(1)

Il-Komunikazzjoni tal-Kummissjoni tad-19 ta’ Frar 2020“Insawru l-Futur Diġitali tal-Ewropa” tħabbar reviżjoni tar-Regolament (UE) Nru 910/2014 tal-Parlament Ewropew u tal-Kunsill (4) biex ittejjeb l-effettività tiegħu, jiġu estiżi l-benefiċċji tiegħu għas-settur privat u jiġu promossi identitajiet diġitali affidabbli għall-Ewropej kollha.

(2)

Fil-konklużjonijiet tiegħu tal-1 u t-2 ta’ Ottubru 2020, il-Kunsill Ewropew talab lill-Kummissjoni tipproponi l-iżvilupp ta’ qafas għall-UE kollha għal identifikazzjoni elettronika pubblika sigura, inkluż firem diġitali interoperabbli, biex in-nies jingħataw kontroll fuq l-identità u d-data online tagħhom kif ukoll biex servizzi diġitali pubbliċi, privati u transfruntieri jkunu jistgħu jiġu aċċessati.

(3)

Il-Programm ta’ Politika tal-2030 dwar id-Deċennju Diġitali, stabbilit bid-Deċiżjoni (UE) 2022/2481 tal-Parlament Ewropew u tal-Kunsill (5), jistipula l-objettivi u l-miri diġitali ta’ qafas tal-Unjoni li, sal-2030, huma maħsuba li jwasslu għal diffużjoni wiesgħa ta’ identità diġitali affidabbli, volontarja u kkontrollata mill-utenti rikonoxxuta fl-Unjoni kollha u li tippermetti lil kull utent jikkontrolla d-data tiegħu f’interazzjonijiet online.

(4)

Id-“Dikjarazzjoni Ewropea dwar id-Drittijiet u l-Prinċipji Diġitali għad-Deċennju Diġitali” proklamata mill-Parlament Ewropew, mill-Kunsill u mill-Kummissjoni (6) (id- “Dikjarazzjoni”), tissottolinja d-dritt ta’ kulħadd li jaċċessa teknoloġiji, prodotti u servizzi diġitali mfassla biex ikunu sikuri, siguri u protettivi għall-privatezza. Dan jinkludi l-iżgurar li l-persuni kollha li jgħixu fl-Unjoni jiġu offruti identità diġitali aċċessibbli, sigura u affidabbli li tippermetti l-aċċess għal firxa wiesgħa ta’ servizzi online u offline, protetta minn riskji għaċ-ċibersigurtà u miċ-ċiberkriminalità fosthom ksur ta’ data u s-serq jew il-manipulazzjoni tal-identità. Id-Dikjarazzjoni tgħid ukoll li kulħadd għandu d-dritt għall-protezzjoni tad-data personali tiegħu. Dak id-dritt jinkludi l-kontroll fuq kif tintuża d-data u ma’ min tiġi kondiviża.

(5)

Iċ-ċittadini tal-Unjoni u r-residenti fl-Unjoni jenħtieġ li jkollhom id-dritt għal identità diġitali li tkun taħt il-kontroll uniku tagħhom u li tippermettilhom jeżerċitaw drittijiethom fl-ambjent diġitali u jipparteċipaw fl-ekonomija diġitali. Biex jintlaħaq dak l-għan, jenħtieġ li jiġi stabbilit qafas Ewropew tal-identità diġitali li jippermetti liċ-ċittadini tal-Unjoni u lir-residenti fl-Unjoni jaċċessaw servizzi pubbliċi u privati online u offline madwar l-Unjoni.

(6)

Qafas armonizzat tal-identità diġitali jenħtieġ li jikkontribwixxi għall-ħolqien ta’ Unjoni aktar integrata f’livell diġitali billi jnaqqas l-ostakli diġitali bejn l-Istati Membri u jsaħħaħ il-pożizzjoni taċ-ċittadini tal-Unjoni u r-residenti fl-Unjoni biex igawdu l-vantaġġi tad-diġitalizzazzjoni filwaqt li jżid it-trasparenza u l-protezzjoni ta’ drittijiethom.

(7)

Approċċ aktar armonizzat għall-identifikazzjoni elettronika jenħtieġ li jnaqqas ir-riskji u l-kostijiet tal-frammentazzjoni attwali minħabba l-użu ta’ soluzzjonijiet nazzjonali diverġenti jew, f’xi Stati Membri, in-nuqqas ta’ tali soluzzjonijiet ta’ identifikazzjoni elettronika. Tali approċċ jenħtieġ li jsaħħaħ is-suq intern billi jippermetti liċ-ċittadini tal-Unjoni, lir-residenti fl-Unjoni, kif definiti mil-liġi nazzjonali, u lin-negozji jidentifikaw lilhom infushom u jipprovdu awtentikazzjoni tal-identità tagħhom online u offline b’mod sikur, affidabbli, faċli għall-utent, konvenjenti, aċċessibbli u armonizzat, madwar l-Unjoni. Jenħtieġ li l-Kartiera Ewropea tal-Identità Diġitali tagħti lill-persuni fiżiċi u ġuridiċi madwar l-Unjoni mezz armonizzat ta’ identifikazzjoni elettronika li jippermettilhom jawtentikaw u jikkondividu d-data marbuta mal-identità tagħhom. Jenħtieġ li kulħadd ikun jista’ jaċċessa b’mod sigur is-servizzi pubbliċi u privati, waqt li jiddependi fuq ekosistema mtejba għas-servizzi fiduċjarji u fuq provi vverifikati tal-identità u attestazzjonijiet elettroniċi tal-attributi, bħall-kwalifiki akkademiċi, fosthom lawrji tal-Università, jew titoli oħra edukattivi jew professjonali. Il-Qafas Ewropew tal-Identità Diġitali huwa maħsub biex jwassal għal bidla mid-dipendenza fuq soluzzjonijiet nazzjonali biss tal-identità diġitali, għall-forniment ta’ attestazzjonijiet elettroniċi tal-attributi li jkunu validi u rikonoxxuti legalment fl-Unjoni kollha. Il-fornituri ta’ attestazzjonijiet elettroniċi tal-attributi jenħtieġ li jibbenefikaw minn sett ċar u uniformi ta’ regoli, waqt li l-amministrazzjonijiet pubbliċi jenħtieġ li jkunu jistgħu jiddependu fuq dokumenti elettroniċi f’format partikolari.

(8)

Diversi Stati Membri implimentaw u jużaw mezzi ta’ identifikazzjoni elettronika aċċettati mill-fornituri tas-servizzi fl-Unjoni. Barra minn hekk, saru investimenti kemm f’soluzzjonijiet nazzjonali kif ukoll f’soluzzjonijiet transfruntiera abbażi tar-Regolament (UE) Nru 910/2014, inkluż l-interoperabbiltà tal-iskemi ta’ identifikazzjoni elettronika notifikati skont dak ir-Regolament. Sabiex jiġu żgurati l-komplementarjetà u l-adozzjoni rapida tal-Kartieri Ewropej tal-Identità Diġitali mill-utenti attwali ta’ mezzi ta’ identifikazzjoni elettronika notifikati u sabiex jiġi minimizzat l-impatt fuq il-fornituri tas-servizzi eżistenti, il-Kartieri Ewropej tal-Identità Diġitali mistennija li jibbenefikaw billi jkomplu fuq l-esperjenza meħuda b’mezzi ta’ identifikazzjoni elettronika eżistenti u mill-infrastruttura ta’ skemi ta’ identifikazzjoni elettronika notifikati implimentati fil-livell tal-Unjoni u f’dak nazzjonali.

(9)

Ir-Regolament (UE) 2016/679 tal-Parlament Ewropew u tal-Kunsill (7) u, fejn rilevanti, id-Direttiva 2002/58/KE tal-Parlament Ewropew u tal-Kunsill (8) japplikaw għall-attivitajiet kollha tal-ipproċessar ta’ data personali skont ir-Regolament (UE) Nru 910/2014. Is-soluzzjonijiet skont il-qafas tal-interoperabbiltà previsti f’dan ir-Regolament jikkonformaw ukoll ma’ dawk ir-regoli. Il-liġi tal-Unjoni dwar il-protezzjoni tad-data tipprevedi prinċipji tal-protezzjoni tad-data, bħall-minimizzazzjoni tad-data u l-prinċipju u l-obbligi tal-limitazzjoni tal-iskop, bħall-protezzjoni tad-data intenzjonata u prestabbilita.

(10)

Sabiex tiġi appoġġata l-kompetittività tan-negozji tal-Unjoni, il-fornituri ta’ servizzi kemm online kif ukoll offline jenħtieġ li jkunu jistgħu jiddependu fuq soluzzjonijiet tal-identità diġitali rikonoxxuti madwar l-Unjoni kollha, irrispettivament mill-Istat Membru li fih dawn is-soluzzjonijiet ikunu previsti, u b’hekk jibbenefikaw minn approċċ Ewropew armonizzat għall-fiduċja, is-sigurtà u l-interoperabbiltà. Kemm l-utenti kif ukoll il-fornituri tas-servizzi jenħtieġ li jkunu jistgħu jibbenefikaw mill-istess valur legali previst għall-attestazzjonijiet elettroniċi tal-attributi madwar l-Unjoni kollha. Qafas armonizzat tal-identità diġitali huwa maħsub li joħloq valur ekonomiku billi jipprovdi aċċess aktar faċli għall-oġġetti u għas-servizzi u billi jnaqqas b’mod sinifikanti l-kostijiet operazzjonali marbuta mal-proċeduri ta’ identifikazzjoni u awtentikazzjoni elettroniċi, pereżempju waqt l-onboarding ta’ klijenti ġodda, billi jnaqqas il-potenzjal taċ-ċiberkriminalità, bħas-serq tal-identità, is-serq ta’ data u l-frodi online, u b’hekk jippromwovi t-titjib fl-effiċjenza u t-trasformazzjoni diġitali sigura tal-impriżi mikro, żgħar u ta’ daqs medju (SMEs) tal-Unjoni.

(11)

Il-Kartieri Ewropej tal-Identità Diġitali jenħtieġ li jiffaċilitaw l-applikazzjoni tal-prinċipju ta’ “darba biss”, u b’hekk inaqqsu l-piż amministrattiv fuq il-mobbiltà transfruntiera taċ-ċittadini tal-Unjoni u r-residenti fl-Unjoni u tan-negozji madwar l-Unjoni, u jappoġġaw tali mobbiltà, u jrawmu l-iżvilupp ta’ servizzi tal-gvern elettroniku interoperabbli madwar l-Unjoni.

(12)

Ir-Regolament (UE) 2016/679, ir-Regolament (UE) 2018/1725 tal-Parlament Ewropew u tal-Kunsill (9) u d-Direttiva 2002/58/KE japplikaw għall-ipproċessar ta’ data personali fl-implimentazzjoni ta’ dan ir-Regolament. Għalhekk, dan ir-Regolament jenħtieġ li jistabbilixxi salvagwardji speċifiċi biex jipprevjenu lill-fornituri ta’ mezzi ta’ identifikazzjoni elettronika u dawk ta’ attestazzjoni elettronika tal-attributi milli jikkombinaw data personali miksuba meta jipprovdu servizzi oħra mad-data personali pproċessata biex jingħataw is-servizzi fil-kamp ta’ applikazzjoni ta’ dan ir-Regolament. Jenħtieġ li d-data personali relatata mal-forniment tal-Kartieri Ewropej tal-Identità Diġitali tinżamm loġikament separata minn kwalunkwe data oħra miżmuma mill-fornitur tal-Kartiera Ewropea tal-Identità Diġitali. Jenħtieġ li dan ir-Regolament ma jipprevjenix lill-fornituri tal-Kartieri Ewropej tal-Identità Diġitali milli japplikaw miżuri tekniċi addizzjonali li jikkontribwixxu għall-protezzjoni tad-data personali, bħas-separazzjoni fiżika tad-data personali relatata mal-forniment ta’ Kartieri Ewropej tal-Identità Diġitali minn kwalunkwe data oħra miżmuma mill-fornitur. Mingħajr preġudizzju għar-Regolament (UE) 2016/679, dan ir-Regolament jispeċifika ulterjorment l-applikazzjoni tal-prinċipji tal-limitazzjoni tal-iskop, il-minimizzazzjoni tad-data, u l-protezzjoni tad-data mid-disinn u b’mod awtomatiku.

(13)

Il-Kartieri Ewropej tal-Identità Diġitali jenħtieġ li jkollhom il-funzjoni ta’ dashboard komuni inkorporata fid-disinn, sabiex jiġi żgurat livell ogħla ta’ trasparenza, privatezza u kontroll min-naħa tal-utenti fuq id-data personali tagħhom. Jenħtieġ li dik il-funzjoni tipprovdi interfaċċa faċli li tintuża mill-utent b’ħarsa ġenerali lejn il-partijiet dipendenti kollha li magħhom l-utent jikkondividi d-data, inkluż l-attributi, u t-tip ta’ data kondiviża minn kull parti dipendenti. Jenħtieġ li tippermetti lill-utenti jintraċċaw it-tranżazzjonijiet kollha eżegwiti permezz tal-Kartiera Ewropea tal-Identità Diġitali b’mill-anqas id-data li ġejja: il-ħin u d-data tat-tranżazzjoni, l-identifikazzjoni tal-kontroparti, id-data personali mitluba u d-data kondiviża. Dik l-informazzjoni jenħtieġ li tinħażen anke jekk it-tranżazzjoni ma tkunx ġiet konkluża. Jenħtieġ li ma jkunx possibbli li tiġi miċħuda l-awtentiċità tal-informazzjoni li tinsab fil-kronoloġija tat-tranżazzjonijiet. Tali funzjoni jenħtieġ li tkun attiva awtomatikament. Jenħtieġ li tippermetti li l-utenti faċilment jitolbu t-tħassir minnufih minn parti dipendenti ta’ data personali skont l-Artikolu 17 tar-Regolament (UE) 2016/679 u faċilment jirrappurtaw il-parti dipendenti lill-awtorità nazzjonali kompetenti għall-protezzjoni tad-data meta tasal talba għal data personali li tkun allegatament illegali jew suspettuża, direttament permezz tal-Kartiera Ewropea tal-Identità Diġitali.

