(1)

Filwaqt li l-użu tat-teknoloġiji tal-informazzjoni u tal-komunikazzjoni u d-dipendenza fuqhom saru aspetti fundamentali ta’ kull settur tal-attività ekonomika u tas-soċjetà fid-dawl tal-interkonnessjonijiet u l-interdipendenza dejjem jikbru tal-amministrazzjonijiet pubbliċi, il-kumpaniji u ċ-ċittadini tal-Istati Membri tul is-setturi u bejn il-fruntieri, filwaqt li fl-istess ħin introduċew vulnerabbiltajiet possibbli.

(2)

Id-daqs, il-frekwenza u l-impatt tal-inċidenti taċ-ċibersigurtà, inkluż l-attakki fil-katina tal-provvista għall-finijiet ta’ ċiberspjunaġġ, ransomware jew tfixkil, qed jiżdiedu madwar l-Unjoni u fil-livell globali. Huma jirrappreżentaw theddida kbira għall-funzjonament tas-sistemi tan-networks u tal-informazzjoni. Fid-dawl tax-xenarju tat-theddid li tant qed jevolvi malajr, it-theddida ta’ inċidenti possibli taċ-ċibersigurtà fuq skala kbira li jikkawżaw tfixkil sinifikanti jew ħsara lill-infrastrutturi kritiċi teżiġi tħejjija akbar tal-qafas taċ-ċibersigurtà tal-Unjoni. Dik it-theddida tmur lil hinn mill-gwerra ta’ aggressjoni tar-Russja kontra l-Ukrajna, u aktarx tissokta minħabba l-għadd kbir ta’ atturi allinjati mal-istat involuti fit-tensjonijiet ġeopolitiċi attwali. Tali inċidenti jistgħu jxekklu l-forniment tas-servizzi pubbliċi peress li l-attakki ċibernetiċi spiss huma mmirati lejn servizzi u infrastrutturi pubbliċi lokali, reġjonali jew nazzjonali, fejn l-awtoritajiet lokali jkunu partikolarment vulnerabbli, inkluż minħabba r-riżorsi limitati tagħhom. Huma jistgħu jxekklu wkoll it-twettiq tal-attivitajiet ekonomiċi, inkluż f’setturi ta’ kritiċità għolja jew setturi kritiċi oħra, jiġġeneraw telf finanzjarju sostanzjali, jimminaw il-fiduċja tal-utenti, jikkawżaw ħsara kbira lill-ekonomija u lis-sistemi demokratiċi tal-Unjoni, u jistgħu jħallu wkoll konsegwenzi fuq is-saħħa jew li jipperikolaw il-ħajjiet. Barra minn hekk, l-inċidenti taċ-ċibersigurtà huma imprevedibbli peress li spiss ifeġġu u jevolvu malajr, ma jkunux biss f’xi żona ġeografika speċifika, u jseħħu f’daqqa jew jinfirxu mill-ewwel f’ħafna pajjiżi. Huwa importanti li jkun hemm kooperazzjoni mill-qrib bejn is-settur pubbliku, is-settur privat, l-akkademja, is-soċjetà ċivili u l-media.

(3)

Jeħtieġ tissaħħaħ il-pożizzjoni kompetittiva tas-setturi tal-industrija u tas-servizzi fl-Unjoni fl-ekonomija diġitali kollha u li tiġi appoġġata t-trasformazzjoni diġitali tagħhom, billi jissaħħaħ il-livell taċ-ċibersigurtà fis-Suq Uniku Diġitali kif rakkomandat fi tliet proposti differenti tal-Konferenza dwar il-Futur tal-Ewropa. Jeħtieġ li tiżdied ir-reżiljenza taċ-ċittadini, tan-negozji, fosthom il-mikroimpriżi, l-impriżi żgħar u ta’ daqs medju u n-negozji l-ġodda, u tal-entitajiet li joperaw infrastrutturi kritiċi kontra t-theddid ċibernetiku dejjem akbar, li jista’ jkollu impatti soċjetali u ekonomiċi devastanti. Għalhekk, jeħtieġ isir investiment fl-infrastrutturi u fis-servizzi u fil-bini tal-kapaċitajiet biex jiġu żviluppati ħiliet fil-qasam taċ-ċibersigurtà li se jappoġġaw l-identifikazzjoni u r-rispons aktar malajr għat-theddid u l-inċidenti ċibernetiċi. Barra minn hekk, l-Istati Membri jeħtieġu l-assistenza biex iħejju ruħhom u jirrispondu aħjar għall-inċidenti taċ-ċibersigurtà sinifikanti u inċidenti taċ-ċibersigurtà fuq skala kbira, kif ukoll assistenza fl-ikrupru inizjali minn dawk l-inċidenti. Filwaqt li tibni fuq l-istrutturi eżistenti u f’kooperazzjoni mill-qrib magħhom, l-Unjoni jenħtieġ li żżid ukoll il-kapaċitajiet tagħha f’dawk l-oqsma, b’mod partikolari fir-rigward tal-ġbir u l-analiżi tad-data dwar it-theddid u l-inċidenti ċibernetiċi.

(4)

L-Unjoni diġà ħadet għadd ta’ miżuri biex tnaqqas il-vulnerabbiltajiet u żżid ir-reżiljenza tal-infrastrutturi u l-entitajiet kritiċi kontra r-riskji ċibernetiċi, b’mod partikolari r-Regolament (UE) 2019/881 tal-Parlament Ewropew u tal-Kunsill (5), id-Direttivi 2013/40/UE (6) u (UE) 2022/2555 (7) tal-Parlament Ewropew u tal-Kunsill, ir-Rakkomandazzjoni tal-Kummissjoni (UE) 2017/1584 (8),. Barra minn hekk, ir-Rakkomandazzjoni tal-Kunsill tat-8 ta’ Diċembru 2022 dwar approċċ ikkoordinat għall-Unjoni kollha li jsaħħaħ ir-reżiljenza tal-infrastruttura kritika tistieden lill-Istati Membri jieħdu miżuri, u jikkooperaw lma’ xulxin, mal-Kummissjoni, ma’ awtoritajiet pubbliċi rilevanti oħra kif ukoll mal-entitajiet ikkonċernati, biex isaħħu r-reżiljenza tal-infrastruttura kritika użata biex ifornu servizzi essenzjali fis-suq intern.

(5)

Ir-riskji dejjem akbar taċ-ċibersigurtà u x-xenarju ġenerali kumpless tat-theddid, b’riskju ċar ta’ tixrid malajr tal-inċidenti ċibernetiċi minn Stat Membru għall-ieħor u minn pajjiż terz għall-Unjoni, jirrikjedu t-tisħiħ tas-solidarjetà fil-livell tal-Unjoni għal identifikazzjoni, tħejjija u rispons aħjar għat-theddid u l-inċidenti ċibernetiċi, u għall-irkupru aħjar minnhom, b’mod partikolari billi jissaħħu l-kapaċitajiet ta’ strutturi eżistenti. Barra minn hekk, il-konklużjonijiet tal-Kunsill tat-23 ta’ Mejju 2022 dwar l-iżvilupp tal-pożizzjoni ċibernetika tal-Unjoni Ewropea stiednu lill-Kummissjoni biex tippreżenta proposta dwar Fond ta’ Rispons ta’ Emerġenza għaċ-Ċibersigurtà ġdid.

(6)

Il-Komunikazzjoni Konġunta tal-Kummissjoni u r-Rappreżentant Għoli tal-Unjoni għall-Affarijiet Barranin u l-Politika tas-Sigurtà tal-10 ta’ Novembru 2022 lill-Parlament Ewropew u lill-Kunsill dwar il-Politika tal-UE dwar iċ-Ċiberdifiża ħabbret Inizjattiva tal-UE għaċ-Ċibersolidarjetà bl-objettivi li jissaħħu l-kapaċitajiet komuni tal-UE tal-identifikazzjoni, l-għarfien sitwazzjonali u r-rispons billi jiġi promoss l-użu ta’ infrastruttura tal-UE taċ-Ċentri tal-Operazzjonijiet tas-Sigurtà (SOCs), jiġi appoġġat it-tiswir gradwali ta’ riżerva ċibernetika fil-livell tal-UE b’servizzi mingħand fornituri privati fdati, u jsir ittestjar tal-entitajiet kritiċi għal vulnerabbiltajiet potenzjali abbażi ta’ valutazzjonijiet tar-riskju tal-UE.

(7)

Jeħtieġ jissaħħu l-identifikazzjoni u l-għarfien sitwazzjonali tat-theddid u l-inċidenti ċibernetiċi madwar l-Unjoni u jeħtieġ tissaħħaħ is-solidarjetà billi jiżdiedu t-tħejjija u l-kapaċitajiet tal-Istati Membri u tal-Unjoni li jipprevjenu u jirrispondu għall-inċidenti taċ-ċibersigurtà sinifikanti, inċidenti taċ-ċibersigurtà fuq skala kbira u inċidenti taċ-ċibersigurtà fuq skala ekwivalenti għal skala kbira. Għalhekk, jenħtieġ li jiġi stabbilit network pan-Ewropew ta’ ċentri ċibernetiċi (is-Sistema Ewropea ta’ Allert għaċ-Ċibersigurtà) biex jinbnew kapaċitajiet koordinati tal-identifikazzjoni u tal-għarfien sitwazzjonali, filwaqt li jissaħħu l-kapaċitajiet tal-identifikazzjoni tat-theddid u tal-kondiviżjoni tal-informazzjoni tal-Unjoni; jenħtieġ li jiġi stabbilit Mekkaniżmu ta’ Emerġenza għaċ-Ċibersigurtà li jappoġġa lill-Istati Membri fuq talba tagħhom fit-tħejjija, fir-rispons u fil-mitigazzjoni tal-impatt għall-inċidenti taċ-ċibersigurtà sinifikanti u inċidenti taċ-ċibersigurtà fuq skala kbira, u fl-irkupru inizjali minnhom; u biex jappoġġaw lil utenti oħrajn fir-rispons għal inċidenti taċ-ċibersigurtà sinifikanti u inċidenti taċ-ċibersigurtà fuq skala ekwivalenti għal skala kbira; u jenħtieġ li jiġi stabbilit Mekkaniżmu Ewropew tar-Rieżami tal-Inċidenti taċ-Ċibersigurtà li jirrieżamina u jivvaluta inċidenti speċifiċi sinifikanti jew inċidenti taċ-ċibersigurtà fuq skala kbira. L-azzjonijiet meħuda skont dan ir-Regolament jenħtieġ li jitwettqu bir-rispett dovut għall-kompetenzi tal-Istati Membri u jenħtieġ li jikkomplementaw u mhux jidduplikaw l-attivitajiet imwettqa min-network tas-CSIRTs, min-Network Ewropew ta' Organizzazzjoni ta' Kollegament f'każ ta' Ċiberkriżijiet (EU-CyCLONe) jew mill-Grupp ta’ Kooperazzjoni (Grupp ta’ Kooperazzjoni tal-NIS), kollha stabbiliti skont id-Direttiva (UE) 2022/2555. Dawk l-azzjonijiet huma mingħajr preġudizzju għall-Artikoli 107 u 108 tat-Trattat dwar il-Funzjonament tal-Unjoni Ewropea (TFUE).

