(1)

Le Rialachán (AE) 2024/903 tugadh isteach na boscaí gainimh rialála idir-inoibritheachta mar bheart tacaíochta nuálaíochta chun feabhas a chur ar fhorbairt réiteach idir-inoibritheachta nuálach agus ar idir-inoibritheacht trasteorann seirbhísí poiblí digiteacha tras-Eorpacha.

(2)

Chun aghaidh a thabhairt ar na riachtanais shonracha nuálaíochta trasteorann agus a bhaineann le hidir-inoibritheacht atá ag údaráis earnála poiblí, féadfaidh comhlachtaí earnála poiblí nó eintitis de chuid an Aontais bosca gainimh rialála idir-inoibritheachta a bhunú de bhun Airteagal 11 de Rialachán (AE) 2024/903. Is fóraim iad boscaí gainimh rialála idir-inoibritheachta chun foghlaim rialála a chruthú atá bunaithe ar shonraí a thagann ó thionscadail spriocdhírithe atá dírithe ar réitigh idir-inoibritheachta nuálacha a fhorbairt, a oiliúint, a thástáil nó a bhailíochtú. Maidir le réitigh idir-inoibritheachta, d’fhéadfadh baint a bheith ag an nuálaíocht sin le gach sraith idir-inoibritheachta (dlíthiúil, eagraíochtúil, séimeantach nó teicniúil), i gcás inar féidir a mheas faoin eilimint nuálach sin go bhfuil ní éigin nua á thabhairt isteach nó go bhfuil ní éigin atá feabhsaithe go mór á thabhairt isteach. Chun measúnú a dhéanamh ar cé acu atá nó nach bhfuil ní éigin nua nó feabhsaithe, tá an comhthéacs ábhartha mar go bhféadfadh rud atá nuálach in earnáil nó i mBallstát amháin a bheith coitianta in earnáil nó i mBallstát eile. Is féidir leis na boscaí gainimh rialála idir-inoibritheachta caoi a thabhairt chun triail a bhaint as raon leathan réiteach idir-inoibritheachta nuálach atá in ann tacú ar bhealach níos fearr le hidir-inoibritheacht trasteorann seirbhísí poiblí. Forbraíonn bosca gainimh rialála idir-inoibritheachta bunaithe ar cheisteanna rialála oscailte, go háirithe i gcomhthéacsanna trasteorann a phléitear leis na rialtóirí ábhartha a d’fhéadfadh teacht ó earnálacha éagsúla, ó leibhéil riaracháin éagsúla agus ó Bhallstáit éagsúla. I gcás nach bhfuil gá ach le turgnamhaíocht theicniúil, d’fhéadfadh turgnamhaíocht den sórt sin tarlú ar bhealaí eile, amhail binsí tástála nó saotharlanna nuálaíochta, agus níl bosca gainimh rialála idir-inoibritheachta ag teastáil. I gcomhréir le hAirteagal 11(4) de Rialachán (AE) 2024/903, is éard atá i mboscaí gainimh rialála idir-inoibritheachta, mar réamhshocrú, iarrachtaí comhpháirteacha roinnt eintiteas de chuid an Aontais agus/nó comhlachtaí earnála poiblí a oibríonn le chéile i dtreo níos mó deimhneachta dlíthiúla faoi chuimsiú bosca gainimh rialála idir-inoibritheachta. Sa chiall sin, bunaítear boscaí gainimh rialála idir-inoibritheachta trí chomhaontuithe sonracha idir na heintitis chomhoibritheacha éagsúla (amhail Meabhrán Tuisceana). Is féidir leis an gcomhar laistigh de na boscaí gainimh rialála idir-inoibritheachta cur leis na sásraí comhair trasteorann atá ann cheana. Ar an gcúis sin, is féidir le comhlachtaí earnála poiblí nó eintitis de chuid an Aontais atá i gcuibhreannas (e.g. Cuibhreannas don Bhonneagar Digiteach Eorpach nó Grúpáil Eorpach um Chomhar Críochach) bosca gainimh rialála idir-inoibritheachta a bhunú freisin.