(14)

L-Istati Membri jenħtieġ li jintegraw teknoloġiji differenti li jippreservaw il-privatezza, bħal prova ta’ żero għarfien, fil-Kartiera Ewropea tal-Identità Diġitali. Dawk il-metodi kriptografiċi jenħtieġ li jippermettu lil parti dipendenti tivvalida jekk dikjarazzjoni partikolari bbażata fuq id-data ta’ identifikazzjoni tal-persuna u l-attestazzjoni tal-attributi tkunx vera, mingħajr ma tiżvela l-ebda data li fuqha tkun ibbażata dik id-dikjarazzjoni, u b’hekk tiġi ppreservata l-privatezza tal-utent.

(15)

Dan ir-Regolament jistipula l-kundizzjonijiet armonizzati għall-istabbiliment ta’ qafas għall-Kartieri Ewropej tal-Identità Diġitali li għandhom jiġu previsti mill-Istati Membri. Iċ-ċittadini tal-Unjoni u r-residenti fl-Unjoni kollha kif definiti mid-dritt nazzjonali jenħtieġ li jingħataw is-setgħa li b’mod sigur jitolbu, jagħżlu, iħalltu, jaħżnu, iħassru, jaqsmu u jippreżentaw data marbuta mal-identità tagħhom u jitolbu t-tħassir tad-data personali tagħhom b’mod konvenjenti u faċli għall-utent, taħt il-kontroll uniku tal-utent, filwaqt li jkun jista’ jsir l-iżvelar selettiv tad-data personali. Dan ir-Regolament jirrifletti l-valuri komuni Ewropej u jirrispetta d-drittijiet fundamentali, is-salvagwardji u r-responsabbiltà legali, u b’hekk jipproteġi s-soċjetajiet demokratiċi, iċ-ċittadini tal-Unjoni u r-residenti fl-Unjoni. Jenħtieġ li jiġu żviluppati teknoloġiji użati biex jintlaħqu dawk l-objettivi mmirati lejn l-ogħla livell ta’ sigurtà, privatezza, konvenjenza għall-utenti, aċċessibbiltà, użabbiltà wiesgħa u interoperabbiltà mingħajr xkiel. Jenħtieġ li l-Istati Membri jiżguraw aċċess ugwali għall-identifikazzjoni elettronika għaċ-ċittadini u għar-residenti kollha tagħhom. L-Istati Membri jenħtieġ li ma jillimitawx l-aċċess, direttament jew indirettament, għal servizzi pubbliċi jew privati għal persuni fiżiċi jew ġuridiċi li ma jkunux għażlu li jużaw il-Kartieri Ewropej tal-Identità Diġitali u jenħtieġ li jagħmlu disponibbli soluzzjonijiet alternattivi xierqa.

(16)

Jenħtieġ li l-Istati Membri jiddependu fuq il-possibbiltajiet offruti minn dan ir-Regolament biex jipprevedu, taħt ir-responsabbiltà tagħhom, il-Kartieri Ewropej tal-Identità Diġitali għall-użu mill-persuni fiżiċi u ġuridiċi residenti fit-territorju tagħhom. Sabiex joffri lill-Istati Membri l-flessibbiltà u jisfrutta l-ogħla livell teknoloġiku, jenħtieġ li dan ir-Regolament jippermetti l-provvediment ta’ Kartieri Ewropej tal-Identità Diġitali direttament minn Stat Membru, b’mandat minn Stat Membru, jew indipendentement minn Stat Membru, iżda rikonoxxut minn dak l-Istat Membru.

(17)

Għall-finijiet tar-reġistrazzjoni, il-partijiet dipendenti jenħtieġ li jipprovdu l-informazzjoni meħtieġa biex jippermettu l-identifikazzjoni u l-awtentikazzjoni elettroniċi tagħhom għall-Kartieri Ewropej tal-Identità Diġitali. Meta jiddikjaraw l-użu maħsub tagħhom tal-Kartiera Ewropea tal-Identità Diġitali, il-partijiet dipendenti jenħtieġ li jipprovdu informazzjoni dwar id-data li ser jitolbu, jekk ikun hemm, sabiex jipprovdu s-servizzi tagħhom u r-raġuni għat-talba. Ir-reġistrazzjoni tal-partijiet dipendenti tiffaċilita l-verifika mill-Istati Membri fir-rigward tal-legalità tal-attivitajiet tal-partijiet dipendenti f’konformità mad-dritt tal-Unjoni. L-obbligu ta’ reġistrazzjoni previst f’dan ir-Regolament jenħtieġ li jkun mingħajr preġudizzju għall-obbligi stabbiliti f’liġi oħra tal-Unjoni jew nazzjonali, bħall-informazzjoni li għandha tingħata lis-suġġetti tad-data skont ir-Regolament (UE) 2016/679. Il-partijiet dipendenti jenħtieġ li jikkonformaw mas-salvagwardji offruti mill-Artikoli 35 u 36 ta’ dak ir-Regolament, b’mod partikolari billi jwettqu valutazzjonijiet tal-impatt fuq il-protezzjoni tad-data u billi jikkonsultaw lill-awtoritajiet kompetenti tal-protezzjoni tad-data qabel l-ipproċessar tad-data fejn il-valutazzjonijiet tal-impatt fuq il-protezzjoni tad-data jindikaw li l-ipproċessar jirriżulta f’riskju għoli. Tali salvagwardji jenħtieġ li jappoġġaw l-ipproċessar skont il-liġi ta’ data personali minn partijiet dipendenti, b’mod partikolari fir-rigward ta’ kategoriji speċjali ta’ data, bħad-data dwar is-saħħa. Ir-reġistrazzjoni tal-partijiet dipendenti hija maħsuba biex issaħħaħ it-trasparenza u l-fiduċja fl-użu tal-Kartieri Ewropej tal-Identità Diġitali. Jenħtieġ li r-reġistrazzjoni tkun kosteffettiva u proporzjonata għar-riskji relatati sabiex tiġi żgurata l-adozzjoni mill-fornituri tas-servizz. F’dak il-kuntest, ir-reġistrazzjoni jenħtieġ li tipprevedi l-użu ta’ proċeduri awtomatizzati, inkluż id-dipendenza fuq ir-reġistri eżistenti u l-użu tagħhom mill-Istati Membri, u jenħtieġ li ma tinvolvix proċess ta’ awtorizzazzjoni minn qabel. Jenħtieġ li l-proċess ta’ reġistrazzjoni jippermetti id-diversità fil-każijiet ta’ użu li jvarjaw f’termini tal-mod ta’ tħaddim, kemm jekk online jew b’modalità offline, jew f’termini tar-rekwiżiti biex jiġi awtentikat l-apparat għall-iskopijiet tal-interfaċċa mal-Kartiera Ewropea tal-Identità Diġitali. Ir-reġistrazzjoni jenħtieġ li tapplika esklużivament għall-partijiet dipendenti li jipprovdu servizzi permezz ta’ interazzjoni diġitali.

(18)

Is-salvagwardja taċ-ċittadini tal-Unjoni u tar-residenti fl-Unjoni kontra l-użu mhux awtorizzat jew frawdolenti tal-Kartieri Ewropej tal-Identità Diġitali hija ta’ importanza kbira biex tiġi żgurata l-fiduċja fil-Kartieri Ewropej tal-Identità Diġitali u għall-adozzjoni wiesgħa tagħhom. Jenħtieġ li l-utenti jingħataw protezzjoni effettiva minn użu ħażin bħal dan. B’mod partikolari, meta l-fatti li jiffurmaw il-bażi għall-użu frawdolenti jew b’xi mod ieħor illegali ta’ Kartiera Ewropea tal-Identità Diġitali jiġu stabbiliti minn awtorità ġudizzjarja nazzjonali fil-kuntest ta’ proċedura oħra, jenħtieġ li l-korpi superviżorji li huma responsabbli għall-emittenti tal-Kartiera Ewropea tal-Identità Diġitali, man-notifika, jieħdu l-miżuri meħtieġa biex jiżguraw li r-reġistrazzjoni tal-parti dipendenti u l-inklużjoni tal-partijiet dipendenti fil-mekkaniżmu ta’ awtentikazzjoni jiġu rtirati jew sospiżi sakemm l-awtorità notifikanti tikkonferma li l-irregolaritajiet identifikati jkunu ġew rimedjati.

(19)

Il-Kartieri Ewropej tal-Identità Diġitali kollha jenħtieġ li jippermettu lill-utenti jidentifikaw u jawtentikaw lilhom infushom elettronikament online u b’modalità offline irrispettivament mill-pajjiż li jkunu fih biex jaċċessaw firxa wiesgħa ta’ servizzi pubbliċi u privati. Mingħajr preġudizzju għall-prerogattivi tal-Istati Membri fir-rigward tal-identifikazzjoni taċ-ċittadini u r-residenti tagħhom, il-Kartieri Ewropej tal-Identità Diġitali jistgħu jservu wkoll il-ħtiġijiet istituzzjonali tal-amministrazzjonijiet pubbliċi, tal-organizzazzjonijiet internazzjonali u tal-istituzzjonijiet, il-korpi, l-uffiċċji u l-aġenziji tal-Unjoni. L-awtentikazzjoni b’modalità offline tkun importanti f’ħafna setturi, inkluż fis-settur tas-saħħa fejn is-servizzi ta’ spiss jiġu pprovduti permezz ta’ interazzjoni wiċċ imb wiċċ u l-preskrizzjonijiet elettroniċi jenħtieġ li jkunu jistgħu jiddependu fuq il-kodiċijiet QR jew teknoloġiji simili biex tiġi vverifikata l-awtentiċità. Id-dipendenza fuq il-livell ta’ assigurazzjoni “għoli” fir-rigward tal-iskemi ta’ identifikazzjoni elettronika, il-Kartieri Ewropej tal-Identità Diġitali jenħtieġ li jibbenefikaw mill-potenzjal offrut minn soluzzjonijiet reżistenti għat-tbagħbis bħal elementi siguri, biex jikkonformaw mar-rekwiżiti tas-sigurtà skont dan ir-Regolament. Il-Kartieri Ewropej tal-Identità Diġitali jenħtieġ li jippermettu wkoll lill-utenti joħolqu u jużaw firem u siġilli elettroniċi kwalifikati li huma aċċettati fl-Unjoni kollha. Ladarba l-persuni fiżiċi jiġu onboarded fuq il-Kartiera Ewropea tal-Identità Diġitali, jenħtieġ li jkunu jistgħu jużawha biex jiffirmaw b’firem elettronikament kwalifikati, b’mod awtomatiku u bla ħlas, mingħajr ma jkollhom għalfejn jgħaddu minn proċeduri amministrattivi addizzjonali. Jenħtieġ li li l-utenti jkunu jistghu jiffirmaw jew jissiġillaw asserzjonijiet jew attributi awtodikjarati. Biex jinkisbu benefiċċji ta’ simplifikazzjoni u ta’ tnaqqis tal-kostijiet għall-persuni u għan-negozji fl-Unjoni kollha, inkluż billi jiġu permessi setgħat ta’ rappreżentanza u mandati elettroniċi, l-Istati Membri jenħtieġ li jipprovdu Kartieri Ewropej tal-Identità Diġitali li jiddependu fuq standards u speċifikazzjonijiet tekniċi komuni biex jiżguraw interoperabbiltà mingħajr xkiel u biex jgħollu b’mod adegwat il-livell ta’ sigurtà tal-IT, isaħħu r-robustezza kontra ċ-ċiberattakki u b’hekk inaqqsu b’mod sinifikanti r-riskji potenzjali tal-proċess ta’ diġitalizzazzjoni li għaddej għaċ-ċittadini tal-Unjoni, ir-residenti fl-Unjoni u l-impriżi. L-awtoritajiet kompetenti tal-Istati Membri biss jistgħu jagħtu livell għoli ta’ fiduċja meta jistabbilixxu l-identità ta’ persuna u għalhekk jipprovdu assigurazzjoni li l-persuna li tiddikjara jew li tafferma identità partikolari tkun fil-fatt il-persuna li qed tiddikjara li hi. Għalhekk, jeħtieġ li l-forniment tal-Kartieri Ewropej tal-Identità Diġitali jiddependi fuq l-identità legali taċ-ċittadini tal-Unjoni, tar-residenti fl-Unjoni jew tal-persuni ġuridiċi. Jenħtieġ li d-dipendenza fuq l-identità legali ma xxekkilx lill-utenti tal-Kartiera Ewropea tal-Identità Diġitali milli jaċċessaw servizzi permezz ta’ psewdonimu, fejn ma jkun hemm l-ebda rekwiżit għall-identità legali għall-awtentikazzjoni. Il-fiduċja fil-Kartieri Ewropej tal-Identità Diġitali tissaħħaħ jekk il-partijiet emittenti u dawk li jiġġestuha jkunu meħtieġa jimplimentaw miżuri tekniċi u organizzattivi xierqa biex jiżguraw l-ogħla livell ta’ sigurtà li jkun proporzjonat għar-riskji għad-drittijiet u l-libertajiet tal-persuni fiżiċi, f’konformità mar-Regolament (UE) 2016/679.

