(1)

Id-Direttiva (UE) 2015/849 tal-Parlament Ewropew u tal-Kunsill (4) tikkostitwixxi l-istrument ġuridiku ewlieni għall-prevenzjoni tal-użu tas-sistema finanzjarja tal-Unjoni għall-finijiet tal-ħasil tal-flus u l-finanzjament tat-terroriżmu. Dik id-Direttiva tistabbilixxi qafas ġuridiku komprensiv, li d-Direttiva (UE) 2018/843 tal-Parlament Ewropew u tal-Kunsill (5) kompliet issaħħaħ bl-indirizzar tar-riskji emerġenti u ż-żieda tat-trasparenza tas-sjieda benefiċjarja. Minkejja l-kisbiet taħt dak il-qafas ġuridiku, l-esperjenza wriet li d-Direttiva (UE) 2015/849 jenħtieġ li tkompli titjieb biex jiġu mmitigati adegwatament ir-riskji u biex jiġu individwati effettivament it-tentattivi kriminali biex is-sistema finanzjarja tal-Unjoni tiġi użata ħażin għall-finijiet kriminali u biex titkompla l-integrità tas-suq intern.

(2)

Mid-dħul fis-seħħ tad-Direttiva (UE) 2015/849, ġew identifikati għadd ta' oqsma fejn ser ikunu meħtieġa emendi biex tiġi żgurata r-reżiljenza meħtieġa u l-kapaċità tas-sistema finanzjarja tal-Unjoni li tipprevjeni l-ħasil tal-flus u l-finanzjament tat-terroriżmu.

(3)

Fl-implimentazzjoni tad-Direttiva (UE) 2015/849, ġew identifikati varjazzjonijiet sinifikanti fil-prattiki u fl-approċċi tal-awtoritajiet kompetenti madwar l-Unjoni kollha, kif ukoll in-nuqqas ta' arranġamenti effettivi biżżejjed għall-kooperazzjoni transfruntiera. Għalhekk huwa xieraq li jiġu definiti rekwiżiti aktar ċari, li jenħtieġ li jikkontribwixxu għal kooperazzjoni bla xkiel madwar l-Unjoni kollha filwaqt li jippermettu lill-Istati Membri jqisu l-ispeċifiċitajiet tas-sistemi nazzjonali tagħhom.

(4)

Din id-Direttiva hija parti minn pakkett komprensiv bil-għan li jsaħħaħ il-qafas tal-ġlieda kontra l-ħasil tal-flus u l-finanzjament tat-terroriżmu tal-Unjoni (“AML/CFT”). Flimkien, din id-Direttiva u r-Regolamenti (UE) 2023/1113 (6), (UE) 2024/1624 (7) u (UE) 2024/1620 (8) tal-Parlament Ewropew u tal-Kunsill ser jifformaw il-qafas ġuridiku li jirregola r-rekwiżiti tal-AML/CFT li għandhom jintlaħqu minn entitajiet marbutin b'obbligu u li jirfdu l-qafas istituzzjonali tal-AML/CFT tal-Unjoni, inkluż l-istabbiliment ta' Awtorità għall-ġlieda kontra l-ħasil tal-Flus u l-finanzjament tat-terroriżmu (“AMLA”).

(5)

Il-ħasil tal-flus u l-finanzjament tat-terroriżmu ta' spiss isiru f'kuntest internazzjonali. L-effett ta' miżuri adottati fil-livell tal-Unjoni li ma jqisux il-koordinazzjoni u l-kooperazzjoni internazzjonali jkun wieħed ferm limitat. Għalhekk, jenħtieġ li l-miżuri adottati mill-Unjoni f'dak il-qasam ikunu kompatibbli ma' azzjonijiet oħra meħuda fil-livell internazzjonali u jkunu tal-anqas rigorużi daqshom. L-azzjoni tal-Unjoni jenħtieġ li tkompli tieħu kont partikolari tar-Rakkomandazzjonijiet tat-Task Force ta' Azzjoni Finanzjarja (FATF), u ta' strumenti ta' korpi internazzjonali oħra attivi fil-ġlieda kontra l-ħasil tal-flus u l-finanzjament tat-terroriżmu. Bil-għan li tissaħħaħ l-effikaċja tal-ġlieda kontra l-ħasil tal-flus u l-finanzjament tat-terroriżmu, jenħtieġ li, fejn xieraq, l-atti legali rilevanti tal-Unjoni jkunu allinjati mal-Istandards Internazzjonali dwar il-Ġlieda kontra l-Ħasil tal-Flus u l-Finanzjament tat-Terroriżmu u l-Proliferazzjoni adottati mill-FATF fi Frar 2012 (ir-“Rakkomandazzjonijiet riveduti tal-FATF”) u l-emendi sussegwenti għal dawk l-istandards.

(6)

It-theddid, ir-riskji u l-vulnerabbiltajiet speċifiċi għall-ħasil tal-flus u għall-finanzjament tat-terroriżmu li jaffettwaw ċerti setturi ekonomiċi fil-livell nazzjonali jnaqqsu l-kapaċità tal-Istati Membri li jikkontribwixxu għall-integrità u għas-solidità tas-sistema finanzjarja tal-Unjoni. B'hekk, huwa xieraq li, mal-identifikazzjoni ta' tali setturi u ta' riskji speċifiċi, l-Istati Membri jitħallew jiddeċiedu li japplikaw ir-rekwiżiti dwar l-AML/CFT għal setturi addizzjonali minbarra dawk koperti mir-Regolament (UE) 2024/1624. Bil-għan li tiġi ppreservata l-effettività tas-suq intern u tas-sistema tal-Unjoni fil-qasam tal-AML/CFT, jenħtieġ li l-Kummissjoni tkun tista', bl-appoġġ tal-AMLA, tivvaluta jekk l-applikazzjoni prevista mill-Istati Membri tar-rekwiżiti tal-AML/CFT għal setturi addizzjonali hijiex ġustifikata. F'każijiet fejn l-aħjar interessi tal-Unjoni jinkisbu billi tittieħed azzjoni fil-livell tal-Unjoni fir-rigward ta' setturi speċifiċi, jenħtieġ li l-Kummissjoni tinforma lill-Istat Membru li biħsiebu japplika r-rekwiżiti tal-AML/CFT għal dawk is-setturi, li minflok biħsiebha tieħu azzjoni fil-livell tal-Unjoni u l-Istat Membru jenħtieġ li ma jiħux il-miżuri nazzjonali li kien biħsiebu jieħu, dment li dawk il-miżuri ma jkunux maħsuba li jindirizzaw riskju urġenti.

(7)

Ċerti kategoriji ta' entitajiet marbutin b'obbligu huma soġġetti għal rekwiżiti ta' liċenzjar jew regolatorji għall-forniment tas-servizzi tagħhom, filwaqt li għal kategoriji oħra ta' operaturi l-aċċess għall-professjoni mhuwiex regolat. Irrispettivament mill-qafas li japplika għall-eżerċizzju tal-professjoni jew tal-attività, l-entitajiet marbutin b'obbligu kollha jaġixxu bħala gwardjani tas-sistema finanzjarja tal-Unjoni u jridu jiżviluppaw ħiliet speċifiċi fil-qasam tal-AML/CFT biex iwettqu dak il-kompitu. Jenħtieġ li l-Istati Membri jikkunsidraw li jipprovdu taħriġ lill-persuni li jixtiequ jidħlu fil-professjoni ta’ dawk l-entitajiet biex ikunu jistgħu jwettqu dmirijiethom. L-Istati Membri jistgħu jikkunsidraw, pereżempju, l-inklużjoni ta’ korsijiet fil-qasam tal-AML/CFT fl-offerta akkademika marbuta ma’ dawk il-professjonijiet jew il-kooperazzjoni ma’ assoċjazzjonijiet professjonali biex iħarrġu parteċipanti ġodda f’dawk il-professjonijiet.

(8)

Meta l-entitajiet marbutin b'obbligu ma jkunux soġġetti għal rekwiżiti speċifiċi ta' liċenzjar jew ta' reġistrazzjoni, jenħtieġ li l-Istati Membri jkollhom fis-seħħ sistemi li jippermettu lis-superviżuri jkunu jafu b'ċertezza l-ambitu tal-popolazzjoni superviżorja tagħhom sabiex jiżguraw is-superviżjoni adegwata ta' tali entitajiet marbutin b’obbligu. Dan ma jfissirx li l-Istati Membri jeħtieġ li jimponu rekwiżiti ta' reġistrazzjoni speċifiċi tal-AML/CFT meta dan ma jkunx meħtieġ għall-identifikazzjoni tal-entitajiet marbutin b'obbligu, kif inhu l-każ pereżempju meta r-reġistrazzjoni tal-VAT tippermetti l-identifikazzjoni tal-operaturi li jwettqu attivitajiet li jaqgħu fil-kamp ta' applikazzjoni tar-rekwiżiti tal-AML/CFT.

(9)

Jenħtieġ li s-superviżuri jiżguraw li, fir-rigward tal-uffiċċji tal-kambju ta' muniti, l-uffiċċju għat-tisrif taċ-ċekkijiet, il-fornituri ta' servizzi ta' trusts, u ta' kumpaniji jew fornituri ta' servizzi tal-logħob tal-azzard, kif ukoll kumpaniji finanzjarji azzjonarji ta’ attività mħallta, il-persuni li effettivament imexxu n-negozju ta' tali entitajiet u s-sidien benefiċjarji ta' tali entitajiet għandhom reputazzjoni tajba u jaġixxu b'onestà u b'integrità u jkollhom l-għarfien u l-kompetenza meħtieġa biex iwettqu l-funzjonijiet tagħhom. Bħala minimu, jenħtieġ li l-kriterji għad-determinazzjoni dwar jekk persuna hijiex konformi ma' dawk ir-rekwiżiti, jirriflettu l-ħtieġa li tali entitajiet jiġu protetti mill-abbuż mill-maniġers jew mis-sidien benefiċjarji tagħhom għal skopijiet kriminali. Sabiex jitrawwem approċċ komuni għall-verifika mis-superviżuri li l-maniġment u s-sidien benefiċjarji tal-entitajiet marbutin b'obbligu jissodisfaw dawk ir-rekwiżiti, jenħtieġ li l-AMLA toħroġ linji gwida dwar il-kriterji biex jiġu vvalutati r-reputazzjoni tajba, l-onestà u l-integrità u l-kriterji biex jiġu vvalutati l-għarfien u l-għarfien espert.

(10)

Għall-finijiet tal-valutazzjoni tal-adegwatezza ta' persuni li jaqdu funzjoni maniġerjali f'entitajiet marbutin b'obbligu, jew b'xi mod jikkontrollawhom, jenħtieġ li kwalunkwe skambju ta' informazzjoni dwar kundanni kriminali jsir f'konformità mad-Deċiżjoni Qafas tal-Kunsill 2009/315/ĠAI (9) u mad-Deċiżjoni tal-Kunsill 2009/316/ĠAI (10). Barra minn hekk, jenħtieġ li s-superviżuri jkunu jistgħu jaċċessaw l-informazzjoni kollha meħtieġa biex jivverifikaw l-għarfien u l-għarfien espert tal-maniġment superjuri, kif ukoll l-onestà u l-integrità tagħhom u dik tas-sidien benefiċjarji tal-entità marbuta b'obbligu, inkluż l-informazzjoni disponibbli permezz ta' sorsi affidabbli u indipendenti.

(11)

L-iskemi tar-residenza b'investiment jippreżentaw riskji u vulnerabbiltajiet, b'mod partikolari fir-rigward tal-ħasil tal-flus, l-evażjoni tal-miżuri restrittivi tal-Unjoni, il-korruzzjoni u l-evażjoni tat-taxxa li fl-aħħar mill-aħħar jistgħu jwasslu għal ċerti riskji għas-sigurtà tal-Unjoni. Pereżempju, dgħufijiet fl-operazzjoni ta’ ċerti skemi, inkluż in-nuqqas ta' proċessi ta' ġestjoni tar-riskju jew implimentazzjoni dgħajfa ta' dawk il-proċessi jistgħu joħolqu opportunitajiet għall-korruzzjoni, filwaqt li kontrolli dgħajfa jew applikati b'mod inkonsistenti fuq is-sors tal-fondi u s-sors tal-ġid tal-applikanti jistgħu jwasslu għal riskji ogħla li tali skemi jiġu sfruttati mill-applikanti għal skopijiet kriminali, bil-għan li jiġu leġittimizzati l-fondi miksuba permezz ta' mezzi illeċiti. Sabiex jiġi evitat li r-riskji li jirriżultaw mill-operat ta' tali skemi jaffettwaw is-sistema finanzjarja tal-Unjoni, l-Istati Membri li d-dritt nazzjonali tagħhom jippermetti l-għoti ta' drittijiet ta' residenza bi skambju għal kwalunkwe tip ta' investiment jenħtieġ li għalhekk jistabbilixxu miżuri biex itaffu r-riskji assoċjati tal-ħasil tal-flus, ir-reati predikati tiegħu u l-finanzjament tat-terroriżmu. Jenħtieġ li tali miżuri jinkludu proċess ta' ġestjoni tar-riskju adegwat, inkluż il-monitoraġġ effettiv tal-implimentazzjoni tiegħu, kontrolli fuq il-profil tal-applikanti, inkluż il-ksib ta' informazzjoni dwar is-sors tal-fondi u s-sors tal-ġid tagħhom u l-verifika ta' informazzjoni dwar l-applikanti kontra informazzjoni miżmuma mill-awtoritajiet kompetenti.

(12)

Il-Kummissjoni qiegħda f'pożizzjoni tajba biex tirrieżamina theddid transfruntier speċifiku li jista' jaffettwa s-suq intern u li ma jistax jiġi identifikat u miġġieled b'mod effettiv minn Stati Membri individwali. Għalhekk jenħtieġ li tiġi fdata bir-responsabbiltà għall-koordinazzjoni tal-valutazzjoni tar-riskji relatati mal-attivitajiet transfruntiera. L-involviment tal-esperti rilevanti, bħall-Grupp ta' Esperti dwar il-Ħasil tal-Flus u l-Finanzjament tat-Terroriżmu u r-rappreżentanti mill-Unitajiet tal-Intelligence Finanzjarja (FIUs), kif ukoll, fejn xieraq, minn korpi oħra fil-livell tal-Unjoni, inkluż l-AMLA, huwa essenzjali għall-effettività tal-proċess tal-valutazzjoni tar-riskji. Il-valutazzjonijiet tar-riskju nazzjonali u l-esperjenzi huma wkoll sors ta' informazzjoni importanti għal dak il-proċess. Jenħtieġ li tali valutazzjonijiet tar-riskji transfruntiera mill-Kummissjoni ma jinvolvux l-ipproċessar ta' data personali. Fi kwalunkwe każ, jenħtieġ li d-data tkun kompletament anonimizzata. L-awtoritajiet superviżorji tal-protezzjoni tad-data kemm tal-Unjoni kif ukoll dawk nazzjonali jenħtieġ li jkunu involuti biss jekk il-valutazzjoni tar-riskju tal-ħasil tal-flus u tal-finanzjament tat-terroriżmu jkollha impatt fuq il-privatezza u l-protezzjoni tad-data tal-individwi. Sabiex jiġu massimizzati s-sinerġiji bejn il-valutazzjoni tar-riskji fil-livell tal-Unjoni u f'dak nazzjonali, jenħtieġ li l-Kummissjoni u l-Istati Membri jagħmlu ħilithom biex japplikaw metodoloġiji konsistenti.

(13)

Is-sejbiet tal-valutazzjoni tar-riskju fil-livell tal-Unjoni jistgħu jgħinu lill-awtoritajiet kompetenti u lill-entitajiet marbutin b'obbligu fl-identifikazzjoni, fil-fehim, fil-ġestjoni u fil-mitigazzjoni tar-riskju tal-ħasil tal-flus u l-finanzjament tat-terroriżmu, kif ukoll fir-riskji ta' nonimplimentazzjoni u ta' evażjoni ta' sanzjonijiet finanzjarji mmirati. Għalhekk huwa importanti li s-sejbiet tal-valutazzjoni tar-riskju jiġu ppubblikati.

(14)

L-Istati Membri jibqgħu fl-aħjar pożizzjoni biex jidentifikaw, jivvalutaw, jifhmu u jiddeċiedu l-mod kif jimmitigaw ir-riskji tal-ħasil tal-flus u l-finanzjament tat-terroriżmu li jaffettwawhom direttament. Għalhekk, kull Stat Membru jenħtieġ li jieħu l-passi xierqa biex jidentifika, jivvaluta u jifhem sew ir-riskji proprji ta' ħasil tal-flus u finanzjament tat-terroriżmu, kif ukoll ir-riskji tan-nonimplimentazzjoni u l-evażjoni ta' sanzjonijiet finanzjarji mmirati u li jiddefinixxi strateġija nazzjonali koerenti biex jimplimenta azzjonijiet għall-mitigazzjoni ta' dawk ir-riskji. Tali valutazzjoni tar-riskju nazzjonali jenħtieġ li tinkludi deskrizzjoni tal-istruttura istituzzjonali u tal-proċeduri tar-reġim tal-AML/CFT tal-Istat Membru, kif ukoll tar-riżorsi umani u finanzjarji allokati sakemm din l-informazzjoni tkun disponibbli. Sabiex jinżamm fehim kontinwu tar-riskji, jenħtieġ li l-Istati Membri jaġġornaw regolarment il-valutazzjoni tar-riskju nazzjonali tagħhom, u jenħtieġ li jkunu jistgħu jissupplimentawha wkoll b'aġġornamenti u valutazzjonijiet immirati tar-riskji assoċjati ma' setturi, prodotti jew servizzi speċifiċi.

(15)

L-entitajiet ġuridiċi u l-arranġamenti ġuridiċi jistgħu jipprovdu mezz għall-kriminali biex jinħbew wara velu ta' leġittimità u għalhekk jistgħu jintużaw ħażin għall-ħasil tar-rikavati illeċi, kemm jekk domestikament jew bejn il-fruntieri. Sabiex dawk ir-riskji jiġu mmitigati, huwa importanti li l-Istati Membri jifhmu r-riskji assoċjati mal-entitajiet ġuridiċi u l-arranġamenti ġuridiċi li jkunu fit-territorju tagħhom, kemm minħabba li l-entitajiet ikunu stabbiliti hemmhekk, jew minħabba li trustees ta' trusts espressi jew persuni li jkollhom pożizzjonijiet ekwivalenti f'arranġamenti ġuridiċi simili jkunu stabbiliti jew residenti hemmhekk, jew jamministraw l-arranġament ġuridiċi minn hemm. Fil-każ ta' arranġamenti ġuridiċi, minħabba d-dritt tas-settlor dwar l-għażla tal-liġi li tirregola l-arranġament, huwa wkoll importanti li l-Istati Membri jifhmu r-riskji assoċjati mal-arranġamenti ġuridiċi li jistgħu jiġu stabbiliti taħt il-liġi tagħhom, irrispettivament minn jekk il-liġijiet tagħhom jirregolawhomx b'mod espliċitu, jew il-ħolqien tagħhom isibx is-sors tiegħu fil-libertà kuntrattwali tal-partijiet u huwiex rikonoxxut mill-qrati nazzjonali.

(16)

Minħabba n-natura integrata tas-sistema finanzjarja internazzjonali u l-ftuħ tal-ekonomija tal-Unjoni, ir-riskji assoċjati mal-entitajiet ġuridiċi u l-arranġamenti ġuridiċi jmorru lil hinn minn dawk fit-territorju tal-Unjoni. Għalhekk huwa importanti li l-Unjoni u l-Istati Membri tagħha jifhmu l-esponiment għar-riskji li jirriżultaw minn entitajiet ġuridiċi barranin u arranġamenti ġuridiċi barranin. Tali valutazzjoni tar-riskji ma għandhiex għalfejn tindirizza kull entità ġuridika barranija individwali jew kull arranġament ġuridiku barrani li għandu rabta suffiċjenti mal-Unjoni, kemm jekk permezz tagħha jkun akkwista proprjetà immobbli jew ikun ingħata kuntratti wara proċedura ta’ akkwist pubbliku, jew minħabba tranżazzjonijiet ma' entitajiet marbutin b'obbligu li jippermettulhom jaċċessaw is-sistema finanzjarja u l-ekonomija tal-Unjoni. Madankollu, jenħtieġ li l-valutazzjoni tar-riskju tippermetti lill-Unjoni u lill-Istati Membri tagħha jifhmu liema tip ta' entitajiet ġuridiċi barranin u arranġamenti ġuridiċi barranin igawdu minn tali aċċess għas-sistema finanzjarja u l-ekonomija tal-Unjoni, u liema tipi ta' riskji huma assoċjati ma' dak l-aċċess.

(17)

Jenħtieġ li r-riżultati tal-valutazzjonijiet tar-riskji jitqiegħdu għad-dispożizzjoni tal-entitajiet marbutin b'obbligu f'waqtu sabiex jippermettulhom jidentifikaw, jifhmu, jimmaniġġjaw u jimmitigaw ir-riskji propji. Dawk ir-riżultati jistgħu jiġu kondiviżi f'forma mqassra u mqiegħda għad-dispożizzjoni tal-pubbliku, u jenħtieġ li ma jinkludux informazzjoni klassifikata jew data personali.

(18)

Barra minn hekk, sabiex jidentifikaw, jifhmu, jimmaniġġjaw u jimmitigaw dejjem aktar ir-riskji fil-livell tal-Unjoni, jenħtieġ li l-Istati Membri jqiegħdu għad-dispożizzjoni reċiproka, tal-Kummissjoni u tal-AMLA, ir-riżultati tal-valutazzjonijiet tar-riskji tagħhom. Jenħtieġ li l-informazzjoni klassifikata jew id-data personali ma tiġix inkluża f'dawk it-trażmissjonijiet dment li ma titqiesx strettament meħtieġa għat-twettiq tal-kompiti tal-AML/CFT.

(19)

Sabiex jiġu mmitigati b'mod effettiv ir-riskji identifikati fil-valutazzjoni tar-riskju nazzjonali, jenħtieġ li l-Istati Membri jiżguraw azzjoni konsistenti fil-livell nazzjonali kemm billi jaħtru awtorità biex tikkoordina r-rispons nazzjonali jew billi jistabbilixxu mekkaniżmu għal dak l-għan. Jenħtieġ li l-Istati Membri jiżguraw li l-awtorità maħtura jew il-mekkaniżmu stabbilit ikollhom biżżejjed setgħat u riżorsi biex iwettqu dak il-kompitu b'mod effettiv u jiżguraw rispons adegwat għar-riskji identifikati.

(20)

Sabiex ikunu jistgħu jirrieżaminaw l-effettività tas-sistemi proprji fil-ġlieda kontra l-ħasil tal-flus u l-finanzjament tat-terroriżmu, jenħtieġ li l-Istati Membri jżommu, u jtejbu l-kwalità tal-istatistika rilevanti. Bil-għan li tittejjeb aktar il-kwalità u l-konsistenza tad-data statistika miġbura fil-livell tal-Unjoni, jenħtieġ li l-Kummissjoni u AMLA jżommu lilhom infushom aġġornati fuq is-sitwazzjoni madwar l-Unjoni kollha fir-rigward tal-ġlieda kontra l-ħasil tal-flus u l-finanzjament tat-terroriżmu u jenħtieġ li jippubblikaw analiżi regolari.

