(1)

Tá cuspóir leagtha amach ag an Aontas dó féin limistéar saoirse, slándála agus ceartais a chothabháil agus a fhorbairt. Ar mhaithe le limistéar den sórt sin a bhunú de réir a chéile, tá an tAontas chun bearta a ghlacadh a bhaineann leis an gcomhar breithiúnach in ábhair choiriúla bunaithe ar phrionsabal an aitheantais fhrithpháirtigh do bhreithiúnais agus do chinntí breithiúnacha, a dtagraítear dóibh go coitianta mar bhunchloch an chomhair bhreithiúnaigh in ábhair choiriúla laistigh den Aontas ó bhí Comhairle Eorpach Tampere ann an 15 agus 16 Deireadh Fómhair 1999.

(2)

Tá bearta chun fianaise leictreonach a fháil agus a chaomhnú le haghaidh imscrúduithe coiriúla agus ionchúisimh choiriúla ar fud an Aontais ag éirí níos tábhachtaí. Is riachtanach iad sásraí éifeachtacha chun fianaise leictreonach a fháil i dtaca le coiriúlacht a chomhrac, agus ba cheart sásraí den sórt sin a bheith faoi réir coinníollacha agus coimircí lena áirithiú go bhfuil siad ag comhlíonadh cearta bunúsacha agus prionsabail a aithnítear in Airteagal 6 den Chonradh ar an Aontas Eorpach (CAE) agus i gCairt um Chearta Bunúsacha an Aontais Eorpaigh (‘an Chairt’) go hiomlán, go háirithe prionsabail an riachtanais agus na comhréireachta, agus na prionsabail a bhaineann le próiseas cuí, cosaint na príobháideachta agus sonraí pearsanta agus rúndacht na cumarsáide.

(3)

Sa Ráiteas Comhpháirteach ó na hAirí Dlí agus Cirt agus ó na hAirí Gnóthaí Baile agus ó ionadaithe institiúidí an Aontais an 24 Márta 2016 maidir leis na hionsaithe sceimhlitheoireachta sa Bhruiséil leagadh béim ar an ngá a bhí, mar ábhar tosaíochta, le fianaise leictreonach a chaomhnú agus a bhailiú níos gasta agus níos éifeachtaí agus chun bearta nithiúla a shainaithint chuige sin.

(4)

Leagadh béim i gconclúidí na Comhairle an 9 Meitheamh 2016 ar an méadú atá tagtha ar an tábhacht a bhaineann le fianaise leictreonach in imeachtaí coiriúla, agus ar an tábhacht a bhaineann leis an gcibearspás a chosaint ó mhí-úsáid agus ó ghníomhaíochtaí coiriúla ar mhaithe le leas an gheilleagair agus na sochaí agus dá bhrí sin, is gá go mbeadh uirlisí éifeachtacha ag údaráis forfheidhmithe dlí agus ag údaráis bhreithiúnacha chun gníomhartha coiriúla a bhaineann leis an gcibearspás a imscrúdú agus a ionchúiseamh.

(5)

Sa teachtaireacht chomhpháirteach ón gCoimisiún agus ó Ardionadaí an Aontais do Ghnóthaí Eachtracha agus don Bheartas Slándála chuig Parlaimint na hEorpa agus chuig an gComhairle an 13 Meán Fómhair 2017 maidir le hAthléimneacht, Díspreagadh agus Cosaint: Building strong cybersecurity for the EU [Cibearshlándáil láidir a thógáil don Aontas], leag an Coimisiún béim ar imscrúdú agus ionchúiseamh éifeachtach na coireachta cibearchumasaithe mar bhac fíorthábhachtach ar chibear-ionsaithe, agus ar an ngá atá le creat nós imeachta an lae inniu a chur in oiriúint níos fearr do ré an idirlín. Uaireanta, ní féidir leis na nósanna imeachta atá ann faoi láthair luas na gcibearionsaithe a láimhseáil, rud a chruthaíonn riachtanais ar leith le haghaidh comhar gasta thar theorainneacha.

(6)

Sa rún ó Pharlaimint na hEorpa an 3 Deireadh Fómhair 2017 maidir leis an gcomhrac in aghaidh na cibearchoireachta (3), leagadh béim ar an ngá atá le modhanna a aimsiú chun fianaise leictreonach a dhaingniú agus a fháil níos gasta, chomh maith lena thábhachtaí atá dlúthchomhar idir údaráis forfheidhmithe dlí, tríú tíortha agus soláthraithe seirbhíse atá gníomhach ar chríoch na hEorpa, i gcomhréir le Rialachán (AE) 2016/679 ó Pharlaimint na hEorpa agus ón gComhairle (4) agus le Treoir (AE) 2016/680 ó Pharlaimint na hEorpa agus ón gComhairle (5), agus le comhaontuithe um chúnamh dlíthiúil frithpháirteach atá ann cheana. Tugadh chun suntais sa rún sin ó Pharlaimint na hEorpa freisin gur féidir leis an gcreat dlíthiúil ilroinnte atá ann faoi láthair dúshláin a chruthú do sholáthraithe seirbhíse atá ag iarraidh iarrataí ar fhorfheidhmiú an dlí a chomhlíonadh agus iarradh ar an gCoimisiún creat dlíthiúil Aontais a thíolacadh le haghaidh fianaise leictreonach lena ngabhann coimircí leordhóthanacha do chearta agus saoirsí na ndaoine uile lena mbaineann, agus ag an am céanna fáiltíodh roimh obair leanúnach an Choimisiúin ar ardán comhair ina mbeidh cainéal cumarsáide slán le haghaidh malartuithe digiteacha Orduithe Imscrúdaithe Eorpacha (EIOnna) le haghaidh fianaise leictreonach agus freagraí leictreonacha idir údaráis bhreithiúnacha an Aontais.

(7)

Is féidir seirbhísí gréasánbhunaithe a sholáthar ó áit ar bith agus ní gá go mbeadh bonneagar fisiceach, áitribh ná foireann oibre acu sa tír ina dtairgtear an tseirbhís ábhartha. Dá bhrí sin, is minic a dhéantar fianaise leictreonach a stóráil lasmuigh den Stát imscrúdaithe nó le soláthraí seirbhíse lasmuigh den Stát sin, agus is minic a chruthaíonn sé sin dúshláin i ndáil le bailiú fianaise leictreonaí in imeachtaí coiriúla.

(8)

Mar gheall ar an gcaoi ina soláthraítear seirbhísí gréasánbhunaithe, is minic a dhírítear iarrataí maidir le comhar breithiúnach ar Stáit atá ag óstáil líon mór soláthraithe seirbhíse. Ina theannta sin, tá méadú tagtha ar líon na n-iarrataí toisc go bhfuil méadú ag teacht ar an úsáid a bhaintear as seirbhísí gréasánbhunaithe. Le Treoir 2014/41/AE ó Pharlaimint na hEorpa agus ón gComhairle (6), foráiltear maidir leis an bhféidearthacht EIO a eisiúint chun fianaise a bhailiú i mBallstát eile. Ina theannta sin, foráiltear leis an gCoinbhinsiún a bhunaigh an Chomhairle i gcomhréir le hAirteagal 34 den Chonradh ar an Aontas Eorpach, maidir le Cúnamh Frithpháirteach in Ábhair Choiriúla idir Ballstáit an Aontais Eorpaigh (7) (‘an Coinbhinsiún maidir le Cúnamh Frithpháirteach in Ábhair Choiriúla’) go bhféadfaí fianaise a iarraidh ar Bhallstát eile. Mar sin féin, d’fhéadfadh nach mbeadh na nósanna imeachta agus na hamlínte dá bhforáiltear i dTreoir 2014/41/AE lena mbunaítear EIO agus sa Choinbhinsiún maidir le Cúnamh Frithpháirteach in Ábhair Choiriúla, oiriúnach d’fianaise leictreonach, atá níos luainí agus a d’fhéadfaí a scriosadh ar bhealach níos éasca agus níos gasta. Is minic a thógann sé achar fada fianaise leictreonach a fháil nuair a úsáidtear bealaí an chomhair bhreithiúnaigh, agus mar thoradh air sin tarlaíonn nach mbíonn leideanna ar fáil a thuilleadh ina dhiaidh sin. Ina theannta sin, níl aon chreat comhchuibhithe ann don chomhar le soláthraithe seirbhíse, agus glacann soláthraithe áirithe i dtríú tíortha le hiarrataí díreacha i gcomhair sonraí seachas inneachar de réir mar atá ceadaithe ag a ndlí náisiúnta infheidhme. Mar thoradh air sin, bíonn Ballstáit ag brath níos mó agus níos mó ar bhealaí comhair dhírigh dheonaigh le soláthraithe seirbhíse nuair is ann dóibh, agus cuireann siad uirlisí náisiúnta, coinníollacha agus nósanna imeachta éagsúla i bhfeidhm. I gcás sonraí inneachair, tá beart aontaobhach déanta ag cuid de na Ballstáit, ach tá Ballstáit eile ag brath go fóill ar chomhar breithiúnach.

(9)

Cruthaíonn an creat dlíthiúil ilroinnte dúshláin d’údaráis um fhorfheidhmiú an dlí, d’údaráis bhreithiúnacha agus do sholáthraithe seirbhíse atá ag iarraidh iarrataí dlíthiúla ar fhianaise leictreonach a chomhlíonadh, ós minice a bhíonn orthu aghaidh a thabhairt ar éiginnteacht dhlíthiúil agus, b’fhéidir, ar choinbhleachtaí dlí. Dá bhrí sin, is gá foráil a dhéanamh maidir le rialacha sonracha i ndáil le comhar breithiúnach trasteorann chun fianaise leictreonach a chaomhnú agus a tháirgeadh, ar rialacha iad lena dtugtar aghaidh ar chineál sonrach na fianaise leictreonaí. Ba cheart a áireamh sna rialacha sin oibleagáid ar sholáthraithe seirbhíse a chumhdaítear le raon feidhme an Rialacháin seo freagairt go díreach d’iarrataí a thagann ó údaráis i mBallstát eile. Dá bhrí sin, comhlánóidh an Rialachán seo dlí an Aontais atá ann cheana agus soiléireoidh sé na rialacha is infheidhme maidir le húdaráis forfheidhmithe dlí agus údaráis bhreithiúnacha agus maidir le soláthraithe seirbhíse i réimse na fianaise leictreonaí, agus comhlíonadh iomlán na gceart bunúsach á áirithiú ag an am céanna.

(10)

Urramaítear leis an Rialachán seo na cearta bunúsacha agus cloíonn sé leis na prionsabail a aithnítear in Airteagal 6 CAE agus sa Chairt, sa dlí idirnáisiúnta agus i gcomhaontuithe idirnáisiúnta a bhfuil an tAontas ina pháirtí iontu nó a bhfuil na Ballstáit uile ina bpáirtí iontu, lena n-áirítear an Coinbhinsiún Eorpach chun Cearta an Duine agus Saoirsí Bunúsacha a Chosaint, agus i mbunreachtanna na mBallstát, ina réimsí faoi seach dá gcur i bhfeidhm. Áirítear i measc na gceart agus na bprionsabal sin, go háirithe an ceart chun saoirse agus slándála, urraim don saol príobháideach agus do shaol an teaghlaigh, sonraí pearsanta a chosaint, an tsaoirse chun gnó a sheoladh, an ceart chun maoine, an ceart chun leigheas éifeachtach agus triail chóir a fháil, toimhde na neamhchiontachta agus an ceart chun cosaint a fháil, prionsabail na dlíthiúlachta agus na comhréireachta, chomh maith leis an gceart chun nach ndéanfar duine a thriail ná a phionósú faoi dhó in imeachtaí coiriúla i ngeall ar an gcion coiriúil céanna.

(11)

Níor cheart aon ní sa Rialachán seo a léirthuiscint mar thoirmeasc ar dhiúltú Ordú Eorpach chun Fianaise a Thabhairt ar Aird a thabhairt ó údarás forfheidhmithe i gcás ina bhfuil cúiseanna lena chreidiúint, ar bhonn eilimintí oibiachtúla, gur eisíodh an tOrdú Eorpach chun Fianaise a Thabhairt ar Aird ar mhaithe le duine a ionchúiseamh nó a phionósú mar gheall ar inscne, bunadh ciníoch nó eitneach, reiligiún, gnéaschlaonadh, féiniúlacht inscne, náisiúntacht, teanga nó tuairimí polaitiúla an duine sin, nó go bhféadfaí seasamh an duine sin a dhochrú ar aon cheann de na cúiseanna sin.

(12)

Braitheann sásra an Ordaithe Eorpaigh chun Fianaise a Thabhairt ar Aird agus an Ordaithe Caomhnaithe Eorpaigh le haghaidh fianaise leictreonach in imeachtaí coiriúla ar phrionsabal na muiníne frithpháirtí idir na Ballstáit agus ar thoimhde go gcomhlíonann na Ballstáit dlí an Aontais, an smacht reachta agus, go háirithe, cearta bunúsacha, ar gnéithe bunriachtanacha iad de limistéar saoirse, slándála agus ceartais an Aontais. Cuireann sásra den sórt sin ar chumas na n-údarás inniúil náisiúnta orduithe den sórt sin a sheoladh go díreach chuig soláthraithe seirbhíse.

(13)

Is cearta bunúsacha iad urraim don saol príobháideach agus do shaol an teaghlaigh agus daoine nádúrtha a chosaint i ndáil le próiseáil sonraí pearsanta. I gcomhréir le hAirteagal 7 agus Airteagal 8(1) den Chairt, tá sé de cheart ag gach duine go ndéanfar a saol príobháideach agus a saol teaghlaigh, a n-áit chónaithe, agus a gcuid cumarsáide a urramú.

(14)

Agus an Rialachán seo á chur chun feidhme, ba cheart do na Ballstáit a áirithiú go ndéanfar sonraí pearsanta a chosaint agus a phróiseáil i gcomhréir le Rialachán (AE) 2016/679 agus Treoir (AE) 2016/680, agus le Treoir 2002/58/CE ó Pharlaimint na hEorpa agus ón gComhairle (8) lena n-áirítear i gcás úsáid bhreise a bhaint as sonraí a fhaightear, iad a tharchur nó a aistriú ar aghaidh.