(8)

Biex jintlaħqu dawk l-objettivi, jeħtieġ ukoll jiġi emendat ir-Regolament (UE) 2021/694 tal-Parlament Ewropew u tal-Kunsill (9) f’ċerti oqsma. B’mod partikolari, dan ir-Regolament jenħtieġ li jemenda r-Regolament (UE) 2021/694 biex jiżdiedu objettivi operazzjonali ġodda relatati mas-Sistema Ewropea ta’ Allert għaċ-Ċibersigurtà u l-Mekkaniżmu ta’ Emerġenza għaċ-Ċibersigurtà skont l-Objettiv Speċifiku 3 tal-Programm Ewropa Diġitali (DEP), maħsub biex jiżgura r-reżiljenza, l-integrità u l-affidabbiltà tas-Suq Uniku Diġitali, biex isaħħaħ il-kapaċitajiet tal-monitoraġġ tal-attakki ċibernetiċi u t-theddid ċibernetiċi u r-rispons għalihom, u biex isaħħaħ il-kooperazzjoni u l-koordinazzjoni transfruntiera fiċ-ċibersigurtà. Is-Sistema Ewropea ta’ Allert għaċ-Ċibersigurtà jista’ jkollha rwol importanti fl-appoġġ lill-Istati Membri fl-antiċipazzjoni u l-protezzjoni kontra t-theddid ċibernetiku, u r-Riżerva tal-UE għaċ-Ċibersigurtà jista’ jkollha rwol importanti fl-appoġġ lill-Istati Membri, lill-istituzzjonijiet, lill-korpi, lill-uffiċċji u lill-aġenziji tal-Unjoni, u lill-pajjiżi terzi assoċjati mad-DEP fir-rispons u fil-mitigazzjoni tal-impatti ta’ inċidenti taċ-ċibersigurtà sinifikanti, inċidenti taċ-ċibersigurtà fuq skala kbira, u inċidenti taċ-ċibersigurtà fuq skala ekwivalenti għal skala kbira. Dak l-impatt jista’ jinkludi ħsara materjali jew mhux materjali konsiderevoli u riskji serji għas-sigurtà u s-sikurezza pubblika. Fid-dawl tar-rwoli speċifiċi li jista’ jkollhom is-Sistema Ewropea ta’ Allert għaċ-Ċibersigurtà u r-Riżerva tal-UE għaċ-Ċibersigurtà, jenħtieġ li dan ir-Regolament jemenda r-Regolament (UE) 2021/694 fir-rigward tal-parteċipazzjoni ta’ entitajiet ġuridiċi li huma stabbiliti fl-Unjoni iżda li huma kkontrollati minn pajjiżi terzi, fejn ikun hemm riskju reali li l-għodod, l-infrastruttura u s-servizzi meħtieġa u suffiċjenti, jew it-teknoloġija, l-għarfien espert u l-kapaċità, ma jkunux disponibbli fl-Unjoni u l-benefiċċji tal-inklużjoni ta’ tali entitajiet ikunu akbar mir-riskju għas-sigurtà. Jenħtieġ li jiġu stabbiliti l-kundizzjonijiet speċifiċi li skonthom jista’ jingħata l-appoġġ finanzjarju għal azzjonijiet li jimplimentaw is-Sistema Ewropea ta’ Allert għaċ-Ċibersigurtà u r-Riżerva tal-UE għaċ-Ċibersigurtà, u jenħtieġ li jiġu definiti l-mekkaniżmi ta’ governanza u koordinazzjoni meħtieġa biex jintlaħqu l-objettivi maħsuba. Emendi oħra għar-Regolament (UE) 2021/694 jenħtieġ li jinkludu deskrizzjonijiet tal-azzjonijiet proposti skont l-objettivi operazzjonali l-ġodda, u indikaturi li jistgħu jitkejlu għall-monitoraġġ tal-implimentazzjoni ta’ dawn l-objettivi operazzjonali l-ġodda.

(9)

Biex jissaħħaħ ir-rispons tal-Unjoni għat-theddid u l-inċidenti ċibernetiċi, kooperazzjoni ma’ organizzazzjonijiet internazzjonali kif ukoll ma’ sħab internazzjali fdati u tal-istess fehma hija essenzjali. F’dak il-kuntest, is-sħab internazzjonali fdati u tal-istess fehma jenħtieġ li jinftiehmu bħala pajjiżi li jikkondividu l-prinċipji li ispiraw il-holqien tal-Unjoni, jiġifieri d-demokrazija, l-istat tad-dritt, l-universalità u l-indiviżibbiltà tad-drittijiet tal-bniedem u l-libertajiet fundamentali, ir-rispett għad-dinjità tal-bniedem, il-prinċipji tal-ugwaljanza u s-solidarjetà, u r-rispett għall-prinċipji tal-Karta tan-Nazzjonijiet Uniti u tal-liġi internazzjonali, u li ma jimminawx l-interessi essenzjali tas-sigurtà tal-Unjoni jew tal-Istati Membri tagħha. Tali kooperazzjoni tista’ tkun ukoll ta’ benefiċċju fir-rigward tal-azzjonijiet meħuda skont dan ir-Regolament, b’mod partikolari s-Sistema Ewropea ta’ Allert għaċ-Ċibersigurtà u r-Riżerva tal-UE għaċ-Ċibersigurtà. Ir-Regolament (UE) 2021/694 jenħtieġ li jipprevedi, soġġett għal ċerti kundizzjonijiet ta’ disponibbiltà u sigurtà, biexofferti għas-Sistema Ewropea ta’ Allert għaċ-Ċibersigurtà u r-Riżerva tal-UE għaċ-Ċibersigurtà jkunu miftuħa għall-entitajiet ġuridiċi kkontrollati minn pajjiżi terzi, soġġetti għar-rekwiżiti tas-sigurtà. Meta jiġi vvalutat ir-riskju għas-sigurtà tal-ftuħ tal-akkwist b’dan il-mod, huwa importanti li jitqiesu l-prinċipji u l-valuri li l-Unjoni tikkondividi ma’ sħab internazzjonali tal-istess fehma, fejn dawk il-prinċipji u l-valuri jkunu relatati mal-interessi essenzjali tas-sigurtà tal-Unjoni. Barra minn hekk, meta tali rekwiżiti ta’ sigurtà jkunu qed jiġu kkunsidrati skont ir-Regolament (UE) 2021/694, jistgħu jitqiesu diversi elementi, bħall-istruttura korporattiva u l-proċess tat-teħid ta’ deċiżjonijiet ta’ entità, is-sigurtà tad-data u tal-informazzjoni klassifikata jew sensittiva u l-iżgurar li r-riżultati tal-azzjoni ma jkunux soġġetti għal kontroll jew restrizzjonijiet minn pajjiżi terzi mhux eliġibbli.

(10)

Il-finanzjament tal-azzjonijiet skont dan ir-Regolament jenħtieġ li jiġi previst fir-Regolament (UE) 2021/694, li jenħtieġ li jibqa’ l-att bażiku rilevanti għall-azzjonijiet minquxa fl-Objettiv Speċifiku 3 tad-DEP. Il-kundizzjonijiet speċifiċi għall-parteċipazzjoni rigward kull azzjoni għandhom jiġu previsti fil-programmi ta’ ħidma rilevanti, f’konformità mar-Regolament (UE) 2021/694.

(11)

Ir-regoli finanzjarji orizzontali adottati mill-Parlament Ewropew u mill-Kunsill abbażi tal-Artikolu 322 tat-TFUE japplikaw għal dan ir-Regolament. Dawk ir-regoli huma stabbiliti fir-Regolament (UE, Euratom) 2024/2509 tal-Parlament Ewropew u tal-Kunsill (10) u jiddeterminaw, b’mod partikolari, il-proċedura għall-istabbiliment u l-implimentazzjoni tal-baġit tal-Unjoni, u jipprevedu kontrolli fuq ir-responsabbiltà tal-atturi finanzjarji. Ir-regoli adottati abbażi tal-Artikolu 322 tat-TFUE jinkludu wkoll ir-reġim ġenerali tal-kundizzjonalità għall-protezzjoni tal-baġit tal-Unjoni kif stabbilit fir-Regolament (UE, Euratom) 2020/2092 tal-Parlament Ewropew u tal-Kunsill (11).

(12)

Filwaqt li l-miżuri ta’ prevenzjoni u tħejjija huma essenzjali biex tissaħħaħ ir-reżiljenza tal-Unjoni fl-indirizzar ta’ inċidenti taċ-ċibersigurtà sinifikanti, inċidenti taċ-ċibersigurtà fuq skala kbira, u inċidenti taċ-ċibersigurtà fuq skala ekwivalenti għal skala kbira, l-okkorrenza, it-twaqqit u d-daqs ta’ tali inċidenti huma, min-natura tagħhom, imprevedibbli. Ir-riżorsi finanzjarji meħtieġa biex jiġi żgurat rispons adegwat jistgħu jvarjaw b’mod sinifikanti minn sena għal oħra u jenħtieġ li jkunu jistgħu jsiru disponibbli minnufih. Ir-rikonċiljazzjoni tal-prinċipju baġitarju tal-prevedibbiltà man-neċessità ta’ rispons rapidu għal ħtiġijiet ġodda għaldaqstant tirrikjedi l-adattament tal-implimentazzjoni finanzjarja tal-programmi ta’ ħidma. Konsegwentement, ikun xieraq li jiġi awtorizzat ir-riport tal-approprjazzjonijiet mhux użati, iżda biss għas-sena ta’ wara u biss għar-Riżerva tal-UE għaċ-Ċibersigurtà u l-azzjonijiet li jappoġġaw l-assistenza reċiproka, flimkien mar-riport ta’ approprjazzjonijiet awtorizzati skont l-Artikolu 12(4) tar-Regolament (UE, Euratom) 2024/2509.

(13)

Biex ikun hemm prevenzjoni, valutazzjoni, rispons u rkupru aktar effettivi fir-rigward tat-theddid u l-inċidenti ċibernetiċi, jeħtieġ jiġi żviluppat għarfien aktar komprensiv dwar it-theddid fuq l-assi u l-infrastrutturi kritiċi fit-territorju tal-Unjoni, inkluż id-distribuzzjoni ġeografika, l-interkonnessjoni u l-effetti potenzjali tagħhom f’każ ta’ attakki ċibernetiċi li jaffettwaw lil dik l-infrastruttura. Approċċ proattiv għall-identifikazzjoni, il-mitigazzjoni u l-prevenzjoni ta’ theddid ċibernetiku jinkludi kapaċità akbar ta’ kapaċitajiet ta’ identifikazzjoni avvanzata. Is-Sistema Ewropea ta’ Allert għaċ-Ċibersigurtà jenħtieġ li tikkonsisti f’diversi Ċentri Ċibernetiċi Transfruntieri interkonnessi, li kull wieħed minnhom jiġbor flimkien tliet Ċentri Ċibernetiċi Nazzjonali jew aktar. Dik l-infrastruttura jenħtieġ li taqdi l-interessi u l-ħtiġijiet taċ-ċibersigurtà nazzjonali u tal-Unjoni, billi tingrana t-teknoloġija mill-aktar avvanzata għall-ġbir avvanzat ta’ data u informazzjoni rilevanti, anonimizzata meta jkun xieraq, u l-għodod tal-analiżi, ittejjeb il-kapaċitajiet tal-identifikazzjoni u l-ġestjoni koordinati taċ-ċibersigurtà u tipprovdi għarfien sitwazzjonali fil-ħin reali. Jenħtieġ li dik l-infrastruttura sservi biex ittejjeb il-pożizzjoni ċibernetika, billi żżid l-identifikazzjoni, l-aggregazzjoni u l-analiżi tad-data u l-informazzjoni bl-għan li tipprevjeni t-theddid u l-inċidenti ċibernetiċi u b’hekk tikkomplementa u tappoġġa lill-entitajiet u lin-networks tal-Unjoni responsabbli għall-ġestjoni tal-kriżijiet ċibernetiċi fl-Unjoni, b’mod partikolari l-EU-CyCLONe.

(14)

Il-parteċipazzjoni fis-Sistema Ewropea ta’ Allert għaċ-Ċibersigurtà hija volontarja għall-Istati Membri. Kull Stat Membru jenħtieġ li jaħtar entità unika fil-livell nazzjonali inkarigata mill-koordinazzjoni tal-attivitajiet tal-identifikazzjoni tat-theddid ċibernetiku f’dak l-Istat Membru. Dawk iċ-Ċentri Ċibernetiċi Nazzjonali jenħtieġ li jaġixxu bħala punt ta’ referenza u portal fil-livell nazzjonali għall-parteċipazzjoni fis-Sistema Ewropea ta’ Allert għaċ-Ċibersigurtà u jenħtieġ li jiżguraw li l-informazzjoni dwar it-theddid ċibernetiku minn entitajiet pubbliċi u privati tiġi kondiviża u miġbura fil-livell nazzjonali b’mod effettiv u simplifikat. Iċ-Ċentri Ċibernetiċi Nazzjonali jistgħu jsaħħu l-kooperazzjoni u l-kondiviżjoni tal-informazzjoni bejn l-entitajiet pubbliċi u privati u jistgħu jappoġġaw ukoll l-iskambju ta’ data u informazzjoni rilevanti ma’ komunitajiet settorjali u transsettorjali rilevanti, inklużi ċ-Ċentri tal-Kondiviżjoni u tal-Analiżi tal-Informazzjoni (“ISACs”) rilevanti tal-industrija. Kooperazzjoni mill-qrib u kkoordinata bejn l-entitajiet pubbliċi u privati hija ċentrali biex tissaħħaħ ir-reżiljenza ċibernetika tal-Unjoni. Tali kooperazzjoni hija partikolarment siewja fil-kuntest tal-kondiviżjoni tal-intelligence dwar it-theddid ċibernetiku biex tittejjeb il-protezzjoni ċibernetika attiva. Bħala parti minn tali kooperazzjoni u l-kondiviżjoni tal-informazzjoni, iċ-Ċentri Ċibernetiċi Nazzjonali jistgħu jitolbu u jirċievu informazzjoni speċifika. Dawk iċ-Ċentri Ċibernetiċi Nazzjonali la huma obbligati u lanqas mogħtija s-setgħa minn dan ir-Regolament li jinfurzaw tali talbiet. Meta jkun xieraq u f’konformità mal-liġi tal-Unjoni u l-liġi nazzjonali, l-informazzjoni mitluba jew riċevuta tista’ tinkludi data dwar it-telemetrija, is-sensuri u l-illoggjar minn entitajiet, bħall-fornituri tas-servizzi tas-sigurtà ġestiti, li joperaw f’setturi ta’ kritiċità għolja jew setturi kritiċi oħra f’dak l-Istat Membru, sabiex tissaħħaħ l-identifikazzjoni rapida ta’ theddid u inċidenti ċibernetiċi potenzjali fi stadju aktar bikri, u b’hekk jittejjeb l-għarfien sitwazzjonali. Jekk iċ-Ċentru Ċibernetiku Nazzjonali ma jkunx l-awtorità kompetenti maħtura jew stabbilita mill-Istat Membru rilevanti skont l-Artikolu 8(1) tad-Direttiva (UE) 2022/2555, huwa kruċjali li jikkoordina ma’ dik l-awtorità kompetenti fir-rigward ta’ talbiet għal tali data u rċevuti tagħha.

