(1)

Is díol sásaimh don Aontas iad infheistíochtaí coigríche toisc go gcuireann siad le fás trí fheabhas a chur ar a iomaíochas, trí phoist agus barainneachtaí scála a chruthú, agus trí chaipiteal, teicneolaíochtaí, nuálaíocht agus saineolas a thabhairt isteach leo.

(2)

Le hAirteagal 3(5) den Chonradh ar an Aontas Eorpach (CAE), sonraítear go bhfuil an tAontas, ina chaidreamh leis an domhan mór, lena chuid luachanna agus leasanna a chumhdach agus a chur chun cinn agus go bhfuil sé le rannchuidiú le cosaint a shaoránach.

(3)

Tá timpeallacht oscailte don infheistíocht i réim san Aontas agus sna Ballstáit, rud a chumhdaítear sa Chonradh ar Fheidhmiú an Aontais Eorpaigh (CFAE) agus atá leabaithe i ngealltanais idirnáisiúnta an Aontais agus a Bhallstát. Mar sin féin, luaitear in Airteagal 21(2) CAE go bhfuil sé d’aidhm ag beartais agus gníomhaíochtaí an Aontais a luachanna, a bhunleasanna, a shlándáil, a neamhspleáchas agus a iomláine a choimirciú. Tá na prionsabail agus na cuspóirí sin mar bhonn agus mar thaca ag comhbheartas tráchtála an Aontais, mar a leagtar amach in Airteagal 207 CFAE, lena n-áirítear i ndáil le hinfheistíocht choigríche. Sa chomhthéacs sin, faoi ghealltanais idirnáisiúnta a rinneadh san Eagraíocht Dhomhanda Trádála (EDT), san Eagraíocht um Chomhar agus Forbairt Eacnamaíochta (ECFE) agus sna comhaontuithe trádála agus infheistíochta a tugadh i gcrích le tríú tíortha, is féidir leis an Aontas nó leis na Ballstáit srian a chur ar infheistíochtaí díreacha coigríche ar fhorais na slándála nó an oird phoiblí, faoi réir ceanglais áirithe.

(4)

De bhun Rialachán (AE) 2019/452 ó Pharlaimint na hEorpa agus ón gComhairle (4), cuireadh creat ar bun faoina ndéanann na Ballstáit scagadh ar infheistíochtaí díreacha coigríche isteach san Aontas. Go sonrach, leagadh amach sásra comhair leis an Rialachán sin lenar cuireadh ar chumas na mBallstát agus an Choimisiúin faisnéis a mhalartú faoi infheistíochtaí díreacha coigríche agus ábhair imní a chur in iúl faoi rioscaí don tslándáil nó don ord poiblí. Leis an sásra comhair sin, cuireadh de cheangal ar an mBallstát ina bhfuil an infheistíocht dhíreach choigríche á déanamh aird chuí a thabhairt ar na barúlacha arna soláthar ag na Ballstáit eile agus ar an tuairim arna heisiúint ag an gCoimisiún ina chinneadh maidir le scagadh.

(5)

An creat a cuireadh ar bun de bhun Rialachán (AE) 2019/452, chomhlíon sé a chuspóir chun sásra foirmiúil a chur ar fáil do na Ballstáit agus don Choimisiún chun faisnéis a mhalartú faoi infheistíochtaí díreacha coigríche agus chun feasacht a mhúscailt faoi rioscaí trasteorann don tslándáil nó don ord poiblí a eascraíonn as infheistíochtaí díreacha coigríche áirithe.

(6)

Mar sin féin, tá gá le hionstraim reachtach nua chun éifeachtúlacht agus éifeachtacht an scagtha ar infheistíochtaí díreacha coigríche a láidriú agus chun méid comhchuibhithe níos airde ar fud an Aontais a áirithiú. Tá gá leis na feabhsuithe sin mar gheall ar chineál athraitheach na sreafaí infheistíochta. Mar thoradh ar chomhtháthú na ngeilleagar domhanda, mar aon le cogadh agus teannas geopholaitiúil, tá rioscaí nua tagtha chun cinn nach mór don Aontas agus do na Ballstáit aghaidh a thabhairt orthu. An 20 Meitheamh 2023, ghlac an Coimisiún agus Ardionadaí an Aontais do Ghnóthaí Eachtracha agus don Bheartas Slándála teachtaireacht chomhpháirteach dar teideal ‘Straitéis Eorpach um an tSlándáil Eacnamaíoch’, agus, an 3 Nollaig 2025, ghlac siad teachtaireacht chomhpháirteach dar teideal ‘Slándáil eacnamaíoch an Aontais a neartú’. Sainaithnítear sna teachtaireachtaí sin scagadh ar Infheistíocht Dhíreach Choigríche (IDC) mar uirlis chun an tAontas a chosaint ar rioscaí slándála eacnamaíche. Leagtar béim sna teachtaireachtaí ar an ngá atá le haghaidh a thabhairt ar na rioscaí a bhaineann le hathléimneacht slabhraí soláthair, le rochtain ar bhonneagar criticiúil, le sceitheadh teicneolaíochta, agus le spleáchais eacnamaíocha nó comhéigean eacnamaíoch a úsáid mar uirlis troda.