(15)

Níor cheart sonraí pearsanta a fhaightear faoin Rialachán seo a phróiseáil ach amháin nuair is gá sin a dhéanamh, agus ar bhealach atá comhréireach le críocha chosc, imscrúdú, bhrath agus ionchúiseamh na coiriúlachta nó ar mhaithe le pionóis choiriúla a fhorfheidhmiú agus cearta cosanta a fheidhmiú. Ba cheart do na Ballstáit a áirithiú, go háirithe, go mbeidh feidhm ag beartais agus bearta iomchuí um chosaint sonraí maidir le tarchur sonraí pearsanta ó údaráis ábhartha chuig soláthraithe seirbhíse chun críocha an Rialacháin seo, lena n-áirítear bearta chun slándáil na sonraí a áirithiú. Ba cheart do sholáthraithe seirbhíse na coimircí céanna a áirithiú i dtaca le sonraí pearsanta a tharchur chuig údaráis ábhartha. Ba cheart gur ag daoine údaraithe agus acu sin amháin a bheadh rochtain ar fhaisnéis ina bhfuil sonraí pearsanta ar féidir í a fháil trí phróisis fíordheimhniúcháin.

(16)

Ba cheart feidhm a bheith ag na cearta nós imeachta a leagtar amach i dTreoracha 2010/64/AE (9), 2012/13/AE (10), 2013/48/AE (11), (AE) 2016/343 (12), (AE) 2016/800 (13) agus (AE) 2016/1919 (14) ó Pharlaimint na hEorpa agus ón gComhairle, laistigh de raon na dTreoracha seo, i ndáil le himeachtaí coiriúla a chumhdaítear leis an Rialachán seo i dtaca leis na Ballstáit atá faoi cheangal ag na Treoracha sin. Ba cheart feidhm a bheith ag na coimircí nós imeachta faoin gCairt freisin.

(17)

Chun a áirithiú go n-urramófar go hiomlán cearta bunúsacha, ba cheart don údarás breithiúnach inniúil luach cruthúnais na fianaise arna bailiú i gcur i bhfeidhm an Rialacháin seo a mheasúnú i dtriail, i gcomhréir leis an dlí náisiúnta agus i gcomhréir leis an gceart chun triail chóir a fháil agus an ceart chun cosanta go háirithe.

(18)

Leagtar síos leis an Rialachán seo na rialacha faoina bhféadfaidh údarás breithiúnach inniúil san Aontas, in imeachtaí coiriúla, lena n-áirítear imscrúduithe coiriúla, nó chun pianbhreith choimeádta nó ordú coinneála a fhorghníomhú tar éis imeachtaí coiriúla i gcomhréir leis an Rialachán seo, ordú a thabhairt do sholáthraí seirbhíse a thairgeann seirbhísí san Aontas fianaise leictreonach a thabhairt ar aird nó a chaomhnú trí Ordú Eorpach chun Fianaise a Thabhairt ar Aird nó trí Ordú Caomhnaithe Eorpach. Ba cheart don Rialachán seo a bheith infheidhme i ngach cás trasteorann ina bhfuil bunaíocht ainmnithe nó ionadaí dlíthiúil ainmnithe ag an soláthraí seirbhíse i mBallstát eile. Tá an Rialachán seo gan dochar do chumhachtaí na n-údarás náisiúnta dul i dteagmháil le soláthraithe seirbhíse atá bunaithe ar a gcríoch nó a bhfuil ionadaíocht á déanamh orthu ar a gcríoch chun gur féidir leo bearta náisiúnta comhchosúla a chomhlíonadh.

(19)

Níor cheart a rialú leis an Rialachán seo ach bailiú sonraí arna stóráil ag soláthraí seirbhíse tráth a fhaightear Ordú Eorpach chun Fianaise a Thabhairt ar Aird nó Ordú Caomhnaithe Eorpach. Níor cheart oibleagáid ghinearálta maidir le coinneáil sonraí a leagan síos do sholáthraithe seirbhíse agus níor cheart é a bheith d’éifeacht aige go ndéanfaí sonraí a choinneáil go ginearálta agus go neamh-idirdhealaitheach. Níor cheart a údarú leis an Rialachán seo ach oiread go ndéanfaí sonraí a idirghabháil ná a fháil ar sonraí iad a stóráiltear tar éis Ordú Eorpach chun Fianaise a Thabhairt ar Aird nó Ordú Caomhnaithe Eorpach a fháil.

(20)

Níor cheart do chur i bhfeidhm an Rialacháin seo difear a dhéanamh don úsáid a bhaineann soláthraithe seirbhíse nó a n-úsáideoirí as criptiú. Ba cheart sonraí atá á n-iarraidh trí bhíthin Ordú Eorpach chun Fianaise a Thabhairt ar Aird nó Ordú Caomhnaithe Eorpach a sholáthar nó a chaomhnú gan beann ar iad a bheith criptithe nó gan a bheith criptithe. Níor cheart, áfach, go leagfaí síos leis an Rialachán seo aon oibleagáid ar sholáthraithe seirbhíse sonraí a dhíchriptiú.

(21)

I mórán cásanna, ní dhéantar sonraí a stóráil ná a phróiseáil ar bhealach eile ar ghléas an úsáideora a thuilleadh, ach cuirtear ar fáil iad ar bhonneagar néalbhunaithe lena gcumasaítear rochtain a bheith orthu ó áit ar bith. Ní gá go mbeadh soláthraithe seirbhíse bunaithe i ndlínse faoi leith ná go mbeadh freastalaithe acu sa dlínse sin chun na seirbhísí sin a reáchtáil. Dá réir sin, níor cheart go mbraithfeadh cur i bhfeidhm an Rialacháin seo ar shuíomh iarbhír bhunaíocht an tsoláthraí seirbhíse ná ar shuíomh na saoráide um próiseáil nó um stóráil sonraí.

(22)

Tá an Rialachán seo gan dochar do chumhachtaí imscrúdaitheacha na n-údarás in imeachtaí sibhialta agus riaracháin, nuair a d’fhéadfadh pionóis a bheith mar thoradh ar imeachtaí den sórt sin san áireamh.

(23)

Ós rud é go bhféadfaí imeachtaí le haghaidh cúnamh dlíthiúil frithpháirteach a bhreithniú mar imeachtaí coiriúla i gcomhréir leis an dlí náisiúnta is infheidhme sna Ballstáit, ba cheart a shoiléiriú nár cheart Ordú Eorpach chun Fianaise a Thabhairt ar Aird nó Ordú Caomhnaithe Eorpach a eisiúint chun cúnamh dlíthiúil frithpháirteach a sholáthar i mBallstát eile ná i dtríú tír. I gcásanna den sórt sin, ba cheart an iarraidh ar chúnamh dlíthiúil frithpháirteach a chur faoi bhráid an Bhallstáit nó an tríú tír a d’fhéadfadh cúnamh dlíthiúil frithpháirteach a sholáthar faoina dhlí náisiúnta.

(24)

Faoi chuimsiú imeachtaí coiriúla, níor cheart an tOrdú Eorpach chun Fianaise a Thabhairt ar Aird agus an tOrdú Caomhnaithe Eorpach a eisiúint ach amháin i gcás imeachtaí coiriúla sonracha a bhaineann le cion coiriúil sonrach atá déanta cheana, tar éis meastóireacht aonair a dhéanamh ar riachtanas agus comhréireacht na n-orduithe sin i ngach cás ar leith, agus cearta an duine atá faoi dhrochamhras nó an duine atá cúisithe á gcur san áireamh.

(25)

Ba cheart feidhm a bheith ag an Rialachán seo freisin maidir le himeachtaí arna dtionscnamh ag údarás eisiúna chun duine ciontaithe a d’éalaigh ón gceartas a aimsiú, chun pianbhreith choimeádta nó ordú coinneála a fhorghníomhú tar éis imeachtaí coiriúla. I gcás inar forchuireadh an phianbhreith choimeádta nó an t-ordú coinneála le cinneadh a tugadh in absentia, áfach, níor cheart go mbeifí in ann Ordú Eorpach chun Fianaise a Thabhairt ar Aird nó Ordú Caomhnaithe Eorpach a eisiúint, toisc go bhfuil éagsúlacht mhór idir dlíthe náisiúnta na mBallstát maidir le cinntí breithiúnacha a thugtar in absentia ar fud an Aontais.

(26)

Ba cheart feidhm a bheith ag an Rialachán seo maidir le soláthraithe seirbhíse a thairgeann seirbhísí san Aontas, agus níor cheart go bhféadfaí na horduithe dá bhforáiltear sa Rialachán seo a eisiúint ach amháin i gcás sonraí a bhaineann le seirbhísí a thairgtear san Aontas. Níor cheart seirbhísí a thairgtear go heisiach taobh amuigh den Aontas a áireamh i raon feidhme an Rialacháin seo, fiú má tá an soláthraí seirbhíse bunaithe san Aontas. Dá bhrí sin, níor cheart go gceadófaí leis an Rialachán seo aon rochtain ar shonraí seachas sonraí a bhaineann leis na seirbhísí a thairgeann na soláthraithe seirbhíse sin don úsáideoir san Aontas.

(27)

Is iad na soláthraithe seirbhíse is ábhartha maidir le fianaise a bhailiú in imeachtaí coiriúla soláthraithe seirbhísí cumarsáide leictreonaí agus soláthraithe sonracha sheirbhísí na sochaí faisnéise lena n-éascaítear idirghníomhaíocht idir úsáideoirí. Dá réir sin, ba cheart go gcumhdófaí an dá ghrúpa leis an Rialachán seo. Déantar seirbhísí cumarsáide leictreonaí a shainmhíniú i dTreoir (AE) 2018/1972 ó Pharlaimint na hEorpa agus ón gComhairle (15) agus áirítear leo seirbhísí cumarsáide idirphearsanta, amhail Prótacal Idirlín Guthaithe, seirbhísí um theachtaireachtaí meandracha agus seirbhísí ríomhphoist. Ba cheart feidhm a bheith ag an Rialachán freisin maidir le soláthraithe seirbhíse eile na sochaí faisnéise de réir bhrí Threoir (AE) 2015/1535 ó Pharlaimint na hEorpa agus ón gComhairle (16) nach gcáilíonn mar sholáthraithe seirbhíse cumarsáide leictreonaí, ach a chuireann ar chumas a n-úsáideoirí cumarsáid a dhéanamh le chéile nó a tháirgeann seirbhísí dá n-úsáideoirí ar féidir úsáid a bhaint astu chun sonraí a phróiseáil nó a stóráil ar a son. Bheadh sé sin i gcomhréir leis na téarmaí a úsáidtear i gCoinbhinsiún Chomhairle na hEorpa maidir le Cibearchoireacht (ETS Uimh 185), arna dhéanamh i mBúdaipeist an 23 Samhain 2001 (‘Coinbhinsiún Bhúdaipeist’). Ba cheart próiseáil sonraí a thuiscint sa chiall theicniúil, is é sin cruthú nó athrú sonraí, is é sin le rá oibríochtaí teicniúla chun sonraí a thabhairt ar aird nó a athrú trí bhíthin cumhacht próiseála ríomhaire. Ba cheart a áireamh ar na catagóirí soláthraithe seirbhíse a chumhdaítear leis an Rialachán seo, mar shampla, margaí ar líne a sholáthraíonn cumas do thomhaltóirí agus do ghnólachtaí cumarsáid a dhéanamh le chéile, agus seirbhísí óstála eile, lena n-áirítear i gcás ina soláthraítear an tseirbhís trí néalríomhaireacht, chomh maith le hardáin chearrbhachais ar líne. I gcás nach gcuireann soláthraí seirbhíse sochaí faisnéise an cumas ar fáil dá úsáideoirí cumarsáid a dhéanamh le chéile ach leis an soláthraí seirbhíse amháin, nó nach soláthraíonn sé an cumas sonraí a stóráil nó a phróiseáil ar bhealach eile, nó i gcás nach comhpháirt shainiúil, is é sin le rá, cuid bhunriachtanach, den tseirbhís a sholáthraítear d’úsáideoirí é sonraí a stóráil, amhail seirbhísí dlí, innealtóireachta ailtireachta agus cuntasaíochta a sholáthraítear go cianda, níor cheart dó teacht faoi raon feidhme an tsainmhínithe ar ‘soláthraí seirbhíse’ a leagtar síos sa Rialachán seo, fiú más seirbhísí de chuid na sochaí faisnéise iad na seirbhísí a sholáthraíonn an soláthraí seirbhíse sin de réir bhrí Threoir (AE) 2015/1535.

(28)

Soláthraithe seirbhísí bonneagair idirlín a bhaineann le hainmneacha agus uimhreacha a shannadh, amhail ainmneacha fearainn clárlann agus cláraitheoirí agus soláthraithe seirbhísí príobháideachta agus seachfhreastalaithe nó clárlanna réigiúnacha idirlín le haghaidh seoltaí prótacail idirlín (IP), tá siad ábhartha go háirithe maidir le sainaithint a dhéanamh ar na gníomhaithe atá taobh thiar de shuíomhanna gréasáin atá mailíseach nó i mbaol. Coinníonn sonraí a d’fhéadfadh a chur ar a gcumas go ndéanfaidís duine aonair nó eintiteas atá taobh thiar de shuíomh gréasáin a úsáidtear i ngníomhaíocht choiriúil a aithint, nó íospartach i ngníomhaíocht choiriúil.

(29)

Chun a chinneadh an bhfuil seirbhísí á dtairiscint ag soláthraí seirbhíse san Aontas ní mór a mheas an gcumasaíonn an soláthraí seirbhíse daoine nádúrtha nó dlítheanacha i gceann amháin nó níos mó de na Ballstáit chun a chuid seirbhísí a úsáid. Mar sin féin, ba cheart a mheas nach leor inrochtaineacht chomhéadain ar líne san Aontas, amhail inrochtaineacht suímh gréasáin nó seoladh ríomhphoist nó sonraí teagmhála eile soláthraí seirbhíse nó idirghabhálaí, arna nglacadh ina n-aonar, chun a chinneadh go dtairgeann soláthraí seirbhíse seirbhísí san Aontas de réir bhrí an Rialacháin seo.