(15)

Bħala parti mis-Sistema Ewropea ta’ Allert għaċ-Ċibersigurtà, jenħtieġ li jiġu stabbiliti għadd ta’ Ċentri Ċibernetiċi Transfruntieri. Dawk iċ-Ċentri Ċibernetiċi Transfruntieri jenħtieġ li jiġbru flimkien lil Ċentri Ċibernetiċi Nazzjonali minn tal-anqas tliet Stati Membri, biex jiżguraw li l-benefiċċji transfruntieri tal-identifikazzjoni tat-theddid u tal-kondiviżjoni u l-ġestjoni tal-informazzjoni jinkisbu kompletament. L-objettiv ġenerali taċ-Ċentri Ċibernetiċi Transfruntieri jenħtieġ li jkun li jissaħħu l-kapaċitajiet biex jiġu analizzati, evitati u identifikati t-theddidiet ċibernetiċi u li tiġi appoġġata l-produzzjoni ta’ intelligence dwar theddid ċibernetiku ta’ kwalità għolja, b’mod partikolari bil-kondiviżjoni ta’ informazzjoni rilevanti, anonimizzata meta jkun xieraq, f’ambjent fdat u sigur, minn diversi sorsi, pubbliċi jew privati, kif ukoll bil-kondiviżjoni u l-użu konġunt ta’ għodod mill-aktar avvanzati, u l-iżvilupp konġunt ta’ kapaċitajiet tal-identifikazzjoni, tal-analiżi u tal-prevenzjoni f’ambjent fdat u sigur. Jenħtieġ li ċ-Ċentri Ċibernetiċi Transfruntiera jipprovdu kapaċità addizzjonali ġdida, filwaqt li jibnu fuq is-SOCs eżistenti, is-CSIRTs u atturi rilevanti oħra, inkluż in-network tas-CSIRTs, u jikkomplementawhom.

(16)

Stat Membru magħżul miċ-Ċentru Ewropew ta’ Kompetenza Industrijali, Teknoloġika u tar-Riċerka fil-qasam taċ-Ċibersigurtà (ECCC) stabbilit fir-Regolament (UE) 2021/887 tal-Parlament Ewropew u tal-Kunsill (12) wara sejħa għal espressjonijiet ta’ interess biex jiġi stabbilit, jew jissaħħu l-kapaċitajiet ta’, Ċentru Ċibernetiku Nazzjonali, jenħtieġ li, b’mod konġunt mal-ECCC, jixtri għodod, infrastruttura jew servizzi rilevanti. Tali Stat Membru jenħtieġ li jkun eliġibbli li jirċievi għotja biex jopera l-għodod, l-infrastruttura jew is-servizzi. Konsorzju tal-Hosting li jikkonsisti f’mill-anqas tliet Stati Membri, li jkun intgħażel mill-ECCC wara sejħa għal espressjonijiet ta’ interess biex jiġi stabbilit jew jissaħħu l-kapaċitajiet ta’ Ċentru Ċibernetiku Transfruntier. Konsorzju tal-Hosting jenħtieġ li jixtri għodod, infrastruttura jew servizzi rilevanti b’mod konġunt mal-ECCC. Il-Konsorzju tal-Hosting jenħtieġ li jkun eliġibbli biex jirċievi għotja biex jopera l-għodod, l-infrastrutturA jew is-servizzi. Il-proċedura ta’ akkwist għax-xiri tal-għodod, l-infrastruttura jew is-servizzi rilevanti jenħtieġ li titwettaq b’mod konġunt mill-ECCC u l-awtoritajiet kontraenti rilevantital-Istati Membri magħżula wara tali sejħiet għal espressjonijiet ta’ interess. Tali akkwist jenħtieġ li jikkonforma mal-Artikolu 168(2) tar-Regolament (UE, Euratom) 2024/2509, u r-Regoli Finanzjarji tal-ECCC. Għalhekk, jenħtieġ li l-entitajiet privati ma jkunux eliġibbli biex jipparteċipaw fis-sejħiet għal espressjonijiet ta’ interess biex jixtru għodod, infrastrutturi jew servizzi mal-ECCC, jew biex jirċievu għotjiet biex joperaw dawk l-għodod, l-infrastrutturi jew is-servizzi. Madankollu, l-Istati Membri jenħtieġ li jkunu jistgħu jinvolvu entitajiet privati fl-istabbiliment, fit-titjib u fil-funzjonament taċ-Ċentri Ċibernetiċi Nazzjonali tagħhom u taċ-Ċentri Ċibernetiċi Transfruntiera tagħhom b’modi oħra li jqisu xierqa, f’konformità mal-liġi tal-Unjoni u l-liġi nazzjonali. L-entitajiet privati jistgħu jkunu eliġibbli wkoll biex jirċievu finanzjament mill-Unjoni skont ir-Regolament (UE) 2021/887 sabiex ifornu appoġġ liċ-Ċentri Ċibernetiċi Nazzjonali.

(17)

Sabiex jissaħħu l-identifikazzjoni tat-theddid ċibernetiku u l-għarfien sitwazzjonali fl-Unjoni, Stat Membru li jintgħażel wara sejħa għal espressjonijiet ta’ interess biex jistabbilixxi Ċentru Ċibernetiku Nazzjonali jew issaħħaħ il-kapaċitajiet tiegħu, jenħtieġ li jimpenja ruħu li japplika biex jipparteċipa f’Ċentru Ċibernetiku Transfruntier. Jekk Stat Membru ma jkunx parteċipant f’Ċentru Ċibernetiku Transfruntier fi żmien sentejn mid-data li fiha l-għodod, l-infrastruttura u s-servizzi jkunu ġew akkwistati, jew li fiha jkun irċieva l-finanzjament f’għotja, skont liema miż-żewġ każijiet seħħ l-ewwel, huwa jenħtieġ li ma jkunx eliġibbli li jipparteċipa f’azzjonijiet ulterjuri ta’ appoġġ tal-Unjoni fi ħdan il-qafas tas-Sistema Ewropea ta’ Allert għaċ-Ċibersigurtà biex jissaħħu l-kapaċitajiet taċ-Ċentru Ċibernetiku Nazzjonali tiegħu, kif previst fil-Kapitolu II ta’ dan ir-Regolament. F’tali każijiet l-entitajiet mill-Istati Membri xorta jistgħu jipparteċipaw f’sejħiet għal proposti dwar suġġetti oħra fil-qafas tad-DEP jew programmi ta’ finanzjament tal-Unjoni oħra, fosthom sejħiet għal kapaċitajiet għall-identifikazzjoni ċibernetika u l-kondiviżjoni tal-informazzjoni, dment li dawk l-entitajiet jissodisfaw il-kriterji ta’ eliġibbiltà stabbiliti f’ dawk il-programmi.

(18)

Is-CSIRTs jiskambjaw informazzjoni fi ħdan in-network tas-CSIRTs, f’konformità mad-Direttiva (UE) 2022/2555. Is-Sistema Ewropea ta’ Allert għaċ-Ċibersigurtà jenħtieġ li tikkostitwixxi kapaċità ġdida li tkun tikkomplementa lin-network tas-CSIRTs billi tikkontribwixxi għall-bini ta’ għarfien sitwazzjonali tal-Unjoni li jippermetti t-tisħiħ tal-kapaċitajiet tan-network tas-CSIRTs. Iċ-Ċentri Ċibernetiċi Transfruntieri jenħtieġ li jikkoordinaw u jikkooperaw mill-qrib man-network tas-CSIRTs. Jenħtieġ li jaġixxu billi jiġbru d-data u jikkondividu informazzjoni rilevanti, anonimizzata meta jkun xieraq, dwar it-theddid ċibernetiku minn entitajiet pubbliċi u privati, itejbu l-valur ta’ tali data u informazzjoni permezz ta’ analiżi esperta u infrastrutturi u għodod mill-aktar avvanzati akkwistati b’mod konġunt, u jikkontribwixxu għas-sovranità teknoloġika tal-Unjoni, l-awtonomija strateġika miftuħa, il-kompetittività u r-reżiljenza tagħha u għall-iżvilupp tal-kapaċitajiet tal-Unjoni.

(19)

Iċ-Ċentri Ċibernetiċi Transfruntiera jenħtieġ li jaġixxu bħala punt ċentrali li jippermetti ġbir wiesa’ ta’ data u intelligence dwar it-theddid ċibernetiku rilevanti, u jippermetti t-tixrid tal-informazzjoni dwar it-theddid fost sett kbir u varjat ta’ partijiet ikkonċernati (bħal pereżempju, Skwadri tar-Rispons f’Emerġenza Relatata mal-Kompjuters (CERTs), is-CSIRTs, l-ISACs u operaturi tal-infrastruttura kritika). Il-membri tal-Konsorzju tal-Hosting jenħtieġ li jispeċifikaw fil-ftehim tal-konsorzju l-informazzjoni rilevanti li għandha tiġi kondiviża fost il-parteċipanti taċ-Ċentru Ċibernetiku Transfruntier ikkonċernat. L-informazzjoni skambjata fost il-parteċipanti f’Ċentru Ċibernetiku Transfruntier tista’ tinkludi pereżempju data minn networks u sensuri, aġġornamenti tal-intelligence dwar it-theddid, indikaturi ta’ kompromess, u informazzjoni kuntestwalizzata dwar inċidenti, theddid, vulnerabbiltajiet u kważi aċċidenti, tekniki u proċeduri, tattiċi avversarjali, informazzjoni speċifika għall-atturi tat-theddid, allerti taċ-ċibersigurtà u rakkomandazzjonijiet rigward il-konfigurazzjoni tal-għodod taċ-ċibersigurtà biex jiġu identifikati attakki ċibernetiċi. Barra minn hekk, iċ-Ċentri Ċibernetiċi Transfruntieri jenħtieġ li jagħmlu wkoll ftehimiet tal-kooperazzjoni ma’ Ċentri Ċibernetiċi Transfruntieri oħra. Tali ftehimiet ta’ kooperazzjoni jenħtieġ li, b’mod partikolari, jispeċifikaw il-prinċipji tal-kondiviżjoni tal-informazzjoni u l-interoperabbiltà. Il-klawżoli tagħhom dwar l-interoperabbiltà, b’mod partikolari l-formati u l-protokolli għall-kondiviżjoni tal-informazzjoni, jenħtieġ li jkunu ggwidati mil-linji gwida dwar l-interoperabbiltà maħruġa mill-Aġenzija tal-Unjoni Ewropea għaċ-Ċibersigurtà stabbilit mir-Regolament 2019/881 (ENISA) u għalhekk, jieħdu lilhom bħala l-punt tat-tluq tagħhom. Dawk il-linji gwida jenħtieġ li jinħarġu malajr biex jiġi żgurat li jkunu jistgħu jitqiesu miċ-Ċentri Ċibernetiċi Transfruntieri fi stadju bikri. Jenħtieġ li jqisu l-istandards internazzjonali u l-aħjar prattiki, u l-funzjonament taċ-Ċentri Ċibernetiċi Transfruntieri stabbiliti.