(7)

D’fhéadfaí rioscaí a chruthú don tslándáil nó don ord poiblí le hinfheistíochtaí coigríche áirithe nach gcumhdaítear le Rialachán (AE) 2019/452. Baineann na rioscaí sin, go sonrach, le hinfheistíochtaí coigríche áirithe a dhéantar i mBallstáit nach bhfuil sásra um scagadh i bhfeidhm acu go fóill, le hinfheistíochtaí coigríche a dhéantar i mBallstáit a bhfuil sásra um scagadh i bhfeidhm acu ach nach n-áirítear infheistíochtaí coigríche íogaire áirithe lena raon feidhme, agus le hinfheistíochtaí coigríche a dhéanann infheisteoirí coigríche trí fhochuideachta atá bunaithe san Aontas (‘infheistíochtaí laistigh den Aontas’) agus a bhféadfadh na rioscaí céanna don tslándáil nó don ord poiblí a bheith ag baint leo agus a bhaineann le hinfheistíochtaí coigríche a dhéantar go díreach ó thríú tíortha.

(8)

Nuair a bhí ionstraim reachtach i bhfeidhm i dtromlach mór de na Ballstáit, ach ní iontu uile, lena ndearnadh foráil maidir le sásra chun scagadh a dhéanamh ar infheistíochtaí díreacha coigríche, in éagmais sásra um scagadh i mBallstáit áirithe, bhí infheisteoirí coigríche achrannacha ar mhian leo infheistíocht a dhéanamh i sócmhainní íogaire in ann infheistíocht a dhéanamh sna Ballstáit sin mar thairseach isteach sa mhargadh inmheánach. Thairis sin, i roinnt mhaith Ballstát, le dlíthe náisiúnta, leathnaítear scagadh chuig infheistíochtaí laistigh den Aontas freisin. I measc na mBallstát tá difríochtaí móra maidir leis an raon feidhme, na tairseacha agus na critéir a úsáidtear chun measúnú a dhéanamh ar cé acu is dócha nó nach dócha go ndéanfaidh infheistíocht choigríche difear diúltach don tslándáil nó don ord poiblí. Tá difríochtaí i nósanna imeachta scagtha freisin. Tá sé mar aidhm leis an Rialachán seo laghdú a dhéanamh ar éagsúlachtaí a bhaineann le príomheilimintí na sásraí um scagadh a chuirtear chun feidhme ar an leibhéal náisiúnta. I mBallstáit áirithe, is féidir an infheistíocht choigríche a chur chun feidhme sula mbeidh imréiteach faighte i leith na héifeachta ar an tslándáil nó ar an ord poiblí. Mar sin féin, cuireann Ballstáit eile de cheangal ar eintitis gan an infheistíocht choigríche a thabhairt chun críche ach amháin tar éis a húdaraithe faoin sásra um scagadh. Le héagsúlachtaí den sórt sin, cruthaítear fadhb d’fheidhmiú rianúil an mhargaidh inmheánaigh. Mar shampla, cruthaítear leo easpa cothroime iomaíochta agus méadaítear costais chomhlíontachta d’infheisteoirí a fhéachann le fógra a thabhairt faoi idirbhearta i mbreis agus Ballstát amháin. Tá sé ríthábhachtach éagsúlacht a laghdú chun intuarthacht a áirithiú d’infheisteoirí i ndáil leis na córais náisiúnta is infheidhme agus a saintréithe, lena laghdaítear costais chomhlíontachta ghaolmhara. Is amhlaidh is ábhartha an méid sin i bhfianaise leibhéal comhtháthaithe an mhargaidh inmheánaigh, a d’fhéadfadh a fhágáil go ndéanfadh idirbheart aonair difear do Bhallstáit éagsúla ar fud an Aontais. Is féidir, mar shampla, i gcás idirbheart arb é is aidhm leis gnóthas a fháil atá bunaithe faoi dhlíthe Ballstáit amháin, go ndéanann an t-idirbheart sin difear do shlándáil nó ord poiblí Ballstáit eile, i ngeall ar struchtúr an tslabhra soláthair nó eilimintí eacnamaíocha eile lena nasctar an sprioc-chuideachta de chuid an Aontais le cuideachtaí eile atá bunaithe i mBallstáit eile. Chun aghaidh a thabhairt ar fhadhbanna den sórt sin a bhaineann le comhtháthú an mhargaidh inmheánaigh agus chun comhsheasmhacht agus intuarthacht níos mó a áirithiú, is iomchuí freisin na critéir agus na heilimintí atá le húsáid chun measúnú a dhéanamh ar infheistíochtaí coigríche a bhunú trí ghníomhaíocht an Aontais. Dá bhrí sin, is é is aidhm leis an Rialachán seo cóineasú na rialacha náisiúnta is infheidhme maidir le scagadh infheistíochtaí coigríche a mhéadú, lena n-áirítear infheistíochtaí laistigh den Aontas, agus ar an gcaoi sin cothroime iomaíochta a chruthú, deimhneacht a mhéadú d’infheisteoirí coigríche, agus cosc a chur ar theacht chun cinn bacainní breise ar an margadh inmheánach.