(30)

Ba cheart nasc suntasach leis an Aontas a bheith ábhartha freisin maidir lena chinneadh cibé an dtairgeann soláthraí seirbhíse seirbhísí san Aontas. Ba cheart a mheas gur ann do nasc substaintiúil den sórt sin leis an Aontas nuair atá bunaíocht ag an soláthraí seirbhíse san Aontas. In éagmais bunaíocht den sórt sin, ba cheart an critéar le haghaidh nasc substaintiúil a bhunú ar chritéir shonracha fhíriciúla amhail líon suntasach úsáideoirí i gceann amháin nó níos mó de na Ballstáit, nó ar an mbonn go bhfuil gníomhaíochtaí á ndíriú ar Bhallstát amháin nó níos mó. Ba cheart a chinneadh an bhfuil gníomhaíochtaí á ndíriú ar Bhallstát amháin nó níos mó ar bhonn na gcúinsí ábhartha go léir, lena n-áirítear tosca amhail úsáid teanga nó airgeadra a mbaintear úsáid aisti nó as i gcoitinne sa Bhallstát sin, nó an fhéidearthacht a bhaineann le hearraí nó seirbhísí a ordú. D’fhéadfaí spriocdhíriú gníomhaíochtaí ar Bhallstát a dhíorthú freisin ó fheidhmchlár (‘aip’) a bheith ar fáil san aipmhargadh náisiúnta ábhartha, bíodh sin ina fhógraíocht áitiúil nó fógraíocht a sholáthar sa teanga a úsáidtear i gcoitinne sa Bhallstát sin, nó láimhseáil an chaidrimh le custaiméirí, amhail trí sheirbhís do chustaiméirí a sholáthar sa teanga a úsáidtear i gcoitinne sa Bhallstát sin. Ba cheart a mheas go bhfuil nasc substaintiúil ann freisin i gcás ina ndíríonn soláthraí seirbhíse a chuid gníomhaíochtaí ar Bhallstát amháin nó níos mó mar a leagtar amach i Rialachán (AE) Uimh. 1215/2012 ó Pharlaimint na hEorpa agus ón gComhairle (17). Ar an taobh eile, maidir le seirbhís a sholáthar chun an toirmeasc ar idirdhealú a leagtar síos i Rialachán (AE) 2018/302 ó Pharlaimint na hEorpa agus ón gComhairle (18) a chomhlíonadh, níor cheart a mheas, gan aon fhorais bhreise, go bhfuil an soláthar sin ag díriú nó ag spriocdhíriú gníomhaíochtaí ar chríoch ar leith laistigh den Aontas. Ba cheart feidhm a bheith ag na tosca céanna chun a chinneadh cé acu a thairgeann nó nach dtairgeann soláthraí seirbhíse seirbhísí i mBallstát.

(31)

Ba cheart don Rialachán seo catagóirí sonraí, sonraí suibscríobhaí, sonraí tráchta agus sonraí inneachair a chuimsiú. Tá an catagóiriú sin i gcomhréir le dlí go leor Ballstát agus le dlí an Aontais, amhail Treoir 2002/58/CE agus cásdlí na Cúirte Breithiúnais, chomh maith leis an dlí idirnáisiúnta, go háirithe Coinbhinsiún Bhúdaipeist.

(32)

D’fhéadfadh seoltaí IP agus uimhreacha rochtana agus faisnéis ghaolmhar a bheith ina dtúsphointe ríthábhachtach d’imscrúduithe coiriúla nach eol céannacht duine atá faoi dhrochamhras iontu. Is iondúil go mbíonn siad mar chuid de thaifead imeachtaí, ar a dtugtar loga freastalaí freisin, a léiríonn tús agus deireadh seisiúin rochtana úsáideora ar sheirbhís. Is seoladh IP aonair, bíodh sin ina cheann statach nó ina cheann dinimiciúil, a bhíonn ann go minic nó sin aitheantóir eile a phiocann amach an comhéadan líonra a úsáideadh le linn an tseisiúin rochtana. Tá gá le faisnéis ghaolmhar maidir le tosú agus críochnú seisiúin rochtana úsáideora ar sheirbhís, amhail na poirt fhoinseacha agus stampa ama toisc gur minic a roinntear seoltaí IP i measc úsáideoirí, mar shampla i gcás ina bhfuil aistriúchán ar sheoladh líonra de ghrád iompróra (CGN) nó a choibhéis theicniúil i bhfeidhm. Mar sin féin, i gcomhréir le acquis an Aontais, caithfear a mheas gur sonraí pearsanta iad seoltaí IP agus go gcaithfidh siad tairbhe a bhaint as cosaint iomlán faoi acquis an Aontais maidir le cosaint sonraí. Ina theannta sin, in imthosca áirithe, is féidir a mheas gur sonraí tráchta iad seoltaí IP. Chomh maith leis sin, meastar gur sonraí tráchta i roinnt Ballstát iad uimhreacha rochtana agus faisnéis ghaolmhar. Mar sin féin, chun críche imscrúdú coiriúil ar leith, d’fhéadfadh sé go mbeadh ar údaráis forfheidhmithe dlí seoladh IP a iarraidh chomh maith le huimhreacha rochtana agus faisnéis ghaolmhar chun an t-úsáideoir a shainaithint, agus chun na críche sin amháin, sular féidir sonraí suibscríobhaí a bhaineann leis an aitheantóir sin a iarraidh ar an soláthraí seirbhíse. I gcásanna den sórt sin, is iomchuí an córas céanna agus a chuirtear i bhfeidhm do shonraí suibscríobhaí a chur i bhfeidhm, mar a shainmhínítear sa Rialachán seo.

(33)

I gcás nach n-iarrtar seoltaí IP, uimhreacha rochtana agus faisnéis ghaolmhar chun an t-úsáideoir a shainaithint in imscrúdú coiriúil ar leith, agus chun na críche sin amháin, iarrtar orthu go ginearálta faisnéis níos fearr a fháil a chuireann isteach ar phríobháideachas, amhail teagmhálacha agus cá bhfuil an t-úsáideoir. Dá réir sin, d’fhéadfadh siad próifíl chuimsitheach a bhunú de dhuine aonair lena mbaineann, ach, ag an am céanna, is féidir iad a phróiseáil agus a anailísiú ar bhealach níos éasca ná sonraí inneachair, toisc go gcuirtear i láthair iad i bhformáid struchtúrtha chaighdeánaithe. Tá sé fíor-riachtanach, dá bhrí sin, i gcásanna den sórt sin, go gcaithfear le seoltaí IP, uimhreacha rochtana agus faisnéis ghaolmhar nach n-iarrtar chun an t-úsáideoir a shainaithint in imscrúdú coiriúil sonrach agus chun na críche sin amháin, go gcaithfear leo mar shonraí tráchta agus go n-iarrfar iad faoi gcóras céanna le sonraí inneachair, mar a shainmhínítear sa Rialachán seo.

(34)

Tá sonraí pearsanta sna catagóirí sonraí go léir agus mar sin tá siad cumhdaithe ag na coimircí faoi acquis cosanta sonraí an Aontais. Mar sin féin, ní hionann déine an tionchair ar chearta bunúsacha idir na catagóirí, go háirithe idir sonraí suibscríobhaí agus sonraí a iarrtar chun an t-úsáideoir a shainaithint mar a shainmhínítear sa Rialachán seo é, agus chun na críche sin amháin, ar thaobh amháin, agus sonraí tráchta, cé is moite de shonraí a iarrtar chun an t-úsáideoir a shainaithint mar a shainmhínítear sa Rialachán seo, agus chun na críche sin amháin, agus sonraí inneachair ar an taobh eile. Cé go bhféadfadh sonraí suibscríobhaí chomh maith le seoltaí IP, uimhreacha rochtana agus faisnéis ghaolmhar, i gcás ina n-iarrtar iad chun an t-úsáideoir a shainaithint agus chun na críche sin amháin, a bheith úsáideach chun torthaí tosaigh a fháil in imscrúdú faoi chéannacht duine atá faoi dhrochamhras, is minic a bhíonn sonraí tráchta, cé is moite de shonraí a iarrtar chun an t-úsáideoir a shainaithint mar a shainmhínítear sa Rialachán seo agus chun na críche sin amháin, agus sonraí inneachair níos ábhartha mar ábhar cruthúnais. Dá bhrí sin, is den bhunriachtanas é go gcumhdófaí na catagóirí sonraí sin go léir leis an Rialachán seo. Toisc nach ionann an méid a chuirtear isteach ar chearta bunúsacha sna cásanna iomchuí, ba cheart coimircí agus coinníollacha difriúla a fhorchur maidir le sonraí den sórt sin a fháil.

(35)

Maidir le cásanna ina bhfuil garbhaol ann do bheatha, do shláine coirp nó do shábháilteacht duine, ba cheart déileáil leo mar chásanna éigeandála agus ba cheart teorainneacha ama níos giorra a cheadú ar an soláthraí seirbhíse agus ar an údarás forfheidhmiúcháin. I gcás ina bhfágfadh briseadh nó scriosadh bonneagair chriticiúil mar a shainmhínítear i dTreoir 2008/114/CE ón gComhairle (19) go mbeadh bagairt den sórt sin ann, lena n-áirítear trí dhochar tromchúiseach a dhéanamh do sholáthar soláthairtí bunúsacha don daonra nó d’fheidhmiú phríomhfheidhmeanna an Stáit, ba cheart caitheamh leis an gcás sin freisin mar chás éigeandála, i gcomhréir le dlí an Aontais.

(36)

Nuair a eisítear Ordú Eorpach chun Fianaise a Thabhairt ar Aird nó Ordú Caomhnaithe Eorpach, ba cheart go mbeadh údarás breithiúnach páirteach i gcónaí sa phróiseas a bhaineann le heisiúint an ordaithe nó sa phróiseas a bhaineann lena bhailíochtú. I bhfianaise go mbíonn sonraí tráchta cé is moite de shonraí a iarrtar chun an t-úsáideoir mar a shainmhínítear sa Rialachán seo a shainaithint, agus chun na críche sin amháin, agus sonraí inneachair níos íogaire, chun Ordú Eorpach chun Fianaise a Thabhairt ar Aird a eisiúint nó a bhailíochtú chun na catagóirí sonraí sin a fháil, ní mór do bhreitheamh athbhreithniú a dhéanamh. Ós rud é nach bhfuil sonraí suibscríobhaí agus sonraí a iarrtar chun an t-úsáideoir mar a shainmhínítear sa Rialachán seo a shainaithint chomh híogair céanna, féadfaidh ionchúisitheoir poiblí inniúil Ordú Eorpach chun sonraí den sórt sin a fháil a eisiúint nó a bhailíochtú freisin. I gcomhréir leis an gceart chun triail chóir a fháil, mar atá cosanta ag an gCairt agus ag an gCoinbhinsiún Eorpach chun Cearta an Duine agus Saoirsí Bunúsacha a Chosaint, tá ar ionchúisitheoirí poiblí a bhfreagrachtaí a fheidhmiú go hoibiachtúil, agus cinneadh á dhéanamh acu maidir le Ordú Eorpach chun Fianaise a Thabhairt ar Aird nó Ordú Caomhnaithe Eorpach a eisiúint nó a bhailíochtú ar bhonn na ngnéithe fíorasacha sa cháschomhad agus ar an mbonn sin amháin, agus an fhianaise inchoiritheach agus dhíchoiritheach uile á cur san áireamh.

(37)

Chun cosaint iomlán na gceart bunúsach a áirithiú, ba cheart aon bhailíochtú ó na húdaráis eisiúna ar Orduithe Eorpacha chun Fianaise a Thabhairt ar Aird agus Ordaithe Caomhnaithe a fháil i bprionsabal sula n-eiseofar an t-ordú. Níor cheart eisceachtaí a dhéanamh ar an bprionsabal sin ach amháin i gcásanna éigeandála arna mbunú go bailí nuair a iarrtar sonraí suibscríobhaí nó sonraí arna n-iarraidh chun an t-úsáideoir mar a shainítear sa Rialachán seo é a shainaithint, agus chun na críche sin amháin, nó chun sonraí a chaomhnú, i gcás nach féidir réamhbhailíochtú a fháil ón údarás breithiúnach in am, go háirithe toisc nach féidir teacht ar an údarás bailíochtaithe chun bailíochtú a fháil agus go bhfuil an bhagairt ar tí tarlú agus go gcaithfear beart a dhéanamh láithreach dá bharr. Níor cheart eisceachtaí den sórt sin a dhéanamh, áfach, ach amháin i gcás ina bhféadfadh an t-údarás a eisíonn an t-ordú lena mbaineann ordú a eisiúint i gcás náisiúnta comhchosúil faoin dlí náisiúnta gan bailíochtú roimh ré.

(38)

Níor cheart Ordú Eorpach chun Fianaise a Thabhairt ar Aird a eisiúint ach amháin i gcás ina bhfuil sin riachtanach, comhréireach, leordhóthanach agus infheidhme maidir leis an gcás atá idir lámha. Ba cheart don údarás eisiúna cearta an duine atá faoi dhrochamhras nó an duine atá cúisithe a chur san áireamh in imeachtaí a bhaineann le cion coiriúil agus níor cheart dó Ordú Eorpach chun Fianaise a Thabhairt ar Aird a eisiúint ach amháin más rud é go bhféadfaí an t-ordú sin a eisiúint faoi na coinníollacha céanna i gcás náisiúnta comhchosúil. Agus é á mheas cibé acu Ordú Eorpach chun Fianaise a Thabhairt ar Aird a eisiúint nó gan é a eisiúint, ba cheart a chur san áireamh an bhfuil ordú den sórt sin teoranta don mhéid atá fíor-riachtanach chun an aidhm dhlisteanach a bhaint amach maidir le sonraí a fháil atá ábhartha agus riachtanach mar fhianaise i gcás aonair.

(39)

I gcásanna ina n-eisítear Ordú Eorpach chun Fianaise a Thabhairt ar Aird chun catagóirí éagsúla sonraí a fháil, ba cheart don údarás eisiúna a áirithiú go gcomhlíontar na coinníollacha agus na nósanna imeachta, amhail fógra a thabhairt don údarás forfheidhmiúcháin, maidir le gach ceann de na catagóirí sonraí sin faoi seach.