(20)

Iċ-Ċentri Ċibernetiċi Transfruntieri u n-network tas-CSIRTs jenħtieġ li jikkooperaw mill-qrib biex jiżguraw sinerġiji u komplementarjetà tal-attivitajiet. Għal dak l-għan, jenħtieġ li jaqblu dwar arranġamenti proċedurali dwar il-kooperazzjoni u l-kondiviżjoni ta’ informazzjoni rilevanti. Dan jista’ jinkludi l-kondiviżjoni ta’ informazzjoni rilevanti dwar it-theddid ċibernetiku, inċidenti sinifikanti taċ-ċibersigurtà u l-iżgurar li l-esperjenza bl-għodod mill-aktar avvanzati, b’mod partikolari l-Intelliġenza Artifiċjali u t-teknoloġija tal-analiżi tad-data, użati fiċ-Ċentri Ċibernetiċi Transfruntieri, jiġu kondiviżi man-network tas-CSIRTs.

(21)

L-għarfien sitwazzjonali kondiviż fost l-awtoritajiet rilevanti hu prerekwiżit indispensabbli għat-tħejjija u l-koordinazzjoni fl-Unjoni kollha rigward l-inċidenti taċ-ċibersigurtà sinifikanti u inċidenti taċ-ċibersigurtà fuq skala kbira. Id-Direttiva (UE) 2022/2555 tistabbilixxi l-EU-CyCLONe biex tappoġġa l-ġestjoni koordinata tal-inċidenti u l-kriżijiet taċ-ċibersigurtà fuq skala kbira fil-livell operazzjonali u biex tiżgura l-iskambju regolari tal-informazzjoni rilevanti bejn l-Istati Membri u l-istituzzjonijiet, il-korpi, l-uffiċċji u l-aġenziji tal-Unjoni. Id-Direttiva (UE) 2022/2555 tistabbilixxiet wkoll in-network tas-CSIRTs li jippromwovi kooperazzjoni operazzjonali rapida u effettiva fost l-Istati Membri kollha. Biex jiġu żgurati l-għarfien sitwazzjonali u t-tisħiħ tas-solidarjetà, f’sitwazzjonijiet fejn iċ-Ċentri Ċibernetiċi Transfruntieri jiksbu informazzjoni relatata ma’ inċident potenzjali jew attwali taċ-ċibersigurtà fuq skala kbira, huma jenħtieġ li jfornu informazzjoni rilevanti lin-network tas-CSIRTs u jinfurmaw, bħala tbassira bikrija, lill-EU-CyCLONe. B’mod partikolari, skont is-sitwazzjoni, l-informazzjoni li trid tiġi kondiviża tista’ tinkludi informazzjoni teknika, informazzjoni dwar in-natura u l-motivi tal-aggressur jew tal-aggressur potenzjali, u informazzjoni mhux teknika ta’ livell ogħla dwar inċident taċ-ċibersigurtà potenzjali jew attwali fuq skala kbira. F’dan il-kuntest, jenħtieġ li tingħata attenzjoni xierqa lill-prinċipju tal-ħtieġa ta’ għarfien u lin-natura potenzjalment sensittiva tal-informazzjoni kondiviża. Id-Direttiva (UE) 2022/2555 tfakkar ukoll fir-responsabbiltajiet tal-Kummissjoni fil-Mekkaniżmu tal-Unjoni għall-Protezzjoni Ċivili (UCPM) stabbilit bid-Deċiżjoni 1313/2013/UE tal-Parlament Ewropew u tal-Kunsill (13), u r-responsabbiltà tagħha li tipprovdi rapporti analitiċi għall-Arranġamenti tar- Integrati tal-UE għal Rispons Politiku f’Sitwazzjonijiet ta’ Kriżi (Arranġamenti IPCR) skont id-Deċiżjoni ta’ Implimentazzjoni (UE) 2018/1993 (14). Meta ċ-Ċentri Ċibernetiċi Transfruntieri jikkondividu informazzjoni rilevanti u twissijiet bikrija relatati ma’ inċident potenzjali jew attwali taċ-ċibersigurtà fuq skala kbira mal-EU-CyCLONe u man-network tas-CSIRTs, huwa imperattiv li dik l-informazzjoni tiġi kondiviża permezz ta’ dawk in-networks mal-awtoritajiet tal-Istati Membri kif ukoll mal-Kummissjoni. F’dak ir-rigward, id-Direttiva (UE) 2022/2555 tipprevedi li l-għan tal-EU-CyCLONe huwa li jappoġġa l-ġestjoni koordinata tal-inċidenti u l-kriżijiet taċ-ċibersigurtà fuq skala kbira fil-livell operazzjonali u li jiżgura l-iskambju regolari tal-informazzjoni rilevanti bejn l-Istati Membri u l-istituzzjonijiet, il-korpi, l-uffiċċji u l-aġenziji tal-Unjoni. Il-kompiti tal-EU-CyCLONe jinkludu l-iżvilupp ta’ għarfien sitwazzjonali kondiviż għal tali inċidenti u kriżijiet. Huwa ta’ importanza kbira li l-EU-CyCLONe jiżgura, f’konformità ma’ dak l-għan u l-kompiti tiegħu, li tali informazzjoni hija fornita minnufih mar-rappreżentanti rilevanti tal-Istati Membri u mal-Kummissjoni. Għal dak il-għan, huwa kruċjali li r-regoli ta’ proċedura tal-EU-CyCLONe jinkludu dispożizzjonijiet xierqa.

(22)

Jenħtieġ li l-entitajiet li jipparteċipaw fis-Sistema Ewropea ta’ Allert għaċ-Ċibersigurtà jiżguraw livell għoli ta’ interoperabbiltà bejniethom inkluż, kif xieraq, fir-rigward tal-formati tad-data, it-tassonomija, l-għodod tal-immaniġġar tad-data u tal-analiżi tad-data. Jenħtieġ li jiżguraw ukoll kanali siguri tal-komunikazzjoni, livell minimu ta’ sigurtà tal-livell tal-applikazzjoni, dashboard tal-għarfien sitwazzjonali, u indikaturi. L-adozzjoni ta’ tassonomija komuni u l-iżvilupp ta’ mudell għar-rapporti sitwazzjonali biex jiġu deskritti l-kawżi tat-theddid ċibernetiku identifikat u r-riskji ċibernetiċijenħtieġ li jqisu l-ħidma eżistenti magħmula fil-kuntest tal-implimentazzjoni tad-Direttiva (UE) 2022/2555.

(23)

Biex ikun jista’ jsir l-iskambju tad-data u l-informazzjoni rilevanti dwar it-theddid taċ-ċibersigurtà minn diversi sorsi, fuq skala kbira u f’ambjent fdat u sigur, l-entitajiet li jieħdu sehem fis-Sistema Ewropea ta’ Allert għaċ-Ċibersigurtà jenħtieġ li jkunu attrezzati b’għodod, tagħmir u infrastrutturi mill-aktar avvanzati u siguri ferm, kif ukoll b’persunal bil-ħiliet meħtieġa. B’hekk jenħtieġ li jkunu jistgħu jittejbu l-kapaċitajiet kollettivi tal-identifikazzjoni u tat-twissijiet fil-ħin lill-awtoritajiet u lill-entitajiet rilevanti, b’mod partikolari billi jintużaw l-aktar teknoloġiji riċenti tal-intelliġenza artifiċjali u tal-analiżi tad-data.

(24)

Bil-ġbir, bl-analiżi, bil-kondiviżjoni u bl-iskambju tad-data u l-informazzjoni rilevanti, is-Sistema Ewropea ta’ Allert għaċ-Ċibersigurtà jenħtieġ li ssaħħaħ is-sovranità teknoloġika tal-Unjoni u l-awtonomija strateġika miftuħa fil-qasam taċ-ċibersigurtà, tal-kompetittività u tar-reżiljenza. Il-ġbir ta’ data mirquma ta’ kwalità għolja jista’ jikkontribwixxi wkoll għall-iżvilupp ta’ teknoloġiji avvanzati tal-intelliġenza artifiċjali u tal-analiżi tad-data. Is-sorveljanza mill-bniedem u, għal dak il-għan, forza tax-xogħol bil-ħiliet meħtieġa tibqa’ essenzjali għall-ġbir b’mod effettiv ta’ data ta’ kwalità għolja.

(25)

Filwaqt li s-Sistema Ewropea ta’ Allert għaċ-Ċibersigurtà hi proġett ċivili, il-komunità taċ-ċibersigurtà tista’ tibbenefika minn kapaċitajiet ċivili aktar sodi tal-identifikazzjoni u tal-għarfien sitwazzjonali żviluppati għall-protezzjoni tal-infrastruttura kritika.

(26)

Jenħtieġ li l-kondiviżjoni tal-informazzjoni fost il-parteċipanti tas-Sistema Ewropea ta’ Allert għaċ-Ċibersigurtà tkun konformi mar-rekwiżiti legali eżistenti u b’mod partikolari mal-liġi tal-Unjoni u l-liġi nazzjonali dwar il-protezzjoni tad-data, u mar-regoli tal-Unjoni dwar il-kompetizzjoni li jirregolaw l-iskambju tal-informazzjoni. Ir-riċevitur tal-informazzjoni jenħtieġ li jimplimenta, sa fejn ikun meħtieġ għall-ipproċessar tad-data personali, miżuri tekniċi u organizzazzjonali li jħarsu d-drittijiet u l-libertajiet tas-suġġetti tad-data, u jenħtieġ li jeqred id-data malli ma tibqax meħtieġa għall-iskop iddikjarat u jinforma lill-entità li jagħmel id-data disponibbli li d-data tkun inqerdet.

(27)

Il-preservazzjoni tal-kunfidenzjalità u tas-sigurtà tal-informazzjoni huma ta’ importanza kbira għat-tliet pilastri ta’ dan ir-Regolament, kemm jekk biex titħeġġeġ il-kondiviżjoni u l-iskambju tal-informazzjoni fil-kuntest tas-Sistema Ewropea ta’ Allert għaċ-Ċibersigurtà, biex jiġu ppreservati l-interessi tal-entitajiet li japplikaw għall-appoġġ skont il-Mekkaniżmu ta’ Emerġenza għaċ-Ċibersigurtà, jew biex jiġi żgurat li r-rapporti skont il-Mekkaniżmu Ewropew tar-Rieżami tal-Inċidenti taċ-Ċibersigurtà jkunu jistgħu jrendu tagħlimiet utli meħuda mingħajr ma jkollhom impatt negattiv fuq l-entitajiet affettwati mill-inċidenti. Il-parteċipazzjoni tal-Istati Membri u l-entitajiet f’dawk il-Mekkaniżmi tiddependi fuq ir-relazzjonijiet ta’ fiduċja bejn il-komponenti tagħhom. Meta l-informazzjoni tkun kunfidenzjali skont ir-regoli tal-Unjoni jew dawk nazzjonali, il-kondiviżjoni u l-iskambju tagħha skont dan ir-Regolament jenħtieġ li jkun limitat għal dak li huwa rilevanti u proporzjonat għall-finijiet tal-kondiviżjoni jew l-iskambju. Dak l-iskambju jenħtieġ ukoll li jippreserva l-kunfidenzjalità ta’ dik l-informazzjoni filwaqt li jipproteġi s-sigurtà u l-interessi kummerċjali ta’ kull entità kkonċernata. Il-kondiviżjoni jew l-iskambju tal-informazzjoni skont dan ir-Regolament tista’ sseħħ bl-użu ta’ ftehimiet ta’ nondivulgazzjoni, jew gwida dwar id-distribuzzjoni tal-informazzjoni bħat-traffic light protocol. It-traffic light protocol għandu jinftiehem li huwa mezz biex tingħata informazzjoni dwar kwalunkwe limitazzjoni rigward it-tixrid ulterjuri tal-informazzjoni. Jintuża fi kważi s-CSIRTs kollha u f’xi ISACs. Minbarra dawk ir-rekwiżiti ġenerali, fir-rigward tas-Sistema Ewropea ta’ Allert għaċ-Ċibersigurtà, il-ftehimiet dwar il-Konsorzji tal-Hosting jenħtieġ li jistabbilixxu regoli speċifiċi dwar il-kundizzjonijiet għall-kondiviżjoni ta’ informazzjoni fi ħdan iċ-Ċentru Ċibernetiku Transfruntier ikkonċernat. Dawk il-ftehimiet jistgħu, b’mod partikolari, jirrikjedu li l-informazzjoni tiġi kondiviża biss f’konformità mal-liġi tal-Unjoni u l-liġi nazzjonali.