(3)

Chun an nuálaíocht a chothú, tá roinnt boscaí gainimh rialála náisiúnta agus uile-Aontais bunaithe nó tá siad á mbunú faoi ionstraimí reachtacha éagsúla de chuid an Aontais, amhail Bosca Gainimh Rialála Blocshlabhra an Aontais, bunú boscaí gainimh rialála intleachta saorga faoi Rialachán (AE) 2024/1689 ó Pharlaimint na hEorpa agus ón gComhairle (2), agus bunú na mboscaí gainimh rialála glan-nialasachta chun nuálaíocht a chur chun cinn i réimse na dteicneolaíochtaí glan-nialasachta faoi Rialachán (AE) 2024/1735 ó Pharlaimint na hEorpa agus ón gComhairle (3) ach gan bheith teoranta dóibh sin. Cé go bhféadfadh roinnt boscaí gainimh rialála a bheith earnálach, díríonn na boscaí gainimh rialála idir-inoibritheachta arna mbunú faoi Rialachán (AE) 2024/903 go sonrach ar réitigh nuálacha le haghaidh seirbhísí poiblí digiteacha Tras-Eorpacha. Chun ailíniú le cuspóirí Rialachán (AE) 2024/903 a áirithiú, ní mór do na boscaí gainimh sin critéir shonracha a chomhlíonadh. Feidhmíonn na critéir sin chun a chinneadh cé na boscaí gainimh rialála a bheidh le feiceáil ar an Tairseach um Eoraip Idir-inoibritheach agus a ndéanfaidh an Bord um Eoraip Idir-inoibritheach, arna bhunú i gcomhréir le hAirteagal 15 de Rialachán (AE) 2024/903, faireachán orthu. Na seicliostaí dá bhforáiltear san Iarscríbhinn a ghabhann leis an Rialachán sin agus leis na treoirlínte agus na soiléirithe a fhéadfaidh an Coimisiún a eisiúint i gcomhréir le hAirteagal 11(3) de Rialachán (AE) 2024/903, tacaíonn siad le comhlachtaí earnála poiblí agus le heintitis an Aontais measúnú a dhéanamh ar a gcomhlíontacht leis na critéir sin. Cuireann sé sin ar a chumas don Choimisiún a chúram a chomhlíonadh faoi Airteagal 12(9) de Rialachán (AE) 2024/903 maidir lena áirithiú go mbeidh faisnéis maidir leis na boscaí gainimh rialála idir-inoibritheachta ar fáil ar an tairseach um Eoraip Idir-inoibritheach. Ní hionann boscaí gainimh rialála idir-inoibritheachta a bheith á seiceáil agus á n-údarú ag an gCoimisiún agus measúnú ar dhlíthiúlacht ghníomhaíochtaí na rannpháirtithe laistigh de na boscaí gainimh sin. Leanfaidh na rannpháirtithe uile de bheith faoi dhliteanas iomlán as a gcuid gníomhaíochtaí mar a leagtar amach in Airteagal 12(5) de Rialachán (AE) 2024/903. Ní dhéanfar difear do chumhachtaí maoirseachta agus ceartaitheacha na n-údarás inniúil ar na boscaí gainimh sin, i gcomhréir le hAirteagal 12(4) de Rialachán (AE) 2024/903.

(4)