(21)

L-FATF żviluppat standards biex il-ġuriżdizzjonijiet jidentifikaw, u jivvalutaw ir-riskji ta' nonimplimentazzjoni jew ta' evażjoni potenzjali tas-sanzjonijiet finanzjarji mmirati relatati mal-finanzjament tal-proliferazzjoni, u biex jieħdu azzjoni biex jimmitigaw dawk ir-riskji. Dawk l-istandards il-ġodda introdotti mill-FATF la jieħdu post u lanqas idgħajfu r-rekwiżiti stretti eżistenti biex il-pajjiżi jimplimentaw sanzjonijiet finanzjarji mmirati biex jikkonformaw mar-riżoluzzjonijiet rilevanti tal-Kunsill tas-Sigurtà tan-Nazzjonijiet Uniti relatati mal-prevenzjoni, is-soppressjoni u t-tfixkil tal-proliferazzjoni tal-armi ta' qerda tal-massa u l-finanzjament tagħhom. Dawk l-obbligi eżistenti, kif implimentati fil-livell tal-Unjoni permezz tad-Deċiżjonijiet tal-Kunsill 2010/413/PESK (11) u (PESK) 2016/849 (12) kif ukoll permezz tar-Regolamenti tal-Kunsill (UE) Nru 267/2012 (13) u (UE) 2017/1509 (14), jibqgħu vinkolanti fuq il-persuni fiżiċi u ġuridiċi kollha fl-Unjoni. Minħabba r-riskji speċifiċi ta' nonimplimentazzjoni u evażjoni ta' sanzjonijiet finanzjarji mmirati li għalihom hija esposta l-Unjoni, huwa xieraq li l-valutazzjoni tar-riskji tiġi estiża biex tinkludi s-sanzjonijiet finanzjarji mmirati kollha adottati fil-livell tal-Unjoni. In-natura sensittiva tal-miżuri AML/CFT relatati ma’ sanzjonijiet finanzjarji mmirati ma tneħħix l-obbligu bbażat fiq ir-regoli li jaqa’ fuq il-persuni fiżiċi jew ġuridiċi kollha fl-Unjoni li jiffriżaw u ma jqegħdux fondi jew assi oħra għad-dispożizzjoni ta’ persuni jew entitajiet deżinjati.

(22)

Sabiex jiġu riflessi żviluppi fil-livell internazzjonali, b'mod partikolari r-rakkomandazzjonijiet riveduti tal-FATF, u biex jiġi żgurat qafas komprensiv għall-implimentazzjoni ta' sanzjonijiet finanzjarji mmirati, jenħtieġ li din id-Direttiva tintroduċi rekwiżiti biex jiġu identifikati, mifhuma, immaniġġjati u mitigati r-riskji ta' nonimplimentazzjoni jew ta' evażjoni ta' sanzjonijiet finanzjarji mmirati fil-livell tal-Unjoni u fil-livell tal-Istati Membri.

(23)

Ir-reġistri ċentrali ta' informazzjoni dwar is-sjieda benefiċjarja (“reġistri ċentrali”) huma kruċjali fil-ġlieda kontra l-użu ħażin ta’ entitajiet ġuridiċi u ta' arranġamenti ġuridiċi. Għalhekk, jenħtieġ li l-Istati Membri jiżguraw li l-informazzjoni dwar is-sjieda benefiċjarja ta' entitajiet ġuridiċi u arranġamenti ġuridiċi, informazzjoni dwar l-arranġamenti tal-mandatarji u informazzjoni dwar entitajiet ġuridiċi barranin u arranġamenti ġuridiċi barranin jinżammu f'reġistru ċentrali. Sabiex jiġi żgurat li dawk ir-reġistri ċentrali jkunu faċilment aċċessibbli u jkun fihom data ta' kwalità għolja, jenħtieġ li jiġu introdotti regoli konsistenti dwar il-ġbir u l-ħżin ta' dik l-informazzjoni permezz tar-reġistri. L-informazzjoni li tinżamm fir-reġistri ċentrali jenħtieġ li tkun aċċessibbli f'format li jista' jintuża immedjatament u li jinqara mill-magni.

(24)

Bil-għan li tittejjeb it-trasparenza sabiex jiġi miġġieled l-użu ħażin ta' entitajiet ġuridiċi, jenħtieġ li l-Istati Membri jiżguraw li l-informazzjoni dwar is-sjieda benefiċjarja tiġi rreġistrata f'reġistru ċentrali li jkun jinsab barra mill-entitá ġuridika, f'konformità sħiħa mad-dritt tal-Unjoni. Jenħtieġ li l-Istati Membri, għal dak il-għan, jużaw bażi tad-data ċentrali li jiġbor l-informazzjoni dwar is-sjieda benefiċjarja, jew ir-reġistru kummerċjali jew reġistru ċentrali ieħor. L-Istati Membri jistgħu jiddeċiedu li l-entitajiet marbutin b'obbligu jkunu responsabbli biex jipprovdu ċerta informazzjoni għar-reġistru ċentrali. Jenħtieġ li l-Istati Membri jiżguraw li f'kull każ dik l-informazzjoni titqiegħed għad-dispożizzjoni tal-awtoritajiet kompetenti u tiġi provduta lill-entitajiet marbutin b'obbligu meta japplikaw miżuri ta' diliġenza dovuta fir-rigward tal-klijent.

(25)

L-informazzjoni dwar is-sjieda benefiċjarja ta' trusts espressi u ta' arranġamenti ġuridiċi simili jenħtieġ li tiġi rreġistrata fil-post fejn ikunu stabbiliti t-trustees tat-trusts u l-persuni li jokkupaw karigi ekwivalenti f'arranġamenti ġuridiċi simili jew fejn ikunu jirrisjedu, jew fejn ikun amministrat l-arranġament ġuridiku. Sabiex jiġu żgurati l-monitoraġġ u r-reġistrazzjoni effettivi tal-informazzjoni dwar is-sjieda benefiċjarja ta' trusts espressi u ta' arranġamenti ġuridiċi simili, hija neċessarja wkoll il-kooperazzjoni bejn l-Istati Membri. L-interkonnessjoni tar-reġistri tal-Istati Membri tas-sidien benefiċjarji ta' trusts espressi u ta' arranġamenti ġuridiċi simili jenħtieġ li trendi dik l-informazzjoni aċċessibbli, u jenħtieġ li tiżgura wkoll li r-reġistrazzjoni multipla tal-istess trusts espressi u ta' arranġamenti ġuridiċi simili tiġi evitata fl-Unjoni.

(26)

Jenħtieġ li jiġi żgurat l-aċċess f'waqtu għall-informazzjoni dwar is-sjieda benefiċjarja b'tali modi li jiġi evitat kwalunkwe riskju ta' preavviż lill-entità ġuridika jew it-trustee jew il-persuna f’pożizzjoni ekwivalenti kkonċernata.

(27)

L-akkuratezza tad-data inkluża fir-reġistri ċentrali hija fundamentali għall-awtoritajiet rilevanti kollha u għall-persuni l-oħra awtorizzati biex jaċċessaw dik id-data, u li jieħdu deċiżjonijiet legali validi abbażi ta' dik id-data. Għalhekk, l-Istati Membri jenħtieġ li jiżguraw li l-entitajiet responsabbli mir-reġistri ċentrali jivverifikaw, f'ħin raġonevoli mis-sottomissjoni tal-informazzjoni dwar is-sjieda benefiċjarja u fuq bażi regolari wara dan, li l-informazzjoni preżentata tkun adegwata, akkurata u aġġornata. Jenħtieġ li l-Istati Membri jiżguraw li l-entitajiet responsabbli mir-reġistri ċentrali jkunu jistgħu jitolbu kwalunkwe informazzjoni li jeħtieġu biex jivverifikaw l-informazzjoni dwar is-sjieda benefiċjarja u l-informazzjoni dwar il-persuna nominata, kif ukoll sitwazzjonijiet fejn ma jkunx hemm sid benefiċjarju jew is-sidien benefiċjarji ma jkunux jistgħu jiġu ddeterminati. F’dawk is-sitwazzjonijiet, l-informazzjoni pprovduta lir-reġistru ċentrali jenħtieġ li tkun akkumpanjata minn ġustifikazzjoni li tinkludi d-dokumenti ta’ sostenn rilevanti kollha biex ir-reġistru jkun jista’ jaċċerta jekk dan huwiex il-każ. Jenħtieġ li l-Istati Membri jiżguraw ukoll li l-entitajiet responsabbli għar-reġistri ċentrali jkollhom għodod adegwati għad-dispożizzjoni tagħhom biex iwettqu l-verifiki, inkluż verifiki awtomatizzati b'mod li jissalvagwardja d-drittijiet fundamentali u jevita eżiti diskriminatorji.

(28)

Huwa importanti li l-Istati Membri jafdaw lill-entitajiet responsabbli għar-reġistri ċentrali b'setgħat u riżorsi suffiċjenti biex jivverifikaw is-sjieda benefiċjarja u l-veraċità tal-informazzjoni pprovduta lilhom, u biex jirrapportaw kwalunkwe suspett lill-FIU tagħhom. Tali setgħat jenħtieġ li jinkludu s-setgħa li jwettqu spezzjonijiet fil-bini tan-negozju ta’ entitajiet ġuridiċi u ta’ entitajiet marbutin b'obbligu li jaġixxu bħala trustees ta' trusts espressi jew persuni li jkollhom pożizzjonijiet ekwivalenti f'arranġamenti ġuridiċi simili, kemm jekk jitwettqu mill-entitajiet responsabbli mir-reġistri ċentrali kif ukoll minn awtoritajiet oħra f'isimhom. Jenħtieġ li l-Istati Membri jiżguraw li jiġu applikati salvagwardji adegwati fejn dawk it-trustees jew persuni li jkollhom pożizzjoni ekwivalenti f'arranġament ġuridiku simili jkunu professjonisti legali, jew fejn il-bini tan-negozju jew l-uffiċċju rreġistrat tagħhom jkunu l-istess bħar-residenza privata tagħhom. Tali setgħat jenħtieġ li jestendu għar-rappreżentanti ta' entitajiet ġuridiċi barranin u arranġamenti ġuridiċi barranin fl-Unjoni, fejn dawk l-entitajiet u l-arranġamenti ġuridiċi jkollhom uffiċċji rreġistrati jew rappreżentanti fl-Unjoni.

(29)

Meta verifika tal-informazzjoni dwar is-sjieda benefiċjarja twassal lil entità inkarigata minn reġistru ċentrali biex tikkonkludi li hemm inkonsistenzi jew żbalji f'dik l-informazzjoni, jew meta dik l-informazzjoni tonqos b'xi mod ieħor milli tissodisfa r-rekwiżiti, jenħtieġ li jkun possibbli għall-entità li żżomm jew tissospendi l-prova tar-reġistrazzjoni fir-reġistru ċentrali, sakemm in-nuqqasijiet ikunu ġew ikkoreġuti.

(30)

L-entitajiet responsabbli mir-reġistri ċentrali jenħtieġ li jwettqu l-funzjonijiet tagħhom mingħajr influwenza indebita, inkluż kwalunkwe influwenza politika jew industrijali indebita fir-rigward tal-verifika tal-informazzjoni, l-impożizzjoni ta' miżuri jew sanzjonijiet u l-għoti ta' aċċess lil persuni b'interess leġittimu. Għal dak l-għan, jenħtieġ li l-entitajiet responsabbli mir-reġistri ċentrali jkollhom fis-seħħ politiki għall-prevenzjoni u l-ġestjoni tal-kunflitti ta' interess.

(31)

L-entitajiet responsabbli mir-reġistri ċentrali huma f'pożizzjoni tajba biex jidentifikaw, b'mod rapidu u effiċjenti, dawk l-individwi li finalment għandhom is-sjieda jew jikkontrollaw entitajiet u arranġamenti ġuridiċi, inkluż individwi deżinjati b'rabta ma' sanzjonijiet finanzjarji mmirati. Id-detezzjoni f'waqtha ta' strutturi ta' sjieda u ta' kontroll tikkontribwixxi għat-titjib tal-fehim tal-esponiment għal riskji ta' nonimplimentazzjoni u evażjoni tas-sanzjonijiet finanzjarji mmirati, u għall-adozzjoni ta' miżuri ta' mitigazzjoni biex jitnaqqsu tali riskji. Huwa għalhekk importanti li l-entitajiet responsabbli mir-reġistri ċentrali jkunu meħtieġa jeżaminaw l-informazzjoni dwar is-sjieda benefiċjarja li jżommu meta mqabbla mad-deżinjazzjonijiet fir-rigward ta' sanzjonijiet finanzjarji mmirati, kemm immedjatament permezz ta' tali deżinjazzjoni kif ukoll regolarment wara dan, sabiex jiġi individwat jekk bidliet fis-sjieda jew fl-istruttura ta' kontroll tal-entità ġuridika jew l-arranġament ġuridiku jwasslux għal riskji ta' evażjoni tas-sanzjonijiet finanzjarji mmirati. Indikazzjoni fir-reġistri ċentrali li l-entitajiet ġuridiċi jew l-arranġamenti ġuridiċi huma assoċjati ma' persuni jew entitajiet soġġetti għal sanzjonijiet finanzjarji mmirati jenħtieġ li tikkontribwixxi għall-attivitajiet tal-awtoritajiet kompetenti u tal-awtoritajiet inkarigati mill-implimentazzjoni tal-miżuri restrittivi tal-Unjoni.

(32)

Ir-rappurtar tad-diskrepanzi bejn l-informazzjoni dwar is-sjieda benefiċjarja miżmuma fir-reġistri ċentrali u l-informazzjoni dwar is-sjieda benefiċjarja disponibbli għall-entitajiet marbutin b'obbligu u, fejn applikabbli, għall-awtoritajiet kompetenti, huwa mekkaniżmu effettiv biex tiġi vverifikata l-akkuratezza tal-informazzjoni. Kwalunkwe diskrepanza identifikata jenħtieġ li tiġi rrappurtata u solvutamalajr, f'konformità mar-rekwiżiti tal-protezzjoni tad-data.

(33)

Meta r-rappurtar ta' diskrepanzi mill-FIUs u minn awtoritajiet kompetenti oħra jippreġudika analiżi ta' tranżazzjoni suspettuża jew investigazzjoni kriminali li tkun għaddejja, jenħtieġ li l-FIUs jew awtoritajiet kompetenti oħra jipposponu r-rappurtar tad-diskrepanza sa meta ma jkunx għad fadal raġunijiet kontra tali rappurtar. Barra minn hekk, jenħtieġ li l-FIUs u l-awtoritajiet kompetenti ma jirrapportaw l-ebda diskrepanza meta dan jikser xi dispożizzjoni ta' kunfidenzjalità tad-dritt nazzjonali jew jikkostitwixxi reat ta' preavviż.

(34)

Sabiex jiġu żgurati kundizzjonijiet ekwi fl-applikazzjoni tal-kunċett ta' sjieda benefiċjarja, huwa essenzjali li, madwar l-Unjoni, kanali u mezzi tar-rappurtar uniformi jeżistu għall-entitajiet ġuridiċi u trustees ta’ trusts espressi jew persuni li għandhom kariga ekwivalenti f’arranġamenti ġuridiċi simili. Għal dak il-għan, il-format għal-preżentazzjoni ta' informazzjoni dwar is-sjieda benefiċjarja fir-reġistri ċentrali rilevanti jenħtieġ li jkun uniformi u joffri garanziji ta' trasparenza u ta' ċertezza tad-dritt.

(35)

Sabiex jiġu żgurati kundizzjonijiet ekwi fost id-diversi tipi ta' forom ġuridiċi, jenħtieġ li t-trustees jkunu rikjesti wkoll jiksbu u jżommu informazzjoni dwar is-sjieda benefiċjarja u li jikkomunikaw dik l-informazzjoni lil reġistru ċentrali jew lil bażi tad-data ċentrali.

(36)

Huwa essenzjali li l-informazzjoni dwar is-sjieda benefiċjarja tibqa' disponibbli permezz tar-reġistri ċentrali u permezz tas-sistema tal-interkonnessjoni tar-reġistri ċentrali għal minimu ta' ħames snin wara li l-entità ġuridika tkun ġiet xolta jew l-arranġament ġuridiku jkun waqaf jeżisti. Jenħtieġ li l-Istati Membri jkunu jistgħu jipprovdu bil-liġi raġunijiet addizzjonali għall-ipproċessar tal-informazzjoni dwar is-sjieda benefiċjarja għall-finijiet għajr l-AML/CFT, jekk tali pproċessar jissodisfa objettiv ta' interess pubbliku u jikkostitwixxi miżura neċessarja u proporzjonata f'soċjetà demokratikagħall-iskop leġittimu segwit.

(37)

L-FIUs, l-awtoritajiet kompetenti l-oħra u l-korpi awtoregolatorji jenħtieġ li jkollhom aċċess immedjat, mhux iffiltrat, dirett u liberu għall-informazzjoni dwar is-sjieda benefiċjarja għall-finijiet tal-prevenzjoni, id-detezzjoni, l-investigazzjoni u l-prosekuzzjoni tal-ħasil tal-flus, ir-reati predikati tiegħu jew il-finanzjament tat-terroriżmu. Jenħtieġ li l-entitajiet marbutin b'obbligu jkollhom ukoll aċċess għar-reġistri ċentrali meta jwettqu d-diliġenza dovuta fir-rigward tal-klijenti. L-Istati Membri jistgħu jagħżlu li jagħmlu l-aċċess mill-entitajiet marbutin b'obbligu soġġett għall-ħlas ta' tariffa. Madankollu, dawk it-tariffi jenħtieġ li jkunu strettament limitati għal dak li huwa meħtieġ biex jiġu koperti l-kostijiet tal-iżgurar tal-kwalità tal-informazzjoni miżmuma f’dawk ir-reġistri u biex l-informazzjoni ssir disponibbli, u jenħtieġ li ma jdgħajfux l-aċċess effettiv għall-informazzjoni dwar is-sjieda benefiċjarja.

(38)

L-aċċess dirett, f'waqtu u mhux iffiltrat għall-informazzjoni dwar is-sjieda benefiċjarja mill-awtoritajiet pubbliċi nazzjonali huwa kruċjali wkoll biex tiġi żgurata l-implimentazzjoni xierqa tal-miżuri restrittivi tal-Unjoni, biex jiġi evitat ir-riskju ta' nonimplimentazzjoni u ta' evażjoni tal-miżuri restrittivi tal-Unjoni, kif ukoll biex jiġi investigat ksur ta’ dawk il-miżuri. Għal dawk ir-raġunijiet, l-awtoritajiet kompetenti għall-implimentazzjoni ta’ tali miżuri restrittivi, identifikati taħt ir-Regolamenti rilevanti tal-Kunsill adottati abbażi tal-Artikolu 215 tat-Trattat dwar il-Funzjonament tal-Unjoni Ewropea (TFUE) jenħtieġ li jkollhom aċċess dirett u immedjat għall-informazzjoni li tkun miżmuma fir-reġistri ċentrali interkonnessi.

(39)

Jenħtieġ li jkun possibbli għall-korpi, l-uffiċċji u l-aġenziji tal-Unjoni li għandhom rwol fil-qafas tal-AML/CFT tal-Unjoni li jaċċessaw informazzjoni dwar is-sjieda benefiċjarja fit-twettiq ta’ dmirijiethom. Dan huwa l-każ għall-Uffiċċju tal-Prosekutur Pubbliku Ewropew (UPPE), iżda wkoll għall-Uffiċċju Ewropew ta’ Kontra l-Frodi (OLAF) fit-twettiq tal-investigazzjonijiet tagħhom, kif ukoll għall-Europol u l-Eurojust meta jappoġġaw investigazzjonijiet mill-awtoritajiet nazzjonali. Bħala awtorità superviżorja, l-AMLA għandha tingħata aċċess għal informazzjoni dwar is-sjieda benefiċjarja meta twettaq attivitajiet superviżorji. Sabiex jiġi żgurat li l-AMLA tkun tista' tappoġġa b'mod effettiv l-attivitajiet tal-FIUs, jenħtieġ li tkun tista' taċċessa wkoll informazzjoni dwar is-sjieda benefiċjarja fil-kuntest ta' analiżijiet konġunti.

(40)

Sabiex jiġu limitati l-interferenzi mad-dritt għar-rispett għall-ħajja privata u għall-protezzjoni tad-data personali, l-aċċess għall-informazzjoni dwar iż-żjieda benefiċċjarja miżmuma f'reġistri ċentrali mill-pubbliku jenħtieġ li jkun kundizzjonali fuq id-dimostrazzjoni ta' interess leġittimu. Approċċi diverġenti mill-Istati Membri rigward il-verifika li jeżisti tali interess leġittimu jistgħu jfixklu l-implimentazzjoni armonizzata tal-qafas tal-AML/CFT u l-iskop preventiv li għalih huwa permess tali aċċess mill-membri tal-pubbliku. Għalhekk huwa meħtieġ li jitfassal qafas għar-rikonoxximent u l-verifika tal-interess leġittimu fil-livell tal-Unjoni, b'rispett sħiħ tal-Karta tad-Drittijiet Fundamentali tal-Unjoni Ewropea (il-“Karta”). Fejn jeżisti interess leġittimu, jenħtieġ li l-pubbliku jkun jista' jaċċessa informazzjoni dwar is-sjieda benefiċjarja ta' entitajiet ġuridiċi u arranġamenti ġuridiċi. L-interess leġittimu jenħtieġ li jiġi preżunt għal ċerti kategoriji tal-pubbliku. L-aċċess abbażi ta' interess leġittimu jenħtieġ li ma jkunx kundizzjonali fuq l-istatus jew il-forma ġuridika tal-persuna li titlob l-aċċess.

(41)

L-organizzazzjonijiet nongovernattivi, l-akkademiċi u l-ġurnalisti investigattivi kkontribwixxew għall-objettivi tal-Unjoni fil-ġlieda kontra l-ħasil tal-flus, ir-reati predikati tiegħu u l-finanzjament tat-terroriżmu. Għalhekk, jenħtieġ li dawk li jiġu meqjusa li għandhom interess leġittimu li jaċċessaw informazzjoni dwar is-sjieda benefiċjarja, li huwa ta' importanza vitali għalihom biex iwettqu l-funzjonijiet tagħhom u jeżerċitaw skrutinju pubbliku, kif xieraq. Il-kapaċità ta' aċċess għar-reġistri ċentrali jenħtieġ li ma tkunx kundizzjonali fuq il-mezz jew il-pjattaforma li permezz tagħhom iwettqu l-attivitajiet tagħhom, jew fuq esperjenza preċedenti fil-qasam. Sabiex tali kategoriji jkunu jistgħu jwettqu l-attivitajiet tagħhom b'mod effettiv u jevitaw riskji ta' ritaljazzjoni, jenħtieġ li jkunu jistgħu jaċċessaw informazzjoni dwar entitajiet ġuridiċi u arranġamenti ġuridiċi mingħajr ma juru rabta ma' dawk l-entitajiet jew arranġamenti. Kif previst fir-regoli tal-Unjoni dwar il-protezzjoni tad-data, kwalunkwe aċċess mis-sidien benefiċjarji għal informazzjoni dwar l-ipproċessar magħmul mid-data personali tagħhom jenħtieġ li ma jaffettwax b'mod negattiv id-drittijiet u l-libertajiet ta' oħrajn, inkluż id-dritt għas-sigurtà tal-persuna. Id-divulgazzjoni lis-sid benefiċjarju li persuni li jaġixxu għall-finijiet ta' ġurnaliżmu jew ta' organizzazzjonijiet tas-soċjetà ċivili jkunu kkonsultaw id-data personali tagħhom tirriskja li timmina s-sikurezza tal-ġurnalisti u tal-membri tal-organizzazzjonijiet tas-soċjetà ċivili li jwettqu investigazzjonijiet dwar attivitajiet kriminali potenzjali. Għalhekk, sabiex jiġi rikonċiljat id-dritt għall-protezzjoni tad-data personali mad-dritt għall-informazzjoni u l-espressjoni għall-ġurnalisti f'konformità mal-Artikolu 85 tar-Regolament (UE) 2016/679 tal-Parlament Ewropew u tal-Kunsill (15) u sabiex jiġi żgurat ir-rwol tal-organizzazzjonijiet tas-soċjetà ċivili fil-prevenzjoni, l-investigazzjoni u d-detezzjoni tal-ħasil ta' flus, ir-reati predikati tiegħu jew il-finanzjament tat-terroriżmu f'konformità mal-Artikolu 23(1), il-punt (d), ta' dak ir-Regolament, jenħtieġ li l-entitajiet responsabbli mir-reġistri ċentrali ma jikkondividux informazzjoni mas-sidien benefiċjarji dwar il-proċessar tad-data tagħhom minn dawk il-kategoriji tal-pubbliku, iżda l-fatt biss li l-persuni li jaġixxu għall-finijiet ta' ġurnaliżmu jew tal-organizzazzjonijiet tas-soċjetà ċivili kkonsultaw id-data tagħhom.