(28)

Fir-rigward tal-użu tar-Riżerva tal-UE għaċ-Ċibersigurtà, huma meħtieġa regoli speċifiċi dwar il-kunfidenzjalità. L-appoġġ se jintalab, jiġi vvalutat u fornut f’kuntest ta’ kriżi u fir-rigward ta’ entitajiet li joperaw f’setturi sensittivi. Sabiex ir-Riżerva tal-UE għaċ-Ċibersigurtà tiffunzjona b’mod effettiv, huwa essenzjali li l-utenti u l-entitajiet ikunu jistgħu jikkondividu, u jfornu aċċess, mingħajr dewmien, għall-informazzjoni kollha li tkun meħtieġa biex kull entità taqdi r-rwol tagħha fil-valutazzjoni tat-talbiet u fl-użu tal-appoġġ. Għaldaqstant, jenħtieġ li dan ir-Regolament jipprevedi li tali informazzjoni kollha tintuża jew tiġi kondiviża biss fejn meħtieġ għall-funzjonament tar-Riżerva tal-UE għaċ-Ċibersigurtà, u li l-informazzjoni li tkun kunfidenzjali jew klassifikata skont il-liġi tal-Unjoni u l-liġi nazzjonalitintuża u tiġi kondiviża biss f’konformità ma’ dik il-liġi. Apparti hekk, l-utenti jenħtieġ li dejjem ikunu jistgħu, meta jkun xieraq, jużaw protokolli għall-kondiviżjoni tal-informazzjoni bħat-traffic light protocol biex jispeċifikaw aktar il-limitazzjonijiet. Filwaqt li l-utenti għandhom diskrezzjoni f’dan ir-rigward, huwa importanti li meta japplikaw tali limitazzjonijiet, huma jqisu l-konsegwenzi possibbli, b’mod partikolari fir-rigward ta’ dewmien fil-valutazzjoni jew il-forniment tas-servizzi mitluba. Sabiex ikun hemm Riżerva tal-UE għaċ-Ċibersigurtà effiċjenti, huwa importanti li l-Awtorità Kontraenti tiċċara dawk il-konsegwenzi lill-utent qabel ma tissottometti talba. Dawk is-salvagwardji huma limitati għat-talba u l-forniment ta’ servizzi tar-iżerva tal-UE għaċ-Ċibersigurtà u ma jaffettwawx il-kondiviżjoni ta’ informazzjoni f’kuntesti oħra, bħal fl-akkwist tar-Riżerva tal-UE għaċ-Ċibersigurtà.

(29)

Fid-dawl taż-żidiet kontinwi fir-riskji u fl-għadd ta’ inċidenti ċibernetiċi li jolqtu lill-Istati Membri, jeħtieġ jiġi stabbilit strument ta’ appoġġ għall-kriżijiet, jiġifieri l-Mekkaniżmu ta’ Emerġenza għaċ-Ċibersigurtà, biex jtejjeb ir-reżiljenza tal-Unjoni għall-inċidenti taċ-ċibersigurtà sinifikanti, inċidenti taċ-ċibersigurtà fuq skala kbira u inċidenti taċ-ċibersigurtà fuq skala ekwivalenti għal skala kbira u jikkomplementa l-azzjonijiet tal-Istati Membri b’appoġġ finanzjarju ta’ emerġenza għat-tħejjija, għar-rispons għal inċident u għall-irkupru inizjali tas-servizzi essenzjali. Peress li l-irkupru sħiħ minn inċident huwa proċess komprensiv biex jiġi restawrat il-funzjonament tal-entità affettwata mill-inċident għall-istat ta’ qabel l-inċident u jista’ jkun proċess twil li jinvolvi kostijiet sinifikanti, l-appoġġ mir-Riżerva tal-UE għaċ-Ċibersigurtà jenħtieġ li jkun limitat għall-istadju inizjali tal-proċess ta’ rkupru, li jwassal għar-restawr tal-funzjonalitajiet bażiċi tas-sistemi. Il-Mekkaniżmu ta’ Emerġenza għaċ-Ċibersigurtà jenħtieġ li jippermetti l-użu rapidu u effettiv tal-assistenza f’ċirkostanzi definiti u f’kundizzjonijiet ċari u jippermetti monitoraġġ u evalwazzjoni bir-reqqa ta’ kif intużaw ir-riżorsi. Filwaqt li r-responsabbiltà primarja għall-prevenzjoni, għat-tħejjija u għar-rispons għall-inċidenti u l-kriżijiet hi f’idejn l-Istati Membri, il-Mekkaniżmu ta’ Emerġenza għaċ-Ċibersigurtà jippromwovi s-solidarjetà bejn l-Istati Membri f’konformità mal-Artikolu 3(3) tat-Trattat dwar l-Unjoni Ewropea (TUE).

(30)

Il-Mekkaniżmu ta’ Emerġenza għaċ-Ċibersigurtà jenħtieġ li jforni appoġġ lill-Istati Membri li jkun jikkomplementa l-miżuri u r-riżorsi proprji tagħhom, u jagħti alternattivi ta’ appoġġ eżistenti oħra fir-rigward tar-rispons għall-inċidenti taċ-ċibersigurtà sinifikanti u inċidenti taċ-ċibersigurtà fuq skala kbira, u l-irkupru inizjali minnhom, bħas-servizzi fornuti mill-ENISA f’konformità mal-mandat tagħha, ir-rispons ikkoordinat u l-assistenza min-network tas-CSIRTs, l-appoġġ tal-mitigazzjoni mill-EU-CyCLONe, kif ukoll l-assistenza reċiproka bejn l-Istati Membri inkluż fil-kuntest tal-Artikolu 42(7) tat-TUE u t-Timijiet ta’ Rispons Rapidu Ċibernetiku tal-kooperazzjoni strutturata permanenti (PESCO) stabbiliti skont id-Deċiżjoni tal-Kunsull (PESK) 2017/2315 (15). Jenħtieġ li jindirizza l-ħtieġa li tkun żgurata d-disponibbiltà ta’ mezzi speċjalizzati li jappoġġaw it-tħejjija u r-rispons għal tali inċidenti madwar l-Unjoni u fil-pajjiżi terzi assoċjati mad-DEP, u l-irkupru minnhom.

(31)

Dan ir-Regolament huwa mingħajr preġudizzju għall-proċeduri u l-oqfsa għall-koordinazzjoni tar-risponsi għall-kriżijiet fil-livell tal-Unjoni, b’mod partikolari d-Direttiva (UE) 2022/2555, il-Mekkaniżmu tal-Unjoni għall-Protezzjoni Ċivili stabbilit skont id-Deċiżjoni Nru 1313/2013/UE tal-Parlament Ewropew u tal-Kunsill (16), l-Arranġamenti IPCR, ir-Rakkomandazzjoni tal-Kummissjoni (UE) 2017/1584 (17). L-appoġġ fornut fil-qafas tal-Mekkaniżmu ta’ Emerġenza għaċ-Ċibersigurtà jista’ jikkomplementa l-assistenza fornuta fil-kuntest tal-politika estera u ta’ sigurtà komuni u l-politika ta’ sigurtà u ta’ difiża komuni, meta titqies in-natura ċivili tal-Mekkaniżmu ta’ Emerġenza għaċ-Ċibersigurtà. L-appoġġ fornut fil-qafas tal-Mekkaniżmu ta’ Emerġenza għaċ-Ċibersigurtà jista’ jikkomplementa l-azzjonijiet implimentati fil-kuntest tal-Artikolu 42(7) tat-TUE, inkluża l-assistenza fornuta minn Stat Membru lil Stat Membru ieħor, jew jifforma parti mir-rispons konġunt bejn l-Unjoni u l-Istati Membri jew f’sitwazzjonijiet imsemmija fl-Artikolu 222 tat-TFUE. L-implimentazzjoni ta’ dan ir-Regolament jenħtieġ li jkun ikkoordinat ukoll mal-implimentazzjoni tal-miżuri skont l-Għodod tad-Diplomazija Ċibernetika, meta jkun xieraq.

(32)

L-assistenza fornuta skont dan ir-Regolament jenħtieġ li tkun tappoġġa u tikkomplementa l-azzjonijiet tal-Istati Membri fil-livell nazzjonali. Għal dan il-għan, jenħtieġ li jiġu żgurati l-kooperazzjoni u l-konsultazzjoni mill-qrib bejn il-Kummissjoni, l-ENISA, l-Istati Membri u, fejn rilevanti, l-ECCC. Meta jitlob l-appoġġ tal-Mekkaniżmu ta’ Emerġenza għaċ-Ċibersigurtà, l-Istati Membri jenħtieġ li jfornu informazzjoni rilevanti li tiġġustifika l-ħtieġa ta’ appoġġ.

(33)

Id-Direttiva (UE) 2022/2555 tirrikjedi li l-Istati Membri jaħtru jew jistabbilixxu awtorità waħda jew aktar għall-ġestjoni tal-kriżijiet ċibernetiċi u jiżguraw li jkollhom ir-riżorsi adegwati biex iwettqu l-kompiti tagħhom b’mod effettiv u effiċjenti. Tirrikjedi wkoll li l-Istati Membri jidentifikaw il-kapaċitajiet, l-assi u l-proċeduri li jistgħu jintużaw fil-każ ta’ kriżi u jadottaw pjan nazzjonali ta’ rispons għall-inċidenti u l-kriżijiet taċ-ċibersigurtà fuq skala kbira li jkun jistabbilixxi l-objettivi u l-arranġamenti għall-ġestjoni tal-inċidenti u l-kriżijiet taċ-ċibersigurtà fuq skala kbira. L-Istati Membri meħtieġa wkoll jistabbilixxu CSIRT waħda jew aktar inkarigati mill-ġestjoni tal-inċidenti skont proċess definit sew u li jkun ikopri mill-anqas is-setturi, is-subsetturi u t-tipi tal-entitajiet fl-ambitu ta’ dik id-Direttiva, u jiżguraw li jkollhom riżorsi adegwati biex iwettqu l-kompiti b’mod effettiv. Dan ir-Regolament hu mingħajr preġudizzju għar-rwol tal-Kummissjoni li tiżgura l-konformità tal-Istati Membri mal-obbligi tad-Direttiva (UE) 2022/2555. Il-Mekkaniżmu ta’ Emerġenza għaċ-Ċibersigurtà jenħtieġ li jforni assistenza għal azzjonijiet immirati biex isaħħu t-tħejjija, u għal azzjonijiet ta’ rispons għall-inċidenti li jimmitigaw l-impatt tal-inċidenti taċ-ċibersigurtà sinifikanti u inċidenti taċ-ċibersigurtà fuq skala kbira, b’appoġġ għall-irkupru inizjali jew biex jitreġġgħu lura l-funzjonalitajiet bażiċi tas-servizzi fornuti mill-entitajiet li joperaw f’setturi ta’ kritiċità għolja jew entitajiet li joperaw f’setturi kritiċi oħra.