Cé gur féidir le boscaí gainimh rialála idir-inoibritheachta fóram a sholáthar le haghaidh cineálacha éagsúla comhair idir na comhordaitheoirí bosca gainimh rialála idir-inoibritheachta, na rialtóirí faoi seach agus gníomhaithe eile, is é is cuspóir don chomhaontú sonrach lena mbunaítear an bosca gainimh rialála idir-inoibritheachta na modhanna oibre atá beartaithe idir na comhordaitheoirí bosca gainimh rialála idir-inoibritheachta agus gníomhaithe eile a leagan amach go soiléir. Sa chomhaontú sonrach, ba cheart go gcuirfí faoi deara dó a bheith trédhearcach maidir leis an gcineál gníomhaithe eile atá incháilithe chun páirt a ghlacadh sa bhosca gainimh rialála idir-inoibritheachta, agus ba cheart a shonrú ann cén pointe i saolré an bhosca gainimh rialála idir-inoibritheachta ar féidir leo a bheith rannpháirteach agus na coinníollacha a bhaineann leis sin. Tá gá leis sin chun cosc a chur ar aon tosca díobhálacha ar chuspóirí an bhosca gainimh rialála idir-inoibritheachta. Leis an gcomhaontú sonrach lena mbunaítear an bosca gainimh rialála idir-inoibritheachta, ba cheart trédhearcacht a chruthú freisin maidir leis na hidirghníomhaíochtaí atá beartaithe le gníomhaithe a chaithfidh a bheith rannpháirteach sa phróiseas de bhun an dlí is infheidhme, amhail Airteagal 11(1) de Rialachán (AE) 2024/903, lena bhforáiltear go bhfuil boscaí gainimh rialála idir-inoibritheachta lena mbaineann próiseáil sonraí pearsanta le hoibriú faoi mhaoirseacht na n-údarás náisiúnta cosanta sonraí nó an Mhaoirseora Eorpaigh ar Chosaint Sonraí. Braitheann rannpháirtíocht riachtanach na n-údarás maoirseachta um chosaint sonraí ar thosca éagsúla ar nós castacht na n-oibríochtaí próiseála sonraí sna tionscadail atá beartaithe sa bhosca gainimh rialála idir-inoibritheachta, catagóirí agus méid na sonraí lena mbaineann chomh maith leis na rioscaí a bhaineann leis an bpróiseáil. Ba cheart oibriú na mboscaí gainimh rialála idir-inoibritheachta faoi mhaoirseacht na n-údarás cosanta sonraí, i gcás ina mbaineann próiseáil sonraí pearsanta leis na boscaí gainimh rialála idir-inoibritheachta, a thuiscint mar chúram breise ar na húdaráis cosanta sonraí, a thugtar dóibh le Rialachán (AE) 2024/903, agus mar choinníoll le haghaidh oibriú cuí na mboscaí gainimh rialála idir-inoibritheachta. Tar éis dlí an Aontais maidir le cosaint sonraí a chur i bhfeidhm maidir le haon phróiseáil sonraí pearsanta i gcomhthéacs chur chun feidhme Rialachán (AE) 2024/903, ba cheart na hacmhainní is gá a sholáthar d’údaráis cosanta sonraí chun a gcúraimí nua a chomhlíonadh. I gcás ina mbeidh údaráis cosanta sonraí ó Bhallstáit éagsúla agus ó leibhéal an Aontais rannpháirteach sa bhosca gainimh rialála idir-inoibritheachta, is féidir le comhar na n-údarás sin cur leis na sásraí faoi seach freisin, dá dtagraítear in Airteagal 61 de Rialachán (AE) 2016/679 ó Pharlaimint na hEorpa agus ón gComhairle (4), in Airteagail 61 agus 62 de Rialachán (AE) 2018/1725 ó Pharlaimint na hEorpa agus ón gComhairle (5).

(5)

Chun a áirithiú go mbeidh rannpháirtíocht sna boscaí gainimh rialála idir-inoibritheachta bunaithe ar phlean sonrach i gcomhréir le hAirteagal 12(3) de Rialachán (AE) 2024/903, ba cheart do na comhordaitheoirí bosca gainimh rialála tionscadal oiriúnach amháin nó níos mó a roghnú agus a áirithiú go mbunófar plean sonrach do gach ceann díobh, ina mbeidh na eilimintí uile a leagtar amach in Airteagal 12(3) de Rialachán (AE) 2024/903. Cé acu a fhorbraíonn nó nach bhforbraíonn na comhordaitheoirí bosca gainimh rialála idir-inoibritheachta, nó gníomhaithe eile a dtugann siad cuireadh dóibh, an plean sonrach maidir leis na tionscadail atá ar siúl sna boscaí gainimh rialála idir-inoibritheachta, beidh sé sin ag brath ar an struchtúr rialachais a úsáidtear don bhosca gainimh rialála idir-inoibritheachta. An rud ba cheart do na comhordaitheoirí bosca gainimh rialála a bhunú go soiléir le linn shaolré an bhosca gainimh rialála idir-inoibritheachta, is ea conas a chuirfidh na táirgí insoláthartha sonracha le cuspóirí foghlama rialála an bhosca gainimh rialála idir-inoibritheachta.