(20)

L-użu ta’ firem elettroniċi kwalifikati jenħtieġ li jkun bla ħlas għall-persuni fiżiċi kollha għal finijiet mhux professjonali. Jenħtieġ li jkun possibbli li l-Istati Membri jipprevedu miżuri biex jipprevjenu l-użu ta’ firem elettroniċi kwalifikati għal finijiet professjonali minn persuni fiżiċi mingħajr ħlas, filwaqt li jiżguraw li kwalunkwe miżura bħal din tkun proporzjonata mar-riskji identifikati u tkun ġustifikata.

(21)

Huwa ta’ benefiċċju li jiġu ffaċilitati l-adozzjoni u l-użu tal-Kartieri Ewropej tal-Identità Diġitali billi jiġu integrati mingħajr xkiel mal-ekosistema tas-servizzi diġitali pubbliċi u privati diġà implimentati fil-livell nazzjonali, lokali jew reġjonali. Sabiex jintlaħaq dak l-għan, jenħtieġ li jkun possibbli li l-Istati Membri jipprevedu miżuri legali u organizzazzjonali biex iżidu l-flessibbiltà għall-fornituri tal-Kartieri Ewropej tal-Identità Diġitali u biex jippermettu funzjonalitajiet addizzjonali tal-Kartieri Ewropej tal-Identità Diġitali minnbarra dawk previsti f’dan ir-Regolament, inkluż bl-interoperabbiltà miżjuda b’mezzi nazzjonali eżistenti ta’ identifikazzjoni elettronika. Jenħtieġ li tali funzjonalitajiet addizzjonali bl-ebda mod ma jkunu għad-detriment tal-forniment tal-funzjonijiet ewlenin tal-Kartieri Ewropej tal-Identità Diġitali kif previsti f’dan ir-Regolament jew jippromwovu soluzzjonijiet nazzjonali eżistenti minflok il-Kartieri Ewropej tal-Identità Diġitali. Peress li jmorru lil hinn minn dan ir-Regolament, tali funzjonalitajiet addizzjonali ma jibbenefikawx mid-dispożizzjonijiet dwar id-dipendenza transfruntiera fuq il-Kartieri Ewropej tal-Identità Diġitali stipulati f’dan ir-Regolament.

(22)

Il-Kartieri Ewropej tal-Identità Diġitali jenħtieġ li jinkludu funzjonalità biex jiġġeneraw psewdonimi magħżula u ġestiti mill-utenti, biex jawtentikaw meta jaċċessaw is-servizzi online.

(23)

Biex jinkiseb livell għoli ta’ sigurtà u fiduċja, dan ir-Regolament jistabbilixxi r-rekwiżiti għall-Kartieri Ewropej tal-Identità Diġitali. Il-konformità tal-Kartieri Ewropej tal-Identità Diġitali ma’ dawk ir-rekwiżiti jenħtieġ li tiġi ċċertifikata minn korpi akkreditati ta’ valutazzjoni tal-konformità maħtura mill-Istati Membri.

(24)

Sabiex jiġu evitati approċċi diverġenti u sabiex tiġi armonizzata l-implimentazzjoni tar-rekwiżiti stabbiliti b’dan ir-Regolament, jenħtieġ li l-Kummissjoni, għall-fini taċ-ċertifikazzjoni tal-Kartieri Ewropej tal-Identità Diġitali, tadotta atti ta’ implimentazzjoni biex tistabbilixxi lista ta’ standards ta’ referenza u fejn meħtieġ, biex tistabbilixxi speċifikazzjonijiet u proċeduri għall-fini tal-espressjoni dettaljata tal-ispeċifikazzjonijiet tekniċi ta’ dawk ir-rekwiżiti. Sakemm iċ-ċertifikazzjoni tal-konformità tal-Kartieri Ewropej tal-Identità Diġitali mar-rekwiżiti rilevanti taċ-ċibersigurtà ma tkunx koperta minn skemi eżistenti ta’ ċertifikazzjoni taċ-ċibersigurtà msemmija f’dan ir-Regolament, u fir-rigward tar-rekwiżiti mhux taċ-ċibersigurtà rilevanti għall-Kartieri Ewropej tal-Identità Diġitali, jenħtieġ li l-Istati Membri jistabbilixxu skemi nazzjonali taċ-ċertifikazzjoni skont ir-rekwiżiti armonizzati li jinsabu f’dan ir-Regolament u adottati f’konformità miegħu. Jenħtieġ li l-Istati Membri jittrażmettu l-abbozz ta’ skemi ta’ ċertifikazzjoni nazzjonali tagħhom lill-Grupp ta’ Kooperazzjoni dwar l-Identità Diġitali Ewropea, li jenħtieġ li jkun jista’ joħroġ opinjonijiet u rakkomandazzjonijiet.

(25)

Jenħtieġ li ċ-ċertifikazzjoni tal-konformità mar-rekwiżiti taċ-ċibersigurtà stabbiliti b’dan ir-Regolament, fejn disponibbli, tiddependi fuq l-iskemi Ewropej rilevanti taċ-ċertifikazzjoni taċ-ċibersigurtà stabbiliti f’konformità mar-Regolament (UE) 2019/881 tal-Parlament Ewropew u tal-Kunsill (10) li jistabbilixxi qafas volontarju Ewropew taċ-ċertifikazzjoni taċ-ċibersigurtà għall-prodotti, proċessi u servizzi tal-ICT.

(26)

Sabiex ir-riskji marbuta mas-sigurtà jiġu evalwati u mitigati kontinwament, jenħtieġ li l-Kartieri Ewropej tal-Identità Diġitali ċċertifikati jkunu soġġetti għal valutazzjonijiet regolari tal-vulnerabbiltà li għandhom l-għan li jaqbdu kwalunkwe vulnerabilità fil-komponenti ċertifikati tal-Kartiera Ewropea tal-Identità Diġitali li jkunu marbuta mal-prodott, proċess jew servizz.

(27)

Billi jipproteġu lill-utenti u lill-kumpaniji mir-riskji għaċ-ċibersigurtà, ir-rekwiżiti essenzjali taċ-ċibersigurtà stabbiliti f’dan ir-Regolament jikkontribwixxu wkoll għat-tisħiħ tal-protezzjoni tad-data personali u tal-privatezza tal-individwi. Is-sinerġiji kemm dwar l-istandardizzazzjoni kif ukoll iċ-ċertifikazzjoni dwar l-aspetti taċ-ċibersigurtà jenħtieġ li jitqiesu permezz tal-kooperazzjoni bejn il-Kummissjoni, l-Organizzazzjonijiet Ewropej tal-Istandardizzazzjoni, l-Aġenzija tal-Unjoni Ewropea għaċ-Ċibersigurtà (ENISA), il-Bord Ewropew għall-Protezzjoni tad-Data stabbilit bir-Regolament (UE) 2016/679 u l-awtoritajiet superviżorji nazzjonali tal-protezzjoni tad-data.

(28)

Jenħtieġ li l-onboarding taċ-ċittadini tal-Unjoni u tar-residenti fl-Unjoni għall-Kartiera Ewropea tal-Identità Diġitali jiġi ffaċilitat permezz ta’ dipendenza fuq mezzi ta’ identifikazzjoni elettronika maħruġa fil-livell ta’ assigurazzjoni “għoli”. Jenħtieġ li d-dipendenza fuq il-mezzi ta’ identifikazzjoni elettronika maħruġa fil-livell ta’ assigurazzjoni “sostanzjali” ssir biss f’każijiet fejn l-ispeċifikazzjonijiet u l-proċeduri tekniċi armonizzati li jużaw mezzi ta’ identifikazzjoni elettronika maħruġa fil-livell ta’ assigurazzjoni “sostanzjali” flimkien ma’ mezzi supplimentari oħra ta’ verifika tal-identità jippermettu li jiġu ssodisfati r-rekwiżiti stabbiliti f’dan ir-Regolament fir-rigward tal-livell ta’ assigurazzjoni “għoli”. Tali mezzi supplimentari jenħtieġ li jkunu affidabbli u faċli biex jintużaw u jkunu jistgħu jinbnew fuq il-possibbiltà li jintużaw proċeduri ta’ onboarding mill-bogħod, ċertifikati kwalifikati appoġġati minn firem elettroniċi kkwalifikati, attestazzjoni elettronika kwalifikata tal-attributi jew kombinazzjoni ta’ dawn. Sabiex jiġi żgurat li l-Kartieri Ewropej tal-Identità Diġitali jiġu aċċettati u użati biżżejjed, jenħtieġ li l-ispeċifikazzjonijiet u l-proċeduri tekniċi armonizzati għall-onboarding tal-utenti bl-użu ta’ mezzi ta’ identifikazzjoni elettronika, inkluż dawk maħruġa fil-livell ta’ assigurazzjoni “sostanzjali”, jiġu stipulati f’atti ta’ implimentazzjoni.

(29)

L-objettiv ta’ dan ir-Regolament huwa li jipprovdi lill-utent b’Kartiera Ewropea tal-Identità Diġitali kompletament mobbli, sigura u faċli għall-utent. Bħala miżura tranżizzjonali sakemm ikunu disponibbli soluzzjonijiet iċċertifikati reżistenti għat-tbagħbis, bħal elementi siguri fl-apparati tal-utenti, jenħtieġ li l-Kartieri Ewropej tal-Identità Diġitali jkunu jistgħu jiddependu fuq elementi siguri esterni ċċertifikati għall-protezzjoni tal-materjal kriptografiku u data sensittiva oħra jew fuq mezzi elettroniċi ta’ identifikazzjoni notifikati fil-livell ta’ assigurazzjoni “għoli” sabiex tintwera l-konformità mar-rekwiżiti rilevanti ta’ dan ir-Regolament fir-rigward tal-livell ta’ assigurazzjoni tal-Kartiera Ewropea tal-Identità Diġitali. Dan ir-Regolament jenħtieġ li jkun mingħajr preġudizzju għall-kundizzjonijiet nazzjonali fir-rigward tal-ħruġ u l-użu ta’ element estern sigur iċċertifikat f’każ li din il-miżura tranżizzjonali tiddependi fuqu.

(30)

Il-Kartieri Ewropej tal-Identità Diġitali jenħtieġ li jiżguraw l-ogħla livell ta’ protezzjoni u sigurtà għad-data għall-finijiet tal-identifikazzjoni u tal-awtentikazzjoni elettroniċi biex jiġi ffaċilitat l-aċċess għas-servizzi pubbliċi u privati, irrispettivament minn jekk din id-data tinħażinx lokalment jew fuq soluzzjonijiet ibbażati fuq il-cloud, filwaqt li jitqiesu kif xieraq il-livelli differenti ta’ riskju.

(31)

Il-Kartieri Ewropej tal-Identità Diġitali jenħtieġ li jkunu ddisinjati siguri u jenħtieġ li jimplimentaw elementi ta’ sigurtà avvanzati biex jipproteġu kontra s-serq tal-identità u ta’ data oħra, iċ-ċaħda tas-servizz u kwalunkwe theddida ċibernetika oħra. Tali sigurtà jenħtieġ li tinkludi kriptaġġ tal-aktar livell avvanzat u metodi ta’ ħżin li jkunu aċċessibbli biss għall-utenti u li jistgħu jiġu kriptati biss mill-utenti, u li jiddependu fuq komunikazzjoni kriptata minn tarf sa tarf ma’ Kartieri Ewropej tal-Identità Diġitali u ma’ partijiet dipendenti oħra. Barra minn hekk, il-Kartieri Ewropej tal-Identità Diġitali jenħtieġ li jirrikjedu l-konferma sigura, espliċita u attiva tal-utenti għall-operazzjonijiet imwettqa permezz tal-Kartieri Ewropej tal-Identità Diġitali.

(32)

L-użu tal-Kartieri Ewropej tal-Identità Diġitali mingħajr ħlas jenħtieġ li ma jirriżultax fl-ipproċessar ta’ data lil hinn minn data li hija meħtieġa għall-forniment ta’ servizzi tal-Kartiera Ewropea tal-Identità Diġitali. Jenħtieġ li dan ir-Regolament ma jippermettix l-ipproċessar ta’ data personali maħżuna fil-Kartiera Ewropea tal-Identità Diġitali, jew li tirriżulta mill-użu tagħha, mill-fornitur tal-Kartiera Ewropea tal-Identità Diġitali għal finijiet għajr il-forniment tas-servizzi tal-Kartiera Ewropea tal-Identità Diġitali. Biex tiġi żgurata l-privatezza, il-fornituri tal-Kartiera Ewropea tal-Identità Diġitali jenħtieġ li jiżguraw nuqqas ta’ osservabbiltà billi ma jiġbrux data u ma jkollhomx għarfien dwar it-tranżazzjonijiet tal-utenti tal-Kartiera Ewropea tal-Identità Diġitali. Tali nuqqas ta’ osservabbiltà jfisser li l-fornituri ma jkunux jistgħu jaraw id-dettalji tat-tranżazzjonijiet magħmula mill-utent. Madankollu, f’każijiet speċifiċi, abbażi tal-kunsens espliċitu minn qabel tal-utent għal kull wieħed minn dawk il-każijiet speċifiċi, u f’konformità sħiħa mar-Regolament (UE) 2016/679, il-fornituri tal-Kartieri Ewropej tal-Identità Diġitali jistgħu jingħataw aċċess għall-informazzjoni meħtieġa għall-forniment ta’ servizz partikulari marbut mal-Kartiera Ewropea tal-Identità Diġitali.