(42)

L-integrità tat-tranżazzjonijiet tan-negozju hija kritika għall-funzjonament tajjeb tas-suq intern u tas-sistema finanzjarja tal-Unjoni. Għal dak l-għan, huwa importanti li l-persuni li jixtiequ jagħmlu negozju ma' entitajiet ġuridiċi jew arranġamenti ġuridiċi fl-Unjoni jkunu jistgħu jaċċessaw informazzjoni dwar is-sidien benefiċjarji tagħhom biex jivverifikaw li l-kontropartijiet tan-negozju potenzjali tagħhom ma jkunux involuti fil-ħasil tal-flus, ir-reati predikati tiegħu jew il-finanzjament tat-terroriżmu. Hemm evidenza mifruxa li l- kriminali jaħbu l-identità tagħhom wara strutturi korporattivi, u li dan jippermetti lil dawk li jistgħu jidħlu fi tranżazzjonijiet ma' entità ġuridika jew arranġament ġuridiku jsiru konxji tal-identità tas-sidien benefiċjarji, li jikkontribwixxi għall-ġlieda kontra l-użu ħażin ta’ entitajiet ġuridiċi jew arranġamenti ġuridiċi għal finijiet kriminali. Tranżazzjoni ma tkunx limitata għal attivitajiet ta' negozjar jew il-forniment jew ix-xiri ta' prodotti jew servizzi, iżda tista' tinkludi wkoll, sitwazzjonijiet fejn persuna x'aktarx tinvesti fondi kif definit fl-Artikolu 4, il-punt (25) tad-Direttiva (UE) 2015/2366 tal-Parlament Ewropew u tal-Kunsill (16) jew kriptoassi fl-entità ġuridika jew l-arranġament ġuridiku, jew li takkwista l-entità ġuridika. Għalhekk, ir-rekwiżit ta' interess leġittimu għall-aċċess għal informazzjoni dwar is-sjieda benefiċjarja jenħtieġ li ma jitqiesx li jkun issodisfat biss minn persuni li jwettqu attivitajiet ekonomiċi jew kummerċjali.

(43)

Minħabba n-natura transfruntiera tal-ħasil tal-flus, ir-reat predikat tiegħu u l-finanzjament tat-terroriżmu, jenħtieġ li jiġi rikonoxxut li l-awtoritajiet ta' pajjiżi terzi għandhom interess leġittimu li jaċċessaw informazzjoni dwar is-sjieda benefiċjarja dwar l-entitajiet ġuridiċi u l-arranġamenti ġuridiċi tal-Unjoni, meta tali aċċess ikun meħtieġ minn dawk l-awtoritajiet fil-kuntest ta' investigazzjonijiet jew analiżi speċifiċi biex iwettqu l-kompiti tagħhom fir-rigward tal-AML/CFT. Bl-istess mod, l-entitajiet li huma soġġetti għar-rekwiżiti tal-AML/CFT f'pajjiżi terzi jenħtieġ li jkunu jistgħu jaċċessaw l-informazzjoni dwar is-sjieda benefiċjarja fir-reġistri ċentrali tal-Unjoni meta jkunu meħtieġa jieħdu miżuri ta' diliġenza dovuta fir-rigward tal-klijenti f'konformità mar-rekwiżiti tal-AML/CFT f'dawk il-pajjiżi fir-rigward tal-entitajiet ġuridiċi u l-arranġamenti ġuridiċi stabbiliti fl-Unjoni. Kwalunkwe aċċess għall-informazzjoni li tinsab fir-reġistri ċentrali jenħtieġ li jkun konformi mad-dritt tal-Unjoni dwar il-protezzjoni tad-data personali, u b'mod partikolari mal-Kapitolu V tar-Regolament (UE) 2016/679. Għal dak l-għan, ir-reġistri ċentrali jenħtieġ li jikkunsidraw ukoll jekk it-talbiet minn persuni stabbiliti barra mill-Unjoni jistgħux jaqgħu taħt il-kundizzjonijiet li fihom tista' tintuża deroga skont l-Artikolu 49 ta' dak ir-Regolament. Hija ġurisprudenza stabbilita tal-Qorti tal-Ġustizzja tal-Unjoni Ewropea (Il-“Qorti tal-Ġustizzja”) li l-ġlieda kontra l-ħasil tal-flus, ir-reati predikati tiegħu u l-finanzjament tat-terroriżmu huma objettiv ta' interess pubbliku ġenerali, u li l-objettivi tas-sigurtà pubblika huma marbuta magħhom. Sabiex tiġi ppreservata l-integrità tal-investigazzjonijiet u l-analiżijiet minn FIUs ta' pajjiżi terzi u mill-awtoritajiet tal-infurzar tal-liġi u ġudizzjarji, jenħtieġ li r-reġistri ċentrali jżommu lura milli jiżvelaw lis-sidien benefiċjarji kwalunkwe pproċessar tad-data personali tagħhom minn dawk l-awtoritajiet sa fejn tali żvelar jaffettwa b'mod negattiv l-investigazzjonijiet u l-analiżi ta’ dawk l-awtoritajiet. Madankollu, sabiex jiġu ppreservati d-drittijiet tas-suġġett tad-data, jenħtieġ li r-reġistri ċentrali jżommu lura biss milli jiżvelaw dik l-informazzjoni sakemm tali żvelar ma jkunx għadu jipperikola investigazzjoni jew analiżi. Jenħtieġ li dik l-iskadenza tiġi stabbilita għal perjodu massimu ta' ħames snin, u jenħtieġ li jiġi estiż biss fuq talba ġġustifikata mill-awtorità fil-pajjiż terz.

(44)

Sabiex jiġi żgurat reġim ta' aċċess li huwa flessibbli biżżejjed u li kapaċi jadatta għal ċirkostanzi emerġenti ġodda, jenħtieġ li l-Istati Membri jkunu jistgħu jagħtu aċċess għal informazzjoni dwar is-sjieda benefiċjarja, fuq bażi ta' każ b'każ, lil kwalunkwe persuna li tista' turi interess leġittimu marbut mal-prevenzjoni u l-ġlieda kontra l-ħasil tal-flus, ir-reati predikati tiegħu u l-finanzjament tat-terroriżmu.Jenħtieġ li l-Istati Membri jiġbru l-informazzjoni dwar każijiet ta' interess leġittimu li jmur lil hinn mill-kategoriji identifikati f'din id-Direttiva, u jinnotifikawhom lill-Kummissjoni.

(45)

Il-kriminali jistgħu jużaw ħażin l-entitajiet ġuridiċi fi kwalunkwe punt. Madankollu, ċerti fażijiet fiċ-ċiklu tal-ħajja tal-entitajiet ġuridiċi huma assoċjati ma' riskji ogħla, bħal fl-istadju tal-formazzjoni tal-kumpanija, jew meta jkun hemm bidliet fl-istruttura tal-kumpanija, bħall-konverżjoni, il-fużjoni jew id-diviżjoni, li jippermettu lill-kriminali jiksbu l-kontroll tal-entità ġuridika. Il-qafas tal-Unjoni jipprovdi sorveljanza mill-awtoritajiet pubbliċi matul dawk il-fażijiet tal-eżistenza ta' entità ġuridika skont id-Direttiva (UE) 2017/1132 tal-Parlament Ewropew u tal-Kunsill (17). Sabiex jiġi żgurat li dawk l-awtoritajiet pubbliċi jkunu jistgħu jwettqu l-attivitajiet tagħhom b'mod effettiv u jikkontribwixxu għall-prevenzjoni tal-użu ħażin ta' entitajiet ġuridiċi għal finijiet kriminali, jenħtieġ li jkollhom aċċess għall-informazzjoni li tinsab fir-reġistri ċentrali interkonnessi.

(46)

Bil-ħsieb li jiġu żgurati l-legalità u r-regolarità tan-nefqa li tinsab fil-kontijiet ippreżentati lill-Kummissjoni taħt il-programmi ta' finanzjament tal-Unjoni, l-awtoritajiet tal-programm iridu jiġbru u jaħżnu fis-sistemi ta' ġestjoni u ta' kontroll tagħhom informazzjoni dwar is-sidien benefiċjarji tar-riċevituri tal-finanzjament tal-Unjoni. Għalhekk huwa meħtieġ li jiġi żgurat li l-awtoritajiet tal-programm fl-Istati Membri jkollhom aċċess għal informazzjoni dwar is-sjieda benefiċjarja miżmuma fir-reġistri ċentrali interkonnessi biex jaqdu dmirijiethom biex jipprevjenu, jindividwaw, jikkoreġu u jirrapportaw dwar irregolaritajiet, inkluż frodi, skont ir-Regolament (UE) 2021/1060 tal-Parlament Ewropew u tal-Kunsill (18).

(47)

Sabiex jipproteġu l-interessi finanzjarji tal-Unjoni, jenħtieġ li l-awtoritajiet tal-Istati Membri li jimplimentaw il-Faċilità għall-Irkupru u r-Reżiljenza skont ir-Regolament (UE) 2021/241 tal-Parlament Ewropew u tal-Kunsill (19) ikollhom aċċess għar-reġistri ċentrali interkonnessi biex jiġbru l-informazzjoni dwar is-sjieda benefiċjarja dwar ir-riċevitur tal-fondi jew il-kuntrattur tal-Unjoni meħtieġa skont dak ir-Regolament.

(48)

Il-korruzzjoni fl-akkwist pubbliku tagħmel ħsara lill-interess pubbliku, iddgħajjef il-fiduċja pubblika u għandha impatt negattiv fuq il-ħajja taċ-ċittadini. Minħabba l-vulnerabbiltà tal-proċeduri tal-akkwist pubbliku għall-korruzzjoni, il-frodi u reati predikati oħra, jenħtieġ li jkun possibbli għall-awtoritajiet nazzjonali b'kompetenzi fil-proċeduri tal-akkwist pubbliku li jikkonsultaw ir-reġistri ċentrali biex jaċċertaw l-identità tal-persuni fiżiċi li fl-aħħar mill-aħħar jippossjedu jew jikkontrollaw l-offerenti, u jidentifikaw każijiet fejn ikun hemm riskju li l-kriminali jistgħu jkunu involuti fil-proċedura ta' akkwist. L-aċċess f'waqtu għall-informazzjoni miżmuma fir-reġistru ċentrali huwa kruċjali biex jiġi żgurat li l-awtoritajiet pubbliċili jwettqu proċeduri ta’ akkwist pubbliku jkunu jistgħu jissodisfaw il-funzjonijiet tagħhom b'mod effettiv, inkluż billi jindividwaw każijiet ta' korruzzjoni f’dawk il-proċeduri. Il-kunċett ta' awtoritajiet pubbliċi fir-rigward tal-proċeduri ta' akkwist jenħtieġ li jinkludi l-kunċett ta' awtoritajiet kontraenti fl-atti legali tal-Unjoni relatata mal-proċeduri tal-akkwist pubbliku għal oġġetti u s-servizzi, jew konċessjonijiet kif ukoll ma' kwalunkwe awtorità pubblika deżinjata mill-Istati Membri biex tivverifika l-legalità tal-proċeduri ta' akkwist pubbliku, li mhijiex awtorità kompetenti għall-finijiet tal-AML/CFT.

(49)

Prodotti bħall-iskrinjar tal-klijenti offruti minn fornituri terzi jappoġġaw lill-entitajiet marbutin b'obbligu fit-twettiq tad-diliġenza dovuta tal-klijent. Tali prodotti jipprovdulhom perspettiva olistika fuq il-klijent, li tippermettilhom jieħdu deċiżjonijiet infurmati dwar il-klassifikazzjoni tar-riskju tagħhom, miżuri ta' mitigazzjoni li għandhom jiġu applikati u suspetti possibbli fir-rigward tal-attivitajiet tal-klijenti. Dawk il-prodotti jikkontribwixxu wkoll għall-ħidma tal-awtoritajiet kompetenti fl-analiżi ta' tranżazzjonijiet u investigazzjonijiet suspettużi f'każijiet potenzjali ta' ħasil tal-flus, ir-reati predikati tiegħu u l-finanzjament tat-terroriżmu billi jikkomplementaw l-informazzjoni dwar is-sjieda benefiċjarja b'soluzzjonijiet tekniċi oħra li jippermettu lill-awtoritajiet kompetenti jkollhom perspettiva usa' ta' skemi kriminali kumplessi, inkluż permezz tal-lokalizzazzjoni tal-awturi. Għalhekk, dawngħandhom rwol kritiku fit-traċċar tal-movimenti dejjem aktar kumplessi u rapidi li jikkaratterizzaw l-iskemi tal-ħasil tal-flus. Minħabba l-funzjoni stabbilita sew tagħhom fl-infrastruttura ta' konformità, huwa ġġustifikat li jitqies li fornituri li joffru dawk il-prodotti għandhom interess leġittimu fl-aċċess għall-informazzjoni miżmuma mir-reġistri ċentrali, dment li d-data miksuba mir-reġistru tiġi offruta biss lill-entitajiet marbutin b'obbligu u lill-awtoritajiet kompetenti fl-Unjoni għat-twettiq ta' kompiti relatati mal-prevenzjoni u l-ġlieda kontra l-ħasil tal-flus, ir-reati predikati tiegħu u l-finanzjament tat-terroriżmu.

(50)

Sabiex jiġu evitati approċċi diverġenti lejn l-implimentazzjoni tal-kunċett ta' interess leġittimu għall-fini ta' aċċess għal informazzjoni dwar is-sjieda benefiċjarja, jenħtieġ li l-proċeduri għar-rikonoxximent ta' tali interess leġittimu jiġu armonizzati. Dan jenħtieġ li jinkludi mudelli komuni għall-applikazzjoni u r-rikonoxximent ta' interess leġittimu, li jiffaċilitaw ir-rikonoxximent reċiproku mir-reġistri ċentrali madwar l-Unjoni. Għal dak l-għan, jenħtieġ li l-Kummissjoni tingħata setgħat ta’ implimentazzjoni biex tistabbilixxi mudelli u proċeduri armonizzati.

(51)

Sabiex jiġi żgurat li l-proċessi għall-għoti ta' aċċess għal dawk b'interess leġittimu vverifikat preċedentement ma jkunux ta' piż bla bżonn, l-aċċess jista' jiġġedded abbażi ta' proċeduri simplifikati li permezz tagħhom l-entità responsabbli mir-reġistru ċentrali tiżgur li l-informazzjoni miksuba preċedentement għall-finijiet ta' verifika tkun korretta u rilevanti, u aġġornata fejn meħtieġ.

(52)

Barra minn hekk, bil-għan li jiġi żgurat approċċ proporzjonat u bbilanċjat u biex jiġu ggarantiti d-drittijiet għall-ħajja privata u għall-protezzjoni tad-data personali, jenħtieġ li l-Istati Membri jipprevedu eżenzjonijiet għall-iżvelar ta' informazzjoni personali dwar is-sid benefiċjarju mir-reġistri ċentrali u għall-aċċess għal tali informazzjoni, f'ċirkostanzi eċċezzjonali, fejn dik l-informazzjoni tesponi lis-sid benefiċjarju għal riskju sproporzjonat ta' frodi, ħtif, rikatt, estorsjoni, fastidju, vjolenza jew intimidazzjoni. Jenħtieġ li jkun possibbli wkoll li l-Istati Membri jirrikjedu li r-reġistrazzjoni ssir online biex b'hekk tiġi identifikata kull persuna li titlob informazzjoni mir-reġistru ċentrali, kif ukoll jirrikjedu l-ħlas ta' tariffa biex tiġi aċċessata l-informazzjoni fir-reġistru minn persuni b’interess leġittimu. Madankollu, dawk it-tariffi jenħtieġ li jkunu strettament limitati għal dak li huwa meħtieġ biex jiġu koperti l-kostijiet tal-iżgurar tal-kwalità tal-informazzjoni miżmuma fir-reġistri ċentrali u biex l-informazzjoni ssir disponibbli, u jenħtieġ li ma jdgħajfux l-aċċess effettiv għall-informazzjoni dwar is-sjieda benefiċjarja.

(53)

L-identifikazzjoni tal-applikanti hija meħtieġa biex jiġi żgurat li persuni b'interess leġittimu biss ikunu jistgħu jaċċessaw informazzjoni dwar is-sjieda benefiċjarja. Madankollu, il-proċess ta' identifikazzjoni jenħtieġ li jitwettaq b'tali mod li ma jwassalx għal diskriminazzjoni, inkluż abbażi tal-pajjiż ta' residenza jew tan-nazzjonalità tal-applikanti. Għal dak l-għan, jenħtieġ li l-Istati Membri jipprovdu mekkaniżmi ta' identifikazzjoni suffiċjenti, inkluż iżda mhux limitat għal skemi ta’ identifikazzjoni elettronika notifikati skont ir-Regolament (UE) Nru 910/2014 tal-Parlament Ewropew u tal-Kunsill (20), u servizzi fiduċjarji kwalifikati rilevanti, biex il-persuni b'interess leġittimu jkunu jistgħu jaċċessaw b'mod effettiv l-informazzjoni dwar is-sjieda benefiċjarja.

(54)

Id-Direttiva (UE) 2018/843 kisbet l-interkonnessjoni tar-reġistri ċentrali tal-Istati Membri li fihom informazzjoni dwar is-sjieda benefiċjarja permezz tal-Pjattaforma Ċentrali Ewropea stabbilita permezz tad-Direttiva (UE) 2017/1132. L-interkonnessjoni wriet li hija essenzjali għal aċċess transfruntier effettiv għall-informazzjoni dwar is-sjieda benefiċjarja mill-awtoritajiet kompetenti, l-entitajiet marbutin b'obbligu u l-persuni b'interess leġittimu. Dan ser jirrikjedi żvilupp kontinwu biex jiġu implimentati r-rekwiżiti regolatorji evoluti qabel it-traspożizzjoni ta' din id-Direttiva. Għalhekk, jenħtieġ li l-ħidma dwar l-interkonnessjoni tkompli bl-involviment tal-Istati Membri fil-funzjonament tas-sistema sħiħa, li jenħtieġ li jkun żgurat permezz ta' djalogu regolari bejn il-Kummissjoni u r-rappreżentanti tal-Istati Membri dwar il-kwistjonijiet relatati mal-operat tas-sistema u dwar l-iżvilupp tagħha fil-futur.

(55)

Permezz tal-interkonnessjoni tar-reġistri ċentrali tal-Istati Membri, kemm l-aċċess nazzjonali kif ukoll dak transfruntier għall-informazzjoni dwar is-sjieda benefiċjarja tal-arranġamenti ġuridiċi li jinsabu fir-reġistru ċentrali ta' kull Stat Membru jenħtieġ li jingħata abbażi tad-definizzjoni ta' interess leġittimu, bis-saħħa ta' deċiżjoni meħuda mill-entità responsabbli mir-reġistru ċentrali rilevanti. Sabiex jiġi aċċertat li d-deċiżjonijiet dwar il-limitazzjoni tal-aċċess għall-informazzjoni dwar is-sjieda benefiċjarja jistgħu jiġu rieżaminati, jenħtieġ li jiġu stabbiliti mekkaniżmi ta' appell kontra tali deċiżjonijiet. Bil-għan li tiġi żgurata reġistrazzjoni u skambju ta' informazzjoni koerenti u effiċjenti, l-Istati Membri jenħtieġ li jiżguraw li l-entità tagħhom responsabbli mir-reġistru ċentrali fl-Istat Membru tagħhom tikkoopera mal-kontropartijiet tagħha fi Stati Membri oħrajn, inkluż billi tikkondividi l-informazzjoni li tikkonċerna t-trusts u arranġamenti ġuridiċi simili li jkunu regolati bil-liġi ta' Stat Membru wieħed u amministrati fi Stat Membru ieħor jew li t-trustee tiegħu jkun stabbilit jew jirresjedi fi Stat Membru ieħor.

(56)

Ir-Regolament (UE) 2016/679 japplika għall-ipproċessar ta' data personali għall-finijiet ta' din id-Direttiva. Il-persuni fiżiċi li d-data personali tagħhom tkun miżmuma fir-reġistri ċentrali bħala s-sidien benefiċjarji jenħtieġ li jkunu mgħarrfa dwar ir-regoli applikabbli dwar il-protezzjoni tad-data. Barra minn hekk, jenħtieġ li tkun disponibbli biss data personali li hija aġġornata u li tikkorrispondi għas-sidien benefiċjarji reali, u jenħtieġ li s-sidien benefiċjarji jkunu mgħarrfa dwar id-drittijiet tagħhom taħt il-qafas ġuridiku tal-Unjoni dwar il-protezzjoni tad-data u l-proċeduri applikabbli għall-eżerċitar ta' dawk id-drittijiet.

(57)

Dewmien fl-aċċess għall-informazzjoni mill-FIUs u minn awtoritajiet kompetenti oħrajn dwar l-identità tad-detenturi ta' kontijiet bankarji u kontijiet ta' pagament, kontijiet ta' titoli, kontijiet tal-kriptoassi u kaxxi ta' depożitu sikur ifixkel id-detezzjoni tat-trasferimenti ta' fondi relatati mal-ħasil tal-flus u l-finanzjament tat-terroriżmu. Għalhekk huwa essenzjali li jiġu stabbiliti mekkaniżmi awtomatizzati ċentralizzati, bħal reġistru jew sistema għall-irkupru tad-data, fl-Istati Membri kollha bħala mezz effiċjenti għall-aċċess f'waqtu ta' informazzjoni dwar l-identità ta' detenturi ta' kontijiet bankarji u ta' kontijiet ta’ pagament, ta' kontijiet ta' titoli, kontijiet tal-kriptoassi u kaxxi ta' depożitu sikur, id-detenturi ta' prokura tagħhom u s-sjieda benefiċjarji tagħhom. Tali informazzjoni jenħtieġ li tinkludi l-informazzjoni storika dwar detenturi ta' kontijiet tal-klijenti magħluqa, kontijiet bankarji u kontijiet ta' pagament, inkluż IBANs virtwali, kontijiet tat-titoli, kontijiet tal-kriptoassi, u kaxxi ta' depożitu sikur. Meta jiġu applikati d-dispożizzjonijiet dwar l-aċċess, huwa xieraq li jintużaw mekkaniżmi diġà eżistenti sakemm l-FIUs nazzjonali jkunu jistgħu jaċċessaw id-data rikjesta b'mod immedjat u eżatt kif inhi. Jenħtieġ li l-Istati Membri jikkunsidraw il-possibilità li jfornu lil dawn il-mekkaniżmi b'informazzjoni addizzjonali li tkun meqjusa neċessarja u proporzjonata sabiex tinkiseb mitigazzjoni aktar effettiva tar-riskji relatati mal-ħasil tal-flus, mar-reati predikati tiegħu u mal-finanzjament tat-terroriżmu. Jenħtieġ li tiġi żgurata l-kunfidenzjalità sħiħa fir-rigward ta' tali investigazzjonijiet u għal talbiet għal informazzjoni relatata mill-FIUs, AMLA fil-kuntest ta’ analiżijiet konġunti u minn awtoritajiet superviżorji.

(58)

L-IBANs virtwali huma numri virtwali maħruġa minn istituzzjonijiet ta' kreditu u instituzzjonijiet finanzjarji li jippermettu li l-pagamenti jiġu diretti mill-ġdid lejn kontijiet bankarji fiżiċi jew lejn kontijiet ta' pagamenti fiżiċi. Filwaqt li l-IBANs virtwali jistgħu jintużaw min-negozji għal skopijiet leġittimi, pereżempju, biex jiġi ssimplifikat il-proċess tal-ġbir u tat-trażmissjoni ta' pagamenti bejn il-fruntieri, dawn huma assoċjati wkoll ma' riskji akbar ta' ħasil tal-flus, ir-reati predikati tiegħu jew il-finanzjament tat-terroriżmu peress li jistgħu jintużaw biex jaħbu l-identità tad-detentur tal-kont, u dan jagħmilha diffiċli għall-FIUs biex jittraċċaw il-fluss tal-fondi, jidentifikaw il-post tal-kont u jimponu l-miżuri meħtieġa, inkluż is-sospensjoni jew il-monitoraġġ tal-kont. Sabiex jiġu mitigati dawk ir-riskji u jiġu ffaċilitati t-traċċar u d-detezzjoni ta' flussi illeċiti mill-FIUs, il-mekkaniżmi awtomatizzati ċentralizzati jenħtieġ li jinkludu informazzjoni dwar IBANs virtwali assoċjati ma' kont bankarju jew kont ta' pagament.