(40)

I bhfianaise gur de chineál níos íogaire iad sonraí tráchta, cé is moite de shonraí a iarrtar chun an t-úsáideoir mar a shainmhínítear sa Rialachán seo a shainaithint, agus chun na críche sin amháin, agus sonraí inneachair, ba cheart idirdhealú a dhéanamh maidir le raon feidhme ábhartha an Rialacháin seo. Ba cheart go mbeadh sé indéanta Ordú Eorpach chun Fianaise a Thabhairt ar Aird a eisiúint chun sonraí suibscríobhaí a fháil nó chun sonraí a fháil a iarrtar chun an t-úsáideoir a shainaithint, mar a shainmhínítear sa Rialachán seo, agus chun na críche sin amháin, i gcás aon chion coiriúil; de bhrí gur cheart go mbeadh Ordú Eorpach chun Fianaise a Thabhairt ar Aird chun sonraí tráchta a fháil, seachas sonraí a iarrtar chun an t-úsáideoir mar a shainmhínítear sa Rialachán seo é a shainaithint, agus chun na críche sin amháin, nó chun sonraí inneachair a fháil, faoi réir ceanglas atá níos déine chun cineál níos íogaire na sonraí sin a léiriú. Ba cheart foráil a dhéanamh sa Rialachán seo maidir le tairseach i ndáil lena raon feidhme, lena gceadófaí cur chuige comhréireach, mar aon le roinnt coinníollacha agus coimircí ex ante agus ex post eile chun a áirithiú go n-urramófar an chomhréireacht agus cearta na ndaoine lena mbaineann. Ag an am céanna, níor cheart go gcuirfeadh tairseach den sórt sin teorainn le héifeachtacht an Rialacháin seo agus lena úsáid ag cleachtóirí. Má cheadaítear Orduithe Eorpacha chun Fianaise a Thabhairt ar Aird a eisiúint in imeachtaí coiriúla maidir le cionta a bhfuil pianbhreith choimeádta uasta 3 bliana ar a laghad ag gabháil leo amháin, déanfar raon feidhme an Rialacháin seo a theorannú do chionta níos tromchúisí, gan difear iomarcach a dhéanamh do na féidearthachtaí a bhaineann lena úsáid ag cleachtóirí. D’eisiafadh an teorannú sin ó raon feidhme an Rialacháin seo líon suntasach cionta a mheasann na Ballstáit nach bhfuil chomh tromchúiseach céanna a eisiamh óna raon feidhme, mar a léirítear i bpionós uasta níos ísle. Beidh sé de bhuntáiste ag an teorannú sin freisin go mbeidh sé infheidhme go héasca go hiarbhír.

(41)

Tá cionta faoi leith ann agus de ghnáth is i bhfoirm leictreonach amháin a bheidh an fhianaise ar fáil ina leith, ar fianaise í atá an-ghearrshaolach de réir cineáil. Is amhlaidh atá i gcás cionta cibearbhainteacha, fiú na cionta nach bhféadfaí a mheas gur cionta tromchúiseacha iontu féin iad ach a d’fhéadfadh damáiste forleathan nó mór a dhéanamh, go háirithe cionta a bhfuil tionchar íseal acu ar bhonn aonair ach a bhfuil a líon ard agus a dhéanann damáiste ar bhonn foriomlán. I bhformhór na gcásanna ina ndearnadh an cion trí chóras faisnéise, dá gcuirfí an tairseach chéanna i bhfeidhm agus a chuirtear i bhfeidhm maidir le cineálacha eile cionta, ní bheadh aon bhaol pionóis ag baint leo den chuid is mó. Leis sin, tugtar údar le cur i bhfeidhm an Rialacháin seo maidir le cionta den sórt sin freisin i gcás ina ngabhann pianbhreith choimeádta uasta níos lú ná 3 bliana leo. Maidir le cionta breise a bhaineann leis an sceimhlitheoireacht de réir bhrí Threoir (AE) 2017/541 ó Pharlaimint na hEorpa agus ón gComhairle (20) chomh maith le cionta a bhaineann le mí-úsáid ghnéasach agus teacht i dtír gnéasach ar leanaí de réir bhrí Threoir 2011/93/AE ó Pharlaimint na hEorpa agus ón gComhairle (21), níor cheart an tairseach íosta d’uasphianbhreith choimeádta 3 bliana a cheangal orthu.

(42)

Mar phrionsabal, ba cheart Ordú Eorpach chun Fianaise a Thabhairt ar Aird a chur chuig an soláthraí seirbhíse, ag gníomhú dó mar rialaitheoir. Mar sin féin, in imthosca áirithe, is féidir leis a bheith an-dúshlánach a chinneadh cibé an bhfuil ról an rialaitheora nó ról an phróiseálaí ag soláthraí seirbhíse, go háirithe i gcás ina bhfuil roinnt soláthraithe seirbhíse rannpháirteach i bpróiseáil sonraí nó i gcás ina ndéanann soláthraithe seirbhíse na sonraí a phróiseáil thar ceann duine nádúrtha. Chun idirdhealú a dhéanamh idir róil an rialaitheora agus ról an phróiseálaí maidir le tacar áirithe sonraí, ní hamháin go bhfuil gá le heolas speisialaithe ar an gcomhthéacs dlíthiúil, ach d’fhéadfadh go mbeadh gá freisin le léiriú ar chreataí conarthacha atá an-chasta go minic lena bhforáiltear i gcás sonrach maidir le cúraimí agus róil éagsúla a leithdháileadh ar sholáthraithe seirbhíse éagsúla maidir le tacar áirithe sonraí. I gcás ina ndéanann soláthraithe seirbhíse sonraí a phróiseáil thar ceann duine nádúrtha, d’fhéadfadh sé a bheith deacair i gcásanna áirithe a chinneadh cé hé an rialaitheoir, fiú i gcás nach bhfuil ach soláthraí seirbhíse amháin i gceist. I gcás ina ndéanann soláthraí seirbhíse na sonraí lena mbaineann a stóráil nó a phróiseáil ar bhealach eile agus nach bhfuil aon soiléireacht ann maidir le cé hé an rialaitheoir, in ainneoin iarrachtaí réasúnacha ó thaobh an údaráis eisiúna de, ba cheart go bhféadfaí, dá bhrí sin, Ordú Eorpach chun Fianaise a Thabhairt ar Aird a chur go díreach chuig an soláthraí seirbhíse sin. Thairis sin, i gcásanna áirithe, d’fhéadfadh sé dochar a dhéanamh don imscrúdú sa chás lena mbaineann dá gcuirfí an t-ordú díreach chuig an rialaitheoir, mar shampla toisc go bhfuil amhras faoin rialaitheoir nó toisc go bhfuil duine cúisithe nó ciontaithe ann nó go bhfuil comharthaí ann go bhféadfadh an rialaitheoir a bheith ag gníomhú chun leasa an duine is ábhar don imscrúdú. Sna cásanna sin freisin, ba cheart é a bheith indéanta Ordú Eorpach chun Fianaise a Thabhairt ar Aird a chur go díreach chuig an soláthraí seirbhíse a phróiseálann na sonraí thar ceann an rialaitheora. Níor cheart dó sin cur isteach ar an gceart atá ag an údarás eisiúna chun ordú a thabhairt don soláthraí seirbhíse na sonraí a chaomhnú.

(43)

I gcomhréir le Rialachán (AE) 2016/679, ba cheart don phróiseálaí a stórálann nó a phróiseálann na sonraí thar ceann an rialaitheora an rialaitheoir a chur ar an eolas faoi shonraí a thabhairt ar aird ach amháin má tá iarrtha ag an údarás eisiúna ar an soláthraí seirbhíse staonadh ón rialaitheoir a chur ar an eolas, chomh fada agus is gá agus is comhréireach, ionas nach gcuirfear bac ar na himeachtaí coiriúla ábhartha. Sa chás sin, ba cheart don údarás eisiúna na cúiseanna leis an moill maidir leis an rialaitheoir a chur ar an eolas a chur in iúl sa chás sin agus ba cheart freisin réasúnú gearr a chur leis an deimhniú a ghabhann leis a tarchuireadh chuig an seolaí.

(44)

I gcás ina ndéantar na sonraí a stóráil nó a phróiseáil ar bhealach eile mar chuid de bhonneagar arna sholáthar ag soláthraí seirbhíse d’údarás poiblí, níor cheart go bhféadfaí Ordú Eorpach chun Fianaise a Thabhairt ar Aird nó Ordú Caomhnaithe Eorpach a eisiúint ach amháin i gcás ina bhfuil an t-údarás poiblí dá bhfuil na sonraí á stóráil nó á bpróiseáil ar bhealach eile lonnaithe sa Stát eisiúna.

(45)

I gcásanna ina ndéanann soláthraí seirbhíse na sonraí atá faoi chosaint phribhléid ghairimiúil faoi dhlí an Stáit eisiúna a stóráil nó a phróiseáil ar bhealach eile mar chuid de bhonneagar arna sholáthar do ghairmithe atá cumhdaithe ag pribhléid ghairmiúil (‘gairmí faoi phribhléid ghairmiúil’), ina gcáil ghnó, níor cheart go bhféadfaí Ordú Eorpach chun Fianaise a Thabhairt ar Aird a eisiúint ach amháin chun sonraí tráchta a fháil, seachas sonraí a iarrtar chun an t-úsáideoir mar a shainmhínítear sa Rialachán seo é a shainaithint, agus chun na críche sin amháin, nó chun sonraí inneachair a fháil i gcás ina bhfuil cónaí ar an ngairmí faoi phribhléid sa Stát eisiúna, i gcás ina bhféadfadh go ndéanfaí dochar don imscrúdú dá gcuirfí an t-ordú díreach chuig an ngairmí faoi phribhléid, nó i gcás inar tarscaoileadh na pribhléidí i gcomhréir leis an dlí is infheidhme.

(46)

Is prionsabal bunúsach dlí san Aontas é an prionsabal ne bis in idem, arna aithint leis an gCairt agus arna fhorbairt ag cásdlí Chúirt Bhreithiúnais an Aontais Eorpaigh. Má tá forais ag an údarás eisiúna a chreidiúint go bhféadfadh imeachtaí coiriúla comhuaineacha a bheith ar siúl i mBallstát eile, rachaidh sé i gcomhairle le húdaráis an Bhallstáit sin i gcomhréir le Cinneadh Réime 2009/948/CGB ón gComhairle (22). I gcás ar bith, níl Ordú Eorpach chun Fianaise a Thabhairt ar Aird ná Ordú Caomhnaithe Eorpach le heisiúint, i gcás ina bhfuil forais ag an údarás eisiúna a chreidiúint go mbeadh sé sin contrártha don phrionsabal ne bis in idem.

(47)

Maidir le díolúintí agus pribhléidí, a d’fhéadfadh tagairt a dhéanamh do chatagóirí daoine, amhail taidhleoirí, nó caidrimh atá faoi chosaint shonrach, amhail pribhléid ghairmiúil dlíodóra nó ceart iriseoirí gan a bhfoinsí faisnéise a nochtadh, déantar tagairt dóibh in ionstraimí aitheantais fhrithpháirtigh eile amhail i dTreoir 2014/41/AE lena mbunaítear anEIO. Tá difríocht idir raon agus tionchar na ndíolúintí agus na bpribhléidí de réir an dlí náisiúnta is infheidhme ar cheart a chur san áireamh tráth a eisítear Ordú Eorpach chun Fianaise a Thabhairt ar Aird nó Ordú Caomhnaithe Eorpach, ós rud é nár cheart go mbeadh an t-údarás eisiúna in ann an t-ordú a eisiúint ach amháin i gcás ina bhféadfaí é a eisiúint faoi na coinníollacha céanna i gcás náisiúnta comhchosúil. Níl sainmhíniú comhchoiteann ann ar cad is díolúine nó pribhléid ann i ndlí an Aontais. Dá bhrí sin, fágtar faoin dlí náisiúnta é sainmhíniú beacht a thabhairt ar na téarmaí sin, agus is féidir cosaintí a áireamh sa sainmhíniú a bhfuil feidhm acu, mar shampla, maidir le gairmeacha leighis agus dlí, lena n-áirítear nuair a úsáidtear ardáin speisialaithe sna gairmeacha sin. Is féidir rialacha maidir le cinneadh agus teorannú dliteanais choiriúil a bhaineann le saoirse an phreasa agus leis an tsaoirse chun tuairimí a nochtadh i meáin eile a áireamh sa sainmhíniú beacht ar dhíolúintí agus ar phribhléidí.

(48)

I gcás ina bhféachann an t-údarás eisiúna le sonraí tráchta a fháil, cé is moite de shonraí a iarrtar chun an t-úsáideoir mar a shainmhínítear sa Rialachán seo é a shainaithint, agus chun na críche sin amháin, nó chun sonraí inneachair a fháil, trí Ordú Eorpach chun Fianaise a Thabhairt ar Aird a eisiúint agus má tá forais réasúnacha aige lena chreidiúint go bhfuil na sonraí a iarrtar faoi chosaint díolúintí nó pribhléidí arna ndeonú faoi dhlí an Stáit forfheidhmiúcháin, nó go bhfuil na sonraí sin sa Stát sin faoi réir rialacha maidir le dliteanas coiriúil a chinneadh agus a theorannú a bhaineann le saoirse an phreasa agus leis an tsaoirse chun tuairimí a nochtadh i meáin eile, ba cheart go mbeadh an t-údarás eisiúna in ann soiléiriú a lorg sula n-eiseofar an tOrdú Eorpach chun Fianaise a Thabhairt ar Aird, lena n-áirítear trí dhul i gcomhairle le húdaráis inniúla an Stáit forfheidhmiúcháin, cibé acu go díreach nó trí Eurojust nó tríd an nGréasán Breithiúnach Eorpach.

(49)

Ba cheart go bhféadfaí Ordú Caomhnaithe Eorpach a eisiúint maidir le haon chion coiriúil. Ba cheart don údarás eisiúna cearta an duine atá faoi dhrochamhras nó an duine atá cúisithe a chur san áireamh in imeachtaí a bhaineann le cion coiriúil agus níor cheart dó Ordú Caomhnaithe Eorpach a eisiúint ach amháin más rud é go bhféadfaí an t-ordú sin a eisiúint faoi na coinníollacha céanna i gcás náisiúnta comhchosúil agus i gcás ina bhfuil sé riachtanach, comhréireach, leordhóthanach agus infheidhme maidir leis an gcás atá idir lámha. Agus measúnú á dhéanamh maidir le cibé acu Ordú Caomhnaithe Eorpach a eisiúint nó gan é a eisiúint, ba cheart a chur san áireamh an bhfuil ordú den sórt sin teoranta don mhéid atá fíor-riachtanach chun an aidhm dhlisteanach a bhaint amach, eadhon cosc a chur ar shonraí a bhaint, a scriosadh nó a athrú, ar sonraí iad atá ábhartha agus riachtanach mar fhianaise i gcás aonair i gcásanna ina bhféadfadh sé níos mó ama a thógáil chun na sonraí sin a thabhairt ar aird.