(6)

Chun tacú leis na cuspóirí sin, foráiltear le hAirteagal 11(3) de Rialachán (AE) 2024/903 go bhféadfaidh an Coimisiún treoirlínte agus soiléirithe a eisiúint. Cruthóidh an Coimisiún comhéadan tiomnaithe le haghaidh faisnéis maidir leis na boscaí gainimh rialála idir-inoibritheachta, lena gcuirfear ar fáil don phobal sonraí ábhartha maidir leis na boscaí gainimh rialála idir-inoibritheachta atá bunaithe agus na tionscadail atá ar siúl laistigh den bhosca gainimh rialála idir-inoibritheachta. Chun rochtain leathan chothrom ar na boscaí gainimh rialála idir-inoibritheachta a chur chun cinn, ba cheart rochtain réidh ar fhaisnéis maidir le conas bosca gainimh rialála idir-inoibritheachta a bhunú a bheith ar fáil go héasca do na comhordaitheoirí bosca gainimh rialála a d’fhéadfadh a bheith ann ar an Tairseach um Eoraip Idir-inoibritheach i gcomhréir le hAirteagal 12(9) de Rialachán (AE) 2024/903. Is féidir leis an Tairseach um Eoraip Idir-inoibritheach líonrú páirtithe leasmhara ar spéis leo bosca gainimh rialála idir-inoibritheachta a bhunú nó páirt a ghlacadh ann a éascú freisin. Beidh an Tairseach ina huirlis ríthábhachtach freisin chun torthaí foghlama rialála éifeachtacha a áirithiú. Foilseofar tuarascálacha deiridh agus léargais rialála ghaolmhara anseo, chomh maith leis na moltaí gaolmhara ón mBord um Eoraip Idir-inoibritheach.

(7)

Chun freastal ar na riachtanais shonracha a bhaineann le réitigh idir-inoibritheachta nuálacha a fhorbairt, a oiliúint, a thástáil agus a bhailíochtú, sa bhosca gainimh rialála idir-inoibritheachta, féadfar daoine nádúrtha nó dlítheanacha eile a áireamh ar chomhordaitheoirí bosca gainimh rialála, ar nós gníomhaithe eile san earnáil phoiblí, eintitis de chuid an Aontais, institiúidí taighde, gníomhaithe GovTech lena n-áirítear FBManna agus gnólachtaí nuathionscanta, gníomhaithe ó éiceachóras nuálaíochta IS, ar choinníoll go gcomhlíonann siad na critéir a shonraítear in Airteagal 12(1) de Rialachán (AE) 2024/903. Ní bhaineann athruithe ar fhreagrachtaí na gcomhordaitheoirí bosca gainimh rialála idir-inoibritheachta leis sin, ná athruithe ar fhreagrachtaí na rannpháirtithe ar cheart dóibh seasamh le coinníollacha sonracha an chomhaontaithe ar dhul isteach i mbosca gainimh rialála idir-inoibritheachta dóibh. Is é is cuspóir do ghníomhaithe GovTech a shonraítear in Airteagal 12(1) idirphlé rialála níos saibhre laistigh den bhosca gainimh rialála idir-inoibritheachta a chumasú, lena ndéanfar comhroinnt na gceachtanna a foghlaimíodh a éascú agus an méid a foghlaimíodh ó thurgnamhaíocht nuálaíochta, ó rioscaí agus ó dhea-chleachtais maidir le caighdeánú a shainaithint. D’fhéadfadh rannpháirtíocht na ngníomhaithe eile sin sa bhosca gainimh rialála idir-inoibritheachta cuidiú freisin le léargas agus rochtain earnáilsonrach a fháil ó shaoráidí tástála agus turgnamhaíochta agus ó na Moil Nuálaíochta Digití Eorpacha. Is féidir le cuir chuige nuálacha soláthair oibriú go sineirgisteach le boscaí gainimh rialála idir-inoibritheachta agus tacú leo trí rochtain thráthúil ar acmhainní, ar shaineolas agus ar theicneolaíochtaí a chumasú le haghaidh turgnamhaíocht rialaithe. Áirithítear leis sin an tsolúbthacht is gá chun réitigh nuálacha a thástáil agus, an tráth céanna, a bheith ailínithe le spriocanna rialála.