(34)

Bħala parti mill-azzjonijiet tat-tħejjija, biex jiġi promoss approċċ konsistenti u tissaħħaħ is-sigurtà fl-Unjoni u fis-suq intern tagħha, jenħtieġ li jingħata appoġġ għall-ittestjar u l-valutazzjoni taċ-ċibersigurtà tal-entitajiet li joperaw f’setturi ta’ kritiċità għolja identifikati skont id-Direttiva (UE) 2022/2555 b’mod ikkoordinat, inkluż permezz tal-eżerċizzju u t-taħriġ. Għal dak il-għan, il-Kummissjoni, wara li tikkonsulta lill-ENISA, lill-Grupp ta’ Kooperazzjoni tal-NIS u lill-EU-CyCLONe, jenħtieġ li tidentifika regolarment is-setturi jew is-subsetturi rilevanti, li jenħtieġ li jkunu eliġibbli li jirċievu appoġġ finanzjarju għal ittestjar tat-tħejjija kkoordinat fil-livell tal-Unjoni. Is-setturi jew is-subsetturi jenħtieġ li jintgħażlu mis-setturi ta’ kritiċità għolja elenkati fl-Anness I tad-Direttiva (UE) 2022/2555. L--ittestjar tat-tħejjija kkoordinat jenħtieġ li jkun bbażat fuq xenarji u metodoloġiji komuni tar-riskju. L-għażla tas-setturi u l-iżvilupp tax-xenarji tar-riskju jenħtieġ li jqisu l-valutazzjonijiet tar-riskju u x-xenarji tar-riskju rilevanti fl-Unjoni kollha, inkluż il-ħtieġa li tkun evitata d-duplikazzjoni, bħall-evalwazzjoni tar-riskju u x-xenarji tar-riskju mitluba fil-konklużjonijiet tal-Kunsill dwar l-iżvilupp tal-qagħda taċ-ċibersigurtà tal-Unjoni Ewropea mwettqa mill-Kummissjoni, mir-Rappreżentant Għoli tal-Unjoni għall-Affarijiet Barranin u għall-Politika tas-Sigurtà (ir-Rappreżentant Għoli) u mill-Grupp ta’ Kooperazzjoni tal-NIS, b’koordinazzjoni mal-korpi u l-aġenziji ċivili u militari rilevanti u n-networks stabbiliti, inkluż l-EU-CyCLONe, kif ukoll il-valutazzjoni tar-riskju tan-networks u tal-infrastruttura tal-komunikazzjoni mitluba mis-Sejħa Ministerjali Konġunta ta’ Nevers u mwettqa mill-Grupp ta’ Kooperazzjoni tal-NIS, bl-appoġġ tal-Kummissjoni u tal-ENISA, u b’kooperazzjoni mal-Korp ta’ Regolaturi Ewropej tal-Komunikazzjonijiet Elettroniċi stabbilit mir-Regolament (UE) 2018/1971 tal-Parlament Ewropew u tal-Kunsill (18), il-valutazzjonijiet tar-riskju tas-sigurtà kkoordinati fil-livell tal-Unjoni ta’ katini ta’ proviżjoni kritiċi li jridu jsiru skont l-Artikolu 22 tad-Direttiva (UE) 2022/2555 u l-ittestjar tar-reżiljenza operazzjonali diġitali kif previst fir-Regolament (UE) 2022/2554 tal-Parlament Ewropew u tal-Kunsill (19). L-għażla tas-setturi jenħtieġ li tqis ukoll ir-Rakkomandazzjoni tal-Kunsill dwar approċċ ikkoordinat fl-Unjoni kollha li jsaħħaħ ir-reżiljenza tal-infrastruttura kritika.

(35)

Barra minn hekk, il-Mekkaniżmu ta’ Emerġenza għaċ-Ċibersigurtà jenħtieġ li jippovdi appoġġ għal azzjonijiet oħra tat-tħejjija u jenħtieġ li jappoġġa t-tħejjija f’setturi oħra li mhumiex koperti mill-ittestjar ikkoordinat tat-tħejjija tal-entitajiet li joperaw f’setturi ta’ kritiċità għolja u f’setturi kritiċi oħra. Dawk l-azzjonijiet jistgħu jinkludu diversi tipi ta’ attivitajiet nazzjonali ta’ tħejjija.

(36)

Meta l-Istati Membri jirċievu għotjiet biex jappoġġaw azzjonijiet ta’ tħejjija, l-entitajiet f’setturi ta’ kritiċità għolja jistgħu jipparteċipaw f’dawk l-azzjonijiet fuq bażi volontarja. Hija prattika tajba li wara tali azzjonijiet, l-entitajiet parteċipanti jfasslu pjan ta’ rimedju biex jimplimentaw kwalunkwe rakkomandazzjoni li tirriżulta ta’ miżuri speċifiċi biex jibbenefikaw kemm jista’ jkun mill-azzjoni tat-tħejjija. Filwaqt li huwa importanti li l-Istati Membri, bħala parti mill-azzjonijiet, jitolbu li l-entitajiet parteċipanti jfasslu u jimplimentaw tali pjanijiet ta’ rimedju, l-Istati Membri la huma obbligati u lanqas mogħtija s-setgħa minn dan ir-Regolament li jinfurzaw tali talbiet. Tali talbiet huma mingħajr preġudizzju għar-rekwiżiti għall-entitajiet u għas-setgħat ta’ superviżjoni għall-awtoritajiet kompetenti skont id-Direttiva (UE) 2022/2555.

(37)

Il-Mekkaniżmu ta’ Emerġenza għaċ-Ċibersigurtà jenħtieġ li jforni wkoll appoġġ għal azzjonijiet ta’ rispons għall-inċidenti biex jiġi mmitigat l-impatt tal-inċidenti taċ-ċibersigurtà sinifikanti, inċidenti taċ-ċibersigurtà fuq skala kbira u inċidenti taċ-ċibersigurtà fuq skala ekwivalenti għal skala kbira, ikun appoġġat l-irkupru inizjali, jew jitreġġa’ lura l-funzjonament tas-servizzi essenzjali. Meta jkun xieraq, jenħtieġ li dan jikkomplementa lill-UCPM biex jiżgura approċċ komprensiv li jirrispondi għall-impatt tal-inċidenti ċibernetiċi fuq iċ-ċittadini.

(38)

Il-Mekkaniżmu ta’ Emerġenza għaċ-Ċibersigurtà jenħtieġ li jappoġġa l-assistenza teknika fornuta minn Stat Membru wieħed lil Stat Membru ieħor. Stat Membru li hu affettwat minn inċident taċ-ċibersigurtà sinifikanti jew inċident taċ-ċibersigurtà fuq skala kbira, inkluż mis-CSIRTs kif imsemmi fl-Artikolu 11(3), il-punt (f), tad-Direttiva (UE) 2022/2555. L-Istati Membri li jipprovdu tali assistenza jenħtieġ li jitħallew jippreżentaw talbiet biex ikopru l-kostijiet relatati mad-dispaċċ tat-timijiet tal-esperti fil-qafas tal-assistenza reċiproka. Il-kostijiet eliġibbli jistgħu jinkludu l-ispejjeż tal-ivvjaġġar, tal-akkomodazzjoni u tal-allowance ta’ kuljum tal-esperti taċ-ċibersigurtà.

(39)

Minħabba r-rwol essenzjali li l-impriżi privati jaqdu fid-detezzjoni, fit-tħejjija u fir-rispons għal inċidenti taċ-ċibersigurtà fuq skala kbira u għal inċidenti taċ-ċibersigurtà fuq skala ekwivalenti għal skala kbira, huwa importanti li jiġi rikonoxxut il-valur tal-kooperazzjoni pro bono volontarja ma’ tali impriżi, fejn joffru servizzi mingħajr remunerazzjoni fil-każ ta’ inċidenti u kriżijiet taċ-ċibersigurtà fuq skala kbira u inċidenti u kriżijiet taċ-ċibersigurtà fuq skala ekwivalenti għal skala kbira. L-ENISA, f’kooperazzjoni mal-EU-CyCLONe tista’ timmonitorja l-evoluzzjoni ta’ tali inizjattivi pro bono u tippromwovi l-konformità tagħhom mal-kriterji applikabbli għall-fornituri fdati ta’ servizzi tas-sigurtà ġestiti skont dan ir-Regolament, inkluż fir-rigward tal-affidabbiltà tal-impriżi privati, l-esperjenza tagħhom kif ukoll il-kapaċità tagħhom li jittrattaw informazzjoni sensittiva b’mod sigur.

(40)

Bħala parti mill-Mekkaniżmu ta’ Emerġenza għaċ-Ċibersigurtà, jenħtieġ li gradwalment tiġi stabbilita Riżerva tal-UE għaċ-Ċibersigurtà, li tkun tikkonsisti f’servizzi minn fornituri fdati ta’ servizzi tas-sigurtà ġestiti biex jappoġġaw l-azzjonijiet ta’ rispons u jibdew azzjonijiet ta’ rkupru f’każijiet ta’ inċidenti taċ-ċibersigurtà sinifikanti, inċidenti taċ-ċibersigurtà fuq skala kbira jew inċidenti taċ-ċibersigurtà fuq skala ekwivalenti għal skala kbira li jaffettwaw lill-Istati Membri, lill-istituzzjonijiet, lill-korpi jew lill-aġenziji tal-Unjoni, jew lill-pajjiżi terzi assoċjati mad-DEP. Ir-Riżerva tal-UE għaċ-Ċibersigurtà jenħtieġ li tiżgura d-disponibbiltà u l-prontezza tas-servizzi. Għalhekk jenħtieġ li tinkludi servizzi li huma impenjati minn qabel, inkluż pereżempju kapaċitajiet li jkunu fuq stand-by u li jkunu jistgħu jintużaw fi żmien qasir. Is-servizzi mir-Riżerva tal-UE għaċ-Ċibersigurtà jenħtieġ li jservu biex jappoġġaw lill-awtoritajiet nazzjonali fl-għoti tal-assistenza lill-entitajiet affettwati li joperaw f’setturi ta’ kritiċità għolja jew lill-entitajiet affettwati li joperaw f’setturi kritiċi oħra li jikkomplementaw l-azzjonijiet tagħhom stess fil-livell nazzjonali. Is-servizzi mir-Riżerva tal-UE għaċ-Ċibersigurtà jistgħu jservu wkoll biex jappoġġaw lill-istituzzjonijiet, lill-korpi, lill-uffiċċji u lill-aġenziji tal-Unjoni, f’kundizzjonijiet simili. Ir-Riżerva tal-UE għaċ-Ċibersigurtà tista’ tikkontribwixxi wkoll biex tissaħħaħ il-pożizzjoni kompetittiva tal-industrija u tas-servizzi fl-Unjoni fl-ekonomija diġitali, fosthom il-mikroimpriżi, l-impriżi żgħar u ta’ daqs medju kif ukoll in-negozji l-ġodda, inkluż billi tinċentivizza l-investiment fir-riċerka u l-innovazzjoni. Huwa importanti li meta jiġu akkwistati s-servizzi għar-Riżerva tal-UE għaċ-Ċibersigurtà, jitqies il-Qafas Ewropew għall-Ħiliet fil-qasam taċ-Ċibersigurtà tal-ENISA. Meta jitolbu appoġġ mir-Riżerva tal-UE għaċ-Ċibersigurtà, l-utenti jenħtieġ li jinkludu fl-applikazzjoni tagħhom informazzjoni xierqa dwar l-entità affettwata u l-impatt potenzjali, informazzjoni dwar is-servizz mitlub mir-Riżerva tal-UE għaċ-Ċibersigurtà, u l-appoġġ fornut lill-entità affettwata fil-livell nazzjonali, li jenħtieġ li jitqies meta tiġi vvalutata t-talba mill-applikant. Biex tiġi żgurata l-komplementarjetà ma’ forom oħra ta’ appoġġ disponibbli għall-entità affettwata, it-talba jenħtieġ li tinkludi wkoll, meta disponibbli, informazzjoni dwar arranġamenti kuntrattwali fis-seħħ ta’ servizzi ta’ rispons għall-inċidenti u rkupru inizjali mill-inċidenti, kif ukoll kuntratti ta’ assigurazzjoni li potenzjalment ikopru tali tip ta’ inċident.

(41)

Sabiex jiġi żgurat l-użu effettiv tal-finanzjament tal-Unjoni, jenħtieġ li s-servizzi impenjati minn qabel taħt ir-Riżerva tal-UE għaċ-Ċibersigurtà jiġu kkonvertiti, f’konformità mal-kuntratt rilevanti, f’servizzi ta’ tħejjija relatati mal-prevenzjoni tal-inċidenti u r-rispons għalihom, f’każ li dawk is-servizzi impenjati minn qabel ma jintużawx għar-rispons għall-inċidenti matul iż-żmien li għalih ikunu impenjati minn qabel. Dawk is-servizzi jenħtieġ li jikkomplementaw u mhux li jidduplikaw l-azzjonijiet ta’ tħejjija li jridu jiġu ġestiti mill-ECCC.

(42)

It-talbiet għal appoġġ fil-qafas tar-Riżerva tal-UE għaċ-Ċibersigurtà mill-awtoritajiet tal-ġestjoni tal-kriżijiet ċibernetiċi tal-Istati Membri u mis-CSIRTs, jew mis-CERT-UE f’isem l-istituzzjoniijiet, il-korpi, l-uffiċċji u l-aġenziji tal-Unjoni, jenħtieġ li jiġu vvalutati mill-awtorità kontraenti. Fejn l-ENISA tkun ġiet fdata bl-amministrazzjoni u l-funzjonament tar-Riżerva tal-UE għaċ-Ċibersigurtà, dik l-awtorità kontraenti hija l-ENISA. It-talbiet għal appoġġ minn pajjiżi terzi assoċjati mad-DEP jenħtieġ li jiġu vvalidati mill-Kummissjoni. Sabiex jiġu ffaċilitati s-sottomissjoni u l-valutazzjoni tat-talbiet għall-appoġġ, l-ENISA tista’ tistabbilixxi pjattaforma sigura.