(59)

Sabiex tiġi rrispettata l-privatezza u tiġi protetta d-data personali, jenħtieġ li d-data minima neċessarja għat-twettiq tal-investigazzjonijiet dwar l-AML/CFT tinżamm f'mekkaniżmi awtomatizzati ċentralizzati għall-kontijiet bankarji jew kontijiet ta' pagament, kontijiet ta' titoli u kontijiet tal-krtiptoassiJenħtieġ li jkun possibbli għall-Istati Membri li jiddeterminaw liema data addizzjonali hija utli u proporzjonata li tinġabar. Waqt it-traspożizzjoni tad-dispożizzjonijiet relatati ma' dawk il-mekkaniżmi, l-Istati Membri jenħtieġ li jistabbilixxu perjodi ta' żamma li huma ekwivalenti għall-perjodu ta' żamma tad-dokumentazzjoni u tal-informazzjoni li tinkiseb fl-applikazzjoni tal-miżuri ta' diliġenza dovuta fir-rigward tal-klijenti. Jenħtieġ li jkun possibbli għall-Istati Membri li jestendu l-perjodu ta' żamma b'mod eċċezzjonali, dment li jingħataw raġunijiet tajbin. Jenħtieġ li l-perjodu ta' żamma addizzjonali ma jaqbiżx il-ħames snin addizzjonali. Jenħtieġ li dak il-perjodu jkun mingħajr preġudizzju għad-dritt nazzjonali li jistabbilixxi rekwiżiti oħra għaż-żamma tad-data li jippermettu deċiżjonijiet fuq bażi ta' każ b'każ biex jiġu ffaċilitati proċedimenti kriminali jew amministrattivi. L-aċċess għal dawk il-mekkaniżmi jenħtieġ li jkun fuq il-bażi ta' ħtieġa ta' tagħrif.

(60)

Permezz tal-interkonnessjoni tal-mekkaniżmi awtomatizzati ċentralizzati tal-Istati Membri, FIUs nazzjonali jkunu jistgħu jiksbu b'mod rapidu informazzjoni transfruntiera dwar l-identità tad-detenturi ta' kontijiet bankarji u kontijiet ta' pagament, kontijiet tat-titoli, kontijiet tal-kriptoassi u ta' kaxxi ta' depożitu sikur fi Stati Membri oħra, li jsaħħaħ il-kapaċità tagħhom li jwettqu b'mod effettiv analiżi finanzjarji u jikkooperaw mal-kontropartijiet tagħhom minn Stati Membri oħra. Aċċess transfruntier dirett għall-informazzjoni dwar kontijiet bankarji u kontijiet ta' pagament, kontijiet tat-titoli, kontijiet tal-kriptoassi u kaxxi ta' depożitu sikur jippermetti lill-FIUs jipproduċu analiżi finanzjarja f'perjodu ta' żmien qasir biżżejjed biex jiġu traċċati l-fondi li jgħaddu minn diversi kontijiet, inkluż bl-użu ta' IBANs virtwali, jiġu individwati każijiet potenzjali ta' ħasil tal-flus u ta' finanzjament tat-terroriżmu u tiġi garantita azzjoni ta' infurzar tal-liġi rapida. Jenħtieġ li l-AMLA tiġi pprovduta wkoll b'aċċess dirett għall-mekkaniżmi awtomatizzati ċentralizzati interkonnessi sabiex tipprovdi appoġġ operazzjonali lill-FIUs fil-qafas ta' eżerċizzji ta' analiżi konġunti. Jenħtieġ li l-Istati Membri jiżguraw li l-aċċess dirett għall-mekkaniżmi awtomatizzati ċentralizzati interkonnessi jkun estiż għall-awtoritajiet superviżorji biex ikunu jistgħu iwettqu l-kompiti tagħhom b’mod effettiv.

(61)

Sabiex jiġi rrispettat id-dritt għall-protezzjoni tad-data personali u d-dritt għall-privatezza, u biex jiġi limitat l-impatt tal-aċċess transfruntier għall-informazzjoni fil-mekkaniżmi awtomatizzati ċentralizzati nazzjonali, il-kamp ta' applikazzjoni tal-informazzjoni aċċessibbli permezz tas-sistema ta’ interkonnessjoni għar-reġistri tal-kontijiet bankarji (BARIS) ser ikun ristrett għall-minimu neċessarju f'konformità mal-prinċipju tal-minimizzazzjoni tad-data biex jippermetti l-identifikazzjoni ta' kwalunkwe persuna fiżika jew ġuridika li għandha jew li tikkontrolla kontijiet bankarji jew kontijiet ta' pagament, kontijiet tat-titoli, kontijiet tal-kriptoassi u kaxxi ta' depożitu sikur. Jenħtieġ li l-FIUs u l-AMLA, kif ukoll l-awtoritajiet superviżorji, jingħataw aċċess immedjat u sħiħ għal BARIS. Jenħtieġ li l-Istati Membri jiżguraw li l-persunal tal-FIUs iżommu standards professjonali għoljin ta' kunfidenzjalità u ta' protezzjoni tad-data, li huma ta' integrità kbira u li għandhom ħiliet xierqa. Barra minn hekk, jenħtieġ li l-Istati Membri jistabbilixxu miżuri tekniċi u organizzazzjonali li jiggarantixxu s-sigurtà tad-data skont standards teknoloġiċi għoljin.

(62)

L-interkonnessjoni tal-mekkaniżmi awtomatizzati ċentralizzati tal-Istati Membri (reġistri ċentrali jew sistemi ċentrali għall-irkupru tad-data elettronika) li fihom informazzjoni dwar kontijiet bankarji u kontijiet ta' pagament, dwar kontijiet ta’ titoli, kontijiet tal-kriptoassi u dwar kaxxi ta' depożitu sikur permezz ta’ BARIS teħtieġ il-koordinazzjoni tas-sistemi nazzjonali b'karatteristiċi tekniċi diversi. Għal dak il-għan, jenħtieġ li jiġu żviluppati miżuri u speċifikazzjonijiet tekniċi li jqisu d-differenzi bejn il-mekkaniżmi awtomatizzati ċentralizzati nazzjonali.

(63)

Il-proprjetà immobbli hija komodità attraenti għall-kriminali biex jaħslu r-rikavati mill-attivitajiet illeċiti tagħhom, peress li tippermetti li s-sors veru tal-fondi u l-identità tas-sid benefiċjarju jiġu moħbija. L-identifikazzjoni proprja u f'waqtha tal-proprjetà immobbli, kif ukoll ta' persuni fiżiċi, entitajiet ġuridiċi u arranġamenti ġuridiċi li għandhom proprjetà immobbli mill-FIUs u minn awtoritajiet kompetenti oħrajn hija importanti kemm biex jiġu individwati skemi tal-ħasil tal-flus kif ukoll biex jiġu ffriżati u kkonfiskati l-assi, kif ukoll għall-miżuri ta' ffriżar amministrattivi li jimplimentaw sanzjonijiet finanzjarji mmirati. Għaldaqstant, huwa importanti li l-Istati Membri jipprovdu lill-FIUs u lill-awtoritajiet kompetenti oħra b'aċċess immedjat u dirett għall-informazzjoni li tippermetti t-twettiq tajjeb ta' analiżi u ta' investigazzjonijiet f'każijiet kriminali potenzjali li jinvolvu proprjetà immobbli. Sabiex jiġi ffaċilitat l-aċċess effettiv, dik l-informazzjoni jenħtieġ li tiġi pprovduta mingħajr ħlas permezz ta' punt ta' aċċess uniku, b'mezzi diġitali u fejn possibbli f'format li jinqara mill-magni. Jenħtieġ li l-informazzjoni tinkludi informazzjoni storika, fosthom l-istorja tas-sjieda tal-proprjetà immobbli, il-prezzijiet li bihom il-proprjetà immobbli tkun ġiet akkwistata fil-passat u l-aggravar relatat fuq perjodu definit fil-passat sabiex l-FIUs u awtoritajiet kompetenti oħra f'dak l-Istat Membru jkunu jistgħu janalizzaw u jidentifikaw kwalunkwe attività suspettuża li tappartjeni għat-tranżazzjonijiet tal-proprjetà immobbli, inkluż l-art, li jistgħu jkunu indikattivi ta' ħasil tal-flus jew ta' tipi oħra ta' kriminalità. Tali informazzjoni storika tikkonċerna tipi ta' informazzjoni diġà miġbura meta jitwettqu tranżazzjonijiet ta' proprjetà immobbli. Għalhekk, ma hemm l-ebda obbligu ġdid impost fuq il-persuni affettwati, li jiżgura li l-aspettattivi leġittimi ta' dawk ikkonċernati jiġu rrispettati kif xieraq. Minħabba li spiss in-natura transfruntiera tal-iskemi kriminali li jinvolvu l-proprjetà immobbli, huwa xieraq li jiġi identifikat sett minimu ta' informazzjoni li l-awtoritajiet kompetenti jenħtieġ li jkunu jistgħu jaċċessaw u jikkondividu mal-kontropartijiet tagħhom fi Stati Membri oħra.

(64)

L-Istati Membri għandhom fis-seħħ, jew jenħtieġ li jwaqqfu FIUs operazzjonalment indipendenti u awtonomi biex jiġbru u janalizzaw l-informazzjoni, bil-għan li jiġu stabbiliti rabtiet bejn tranżazzjonijiet jew attivitajiet suspettużi u l-attività kriminali sottostanti sabiex jipprevjenu u jiġġieldu kontra l-ħasil tal-flus u l-finanzjament tat-terroriżmu. Jenħtieġ li l-FIU tkun l-unità nazzjonali ċentrali unika responsabbli biex tirċievi u tanalizza rapporti dwar tranżazzjonijiet suspettużi, rapporti dwar movimenti fiżiċi transfruntiera ta' flus kontanti permezz tas-Sistema ta' Informazzjoni tad-Dwana, dwar tranżazzjonijiet li jkunu ġew irraportati meta jinqabżu ċerti livelli limiti (żvelar ibbażat fuq il-livelli limitu) kif ukoll informazzjoni rilevanti oħra għall-ħasil tal-flus, ir-reati predikati tiegħu jew il-finanzjament tat-terroriżmu sottomessi mill-entitajiet marbutin b'obbligu. Jenħtieġ li tiġi żgurata l-indipendenza operazzjonali u l-awtonomija tal-FIU billi din tingħata l-l-awtorità u l-kapaċità li twettaq il-funzjonijiet tagħha liberament, inkluża l-kapaċità li tieħu deċiżjonijiet awtonomi fir-rigward tal-analiżi, it-talbiet u d-disseminazzjoni ta' informazzjoni speċifika. F'kull każ, jenħtieġ li l-FIU ikollha d-dritt indipendenti li tibgħat jew li taqsam l-informazzjoni lill-awtoritajiet kompetenti relevanti. Jenħtieġ li l-FIU tiġi pprovduta b'riżorsi finanzjarji, umani u tekniċi adegwati, b'mod li jiżgura l-awtonomija u l-indipendenza tagħha u li jippermettilha teżerċita l-mandat tagħha b'mod effettiv. Jenħtieġ li l-FIU tkun tista' tikseb u tuża r-riżorsi meħtieġa biex twettaq il-funzjonijiet tagħha, fuq bażi individwali jew ta' rutina, ħielsa minn ebda influwenza jew indħil indebitu mill-gvern, mill-industrija jew politiku, li jista' jikkomprometti l-indipendenza operazzjonali tagħha. Sabiex jiġi vvalutat it-twettiq ta' dawk ir-rekwiżiti u jiġu identifikati d-dgħufijiet u l-aħjar prattiki, l-AMLA jenħtieġ li tingħata s-setgħa li tikkoordina l-organizzazzjoni ta' rieżamijiet bejn il-pari tal-FIUs.

(65)

Jenħtieġ li l-persunal tal-FIUs ikun ta' integrità kbira u b'ħiliet xierqa, u jżomm standards professjonali għoljin. L-FIUs jenħtieġ li jkollhom fis-seħħ proċeduri biex jipprevjenu u jimmaniġġjaw b'mod effettiv il-kunflitti ta' interess. Minħabba n-natura tax-xogħol tagħhom, l-FIUs jirċievu ammonti kbar ta' informazzjoni personali u finanzjarja sensittiva u għandhom aċċess għaliha. Għalhekk, jenħtieġ li l-persunal tal-FIUs jkollu ħiliet xierqa fir-rigward tal-użu etiku tal-għodod analitiċi tal-big data. Barra minn hekk, l-attivitajiet tal-FIUs jista' jkollhom implikazzjonijiet għad-drittijiet fundamentali tal-individwi, bħad-dritt għall-protezzjoni tad-data personali, id-dritt għall-ħajja privata u d-dritt għall-proprjetà. Għalhekk, jenħtieġ li l-FIUs jiddeżinjaw Uffiċjal għad-Drittijiet Fundamentali li jista' jkun membru tal-persunal eżistenti tal-FIU. Il-kompiti tal-Uffiċjal għad-Drittijiet Fundamentali jenħtieġ li jinkludu, mingħajr ma jimpedixxu jew idewmu l-attivitajiet tal-FIU, il-monitoraġġ u l-promozzjoni tal-konformità tal-FIU mad-drittijiet fundamentali, l-għoti ta' pariri u gwida lill-FIU dwar l-implikazzjonijiet tad-drittijiet fundamentali tal-politiki u l-prattiki tagħha, l-iskrutinju tal-legalità u l-etika tal-attivitajiet tal-FIU u l-ħruġ ta' opinjonijiet mhux vinkolanti. Il-ħatra ta' Uffiċjal għad-Drittijiet Fundamentali tgħin biex jiġi żgurat li fit-twettiq tal-kompiti tagħhom, l-FIUs jirrispettaw u jipproteġu d-drittijiet fundamentali tal-individwi affettwati.

(66)

Jenħtieġ li l-FIUs ikunu jistgħu jaqsmu informazzjoni mal-awtoritajiet kompetenti inkarigati mill-ġlieda kontra l-ħasil tal-flus, ir-reati predikati tiegħu, u l-finanzjament tat-terroriżmu. Jenħtieġ li tali awtoritajiet jinftiehmu li jinkludu awtoritajiet bi rwol investigattiv, ta' prosekuzzjoni jew ġudizzjarju. Madwar l-Istati Membri, awtoritajiet oħra għandhom rwoli ddedikati marbuta mal-ġlieda kontra l-ħasil tal-flus, ir-reati predikati tiegħu u l-finanzjament tat-terroriżmu, u l-FIUs jenħtieġ li jkunu jistgħu jipprovdulhom ukoll ir-riżultati tal-analiżi operazzjonali jew strateġiċi tagħhom, meta jqisu li dan ikun rilevanti għall-funzjonijiet tagħhom. Ir-riżultati ta' dawk l-analiżijiet jipprovdu intelligence sinifikanti biex tintuża għall-iżvilupp ta' mexxejja matul il-ħidma investigattiva u ta' prosekuzzjoni. Jenħtieġ li s-sors tar-rapport dwar it-tranżazzjoni jew l-attività suspettuża ma jiġix żvelat fid-disseminazzjoni. Dan, madankollu, jenħtieġ li ma jipprekludix lill-FIUs milli jaqsmu informazzjoni rilevanti inkluż, pereżempju, informazzjoni dwar numri IBAN, kodiċijiet BIC jew SWIFT. Barra minn hekk, jenħtieġ li l-FIUs ikunu jistgħu jikkondividu informazzjoni oħra fil-pussess tagħhom inkluż fuq talba minn awtoritajiet kompetenti oħra. Meta jkunu qed jeżerċitaw l-awtonomija u l-indipendenza tagħhom, jenħtieġ li l-FIUs jikkunsidraw kif rifjut li tiġi pprovduta informazzjoni jista' jkollu impatt fuq il-kooperazzjoni u l-għan usa' tal-ġlieda kontra l-ħasil tal-flus, ir-reati predikati tiegħu u l-finanzjament tat-terroriżmu. Jenħtieġ li rifjuti jkunu limitati għal ċirkostanzi eċċezzjonali, pereżempju meta l-informazzjoni toriġina minn FIU oħra li ma tkunx tat il-kunsens għad-disseminazzjoni ulterjuri tagħha, jew meta l-FIU ikollha raġunijiet biex temmen li l-informazzjoni mhux ser tintuża għall-finijiet li għalihom tkun intalbet. F'każijiet bħal dawn, jenħtieġ li l-FIU tipprovdi raġunijiet għar-rifjut. Tali raġunijiet jistgħu jinkludu l-kjarifika, pereżempju, li l-informazzjoni ma tkunx fil-pussess tal-FIU, jew li l-kunsens għal aktar disseminazzjoni ma jkunx ingħata.

(67)

Il-kooperazzjoni effettiva u l-iskambju ta' informazzjoni bejn l-FIUs u s-superviżuri huma ta' importanza kruċjali għall-integrità u l-istabbiltà tas-sistema finanzjarja. Dan jiżgura approċċ komprensiv u konsistenti għall-prevenzjoni u l-ġlieda kontra l-ħasil tal-flus, ir-reati predikati tiegħu u l-finanzjament tat-terroriżmu, isaħħaħ l-effettività tar-reġim tal-AML/CFT tal-Unjoni u jissalvagwardja l-ekonomija mit-theddid maħluq minn attivitajiet finanzjarji illeċiti. Informazzjoni fil-pussess tal-FIUs li tappartjeni għal, pereżempju, il-kwalità u l-kwantità ta' rapporti dwar tranżazzjonijiet suspettużi sottomessi mill-entitajiet marbutin b'obbligu, il-kwalità u t-tempestività tat-tweġibiet tal-entitajiet marbutin b'obbligu għal talbiet għal informazzjoni mill-FIUs, u informazzjoni dwar it-tipoloġiji, ix-xejriet u l-metodi ta’ tħasil tal-flus, tar-reati predikati tiegħu, u tal-finanzjament tat-terroriżmujistgħu jgħinu lis-superviżuri jidentifikaw oqsma fejn ir-riskji huma ogħla jew fejn il-konformità hija dgħajfa u b’hekk tipprovdilhom għarfien dwar jekk is-superviżjoni għandhiex bżonn tissaħħaħ fir-rigward ta' entitajiet jew setturi marbuta b'obbligu speċifiċi. Għal dak l-għan, jenħtieġ li l-FIUs jipprovdu ċerti tipi ta' informazzjoni lis-superviżuri, jew b'mod spontanju jew fuq talba, li tista' tkun rilevanti għall-finijiet tas-superviżjoni.

(68)

L-FIUs għandhom rwol importanti fl-identifikazzjoni tal-operazzjonijiet finanzjarji tan-networks terroristiċi, speċjalment dawk transfruntiera, u fid-detezzjoni tal-finanzjaturi tagħhom. L-intelligence finanzjarja tista' tkun ta' importanza fundamentali fil-kxif tal-faċilitazzjoni tar-reati terroristiċi kif ukoll tan-networks u tal-iskemi tal-organizzazzjonijiet terroristiċi. Hemm differenzi sinifikanti bejn l-FIUs f'dak li għandu x'jaqsam mal-funzjonijiet, mal-kompetenzi u mas-setgħat tagħhom. Madankollu jenħtieġ li d-differenzi attwali ma jaffettwawx l-attività ta' FIU, b'mod partikolari l-kapaċità tagħha li tiżviluppa analiżijiet preventivi b'appoġġ għall-awtoritajiet kollha responsabbli għall-intelligence, għall-attivitajiet investigattivi u ġudizzjarji, u għall-kooperazzjoni internazzjonali. Fl-eżerċizzju tal-kompiti tagħhom, sar essenzjali li jiġi identifikat is-sett minimu ta' data li għalih l-FIUs jenħtieġ li jkollhom aċċess rapidu u li jkunu jistgħu jiskambjaw mingħajr impedimenti mal-kontropartijiet tagħhom minn Stati Membri oħra. F'kull każ ta' suspett ta' ħasil tal-flus, ir-reati predikati tiegħu u l-finanzjament tat-terroriżmu, jenħtieġ li l-informazzjoni tgħaddi direttament u malajr bejn FIUs mingħajr dewmien bla bżonn. Għaldaqstant huwa essenzjali li tkompli tissaħħaħ l-effettività u l-effiċjenza tal-FIUs, billi jiġu ċċarati s-setgħat tal-FIUs u l-kooperazzjoni ta' bejniethom.

(69)

Is-setgħat tal-FIUs jinkludu d-dritt ta' aċċess dirett jew indirett għall-informazzjoni “finanzjarja”, “amministrattiva” u “relatata mal-infurzar tal-liġi” li huma jeħtieġu għall-ġlieda kontra l-ħasil tal-flus, ir-reati predikati tiegħu u l-finanzjament tat-terroriżmu. In-nuqqas ta' definizzjoni ta' x'tipi ta' informazzjoni jinkludu dawk il-kategoriji ġenerali wassal biex l-FIUs ingħataw aċċess għal settijiet konsiderevolment diversifikati ta' informazzjoni li jaffettwa l-funzjonijiet analitiċi tal-FIUs kif ukoll il-kapaċità tagħhom li jikkooperaw b'mod effettiv mal-kontropartijiet tagħhom fi Stati Membri oħra, inkluż fil-qafas ta' eżerċizzji ta' analiżi konġunta. Għalhekk hemm bżonn li jiġu definiti s-settijiet minimi ta' informazzjoni “finanzjarja”, “amministrattiva” u “relatata mal-infurzar tal-liġi” li jenħtieġ li jsiru direttament jew indirettament disponibbli għal kull FIU madwar l-Unjoni. L-FIUs jirċievu u jaħżnu wkoll fil-bażijiet tad-data tagħhom, jew ikollhom aċċess għal, informazzjoni relatata ma' tranżazzjonijiet li jiġu rrapportati meta jinqabżu l-livelli limiti speċifikati (rapporti bbażati fuq il-livelli limitu). Dawk ir-rapporti huma sors importanti ta' informazzjoni u jintużaw b'mod wiesa' mill-FIUs fil-kuntest ta' analiżijiet domestiċi u konġunti. Għalhekk, ir-rapporti bbażati fuq il-livelli limitu huma fost it-tipi ta' informazzjoni skambjata permezz tal-FIU.net. L-aċċess dirett huwa prerekwiżit importanti għall-effettività operazzjonali u r-rispons tal-FIUs. Għal dak l-għan, jenħtieġ li jkun possibbli għall-Istati Membri li jipprovdu lill-FIUs b'aċċess dirett għal sett usa' ta' informazzjoni minn dawk meħtieġa minn din id-Direttiva. Fl-istess ħin, din id-Direttiva ma teħtieġx li l-Istati Membri jistabbilixxu bażijiet tad-data jew reġistri ġodda fil-każijiet fejn ċerti tipi ta' informazzjoni, pereżempju, informazzjoni dwar l-akkwist, tkun mifruxa fuq diversi repożitorji jew arkivji. Meta ma jkunux ġew stabbiliti bażi tad-data jew reġistru, jenħtieġ li l-Istati Membri jieħdu miżuri oħra meħtieġa biex jiżguraw li l-FIUs ikunu jistgħu jiksbu dik l-informazzjoni b'mod rapidu. Barra minn hekk, l-FIUs jenħtieġ li jkunu jistgħu jakkwistaw l-informazzjoni neċessarja kollha relatata mal-funzjonijiet tagħhom malajr minn kwalunkwe entità marbuta b'obbligu. Jenħtieġ li l-FIU tkun anke tista' tikseb tali informazzjoni fuq talba minn FIU oħra u li tiskambja dik l-informazzjoni mal-FIU rikjedenti.