(33)

It-trasparenza tal-Kartieri Ewropej tal-Identità Diġitali u l-akkontabbiltà tal-fornituri tagħhom huma elementi ewlenin biex tinħoloq fiduċja soċjali u tiġi skattata l-aċċettazzjoni tal-qafas. Għalhekk jenħtieġ li l-funzjonament tal-Kartieri Ewropej tal-Identità Diġitali jkun trasparenti u, b’mod partikolari, jippermetti pproċessar verifikabbli tad-data personali. Sabiex jinkiseb dan, jenħtieġ li l-Istati Membri jiżvelaw il-kodiċi sors tal-komponenti tas-software tal-applikazzjoni tal-utent tal-Kartieri Ewropej tal-Identità Diġitali, inkluż dawk li huma relatati mal-ipproċessar ta’ data personali u data ta’ persuni ġuridiċi. Jenħtieġ li l-pubblikazzjoni ta’ dan il-kodiċi tas-sors taħt liċenzja ta’ sors miftuħ tippermetti lis-soċjetà, inkluż l-utenti u l-iżviluppaturi, tifhem l-operat, l-awditjar u r-rieżami tal-kodiċi tagħha. Dan iżid il-fiduċja tal-utenti fl-ekosistema u jikkontribwixxi għas-sigurtà tal-Kartieri Ewropej tal-Identità Diġitali billi jippermetti lil kulħadd jirrapporta vulnerabbiltajiet u żbalji fil-kodiċi. B’mod ġenerali, dan jenħtieġ li jipprovdi inċentiv lill-fornituri biex jipprovdu u jżommu prodott sigur ħafna. Madankollu, f’ċerti każijiet, id-divulgazzjoni tal-kodiċi tas-sors għal-libreriji użati, il-kanal ta’ komunikazzjoni jew elementi oħra li mhumiex ospitati fuq l-apparat tal-utent, jistgħu jkunu limitati mill-Istati Membri, għal raġunijiet debitament ġustifikati, speċjalment għall-fini tas-sigurtà pubblika.

(34)

L-użu tal-Kartieri Ewropej tal-Identità Diġitali kif ukoll il-waqfien tal-użu tagħhom jenħtieġ li jkunu d-dritt u l-għażla esklużivi tal-utenti. Jenħtieġ li l-Istati Membri jiżviluppaw proċeduri sempliċi u siguri għall-utenti biex jitolbu revoka immedjata tal-validità tal-Kartieri Ewropej tal-Identità Diġitali, inkluż fil-każ ta’ telf jew serq. F’każ ta’ mewt tal-utent jew ta’ waqfien tal-attività ta’ persuna ġuridika, jenħtieġ li jiġi stabbilit mekkaniżmu li jippermetti lill-awtorità responsabbli mis-suċċessjoni tal-persuna fiżika jew tal-assi tal-persuna ġuridika titlob ir-revoka immedjata tal-Kartieri Ewropej tal-Identità Diġitali.

(35)

Bil-għan li jiġi promoss it-tixrid tal-Kartieri Ewropej tal-Identità Diġitali u użu aktar mifrux tal-identitajiet diġitali, l-Istati Membri jenħtieġ li mhux biss jippromwovu l-benefiċċji tas-servizzi rilevanti, iżda jenħtieġ wkoll li, f’kooperazzjoni mas-settur privat, mar-riċerkaturi u mad-dinja akkademika, jiżviluppaw programmi ta’ taħriġ maħsuba biex isaħħu l-ħiliet diġitali taċ-ċittadini u r-residenti tagħhom, b’mod partikolari għall-gruppi vulnerabbli, bħall-persuni b’diżabbiltà u l-anzjani. Jenħtieġ ukoll li l-Istati Membri jżidu l-għarfien dwar il-benefiċċji u r-riskji tal-Kartieri Ewropej tal-Identità Diġitali permezz ta’ kampanji ta’ komunikazzjoni.

(36)

Sabiex jiġi żgurat li l-Qafas Ewropew tal-Identità Diġitali jkun miftuħ għall-innovazzjoni u għall-iżvilupp teknoloġiku, u jibqa’ validu fil-futur, l-Istati Membri huma mħeġġa, b’mod konġunt, jistabbilixxu ambjenti ta’ esperimentazzjoni għall-ittestjar ta’ soluzzjonijiet innovattivi f’ambjent ikkontrollat u sigur b’mod partikolari biex itejbu l-funzjonalità, il-protezzjoni tad-data personali, is-sigurtà u l-interoperabbiltà tas-soluzzjonijiet u jikkontribwixxu għal aġġornamenti futuri tar-referenzi tekniċi u tar-rekwiżiti legali. Dak l-ambjent jenħtieġ li jrawwem l-inklużjoni tal-SMEs, tan-negozji ġodda u tal-innovaturi u r-riċerkaturi individwali, kif ukoll tal-partijiet ikkonċernati rilevanti tal-industrija. Tali inizjattivi jenħtieġ li jsaħħu u jikkontribwixxu għall-konformità regolatorja u għar-robustezza teknika tal-Kartieri Ewropej tal-Identità Diġitali li għandhom jiġu pprovduti liċ-ċittadini tal-Unjoni u lir-residenti fl-Unjoni, u b’hekk jipprevjenu l-iżvilupp ta’ soluzzjonijiet li ma jikkonformawx mad-dritt tal-Unjoni dwar il-protezzjoni tad-data jew li jkunu miftuħa għal vulnerabbiltajiet tas-sigurtà.

(37)

Ir-Regolament (UE) 2019/1157 tal-Parlament Ewropew u tal-Kunsill (11) isaħħaħ is-sigurtà tal-karti tal-identità b’karatteristiċi tas-sigurtà mtejba sa Awwissu 2021. L-Istati Membri jenħtieġ li jqisu l-fattibbiltà li jinnotifikawhom skont l-iskemi ta’ identifikazzjoni elettronika biex jestendu d-disponibbiltà transfruntiera tal-mezzi ta’ identifikazzjoni elettronika.

(38)

Il-proċess tan-notifika tal-iskemi ta’ identifikazzjoni elettronika jenħtieġ li jiġi ssimplifikat u aċċellerat biex jiġi promoss l-aċċess għal soluzzjonijiet konvenjenti, affidabbli, siguri u innovattivi ta’ awtentikazzjoni u identifikazzjoni u, meta jkun rilevanti, biex il-fornituri tal-identità privata jiġu mħeġġa joffru skemi ta’ identifikazzjoni elettronika lill-awtoritajiet tal-Istati Membri għan-notifika bħala skemi nazzjonali tal-identifikazzjoni elettronika skont ir-Regolament (UE) Nru 910/2014.

(39)

Is-simplifikazzjoni tal-proċeduri attwali ta’ notifika u ta’ reviżjoni bejn il-pari ser tipprevjeni approċċi eteroġeni għall-valutazzjoni ta’ diversi skemi ta’ identifikazzjoni elettronika notifikati u ser tiffaċilita l-bini tal-fiduċja bejn l-Istati Membri. Il-mekkaniżmi ġodda u simplifikati huma maħsuba biex jrawmu l-kooperazzjoni tal-Istati Membri dwar is-sigurtà u l-interoperabbiltà tal-iskemi ta’ identifikazzjoni elettronika notifikati tagħhom.

(40)

Jenħtieġ li l-Istati Membri jibbenefikaw minn għodod ġodda u flessibbli biex jiżguraw il-konformità mar-rekwiżiti ta’ dan ir-Regolament u tal-atti ta’ implimentazzjoni rilevanti adottati skont dan. Jenħtieġ li dan ir-Regolament jippermetti lill-Istati Membri jużaw rapporti u valutazzjonijiet, imwettqa minn korpi akkreditati tal-valutazzjoni tal-konformità, kif previst fil-kuntest tal-iskemi ta’ ċertifikazzjoni li għandhom jiġu stabbiliti fil-livell tal-Unjoni skont ir-Regolament (UE) 2019/881, biex jappoġġaw l-affermazzjonijiet tagħhom dwar l-allinjament tal-iskemi jew ta’ partijiet minnhom mar-Regolament (UE) Nru 910/2014.

(41)

Il-fornituri tas-servizz pubbliku jużaw id-data ta’ identifikazzjoni ta’ persuna disponibbli minn mezzi ta’ identifikazzjoni elettronika skont ir-Regolament (UE) Nru 910/2014 biex iqabblu l-identità elettronika tal-utenti minn Stati Membri oħra mad-data ta’ identifikazzjoni tal-persuna pprovduta lil dawk l-utenti fl-Istat Membru li jwettaq il-proċess transfruntier ta’ korrispondenza tal-identità. Madankollu, f’ħafna każijiet, minkejja l-użu tas-sett ta’ data minimu pprovdut skont l-iskemi ta’ identifikazzjoni elettronika notifikati, l-iżgurar ta’ korrispondenza preċiża tal-identità meta l-Istati Membri jaġixxu bħala partijiet dipendenti jirrikjedi informazzjoni addizzjonali dwar l-utent u proċeduri ta’ identifikazzjoni unika komplementari speċifiċi li għandhom jitwettqu fil-livell nazzjonali. Biex ikompli jappoġġa l-użabbiltà tal-mezzi ta’ identifikazzjoni elettronika, jipprovdi servizzi pubbliċi online aħjar u jżid iċ-ċertezza legali fir-rigward tal-identità elettronika tal-utenti, jenħtieġ li r-Regolament (UE) Nru 910/2014 jirrikjedi li l-Istati Membri jieħdu miżuri speċifiċi online biex jiżguraw korrispondenza inekwivoka tal-identità meta l-utenti jkollhom l-intenzjoni li jaċċessaw servizzi pubbliċi transfruntiera online.

(42)

Meta jiġu żviluppati l-Kartieri Ewropej tal-Identità Diġitali, huwa essenzjali li jitqiesu l-ħtiġijiet tal-utenti. Jenħtieġ li jkunu disponibbli każijiet ta’ użu sinifikattiv u servizzi online li jiddependu fuq il-Kartieri Ewropej tal-Identità Diġitali. Għall-konvenjenza tal-utenti u sabiex tiġi żgurata d-disponibbiltà transfruntiera ta’ tali servizzi, huwa importanti li jittieħdu azzjonijiet sabiex jiġi ffaċilitat approċċ simili għad-disinn, l-iżvilupp u l-implimentazzjoni tas-servizzi online fl-Istati Membri kollha. Linji gwida mhux vinkolanti dwar kif jitfasslu, jiġu żviluppati u implimentati servizzi online li jiddependu fuq il-Kartieri Ewropej tal-Identità Diġitali għandhom il-potenzjal li jsiru għodda utli biex jintlaħaq dak l-għan. Dawn il-linji gwida jenħtieġ li jitħejjew b’kont meħud tal-qafas ta’ interoperabbiltà tal-Unjoni. Jenħtieġ li l-Istati Membri jaqdu rwol ewlieni fejn tidħol l-adozzjoni ta’ dawk il-linji gwida.

(43)

F’konformità mad-Direttiva (UE) 2019/882 tal-Parlament Ewropew u tal-Kunsill (12), jenħtieġ li l-persuni b’diżabbiltà jkunu jistgħu jużaw il-Kartieri Ewropej tal-Identità Diġitali, is-servizzi fiduċjarji u l-prodotti ta’ utenti finali użati fil-forniment ta’ dawk is-servizzi fuq bażi ugwali ma’ utenti oħra.

(44)

Sabiex jiġi żgurat infurzar effettiv ta’ dan ir-Regolament, jenħtieġ li jiġi stabbilit minimu għall-massimu ta’ multi amministrattivi kemm għall-fornituri kwalifikati ta’ servizzi fiduċjarji kif ukoll għal dawk mhux kwalifikati. Jenħtieġ li l-Istati Membri jipprevedu ‘ penali effettivi, proporzjonati u dissważivi. Meta jiġu ddeterminati l-penali, jenħtieġ li jitqiesu kif xieraq id-daqs tal-entitajiet affettwati, il-mudelli kummerċjali tagħhom u s-severità tal-ksur.

(45)

Jenħtieġ li l-Istati Membri jistabbilixxu regoli dwar penali għal ksur bħal prattiki diretti jew indiretti li jwasslu għal konfużjoni bejn servizzi fiduċjarji mhux kwalifikati u dawk kwalifikati jew għall-użu abbużiv tal-marka fiduċjarja tal-UE minn fornituri mhux kwalifikati ta’ servizzi fiduċjarji. Jenħtieġ li l-marka fiduċjarja tal-UE ma tintużax taħt kundizzjonijiet li, direttament jew indirettament, iwasslu għall-perċezzjoni li kwalunkwe servizz fiduċjarju mhux kwalifikat offrut minn dawk il-fornituri jkun kwalifikat.

(46)

Jenħtieġ li dan ir-Regolament ma jkoprix aspetti relatati mal-konklużjoni u l-validità tal-kuntratti jew obbligi legali oħra fejn ikun hemm rekwiżiti rigward il-forma stabbiliti mid-dritt tal-Unjoni jew mill-liġi nazzjonali. Barra minn hekk, jenħtieġ li ma jaffettwax ir-rekwiżiti nazzjonali dwar il-forma li jappartjenu għar-reġistri pubbliċi, b’mod partikolari r-reġistri kummerċjali u dawk tal-artijiet.