(43)

Meta jaslu diversi talbiet simultanji, dawk it-talbiet jenħtieġ li jingħataw prijorità f’konformità mal-kriterji stabbiliti f’dan ir-Regolament. Fid-dawl tal-objettivi ġenerali ta’ dan ir-Regolament, dawk il-kriterji jenħtieġ li jinkludu s-skala u s-severità tal-inċident, it-tip ta’ entità affettwata, l-impatt potenzjali tal-inċident fuq l-Istat Membru jew l-utenti affettwati, in-natura transfruntiera potenzjali tal-inċident u r-riskju ta’ tixrid, u l-miżuri diġà meħuda mill-utent biex jassisti fir-rispons u fl-irkupru inizjali. Fid-dawl ta’ dawk objettivi u minħabba li t-talbiet mill-utenti tal-Istati Membri huma maħsuba esklużivament biex jappoġġaw entitajiet madwar l-Unjoni li joperaw f’setturi ta’ kritiċità għolja jew entitajiet li joperaw f’setturi kritiċi oħra, huwa xieraq li tingħata prijorità ogħla lit-talbiet tal-utenti tal-Istati Membri meta dawk il-kriterji jwasslu biex żewġ talbiet jew aktar jiġu vvalutati bħala ugwali. Dan huwa mingħajr preġudizzju għal kwalunkwe obbligu li l-Istati Membri jista’ jkollhom, skont il-ftehimiet tal-hosting rilevanti, li jieħdu miżuri biex jipproteġu u jassistu lill-istituzzjonijiet, lill-korpi, lill-uffiċċji u lill-aġenziji tal-Unjoni.

(44)

Il-Kummissjoni jenħtieġ li jkollha responsabbiltà ġenerali għall-implimentazzjoni tar-Riżerva tal-UE għaċ-Ċibersigurtà. Minħabba l-esperjenza estensiva li kisbet l-ENISA bl-azzjoni ta’ appoġġ għaċ-ċibersigurtà, l-ENISA hija l-Aġenzija l-aktar xierqa biex timplimenta r-Riżerva tal-UE għaċ-Ċibersigurtà. Għalhekk il-Kummissjoni jenħtieġ li tinkariga lill-ENISA, parzjalment jew, meta l-Kummissjoni tqis li jkun xieraq, kompletament bil-funzjonament u l-amministrazzjoni tar-Riżerva tal-UE għaċ-Ċibersigurtà. L-inkarigu jenħtieġ li jitwettaq f’konformità mar-regoli applikabbli skont ir-Regolament (UE, Euratom) 2024/2509 u b’mod partikolari jenħtieġ li jkun soġġett li jiġu ssodisfati l-kundizzjonijiet rilevanti għall-iffirmar ta’ ftehim ta’ kontribuzzjoni. Kwalunkwe aspett tal-funzjonament u tal-amministrazzjoni tar-Riżerva tal-UE għaċ-Ċibersigurtà mhux fdat lill-ENISA jenħtieġ li jkun soġġett għal ġestjoni diretta mill-Kummissjoni, inkluż qabel ma jiġi ffirmat il-ftehim ta’ kontribuzzjoni.

(45)

L-Istati Membri jenħtieġ li jkollhom rwol ewlieni fil-kostituzzjoni, fl-implimentazzjoni u fil-perjodu ta’ wara l-implimentazzjoni tar-Riżerva tal-UE għaċ-Ċibersigurtà. Peress li r-Regolament (UE) 2021/694 huwa l-att bażiku rilevanti għall-azzjonijiet li jimplimentaw ir-Riżerva tal-UE għaċ-Ċibersigurtà, l-azzjonijiet fil-qafas tar-Riżerva tal-UE għaċ-Ċibersigurtà jenħtieġ li jiġu previsti fil-programmi ta’ ħidma msemmija fl-Artikolu 24 tar-Regolament (UE) 2021/694. Skont il-paragrafu 6 ta’ dak l-Artikolu, dawk il-programmi ta’ ħidma jenħtieġ li jiġu adottati mill-Kummissjoni permezz ta’ atti ta’ implimentazzjoni f’konformità mal-proċedura ta’ eżami. Barra minn hekk, il-Kummissjoni, f’koordinazzjoni mal-Grupp ta’ Kooperazzjoni tal-NIS, jenħtieġ li tiddetermina l-prijoritajiet u l-evoluzzjoni tar-Riżerva tal-UE għaċ-Ċibersigurtà.

(46)

Il-kuntratti stabbiliti fil-qafas tar-Riżerva tal-UE għaċ-Ċibersigurtà jenħtieġ li ma jaffettwawx ir-relazzjoni bejn in-negozji u l-obbligi li diġà jeżistu bejn l-entità affettwata jew l-utenti u l-fornitur tas-servizzi.

(47)

Għall-fini tal-għażla tal-fornituri privati tas-servizzi biex ifornu servizzi fil-kuntest tar-Riżerva tal-UE għaċ-Ċibersigurtà, jeħtieġ jiġi stabbilit sett ta’ kriterji u rekwiżiti minimi li jenħtieġ li jiġi inkluż fis-sejħa għall-offerti biex jintgħażlu dawk il-fornituri, biex ikun żgurat li jiġu ssodisfati l-ħtiġijiet tal-awtoritajiet tal-Istati Membri u tal-entitajiet li joperaw f’setturi ta’ kritiċità għolja u entitajiet li joperaw f’setturi kritiċi oħra. Sabiex jiġu indirizzati l-ħtiġijiet speċifiċi tal-Istati Membri, meta takkwista servizzi għar-Riżerva tal-UE għaċ-Ċibersigurtà, jenħtieġ li l-awtorità kontraenti, meta jkun xieraq, tiżviluppa kriterji u rekwiżiti tal-għażla addizzjonali għal dawk stabbiliti f’dan ir-Regolament. Huwa importanti li titħeġġeġ il-parteċipazzjoni ta’ fornituri iżgħar, attivi fil-livell reġjonali u lokali.

(48)

Meta tagħżel il-fornituri għall-inklużjoni fir-Riżerva tal-UE għaċ-Ċibersigurtà, l-awtorità kontraenti jenħtieġ li jkollha l-għan li tiżgura li r-Riżerva tal-UE għaċ-Ċibersigurtà, meta titqies kollha kemm hi, ikun fiha fornituri li jkunu kapaċi jakkomodaw ir-rekwiżiti lingwistiċi tal-utenti. Għal dak il-għan, l-awtorità kontraenti, qabel ma tħejji l-ispeċifikazzjonijiet tal-offerta, jenħtieġ li tinvestiga jekk l-utenti potenzjali tar-Riżerva tal-UE għaċ-Ċibersigurtà jkollhomx rekwiżiti lingwistiċi speċifiċi sabiex is-servizzi ta’ appoġġ tar-Riżerva jkunu jistgħu jiġu fornuti b’lingwa minn fost il-lingwi uffiċjali tal-istituzzjonijiet tal-Unjoni jew tal-Istati Membri, li x’aktarx tinftiehem mill-utent jew mill-entità affettwata. F’każ li aktar minn lingwa waħda tkun meħtieġa minn utent għall-forniment ta’ servizzi ta’ appoġġ tar-Riżerva tal-UE għaċ-Ċibersigurtà u li dawk is-servizzi jkunu ġew akkwistati f’dawk il-lingwi għal dak l-utent, l-utent jenħtieġ li, fit-talba għal appoġġ tar-Riżerva tal-UE għaċ-Ċibersigurtà, ikun jista’ jispeċifika f’liema minn dawk il-lingwi jenħtieġ li jiġu fornuti s-servizzi fir-rigward tal-inċident speċifiku li jwassal għat-talba.

(49)

Biex tappoġġa l-istabbiliment tar-Riżerva tal-UE għaċ-Ċibersigurtà, huwa importanti li l-Kummissjoni titlob lill-ENISA tħejji skema kandidata ta’ ċertifikazzjoni taċ-ċibersigurtà għal servizzi tas-sigurtà ġestiti skont ir-Regolament (UE) 2019/881 fl-oqsma koperti mill-Mekkaniżmu ta’ Emerġenza għaċ-Ċibersigurtà.

(50)

Biex jiġu appoġġati l-objettivi ta’ dan ir-Regolament tal-promozzjoni tal-għarfien sitwazzjonali kondiviż, it-tisħiħ tar-reżiljenza tal-Unjoni u l-iffaċilitar ta’ rispons effettiv għall-inċidenti taċ-ċibersigurtà sinifikanti u l-inċidenti taċ-ċibersigurtà fuq skala kbira, il-Kummissjoni jew l-EU-CyCLONe jenħtieġ li jkunu jistgħu jitolbu lill-ENISA, bl-appoġġ tan-network tas-CSIRTs u tal-approvazzjoni tal-Istati Membri kkonċernati, tirrieżamina u tivvaluta t-theddid ċibernetiku, il-vulnerabbiltajiet magħrufin sfruttabbli u l-azzjonijiet tal-mitigazzjoni fir-rigward ta’ xi inċident taċ-ċibersigurtà sinifikanti jew inċident taċ-ċibersigurtà fuq skala kbira speċifiku. Wara t-tlestija tar-rieżami u tal-valutazzjoni ta’ inċident, l-ENISA jenħtieġ li tħejji rapport tar-rieżami tal-inċident, b’kollaborazzjoni mal-Istat Membru kkonċernat, mal-partijiet ikkonċernati rilevanti, inkluż rappreżentanti mis-settur privat, mill-Kummissjoni u minn istituzzjonijiet, korpi, uffiċċji u aġenziji rilevanti oħra tal-Unjoni. Filwaqt li jibni fuq il-kollaborazzjoni mal-partijiet ikkonċernati, inkluż mis-settur privat, ir-rapport tar-rieżami tal-inċidenti speċifiċi jenħtieġ li jkollu l-għan li jivvaluta l-kawżi, l-impatt u l-mitigazzjoni tal-inċident, wara li jkun seħħ. Jenħtieġ li tingħata attenzjoni partikolari lill-kontribut u lit-tagħlimiet kondiviżi mill-fornituri tas-servizzi tas-sigurtà ġestiti li jissodisfaw il-kundizzjonijiet tal-ogħla integrità professjonali, tal-imparzjalità u tal-għarfien espert tekniku kif meħtieġ skont dan ir-Regolament. Ir-rapport jenħtieġ li jintbagħat lill-EU-CyCLONe, lin-network tas-CSIRTs u lill-Kummissjoni u jenħtieġ li jintuża għall-ħidma tagħhom kif ukoll għall-ħidma tal-ENISA. Meta l-inċident ikun relatat ma’ pajjiż terz assoċjat mad-DEP, il-Kummissjoni jenħtieġ ukoll li tforni r-rapport lir-Rappreżentant Għoli.

(51)

Filwaqt li titqies in-natura imprevedibbli tal-attakki ċibernetiċi u l-fatt li dawn spiss ma jkunux f’xi żona ġeografika speċifika, u jkunu jippreżentaw riskju għoli ta’ tixrid, it-tisħiħ tar-reżiljenza tal-pajjiżi ġirien u tal-kapaċità tagħhom li jirrispondu b’mod effettiv għall-inċidenti taċ-ċibersigurtà sinifikanti u inċidenti taċ-ċibersigurtà fuq skala kbira jgħin għall-protezzjoni tal-Unjoni kollha kemm hi, u b’mod partikolari is-suq intern u l-impriżi tagħha. Tali attivitajiet jenħtieġ li jikkontribwixxu aktar għad-diplomazija ċibernetika tal-Unjoni. Għaldaqstant, il-pajjiżi terzi assoċjati mad-DEP jistgħu jiġu appoġġati mir-Riżerva tal-UE għaċ-Ċibersigurtà, fit-territorji kollha tagħhom jew f’parti minnhom, meta dan ikun previst fil-ftehim li permezz tiegħu l-pajjiż terz ikun assoċjat mad-DEP. Il-finanzjament għal pajjiżi terzi assoċjati mad-DEP jenħtieġ li jiġi appoġġat mill-Unjoni fil-qafas ta’ sħubijiet u strumenti tal-finanzjament rilevanti għal dawk il-pajjiżi. L-appoġġ jenħtieġ li jkopri s-servizzi fil-qasam tar-rispons għall-inċidenti taċ-ċibersigurtà sinifikanti jew inċidenti taċ-ċibersigurtà fuq skala ekwivalenti għal skala kbira, u l-irkupru inizjali minnhom.