(70)

Jenħtieġ li l-aċċess jitqies dirett u immedjat meta l-informazzjoni tkun tinsab f'bażi tad-data, reġistru jew sistema elettronika għall-irkupru tad-data li tippermetti lill-FIU tiksibha direttament, permezz ta' mekkaniżmu awtomatizzat, mingħajr l-involviment ta' intermedjarju. Meta l-informazzjoni tkun miżmuma minn entità jew awtorità oħra, l-aċċess dirett jinvolvi li dawk l-awtoritajiet jew l-entitajiet jittrażmettuha lill-FIU b'mod rapidu mingħajr ma jinterferixxu mal-kontenut tad-data mitluba jew mal-informazzjoni li għandha tiġi pprovduta. Jenħtieġ li l-informazzjoni ma tgħaddi mill-ebda filtrazzjoni. F'xi sitwazzjonijiet, madankollu, ir-rekwiżiti ta' kunfidenzjalità mehmuża mal-informazzjoni jistgħu ma jippermettux l-għoti tal-informazzjoni b'mod mhux iffiltrat. Dan huwa l-każ, pereżempju, fejn l-informazzjoni dwar it-taxxa tista' tiġi pprovduta biss lill-FIUs bi qbil ma' awtorità tat-taxxa f'pajjiż terz, fejn l-aċċess dirett għall-informazzjoni dwar l-infurzar tal-liġi jista' jipperikola investigazzjoni li tkun għaddejja, kif ukoll fir-rigward tad-data tar-reġistru tal-ismijiet tal-passiġġieri miġbura skont id-Direttiva (UE) 2016/681 tal-Parlament Ewropew u tal-Kunsill (21). F'tali każijiet, jenħtieġ li l-Istati Membri jagħmlu kull sforz biex jiżguraw aċċess effettiv għall-informazzjoni mill-FIUs, inkluż billi jippermettu lill-FIUs ikollhom aċċess taħt kundizzjonijiet simili għal dawk offruti lil awtoritajiet oħra fil-livell nazzjonali biex jiffaċilitaw l-attivitajiet analitiċi tagħhom.

(71)

Il-maġġoranza l-kbira tal-FIUs ingħataw is-setgħa li jieħdu azzjoni urġenti u li jissospendu jew jirrifjutaw il-kunsens għal tranżazzjoni sabiex iwettqu l-analiżijiet, jikkonfermaw is-suspett u jaqsmu r-riżultati tal-attivitajiet analitiċi fost l-awtoritajiet kompetenti. Madankollu, fost Stati Membri hemm ċerti varjazzjonijiet f'dak li għandu x'jaqsam mas-setgħa relatata mat-tul tal-posponiment, b'impatt mhux biss fuq il-posponiment ta' attivitajiet ta' natura transfruntiera permezz tal-kooperazzjoni bejn FIU u FIU, iżda anke fuq id-drittijiet fundamentali tal-individwi. Barra minn hekk, sabiex jiġi żgurat li l-FIUs ikollhom il-kapaċità li jissekwestraw fil-pront il-fondi jew l-assi kriminali u jipprevjenu d-dissipazzjoni tagħhom, anke għall-finijiet ta' sekwestru, jenħtieġ li l-FIUs jingħataw is-setgħa li jissospendu l-użu ta' kontijiet bankarji jew kont ta' pagament, kont tal-kriptoassi jew relazzjoni tan-negozju sabiex janalizzaw it-tranżazzjonijiet imwettqa permezz tal-kont jew ir-relazzjoni kummerċjali, jikkonfermaw is-suspett u jaqsmu r-riżultati tal-analiżi bejn l-awtoritajiet kompetenti relevanti. Minħabba li tali sospensjoni jkollha impatt fuq id-dritt għall-proprjetà, jenħtieġ li l-FIUs ikunu jistgħu jissospendu tranżazzjonijiet, kontijiet jew relazzjonijiet tan-negozju għal perjodu limitat sabiex jippreservaw il-fondi, iwettqu l-analiżijiet meħtieġa u jaqsmu r-riżultati tal-analiżijiet mal-awtoritajiet kompetenti għall-adozzjoni possibbli ta' miżuri xierqa. Minħabba l-impatt aktar sinifikanti fuq id-drittijiet fundamentali ta' persuna affettwata, is-sospensjoni ta' kont jew ta' relazzjoni tan-negozju jenħtieġ li tiġi imposta perjodu aktar limitat, li jenħtieġ li jiġi stabbilit għal ħamest ijiem tax-xogħol. L-Istati Membri jistgħu jiddefinixxu perjodu itwal ta' sospensjoni fejn, skont id-dritt nazzjonali, l-FIU teżerċita kompetenzi fil-qasam tal-irkupru tal-assi u twettaq funzjonijiet ta' traċċar, qbid, iffriżar jew konfiska ta' assi kriminali. F'każijiet bħal dawn, il-preservazzjoni tad-drittijiet fundamentali tal-persuni affettwati jenħtieġ li tiġi ggarantita u jenħtieġ li l-FIUs jeżerċitaw il-funzjonijiet tagħhom f'konformità mas-salvagwardji nazzjonali xierqa. Jenħtieġ li l-FIUs ineħħu s-sospensjoni tat-tranżazzjoni, kont jew relazzjoni tan-negozju hekk kif tali sospensjoni ma tibqax meħtieġa. Meta jiġi definit perjodu ta' sospensjoni itwal, jenħtieġ li l-persuni affettwati li t-tranżazzjonijiet, il-kontijiet jew ir-relazzjonijiet tan-negozju tagħhom ikunu ġew sospiżi jkollhom il-possibbiltà li jikkontestaw l-ordni ta' sospensjoni quddiem qorti.

(72)

F'ċirkostanzi speċifiċi, jenħtieġ li l-FIUs ikunu jistgħu jitolbu, f’isimhom jew f'isem FIU oħra, lil entità marbuta b'obbligu biex timmonitorja, għal perjodu definit, tranżazzjonijiet jew attivitajiet imwettqa permezz ta' kont bankarju jew kont ta' pagament jew kont tal-kriptoassi jew tip ieħor ta' relazzjoni tan-negozju fir-rigward ta' persuni li jippreżentaw riskju sinifikanti ta' ħasil tal-flus, ir-reati predikati tiegħu jew il-finanzjament tat-terroriżmu. Monitoraġġ aktar mill-qrib ta' kont jew relazzjoni tan-negozju jista' jipprovdi lill-FIU b'għarfien addizzjonali dwar ix-xejriet tat-tranżazzjonijiet tad-detentur tal-kont u jwassal għad-detezzjoni f'waqtha ta' tranżazzjonijiet jew attivitajiet mhux tas-soltu jew suspettużi li jistgħu jiġġustifikaw azzjoni ulterjuri mill-FIU, inkluż is-sospensjoni tal-kont jew ir-relazzjoni tan-negozju, l-analiżi tal-intelligence miġbura u d-disseminazzjoni tagħha lill-awtoritajiet investigattivi u ta' prosekuzzjoni. Jenħtieġ li l-FIUs ikunu jistgħu wkoll iwissu lill-entitajiet marbutin b'obbligu dwar informazzjoni rilevanti għat-twettiq tad-diliġenza dovuta fir-rigward tal-klijenti. Tali twissijiet jistgħu jgħinu lill-entitajiet marbutin b'obbligu jinfurmaw il-proċeduri ta' diliġenza dovuta fir-rigward tal-klijenti tagħhom u jiżguraw il-konsistenza tagħhom mar-riskji, jaġġornaw is-sistemi ta' valutazzjoni tar-riskju u ta' ġestjoni tar-riskju tagħhom kif xieraq u jipprovdulhom informazzjoni addizzjonali li tista' tiskatta l-ħtieġa għal diliġenza dovuta msaħħa dwar ċerti klijenti jew tranżazzjonijiet li jippreżentaw riskji ogħla.

(73)

Għall-finijiet ta' aktar trasparenza u responsabbiltà u sabiex tiżdied is-sensibilizzazzjoni fir-rigward tal-attivitajiet tagħhom, jenħtieġ li l-FIUs joħorġu rapporti ta' attività fuq bażi annwali. Dawk ir-rapporti jenħtieġ li tal-anqas jipprovdu data statistika fir-rigward tar-rapporti dwar tranżazzjonijiet suspettużi riċevuti u s-segwitu li jingħata, l-għadd ta' disseminazzjonijiet li saru mal-awtoritajiet kompetenti nazzjonali u s-segwitu li jiġi pprovdut lil dawk id-disseminazzjonijiet, l-għadd ta' talbiet ippreżentati u li waslu mingħand FIUs oħra kif ukoll informazzjoni dwar ix-xejriet u t-tipoloġiji identifikati. Dawk ir-rapporti jenħtieġ li jiġu ppubblikati ħlief għall-partijiet minnhom li fihom informazzjoni sensittiva u klassifikata.

(74)

Jenħtieġ li tal-anqas darba fis-sena l-FIU tipprovdi feedback lill-entitajiet marbutin b'obbligu dwar il-kwalità tar-rapporti dwar tranżazzjonijiet suspettużi, it-tempestività tagħhom, id-deskrizzjoni tas-suspett u kwalunkwe dokument addizzjonali pprovdut. Tali feedback jista' jiġi pprovdut lil entitajiet individwali marbutin b'obbligu jew lil gruppi ta' entitajiet marbutin b'obbligu u jenħtieġ li jkollu l-għan li jkompli jtejjeb il-kapaċità tal-entitajiet marbutin b'obbligu għad-detezzjoni u l-identifikazzjoni ta' tranżazzjonijiet u attivitajiet suspettużi, itejbu l-kwalità tar-rapporti dwar tranżazzjonijiet suspettużi, itejbu l-mekkaniżmi ta' rappurtar ġenerali u jipprovdu lill-entitajiet marbutin b'obbligu b'għarfien importanti dwar ix-xejriet, it-tipoloġiji u r-riskji assoċjati mal-ħasil tal-flus, ir-reati predikati tiegħu u l-finanzjament tat-terroriżmu. Meta jiddeterminaw it-tip u l-frekwenza tal-feedback, jenħtieġ li l-FIUs, sakemm ikun possibbli, iqisu oqsma fejn jista' jkun meħtieġ titjib fl-attivitajiet ta' rappurtar. Sabiex tappoġġa approċċ konsistenti fost l-FIUs u feedback adegwat lill-entitajiet marbutin b'obbligu, jenħtieġ li l-AMLA toħroġ rakkomandazzjonijiet lill-FIUs dwar l-aħjar prattiki u approċċi lejn l-għoti ta' feedback. Meta dan ma jipperikolax il-ħidma analitika jew investigattiva, l-FIUs jistgħu jikkunsidraw li jipprovdu feedback dwar l-użu li jkun sar jew dwar l-eżitu ta' rapporti dwar tranżazzjonijiet suspettużi, kemm jekk dwar rapporti individwali kif ukoll jekk b'mod aggregat. Jenħtieġ li l-FIUs jipprovdu wkoll lill-awtoritajiet doganali b'feedback, mill-inqas darba fis-sena, dwar l-effettività u s-segwitu għar-rapporti dwar il-movimenti fiżiċi transfruntiera tal-flus kontanti.

(75)

L-iskop tal-FIU huwa li tiġbor u tanalizza l-informazzjoni bil-għan li tistabbilixxi rabtiet bejn it-tranżazzjonijiet jew attivitajiet suspettużi u l-attività kriminali sottostanti sabiex tipprevjeni u tiġġieled il-ħasil tal-flus u l-finanzjament tat-terroriżmu, u li taqsam ir-riżultati tal-analiżi tagħha kif ukoll informazzjoni addizzjonali lill-awtoritajiet kompetenti meta jkun hemm raġunijiet ta' suspett ta' ħasil tal-flus, ir-reati predikati tiegħu jew finanzjament tat-terroriżmu. Jenħtieġ li FIU ma toqgħodx lura jew tirrifjuta l-iskambju ta' informazzjoni ma' FIU oħra, b'mod spontanju jew fuq talba, għal raġunijiet bħan-nuqqas ta' identifikazzjoni ta' reat predikat, il-karatteristiċi tal-liġijiet kriminali nazzjonali u differenzi bejn id-definizzjonijiet ta' reati predikati jew in-nuqqas ta' referenza għal reati predikati partikolari. L-FIUs irrapportaw diffikultajiet fl-iskambju ta' informazzjoni minħabba differenzi fid-definizzjonijiet nazzjonali ta' ċerti reati predikati assoċjati, bħal reati fiskali, li ma humiex armonizzati fid-dritt tal-Unjoni. Jenħtieġ li tali differenzi ma jxekklux l-iskambju reċiproku, id-disseminazzjoni lil awtoritajiet kompetenti oħra u l-użu ta' dik l-informazzjoni. Jenħtieġ li l-FIUs jiżguraw b'mod rapidu, kostruttiv u effettiv l-aktar firxa wiesgħa ta' kooperazzjoni internazzjonali ma' FIUs ta' pajjiżi terzi fir-rigward tal-ħasil tal-flus, ir-reati predikati tagħha u l-finanzjament tat-terroriżmu f'konformità mar-regoli applikabbli dwar il-protezzjoni tad-data fil-każ ta' trasferimenti tad-data, ir-Rakkomandazzjonijiet tal-FATF u l-Prinċipji Egmont għall-Iskambju ta' Informazzjoni bejn l-Unitajiet tal-Intelligence Finanzjarja. Għal dak il-għan, jenħtieġ li l-FIUs jiġu mħeġġa jikkonkludu ftehimiet bilaterali u memoranda ta' qbil ma' kontropartijiet minn pajjiżi terzi, filwaqt li jqisu kwalunkwe obbligu tad-drittijiet fundamentali u l-ħtieġa li jiġi protett l-istat tad-dritt.

(76)

FIU tista' timponi ċerti restrizzjonijiet u limitazzjonijiet fir-rigward tal-użu ulterjuri ta' informazzjoni li tipprovdi lil FIU oħra. Jenħtieġ li l-FIU riċevitur juża l-informazzjoni biss għall-finijiet li għalihom tkun intalbet jew ġiet ipprovduta. Jenħtieġ li l-FIU tagħti l-kunsens minn qabel tagħha lil FIU oħra biex tibgħat l-informazzjoni lil awtoritajiet kompetenti oħra irrispettivament mit-tip ta' reat predikat possibbli u irrispettivament mill-fatt jekk ir-reat predikat ikunx ġie identifikat fil-ħin tal-iskambju, sabiex tippermetti l-eżekuzzjoni effettiva tal-funzjoni ta' disseminazzjoni. Tali kunsens minn qabel għal aktar disseminazzjoni jenħtieġ li jingħata minnufih u jenħtieġ li ma jiġix irrifjutat sakemm ma jkunx jaqa' lil hinn mill-kamp ta' applikazzjoni tad-dispożizzjonijiet tal-AML/CFT jew ma jkunx f'konformità mal-prinċipji fundamentali tad-dritt nazzjonali. Jenħtieġ li l-FIUs jipprovdu spjegazzjoni fir-rigward ta' kwalunkwe rifjut li jingħata l-kunsens.

(77)

Jenħtieġ li l-FIUs jużaw faċilitajiet sikuri, inkluż kanali ta' komunikazzjoni protetti, biex jikkooperaw u jiskambjaw l-informazzjoni ma' xulxin. F'dan ir-rigward, jenħtieġ li tiġi stabbilita sistema għall-iskambju ta' informazzjoni bejn l-FIUs tal-Istati Membri (“FIU.net”). Jenħtieġ li s-sistema tiġi ġestita u ospitata mill-AMLA u jenħtieġ li tipprevedi l-ogħla livell ta' sigurtà u l-kriptaġġ sħiħ tal-informazzjoni skambjata. Jenħtieġ li l-FIUs jużaw l-FIU.net biex jikkooperaw u jiskambjaw l-informazzjoni bejniethom u tista' tintuża wkoll, fejn xieraq, u soġġett għal deċiżjoni mill-AMLA, għall-iskambju ta' informazzjoni ma' FIUs ta' pajjiżi terzi u ma' awtoritajiet u korpi, uffiċċji u aġenziji oħra tal-Unjoni. Jenħtieġ li l-FIUs jużaw il-potenzjal massimu tal-funzjonalitajiet tal-FIU.net. Jenħtieġ li dawk il-funzjonalitajiet jippermettu lill-FIUs iqabblu d-data tagħhom ma' dik ta' FIUs oħrajn b'mod psewdoanonimu, bil-għan li jiġu individwati s-suġġetti ta' interess għall-FIUs fi Stati Membri oħrajn u li jiġu identifikati r-rikavati u l-fondi tagħhom filwaqt li tiġi żgurata protezzjoni sħiħa tad-data personali. Sabiex jidentifikaw ir-rabtiet bejn l-informazzjoni finanzjarja u l-intelligence kriminali, jenħtieġ li l-FIUs ikunu jistgħu jużaw ukoll il-funzjonalitajiet tal-FIU.net biex iqabblu trasversalment b'mod psewdonimu d-data tagħhom mal-informazzjoni miżmuma mill-korpi, l-uffiċċji u l-aġenziji tal-Unjoni sa fejn tali tlaqqigħ trasversali jaqa' taħt il-mandati legali rispettivi ta' dawn tal-aħħar u b'rispett sħiħ tar-regoli applikabbli dwar il-protezzjoni tad-data.

(78)

Huwa importanti li l-FIUs jikkooperaw u jiskambjaw l-informazzjoni b'mod effettiv ma' xulxin. F'dak ir-rigward, jenħtieġ li l-AMLA tipprovdi l-assistenza meħtieġa, mhux biss billi tikkoordina analiżijiet konġunti ta' rapporti dwar tranżazzjonijiet suspettużi transfruntiera, iżda wkoll billi tiżviluppa abbozz ta' standards tekniċi regolatorji u ta' implimentazzjoni fir-rigward tal-format li jrid jintuża għall-iskambju ta' informazzjoni bejn l-FIUs, il-mudell għall-preżentazzjoni ta' rapporti ta' tranżazzjonijiet suspettużi u r-rilevanza u l-kriterji ta' għażla li jridu jitqiesu meta jkun qed jiġi determinat jekk rapport dwar tranżizzjoni suspettuża jikkonċerna Stat Membru ieħor, kif ukoll linji gwida dwar in-natura, il-karatteristiċi u l-objettivi ta' analiżi operazzjonali u strateġika u dwar il-proċeduri li jridu jiġu stabbiliti meta jiġi sottomess u riċevut rapport dwar tranżizzjoni suspettuża li jikkonċerna Stat Membru ieħor u s-segwitu li jrid jingħata. Jenħtieġ li l-AMLA tistabbilixxi wkoll proċess ta' rieżami bejn il-pari sabiex issaħħaħ il-konsistenza u l-effettività tal-attivitajiet tal-FIUs u tiffaċilita l-iskambju tal-aħjar prattiki bejn l-FIUs.

(79)

L-FIUs huma responsabbli biex jirċievu rapporti dwar tranżazzjonijiet jew attivitajiet suspettużi minn entitajiet marbutin b'obbligu stabbiliti fit-territorju tal-Istati Membri tagħhom. Madankollu, ċerti transazzjonijiet jew attivitajiet suspettużi rrapportati lill-FIUs jistgħu jappartjenu għal attivitajiet imwettqa minn entitajiet marbutin b'obbligu fi Stati Membri oħra, fejn joperaw mingħajr stabbiliment. F'dawk il-każijiet, huwa importanti li l-FIUs jaqsmu dawk ir-rapporti mal-kontroparti tagħhom fl-Istat Membru kkonċernat mit-tranżazzjoni jew l-attività, mingħajr ma jehmżu kundizzjonijiet mal-użu ta' dawk ir-rapporti. Is-sistema FIU.net tippermetti d-disseminazzjoni ta' tali rapporti transfruntiera. Sabiex tissaħħaħ dik il-funzjonalità, is-sistema għaddejja minn titjib biex tippermetti d-disseminazzjoni rapida ta' tali rapporti u biex tappoġġa skambji sinifikanti ta' informazzjoni bejn l-FIUs, u b’hekk l-implimentazzjoni effettiva ta' din id-Direttiva.

(80)

Il-limiti ta' żmien għall-iskambji ta' informazzjoni bejn l-FIUs huma neċessarji sabiex tiġi żgurata kooperazzjoni rapida, effettiva u konsistenti. Jenħtieġ li jiġu stabbiliti termini ta' żmien sabiex tiġi żgurata l-kondiviżjoni effettiva tal-informazzjoni fi żmien raġonevoli jew sabiex jiġu jintlaħqu restrizzjonijiet proċedurali. F'każijiet eċċezzjonali, ġustifikati u urġenti jenħtieġ li jiġu previsti termini iqsar biex l-FIU rikjesta tkun tista' taċċessa direttament il-bażijiet tad-data fejn tkun miżmuma l-informazzjoni mitluba. Fil-każijiet fejn l-FIU rikjesta ma tkunx tista' tipprovdi l-informazzjoni fil-limitu ta' żmien, jenħtieġ li tinforma lill-FIU rikjedenti b'dan.

(81)

Il-moviment ta' flus illeċiti jaqsam il-fruntieri u jista' jaffettwa Stati Membri b'modi differenti. Il-każijiet transfruntiera, li jinvolvu diversi ġuriżdizzjonijiet, qed isiru dejjem aktar frekwenti u sinifikanti, anki minħabba l-attivitajiet imwettqa mill-entitajiet marbutin b'obbligu fuq bażi transfruntiera. Sabiex jittrattaw b'mod effettiv każijiet li jikkonċernaw Stati Membri differenti, jenħtieġ li l-FIUs jkunu jistgħu jmorru lil hinn mis-sempliċi skambju ta' informazzjoni għad-detezzjoni u l-analiżi ta' tranżazzjonijiet u ta' attivitajiet suspettużi u jwettqu b’mod konġunt l-attività analitika nnifisha. L-FIUs irrapportaw ċerti kwistjonijiet importanti li jillimitaw jew li jikkundizzjonaw il-kapaċità tagħhom li jipparteċipaw f'analiżi konġunta. It-twettiq ta' analiżi konġunta ta' tranżazzjonijiet u ta' attivitajiet suspettużi jippermetti lill-FIUs jisfruttaw sinerġiji potenzjali, li jużaw informazzjoni minn sorsi differenti, li jiksbu stampa sħiħa tal-attivitajiet anomali u li jarrikkixxu l-analiżi. Jenħtieġ li l-FIUs ikunu jistgħu jwettqu analiżijiet konġunti ta' tranżazzjonijiet u ta' attivitajiet suspettużi kif ukoll jistabbilixxu u jipparteċipaw f'timijiet konġunti tal-analiżi għal skopijiet speċifiċi u għal perjodu limitat bl-assistenza tal-AMLA. Jenħtieġ li l-AMLA tuża s-sistema FIU.net sabiex tkun tista' tibgħat, tirċievi u tqabbel trasversalment informazzjoni u tipprovdi appoġġ operazzjonali lill-FIUs fil-kuntest tal-analiżi konġunta ta' każijiet transfruntiera.

(82)

Il-parteċipazzjoni ta' partijiet terzi, inkluż korpi, uffiċċji u aġenziji tal-Unjoni, tista' tkun strumentali għall-eżitu b'suċċess tal-analiżijiet tal-FIUs, inkluż analiżijiet konġunti. Għalhekk, l-FIUs jistgħu jistiednu partijiet terzi biex jipparteċipaw fl-analiżi konġunta meta tali parteċipazzjoni taqa' fil-mandati rispettivi ta' dawk il-partijiet terzi. Il-parteċipazzjoni minn partijiet terzi fil-proċess analitiku tista' tgħin biex jiġu identifikati rabtiet bejn intelligence finanzjarja u informazzjoni u intelligence kriminali, tarrikkixxi l-analiżi u tiddetermina jekk hemmx indikazzjonijiet li jkun twettaq reat kriminali.