(47)

Il-forniment u l-użu ta’ servizzi fiduċjarji u l-benefiċċji miġjuba f’termini ta’ konvenjenza u ċertezza legali fil-kuntest ta’ tranżazzjonijiet transfruntiera, b’mod partikolari meta jintużaw servizzi fiduċjarji kwalifikati, qed isiru dejjem aktar importanti għall-kummerċ u l-kooperazzjoni internazzjonali. Is-sħab internazzjonali tal-Unjoni qed jistabbilixxu oqfsa fiduċjarji ispirati mir-Regolament (UE) Nru 910/2014. Sabiex jiġi ffaċilitat ir-rikonoxximent tas-servizzi fiduċjarji kwalifikati u tal-fornituri tagħhom, il-Kummissjoni tista’ tadotta atti ta’ implimentazzjoni biex tistabbilixxi l-kundizzjonijiet li skonthom l-oqfsa fiduċjarji ta’ pajjiżi terzi jistgħu jitqiesu ekwivalenti għall-qafas fiduċjarju għas-servizzi u l-fornituri fiduċjarji kwalifikati tagħhom f’dan ir-Regolament. Tali approċċ jenħtieġ li jikkomplementa l-possibbiltà għar-rikonoxximent reċiproku ta’ servizzi u fornituri fiduċjarji tagħhom stabbiliti fl-Unjoni u f’pajjiżi terzi f’konformità mal-Artikolu 218 tat-Trattat dwar il-Funzjonament tal-Unjoni Ewropea (TFUE). Meta jiġu stipulati l-kundizzjonijiet, li skonthom l-oqfsa fiduċjarji ta’ pajjiżi terzi jistgħu jitqiesu li huma ekwivalenti għall-qafas fiduċjarju ta’ servizzi u fornituri fiduċjarji tagħhom ikkwalifikati skont ir-Regolament (UE) Nru 910/2014, jenħtieġ li tiġi żgurata l-konformità mad-dispożizzjonijiet rilevanti fid-Direttiva (UE) 2022/2555 tal-Parlament Ewropew u tal-Kunsill (13) u r-Regolament (UE) 2016/679, kif ukoll l-użu ta’ listi ta’ fiduċja bħala elementi essenzjali biex tinbena l-fiduċja.

(48)

Dan ir-Regolament jenħtieġ li jrawwem l-għażla u l-possibbiltà li wieħed jaqleb bejn il-Kartieri Ewropej tal-Identità Diġitali meta Stat Membru jkun approva aktar minn soluzzjoni waħda tal-Kartiera Ewropea tal-Identità Diġitali fit-territorju tiegħu. Sabiex jiġu evitati effetti ta’ intrappolament tal-klijentela f’sitwazzjonijiet bħal dawn, fejn ikun teknikament fattibbli, il-fornituri tal-Kartieri Ewropej tal-Identità Diġitali jenħtieġ li jiżguraw il-portabbiltà effettiva tad-data fuq talba tal-utenti tal-Kartiera Ewropea tal-Identità Diġitali, u jenħtieġ li ma jitħallewx jużaw ostakli kuntrattwali, ekonomiċi jew tekniċi biex jipprevjenu jew jiskoraġġixxu l-qlib effettiv bejn Kartieri Ewropej tal-Identità Diġitali differenti.

(49)

Biex jiġi żgurat il-funzjonament xieraq tal-Kartieri Ewropej tal-Identità Diġitali, il-fornituri ta’ Kartieri Ewropej tal-Identità Diġitali jeħtieġu interoperabbiltà effettiva u kundizzjonijiet ġusti, raġonevoli u nondiskriminatorji għall-Kartieri Ewropej tal-Identità Diġitali biex jaċċessaw karatteristiċi speċifiċi tal-hardware u tas-software tal-apparati mobbli. Dawk il-komponenti jistgħu jinkludu, b’mod partikolari, antenni ta’ komunikazzjoni qrib il-post u elementi siguri, inklużi kards b’ċirkwit integrat universali, elementi siguri inkorporati, kards mikroSD u Bluetooth b’Enerġija Baxxa. L-aċċess għal dawk il-komponenti jista’ jkun taħt il-kontroll tal-operaturi tan-networks mobbli u l-manifatturi tat-tagħmir. Għalhekk, meta meħtieġ biex jiġu pprovduti s-servizzi tal-Kartieri Ewropej tal-Identità Diġitali, il-manifatturi tat-tagħmir oriġinali ta’ apparati mobbli jew il-fornituri ta’ servizzi ta’ komunikazzjoni elettronika jenħtieġ li ma jirrifjutawx l-aċċess għal tali komponenti. Barra minn hekk, jenħtieġ li l-impriżi maħtura bħala gwardjani għas-servizzi ewlenin tal-pjattaforma kif elenkati mill-Kummissjoni skont ir-Regolament (UE) 2022/1925 tal-Parlament Ewropew u tal-Kunsill (14) jibqgħu soġġetti għad-dispożizzjonijiet speċifiċi ta’ dak ir-Regolament, filwaqt li jibnu fuq l-Artikolu 6(7) tiegħu.

(50)

Sabiex jiġu ssimplifikati l-obbligi taċ-ċibersigurtà imposti fuq il-fornituri ta’ servizzi fiduċjarji, kif ukoll biex dawk il-fornituri u l-awtoritajiet kompetenti rispettivi tagħhom ikunu jistgħu jibbenefikaw mill-qafas legali stabbilit mid-Direttiva (UE) 2022/2555, is-servizzi fiduċjarji huma meħtieġa jieħdu miżuri tekniċi u organizzazzjonali xierqa skont dik id-Direttiva, bħal miżuri li jindirizzaw il-fallimenti tas-sistema, l-iżball uman, azzjonijiet malizzjużi jew fenomeni naturali biex jiġu ġestiti r-riskji għas-sigurtà tan-network u tas-sistemi tal-informazzjoni li dawk il-fornituri jużaw fil-forniment tas-servizzi tagħhom kif ukoll biex jiġu notifikati inċidenti sinifikanti u theddid għaċ-ċibersigurtà f’konformità ma’ dik id-Direttiva. Fir-rigward tar-rapportar ta’ inċidenti, il-fornituri ta’ servizzi fiduċjarji jenħtieġ li jinnotifikaw kwalunkwe inċident li jkollu impatt sinifikanti fuq il-forniment tas-servizzi tagħhom, inkluż dak ikkawżat minn serq jew telf ta’ apparat, ħsara fil-fili tan-network jew inċidenti li jseħħu fil-kuntest tal-identifikazzjoni tal-persuni. Ir-rekwiżiti tal-ġestjoni tar-riskju għaċ-ċibersigurtà u l-obbligi ta’ rapportar skont id-Direttiva (UE) 2022/2555 jenħtieġ li jitqiesu bħala komplementari għar-rekwiżiti imposti fuq il-fornituri ta’ servizzi fiduċjarji skont dan ir-Regolament. Meta jkun xieraq, il-prattiki jew il-gwida nazzjonali stabbiliti fir-rigward tal-implimentazzjoni tar-rekwiżiti tas-sigurtà u ta’ rapportar u tas-superviżjoni tal-konformità ma’ dawn ir-rekwiżiti skont ir-Regolament (UE) Nru 910/2014 jenħtieġ li jkomplu jiġu applikati mill-awtoritajiet kompetenti maħtura skont id-Direttiva (UE) 2022/2555. Dan ir-Regolament ma jaffettwax l-obbligu li jiġi notifikat ksur ta’ data personali skont ir-Regolament (UE) 2016/679.

(51)

Jenħtieġ li tingħata kunsiderazzjoni xierqa biex tiġi żgurata kooperazzjoni effettiva bejn il-korpi superviżorji maħtura skont l-Artikolu 46b tar-Regolament (UE) Nru 910/2014 u l-awtoritajiet kompetenti maħtura jew stabbiliti skont l-Artikolu 8(1) tad-Direttiva (UE) 2022/2555. Meta tali korp superviżorju jkun differenti minn tali awtorità kompetenti, jenħtieġ li dawn jikkooperaw mill-qrib, u b’mod f’waqtu billi jiskambjaw l-informazzjoni rilevanti sabiex jiżguraw superviżjoni u konformità effettivi tal-fornituri ta’ servizzi fiduċjarji mar-rekwiżiti stabbiliti fir-Regolament (UE) Nru 910/2014 u fid-Direttiva (UE) 2022/2555. B’mod partikolari, jenħtieġ li korpi superviżorji maħtura skont ir-Regolament (UE) Nru 910/2014 ikunu intitolati jitolbu lill-awtoritajiet kompetenti maħtura jew stabbiliti skont id-Direttiva (UE) 2022/2555 biex jipprovdu l-informazzjoni rilevanti meħtieġa biex jingħata l-istatus kwalifikat u biex iwettqu azzjonijiet superviżorji ta’ verifika tal-konformità tal-fornituri ta’ servizzi fiduċjarji mar-rekwiżiti rilevanti skont id-Direttiva (UE) 2022/2555 jew biex jitolbuhom jirrimedjaw in-nuqqas ta’ konformità.

(52)

Huwa essenzjali li jiġi previst qafas legali biex jiġi ffaċilitat ir-rikonoxximent transfruntier bejn is-sistemi legali nazzjonali eżistenti relatati mas-servizzi elettroniċi ta’ konsenja reġistrata. Dak il-qafas jista’ jiftaħ ukoll opportunitajiet ta’ swieq ġodda għal fornituri ta’ servizzi fiduċjarji tal-Unjoni biex joffru servizzi elettroniċi ġodda mal-Unjoni kollha ta’ konsenja reġistrata. Sabiex jiġi żgurat li d-data li tuża servizz elettroniku kwalifikat ta’ konsenja reġistrata tingħata lid-destinatarju korrett, is-servizzi elettroniċi kwalifikati ta’ konsenja reġistrata jenħtieġ li jiżguraw b’ċertezza sħiħa l-identifikazzjoni tad-destinatarju filwaqt li livell għoli ta’ fiduċja jkun biżżejjed fir-rigward tal-identifikazzjoni tal-emittent. Il-fornituri kwalifikati ta’ servizzi elettroniċi ta’ konsenja reġistrata jenħtieġ li jiġu mħeġġa mill-Istati Membri biex jagħmlu s-servizzi tagħhom interoperabbli ma’ servizzi elettroniċi kwalifikati ta’ konsenja reġistrata pprovduti minn fornituri kwalifikati oħra ta’ servizzi fiduċjarji sabiex jittrasferixxu faċilment id-data elettronika reġistrata bejn żewġ fornituri kwalifikati ta’ servizzi fiduċjarji jew aktar u biex jippromwovu prattiki ġusti fis-suq intern.

(53)

Fil-biċċa l-kbira tal-każijiet, iċ-ċittadini tal-Unjoni u r-residenti fl-Unjoni ma jistgħux jiskambjaw informazzjoni diġitali relatata mal-identità tagħhom, bħall-indirizz, l-età, il-kwalifiki professjonali, il-liċenzja tas-sewqan u permessi oħra u data dwar il-pagamenti tagħhom, bejn il-fruntieri, b’mod sigur u b’livell għoli ta’ protezzjoni tad-data.

(54)

Jenħtieġ li jkun possibbli li jinħarġu u li jiġu mmaniġġati attributi elettroniċi affidabbli u li jingħata kontribut għat-tnaqqis fil-piż amministrattiv, filwaqt li tingħata s-setgħa liċ-ċittadini tal-Unjoni u lir-residenti fl-Unjoni biex jużawhom fit-tranżazzjonijiet privati u pubbliċi tagħhom. Iċ-ċittadini tal-Unjoni u r-residenti fl-Unjoni jenħtieġ li jkunu jistgħu, pereżempju, juru s-sjieda ta’ liċenzja tas-sewqan valida maħruġa minn awtorità fi Stat Membru wieħed, li tista’ tiġi vverifikata u titqies affidabbli mill-awtoritajiet rilevanti fi Stati Membri oħra, u li jkunu jistgħu jiddependu fuq il-kredenzjali tas-sigurtà soċjali tagħhom jew fuq dokumenti diġitali futuri tal-ivvjaġġar f’kuntest transfruntier.

(55)

Kwalunkwe fornitur ta’ servizzi li joħroġ attributi attestati f’forma elettronika bħal diplomi, liċenzji, ċertifikati tat-twelid jew setgħat u mandati biex jirrappreżenta jew jaġixxi f’isem persuni fiżiċi jew ġuridiċi jenħtieġ li jitqies bħala fornitur ta’ servizzi fiduċjarji ta’ attestazzjoni elettronika tal-attributi. Attestazzjoni elettronika tal-attributi jenħtieġ li ma tiġix miċħuda effett legali minħabba li tkun f’forma elettronika jew li ma tissodisfax ir-rekwiżiti tal-attestazzjoni elettronika kwalifikata tal-attributi. Jenħtieġ li jiġu stabbiliti rekwiżiti ġenerali biex jiġi żgurat li attestazzjoni elettronika kwalifikata tal-attributi jkollha l-effett legali ekwivalenti ta’ attestazzjonijiet maħruġa legalment f’forma stampata. Madankollu, dawk ir-rekwiżiti jenħtieġ li japplikaw mingħajr preġudizzju għad-dritt tal-Unjoni jew għal-liġi nazzjonali li jiddefinixxu rekwiżiti addizzjonali speċifiċi għas-settur fir-rigward tal-forma b’effetti legali sottostanti u, b’mod partikolari, għar-rikonoxximent transfruntier ta’ attestazzjoni elettronika kwalifikata tal-attributi, meta jkun xieraq.