(52)

Il-kundizzjonijiet stabbiliti għar-Riżerva tal-UE għaċ-Ċibersigurtà u għall-fornituri fdati ta’ servizzi tas-sigurtà ġestiti f’dan ir-Regolament jenħtieġ li japplikaw meta jingħata l-appoġġ lill-pajjiżi terzi assoċjati mad-DEP. Il-pajjiżi terzi assoċjati mad-DEP jenħtieġ li jkunu jistgħu jitolbu appoġġ mir-Riżerva tal-UE għaċ-Ċibersigurtà meta l-entitajiet fil-mira u li għalihom jitolbu appoġġ mir-Riżerva tal-UE għaċ-Ċibersigurtà jkunu entitajiet li joperaw f’setturi ta’ kritiċità għolja jew entitajiet li joperaw f’setturi kritiċi oħra u meta l-inċidenti identifikati jwasslu għal tfixkil operazzjonali sinifikanti jew jista’ jkollhom effetti konsegwenzjali fl-Unjoni. Il-pajjiżi terzi assoċjati mad-DEP jenħtieġ li jkunu eliġibbli biss li jirċievu appoġġ meta l-ftehim li permezz tiegħu jkunu assoċjati mad-DEP jipprevedi speċifikament tali appoġġ. Barra minn hekk, tali pajjiżi terzi jenħtieġ li jibqgħu eliġibbli biss sakemm jiġu ssodisfati tliet kriterji. L-ewwel nett, il-pajjiż terz jenħtieġ li jkun jikkonforma bis-sħiħ mat-termini rilevanti ta’ dak il-ftehim. It-tieni, minħabba n-natura komplementari tar-Riżerva tal-UE għaċ-Ċibersigurtà, il-pajjiż terz jenħtieġ li jkun ħa passi adegwati biex iħejji għal inċidenti taċ-ċibersigurtà sinifikanti jew inċidenti taċ-ċibersigurtà fuq skala ekwivalenti għal skala kbira. It-tielet, il-forniment ta’ appoġġ mir-Riżerva jenħtieġ li jkun konsistenti mal-politika tal-Unjoni fil-konfront tar-relazzjonijiet ma’ dak il-pajjiż, anki fuq livell ġenerali, u mal-politiki l-oħra tal-Unjoni fil-qasam tas-sigurtà. Fil-kuntest tal-valutazzjoni tagħha dwar il-konformità ma’ dak it-tielet kriterju, jenħtieġ li l-Kummissjoni tikkonsulta lir-Rappreżentant Għoli għall-allinjament tal-għoti ta’ tali appoġġ mal-politika estera u ta’ sigurtà komuni.

(53)

Il-forniment ta’ appoġġ lil pajjiżi terzi assoċjati mad-DEP jista’ jaffettwa r-relazzjonijiet ma’ pajjiżi terzi u l-politika ta’ sigurtà tal-Unjoni, inkluż fil-kuntest tal-politika estera u ta’ sigurtà komuni u l-politika ta’ difiża u ta’ sigurtà komuni. Għaldaqstant, huwa xieraq li l-Kunsill jingħata setgħat ta’ implimentazzjoni biex jawtorizza u jispeċifika l-perjodu li matulu jista’ jiġi fornut tali appoġġ. Il-Kunsill jenħtieġ li jaġixxi abbażi ta’ proposta tal-Kummissjoni, filwaqt li titqies kif xieraq il-valutazzjoni tal-Kummissjoni tat-tliet kriterji. L-istess jenħtieġ li japplika għat-tiġdid u għall-proposti li jemendaw jew jirrevokaw tali atti. Meta, f’ċirkostanzi eċċezzjonali, il-Kunsill iqis li kien hemm bidla sinifikanti fiċ-ċirkostanzi fir-rigward tat-tielet kriterju, il-Kunsill jenħtieġ li jkun jista’ jaġixxi fuq l-inizjattiva tiegħu stess biex jemenda jew jirrevoka att ta’ implimentazzjoni mingħajr ma jistenna proposta mill-Kummissjoni. Tali bidliet sinifikanti aktarx li jirrikjedu azzjoni urġenti, li jkollhom implikazzjonijiet partikolarment importanti għar-relazzjonijiet ma’ pajjiżi terzi, u li ma jirrikjedux valutazzjoni dettaljata minn qabel mill-Kummissjoni. Barra minn hekk, jenħtieġ li l-Kummissjoni tikkoopera mar-Rappreżentant Għoli fir-rigward ta’ tali talbiet għal appoġġ minn pajjiżi terzi assoċjati mad-DEP u l-implimentazzjoni ta’ appoġġ mogħti lil tali Stati Membri. Il-Kummissjoni jenħtieġ li tqis ukoll eventwali fehmiet fornuti mill-ENISA fir-rigward ta’ tali talbiet u appoġġ. Il-Kummissjoni jenħtieġ li tinforma lill-Kunsill dwar l-eżitu tal-valutazzjoni tat-talbiet, inkluż il-kunsiderazzjonijiet rilevanti magħmula f’dak ir-rigward, u s-servizzi użati.

(54)

Il-komunikazzjoni tal-Kummissjoni tat-18 ta’ April 2023 dwar l-Akkademja għall-Ħiliet fiċ-Ċibersigurtà rrikonoxxiet in-nuqqas ta’ professjonisti bil-ħiliet meħtieġa. Tali ħiliet huma meħtieġa biex jintlaħqu l-objettivi ta’ dan ir-Regolament. L-Unjoni teħtieġ b’mod urġenti professjonisti bil-ħiliet u l-kompetenzi biex jipprevjenu, jidentifikaw u jiskoraġġixxu l-attakki ċibernetiċi u jiddefendu lill-Unjoni, inkluż l-infrastrutturi l-aktar kritiċi tagħha, kontra tali attakki u jiżguraw ir-reżiljenza tagħha. Għal dak il-għan, huwa importanti li titħeġġeġ il-kooperazzjoni fost il-partijiet ikkonċernati, inkluż mis-settur privat, l-akkademja u s-settur pubbliku. Huwa daqstant importanti li jinħolqu sinerġiji, fit-territorji kollha tal-Unjoni, fir-rigward tal-investiment fl-edukazzjoni u fit-taħriġ sabiex jiġi promoss il-ħolqien ta’ salvagwardji biex jiġu evitati l-eżodu ta’ mħuħ u t-tkabbir tad-distakk fil-ħiliet f’ċerti reġjuni aktar minn f’reġjuni oħra. Hemm bżonn urġenti li jingħalaq id-distakk fil-ħiliet taċ-ċibersigurtà, b’enfasi partikolari fuq it-tnaqqis fid-differenza bejn il-ġeneri fil-forza tax-xogħol fil-qasam taċ-ċibersigurtà biex jiġu promossi l-preżenza u l-parteċipazzjoni tan-nisa fit-tfassil tal-governanza diġitali.

(55)

Sabiex tingħata spinta lill-innovazzjoni fis-Suq Uniku Diġitali, it-tisħiħ tar-riċerka u l-innovazzjoni fiċ-ċibersigurtà huwa importanti biex jingħata kontribut għaż-żieda fir-reżiljenza tal-Istati Membri u l-awtonomija strateġika miftuħa tal-Unjoni, li t-tnejn li huma huma objettivi ta’ dan ir-Regolament. Is-sinerġiji huma essenzjali biex jissaħħu l-kooperazzjoni u l-koordinazzjoni fost il-partijiet ikkonċernati differenti, fosthom mis-settur privat, is-soċjetà ċivili u l-akkademja.

(56)

Dan ir-Regolament jenħtieġ li jikkontribwixxi għall-impenn stabbilit fid-Dikjarazzjoni Konġunta tas-26 ta’ Jannar 2022 tal-Parlament, il-Kunsill u l-Kummissjoni intitolata “Dikjarazzjoni Ewropea dwar id-Drittijiet u l-Prinċipji Diġitali għad-Deċennju Diġitali” li tipproteġi l-interessi tad-demokraziji, tal-popli, tan-negozji u tal-istituzzjonijiet pubbliċi tal-Unjoni kontra r-riskji ċibernetiċi u ċ-ċiberkriminalità inkluż il-ksur tad-data u s-serq jew il-manipulazzjoni tal-identità.

(57)

Sabiex jiġu ssumplimentati ċerti elementi mhux essenzjali ta’ dan ir-Regolament, jenħtieġ li s-setgħa li jiġu adottati atti skont l-Artikolu 290 tat-TFUE tiġi ddelegata lill-Kummissjoni biex tispeċifika t-tipi u l-għadd ta’ servizzi ta’ rispons meħtieġa għar-Riżerva tal-UE għaċ-Ċibersigurtà. Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta’ tħejjija, inkluż fil-livell ta’ esperti, u li dawk il-konsultazzjonijiet jiġu mwettqa f’konformità mal-prinċipji stipulati fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (20). B’mod partikolari, sabiex tiġi żgurata parteċipazzjoni ugwali fit-tħejjija ta’ atti delegati, jenħtieġ li l-Parlament Ewropew u l-Kunsill jirċievu d-dokumenti kollha fl-istess ħin li jirċivuhom l-esperti tal-Istati Membri, u l-esperti tagħhom sistematikament ikollhom aċċess għal-laqgħat tal-gruppi ta’ esperti tal-Kummissjoni li jittrattaw it-tħejjija ta’ atti delegati.

(58)

Sabiex ikunu żgurati kundizzjonijiet uniformi għall-implimentazzjoni ta’ dan ir-Regolament, jenħtieġ li l-Kummissjoni tingħata setgħat ta’ implimentazzjoni biex tispeċifika ulterjorment l-arranġamenti proċedurali dettaljati għall-allokazzjoni tas-servizzi ta’ appoġġ tar-Riżerva tal-UE għaċ-Ċibersigurtà. Jenħtieġ li dawk is-setgħat jiġu eżerċitati f’konformità mar-Regolament (UE) Nru 182/2011 tal-Parlament Ewropew u tal-Kunsill (21).

(59)

Mingħajr preġudizzju għar-regoli relatati mal-baġit annwali tal-Unjoni skont it-Trattati, il-Kummissjoni jenħtieġ li tqis l-obbligi li jirriżultaw minn dan ir-Regolament meta tivvaluta l-ħtiġijiet tal-ibbaġitjar u tal-persunal tal-ENISA.

(60)

Jenħtieġ li l-Kummissjoni twettaq evalwazzjoni tal-miżuri stabbiliti f’dan ir-Regolament fuq bażi regolari. L-ewwel tali evalwazzjoni jenħtieġ li ssir fl-ewwel sentejn wara d-data tad-dħul fis-seħħ ta’ dan ir-Regolament u mill-anqas kull 4 snin wara, filwaqt li jitqies iż-żmien tar-reviżjoni tal-qafas finanzjarju pluriennali stabbilit skont l-Artikolu 312 TFUE. Jenħtieġ li l-Kummissjoni tippreżenta rapport dwar il-progress li jkun sar lill-Parlament Ewropew u lill-Kunsill. Sabiex tivvaluta l-elementi differenti meħtieġa, inkluż il-firxa ta’ informazzjoni kondiviża fis-Sistema Ewropea ta’ Allert għaċ-Ċibersigurtà, jenħtieġ li l-Kummissjoni tibbaża ruħha esklużivament fuq informazzjoni li tkun faċilment disponibbli jew fornuta b’mod volontarju. Filwaqt li jitqiesu l-iżviluppi ġeopolitiċi u sabiex jiġu żgurati l-kontinwità u l-iżvilupp ulterjuri tal-miżuri stabbiliti f’dan ir-Regolament lil hinn mill-2027, huwa importanti li l-Kummissjoni tivvaluta l-bżonn li jiġi allokat baġit xieraq fil-qafas finanzjarju pluriennali għall-perjodu 2028-2034.

(61)

Minħabba li l-objettivi ta' dan ir-Regolament, jiġifieri li tiġi rinfurzata l-pożizzjoni kompetittiva tal-industrija u tas-servizzi fl-Unjoni fl-ekonomija diġitali u jsir kontribut għas-sovrenità teknika u l-awtonomija strateġika miftuħa tal-Unjoni fil-qasam taċ-ċibersigurtà ma jistgħux jinkisbu b'mod suffiċjenti mill-Istati Membri iżda jistgħu pjuttost, minħabba l-iskala jew l-effetti tal-azzjoni, jinkisbu aħjar fil-livell tal-Unjoni, l-Unjoni tista' tadotta miżuri, f'konformità mal-prinċipju ta’ sussidjarjetà kif stabbilit fl-Artikolu 5 TUE. F'konformità mal-prinċipju ta’ proporzjonalità kif stabbilit f'dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkisbu dawk l-objettivi,