(83)

Is-superviżjoni effettiva tal-entitajiet kollha marbuta b'obbligu hija essenzjali biex tiġi mħarsa l-integrità tas-sistema finanzjarja tal-Unjoni u tas-suq intern. Għal dak il-għan, jenħtieġ li l-Istati Membri jimplimentaw superviżjoni effettiva u imparzjali fil-qasam tal-AML/CFT u jistabbilixxu l-kundizzjonijiet għal kooperazzjoni effettiva, f'waqtha u sostnuta bejn is-superviżuri.

(84)

L-Istati Membri jenħtieġ li jiżguraw superviżjoni effettiva, imparzjali u bbażata fuq ir-riskju tal-entitajiet marbutin b'obbligu kollha, preferibbilment min-naħa tal-awtoritajiet pubbliċi, permezz ta' superviżur nazzjonali mhux relatat u indipendenti. Is-superviżuri nazzjonali jenħtieġ li jkunu jistgħu jwettqu firxa komprensiva ta' kompiti sabiex jeżerċitaw superviżjoni effettiva tal-entitajiet marbutin b'obbligu kollha.

(85)

F'ċerti okkażjonijiet l-Unjoni osservat approċċ laxk għas-superviżjoni tad-dmirijiet tal-entitajiet marbutin b'obbligu f'termini ta' dmirijiet kontra l-ħasil tal-flus u kontra l-finanzjament tat-terroriżmu. Għalhekk, huwa meħtieġ li s-superviżuri nazzjonali, bħala parti mill-mekkaniżmu superviżorju integrat stabbilit minn din id-Direttiva u mir-Regolament (UE) 2024/1620, jiksbu ċarezza dwar id-drittijiet u l-obbligi rispettivi tagħhom.

(86)

Sabiex jivvalutaw u jimmonitorjaw b'mod aktar effettiv u regolari r-riskji li għalihom entitajiet marbutin b'obbligu huma esposti u l-politiki interni, il-proċeduri u l-kontrolli li jistabbilixxu biex jimmaniġġjaw u jimmitigaw dawk ir-riskji u biex jimplimentaw sanzjonijiet finanzjarji mmirati, hemm bżonn li jiġi ċċarat li s-superviżuri nazzjonali għandhom id-dritt u l-obbligu li jwettqu l-investigazzjonijiet kollha meħtieġa fuq il-post kif ukoll mhux fuq il-post u kontrolli tematiċi kif ukoll investigazzjonijiet u valutazzjonijiet oħra skont kif iqisu meħtieġ. Jenħtieġ li jkunu jistgħu wkoll jirreaġixxu mingħajr dewmien bla bżonn għal kwalunkwe suspett ta' nonkonformità mar-rekwiżiti applikabbli u li jieħdu miżuri superviżorji xierqa biex jindirizzaw allegazzjonijiet ta' nonkonformità. Dan mhux ser jgħin biss lis-superviżuri jiddeċiedu dwar dawk il-każijiet fejn ir-riskji speċifiċi inerenti f'settur ikunu ċari u mifhuma, iżda jagħtihom ukoll l-għodod meħtieġa biex ikomplu jaqsmu l-informazzjoni rilevanti lill-entitajiet marbutin b'obbligu u jinforma l-fehim tagħhom dwar ir-riskji tal-ħasil tal-flus u l-finanzjament tat-terroriżmu.

(87)

L-attivitajiet ta' sensibilizzazzjoni, inkluż id-disseminazzjoni ta' informazzjoni mis-superviżuri lill-entitajiet marbutin b'obbligu taħt is-superviżjoni tagħhom, huma essenzjali biex jiġi ggarantit li s-settur privat jifhem sew in-natura u l-livell tar-riskji tal-ħasil tal-flus u tal-finanzjament tat-terroriżmu li jiffaċċaw. Dan jinkludi t-tixrid ta' nominazzjonijiet taħt sanzjonijiet finanzjarji mmirati u sanzjonijiet finanzjarji tan-NU, li neħtieġ li jseħħu immedjatament ladarba tali nominazzjonijiet isiru sabiex is-settur ikun jista' jikkonforma mal-obbligi tagħhom. Peress li l-implimentazzjoni tar-rekwiżiti tal-AML/CFT mill-entitajiet marbutin b'obbligu tinvolvi l-ipproċessar ta' data personali, huwa importanti li s-superviżuri jkunu konxji tal-gwida u ma' pubblikazzjonijiet oħra maħruġa mill-awtoritajiet tal-protezzjoni tad-data, fil-livell nazzjonali jew fil-livell tal-Unjoni permezz tal-Bord Ewropew għall-Protezzjoni tad-Data, u li jinkludu dik l-informazzjoni, kif xieraq, fid-disseminazzjonijiet tagħhom lill-entitajiet taħt is-superviżjoni tagħhom.

(88)

Jenħtieġ li s-superviżuri jadottaw approċċ ibbażat fuq ir-riskju lejn il-ħidma tagħhom, li jippermettilhom jikkonċentraw ir-riżorsi tagħhom fejn ir-riskji jkunu l-ogħla, filwaqt li jiġi żgurat li l-ebda settur jew entità ma titħalla esposta għal tentattivi kriminali ta' ħasil tal-flus jew ta' finanzjament tat-terroriżmu. Għal dak il-għan, jenħtieġ li s-superviżuri jippjanaw l-attivitajiet tagħhom fuq bażi annwali. Meta jagħmlu dan, jenħtieġ li mhux biss jiżguraw kopertura bbażata fuq ir-riskju tas-setturi taħt is-superviżjoni tagħhom, iżda wkoll li jkunu jistgħu jirreaġixxu fil-pront fil-każ ta' indikazzjonijiet oġġettivi u sinifikanti ta' ksur fl-entità marbuta b'obbligu, inkluż b'mod partikolari wara rivelazzjonijiet pubbliċi jew informazzjoni ppreżentata mill-informaturi. Jenħtieġ li s-superviżuri jiżguraw ukoll it-trasparenza fir-rigward tal-attivitajiet superviżorji li wettqu, bħall-kulleġġi superviżorji li organizzaw u attendew, l-azzjonijiet superviżorji fuq il-post u mhux fuq il-post meħuda, s-sanzjonijiet pekunarji imposti jew il-miżuri amministrattivi applikati. Jenħtieġ li l-AMLA jkollha rwol ewlieni fit-trawwim ta' fehim komuni dwar ir-riskji, u għalhekk jenħtieġ li tiġi fdata bl-iżvilupp tal-parametri referenzjarji u metodoloġija għall-valutazzjoni u għall-klassifikazzjoni tal-profil tar-riskju inerenti u residwu tal-entitajiet marbutin b'obbligu, kif ukoll il-frekwenza li biha tali profil tar-riskju jenħtieġ li jiġi rivedut.

(89)

Id-divulgazzjoni ta' fatti lill-FIUs li jistgħu jkunu relatati mal-ħasil tal-flus jew mal-finanzjament tat-terroriżmu mis-superviżuri hija waħda mill-pedamenti ta' superviżjoni effiċjenti u effettiva tar-riskji ta' ħasil tal-flus u ta' finanzjament tat-terroriżmu, u tippermetti lis-superviżuri jindirizzaw nuqqasijiet fil-proċess ta' rappurtar ta' entitajiet marbutin b'obbligu. Għal dak il-għan, jenħtieġ li s-superviżuri jkunu jistgħu jirrapportaw lill-FIU każijiet ta' suspetti li l-entità marbuta b'obbligu tkun naqset milli tirrapporta jew tikkomplementa r-rapporti ppreżentati mill-entità marbuta b'obbligu b'informazzjoni addizzjonali, li huma jindividwaw matul l-attivitajiet superviżorji tagħhom. Jenħtieġ li s-superviżuri jkunu jistgħu wkoll jirrapportaw ukoll suspetti ta' ħasil tal-flus, ir-reati predikati tiegħu jew il-finanzjament tat-terroriżmu mill-impjegati ta' entitajiet marbutin b'obbligu, jew persuni f'pożizzjoni ekwivalenti, mill-maniġment tagħha jew mis-sidien benefiċjarji tagħha. Għalhekk, jeħtieġ li l-Istati Membri jistabbilixxu sistema li tiżgura li l-FIUs ikunu adegwatament u tempestivament infurmati. Ir-rappurtar ta' suspetti lill-FIU jenħtieġ li ma jinftiehemx bħala dak li jissostitwixxi l-obbligu għall-awtoritajiet pubbliċi li jirrapportaw lill-awtoritajiet kompetenti rilevanti kwalunkwe attività kriminali li jikxfu jew li jsiru konxji tagħha matul it-twettiq tal-kompiti tagħhom. L-informazzjoni koperta mill-privileġġ legali jenħtieġ li la tinġabar u lanqas tiġi kkonsultata fil-kuntest tal-kompiti superviżorji, sakemm ma japplikawx l-eżenzjonijiet stabbiliti fir-Regolament (UE) 2024/1624 Jekk is-superviżuri jiltaqgħu jew ikollhom fil-pussess tagħhom tali informazzjoni, jenħtieġ li ma jqisux din l-informazzjoni għall-finijiet tal-attivitajiet superviżorji tagħhom u lanqas ma jirrapportawha lill-FIU.

(90)

Il-kooperazzjoni bejn is-superviżuri nazzjonali hija essenzjali biex jiġi żgurat approċċ superviżorju komuni madwar l-Unjoni kollha. Sabiex tkun effettiva, dik il-kooperazzjoni trid tiġi użata sal-massimu possibbli u irrispettivament min-natura jew mill-istatus rispettiv tas-superviżuri. Minbarra l-kooperazzjoni tradizzjonali – bħall-kapaċità li jwettqu investigazzjonijiet f'isem awtorità superviżorja rikjedenti – huwa xieraq li jingħata mandat biex jitwaqqfu kulleġġi superviżuri għall-AML/CFT fis-settur finanzjarju fir-rigward tal-entitajiet marbutin b'obbligu li joperaw f'diversi Stati Membri permezz ta' stabbilimenti u fir-rigward ta' entitajiet marbutin b'obbligu li huma parti minn grupp transfruntier. Is-superviżuri finanzjarji ta' pajjiż terz jistgħu jiġu mistiedna għal dawk il-kulleġġi taħt ċerti kundizzjonijiet, inkluż rekwiżiti ta' kunfidenzjalità ekwivalenti għal dawk imposti fuq is-superviżuri finanzjarji tal-Unjoni u l-konformità mad-dritt tal-Unjoni rigward l-ipproċessar u t-trażmissjoni ta' data personali. L-attivitajiet tal-kulleġġi superviżorji għall-AML/CFT jenħtieġ li jkunu proporzjonati mal-livell li għalih tkun esposta l-istituzzjoni ta' kreditu jew l-istituzzjoni finanzjarja, u l-iskala tal-attività transfruntiera.

(91)

Id-Direttiva (UE) 2015/849 kienet tinkludi rekwiżit ġenerali biex is-superviżuri tal-Istati Membri domiċiljari u ta' dak ospitanti jikkooperaw ma' xulxin. Dak ir-rekwiżit ġie sussegwentement imsaħħah biex tiġi evitata l-projbizzjoni jew ir-restrizzjoni irraġonevoli fuq l-iskambju ta' informazzjoni u fuq il-kooperazzjoni bejn is-superviżuri. Madankollu, fin-nuqqas ta' qafas ġuridiku ċar, it-twaqqif ta' kulleġġi superviżorji għall-AML/CFT kien ibbażat fuq linji gwida mhux vinkolanti. Għalhekk hemm bżonn li jiġu stabbiliti regoli ċari għall-organizzazzjoni tal-kulleġġi għall-AML/CFT u li jiġi previst approċċ ikkoordinat u legalment b'saħħtu, li jirrikonoxxi l-ħtieġa għal interazzjoni strutturata bejn is-superviżuri madwar l-Unjoni kollha. F'konformità mar-rwol ta' koordinazzjoni u ta' sorveljanza tagħha, jenħtieġ li l-AMLA tiġi fdata bl-iżvilupp tal-abbozz tal-istandards tekniċi regolatorji li jiddefinixxi l-kundizzjonijiet ġenerali li jippermettu l-funzjonament xieraq tal-kulleġġi superviżorji għall-AML/CFT.

(92)

L-entitajiet marbutin b'obbligu li joperaw fis-settur mhux finanzjarju jistgħu jwettqu wkoll attivitajiet transfruntiera jew ikunu parti minn gruppi li jwettqu attivitajiet transfruntiera. Huwa għalhekk xieraq li jiġu stabbiliti regoli li jiddefinixxu l-funzjonament tal-kulleġġi superviżorji tal-AML/CFT għal gruppi li jwettqu kemm attivitajiet finanzjarji kif ukoll mhux finanzjarji, u li jippermettu l-istabbiliment ta' kulleġġi superviżorji fis-settur mhux finanzjarju, filwaqt li titqies il-ħtieġa li jiġu applikati salvagwardji addizzjonali fir-rigward ta' gruppi jew entitajiet transfruntiera li jipprovdu servizzi legali. Sabiex tiġi żgurata superviżjoni transfruntiera effettiva fis-settur mhux finanzjarju, jenħtieġ li l-AMLA tipprovdi appoġġ għall-funzjonament ta' tali kulleġġi u tipprovdi regolarment l-opinjoni tagħha dwar il-funzjonament ta' dawk il-kulleġġi hekk kif l-implimentazzjoni tal-qafas ta' abilitazzjoni previst minn din id-Direttiva tavvanza.

(93)

Meta entità marbuta b'obbligu topera stabbilimenti fi Stat Membru ieħor, inkluż permezz ta' network ta' aġenti, is-superviżur tal-Istat Membru domiċiljari jenħtieġ li jkun responsabbli biex iwettaq superviżjoni ta' kif l-entità marbuta b'obbligu tapplika l-politiki u l-proċeduri tal-AML/CFT fil-grupp kollu. Dan jista' jinvolvi żjarat fuq il-post fi stabbilimenti bbażati fi Stat Membru ieħor. Jenħtieġ li s-superviżur tal-Istat Membru domiċiljari jikkoopera mill-qrib mas-superviżur tal-Istat Membru ospitanti u jenħtieġ li jinformahdwar kwalunkwe kwistjoni li tista' taffettwa l-valutazzjoni tagħhom tal-konformità tal-istabbiliment mar-regoli tal-AML/CFT tal-Istat Membru ospitanti.

(94)

Meta entità marbuta b'obbligu topera stabbilimenti fi Stat Membru ieħor, inkluż permezz ta' network ta' aġenti, is-superviżur tal-Istat Membru ospitanti jenħtieġ li jibqa' responsabbli għall-infurzar tal-konformità tal-istabbiliment mar-regoli fil-qasam tal-AML/CFT, inkluż fejn xieraq, billi jwettaq spezzjonijiet fuq il-post u monitoraġġ mhux fuq il-post u billi jieħu miżuri adatti u proporzjonati biex jindirizza ksur ta' dawk ir-rekwiżiti. L-istess jenħtieġ li japplika għal tipi oħra ta' infrastruttura ta' entitajiet marbutin b'obbligu li joperaw bil-libertà li jipprovdu servizzi, fejn dik l-infrastruttura tkun biżżejjed biex tirrikjedi superviżjoni mis-superviżur tal-Istat Membru ospitanti. Jenħtieġ li s-superviżur tal-Istat Membru ospitanti jikkoopera mill-qrib mas-superviżur tal-Istat Membru domiċiljari u jenħtieġ li jinformahdwar kwalunkwe kwistjoni li tista' taffettwa l-valutazzjoni tiegħu tal-applikazzjoni tal-politiki u tal-proċeduri fil-qasam tal-AML/CFT mill-entità marbuta b'obbligu, u jippermetti lis-superviżur tal-Istat Membru domiċiljari jieħu miżuri biex jindirizza kwalunkwe ksur identifikat. Madankollu, fejn jiġi individwat ksur serju ripetut jew sistematiku tar-regoli tal-AML/CFT li jeħtieġu rimedji immedjati, jenħtieġ li s-superviżur tal-Istat Membru ospitanti jkun jista' japplika miżuri temporanji ta' rimedju adatti u proporzjonati, applikabbli f'ċirkostanzi simili għall-entitajiet marbutin b'obbligu taħt il-kompetenza tagħhom, sabiex jiġi indirizzat dan il-ksur serju ripetut jew sistematiku, fejn ikun il-każ, bl-assistenza, jew f'kooperazzjoni mas-superviżur tal-Istat Membru domiċiljari.

(95)

F'oqsma li mhumiex armonizzati fil-livell tal-Unjoni, l-Istati Membri jistgħu jadottaw miżuri nazzjonali, anke meta dawk il-miżuri jikkostitwixxu restrizzjonijiet għal-libertajiet tas-suq intern. Dan huwa l-każ, pereżempju, għal miżuri li jittieħdu biex jirregolaw il-forniment ta' servizzi tal-logħob tal-azzard, b'mod partikolari meta dawk l-attivitajiet jitwettqu online, mingħajr ebda infrastruttura fl-Istat Membru. Madankollu, sabiex ikunu kompatibbli mad-dritt tal-Unjoni, jeħtieġ li tali miżuri jiksbu interess ġenerali, ikunu nondiskriminatorji u adatti biex jintlaħaq dak l-objettiv, u ma jridux imorru lil hinn minn dak li huwa strettament meħtieġ biex jintlaħaq l-objettiv. Meta l-Istati Membri jissoġġettaw il-forniment ta' servizzi li huma regolati skont il-qafas tal-AML/CFT tal-Unjoni għal rekwiżiti ta' awtorizzazzjoni speċifiċi, bħall-kisba ta' liċenzja, jenħtieġ li jkunu responsabbli wkoll għas-superviżjoni ta' dawk is-servizzi. Ir-rekwiżit ta' superviżjoni ta' dawk is-servizzi ma jippreġudikax il-konklużjonijiet li l-Qorti tal-Ġustizzja tista' tfassal fuq il-kompatibbiltà tal-miżuri nazzjonali mad-dritt tal-Unjoni.

(96)

Fid-dawl tal-vulnerabbiltajiet speċifiċi kontra l-ħasil tal-flus relatati mal-emittenti ta' flus elettroniċi, il-fornituri ta’ servizzi ta' pagament u l-fornituri ta’ servizzi tal-kriptoassi, jenħtieġ li jkun possibbli li l-Istati Membri jeżiġu li l-fornituri stabbiliti fit-territorju tagħhom f'forom oħra għajr fergħa jew permezz ta' tipi oħra ta' infrastruttura u li s-sede tal-uffiċċju ewlieni tagħhom tkun tinsab fi Stat Membru ieħor jaħtru punt ta' kuntatt ċentrali. Tali punt ta' kuntatt ċentrali, li jaġixxi f'isem l-istituzzjoni tal-ħatra, jenħtieġ li jiżgura l-konformità tal-istabbilimenti mar-regoli dwar l-AML/CFT.

(97)

Sabiex tiġi żgurata koordinazzjoni aħjar tal-isforzi u jikkontribwixxu b'mod effettiv għall-ħtiġijiet tal-mekkaniżmu superviżorju integrat, jenħtieġ li jiġu ċċarati d-dmirijiet rispettivi tas-superviżuri fir-rigward ta' entitajiet marbutin b'obbligu li joperaw fi Stati Membri oħra permezz ta’ stabbilimenti jew forom ta’ infrastruttura li tiġġustifika superviżjoni mill-Istat Membru ospitanti, u jenħtieġ li jiġu previsti mekkaniżmi speċifiċi u proporzjonati ta' kooperazzjoni.

(98)

Jeħtieġ li l-gruppi transfruntiera jkollhom fis-seħħ politiki u proċeduri ta' portata wiesgħa fil-livell ta' grupp. Sabiex jiġi żgurat li l-operazzjonijiet transfruntiera jkunu akkumpanjati minn superviżjoni adegwata, huwa meħtieġ li jiġu stabbiliti regoli superviżorji dettaljati, li jippermettu lis-superviżuri tal-Istat Membru domiċiljari u lil dawk tal-Istat Membru ospitanti jikkooperaw kemm jista' jkun ma' xulxin, irrispettivament min-natura jew mill-istatus rispettiv tagħhom, u mal-AMLA biex jivvalutaw ir-riskji u jimmonitorjaw l-iżviluppi li jistgħu jaffettwaw id-diversi entitajiet li jagħmlu parti mill-grupp u jikkoordinaw azzjoni superviżorja u jsolvu t-tilwimiet. Minħabba r-rwol ta' koordinazzjoni tagħha, jenħtieġ li l-AMLA tiġi fdata bid-dmir li tiżviluppa l-abbozz tal-istandards tekniċi regolatorji li jiddefinixxi d-dmirijiet rispettivi dettaljati tas-superviżuri domiċiljari u dawk ospitanti tal-gruppi, kif ukoll l-arranġamenti għall-kooperazzjoni bejniethom. Is-sorveljanza tal-implimentazzjoni effettiva tal-politika fil-qasam tal-AML/CFT fil-grupp jenħtieġ li ssir f'konformità mal-prinċipji u l-metodi ta' superviżjoni kkonsolidata kif stabbilit fl-atti legali settorjali tal-Unjoni rilevanti.

(99)

L-iskambju ta' informazzjoni u l-kooperazzjoni bejn is-superviżuri huma essenzjali fil-kuntest ta' sistemi finanzjarji globali dejjem aktar integrati. Min-naħa waħda, is-superviżuri tal-Unjoni, inkluż l-AMLA, jenħtieġ li jinfurmaw lil xulxin dwar każijiet li fihom il-liġi ta' pajjiż terz ma tippermettix l-implimentazzjoni tal-politiki u tal-proċeduri meħtieġa skont ir-Regolament (UE) 2024/1624. Min-naħa l-oħra, jenħtieġ li jkun possibbli għall-Istati Membri li jagħtu l-awtorizzazzjoni tagħhom lis-superviżuri biex jikkonkludu ftehimiet ta' kooperazzjoni li jipprevedu l-kooperazzjoni u l-iskambji ta' informazzjoni kunfidenzjali mal-kontropartijiet tagħhom f'pajjiżi terzi, f'konformità mar-regoli applikabbli għat-trasferimenti ta' data personali. Minħabba r-rwol ta' sorveljanza tagħha, jenħtieġ li l-AMLA tipprovdi l-assistenza tagħha, skont kif meħtieġ, biex tiġi vvalutata l-ekwivalenza tar-rekwiżiti tas-segretezza professjonali applikabbli għall-pajjiż terz kontroparti.

(100)

Id-Direttiva (UE) 2015/849 tippermetti lill-Istati Membri jafdaw is-superviżjoni ta' ċerti entitajiet marbutin b'obbligu lil korpi ta' awtoregolamentazzjoni. Madankollu, il-kwalità u l-intensità tas-superviżjoni eżerċitata minn tali korpi ta' awtoregolamentazzjoni ma kinux biżżejjed, u ma kienu taħt l-ebda jew kważi l-ebda skrutinju pubbliku. Meta Stat Membru jiddeċiedi li jafda s-superviżjoni lil korp ta' awtoregolamentazzjoni, jenħtieġ li jaħtar ukoll awtorità pubblika biex tissorvelja l-attivitajiet tal-korp ta' awtoregolamentazzjoni biex tiżgura li l-eżekuzzjoni ta' dawk l-attivitajiet hija konformi ma’ din id-Direttiva. Jenħtieġ li dik l-awtorità pubblika tkun entità tal-amministrazzjoni pubblika u jenħtieġ li twettaq il-funzjonijiet tagħha ħielsa minn influwenza indebita. Il-funzjonijiet li għandhom jiġu eżerċitati mill-awtorità pubblika li tissorvelja l-korpi ta' awtoregolamentazzjoni ma jimplikawx li l-awtorità jenħtieġ li teżerċita funzjonijiet superviżorji fir-rigward ta' entitajiet marbutin b'obbligu, u lanqas tieħu deċiżjonijiet f'każijiet individwali ttrattati mill-korp awtoregolatorju. Madankollu, dan ma jżommx lill-Istati Membri milli jallokaw kompiti addizzjonali lil dik l-awtorità jekk iqisu li dan ikun meħtieġ biex jintlaħqu l-objettivi ta' din id-Direttiva. Meta jagħmlu dan, l-Istati Membri jenħtieġ li jiżguraw li l-kompiti addizzjonali jkunu konformi mad-drittijiet fundamentali, u b'mod partikolari li dawk il-kompiti ma jfixklux l-eżerċizzju tad-dritt tad-difiża u l-kunfidenzjalità tal-komunikazzjoni bejn l-avukat u l-klijent.