(50)

Ba cheart Orduithe Eorpacha chun Fianaise a Thabhairt ar Aird agus Orduithe Caomhnaithe Eorpacha a chur go díreach chuig an mbunaíocht ainmnithe nó chuig an ionadaí dlíthiúil arna ainmniú ag an soláthraí seirbhíse de bhun Threoir (AE) 2023/1544 ó Pharlaimint na hEorpa agus ón gComhairle (23). Go heisceachtúil, i gcásanna éigeandála mar a shainmhínítear sa Rialachán seo, i gcás nach bhfreagraíonn bunaíocht ainmnithe nó ionadaí dlíthiúil soláthraí seirbhíse don Deimhniú um Ordú Eorpach chun Fianaise a Thabhairt ar Aird (EPOC) a ghabhann leis nó don Deimhniú um Ordú Caomhnaithe Eorpach (EPOC-PR) a ghabhann leis laistigh de na sprioc-amanna nó nár ainmníodh nó nár ceapadh é laistigh de na sprioc-amanna a leagtar amach i dTreoir (AE) 2023/1544 ba cheart go bhféadfaí an EPOC nó an EPOC-PR a chur chuig aon bhunaíocht nó ionadaí dlíthiúil eile de chuid an tsoláthraí seirbhíse san Aontas in éineacht le forfheidhmiú an ordaithe tosaigh i gcomhréir leis an Rialachán seo nó ina ionad sin. I bhfianaise na gcásanna féideartha éagsúla seo, úsáidtear an téarma ginearálta ‘seolaí’ i bhforálacha an Rialacháin seo.

(51)

I bhfianaise gur de chineál níos íogaire é Ordú Eorpach chun Fianaise a Thabhairt ar Aird chun sonraí tráchta a fháil, seachas sonraí a iarrtar chun an t-úsáideoir mar a shainmhínítear sa Rialachán seo é a shainaithint, agus chun na críche sin amháin, nó chun sonraí inneachair a fháil, is iomchuí foráil a dhéanamh maidir le sásra fógartha is infheidhme maidir le hOrduithe Eorpacha chun Fianaise a Thabhairt ar Aird chun na catagóirí sonraí sin a fháil. Ba cheart údarás forfheidhmiúcháin a bheith i gceist leis an sásra fógartha sin agus ba cheart an t-ordú (EPOC) a chur chuig an údarás sin an tráth céanna a chuirtear é chuig an seolaí. I gcás ina n-eisítear Ordú Eorpach chun Fianaise a Thabhairt ar Aird, áfach, chun fianaise leictreonach a fháil in imeachtaí coiriúla a bhfuil naisc shubstaintiúla láidre aige leis an Stát eisiúna, níor cheart go mbeadh gá le fógra a thabhairt don údarás forfheidhmiúcháin. Ba cheart glacadh leis na naisc sin más rud é, tráth eisiúna an Ordaithe Eorpaigh chun Fianaise a Thabhairt ar Aird, go bhfuil forais réasúnta ag an údarás eisiúna a chreidiúint go ndearnadh an cion, go bhfuil sé á dhéanamh nó gur dócha go ndéanfar é sa Stát eisiúna, agus i gcás ina bhfuil cónaí ar an duine a bhfuil a chuid sonraí á n-iarraidh sa Stát eisiúna.

(52)

Chun críocha an Rialacháin seo, ba cheart a mheas go ndearnadh cion sa Stát eisiúna, go bhfuil cion á dhéanamh sa Stát eisiúna nó gur dócha go ndéanfar é sa Stát eisiúna má mheastar amhlaidh i gcomhréir le dlí náisiúnta an Stáit eisiúna. I gcásanna áirithe, go háirithe i réimse na cibearchoireachta, is iondúil go mbíonn roinnt gnéithe fíorasacha, amhail áit chónaithe an íospartaigh, tábhachtach le breithniú agus cinneadh á dhéanamh faoin áit ina ndearnadh an cion. Mar shampla, is minic a mheastar coireanna bogearraí éirice a bheith déanta san áit ina bhfuil cónaí ar íospartach na coire sin, fiú nuair nach eol go cinnte suíomh beacht na háite ónar seoladh na bogearraí éirice. Ba cheart aon chinneadh maidir leis an áit ina ndearnadh an cion a bheith gan dochar do na rialacha maidir le dlínse ar na cionta ábhartha de bhun an dlí náisiúnta is infheidhme.

(53)

Is faoin údarás eisiúna atá sé a mheas, tráth eisiúna an Ordaithe Eorpaigh chun Fianaise a Thabhairt ar Aird chun sonraí tráchta a fháil, seachas i gcás sonraí a iarrtar chun an t-úsáideoir mar a shainmhínítear sa Rialachán seo é a shainaithint, agus chun na críche sin amháin, nó chun sonraí inneachair a fháil, agus ar bhonn an ábhair os a chomhair, an bhfuil forais réasúnacha ann lena chreidiúint go bhfuil cónaí sa Stát eisiúna ar an duine a bhfuil a chuid sonraí á n-iarraidh. I ndáil leis sin, d’fhéadfadh imthosca oibiachtúla éagsúla, a d’fhéadfadh a léiriú gur bhunaigh an duine lena mbaineann lárionad a leasanna i mBallstát ar leith nó a bhfuil sé ar intinn aige déanamh amhlaidh, a bheith ábhartha. Eascraíonn sé as an ngá atá le dlí an Aontais agus a chur i bhfeidhm go haonfhoirmeach agus as prionsabal an chomhionannais gur cheart léirmhíniú aonfhoirmeach a thabhairt ar an gcoincheap ‘cónaí’ sa chomhthéacs áirithe sin ar fud an Aontais. D’fhéadfadh forais réasúnacha a bheith ann lena chreidiúint go bhfuil cónaí ar dhuine i Stát eisiúna, go háirithe i gcás ina bhfuil duine cláraithe mar chónaitheoir i Stát eisiúna, mar a léirítear le cárta aitheantais a bheith ag duine nó le cead cónaithe nó trína bheith cláraithe i gclár cónaithe oifigiúil. In éagmais clárúcháin sa Stát eisiúna, d’fhéadfaí áit chónaithe a thaispeáint trí léiriú a bheith tugtha ag duine go bhfuil rún aige cur faoi sa Bhallstát sin nó go bhfuil naisc áirithe aige, tar éis tréimhse sheasta láithreachta sa Bhallstát sin, leis an Stát sin atá ar comhchéim leis na naisc sin a d’eascair as cónaí foirmiúil a bhunú sa Bhallstát sin. Chun a chinneadh an bhfuil naisc leordhóthanacha idir an duine lena mbaineann agus an Stát eisiúna, i gcás ar leith, as a n-eascraíonn forais réasúnacha lena chreidiúint go bhfuil cónaí ar an duine lena mbaineann sa Stát sin, d’fhéadfaí tosca oibiachtúla éagsúla a chur san áireamh arb iad is príomhthréithe de staid an duine sin, lena n-áirítear, go háirithe, fad, cineál agus coinníollacha láithreachta an duine sa Stát eisiúna nó na naisc theaghlaigh nó na naisc eacnamaíocha atá ag an duine sin leis an mBallstát sin. D’fhéadfadh feithicil chláraithe, cuntas bainc, an fíoras gur fhan an duine sa Stát eisiúna gan bhriseadh nó tosca oibiachtúla eile a bheith ábhartha chun a chinneadh go bhfuil forais réasúnacha ann lena chreidiúint go bhfuil cónaí ar an duine lena mbaineann sa Stát eisiúna. Ní mheasfar gur leor cuairt ghearr, fanacht saoire, lena n-áirítear i dteach saoire, nó fanacht dá shamhail sa Stát eisiúna gan aon nasc substaintiúil breise chun cónaí a bhunú sa Bhallstát sin. I gcásanna nach bhfuil forais réasúnacha ag an údarás eisiúna chun a chreidiúint go bhfuil cónaí ar an duine a bhfuil a chuid sonraí á lorg sa Stát eisiúna, tráth eisiúna an Ordaithe Eorpaigh chun sonraí tráchta a fháil, seachas sonraí a iarrtar chun an t-úsáideoir mar a shainmhínítear an Rialachán seo é a shainaithint, agus chun na críche sin amháin, nó chun sonraí inneachair a fháil, ba cheart don údarás eisiúna fógra a thabhairt don údarás forfheidhmiúcháin.

(54)

Chun foráil a dhéanamh maidir le nós imeachta mear, ba cheart gurbh é an t-am a eisítear an tOrdú Eorpach chun Fianaise a Thabhairt ar Aird an t-am ábhartha chun a chinneadh an gá fógra a thabhairt don údarás forfheidhmiúcháin. Níor cheart tionchar ar an nós imeachta a bheith ag aon athrú eile ar an áit chónaithe ina dhiaidh sin. Ba cheart go mbeadh na daoine lena mbaineann in ann a gcearta a agairt chomh maith leis na rialacha maidir le cinneadh agus teorannú dliteanais choiriúil a bhaineann le saoirse an phreasa agus leis an tsaoirse chun tuairimí a nochtadh i meáin eile, le linn na n-imeachtaí coiriúla ar fad, agus ba cheart go mbeadh an t-údarás forfheidhmiúcháin in ann foras diúltaithe a ardú i gcásanna eisceachtúla, i gcás ina bhfuil forais shubstaintiúla ann lena chreidiúint, ar bhonn fianaise shonrach agus oibiachtúil, go mbeadh sárú follasach ar cheart bunúsach ábhartha mar a leagtar amach in Airteagal 6 CAE agus sa Chairt i gceist le forghníomhú an ordaithe in imthosca sonracha an cháis. Ina theannta sin, ba cheart go bhféadfaí na forais sin a agairt le linn an nós imeachta um fhorfheidhmiú.

(55)

Ba cheart Ordú Eorpach chun Fianaise a Thabhairt ar Aird a tharchur trí EPOC, agus ba cheart Ordú Caomhnaithe Eorpach a tharchur trí EPOC-PR. Nuair is gá sin, ba cheart an EPOC nó an EPOC-PR a aistriú chuig teanga oifigiúil de chuid an Aontais a bhfuil glacadh ag an seolaí léi. I gcás nár shonraigh an soláthraí seirbhíse aon teanga, ba cheart an EPOC nó an EPOC-PR a aistriú go teanga oifigiúil de chuid an Bhallstáit ina bhfuil an bhunaíocht ainmnithe nó ionadaí dlíthiúil an tsoláthraí seirbhíse lonnaithe, nó go teanga oifigiúil eile ar dhearbhaigh an bhunaíocht ainmnithe nó ionadaí dlíthiúil an tsoláthraí seirbhíse go nglacfaidh sí nó sé léi. I gcás ina gceanglaítear fógra a thabhairt don údarás forfheidhmiúcháin de bhun an Rialacháin seo, ba cheart an EPOC atá le tarchur chuig an údarás sin a aistriú go teanga oifigiúil de chuid an Stáit forfheidhmiúcháin nó go teanga oifigiúil eile de chuid an Aontais lena nglacann an Stát sin. I ndáil leis sin, ba cheart a mholadh do gach Ballstát a shonrú, tráth ar bith, i ndearbhú i scríbhinn arna chur faoi bhráid an Choimisiúin, más rud é go nglacfadh siad le haistriúcháin EPOCanna agus EPOC-PRanna, agus an teanga oifigiúil nó teangacha oifigiúla de chuid an Aontais ina theannta sin, sa bhreis ar theanga oifigiúil nó ar theangacha oifigiúla an Bhallstáit sin. Ba cheart don Choimisiún na dearbhuithe sin a chur ar fáil do na Ballstáit uile agus don Ghréasán Breithiúnach Eorpach.

(56)

I gcás inar eisíodh EPOC agus nach gceanglaítear fógra a thabhairt don údarás forfheidhmiúcháin faoin Rialachán seo, ba cheart don seolaí a áirithiú, ar an EPOC a fháil, go ndéanfar na sonraí a iarrtar a tharchur go díreach chuig an údarás eisiúna nó chuig na húdaráis forfheidhmithe dlí mar a léirítear san EPOC laistigh de 10 lá ar a dhéanaí tar éis an EPOC a fháil. I gcás ina gceanglaítear fógra a thabhairt don údarás forfheidhmiúcháin de bhun an Rialacháin seo, ar an EPOC a fháil, ba cheart don soláthraí seirbhíse gníomhú go gasta chun na sonraí a chaomhnú. I gcás nár ardaigh an t-údarás forfheidhmiúcháin aon fhorais diúltaithe de bhun an Rialacháin seo laistigh de 10 lá tar éis an EPOC a fháil, ba cheart don seolaí a áirithiú go ndéanfar na sonraí a iarradh a tharchur go díreach chuig an údarás eisiúna nó chuig na húdaráis forfheidhmithe dlí mar a léirítear san EPOC ag deireadh na tréimhse 10 lá sin. I gcás ina ndeimhneoidh an t-údarás forfheidhmiúcháin roimh dheireadh na tréimhse 10 lá don údarás eisiúna agus don seolaí nach n-ardóidh sé aon fhorais diúltaithe, ba cheart don seolaí gníomhú a luaithe is féidir tar éis an daingnithe sin agus ag deireadh na tréimhse 10 lá sin ar a dhéanaí. Ba cheart don seolaí, agus, i gcás inarb infheidhme, don údarás forfheidhmiúcháin, cloí leis na teorainneacha ama níos giorra is infheidhme i gcásanna éigeandála mar a shainmhínítear sa Rialachán seo. Ba cheart don seolaí, agus, i gcás inarb infheidhme, don údarás forfheidhmiúcháin, an EPOC a fhorghníomhú a luaithe is féidir agus ar a dhéanaí laistigh de na sprioc-amanna a leagtar amach sa Rialachán seo, agus na spriocdhátaí nós imeachta agus spriocdhátaí eile arna sonrú ag an Stát eisiúna á gcur i gcuntas a mhéid is féidir.