(56)

Id-disponibbiltà u l-użabbiltà wiesgħa tal-Kartieri Ewropej tal-Identità Diġitali jenħtieġ li jsaħħu l-aċċettazzjoni tagħhom u l-fiduċja fihom kemm minn individwi privati kif ukoll minn fornituri ta’ servizzi privati. Għalhekk, partijiet dipendenti privati li jipprovdu servizzi, pereżempju fl-oqsma tat-trasport, tal-enerġija, tas-servizzi bankarji u finanzjarji, tas-sigurtà soċjali, tas-saħħa, tal-ilma tax-xorb, tas-servizzi postali, tal-infrastruttura diġitali, tat-telekomunikazzjoni jew tal-edukazzjoni, jenħtieġ li jaċċettaw l-użu ta’ Kartieri Ewropej tal-Identità Diġitali għall-forniment ta’ servizzi fejn awtentikazzjoni b’saħħitha tal-utenti għal identifikazzjoni online tkun meħtieġa bid-dritt tal-Unjoni jew bil-liġi nazzjonali jew minn obbligu kuntrattwali. Kwalunkwe talba mill-parti dipendenti għal informazzjoni mill-utent ta’ Kartiera Ewropea tal-Identifikazzjoni Diġitali jenħtieġ li tkun meħtieġa u proporzjonata mal-użu maħsub f’każ partikolari, jenħtieġ li tkun konformi mal-prinċipju tal-minimizzazzjoni tad-data u jenħtieġ li tiżgura t-trasparenza fir-rigward ta’ liema data tiġi kondiviża u għal liema finijiet. Sabiex jiġu ffaċilitati l-użu u l-aċċettazzjoni tal-Kartieri Ewropej tal-Identità Diġitali, jenħtieġ li fl-implimentazzjoni tagħhom jitqiesu l-istandards u l-ispeċifikazzjonijiet aċċettati b’mod wiesa’ tal-industrija.

(57)

Meta pjattaformi online kbar ħafna skont it-tifsira tal-Artikolu 33(1) tar-Regolament (UE) 2022/2065 tal-Parlament Ewropew u tal-Kunsill (15) jirrikjedu li l-utenti jkunu awtentikati sabiex dawn jaċċessaw is-servizzi online, dawk il-pjattaformi jenħtieġ li jkunu meħtieġa jaċċettaw l-użu tal-Kartieri Ewropej tal-Identità Diġitali fuq talba volontarja tal-utent. Jenħtieġ li l-utenti ma jkunu taħt l-ebda obbligu li jużaw Kartiera Ewropea tal-Identità Diġitali biex jaċċessaw servizzi privati u jenħtieġ li ma jiġux ristretti jew imxekkla fl-aċċess tagħhom għas-servizzi minħabba li ma jużawx Kartiera Ewropea tal-Identità Diġitali. Madankollu, jekk l-utenti jixtiequ jagħmlu dan, il-pjattaformi online kbar ħafna jenħtieġ li jaċċettawhom għal dak l-għan, filwaqt li jirrispettaw il-prinċipju tal-minimizzazzjoni tad-data u d-dritt tal-utenti li jużaw psewdonimi magħżula liberament. Minħabba l-importanza tal-pjattaformi online kbar ħafna, dovuta għall-firxa tagħhom, partikolarment kif espressa fl-għadd ta’ destinatarji ta’ tranżazzjonijiet ta’ servizzi u ta’ dawk ekonomiċi, l-obbligu li jiġu aċċettati Kartieri Ewropej tal-Identità Diġitali huwa meħtieġ biex tiżdied il-protezzjoni tal-utenti mill-frodi u jiġi żgurat livell għoli ta’ protezzjoni tad-data.

(58)

Jenħtieġ li jiġu żviluppati kodiċijiet tal-kondotta fil-livell tal-Unjoni biex jikkontribwixxu għal disponibbiltà u użabbiltà wiesgħa tal-mezzi ta’ identifikazzjoni elettronika, inkluż il-Kartieri Ewropej tal-Identità Diġitali fil-kamp ta’ applikazzjoni ta’ dan ir-Regolament. Jenħtieġ li l-kodiċijiet tal-kondotta jiffaċilitaw l-aċċettazzjoni wiesgħa tal-mezzi ta’ identifikazzjoni elettronika inkluż il-Kartieri Ewropej tal-Identità Diġitali minn dawk il-fornituri tas-servizzi li ma jikkwalifikawx bħala pjattaformi kbar ħafna u li jiddependu fuq servizzi ta’ identifikazzjoni elettronika ta’ partijiet terzi għall-awtentikazzjoni tal-utenti.

(59)

L-iżvelar selettiv huwa kunċett li jagħti s-setgħa lis-sid tad-data li jiżvela biss ċerti partijiet ta’ sett akbar ta’ data, sabiex l-entità riċeventi tikseb biss informazzjoni li tkun meħtieġa għall-forniment ta’ servizz mitlub minn utent. Jenħtieġ li l-Kartiera Ewropea tal-Identità Diġitali tippermetti teknikament l-iżvelar selettiv tal-attributi lill-partijiet dipendenti Jenħtieġ li jkun teknikament possibbli għall-utent li jiżvela b’mod selettivattributi, inkluż minn attestazzjonijiet elettroniċi distinti, multipli u li jikkombinhom u jippreżentahom mingħajr xkiel lill-partijiet dipendenti. Din il-karatteristika jenħtieġ li ssir karatteristika bażika tat-tfassil tal-Kartieri Ewropej tal-Identità Diġitali, u b’hekk jissaħħu l-konvenjenza u l-protezzjoni tad-data personali inkluż il-minimizzazzjoni tad-data.

(60)

Sakemm regoli speċifiċi tad-dritt tal-Unjoni jew nazzjonali ma jirrikjedux li l-utenti jidentifikaw lilhom infushom, l-aċċess għas-servizzi bl-użu ta’ psewdonimu jenħtieġ li ma jkunx ipprojbit.

(61)

L-attributi pprovduti mill-fornituri kwalifikati ta’ servizzi fiduċjarji bħala parti mill-attestazzjoni kwalifikata tal-attributi jenħtieġ li jiġu vverifikati mas-sorsi awtentiċi jew direttament mill-fornitur kwalifikat ta’ servizzi fiduċjarji jew permezz ta’ intermedjarji maħtura rikonoxxuti fil-livell nazzjonali f’konformità mad-dritt tal-Unjoni jew nazzjonali għall-fini ta’ skambju sigur ta’ attributi attestati bejn il-fornituri tas-servizzi u l-partijiet dipendenti tal-identifikazzjoni jew tal-attestazzjoni tal-attributi. Jenħtieġ li l-Istati Membri jistabbilixxu mekkaniżmi xierqa fil-livell nazzjonali biex jiżguraw li l-fornituri kwalifikati ta’ servizzi fiduċjarji li joħorġu attestazzjoni elettronika kwalifikata tal-attributi jkunu jistgħu, abbażi tal-kunsens tal-persuna li lilha tkun inħarġet l-attestazzjoni, jivverifikaw l-awtentiċità tal-attributi abbażi ta’ sorsi awtentiċi. Jenħtieġ li jkun possibbli li mekkaniżmi xierqa jinkludu l-użu ta’ intermedjarji jew soluzzjonijiet tekniċi speċifiċi f’konformità mal-liġi nazzjonali li jippermettu aċċess għal sorsi awtentiċi. L-iżgurar tad-disponibbiltà ta’ mekkaniżmu li jippermetti l-verifika tal-attributi fuq il-bażi ta’ sorsi awtentiċi huwa maħsub biex jiffaċilita l-konformità tal-fornituri kwalifikati ta’ servizzi fiduċjarji ta’ attestazzjoni elettronika kwalifikata tal-attributi mal-obbligi tagħhom skont ir-Regolament (UE) Nru 910/2014. Anness ġdid għal dak ir-Regolament jenħtieġ li jkun fih lista ta’ kategoriji ta’ attributi li fir-rigward tagħhom l-Istati Membri għandhom jiżguraw li jittieħdu miżuri biex il-fornituri kwalifikati ta’ attestazzjonijiet elettroniċi tal-attributi jkunu jistgħu jivverifikaw b’mezzi elettroniċi, fuq talba tal-utent, l-awtentiċità tagħhom mas-sors awtentiku rilevanti.

(62)

L-identifikazzjoni elettronika sigura u l-forniment ta’ attestazzjoni tal-attributi jenħtieġ li joffru flessibbiltà u soluzzjonijiet addizzjonali għas-settur tas-servizzi finanzjarji biex jiġu ffaċilitati l-identifikazzjoni tal-klijenti u l-iskambju ta’ attributi speċifiċi meħtieġa għall-konformità, pereżempju, mar-rekwiżiti tad-diliġenza dovuta tal-klijenti skont Regolament futur li jistabbilixxi l-Awtorità Kontra l-Ħasil tal-Flus, b’rekwiżiti tal-adegwatezza li jirriżultaw mil-liġi dwar il-protezzjoni tal-investitur, jew biex jiġi appoġġat l-issodisfar ta’ rekwiżiti b’saħħithom tal-awtentikazzjoni tal-klijenti għall-identifikazzjoni online għall-finijiet tad-dħul fil-kontijiet u tal-bidu ta’ tranżazzjonijiet fil-qasam tas-servizzi ta’ pagament.

(63)

L-effett legali ta’ firma elettronika ma għandux jiġi kkontestat minħabba li hija f’forma elettronika jew minħabba li ma tissodisfax ir-rekwiżiti ta’ firma elettronika kwalifikata. Dan ir-Regolament jipprevedi li firma elettronika kwalifikata titqies bħala ekwivalenti għal firma bl-idejn. Madankollu, huwa d-dritt nazzjonali li għandu jistabbilixxi l-effett legali tal-firem elettroniċi, ħlief għar-rekwiżiti previsti f’dan ir-Regolament li skonthom l-effett legali ta’ firma elettronika kwalifikata għandha tiġi kkonsidrata bħala ekwivalenti għal dik ta’ firma miktuba bl-idejn. Fid-determinazzjoni tal-effetti legali tal-firem elettroniċi, l-Istati Membri jenħtieġ li jqisu l-prinċipju ta’ proporzjonalità bejn il-valur legali ta’ dokument li jrid jiġi ffirmat u l-livell ta’ sigurtà u l-ispiża li tirrikjedi firma elettronika. Biex jiżdiedu l-aċċessibbiltà u l-użu tal-firem elettroniċi, l-Istati Membri huma mħeġġa jikkunsidraw l-użu ta’ firem elettroniċi avvanzati fit-tranżazzjonijiet ta’ kuljum, li għalihom dawn ifornu livell ta’ sigurtà u fiduċja suffiċjenti.

(64)

Sabiex tiġi żgurata l-konsistenza tal-prattiki ta’ ċertifikazzjoni madwar l-Unjoni, jenħtieġ li l-Kummissjoni toħroġ linji gwida dwar iċ-ċertifikazzjoni u ċ-ċertifikazzjoni mill-ġdid ta’ apparat kwalifikat għall-ħolqien ta’ firem elettroniċi u ta’ apparat kwalifikat għall-ħolqien ta’ siġilli elettroniċi, inkluż il-validità u l-limitazzjonijiet tagħhom fiż-żmien. Dan ir-Regolament ma jwaqqafx lill-korpi pubbliċi jew privati li jkunu ċċertifikaw apparat kwalifikat għall-ħolqien ta’ firem elettroniċi milli jirriċertifikaw temporanjament tali apparati għal perjodu qasir ta’ ċertifikazzjoni abbażi tar-riżultati tal-proċess ta’ ċertifikazzjoni ta’ qabel, fejn tali riċertifikazzjoni ma tistax jitwettaq fil-qafas ta’ ħin stabbilit għal xi raġuni għajr inċident ta’ ksur jew sigurtà, mingħajr preġudizzju għall-obbligu li titwettaq valutazzjoni ta’ vulnerabbilita u mingħajr preġudizzju għall-prattika applikabbli ta’ ċertifikazzjoni.

(65)