(101)

L-importanza tal-ġlieda kontra l-ħasil tal-flus u l-finanzjament tat-terroriżmu jenħtieġ li twassal biex l-Istati Membri jistabbilixxu sanzjonijiet pekunarji u miżuri amministrattivi effettivi, proporzjonati u dissważivi fid-dritt nazzjonali fil-każ ta' nuqqas ta' konformità mar-Regolament (UE) 2024/1624 Jenħtieġ li l-Istati Membri jagħtu s-setgħa lis-superviżuri nazzjonali biex japplikaw tali miżuri amministrattivi fuq entitajiet marbutin b'obbligu biex tiġi rrimedjata s-sitwazzjoni f'każ ta' ksur u, fejn il-ksur jiġġustifika dan, jimponu sanzjonijiet pekunarji. Skont is-sistemi organizzattivi fis-seħħ fl-Istati Membri, tali miżuri u sanzjonijiet jistgħu jiġu applikati wkoll f'kooperazzjoni bejn is-superviżuri u awtoritajiet oħra, b'delega mis-superviżuri lil awtoritajiet oħra jew b'applikazzjoni mis-superviżuri lill-awtoritajiet ġudizzjarji. Jenħtieġ li l-firxa ta' sanzjonijiet pekunarji u ta' miżuri amministrattivi tkun wiesgħa biżżejjed biex tippermetti lill-Istati Membri u lis-superviżuri jifhmu d-differenzi bejn l-entitajiet marbutin b'obbligu, b'mod partikolari bejn l-istituzzjonijiet finanzjarji u ta' kreditu u entitajiet oħra marbutin b'obbligu, f'dak li għandu x'jaqsam mad-daqs, il-karatteristiċi u n-natura tan-negozju tagħhom.

(102)

Attwalment l-Istati Membri għandhom fis-seħħ firxa varja ta' sanzjonijiet pekunarji u ta' miżuri amministrattivi għall-ksur tad-dispożizzjonijiet preventivi ewlenin u approċċ inkonsistenti lejn l-investigazzjoni u s-sanzjonar tal-ksur tar-rekwiżiti kontra l-ħasil tal-flus. Barra minn hekk, m’hemmx fehim komuni bejn is-superviżuri dwar x'jenħtieġ li jikkostitwixxi ksur “serju” u b'hekk ma jistgħux jevalwaw malajr meta jenħtieġ li tiġi imposta sanzjoni pekunarja. Dik id-diversità hija ta' detriment għall-isforzi fil-ġlieda kontra l-ħasil tal-flus u l-finanzjament tat-terroriżmu u r-rispons tal-Unjoni huwa wieħed frammentat. Għalhekk, jenħtieġ li jiġu stabbiliti kriterji komuni biex jiġi ddeterminat l-aktar rispons superviżorju xieraq fil-każ ta' ksur u jenħtieġ li tiġi prevista firxa ta' miżuri amministrattivi li s-superviżuri jistgħu japplikaw biex jirrimedjaw ksur, kemm jekk f'kombinazzjoni ma' sanzjonijiet pekunarji jew meta l-ksur ma jkunx serju biżżejjed biex jiġi ppenalizzat b'sanzjoni pekunarja waħedha. Sabiex l-entitajiet marbutin b'obbligu jiġu inċentivati jikkonformaw mad-dispożizzjonijiet tar-Regolament (UE) 2024/1624, hemm bżonn li tissaħħaħ in-natura dissważiva tas-sanzjonijiet pekunarji. Għaldaqstant, jenħtieġ li jiżdied l-ammont minimu tal-penali massima li tista' tiġi imposta f'każ ta' ksur serju tar-Regolament (UE) 2024/1624. Fit-traspożizzjoni ta' din id-Direttiva, jenħtieġ li l-Istati Membri jiżguraw li l-impożizzjoni ta' sanzjonijiet pekunarji u l-applikazzjoni ta' miżuri amministrattivi, u l-impożizzjoni ta' sanzjonijiet kriminali f'konformità mad-dritt nazzjonali, ma tmurx kontra l-prinċipju ta' ne bis in idem.

(103)

Fil-każ ta' entitajiet marbutin b'obbligu li huma persuni ġuridiċi, il-ksur tar-rekwiżiti tal-AML/CFT iseħħ wara azzjoni minn persuni fiżiċi, jew taħt ir-responsabbiltà tagħhom li għandhom is-setgħa li jidderieġu l-attivitajiet tagħhom, inkluż permezz ta' aġenti, distributuri jew persuni oħra li jaġixxu f'isem l-entità marbuta b'obbligu. Sabiex jiġi żgurat li l-azzjoni superviżorja b'reazzjoni għal tali ksur tkun effettiva, jenħtieġ li l-entità marbuta b'obbligu tinżamm responsabbli wkoll għal azzjonijiet meħuda minn dawk il-persuni fiżiċi, kemm jekk imwettqa intenzjonalment jew b'negliġenza. Mingħajr preġudizzju għar-responsabbiltà ta' persuni ġuridiċi fi proċedimenti kriminali, kwalunkwe intenzjoni li jinkiseb benefiċċju għall-entità marbuta b'obbligu minn ksur tindika nuqqasijiet usa' fil-politiki, fil-proċeduri u fil-kontrolli interni tal-entità marbuta b'obbligu li tipprevjeni l-ħasil tal-flus, ir-reati predikati tiegħu u l-finanzjament tat-terroriżmu. Tali nuqqasijiet idgħajfu r-rwol tal-entità marbuta b'obbligu bħala gwardjan tas-sistema finanzjarja tal-Unjoni. Għalhekk, kwalunkwe intenzjoni li jinkiseb benefiċċju minn ksur tar-rekwiżit tal-AML/CFT jenħtieġ li tittieħed bħala fattur aggravanti.

(104)

L-Istati Membri għandhom sistemi differenti fis-seħħ għall-impożizzjoni ta' sanzjonijiet pekunarji, l-applikazzjoni ta’ miżuri amministrattivi u l-impożizzjoni ta’ pagamenti perjodiċi ta' penali. Barra minn hekk, ċerti miżuri amministrattivi li s-superviżuri għandhom is-setgħa li japplikaw, bħall-irtirar jew is-sospensjoni tal-liċenzja, jiddependu fuq l-eżekuzzjoni ta' dawk il-miżuri minn awtoritajiet oħra. Sabiex tiġi prevista firxa tant diversa ta' sitwazzjonijiet, huwa xieraq li tiġi permessa flessibbiltà fir-rigward tal-mezzi li s-superviżuri jridu jimponu sanzjonijiet pekunarji, japplikaw miżuri amministrattivi u jimponu pagamenti perjodiċi ta' penali. Irrispettivament mill-mezzi magħżula, hija r-responsabbiltà tal-Istati Membri u tal-awtoritajiet involuti li jiżguraw li l-mekkaniżmi implimentati jiksbu r-riżultat maħsub tar-restawr tal-konformità u jimponu sanzjonijiet pekunarji effettivi, dissważivi u proporzjonati.

(105)

Bil-ħsieb li jiġi żgurat li l-entitajiet marbutin b'obbligu jikkonformaw mar-rekwiżiti tal-AML/CFT u jimmitigaw b'mod effettiv ir-riskji tal-ħasil tal-flus, ir-reati predikati tiegħu u l-finanzjament tat-terroriżmu li huma esposti għalihom, jenħtieġ li s-superviżuri jkunu jistgħu japplikaw miżuri amministrattivi mhux biss biex jirrimedjaw il-ksur identifikat, iżda wkoll meta jidentifikaw li d-dgħufijiet fil-politiki, fil-proċeduri u fil-kontrolli interni x'aktarx jirriżultaw fi ksur tar-rekwiżiti tal-AML/CFT, jew meta dawk il-politiki, il-proċeduri u l-kontrolli ma jkunux adegwati biex jimmitigaw ir-riskji. Il-kamp ta' applikazzjoni tal-miżuri amministrattivi applikati, u ż-żmien mogħti lill-entitajiet marbutin b'obbligu biex jimplimentaw l-azzjonijiet mitluba, jiddependu fuq il-ksur jew id-dgħufijiet speċifiċi identifikati. Meta jiġu identifikati ksur jew dgħufijiet diversi, jistgħu japplikaw skadenzi differenti għall-implimentazzjoni ta' kull miżura amministrattiva individwali. B'mod konsistenti mal-għan punittiv u edukattiv tal-pubblikazzjonijiet, jenħtieġ li jiġu ppubblikati biss id-deċiżjonijiet li jiġu applikati miżuri amministrattivi fir-rigward tal-ksur tar-rekwiżiti tal-AML/CFT, iżda mhux miżuri amministrattivi applikati għall-prevenzjoni ta' tali ksur.

(106)

Il-konformità f'waqtha mill-entitajiet marbutin b'obbligu mal-miżuri amministrattivi applikati għalihom hija essenzjali biex jiġi żgurat livell adegwat u konsistenti ta' protezzjoni kontra l-ħasil tal-flus, ir-reati predikati tiegħu u l-finanzjament tat-terroriżmu fis-suq intern kollu. Meta l-entitajiet marbutin b'obbligu jonqsu milli jikkonformaw mal-miżuri amministrattivi sal-iskadenza stabbilita, huwa meħtieġ li s-superviżuri jkunu jistgħu japplikaw pressjoni msaħħa fuq l-entità marbuta b'obbligu biex tirrestawra l-konformità mingħajr dewmien. Għal dak il-għan, jenħtieġ li jkun possibbli għas-superviżuri li jimponu pagamenti perjodiċi ta' penali mill-iskadenza stabbilita biex terġa' tinkiseb il-konformità, inkluż b'effett retroattiv meta d-deċiżjoni li timponi l-pagament perjodiku ta' penali tittieħed fi stadju aktar tard. Fil-kalkolu tal-ammonti ta' pagamenti perjodiċi ta' penali, is-superviżuri jenħtieġ li jqisu l-fatturat ġenerali tal-entità marbuta b'obbligu u t-tip u l-gravità tal-ksur jew tad-dgħufija fil-mira tal-miżura superviżorja biex jiżguraw l-effettività u l-proporzjonalità tagħha. Minħabba l-għan tagħhom li jagħmlu pressjoni fuq entità marbuta b'obbligu biex tikkonforma ma' miżura amministrattiva, il-pagamenti perjodiċi ta' penali jenħtieġ li jkunu limitati fiż-żmien u ma japplikawx għal aktar minn sitt xhur. Filwaqt li jenħtieġ li jkun possibbli għas-superviżuri li jġeddu l-impożizzjoni ta' pagamenti perjodiċi ta' penali għal massimu ta' sitt xhur oħra, jenħtieġ li jiġu kkunsidrati miżuri alternattivi biex tiġi indirizzata sitwazzjoni estiża ta' nuqqas ta' konformità, konsistenti mal-firxa wiesgħa ta' miżuri amministrattivi li s-superviżuri jistgħu japplikaw.

(107)

Fejn is-sistema legali tal-Istat Membru ma tippermettix l-impożizzjoni ta' sanzjonijiet pekunarji previsti f'din id-Direttiva b'mezzi amministrattivi, ir-regoli dwar sanzjonijiet pekunarji jistgħu jiġu applikati b'tali mod li l-penali tinbeda mis-superviżur u tiġi imposta mill-awtoritajiet ġudizzjarji. Għalhekk, huwa neċessarju li dawk l-Istati Membri jiżguraw li l-applikazzjoni tar-regoli u tas-sanzjonijiet pekunarji jkollha effett ekwivalenti għas-sanzjonijiet pekunarji imposti mis-superviżuri. Meta jimponu tali sanzjonijiet pekunarji, jenħtieġ li l-awtoritajiet ġudizzjarji jqisu r-rakkomandazzjoni mis-superviżur li jagħti bidu għall-penali. Jenħtieġ li s-sanzjonijiet pekunarji imposti jkunu effettivi, proporzjonati u dissważivi.

(108)

L-entitajiet marbutin b'obbligu jistgħu jibbenefikaw mil-libertà li jipprovdu servizzi u ta' stabbiliment fis-suq intern kollu biex joffru l-prodotti u s-servizzi tagħhom madwar l-Unjoni kollha. Sistema superviżorja effettiva tirrikjedi li s-superviżuri jkunu konxji min-nuqqasijiet tal-entitajiet marbutin b'obbligu f'konformità mar-regoli fil-qasam tal-AML/CFT. Għalhekk huwa importanti li s-superviżuri jkunu jistgħu jinfurmaw lil xulxin dwar sanzjonijiet pekunarji imposti fuq entitajiet marbutin b'obbligu u miżuri amministrattivi applikati għalihom-, meta tali informazzjoni tkun rilevanti għal superviżuri oħra.

(109)

Il-pubblikazzjoni ta' sanzjoni pekunarja jew miżura amministrattiva għall-ksur tar-Regolament (UE) 2024/1624 jista' jkollha effett disważiv b'saħħtu kontra r-repetizzjoni ta' tali ksur. Barra minn hekk tinforma lill-entitajiet oħra dwar ir-riskji ta' ħasil tal-flus u r-riskji tal-finanzjament tat-terroriżmu assoċjati mal-entità marbuta b'obbligu sanzjonata qabel ma jidħlu f'relazzjoni tan-negozju u tgħin lis-superviżuri fi Stati Membri oħra fir-rigward tar-riskji assoċjati ma' entità marbuta b'obbligu meta topera fl-Istat Membru tagħhom fuq bażi transfruntiera. Għal dawk ir-raġunijiet, jenħtieġ li jiġi kkonfermat ir-rekwiżit li jiġu ppubblikati deċiżjonijiet dwar sanzjonijiet pekunarji li kontrihom ma hemm l-ebda appell u jenħtieġ li jiġi estiż għall-pubblikazzjoni ta' ċerti miżuri amministrattivi li huma applikati biex jirrimedjaw ksur tar-rekwiżiti tal-AML/CFT u għal pagamenti perjodiċi ta' penali. Madankollu, kull pubblikazzjoni ta' dan it-tip jenħtieġ li tkun proporzjonata u, fit-teħid ta' deċiżjoni dwar jekk sanzjoni pekunarja jew miżura amministrattiva tiġix ippubblikata jew le, is-superviżuri jenħtieġ li jqisu l-gravità tal-ksur u l-effett dissważiv li l-pubblikazzjoni x'aktarx ikollha. Għal dak il-għan, l-Istati Membri jistgħu jiddeċiedu li jdewmu l-pubblikazzjoni ta' miżuri amministrattivi li jkun hemm appell kontrihom meta dawk il-miżuri jiġu applikati biex jirrimedjaw ksur li ma jkunx serju, ripetut jew sistematiku.

(110)

Id-Direttiva (UE) 2019/1937 tal-Parlament Ewropew u tal-Kunsill (22) tapplika għar-rappurtar tal-ksur tad-Direttiva (UE) 2015/849 fir-rigward tal-ħasil tal-flus u l-finanzjament tat-terroriżmu u għall-protezzjoni ta' persuni li jirrapportaw tali ksur, li hija msemmija fil-Parti II tal-Anness tad-Direttiva (UE) 2019/1937. Peress li din id-Direttiva tħassar id-Direttiva (UE) 2015/849, ir-referenza għad-Direttiva (UE) 2015/849 fl-Anness II tad-Direttiva (UE) 2019/1937 jenħtieġ li tinftiehem bħala referenza għal din id-Direttiva. Fl-istess ħin, huwa meħtieġ li jinżammu regoli mfassla apposta dwar ir-rappurtar ta' ksur tar-rekwiżiti tal-AML/CFT li jikkomplementaw id-Direttiva (UE) 2019/1937, b'mod partikolari, fir-rigward tar-rekwiżiti għall-entitajiet marbutin b'obbligu biex jistabbilixxu kanali ta' rappurtar interni u l-identifikazzjoni tal-awtoritajiet kompetenti biex jirċievu u jsegwu rapporti relatati ma' ksur tar-regoli fir-rigward tal-prevenzjoni u l-ġlieda kontra l-ħasil tal-flus u l-finanzjament tat-terroriżmu.

(111)

Huwa essenzjali li jkun hemm politika ta’ AML/CFT ġdida kompletament integrata u koerenti fil-livell tal-Unjoni, bi rwoli speċifikati kemm għall-awtoritajiet kompetenti tal-Unjoni kif ukoll għal dawk nazzjonali u bil-għan li tiġi żgurata l-kooperazzjoni bla xkiel u kostanti tagħhom. F'dak ir-rigward, il-kooperazzjoni bejn l-awtoritajiet nazzjonali u tal-Unjoni kollha fil-qasam tal-AML/CFT hija ta' importanza kbira u jenħtieġ li din tiġi ċċarata u msaħħa. Jibqa' d-dmir tal-Istati Membri li jipprevedu r-regoli meħtieġa biex jiżguraw li fuq livell nazzjonali, dawk li jfasslu l-politika, l-FIUs, is-superviżuri, inkluż l-AMLA, u awtoritajiet kompetenti oħra involuti fl-AML/CFT, kif ukoll l-awtoritajiet tat-taxxa u l-awtoritajiet tal-infurzar tal-liġi jaġixxu fi ħdan il-kamp ta' applikazzjoni ta' din id-Direttiva, ikollhom mekkaniżmi effettivi li jippermettulhom jikkooperaw u jikkoordinaw bejniethom, inkluż permezz ta' approċċ restrittiv għar-rifjut tal-awtoritajiet kompetenti li jikkooperaw u li jiskambjaw l-informazzjoni fuq talba ta' awtorità kompetenti oħra. Irrispettivament mill-mekkaniżmi stabbiliti, tali kooperazzjoni nazzjonali jenħtieġ li tirriżulta f'sistema effettiva għall-prevenzjoni u l-ġlieda kontra l-ħasil tal-flus, ir-reati predikati tiegħu u l-finanzjament tat-terroriżmu, u għall-prevenzjoni tan-nonimplimentazzjoni u l-evażjoni ta' sanzjonijiet finanzjarji mmirati.

(112)

Sabiex tiġi ffaċilitata u promossa l-kooperazzjoni effettiva, u b'mod partikolari l-iskambju ta' informazzjoni, jenħtieġ li l-Istati Membri jikkomunikaw lill-Kummissjoni u lill-AMLA l-lista tal-awtoritajiet kompetenti tagħhom u d-dettalji ta' kuntatt rilevanti.

(113)

Ir-riskju ta' ħasil tal-flus u ta' finanzjament tat-terroriżmu jista' jiġi identifikat mis-superviżuri kollha responsabbli għall-istituzzjonijiet ta' kreditu. L-informazzjoni ta' natura prudenzjali relatata mal-istituzzjonijiet ta' kreditu l-istituzzjonijiet finanzjarji, bħalma hija l-informazzjoni relatata mal-kompetenza u mal-idoneità tad-diretturi u tal-azzjonisti, mal-mekkaniżmi ta' kontroll intern, mal-governanza jew mal-ġestjoni tal-konformità u tar-riskju, spiss hija indispensabbli għas-superviżjoni adegwata ta' tali istituzzjonijiet fil-qasam tal-AML/CFT. B'mod simili, l-informazzjoni fil-qasam tal-AML/CFT hija importanti wkoll għas-superviżjoni prudenzjali ta' tali istituzzjonijiet. Għalhekk, jenħtieġ li l-kooperazzjoni u l-iskambju ta' informazzjoni mas-superviżuri fil-qasam tal-AML/CFT u mal-FIU jiġu estiżi għall-awtoritajiet kompetenti kollha responsabbli għas-superviżjoni ta' dawk l-entitajiet marbutin b'obbligu f'konformità ma' strumenti ġuridiċi oħra tal-Unjoni, bħad-Direttivi 2013/36/UE (23), 2014/49/UE (24), 2014/59/UE (25) u 2014/92/UE (26) tal-Parlament Ewropew u tal-Kunsill u d-Direttiva (UE) 2015/2366. Sabiex tiġi żgurata l-implimentazzjoni effettiva ta' dik il-kooperazzjoni, jenħtieġ li l-Istati Membri jinfurmaw lil AMLA dwar l-iskambji mwettqa fuq bażi annwali.

(114)

Il-kooperazzjoni ma' awtoritajiet kompetenti oħra għas-superviżjoni ta' istituzzjonijiet ta' kreditu skont id-Direttivi 2014/92/UE u (UE) 2015/2366 għandha l-potenzjal li tnaqqas il-konsegwenzi mhux intenzjonati tar-rekwiżiti fil-qasam tal-AML/CFT. L-istituzzjonijiet ta' kreditu jistgħu jagħżlu li jwaqqfu jew li jillimitaw ir-relazzjonijiet tan-negozju ma' klijenti jew ma' kategoriji ta' klijenti sabiex jevitaw, aktar milli jimmaniġġjaw, ir-riskju. Tali prattiki ta' tneħħija tar-riskji jistgħu jdgħajfu l-qafas tal-AML/CFT u d-detezzjoni ta' tranżazzjonijiet suspettużi, peress li jġiegħlu lill-klijenti affettwati jirrikorru għal mezzi ta' pagament inqas sikuri jew mhux irregolati biex jissodisfaw il-ħtiġijiet finanzjarji tagħhom. Fl-istess ħin, il-prattiki mifruxa tat-tneħħija tar-riskji fis-settur bankarju jistgħu jwasslu għall-esklużjoni finanzjarja ta' ċerti kategoriji ta' entitajiet ta' pagament jew konsumaturi. Is-superviżuri finanzjarji huma fl-aħjar pożizzjoni biex jidentifikaw sitwazzjonijiet fejn istituzzjoni ta' kreditu tkun irrifjutat li tidħol f'relazzjoni tan-negozju minkejja li possibbilment tkun obbligata tagħmel dan abbażi tad-dritt nazzjonali li jimplimenta d-Direttiva 2014/92/UE jew id-Direttiva (UE) 2015/2366, u mingħajr ġustifikazzjoni abbażi tad-diliġenza dovuta fir-rigward tal-klijent dokumentata. Jenħtieġ li s-superviżuri finanzjarji jallertaw lill-awtoritajiet responsabbli biex jiżguraw il-konformità tal-istituzzjoni finanzjarja mad-Direttiva 2014/92/UE jew mad-Direttiva (UE) 2015/2366 meta jirriżultaw każijiet bħal dawn jew fejn relazzjonijiet tan-negozju jieqfu bħala riżultat ta' prattiki ta' tneħħija tar-riskju.

(115)

Il-kooperazzjoni bejn is-superviżuri finanzjarji u l-awtoritajiet responsabbli għall-maniġġar ta' kriżijiet ta' istituzzjonijiet ta' kreditu u ditti ta' investiment, bħal b'mod partikolari l-awtoritajiet deżinjati u l-awtoritajiet ta' riżoluzzjoni tal-Iskemi ta' Garanzija tad-Depożiti, hija neċessarja biex l-objettivi jiġu rikonċiljati għall-prevenzjoni tal-ħasil tal-flus skont din id-Direttiva u biex jiġu protetti l-istabbiltà finanzjarja u d-depożitanti skont id-Direttivi 2014/49/UE u 2014/59/UE. Jenħtieġ li s-superviżuri finanzjarji jinfurmaw lill-awtoritajiet deżinjati u lill-awtoritajiet tar-riżoluzzjoni skont dawk id-Direttivi b’kull każ fejn jidentifikaw possibbiltà akbar ta' falliment jew in-nuqqas ta' disponibbiltà ta' depożiti minħabba AML/CFT. Jenħtieġ li s-superviżuri finanzjarji jinfurmaw ukoll lil dawk l-awtoritajiet dwar kwalunkwe tranżazzjoni, kont jew relazzjoni ta' negozju li tkun ġiet sospiża mill-FIU sabiex tippermetti t-twettiq tal-kompiti tal-awtoritajiet deżinjati u tal-awtoritajiet ta' riżoluzzjoni f'każijiet ta' riskju akbar ta' falliment jew ta' nuqqas ta' disponibbiltà ta' depożiti, irrispettivament mir-raġuni għal dak ir-riskju akbar.