(57)

I gcás ina measann an seolaí, bunaithe ar an bhfaisnéis atá san EPOC nó san EPOC-PR amháin, go bhféadfadh forghníomhú an EPOC nó an EPOC-PR cur isteach ar dhíolúintí nó ar phribhléidí, nó ar rialacha maidir le dliteanas coiriúil a chinneadh nó a theorannú a bhaineann le saoirse an phreasa nó leis an tsaoirse chun tuairimí a nochtadh i meáin eile, faoi dhlí an Stáit forfheidhmiúcháin, ba cheart don seolaí an méid sin a chur in iúl don údarás eisiúna agus don údarás forfheidhmiúcháin. Maidir le EPOCanna, i gcás nár tugadh aon fhógra don údarás forfheidhmiúcháin de bhun an Rialacháin seo, ba cheart don údarás eisiúna an fhaisnéis a fhaightear ón seolaí a chur i gcuntas, agus ba cheart dó cinneadh a dhéanamh, ar a thionscnamh féin nó ar iarraidh ón údarás forfheidhmiúcháin, an ndéanfar an tOrdú Eorpach chun Fianaise a Thabhairt ar Aird a tharraingt siar, a oiriúnú nó a choinneáil ar bun. I gcás inar tugadh fógra don údarás forfheidhmiúcháin de bhun an Rialacháin seo, ba cheart don údarás eisiúna an fhaisnéis a fuarthas ón seolaí a chur i gcuntas agus a chinneadh an ndéanfar an tOrdú Eorpach chun Fianaise a Thabhairt ar Aird a tharraingt siar, a oiriúnú nó a choinneáil ar bun. Ba cheart go bhféadfadh an t-údarás forfheidhmiúcháin na forais diúltaithe a leagtar amach sa Rialachán seo a ardú.

(58)

Chun go bhfeadfaidh an seolaí aghaidh a thabhairt ar fhadhbanna foirmiúla a bhaineann le EPOC nó EPOC-PR, is gá nós imeachta a leagan amach chun cumarsáid a dhéanamh idir an seolaí agus an t-údarás eisiúna, agus, i gcás inar tugadh fógra don údarás forfheidhmiúcháin de bhun an Rialacháin seo, idir an seolaí agus an t-údarás forfheidhmiúcháin, i gcásanna ina bhfuil an EPOC nó an EPOC-PR neamhiomlán nó ina bhfuil earráidí follasacha ann nó nach bhfuil dóthain faisnéise ann chun an t-ordú lena mbaineann a fhorghníomhú. Thairis sin, i gcás nach gcuirfidh an seolaí an fhaisnéis ar fáil ar bhealach uileghabhálach nó tráthúil ar aon chúis eile, mar shampla toisc go measann sé go bhfuil coinbhleacht ann le hoibleagáid faoi dhlí tríú tír, nó toisc go measann sé nár eisíodh an tOrdú Eorpach chun Fianaise a Thabhairt ar Aird nó an tOrdú Caomhnaithe Eorpach i gcomhréir leis na coinníollacha a leagtar amach sa Rialachán seo, ba cheart dó an t-údarás eisiúna a chur ar an eolas, agus, i gcás inar tugadh fógra don údarás forfheidhmiúcháin, an t-údarás forfheidhmiúcháin, agus na réasúnuithe a sholáthar gan an EPOC nó an EPOC-PR a fhorghníomhú go tráthúil. Dá bhrí sin, ba cheart go lamhálfaí leis an nós imeachta cumarsáide go ndéanfadh an t-údarás eisiúna an tOrdú Eorpach chun Fianaise a Thabhairt ar Aird nó an tOrdú Caomhnaithe Eorpach a cheartú nó a athbhreithniú go luath. Chun infhaighteacht na sonraí atá á n-iarraidh a ráthú, ba cheart don seolaí na sonraí sin a chaomhnú más féidir leis an seolaí na sonraí sin a shainaithint

(59)

Níor cheart é a bheith d’oibleagáid ar an seolaí an tOrdú Eorpach chun Fianaise a Thabhairt ar Aird nó an tOrdú Caomhnaithe Eorpach a chomhlíonadh i gcás ina bhfuil sé dodhéanta de facto de bharr imthosca nach bhfuil inchurtha i leith an tseolaí nó, murab ionann iad, an soláthraí seirbhíse tráth a fuarthas an tOrdú Eorpach chun Fianaise a Thabhairt ar Aird nó an tOrdú Caomhnaithe Eorpach. Ba cheart glacadh leis go bhfuil sé dodhéanta de facto glacadh leis mura custaiméir de chuid an tsoláthraí seirbhíse é an duine a bhfuil a chuid sonraí á n-iarraidh nó mura féidir é a shainaithint amhlaidh fiú tar éis iarraidh ar fhaisnéis bhreise a fháil chuig an údarás eisiúna, nó más rud é gur scriosadh na sonraí go dleathach sula bhfuarthas an t-ordú lena mbaineann.

(60)

Ar EPOC-PR a fháil, ba cheart don seolaí na sonraí iarrtha a chaomhnú go ceann 60 lá ar a mhéad mura ndeimhneoidh an t-údarás eisiúna gur eisíodh iarraidh ina dhiaidh sin ar thabhairt ar aird, agus sa chás sin ba cheart leanúint leis an gcaomhnú. Ba cheart go mbeadh an t-údarás eisiúna in ann síneadh 30 lá breise a chur le ré an chaomhnaithe i gcás inar gá chun gur féidir iarraidh ina dhiaidh sin a eisiúint, agus úsáid á baint as an bhfoirm a leagtar amach sa Rialachán seo. I gcás ina ndeimhneoidh an t-údarás eisiúna le linn na tréimhse caomhnúcháin gur eisíodh iarraidh ina dhiaidh sin ar thabhairt ar aird, ba cheart don seolaí na sonraí a chaomhnú chomh fada agus is gá chun na sonraí a thabhairt ar aird a luaithe a gheofar an iarraidh ina dhiaidh sin ar na sonraí a thabhairt ar aird. Ba cheart an dearbhú sin a sheoladh chuig an seolaí laistigh den sprioc-am ábhartha, i dteanga oifigiúil de chuid an Stáit forfheidhmiúcháin nó in aon teanga eile a nglacann an seolaí léi, ag baint úsáid as an bhfoirm a leagtar amach sa Rialachán seo. Chun cosc a chur ar an gcaomhnú a bheith á scor, ba cheart gur leor go n-eiseofaí an iarraidh ina dhiaidh sin ar thabhairt ar aird agus gur sheol an t-údarás eisiúna an deimhniú; níor cheart go mbeadh sé riachtanach tuilleadh foirmiúlachtaí riachtanacha a chur i gcrích maidir leis an tarchur, amhail aistriú doiciméad, ag an bpointe ama sin. I gcás nach mbíonn gá a thuilleadh leis an gcaomhnú, cuirfidh an t-údarás eisiúna na seolaithe ar an eolas gan moill mhíchuí agus cuirfear deireadh leis an oibleagáid maidir le caomhnú ar bhonn an Ordaithe Caomhnaithe Eorpaigh ábhartha.

(61)

D’ainneoin phrionsabal na muiníne frithpháirtí, ba cheart go mbeadh an t-údarás forfheidhmiúcháin in ann forais a ardú chun Ordú Eorpach chun Fianaise a Thabhairt ar Aird a dhiúltú, i gcás inar tugadh fógra don údarás forfheidhmiúcháin de bhun an Rialacháin seo, bunaithe ar liosta na bhforas diúltaithe dá bhforáiltear sa Rialachán seo. I gcás ina dtugtar fógra don údarás forfheidhmiúcháin, nó don fhorfheidhmiú, i gcomhréir leis an Rialachán seo, d’fhéadfadh an Stát forfheidhmiúcháin a fhoráil faoina dhlí náisiúnta go mb’fhéidir go mbeadh gá le rannpháirtíocht nós imeachta cúirte sa Stát forfheidhmiúcháin chun go bhforghníomhófaí Ordú Eorpach chun Fianaise a Thabhairt ar Aird.

(62)

I gcás ina dtugtar fógra don údarás forfheidhmiúcháin faoi Ordú Eorpach chun Fianaise a Thabhairt ar Aird chun sonraí tráchta a fháil, seachas i gcás sonraí a iarrtar chun an t-úsáideoir a shainaithint, agus chun na críche sin amháin, mar a shainmhínítear sa Rialachán seo, nó chun sonraí inneachair a fháil, ba cheart an ceart a bheith aige measúnú a dhéanamh ar an bhfaisnéis a leagtar amach san ordú agus, i gcás inarb iomchuí, é a dhiúltú i gcás ina dtagann sé ar an gconclúid, bunaithe ar anailís éigeantach chuí ar an bhfaisnéis atá san ord sin agus i gcomhréir le rialacha infheidhme dhlí príomha an Aontais, go háirithe an Chairt, go bhféadfadh ceann amháin nó níos mó de na forais diúltaithe dá bhforáiltear sa Rialachán seo a tharraingt anuas. Chun neamhspleáchas na n-údarás breithiúnach a urramú, ní mór rogha áirithe a thabhairt do na húdaráis sin agus cinntí á ndéanamh acu maidir leis na forais diúltaithe.

(63)

Ba cheart go bhféadfadh an t-údarás forfheidhmiúcháin, i gcás ina dtugtar fógra dó de bhun an Rialacháin seo, Ordú Eorpach chun Fianaise a Thabhairt ar Aird a dhiúltú i gcás ina bhfuil na sonraí a iarrtar faoi chosaint díolúintí nó pribhléidí arna ndeonú faoi dhlí an Stáit forfheidhmiúcháin lena gcoisctear forghníomhú nó forfheidhmiú an Ordaithe Eorpaigh chun Fianaise a Thabhairt ar Aird, nó i gcás ina bhfuil na sonraí arna n-iarraidh cumhdaithe ag rialacha maidir le dliteanas coiriúil a chinneadh nó a theorannú a bhaineann le saoirse an phreasa nó leis an tsaoirse chun tuairimí a nochtadh i meáin eile, lena gcoisctear forghníomhú nó forfheidhmiú an Ordaithe Eorpaigh chun Fianaise a Thabhairt ar Aird.

(64)

Ba cheart don údarás forfheidhmiúcháin a bheith in ann ordú a dhiúltú, i gcásanna eisceachtúla, i gcás ina bhfuil forais shubstaintiúla ann lena chreidiúint, ar bhonn fianaise shonrach agus oibiachtúil, go mbeadh sárú follasach ar cheart bunúsach ábhartha mar a leagtar amach in Airteagal 6 CAE agus sa Chairt i gceist, in imthosca ar leith an cháis, le forghníomhú an Ordaithe Eorpaigh chun Fianaise a Thabhairt ar Aird. Go háirithe, agus measúnú á dhéanamh ar an bhforas diúltaithe sin, i gcás ina bhfuil fianaise nó ábhar ar fáil don údarás forfheidhmiúcháin amhail an fhianaise nó an t-ábhar a leagtar amach i dtogra réasúnaithe ó thrian de na Ballstáit, ó Pharlaimint na hEorpa nó ón gCoimisiún Eorpach, arna ghlacadh de bhun Airteagal 7(1) CAE, lena léirítear go bhfuil riosca soiléir ann, dá ndéanfaí an t-ordú a fhorghníomhú, go bhfuil sárú tromchúiseach ar an gceart bunúsach chun leighis éifeachtaigh agus chun trialach córa faoi Airteagal 47 den Chairt, mar gheall ar easnaimh shistéamacha nó ghinearálaithe a bhaineann le neamhspleáchas bhreithiúna an Stáit eisiúna, ba cheart don údarás forfheidhmiúcháin a chinneadh go sonrach agus go beacht, ag féachaint do staid phearsanta an duine lena mbaineann, agus do chineál an chiona a ndéantar na himeachtaí coiriúla ina leith, agus don chomhthéacs fíorasach atá mar bhonn leis an ordú, agus i bhfianaise na faisnéise arna soláthar ag an údarás eisiúna, an bhfuil forais shuntasacha ann lena chreidiúint go bhfuil baol ann go sárófar ceart duine chun trialach córa.

(65)

Ba cheart go bhféadfadh an t-údarás forfheidhmiúcháin ordú a dhiúltú i gcás ina mbeadh forghníomhú an ordaithe sin contrártha do phrionsabal ne bis in idem.

(66)

Ba cheart go bhféadfadh an t-údarás forfheidhmiúcháin, i gcás ina dtugtar fógra dó de bhun an Rialacháin seo, Ordú Eorpach chun Fianaise a Thabhairt ar Aird a dhiúltú i gcás nach cion faoi dhlí an Stáit forfheidhmiúcháin é an t-iompar ar eisíodh an t-ordú ina leith, ach amháin má bhaineann sé le cion a liostaítear laistigh de na catagóirí cionta a leagtar amach in iarscríbhinn a ghabhann leis an Rialachán seo, mar atá léirithe ag an údarás eisiúna san EPOC, má tá sé inphionóis sa Stát eisiúna le pianbhreith choimeádta nó le hordú coinneála ar feadh uastréimhse 3 bliana ar a laghad.

(67)

Ós rud é gur gné bhunriachtanach maidir le cearta cosanta sonraí agus cearta cosanta é an duine a bhfuil a chuid sonraí á n-iarraidh a chur ar an eolas, sa mhéid go gcumasaíonn sé athbhreithniú éifeachtach agus sásamh breithiúnach éifeachtach, i gcomhréir le hAirteagal 6 CAE agus leis an gCairt, ba cheart don údarás eisiúna an duine a bhfuil a chuid sonraí á n-iarraidh a chur ar an eolas, gan moill mhíchuí, faoi shonraí a thabhairt ar aird ar bhonn Ordú Eorpach chun Fianaise a Thabhairt ar Aird. Mar sin féin, ba cheart don údarás eisiúna a bheith in ann, i gcomhréir leis an dlí náisiúnta, moill a chur ar an duine a bhfuil a chuid sonraí á lorg a chur ar an eolas nó srian a chur ar an duine a bhfuil a chuid sonraí á lorg a chur ar an eolas, nó gan an duine a bhfuil a sonraí á n-iarraidh a chur ar an eolas, a mhéid a chomhlíontar agus fad a chomhlíontar coinníollacha Threoir (AE) 2016/680, agus sa chás sin ba cheart don údarás eisiúna na cúiseanna leis an moill, leis an srian nó leis an easnamh a chur in iúl sa chás agus bonn cirt gearr a chur leis san EPOC. Ba cheart do na seolaithe agus, murab ionann iad, do na soláthraithe seirbhíse na bearta oibríochtúla agus teicniúla úrscothacha is gá chun rúndacht, sicréideacht agus sláine an EPOC nó an EPOC-PR a áirithiú mar aon le rúndacht, sicréideacht agus sláine na sonraí a thabharfar ar aird nó a chaomhnófar.