(8)

Chun a áirithiú go n-urramóidh gach tionscadal a chuirtear ar siúl sna boscaí gainimh rialála idir-inoibritheachta príobháideachas sonraí, ní mór do na comhordaitheoirí bosca gainimh rialála agus do na gníomhaithe eile cur chuige dea-shainithe a leagan amach i leith tuilleadh próiseála a dhéanamh ar shonraí pearsanta sa bhosca gainimh rialála idir-inoibritheachta, is é sin le rá, sonraí pearsanta a bailíodh go dleathach ar dtús chun críoch eile. Ba cheart an cur chuige sin a bheith i gcomhréir leis na ceanglais uile a leagtar amach i Rialachán (AE) 2024/903 agus le gach oibleagáid eile de bhun dhlí an Aontais maidir le cosaint sonraí. Maidir le bunú an bhosca gainimh rialála idir-inoibritheachta, ba cheart é a bheith sonraithe sa chomhaontú sonrach mar atá, i gcás inarb iomchuí, na heilimintí a leagtar amach in Airteagal 11(4) de Rialachán (AE) 2024/903. Ba cheart a áirithiú sa chur chuige sin, go dtugtar aird ar leith ar chur chuige ordlathach a leanúint maidir le húsáid sonraí pearsanta, go mbeidh na sonraí a phróiseáiltear teoranta don mhéid is gá d’fheidhmiú an réitigh idir-inoibritheachta atá le forbairt nó le tástáil sa bhosca gainimh rialála idir-inoibritheachta, agus nach féidir an feidhmiú sin a bhaint amach go héifeachtach trí phróiseáil a dhéanamh ar shonraí anaithnidithe, ar shonraí sintéiseacha nó ar shonraí neamhphearsanta eile, mar a leagtar amach in Airteagal 12(6)(b) de Rialachán (AE) 2024/903. I gcás ina bhféadfadh tátail nua a bhaint maidir le hábhair sonraí gheall ar phróiseáil sonraí pearsanta, ní mór do chomhordaitheoirí bosca gainimh rialála agus freisin do na gníomhaithe eile atá rannpháirteach sa bhosca gainimh rialála idir-inoibritheachta bunús dlí bailí a léiriú maidir le húsáid oibríochtúil thorthaí an bhosca gainimh. Áireofar an bunús dlí sin sa phlean sonrach de bhun Airteagal 12(3)(g) de Rialachán (AE) 2024/903, agus ní mór na coinníollacha uile faoi Airteagal 12(6) a chomhlíonadh. Gan bunús dlí den sórt sin, ní féidir sonraí pearsanta oibríochtúla ón mbosca gainimh a phróiseáil a thuilleadh. Cuirtear cosc leis an teorannú sin ar bhoscaí gainimh rialála idir-inoibritheachta a úsáid go príomha le haghaidh malartú sonraí nó comparáid sonraí idir údaráis gan foras dlíthiúil cuí.

(9)

Tá cur chuige struchtúrtha maidir le meastóireacht agus faireachán fíor-riachtanach chun timpeallacht shábháilte tháirgiúil a chothú don nuálaíocht, agus cuntasacht agus sláine rialála a choinneáil ar bun laistigh den bhosca gainimh rialála idir-inoibritheachta an tráth céanna. Chun na críche sin, de bhun Airteagal 12(8) de Rialachán (AE) 2024/903, ní mór do chomhordaitheoirí bosca gainimh rialála tuarascálacha tráthrialta a sholáthar don Choimisiún agus don Bhord um Eoraip Idir-inoibritheach ina mbeidh achoimre ar dhul chun cinn, ar thorthaí agus ar dhúshláin. Ba cheart a chumhdach leis an tuairisciú freisin an mheastóireacht ar ghnéithe cáilíochta sonraí, ar nós cruinneas agus cothroime measúnuithe, sonraí, nó tátail a ghintear le linn oibriú an bhosca gainimh. Tá an mheastóireacht sin ríthábhachtach chun iontaofacht aschuir an bhosca gainimh atá le húsáid go hoibríochtúil a áirithiú (e.g. chun calaois a bhrath, fóirdheontais a leithdháileadh, nó stádas sibhialta a chlárú). Is féidir turgnamhaíocht i mboscaí gainimh rialála idir-inoibritheachta caoi a thabhairt freisin chun meastóireacht a dhéanamh ar inbhuanaitheacht, ar éifeachtúlacht fuinnimh agus éifeachtúlacht acmhainní na réiteach idir-inoibritheachta nuálach arna bhforbairt, arna n-oiliúint, arna dtástáil nó arna mbailíochtú i gcomhthéacs an bhosca gainimh rialála idir-inoibritheachta. Chun formhaoirseacht leanúnach a áirithiú, ba cheart go gceanglófaí leis an bpróiseas sásra a bhunú chun sonraí a bhailiú go leanúnach ó thionscadail aonair, rud a d’fhágfadh go bhféadfaí rianú tráthrialta a dhéanamh ar dhul chun cinn, ar bhainistiú riosca, agus ar chaighdeáin an bhosca gainimh a chomhlíonadh. Is féidir le teimpléid agus samplaí arna soláthar ag an gCoimisiún agus atá ar fáil ar an Tairseach um Eoraip Idir-inoibritheach tacú amach anseo le cuíchóiriú an tuairiscithe, chun é a dhéanamh níos éasca do gach páirtí torthaí na mboscaí gainimh rialála idir-inoibritheachta a líonadh isteach agus a thuiscint.