Il-ħruġ ta’ ċertifikati għall-awtentikazzjoni ta’ siti elettroniċi huwa maħsub li jipprovdi lill-utenti b’assigurazzjoni b’livell għoli ta’ fiduċja fl-identità tal-entità li tinsab wara s-sit elettroniku, irrispettivament mill-pjattaforma użata biex turi dik l-identità. Dawk iċ-ċertifikati jenħtieġ li jikkontribwixxu biex tinbena l-fiduċja fit-twettiq tan-negozju online, billi l-utenti jkollhom fiduċja f’sit elettroniku li jkun ġie awtentikat. Jenħtieġ li l-użu ta’ tali ċertifikati minn siti elettroniċi jkun volontarju. Sabiex l-awtentikazzjoni ta’ siti elettroniċi ssir mezz li bih tiżdied il-fiduċja, biex tiġi pprovduta esperjenza aħjar għall-utent u biex jitrawwem it-tkabbir fis-suq intern, jenħtieġ li dan ir-Regolament jistabbilixxi qafas ta’ fiduċja li jinkludi obbligi minimi tas-sigurtà u responsabbiltà għall-fornituri ta’ ċertifikati kwalifikati għall-awtentikazzjoni ta’ siti elettroniċi u rekwiżiti għall-ħruġ ta’ dawk iċ-ċertifikati. Jenħtieġ li l-listi affidabbli nazzjonali jikkonfermaw l-istatus kwalifikat tas-servizzi ta’ awtentikazzjoni ta’ siti elettroniċi u tal-fornituri ta’ servizzi fiduċjarji tagħhom, inkluż il-konformità sħiħa tagħhom mar-rekwiżiti ta’ dan ir-Regolament fir-rigward tal-ħruġ ta’ ċertifikati kwalifikati għall-awtentikazzjoni ta’ siti elettroniċi. Ir-rikonoxximent ta’ ċertifikati kwalifikati għall-awtentikazzjoni ta’ siti elettroniċi jfisser li l-fornituri tal-browsers tal-web jenħtieġ li ma jiċħdux l-awtentiċità ta’ ċertifikati kwalifikati għall-awtentikazzjoni ta’ siti elettroniċi għall-iskop uniku ta’ attestazzjoni tar-rabta bejn l-isem tad-dominju tas-sit elettroniku u l-persuna fiżika jew ġuridika li lilha jinħareġ iċ-ċertifikat jew ta’ konferma tal-identità ta’ dik il-persuna. Il-fornituri tal-browsers tal-web jenħtieġ li juru d-data tal-identità ċċertifikata u l-attributi attestati l-oħra lill-utent finali b’mod faċli għall-utent fl-ambjent tal-browser, b’mezzi tekniċi tal-għażla tagħhom. Għal dak il-għan, jenħtieġ li l-fornituri tal-browsers tal-web jiżguraw appoġġ u interoperabbiltà maċ-ċertifikati kwalifikati għall-awtentikazzjoni ta’ siti elettroniċi maħruġa f’konformità sħiħa ma’ dan ir-Regolament. L-obbligu tar-rikonoxximent u l-interoperabbiltà ta’ u l-appoġġ għal ċertifikati kwalifikati għall-awtentikazzjoni ta’ siti elettroniċi ma jaffettwax il-libertà tal-fornituri tal-browsers tal-web li jiżguraw is-sigurtà tal-web, l-awtentikazzjoni tad-dominji u l-kriptaġġ tat-traffiku tal-web b’mod u bil-mezzi tat-teknoloġija li huma jqisu bħala l-aktar xierqa. Sabiex jikkontribwixxu għas-sigurtà online tal-utenti finali, il-fornituri tal-browsers tal-web jenħtieġ li, f’ċirkostanzi eċċezzjonali, ikunu jistgħu jieħdu miżuri ta’ prekawzjoni li jkunu kemm meħtieġa kif ukoll proporzjonati b’reazzjoni għal tħassib sostanzjat dwar ksur tas-sigurtà jew telf ta’ integrità ta’ ċertifikat identifikat jew sett ta’ ċertifikati. Meta jieħdu tali miżuri ta’ prekawzjoni, il-fornituri tal-browser tal-web jenħtieġ li jinnotifikaw, mingħajr dewmien żejjed, lill-Kummissjoni, lill-korp superviżorju nazzjonali, lill-entità li lilha jkun inħareġ iċ-ċertifikat u lill-fornitur kwalifikat ta’ servizzi fiduċjarji li jkun ħareġ dak iċ-ċertifikat jew sett ta’ ċertifikati, bi kwalunkwe tħassib fir-rigward tal-ksur tas-sigurtà jew tat-telfa tal-integrità kif ukoll il-miżuri meħuda relatati maċ-ċertifikat uniku jew sett ta’ ċertifikati. Dawk il-miżuri jenħtieġ li jkunu mingħajr preġudizzju għall-obbligu tal-fornituri tal-browsers tal-web li jirrikonoxxu ċ-ċertifikati kwalifikati ta’ awtentikazzjoni ta’ siti elettroniċi skont il-listi affidabbli nazzjonali. Sabiex ikomplu jiġu protetti ċ-ċittadini tal-Unjoni u r-residenti fl-Unjoni u jiġi promoss l-użu ta’ ċertifikati kwalifikati għall-awtentikazzjoni ta’ siti elettroniċi, jenħtieġ li l-awtoritajiet pubbliċi fl-Istati Membri jikkunsidraw li jinkorporaw ċertifikati kwalifikati għall-awtentikazzjoni ta’ siti elettroniċi fis-siti elettroniċi tagħhom. Il-miżuri previsti minn dan ir-Regolament li għandhom l-għan li jġibu aktar koerenza bejn l-approċċi u l-prattiki diverġenti tal-Istati Membri relatati mal-proċeduri superviżorji huma maħsuba biex jikkontribwixxu għal fiduċja u kunfidenza mtejba fis-sigurtà, il-kwalità u d-disponibbiltà ta’ ċertifikati kwalifikati għall-awtentikazzjoni ta’ siti elettroniċi.

(66)

Ħafna Stati Membri introduċew rekwiżiti nazzjonali għal servizzi li jipprovdu arkivjar elettroniku sigur u affidabbli biex jippermettu l-preservazzjoni fit-tul ta’ data elettronika u dokumenti elettroniċi, u servizzi fiduċjarji assoċjati. Sabiex jiġu żgurati ċ-ċertezza legali, il-fiduċja u l-armonizzazzjoni fl-Istati Membri kollha, jenħtieġ li jiġi stabbilit qafas legali għal servizzi kwalifikati ta’ arkivjar elettroniku, ispirat mill-qafas tas-servizzi fiduċjarji l-oħra stabbiliti f’dan ir-Regolament. Jenħtieġ li l-qafas legali għal servizzi ta’ arkivjar elettroniku kwalifikat joffri lill-fornituri u l-utenti ta’ servizzi fiduċjarji sett ta’ għodod effiċjenti li jinkludi rekwiżiti funzjonali għas-servizz ta’ arkivjar elettroniku, kif ukoll effetti legali ċari meta jintuża servizz kwalifikat ta’ arkivjar elettroniku. Jenħtieġ li dawk id-dispożizzjonijiet japplikaw kemm għal data elettronika u dokumenti elettroniċi maħluqa f’forma elettronika kif ukoll għal dokumenti stampati li jkunu ġew skennjati u diġitalizzati. Meta jkun meħtieġ, dawk id-dispożizzjonijiet jenħtieġ li jippermettu li d-data elettronika u d-dokumenti elettroniċi preservati jiġu ttrasferiti fuq mezzi jew f’formati differenti bl-għan li jiġu estiżi d-durabbiltà u l-leġibbiltà tagħhom lil hinn mill-perjodu ta’ validità teknoloġika, filwaqt li jiġu evitati kemm jista’ jkun it-telf u l-bidla. Meta data elettronika u dokumenti elettroniċi mqiegħda fuq is-servizz ta’ arkivjar elettroniku jkun fihom firma elettronika kwalifikata, waħda jew aktar, jew siġill elettroniku kwalifikat, wieħed jew aktar, jenħtieġ li s-servizz juża proċeduri u teknoloġiji li jkunu kapaċi jestendu l-affidabbiltà ta’ dawn għall-perjodu ta’ preservazzjoni ta’ tali data, possibbilment bl-użu ta’ servizzi fiduċjarji kwalifikati oħra stabbiliti b’dan ir-Regolament. Sabiex tinħoloq evidenza ta’ preservazzjoni fejn jintużaw firem elettroniċi, siġilli elettroniċi jew timbri tal-ħin elettroniċi, jenħtieġ li jintużaw servizzi fiduċjarji kwalifikati. Peress li s-servizzi ta’ arkivjar elettroniku mhumiex armonizzati b’dan ir-Regolament, jenħtieġ li jkun possibbli li l-Istati Membri jżommu jew jintroduċu dispożizzjonijiet nazzjonali, f’konformità mad-dritt tal-Unjoni, fir-rigward ta’ dawk is-servizzi, bħal dispożizzjonijiet speċifiċi għal servizzi integrati f’organizzazzjoni u użati biss għall-arkivji interni ta’ dik l-organizzazzjoni. Jenħtieġ li dan ir-Regolament ma jagħmilx distinzjoni bejn data elettronika u dokumenti elettroniċi maħluqa f’forma elettronika u dokumenti fiżiċi li jkunu ġew diġitalizzati.

(67)

L-attivitajiet tal-arkivji nazzjonali u l-istituzzjonijiet ta’ kustodja tal-memorja, fil-kapaċità tagħhom bħala organizzazzjonijiet iddedikati għall-preservazzjoni tal-wirt dokumentarju fl-interess pubbliku, huma normalment regolati fil-liġi nazzjonali u mhux neċessarjament jipprovdu servizzi fiduċjarji skont it-tifsira ta’ dan ir-Regolament. Sa fejn dawn l-istituzzjonijiet ma jipprovdux tali servizzi fiduċjarji, dan ir-Regolament huwa mingħajr preġudizzju għall-operat tagħhom.

(68)

Ir-reġistri elettroniċi huma sekwenza ta’ rekords tad-data elettronika li jenħtieġ li jiżguraw l-integrità tagħhom u l-preċiżjoni tal-ordni kronoloġiku tagħhom. Jenħtieġ li r-reġistri elettroniċi jistabbilixxu sekwenza kronoloġika tar-rekords tad-data. Flimkien ma’ teknoloġiji oħra, dawn jenħtieġ li jikkontribwixxu għal soluzzjonijiet għal servizzi pubbliċi aktar effiċjenti u trasformattivi bħall-votazzjoni elettronika, il-kooperazzjoni transfruntiera tal-awtoritajiet doganali, il-kooperazzjoni transfruntiera tal-istituzzjonijiet akkademiċi, u r-reġistrazzjoni tas-sjieda għall-proprjetà immobbli f’reġistri deċentralizzati tal-artijiet. Jenħtieġ li r-reġistri elettroniċi kwalifikati jistabbilixxu preżunzjoni legali għall-ordni kronoloġiku sekwenzjali uniku u preċiż tar-rekords tad-data fir-reġistru u għall-integrità ta’ tali rekords. Minħabba l-ispeċifiċitajiet tagħhom, bħall-ordni kronoloġiku sekwenzjali tar-rekords tad-data, jenħtieġ li ssir distinzjoni bejn ir-reġistri elettroniċi u servizzi fiduċjarji oħra bħal timbri tal-ħin elettroniċi u servizzi elettroniċi ta’ konsenja reġistrata. Sabiex tiġi żgurata ċ-ċertezza legali u tiġi promossa l-innovazzjoni, jenħtieġ li jiġi stabbilit qafas legali għall-Unjoni kollha li jipprovdi r-rikonoxximent transfruntier tas-servizzi fiduċjarji għar-reġistrazzjoni tad-data fir-reġistri elettroniċi. Dan jenħtieġ li jipprevjeni b’mod suffiċjenti li l-istess assi diġitali jiġu kkupjati u mibjugħa aktar minn darba lil partijiet differenti. Il-proċess tal-ħolqien u l-aġġornament ta’ reġistru elettroniku jiddependi mit-tip ta’ reġistru użat, b’mod partikolari jekk huwiex ċentralizzat jew distribwit. Jenħtieġ li dan ir-Regolament jiżgura n-newtralità teknoloġika, jiġifieri la jiffavorixxi, u lanqas jiddiskrimina kontra, kwalunkwe teknoloġija użata biex jiġi implimentat is-servizz fiduċjarju l-ġdid għar-reġistri elettroniċi. Barra minn hekk, l-indikaturi tas-sostenibbiltà fir-rigward ta’ kwalunkwe impatt negattiv fuq il-klima jew impatti negattivi oħra relatati mal-ambjent jenħtieġ li jitqiesu mill-Kummissjoni, bl-użu ta’ metodoloġiji adegwati, meta tħejji l-atti ta’ implimentazzjoni li jispeċifikaw ir-rekwiżiti għar-reġistri elettroniċi kwalifikati.

(69)

Jenħtieġ li r-rwol tal-fornituri ta’ servizzi fiduċjarji ta’ reġistri elettroniċi jkun li jaċċertaw ir-reġistrazzjoni sekwenzjali tad-data fir-reġistru. Dan ir-Regolament huwa mingħajr preġudizzju għal kwalunkwe obbligu legali tal-utenti ta’ reġistri skont id-dritt tal-Unjoni jew nazzjonali. Pereżempju, każijiet ta’ użu li jinvolvu l-ipproċessar ta’ data personali jenħtieġ li jikkonformaw mar-Regolament (UE) 2016/679 u każijiet ta’ użu li huma relatati mas-servizzi finanzjarji jenħtieġ li jikkonformaw mal-liġi rilevanti tal-Unjoni dwar is-servizzi finanzjarji.

(70)

Sabiex jiġu evitati l-frammentazzjoni tas-suq intern u l-ostakli fih, minħabba standards diverġenti u restrizzjonijiet tekniċi, u sabiex jiġi żgurat proċess ikkoordinat biex jiġi evitat li tiġi affettwata l-implimentazzjoni tal-Qafas Ewropew tal-Identità Diġitali, huwa meħtieġ proċess għal kooperazzjoni mill-qrib u strutturata bejn il-Kummissjoni, l-Istati Membri, is-soċjetà ċivili, id-dinja akkademika u s-settur privat. Biex jintlaħaq dak l-objettiv, jenħtieġ li l-Istati Membri u l-Kummissjoni jikkooperaw fil-qafas stabbilit fir-Rakkomandazzjoni tal-Kummissjoni (UE) 2021/946 (16) biex jidentifikaw sett ta’ għodod komuni tal-Unjoni għall-Qafas Ewropew għall-Identità Diġitali. F’dak il-kuntest, jenħtieġ li l-Istati Membri jaqblu dwar arkitettura teknika komprensiva u qafas ta’ referenza, sett ta’ standards komuni u referenzi tekniċi, inkluż standards eżistenti rikonoxxuti u sett ta’ linji gwida u deskrizzjonijiet tal-aħjar prattiki li jkopru mill-inqas il-funzjonalitajiet u l-interoperabbiltà tal-Kartieri Ewropej tal-Identità Diġitali, inkluż il-firem elettroniċi, u tal-fornituri kwalifikati ta’ servizzi fiduċjarji għall-attestazzjoni elettronika tal-attributi kif stabbilit f’dan ir-Regolament. F’dak il-kuntest, jenħtieġ li l-Istati Membri jaqblu wkoll dwar elementi komuni fir-rigward ta’ mudell ta’ negozju u struttura ta’ tariffi għall-Kartieri Ewropej tal-Identità Diġitali, sabiex tiġi ffaċilitata l-adozzjoni, b’mod partikolari mill-SMEs, f’kuntest transfruntier. Il-kontenut tas-sett ta’ għodod jenħtieġ li jevolvi b’mod parallel mal-eżitu tad-diskussjoni u tal-proċess tal-adozzjoni tal-qafas Ewropew tal-Identità Diġitali u jirriflettihom.