(68)

Ba cheart go bhféadfadh soláthraí seirbhíse aisíocaíocht ar a chostais a éileamh chun freagra a thabhairt ar Ordú Eorpach chun Fianaise a Thabhairt ar Aird nó ar Ordú Caomhnaithe Eorpach ón Stát eisiúna, má fhoráiltear don fhéidearthacht sin i ndlí náisiúnta an Stáit eisiúna d’orduithe intíre i gcásanna comhchosúla, i gcomhréir le dlí náisiúnta an Stáit sin. Ba cheart do na Ballstáit an Coimisiún a chur ar an eolas faoi na rialacha naisiúnta maidir le haisíocaíocht agus ba cheart don Choimisiún iad a chur ar fáil go poiblí. Déantar foráil sa Rialachán seo maidir le rialacha ar leithligh is infheidhme maidir le haisíoc costas a bhaineann leis an gcóras TF díláraithe.

(69)

Gan dochar do na dlíthe náisiúnta lena bhforáiltear d’fhorchur pionós coiriúil, ba cheart do na Ballstáit na rialacha a leagan síos maidir leis na pionóis airgid is infheidhme maidir le sáruithe ar an Rialachán seo agus ba cheart dóibh gach beart is gá a ghlacadh chun a áirithiú go gcuirfear chun feidhme iad. Ba cheart do na Ballstáit a áirithiú go mbeidh na pionóis airgid dá bhforáiltear ina ndlíthe náisiúnta éifeachtach, comhréireach agus athchomhairleach. Ba cheart do na Ballstáit, gan mhoill, fógra a thabhairt don Choimisiún faoi na rialacha sin agus na bearta sin agus ba cheart dóibh fógra a thabhairt dó, gan mhoill, faoi aon leasú ina dhiaidh sin a dhéanfaidh difear dóibh.

(70)

Agus measúnú á dhéanamh sa chás aonair ar an bpionós airgid iomchuí, ba cheart do na húdaráis inniúla na himthosca ábhartha uile a chur i gcuntas, amhail cineál, tromchúis agus fad an tsáraithe, cibé acu d’aon ghnó nó trí fhaillí a rinneadh é, i dtaobh ar cuireadh freagracht ar an soláthraí seirbhíse as sáruithe comhchosúla roimhe sin agus láidreacht airgeadais an tsoláthraí seirbhíse atá faoi dhliteanas. In imthosca eisceachtúla, d’fhéadfadh an t-údarás forfheidhmiúcháin cinneadh a dhéanamh staonadh ó phionóis airgid a fhorchur mar thoradh ar an measúnú sin. I ndáil leis sin, tá aird ar leith le tabhairt ar mhicrifhiontair nach gcomhlíonann Ordú Eorpach chun Fianaise a Thabhairt ar Aird nó Ordú Caomhnaithe Eorpach i gcás éigeandála mar gheall ar easpa acmhainní daonna lasmuigh de ghnáthuaireanta gnó, má tharchuirtear na sonraí gan moill mhíchuí.

(71)

Gan dochar d’oibleagáidí cosanta sonraí, níor cheart soláthraithe seirbhíse a bheith faoi dhliteanas sna Ballstáit as dochar a rinneadh dá n-úsáideoirí nó dá dtríú páirtithe mar thoradh go heisiach ar EPOC nó EPOC-PR a chomhlíonadh de mheon macánta. Ba cheart gur ar an údarás eisiúna a bheadh an fhreagracht dlíthiúlacht an ordaithe lena mbaineann a áirithiú, go háirithe a riachtanas agus a chomhréireacht.

(72)

I gcás nach gcomhlíonann an seolaí EPOC laistigh den spriocdháta nó EPOC-PR, gan cúiseanna a nglacann an t-údarás eisiúna leo a chur ar fáil, agus, más infheidhme, i gcás nár agair an t-údarás forfheidhmiúcháin aon cheann de na forais diúltaithe dá bhforáiltear sa Rialachán seo, ba cheart go mbeadh an t-údarás eisiúna in ann a iarraidh ar an údarás forfheidhmiúcháin an tOrdú Eorpach chun Fianaise a Thabhairt ar Aird nó an tOrdú Caomhnaithe Eorpach a fhorfheidhmiú. Chuige sin, ba cheart don údarás eisiúna an t-ordú lena mbaineann, an fhoirm ábhartha dá bhforáiltear sa Rialachán seo, mar atá comhlánaithe ag an seolaí, agus aon doiciméad ábhartha a aistriú chuig an údarás forfheidhmiúcháin. Ba cheart don údarás eisiúna an t-ordú lena mbaineann agus aon doiciméad atá le haistriú a aistriú go ceann de na teangacha a nglacann an Stát forfheidhmiúcháin leo agus ba cheart dó an seolaí a chur ar an eolas faoin aistriú. Ba cheart don Stát sin an t-ordú lena mbaineann a fhorfheidhmiú i gcomhréir lena dhlí náisiúnta.

(73)

Leis an nós imeachta um fhorfheidhmiú, ba cheart don seolaí a bheith in ann forais i gcoinne an fhorfheidhmithe a agairt, bunaithe ar liosta de fhorais shonracha dá bhforáiltear sa Rialachán seo, lena n-áirítear nár eisigh nó nár bhailíochtaigh údarás inniúil an t-ordú lena mbaineann de réir mar a fhoráiltear sa Rialachán seo, nó i gcás nach mbaineann an t-ordú le sonraí atá á stóráil ag an soláthraí seirbhíse nó thar a cheann tráth a fhaightear an deimhniú ábhartha. Ba cheart go mbeadh an t-údarás forfheidhmiúcháin in ann diúltú aitheantas a thabhairt d’Ordú Eorpach chun Fianaise a Thabhairt ar Aird nó d’Ordú Caomhnaithe Eorpach bunaithe ar na forais chéanna sin agus freisin, in imthosca eisceachtúla, mar gheall ar shárú follasach ar cheart bunúsach ábhartha mar a leagtar amach in Airteagal 6 CAE agus sa Chairt. Ba cheart don údarás forfheidhmiúcháin dul i gcomhairle leis an údarás eisiúna sula gcinnfidh sé gan an t-ordú a aithint nó gan é a fhorfheidhmiú, bunaithe ar na forais sin. I gcás nach gcomhlíonann an seolaí a oibleagáidí faoi Ordú Eorpach aitheanta chun Fianaise a Thabhairt ar Aird nó faoi Ordú Caomhnaithe Eorpach a bhfuil a in-fhorfheidhmitheacht deimhnithe ag an údarás forfheidhmiúcháin, ba cheart don údarás sin pionós airgid a fhorchur. Ba cheart an pionós sin a bheith comhréireach, go háirithe i bhfianaise imthosca sonracha amhail neamhchomhlíonadh leanúnach nó sistéamach.

(74)

D’fhéadfadh comhlíonadh Ordaithe Eorpaigh chun Fianaise a Thabhairt ar Aird teacht salach ar oibleagáid faoin dlí is infheidhme i dtríú tír. Chun cúirtéis a áirithiú i leith leasanna ceannasacha tríú tíortha, chun an duine aonair lena mbaineann a chosaint agus chun aghaidh a thabhairt ar oibleagáidí coinbhleachta ar sholáthraithe seirbhíse, déantar foráil leis an Rialachán seo do shásra sonrach le haghaidh athbhreithniú breithiúnach i gcás ina gcuirfeadh comhlíonadh Ordaithe Eorpaigh chun Fianaise a Thabhairt ar Aird cosc ar sholáthraí seirbhíse oibleagáidí dlíthiúla a eascraíonn as dlí tríú tír a chomhlíonadh.

(75)

I gcás ina measann seolaí go mbeadh sárú oibleagáide dlíthiúla a eascraíonn as dlí tríú tír i gceist le hOrdú Eorpach chun Fianaise a Thabhairt ar Aird i gcás sonrach, ba cheart dó an t-údarás eisiúna agus an t-údarás forfheidhmiúcháin a chur ar an eolas faoi na cúiseanna nár forghníomhaíodh an t-ordú trí agóid réasúnaithe, ag baint úsáid as an bhfoirm dá bhforáiltear sa Rialachán seo. Ba cheart don údarás eisiúna athbhreithniú a dhéanamh ar an Ordú Eorpach chun Fianaise a Thabhairt ar Aird ar bhonn na hagóide réasúnaithe agus aon ionchuir arna soláthar ag an Stát forfheidhmiúcháin, agus na critéir chéanna a bheadh ar chúirt inniúil an Stáit eisiúna a leanúint á gcur i gcuntas. I gcás ina bhfuil sé ar intinn ag an údarás eisiúna seasamh leis an ordú, ba cheart dó athbhreithniú a iarraidh ar chúirt inniúil an Stáit eisiúna, mar atá fógartha ag an mBallstát ábhartha, agus ba cheart don Bhallstát sin athbhreithniú a dhéanamh ar an ordú.

(76)

Nuair a bhíonn cinneadh á dhéanamh maidir le hoibleagáid chontrártha a bheith ann i gcúinsí sonracha an cháis atá á scrúdú, d’fhéadfadh an chúirt inniúil dul i dtuilleamaí saineolas seachtrach iomchuí nuair a theastaíonn sé, mar shampla maidir le léirmhíniú ar dhlí an tríú tír lena mbaineann. Chun na críche sin, d’fhéadfadh an chúirt inniúil, mar shampla, dul i gcomhairle le húdarás lárnach an tríú tír, agus Treoir (AE) 2016/680 á cur i gcuntas. Go háirithe, ba cheart go n-iarrfadh an Stát eisiúna faisnéis ar údarás inniúil an tríú tír i gcás ina mbaineann an choinbhleacht le cearta bunúsacha nó leasanna bunúsacha eile de chuid an tríú tír a bhaineann le slándáil agus cosaint náisiúnta.

(77)

D’fhéadfaí saineolas maidir le léirmhíniú a chur ar fáil freisin trí thuairimí saineolacha i gcás fáil a bheith orthu. Ba cheart faisnéis agus cásdlí maidir le léirmhíniú ar dhlí tríú tír agus maidir le nósanna imeachta easaontachtaí dlíthe sna Ballstáit a chur ar fáil ar ardán lárnach amhail tionscadal SIRIUS nó an Gréasán Breithiúnach Eorpach, d’fhonn gur féidir sochar a bhaint as taithí agus saineolas a bailíodh maidir leis na ceisteanna céanna nó ceisteanna comhchosúla. Níor cheart go gcuirfeadh infhaighteacht faisnéise den sórt sin ar ardán lárnach cosc ar chomhairliúchán athnuaite leis an tríú tír i gcás inarb iomchuí.

(78)

Agus measúnú á dhéanamh an ann d’oibleagáidí contrártha, ba cheart don chúirt inniúil a chinneadh an bhfuil dlí an tríú tír infheidhme agus, má tá, an dtoirmisctear nochtadh na sonraí lena mbaineann le dlí an tríú tír. I gcás ina suíonn an chúirt inniúil go gcuireann dlí an tríú tír toirmeasc ar nochtadh na sonraí lena mbaineann, ba cheart don chúirt sin a chinneadh cibé acu a sheasfaidh sí leis an Ordú Eorpach chun Fianaise a Thabhairt ar Aird nó a chuirfidh sí i leataobh é, trí roinnt gnéithe a chur sa mheá atá ceaptha chun neart an naisc le ceachtar den dá dhlínse lena mbaineann a fhionnadh, na leasanna faoi seach maidir le nochtadh na sonraí a fháil nó nochtadh na sonraí a chosc, agus na hiarmhairtí a d’fhéadfadh a bheith ann don seolaí nó don soláthraí seirbhíse as an ordú a chomhlíonadh. Ba cheart tábhacht agus béim ar leith a thabhairt do chosaint na gceart bunúsach le dlí ábhartha an tríú tír agus leasanna bunúsacha eile, amhail leasanna slándála náisiúnta an tríú tír, chomh maith le méid an naisc idir an cás coiriúil agus ceachtar den dá dhlínse agus an measúnú á dhéanamh. I gcás ina gcinneann an chúirt an t-ordú a chur i leataobh, ba cheart di é sin a chur in iúl don údarás eisiúna agus don seolaí. Má chinneann an chúirt inniúil go bhfuiltear chun seasamh leis an ordú, ba cheart di é sin a chur in iúl don údarás eisiúna agus don seolaí, agus ba cheart don seolaí sin dul ar aghaidh le forghníomhú an ordaithe sin. Ba cheart don údarás eisiúna an t-údarás forfheidhmiúcháin a chur ar an eolas faoi thoradh an nós imeachta um athbhreithniú.

(79)

Ba cheart na coinníollacha a leagtar amach sa Rialachán seo maidir le EPOC a fhorghníomhú a bheith infheidhme freisin i gcás oibleagáidí contrártha ag eascairt as dlí tríú tír. Dá bhrí sin, le linn an athbhreithnithe bhreithiúnaigh i gcás ina gcuirfeadh comhlíonadh Ordaithe Eorpaigh chun Fianaise a Thabhairt ar Aird cosc ar sholáthraithe seirbhíse oibleagáid dhlíthiúil a eascraíonn as dlí tríú tír a chomhlíonadh, ba cheart na sonraí atá á lorg faoin ordú sin a chaomhnú. Más rud é, tar éis an athbhreithnithe bhreithiúnaigh, go gcinneann an chúirt inniúil Ordú Eorpach chun Fianaise a Thabhairt ar Aird a chur i leataobh, ba cheart go bhféadfaí Ordú Caomhnaithe Eorpach a eisiúint chun a lamháil don údarás eisiúna a iarraidh go dtabharfaí na sonraí ar aird ar bhealaí eile, amhail cúnamh dlíthiúil frithpháirteach.