(10)

D’fhéadfadh sé gur ghá an comhaontú sonrach maidir leis na boscaí gainimh rialála idir-inoibritheachta a athnuachan i gcás athruithe substaintiúla ar an gcomhaontú sonrach bunaidh. Féadfar a áireamh ar na hathruithe sin, i measc athruithe eile, modhnuithe maidir le líon agus céannacht na gcomhordaitheoirí bosca gainimh rialála, nó síneadh a chur leis an tráthchlár a comhaontaíodh ar dtús agus atá riachtanach chun cuspóirí an bhosca gainimh a bhaint amach.

(11)

I gcás inar leor an fhianaise a soláthraíodh leis an idirphlé rialála agus leis an turgnamhaíocht sna boscaí gainimh rialála idir-inoibritheachta maidir le húsáid shábháilte réitigh idir-inoibritheachta, ba cheart na réitigh idir-inoibritheachta sin a roinnt tríd an tairseach um Eoraip Idir-inoibritheach, i gcás inarb infheidhme, lena ngabhann téarmaí ceadúnaithe neamhshriantacha, amhail Ceadúnas Poiblí an Aontais Eorpaigh (EUPL), i gcomhréir le hAirteagal 4 de Rialachán (AE) 2024/903).

(12)

Ba cheart maolú leordhóthanach a bheith mar thoradh ar aon riosca mór a shainaithnítear le linn réitigh idir-inoibritheachta a fhorbairt agus a thástáil i mbosca gainimh rialála idir-inoibritheachta agus, ina éagmais sin, go gcuirfí an próiseas forbartha agus tástála ar fionraí. Leis an gcur chuige il-leibhéil bainistithe riosca a iarrtar, agus ról na mbainisteoirí riosca agus an fhormhaoirseacht a dhéanann na comhordaitheoirí bosca gainimh rialála agus na húdaráis inniúla á gcothromú, ba cheart timpeallacht shábháilte a áirithiú chun réitigh idir-inoibritheachta sa bhosca gainimh rialála idir-inoibritheachta a thástáil, a oiliúint, a fhorbairt nó a bhailíochtú. Ba cheart do chomhordaitheoirí bosca gainimh rialála cinneadh a dhéanamh maidir leis an bpróiseas bainistithe riosca, an chumarsáid idir na húdaráis inniúla agus na bainisteoirí riosca a bhainistiú, agus a áirithiú go gcomhlíonann gach tionscadal laistigh den bhosca gainimh rialála idir-inoibritheachta an plean bainistithe riosca bunaithe. Ba cheart don bhainistiú riosca cur le nósanna imeachta bainistithe riosca eile is infheidhme agus comhlíonadh iomlán na nósanna imeachta sin a áirithiú, e.g. i réimse na cibearshlándála nó na cosanta sonraí pearsanta. Is féidir le treoirlínte agus soiléirithe maidir leis an Tairseach um Eoraip Idir-inoibritheach cuidiú amach anseo le comhordaitheoirí bosca gainimh rialála an leagan amach iomchuí a aimsiú.

(13)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 agus thug sé a thuairim uaidh an 25 Márta 2025.

(14)

Na bearta dá bhforáiltear sa Rialachán seo, tá siad i gcomhréir le tuairim an Choiste a bunaíodh le hAirteagal 22(1) de Rialachán (AE) 2024/903,