(71)

Dan ir-Regolament jipprovdi livell armonizzat ta’ kwalità, affidabbiltà u sigurtà tas-servizzi fiduċjarji kwalifikati, irrispettivament minn fejn jitwettqu l-operazzjonijiet. Għalhekk jenħtieġ li fornitur kwalifikat ta’ servizzi fiduċjarji jitħalla jesternalizza l-operazzjonijiet tiegħu relatati mal-forniment ta’ servizz fiduċjarju kwalifikat f’pajjiż terz, jekk dak il-pajjiż terz jipprovdi l-garanziji adegwati, filwaqt li jiżgura li l-attivitajiet superviżorji u l-awditi jistgħu jiġu infurzati daqslikieku twettqu fl-Unjoni. Meta l-konformità ma’ dan ir-Regolament ma tkunx tista’ tiġi żgurata kompletament, jenħtieġ li l-korpi superviżorji jkunu jistgħu jadottaw miżuri proporzjonati u ġustifikati inkluż l-irtirar tal-istatus kwalifikat tas-servizz fiduċjarju provdut.

(72)

Sabiex tiġi żgurata ċ-ċertezza legali fir-rigward tal-validità tal-firem elettroniċi avvanzati bbażati fuq ċertifikati kwalifikati, huwa essenzjali li tiġi speċifikata l-valutazzjoni mill-parti dipendenti li twettaq il-validazzjoni ta’ dik il-firma elettronika avvanzata bbażata fuq ċertifikati kwalifikati.

(73)

Jenħtieġ li l-fornituri ta’ servizzi fiduċjarji jużaw metodi kriptografiċi li jirriflettu l-aħjar prattiki attwali u implimentazzjonijiet affidabbli ta’ dawk l-algoritmi sabiex jiżguraw is-sigurtà u l-affidabbiltà tas-servizzi fiduċjarji tagħhom.

(74)

Dan ir-Regolament jistabbilixxi obbligu għall-fornituri kwalifikati ta’ servizzi fiduċjarji li jivverifikaw l-identità ta’ persuna fiżika jew ġuridika li lilha jinħareġ iċ-ċertifikat kwalifikat jew l-attestazzjoni elettronika kwalifikata tal-attribut abbażi ta’ diversi metodi armonizzati madwar l-Unjoni. Sabiex jiġi żgurat li ċ-ċertifikati kwalifikati u l-attestazzjonijiet elettroniċi kwalifikati tal-attributi jinħarġu lill-persuna li jappartjenu għaliha u li jattestaw is-sett korrett u uniku ta’ data li jirrappreżenta l-identità ta’ dik il-persuna, jenħtieġ li l-fornituri kwalifikati ta’ servizzi fiduċjarji li joħorġu ċertifikati kwalifikati jew li joħorġu attestazzjonijiet elettroniċi kwalifikati tal-attributi, fil-mument tal-ħruġ ta’ dawk iċ-ċertifikati u l-attestazzjonijiet, jiżguraw b’ċertezza sħiħa l-identifikazzjoni ta’ dik il-persuna. Barra minn hekk, minbarra l-verifika obbligatorja tal-identità tal-persuna, jekk applikabbli għall-ħruġ ta’ ċertifikati kwalifikati u meta joħorġu attestazzjoni elettronika kwalifikata tal-attributi, il-fornituri kwalifikati ta’ servizzi fiduċjarji jenħtieġ li jiżguraw b’ċertezza sħiħa l-korrettezza u l-preċiżjoni tal-attributi attestati tal-persuna li lilha jinħareġ iċ-ċertifikat kwalifikat jew l-attestazzjoni elettronika kwalifikata tal-attributi. Dawk l-obbligi ta’ riżultat u ċertezza sħiħa fil-verifika tad-data attestata jenħtieġ li jiġu appoġġati b’mezzi xierqa, inkluż bl-użu ta’ metodu speċifiku wieħed jew, fejn meħtieġ, taħlita ta’ metodi speċifiċi previsti f’dan ir-Regolament. Jenħtieġ li jkun possibbli li dawk il-metodi jiġu kkombinati biex tiġi pprovduta bażi xierqa għall-verifika tal-identità tal-persuna li lilha jinħareġ iċ-ċertifikat kwalifikat jew attestazzjoni elettronika kwalifikata tal-attributi. Jenħtieġ li jkun possibbli li tali kombinazzjoni tinkludi dipendenza fuq mezzi ta’ identifikazzjoni elettronika li jissodisfaw ir-rekwiżiti ta’ livell ta’ assigurazzjoni sostanzjali flimkien ma’ mezzi oħra ta’ verifika tal-identità li jippermettu li jiġu ssodisfati r-rekwiżiti armonizzati stabbiliti f’dan ir-Regolament fir-rigward ta’ livell ta’ assigurazzjoni għoli bħala parti minn proċeduri mill-bogħod armonizzati addizzjonali li jiżguraw l-identifikazzjoni b’livell għoli ta’ fiduċja. Jenħtieġ li dawk il-metodi jinkludu l-possibbiltà li l-fornitur kwalifikat ta’ servizzi fiduċjarji li joħroġ attestazzjoni elettronika kwalifikata tal-attributi jivverifika l-attributi li għandhom jiġu attestati b’mezzi elettroniċi fuq talba tal-utent, f’konformità mad-dritt tal-Unjoni jew il-liġi nazzjonali, inkluż fuq il-bażi ta’ sorsi awtentiċi.

(75)

Sabiex dan ir-Regolament jinżamm konformi mal-iżviluppi globali u biex jiġu segwiti l-aħjar prattiki dwar is-suq intern, l-atti delegati u ta’ implimentazzjoni adottati mill-Kummissjoni jenħtieġ li jiġu riveduti u jekk meħtieġ aġġornati fuq bażi regolari. Jenħtieġ li l-valutazzjoni tal-ħtieġa ta’ dawk l-aġġornamenti tqis it-teknoloġiji, il-prattiki, l-istandards jew l-ispeċifikazzjonijiet tekniċi l-ġodda.

(76)

Billi l-objettivi ta’ dan ir-Regolament, jiġifieri l-iżvilupp tal-Qafas Ewropew għall-Identità Diġitali u ta’ -qafas tas-servizzi fiduċjarji fl-Unjoni kollha, ma jistgħux jinkisbu b’mod suffiċjenti mill-Istati Membri iżda jistgħu pjuttost, minħabba l-iskala u l-effetti tagħhom, jinkisbu aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju ta’ proporzjonalità kif stabbilit f’dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkisbu dawk l-objettivi.

(77)

Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42(1) tar-Regolament (UE) 2018/1725.

(78)

Għalhekk, ir-Regolament (UE) Nru 910/2014 jenħtieġ li jiġi emendat skont dan,

(1)

L-Artikolu 1 huwa sostitwit b’dan li ġej:

(2)

L-Artikolu 2 huwa emendat kif ġej:

(3)

L-Artikolu 3 huwa emendat kif ġej:

(4)

L-Artikolu 5 huwa sostitwit b’dan li ġej:

(5)

fil-Kapitolu II, tiddaħħal it-taqsima li ġejja:

(*2)  Id-Direttiva (UE) 2019/882 tal-Parlament Ewropew u tal-Kunsill tas-17 ta’ April 2019 dwar ir-rekwiżiti ta’ aċċessibbiltà għall-prodotti u għas-servizzi (ĠU L 151, 7.6.2019, p. 70)."

(*3)  Ir-Regolament (UE) 2019/881 tal-Parlament Ewropew u tal-Kunsill tas-17 ta’ April 2019 dwar l-ENISA (l-Aġenzija tal-Unjoni Ewropea għaċ-Ċibersigurtà) u dwar iċ-ċertifikazzjoni taċ-ċibersigurtà tat-teknoloġija tal-informazzjoni u tal-komunikazzjoni u li jħassar ir-Regolament (UE) Nru 526/2013 (l-Att dwar iċ-Ċibersigurtà) (ĠU L 151, 7.6.2019, p. 15)."

(*4)  Ir-Rakkomandazzjoni tal-Kummissjoni 2003/361/KE tas-6 ta’ Mejju 2003 dwar id-definizzjoni tal-intrapriżi mikro, żgħar u ta’ daqs medju (ĠU L 124, 20.5.2003, p. 36)."

(*5)  Regolament (UE) 2022/2065 tal-Parlament Ewropew u tal-Kunsill tad-19 ta’ Ottubru 2022 dwar Suq Uniku għas-Servizzi Diġitali u li jemenda d-Direttiva 2000/31/KE (l-Att dwar is-Servizzi Diġitali) (ĠU L 277, 27.10.2022, p. 1).”;"

(6)

Tiddaħħal l-intestatura li ġejja qabel l-Artikolu 6:

(7)

fl-Artikolu 7, il-punt (g) għandu jiġi sostitwit b’dan li ġej:

(8)

fl-Artikolu 8(3), l-ewwel paragrafu huwa sostitwit b’dan li ġej:

(9)

fl-Artikolu 9, il-paragrafi 2 u 3 huma sostitwiti b’dan li ġej:

(10)

fl-Artikolu 10, it-titolu huwa sostitwit b’dan li ġej:

“Ksur tas-sigurtà tal-iskemi ta’ identifikazzjoni elettronika”;

(11)

jiddaħħal l-artikolu li ġej:

12)

L-Artikolu 12 huwa emendat kif ġej:

(13)

l-artikoli li ġejjin jiddaħħlu fil-Kapitolu II:

(*6)  Regolament (UE) 2022/1925 tal-Parlament Ewropew u tal-Kunsill tal-14 ta’ Settembru 2022dwar swieq kontestabbli u ġusti fis-settur diġitali u li jemenda d-Direttivi (UE) 2019/1937 u (UE) 2020/1828 (l-Att dwar is-Swieq Diġitali) (ĠU L 265, 12.10.2022, p. 1).”;"

(14)

fl-Artikolu 13, il-paragrafu 1 huwa sostitwit b’dan li ġej:

(15)

L-Artikolu 14, 15 u 16 huwa sostitwit b’dan li ġej:

(*7)  Id-Direttiva (UE) 2022/2555 tal-Parlament Ewropew u tal-Kunsill tal-14 ta’ Diċembru 2022dwar miżuri għal livell għoli komuni ta’ ċibersigurtà madwar l-Unjoni kollha, li temenda r-Regolament (UE) Nru 910/2014 u d-Direttiva (UE) 2018/1972, u li tħassar id-Direttiva (UE) 2016/1148 (Direttiva NIS 2) (ĠU L 333, 27.12.2022, p. 80).”;"

(16)

fil-Kapitolu III, fit-Taqsima 2, it-titolu huwa sostitwit minn dan li ġej:

“Servizzi fiduċjarji mhux kwalifikati”

(17)

L-Artikoli 17 u 18 jitħassru;

(18)

L-artikolu li ġej jiddaħħal fil-Kapitolu III, Taqsima 2:

(19)

L-Artikolu 20 huwa emendat kif ġej:

(20)

L-Artikolu 21 huwa emendat kif ġej:

(21)

L-Artikolu 24 huwa emendat kif ġej:

(22)

l-Artikolu li ġej jiddaħħal fil-Kapitolu III, it-Taqsima 3:

(23)

fl-Artikolu 25, il-paragrafu 3 huwa mħassar;

(24)

l-Artikolu 26 huwa emendat kif ġej:

(25)

fl-Artikolu 27, il-paragrafu 4 huwa mħassar;

(26)

fl-Artikolu 28, il-paragrafu 6 huwa sostitwit b’dan li ġej:

(27)

fl-Artikolu 29, jiddaħħal il-paragrafu li ġej:

(28)

jiddaħħal l-Artikolu li ġej:

(29)

fl-Artikolu 30, jiddaħħal il-paragrafu li ġej:

(30)

fl-Artikolu 31, il-paragrafu 3 huwa sostitwit b’dan li ġej:

(31)

L-Artikolu 32 huwa emendat kif ġej:

(32)

jiddaħħal l-artikolu li ġej:

(33)

fl-Artikolu 33, il-paragrafu 2 huwa sostitwit bit-test li ġej:

(34)

l-Artikolu 34 huwa emendat kif ġej:

(35)

fl-Artikolu 35, il-paragrafu 3 huwa mħassar;

(36)

l-Artikolu 36 huwa emendat kif ġej:

(37)

fl-Artikolu 37, il-paragrafu 4 huwa mħassar;

(38)

fl-Artikolu 38, il-paragrafu 6 huwa sostitwit b’dan li ġej:

(39)

jiddaħħal l-artikolu li ġej:

(40)

l-Artikolu li ġej jiddaħħal fil-Kapitolu III, it-Taqsima 5:

(41)

fl-Artikolu 41, il-paragrafu 3 huwa mħassar;

(42)

L-Artikolu 42 huwa emendat kif ġej:

(43)

L-Artikolu 44 huwa emendat kif ġej:

(44)

L-Artikolu 45 huwa sostitwit b’dan li ġej:

(45)

jiddaħħal l-artikolu li ġej:

(46)

it-taqsimiet li ġejjin jiżdiedu fil-Kapitolu III:

(47)

jiddaħħal il-kapitolu li ġej:

(48)

L-Artikolu 47 huwa emendat kif ġej:

(49)

l-artikolu li ġej jiddaħħal fil-Kapitolu VI:

(50)

L-Artikolu 49 huwa sostitwit b’dan li ġej:

(51)

L-Artikolu 51 huwa sostitwit b’dan li ġej:

(52)

L-Annessi I sa IV huma emendati, rispettivament, f’konformità mal-Annessi I sa IV ta’ dan ir-Regolament;

(53)

jiżdiedu l-Annessi V, VI u VII ġodda kif jinsabu fl-Annessi V, VI u VII ta’ dan ir-Regolament.