(116)

Sabiex tiġi ffaċilitata tali kooperazzjoni fir-rigward tal-istituzzjonijiet ta' kreditu u istituzzjonijiet finanzjarji, l-AMLA, f'konsultazzjoni mal-Awtorità Bankarja Ewropea, jenħtieġ li toħroġ linji gwida li jispeċifikaw l-elementi ewlenin ta' tali kooperazzjoni inkluż kif jenħtieġ li tiġi skambjata l-informazzjoni.

(117)

Jenħtieġ li l-mekkaniżmi ta' kooperazzjoni jestendu wkoll għall-awtoritajiet responsabbli għas-superviżjoni u għas-sorveljanza tal-awdituri, peress li tali kooperazzjoni tista' ssaħħaħ l-effettività tal-qafas tal-Unjoni kontra l-ħasil tal-flus.

(118)

L-iskambju ta' informazzjoni u l-għoti ta' assistenza bejn l-awtoritajiet kompetenti tal-Istati Membri huma essenzjali għall-finijiet ta' din id-Direttiva. Konsegwentement, jenħtieġ li l-Istati Membri ma jipprojbixxux jew jimponu kundizzjonijiet restrittivi irraġonevoli jew bla bżonn fuq tali skambju ta' informazzjoni jew għoti ta' assistenza.

(119)

Is-superviżuri jenħtieġ li jkunu jistgħu jikkooperaw u jiskambjaw informazzjoni kunfidenzjali, irrispettivament min-natura jew mill-istatus rispettiv tagħhom. Għal dak il-għan, jenħtieġ li jkollhom bażi ġuridika adegwata għall-iskambju ta' informazzjoni kunfidenzjali u għall-kooperazzjoni. Jenħtieġ li l-iskambju ta' informazzjoni u l-kooperazzjoni ma' awtoritajiet oħra kompetenti għas-superviżjoni jew għas-sorveljanza ta' entitajiet marbutin b'obbligu skont atti legali oħra tal-Unjoni ma jiġux imfixkla involontarjament minn inċertezza tad-dritt li tista' tkun ġejja minn nuqqas ta' dispożizzjonijiet espliċiti f'dan il-qasam. Kjarifika tal-qafas ġuridiku hija saħansitra aktar importanti peress li f'għadd ta' każijiet, is-superviżjoni prudenzjali ġiet fdata lil superviżuri mhux fil-qasam tal-AML/CFT, bħal pereżempju l-Bank Ċentrali Ewropew (BĊE).

(120)

L-informazzjoni fil-pussess tas-superviżuri tista' tkun kruċjali għat-twettiq tal-attivitajiet ta' awtoritajiet kompetenti oħra. Sabiex tiġi żgurata l-effettività tal-qafas tal-AML/CFT tal-Unjoni, jenħtieġ li l-Istati Membri jawtorizzaw l-iskambju ta' informazzjoni bejn is-superviżuri u awtoritajiet kompetenti oħra. Jenħtieġ li japplikaw regoli stretti fir-rigward tal-użu ta' informazzjoni kunfidenzjali skambjata.

(121)

L-effettività tal-qafas tal-Unjoni fil-qasam tal-AML/CFT tiddependi fuq kooperazzjoni bejn firxa wiesgħa ta' awtoritajiet kompetenti. Sabiex tiġi ffaċilitata din il-kooperazzjoni, jenħtieġ li l-AMLA tiġi fdata bl-iżvilupp ta' linji gwida f'koordinazzjoni mal-BĊE, mal-Awtoritajiet Superviżorji Ewropej, mal-Europol, mal-Eurojust, u mal-UPPE dwar il-kooperazzjoni bejn l-awtoritajiet kompetenti kollha. Tali linji gwida jenħtieġ li jiddeskrivu wkoll il-mod kif l-awtoritajiet kompetenti għas-superviżjoni jew għas-sorveljanza tal-entitajiet marbutin b'obbligu skont atti legali oħra tal-Unjoni jenħtieġ li jqisu t-tħassib dwar il-ħasil tal-flus u l-finanzjament tat-terroriżmu fl-eżerċizzju tad-dmirijiet tagħhom.

(122)

Ir-Regolament (UE) 2016/679 japplika għall-ipproċessar ta' data personali għall-finijiet ta' din id-Direttiva. Ir-Regolament (UE) 2018/1725 tal-Parlament Ewropew u tal-Kunsill (27) japplika għall-ipproċessar ta' data personali mill-istituzzjonijiet, mill-korpi, mill-uffiċċji u mill-aġenziji tal-Unjoni għall-finijiet ta' din id-Direttiva. Il-ġlieda kontra l-ħasil tal-flus u l-finanzjament tat-terroriżmu hija rikonoxxuta bħala raġuni importanti ta' interess pubbliku mill-Istati Membri. Madankollu, l-awtoritajiet kompetenti responsabbli għall-investigazzjoni jew għall-prosekuzzjoni tal-ħasil tal-flus, ir-reati predikati tiegħu jew il-finanzjament tat-terroriżmu, jew dawk li għandhom il-funzjoni li jintraċċaw, jissekwestraw jew jiffriżaw u jikkonfiskaw l-assi kriminali jenħtieġ li jirrispettaw ir-regoli relatati mal-protezzjoni tad-data personali li tiġi pproċessata fil-qafas tal-kooperazzjoni bejn il-pulizija u dik ġudizzjarja f'materji kriminali, fosthom id-Direttiva (UE) 2016/680 tal-Parlament Ewropew u tal-Kunsill (28).

(123)

Huwa essenzjali li l-allinjament ta' din id-Direttiva mar-Rakkomandazzjonijiet riveduti tal-FATF isir f'konformità sħiħa mad-dritt tal-Unjoni, partikolarment fir-rigward tal-liġi tal-Unjoni dwar il-protezzjoni tad-data, inkluż ir-regoli dwar it-trasferimenti tad-data, kif ukoll il-protezzjoni tad-drittijiet fundamentali kif minquxa fil-Karta. Ċerti aspetti tal-implimentazzjoni ta' din id-Direttiva jinvolvu l-ġbir, l-analiżi, il-ħżin u l-kondiviżjoni ta' data ġewwa l-Unjoni u ma' pajjiżi terzi. Jenħtieġ li tali pproċessar ta' data personali jkun permess, filwaqt li jiġu rrispettati bis-sħiħ id-drittijiet fundamentali, unikament għall-finijiet previsti f'din id-Direttiva, u għall-attivitajiet meħtieġa skont din id-Direttiva, bħall-iskambju ta' informazzjoni bejn l-awtoritajiet kompetenti.

(124)

Id-drittijiet ta' aċċess għad-data mis-suġġett tad-data huma applikabbli għad-data personali pproċessata għall-fini ta' din id-Direttiva. Madankollu, l-aċċess mis-suġġett tad-data għal kwalunkwe informazzjoni relatata ma' rapport ta' tranżazzjoni suspettuża jdgħajjef serjament l-effettività tal-ġlieda kontra l-ħasil tal-flus u l-finanzjament tat-terroriżmu. Għalhekk l-eċċezzjonijiet u r-restrizzjonijiet għal dak id-dritt f'konformità mal-Artikolu 23 tar-Regolament (UE) 2016/679 u, fejn rilevanti, l-Artikolu 25 tar-Regolament (UE) 2018/1725, jistgħu jkunu ġġustifikati. Is-suġġett tad-data għandu d-dritt jitlob li awtorità superviżorja kif imsemmija fl-Artikolu 51 tar-Regolament (UE) 2016/679 jew, fejn applikabbli, il-Kontrollur Ewropew għall-Protezzjoni tad-Data, tivverifika l-legalità tal-ipproċessar, u għandu d-dritt li jfittex rimedju ġudizzjarju msemmi fl-Artikolu 79 ta' dak ir-Regolament. L-awtorità superviżorja msemmija fl-Artikolu 51 tar-Regolament (UE) 2016/679 tista' taġixxi wkoll fuq bażi ex-officio. Mingħajr preġudizzju għar-restrizzjonijiet dwar id-dritt tal-aċċess, jenħtieġ li l-awtorità superviżorja tkun tista' tinforma lis-suġġett tad-data li wettqet il-verifiki meħtieġa kollha, u dwar ir-riżultat fir-rigward tal-legalità tal-ipproċessar inkwistjoni.

(125)

Sabiex jiġi żgurat skambju kontinwu ta' informazzjoni bejn l-FIUs matul il-perjodu ta' twaqqif tal-AMLA, jenħtieġ li l-Kummissjoni tkompli tospita temporanjament l-FIU.net. Sabiex jiġi żgurat l-involviment sħiħ tal-FIUs fl-operat tas-sistema, jenħtieġ li l-Kummissjoni tagħmel skambji regolari mal-Pjattaforma tal-Unitajiet tal-Intelligence Finanzjarja tal-UE (il-Pjattaforma tal-“FIUs tal-UE”), grupp informali magħmul minn rappreżentanti mill-FIUs li ilu attiv mill-2006, li jintuża biex jiffaċilita l-kooperazzjoni bejn l-FIUs u għall-iskambju ta' opinjonijiet dwar kwistjonijiet relatati mal-kooperazzjoni.

(126)

Jenħtieġ li l-istandards tekniċi regolatorji jiżguraw armonizzazzjoni konsistenti madwar l-Unjoni kollha. Bħala l-korpi b'għarfien ferm speċjalizzat fil-qasam tal-AML/CFT, huwa xieraq li l-AMLA tiġi fdata bl-elaborazzjoni, għall-preżentazzjoni lill-Kummissjoni, ta' abbozz ta' standards tekniċi regolatorji li ma jinvolvux għażliet ta' politika.

(127)

Sabiex jiġu żgurati approċċi konsistenti fost l-FIUs u fost is-superviżuri, jenħtieġ li l-Kummissjoni tingħata s-setgħa li tadotta atti f'konformità mal-Artikolu 290 TFUE fir-rigward tad-definizzjoni ta' indikaturi sabiex tiġi kklassifikata l-livell tal-gravità tal-fallimenti fir-rappurtar ta' informazzjoni adegwata, akkurata u aġġornata fir-reġistri ċentrali. Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta' tħejjija, anke fil-livell ta' esperti, u li dawk il-konsultazzjonijiet jiġu mwettqa f'konformità mal-prinċipji stipulati fil-Ftehim Interistituzzjonali dwar it-Tfassil Aħjar tal-Liġijiet tat-13 ta' April 2016 (29). B'mod partikolari, biex tiġi żgurata parteċipazzjoni ugwali fit-tħejjija ta' atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta' atti delegati.

(128)

Jenħtieġ li l-Kummissjoni tingħata s-setgħa li tadotta standards tekniċi regolatorji żviluppati minn AMLA li jispeċifikaw ir-rilevanza u l-kriterji tal-għażla meta jiġi ddeterminat jekk rapport ta’ tranżizzjoni suspettuża jikkonċernax Stat Membru ieħor; li jistabbilixxuparametri referenzjarji u metodoloġija għall-valutazzjoni u l-klassifikazzjoni tal-profil tar-riskju inerenti u residwu tal-entitajiet marbutin b’obbligu u l-frekwenza tar-rieżamijiet tal-profil ta’ riskju; li jistabbilixxu l-kriterji biex jiġu ddeterminati ċ-ċirkostanzi tal-ħatra ta’ punt ta’ kuntatt ċentrali ta’ ċerti fornituri ta’ servizzi u l-funzjonijiet tal-punti ta’ kuntatt ċentrali; li jispeċifikaw id-dmirijiet tas-superviżuri domiċiljari u ospitanti, u l-modalitajiet ta’ kooperazzjoni bejniethom; li jispeċifikaw il-kundizzjonijiet ġenerali għall-funzjonament tal-kulleġi superviżorji għall-AML/CFT fis-settur finanzjarju, il-mudell għall-ftehim bil-miktub li jrid jiġi ffirmat mis-superviżuri finanzjarji, kwalunkwe miżura addizzjonali li għandha tiġi implimentata mill-kulleġġi meta l-gruppi jinkludu entitajiet marbutin b'obbligu fis-settur mhux finanzjarju u l-kundizzjonijiet għall-parteċipazzjoni ta' superviżuri finanzjarji f'pajjiżi terzi; li jispeċifikaw il-kundizzjonijiet ġenerali għall-funzjonament tal-kulleġġi superviżorji AML/CFT fis-settur mhux finanzjarju, il-mudell għall-ftehim bil-miktub li jrid jiġi ffirmat mis-superviżuri mhux finanzjarji, il-kundizzjonijiet għall-parteċipaazzjoni tal-ispetturi mhux finanzjarji f’pajjiżi terzi u kwalunkwe miżura addizzjonali li għandha tiġi implimentata mill-kulleġġi meta l-gruppi jinkludu istitizzjonijiet ta’ kreditu jew istituzzjonijiet finanzjarji; lijistabbilixxu indikaturi għall-klassifikazzjoni tal-livell tal-gravità ta' ksur ta' din id-Direttiva, kriterji li jridu jitqiesu meta jkun qed jiġi stabbilit il-livell tas-sanzjonijiet pekunarji jew meta jkunu qed japplikaw miżuri amministrattivi u metodoloġija għall-impożizzjoni ta' pagamenti perjodiċi ta' penali. Jenħtieġ li l-Kummissjoni tadotta dawk l-istatndards tekniċi regolatorji permezz ta’ atti delegati skont l-Artikolu 290 TFUE u f’konformità mal-Artikolu 49 tar-Regolament (UE) 2024/1620.

(129)

Sabiex jiġu żgurati kundizzjonijiet uniformi għall-implimentazzjoni ta' din id-Direttiva, jenħtieġ li l-Kummissjoni tingħata s-setgħat ta' implimentazzjoni sabiex tistipula metodoloġija għall-ġbir ta' statistika; tistabbilixxi l-format għall-preżentazzjoni tal-informazzjoni dwar is-sjieda benefiċjarja lir-reġistru ċentrali; tiddefinixxi l-ispeċifikazzjonijiet tekniċi u l-proċeduri meħtieġa għall-implimentazzjoni tal-aċċess għall-informazzjoni dwar is-sjieda benefiċjarja abbażi ta' interess leġittimu mir-reġistri ċentali; tistabbilixxi l-format għall-preżentazzjoni tal-informazzjoni għall-mekkaniżmi awtomatizzati ċentralizzati; tistabbilixxi l-ispeċifikazzjonijiet tekniċi u l-proċeduri għall-konnessjoni tal-mekkaniżmi awtomatizzati ċentralizzati tal-Istati Membri ma’ BARIS; tistabbilixxi l-ispeċifikazzjonijiet tekniċi u l-proċeduri meħtieġa biex tipprevedi l-interkonnessjoni tar-reġistri ċentrali tal-Istati Membri; u tistabbilixxi l-ispeċifikazzjonijiet tekniċi u l-proċeduri meħtieġa biex tipprevedi l-interkonnessjoni tal-Istati Membri mal-mekkaniżmi awtomatizzati ċentralizzati. Jenħtieġ li dawk is-setgħat jiġu eżerċitati f'konformità mar-Regolament (UE) Nru 182/2011 tal-Parlament Ewropew u tal-Kunsill (30).

(130)

Jenħtieġ li l-Kummissjoni tingħata s-setgħa tadotta standards tekniċi ta’ implimentazzjoni żviluppati minn AMLA li jispeċifikaw il-format li jrid jintuża għall-iskambju tal-informazzjoni fost il-FIUs tal-Istati Membri kif ukoll li jispeċifikaw il-mudell li jrid jintuża għall-konklużjoni ta’ ftehimiet ta' kooperazzjoni bejn is-superviżuri tal-Unjoni u l-kontropartijiet ta' pajjiżi terzi. Jenġtieġ li l-Kummissjoni tadotta dawk l-istandards tekniċi ta’ implimentazzjoni permezz ta’ atti ta’ implimentazzjoni skont l-Artikolu 291 TFUE u f’konformità mal-Artikolu 53 tar-Regolament (UE) 2024/1620.

(131)

Din id-Direttiva tirrispetta d-drittijiet fundamentali u tosserva l-prinċipji rikonoxxuti fil-Karta, b'mod partikolari d-dritt għar-rispett għall-ħajja privata u tal-familja, id-dritt għall-protezzjoni tad-data personali u l-libertà ta' intrapriża.

(132)

L-ugwaljanza bejn in-nisa u l-irġiel u d-diversità huma valuri fundamentali tal-Unjoni, li hija tistabbilixxi biex tippromwovi fil-firxa kollha ta' azzjonijiet tal-Unjoni. Filwaqt li sar progress f'dawk l-oqsma, huwa meħtieġ aktar biex tinkiseb rappreżentanza bbilanċjata fit-teħid tad-deċiżjonijiet, kemm fil-livell tal-Unjoni kif ukoll f'dak nazzjonali. Mingħajr preġudizzju għall-applikazzjoni primarja tal-kriterji bbażati fuq il-mertu, meta jaħtru l-kapijiet tal-awtoritajiet superviżorji nazzjonali u tal-FIU tagħhom, l-Istati Membri jenħtieġ li jfittxu li jiżguraw il-bilanċ bejn il-ġeneri, id-diversità u l-inklużjoni, u jqisu, sa fejn ikun possibbli, l-interTaqsimajiet bejniethom. Jenħtieġ li l-Istati Membri jagħmlu ħilithom biex jiżguraw rappreżentanza bbilanċjata u inklużiva anke meta jagħżlu r-rappreżentanti tagħhom fil-Bordijiet Ġenerali tal-AMLA.

(133)

Meta tfassal rapport li jivvaluta l-implimentazzjoni ta' din id-Direttiva, jenħtieġ li l-Kummissjoni tagħti l-kunsiderazzjoni dovuta għar-rispett tad-drittijiet fundamentali u l-prinċipji rikonoxxuti mill-Karta.

(134)

Is-senteza tal-Qorti tal-Ġustizzja fil-każijiet konġunti C-37/20 u C-601/20, WM and Sovim SA v Luxembourg Business Registers (31) ħassru l-emenda li kienet saret, bid-Direttiva (UE) 2018/843, għall-Artikolu 30(5) tad-Direttiva (UE) 2015/849 safejn din kienet tirrikjedi li l-Istati Membri jiżġuraw li l-informazzjoni dwar is-sjieda benefiċjarja ta’ kumpaniji u ta’ entitajiet ġuridiċi oħrajn inkorporati fit-territorju tagħhom tkun aċċessibbli fil-każijiet kollha għal kull membru tal-pubbliki inġenerali. Sabiex tiġi żgurata ċ-ċarezza legali, huwa importanti li dik id-dispożizzjoni tiġi adattata billi jiġi ċċarat li l-persuni jew l-organizzazzjonjiet li jkollhom interess leġittimu biss għandu jkollhom aċċess għal dik l-informazzjoni. L-istess kundizzjoni jenħtieġ li tapplika għall-aċċess tal-informazzjoni dwat is-sjieda benefiċċjarja ta’ trusts jew arranġamenti ġuridiċi simili. Għaldaqstant, jenħtieġ li d-Direttiva (UE) 2015/849 tiġi emendata.L-implikazzjonijiet ta’ dik is-sentenza jestendu lil hinn mill-Artikolu 30(5) tad-Direttiva (UE) 2015/849 u huma simili għad-disposizzjonijiet li jirregolaw l-aċċess għal informazzjoni dwar is-sjieda benefiċjarja tal-arranġamenti ġuridiċi. Sabiex jiġi żgurat li l-qafas tal-Unjoni jsib bilanċ tajjeb bejn il-protezzjoni tad-drittijiet fundamentali u l-ħarsien ta’ oġġettiv leġġittimu ta’ interess ġenerali bħall-protezzjoni tas-sistema finanzjarja tal-Unjoni kontra l-ħasil tal-flus u l-finanzjament tat-terroriżmu, huwa għalhekk xieraq li jiġu introdotti emendi għall-Artiklu 31(4) tad-Direttiva (UE) 2015/849. L-Istati Membri jenħtieġ li jingħataw sena mid-data tad-dħul fis-seħħ ta’ din id-Direttiva biex idaħħlu fis-seħħ il-liġijiet, ir-regolamenti u l-miżuri amministrattivi neċessarji biex jittrasponu dawk l-emendi. Minħabba l-importanza li jiġi żgurat qafas AML/CFT tal-Unjoni proporzjonat, l-Istati Membri jenħtieġ li jagħmlu kull sforz biex jittrasponu dawk l-emendi malajr kemm jistà jkun qabel dik l-iskadenza.

(135)

Minħabba l-ħtieġa li jiġi implimentat b'mod urġenti approċċ armonizzat għall-aċċess għar-reġistri ċentrali abbażi tad-dimostrazzjoni ta' interess leġittimu, jenħtieġ li d-dispożizzjonijiet rilevanti jiġu trasposti mill-Istati Membri sal-10 ta’ Lulju 2026. Madankollu, peress li l-perjodu inizjali tar-reġim il-ġdid għall-aċċess fuq il-bażi tad-dimostrazzjoni ta' interess leġittimu x'aktarx li ser jilħaq il-quċċata fit-talbiet li għandhom jiġu pproċessati mill-entitajiet responsabbli għar-reġistri ċentrali, l-iskadenzi għall-għoti tal-aċċess jenħtieġ li ma japplikawx għall-ewwel erba' xhur tal-applikazzjoni tar-reġim il-ġdid. Jenħtieġ li l-Istati Membri jistabbilixxu punti uniċi ta' aċċess għall-informazzjoni dwar il-proprjetà immobbli sal-10 tal-Lulju 2029. Il-mekkaniżmi awtomatizzati ċentralizzati li jippermettu l-identifikazzjoni tad-detenturi ta' kontijiet bankarji jew ta' kontijiet ta’ pagament, kontijiet ta' titoli, kontijiet ta' kriptoassi u kaxxi ta' depożitu sikur jenħtieġ li jkunu interkonnessi wkoll sa dik id-data.

(136)

Minħabba li l-objettivi ta' din id-Direttiva, jiġifieri t-twaqqif ta' mekkaniżmu koordinat u koerenti għall-prevenzjoni tal-ħasil tal-flus u tal-finanzjament tat-terroriżmu, ma jistgħux jinkisbu suffiċjentement mill-Istati Membri, iżda, minħabba l-iskala u l-effetti tal-azzjoni, jistgħu jinkisbu aħjar fil-livell tal-Unjoni, l-Unjoni tista' tadotta miżuri, f'konformità mal-prinċipju tas-sussidjarjetà kif stipulat fl-Artikolu 5 tat-Trattat dwar l-Unjoni Ewropea. F'konformità mal-prinċipju tal-proporzjonalità, kif stipulat f'dak l-Artikolu, din id-Direttiva ma tmurx lil hinn minn dak li huwa meħtieġ sabiex jintlaħqu dawk l-objettivi.

(137)

F'konformità mad-Dikjarazzjoni Politika Konġunta tat-28 ta' Settembru 2011 tal-Istati Membri u tal-Kummissjoni dwar id-dokumenti ta' spjegazzjoni (32), l-Istati Membri impenjaw ruħhom li, f'każijiet ġustifikati, in-notifika tal-miżuri ta' traspożizzjoni tagħhom tkun akkumpanjata minn dokument wieħed jew iktar fejn tiġi spjegata l-korrelazzjoni bejn il-komponenti ta' direttiva u l-partijiet ekwivalenti tal-istrumenti nazzjonali ta' traspożizzjoni. Fir-rigward ta' din id-Direttiva, il-leġiżlatur iqis li t-trażmissjoni ta' dawk id-dokumenti hija ġustifikata.

(138)

Il-Kontrollur Ewropew għall-Protezzjoni tad-Data ġie kkonsultat f'konformità mal-Artikolu 42(1) tar-Regolament (UE) 2018/1725 u ta opinjoni fit-22 ta’ Settembru 2021 (33).

(139)

Għalhekk jenħtieġ li d-Direttiva (UE) 2015/849 titħassar,