(80)

Is den bhunriachtanas é go mbeadh rochtain ag na daoine go léir a n-iarrtar a gcuid sonraí in imscrúduithe coiriúla ar leigheas éifeachtach dlíthiúil, i gcomhréir le hAirteagal 47 den Chairt. I gcomhréir leis an gceanglas sin agus gan dochar do leigheasanna dlíthiúla breise atá ar fáil i gcomhréir leis an dlí náisiúnta, ba cheart go mbeadh an ceart chun leigheasanna éifeachtacha i gcoinne an ordaithe sin ag aon duine a raibh a chuid sonraí á n-iarraidh trí Ordú Eorpach chun Fianaise a Thabhairt ar Aird. I gcás inar duine atá faoi dhrochamhras nó duine atá cúisithe an duine sin, ba cheart an ceart a bheith ag an duine sin chun leigheasanna éifeachtacha le linn na n-imeachtaí coiriúla ina bhfuil na sonraí á n-úsáid mar fhianaise. Ba cheart an ceart chun leigheasanna éifeachtacha a fheidhmiú os comhair cúirte sa Stát eisiúna i gcomhréir lena dhlí náisiúnta agus ba cheart go n-áireofaí ann an fhéidearthacht agóid a dhéanamh i gcoinne dhlíthiúlacht an bhirt, lena n-áirítear a riachtanas agus a chomhréireacht, gan dochar do ráthaíochtaí maidir le cearta bunúsacha sa Stát forfheidhmiúcháin, ná do leigheasanna breise eile i gcomhréir leis an dlí náisiúnta. Níor cheart leis an Rialachán seo teorainn a chur leis na forais a d’fhéadfadh a bheith ann chun agóid a dhéanamh i gcoinne dlíthiúlacht ó thaobh ordú de. Ba cheart an ceart chun leigheasanna éifeachtacha dá bhforáiltear sa Rialachán seo a bheith gan dochar don cheart leigheasanna a lorg faoi Rialachán (AE) 2016/679 agus faoi Threoir (AE) 2016/680. Ba cheart faisnéis a sholáthar in am trátha faoi na féidearthachtaí faoin dlí náisiúnta maidir le leigheasanna a lorg agus ba cheart a áirithiú gur féidir iad a fheidhmiú go héifeachtach.

(81)

Ba cheart bealaí iomchuí a fhorbairt chun a áirithiú gur féidir leis na páirtithe uile comhoibriú go héifeachtúil trí mhodhanna digiteacha, trí chóras díláraithe teicneolaíochta faisnéise (TF) lenar féidir malartú leictreonach gasta, díreach, idir-inoibritheach, inbhuanaithe, iontaofa agus slán a dhéanamh ar fhoirmeacha, ar shonraí agus ar fhaisnéis a bhaineann le cásanna.

(82)

Chun gur féidir cumarsáid éifeachtúil shlán i scríbhinn a dhéanamh idir údaráis inniúla agus bunaíochtaí ainmnithe nó ionadaithe dlíthiúla soláthraithe seirbhíse faoin Rialachán seo, ba cheart modhanna leictreonacha rochtana ar na córais TF náisiúnta, cuid den chóras TF díláraithe, arna oibriú ag na Ballstáit, a chur ar fáil do na bunaíochtaí ainmnithe nó do na hionadaithe dlíthiúla sin.

(83)

Ba cheart a bheith sa chóras TF díláraithe córais TF na mBallstát agus ghníomhaireachtaí agus chomhlachtaí an Aontais, agus pointí rochtana idir-inoibritheacha, trína bhfuil na córais TF sin idirnasctha. Ba cheart pointí rochtana an chórais TF dhíláraithe a bheith bunaithe ar an gcóras e-CODEX, a bunaíodh le Rialachán (AE) 2022/850 ó Pharlaimint na hEorpa agus ón gComhairle (24).

(84)

Soláthraithe seirbhíse a bhaineann úsáid as réitigh shaincheaptha TF chun faisnéis agus sonraí a bhaineann le hiarrataí ar fhianaise leictreonach a mhalartú, ba cheart modhanna uathoibrithe a sholáthar dóibh chun rochtain a fháil ar na córais TF dhíláraithe trí bhíthin caighdeán coiteann malartaithe sonraí.

(85)

De ghnáth, ba cheart gach cumarsáid i scríbhinn idir údaráis inniúla nó idir údaráis inniúla agus bunaíochtaí ainmnithe nó ionadaithe dlíthiúla a dhéanamh tríd an gcóras TF díláraithe. Níor cheart é a bheith indéanta modhanna malartacha a úsáid ach amháin i gcás nach féidir an córas TF díláraithe a úsáid, mar shampla mar gheall ar riachtanais fhóiréinseacha shonracha, toisc go gcuireann srianta ar chumas teicniúil bac ar líon na sonraí atá le haistriú, nó toisc nach mór aghaidh a thabhairt i gcás éigeandála ar bhunaíocht eile nach bhfuil nasctha leis an gcóras TF díláraithe. Sna cásanna sin, ba cheart an tarchur a dhéanamh ar na modhanna malartacha is iomchuí, agus an gá atá le malartú gasta, slán agus iontaofa faisnéise a áirithiú á chur i gcuntas.

(86)

Chun a áirithiú go bhfuil taifead iomlán ar mhalartuithe i scríbhinn faoin Rialachán seo sa chóras TF díláraithe, ba cheart aon tarchur a dhéantar ar bhealaí malartacha a thaifeadadh sa chóras TF díláraithe gan moill mhíchuí.

(87)

Ba cheart úsáid sásraí chun barántúlacht a áirithiú, dá bhforáiltear i Rialachán (AE) Uimh. 910/2014 ó Pharlaimint na hEorpa agus ón gComhairle (25), a mheas

(88)

Níor cheart go mbeadh soláthraithe seirbhíse, go háirithe fiontair bheaga agus mheánmhéide, neamhchosanta ar chostais dhíréireacha i ndáil le bunú agus oibriú an chórais TF dhíláraithe. Mar chuid de chruthú, de chothabháil agus d’fhorbairt an chur chun feidhme tagartha, tá an Coimisiún, dá bhrí sin, le comhéadan gréasánbhunaithe a chur ar fáil a chuirfidh ar chumas soláthraithe seirbhíse cumarsáid a dhéanamh go slán leis na húdaráis gan a bheith orthu a mbonneagar tiomnaithe féin a bhunú chun rochtain a fháil ar an gcóras TF díláraithe

(89)

Ba cheart é a bheith indéanta ag na Ballstáit úsáid a bhaint as bogearraí arna bhforbairt ag an gCoimisiún, eadhon na bogearraí cur chun feidhme tagartha, seachas córas náisiúnta TF. Tá na bogearraí cur chun feidhme tagartha sin le bheith bunaithe ar shocrú modúlach, rud a chiallaíonn go ndéantar na bogearraí a phacáistiú agus a sheachadadh ar leithligh ó chomhpháirteanna an chórais e-CODEX is gá chun iad a nascadh leis an gcóras TF díláraithe. Leis an leagan amach sin, ba cheart go gcuirfí ar chumas na mBallstát an bonneagar cumarsáide breithiúnaí náisiúnta atá acu cheana féin a athúsáid nó a fheabhsú chun críche úsáide trasteorann.

(90)

Ba cheart don Choimisiún a bheith freagrach as bogearraí cur chun feidhme tagartha a chruthú, a chothabháil agus a fhorbairt. Ba cheart don Choimisiún na bogearraí cur chun feidhme tagartha a dhearadh, a fhorbairt agus a chothabháil i gcomhréir leis na ceanglais agus na prionsabail cosanta sonraí a leagtar síos i Rialachán (AE) 2018/1725 ó Pharlaimint na hEorpa agus ón gComhairle (26), Rialachán (AE) 2016/679, agus Treoir (AE) 2016/680, go háirithe prionsabail na cosanta sonraí trí dhearadh agus mar réamhshocrú chomh maith le hardleibhéal cibearshlándála. Tá sé tábhachtach go mbeidh bearta teicniúla iomchuí le háireamh sna bogearraí cur chun feidhme tagartha freisin agus beifear in ann na bearta eagraíochtúla is gá a dhéanamh chun leibhéal iomchuí slándála agus idir-inoibritheachta a áirithiú.

(91)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (27).

(92)

Maidir le malartuithe sonraí a dhéantar tríd an gcóras TF díláraithe nó a thaifeadtar sa chóras TF díláraithe, ba cheart do na Ballstáit a bheith in ann staidreamh a bhailiú chun a n-oibleagáidí faireacháin agus tuairiscithe a chomhlíonadh faoin Rialachán seo trína dtairseacha náisiúnta.

(93)

Chun faireachán a dhéanamh ar aschur, torthaí agus tionchar an Rialacháin seo, ba cheart don Choimisiún tuarascáil bhliantúil a fhoilsiú ar an mbliain féilire roimhe sin, bunaithe ar shonraí arna bhfáil ó na Ballstáit. Chun na críche sin, ba cheart do na Ballstáit staidreamh cuimsitheach a bhailiú agus a sholáthar don Choimisiún maidir le gnéithe éagsúla den Rialachán seo, de réir na gcineálacha sonraí a iarradh, na seolaithe agus cibé acu an cás éigeandála a bhí ann nó nach ea.

(94)

D’éascódh úsáid foirmeacha réamhaistrithe agus caighdeánaithe comhar agus malartú faisnéise faoin Rialachán seo, rud a d’fhágfadh go bhféadfaí cumarsáid níos tapúla agus níos éifeachtaí a dhéanamh ar bhealach atá áisiúil don úsáideoir. Dhéanfadh foirmeacha den sórt sin na costais aistriúcháin a laghdú agus rannchuideodh siad le caighdeán ardcháilíochta cumarsáide. Ar an mbealach céanna, d’fhágfadh foirmeacha freagartha go bhféadfaí malartú caighdeánaithe faisnéise a dhéanamh, go háirithe nuair nach bhfuil soláthraithe seirbhíse ábalta comhlíonadh a dhéanamh toisc nach ann don chuntas úsáideora nó toisc nach bhfuil aon sonraí ar fáil. D’éascódh na foirmeacha dá bhforáiltear sa Rialachán seo bailiú staidrimh freisin.

(95)

Chun aghaidh a thabhairt go héifeachtach ar an ngá a d’fhéadfadh a bheith le feabhsuithe maidir le hinneachar na bhfoirmeacha EPOC agus EPOC-PR agus maidir leis na foirmeacha a bheidh le húsáid chun faisnéis a sholáthar maidir le dodhéantacht EPOC nó EPOC-PR a fhorghníomhú, chun eisiúint iarrata ar thabhairt ar aird tar éis Ordú Caomhnaithe Eorpach a dheimhniú agus chun síneadh a chur le caomhnú fianaise leictreonaí, ba cheart an chumhacht chun gníomhartha a ghlacadh i gcomhréir le hAirteagal 290 den Chonradh ar Fheidhmiú an Aontais Eorpaigh (CFAE) a tharmligean chuig an gCoimisiún i dtaca le leasú na bhfoirmeacha dá bhforáiltear sa Rialachán seo. Tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear ar leibhéal na saineolaithe, agus go ndéanfaí na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (28). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid uile ag an am céanna leis na saineolaithe sna Ballstáit, agus bíonn rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe.

(96)

Níor cheart go ndéanfadh an Rialachán seo difear d’ionstraimí, comhaontuithe agus socruithe de chuid an Aontais ná d’ionstraimí, comhaontuithe agus socruithe idirnáisiúnta eile maidir le bailiú fianaise a thagann faoi raon feidhme an Rialacháin seo. Ba cheart d’údaráis na mBallstát an uirlis is oiriúnaí don chás atá idir lámha a roghnú. I gcásanna áirithe, b’fhéidir gurbh fhearr leo ionstraimí, comhaontuithe agus socruithe de chuid an Aontais agus ionstraimí, comhaontuithe agus socruithe idirnáisiúnta eile a úsáid agus sraith de chineálacha éagsúla beart imscrúdaitheach á hiarraidh acu nach bhfuil teoranta d’fhianaise leictreonach a thabhairt ar aird ó Bhallstát eile. Ba cheart do na Ballstáit fógra a thabhairt don Choimisiún 3 bliana ar a dhéanaí tar éis theacht i bhfeidhm an Rialacháin seo maidir leis na hionstraimí, na comhaontuithe agus na socruithe atá ann cheana agus dá dtagraítear sa Rialachán seo a leanfaidh d’fheidhm a bheith acu. Ba cheart do na Ballstáit fógra a thabhairt don Choimisiún freisin laistigh de 3 mhí tar éis aon chomhaontú nó socrú nua dá dtagraítear sa Rialachán seo a shíniú.

(97)

I bhfianaise na bhforbairtí teicneolaíochta, d’fhéadfadh cineálacha nua uirlisí cumarsáide a bheith i réim laistigh de chúpla bliain, nó d’fhéadfadh bearnaí teacht chun cinn i gcur i bhfeidhm an Rialacháin seo. Tá sé tábhachtach, dá bhrí sin, foráil a dhéanamh maidir le meastóireacht ar a chur i bhfeidhm.

(98)

Ba cheart don Choimisiún meastóireacht a dhéanamh ar an Rialachán seo agus ba cheart an mheastóireacht sin a bheith bunaithe ar chúig chritéar na héifeachtúlachta, na héifeachtachta, na hábharthachta, an chomhleanúnachais agus bhreisluach AE, agus ba cheart an mheastóireacht sin a bheith mar bhonn do mheasúnuithe tionchair ar bhearta a d’fhéadfadh a bheith ann amach anseo. Ba cheart measúnú ar chur i bhfeidhm an Rialacháin seo agus ar na torthaí a baineadh amach i dtaobh na gcuspóirí atá leis agus chomh maith leis sin, measúnú ar thionchar an Rialacháin seo ar chearta bunúsacha a bheith sa tuarascáil mheastóireachta. Ba cheart don Choimisiún faisnéis a bhailiú go rialta chun bonn eolais a chur faoin meastóireacht ar an Rialachán seo.

(99)

Ós rud é nach féidir leis na Ballstáit cuspóir an Rialacháin seo, is é sin feabhas a chur ar fháil agus ar áirithiú fianaise leictreonaí thar theorainneacha, a ghnóthú go leordhóthanach, agus, de bharr chineál trasteorann na fianaise, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 CAE. I gcomhréir le prionsabal na comhréireachta mar a leagtar amach san Airteagal sin, ní théann an Rialachán seo thar a bhfuil riachtanach chun an cuspóir sin a ghnóthú.

(100)

I gcomhréir le hAirteagal 3 de Phrótacal Uimh. 21 maidir le seasamh na Ríochta Aontaithe agus na hÉireann i dtaca leis an limistéar saoirse, slándála agus ceartais, atá i gceangal le CAE agus le CFAE, tá fógra tugtha ag Éirinn gur mian léi a bheith rannpháirteach i nglacadh agus i gcur i bhfeidhm an Rialacháin seo.

(101)

I gcomhréir le hAirteagail 1 agus 2 de Phrótacal Uimh. 22 maidir le seasamh na Danmhairge, atá i gceangal le CAE agus le CFAE, níl an Danmhairg rannpháirteach i nglacadh an Rialacháin seo agus níl sí faoi cheangal aige ná faoi réir a chur i bhfeidhm.

(102)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 agus thug sé a thuairim uaidh an 6 Samhain 2019 (29),