(9)

Chun cur chuige comhsheasmhach ar fud an Aontais a áirithiú i leith scagadh infheistíochtaí coigríche, ba cheart é a chur de cheangal ar na Ballstáit uile scagadh a dhéanamh ar infheistíochtaí coigríche ar fhorais na slándála nó an oird phoiblí. Thairis sin, ba cheart croí-eilimintí na sásraí náisiúnta um scagadh a chomhchuibhiú. Leis an gcomhchuibhiú íosta sin, ba cheart oibleagáid ar na Ballstáit a áireamh chun a áirithiú go ndéanfar scagadh ar infheistíochtaí coigríche a dhíríonn ar eintitis a oibríonn i sraith shonrach de limistéir íogaire. Ba cheart a áirithiú leis an oibleagáid sin go ndéanfar scagadh ar infheistíochtaí coigríche íogaire áirithe i ngach Ballstát. Thairis sin, leis an Rialachán seo, ba cheart na nósanna imeachta faoin sásra comhair agus an idirghníomhaíocht idir na sásraí um scagadh agus an sásra comhair a chomhchuibhiú agus a shoiléiriú tuilleadh. Go háirithe, is iomchuí a áirithiú go n-áireofar sna sásraí uile um scagadh athbhreithniú tosaigh nár cheart a bheith níos faide ná 45 lá féilire ón dáta a mheasann an t-údarás scagtha an comhdú a bheith iomlán. Dá bhrí sin, chun críocha an Rialacháin seo, ba cheart sainmhíniú ar ‘comhdú’ a thabhairt isteach lena léirítear tíolacadh tosaigh na doiciméadachta is gá chomh maith leis an measúnú i dtaobh an meastar iarraidh a bheith iomlán. I gcás inar gá, ba cheart grinn-imscrúdú a dhéanamh. Ina theannta sin, ba cheart na hamlínte maidir le fógra a thabhairt tríd an sásra comhair a chomhchuibhiú, agus ba cheart na céimeanna don nós imeachta faoin sásra comhair, go háirithe maidir le soláthar barúlacha ó na Ballstáit agus eisiúint tuairimí ón gCoimisiún, a ailíniú ar bhealach níos fearr. Le comhchuibhiú agus ailíniú den sórt sin, d’fhéadfaí aghaidh a thabhairt ar chásanna nach bhfuil amlínte na nósanna imeachta náisiúnta ailínithe, agus a d’fhéadfadh, dá bhrí sin, moill a chur ar idirbheart. Ba cheart leibhéal áirithe comhchuibhithe a bheith ann maidir leis na critéir ba cheart do na Ballstáit agus don Choimisiún a chur san áireamh agus measúnú á dhéanamh acu i dtaobh an dócha go ndéanfaidh infheistíocht choigríche difear diúltach don tslándáil nó don ord poiblí. Ba cheart a áireamh sa tacar coiteann critéar sin slándáil, sláine, athléimneacht agus feidhmiú eintiteas criticiúil, infhaighteacht teicneolaíochtaí criticiúla nó leanúnachas soláthair ionchur criticiúil. Leis an tacar coiteann critéar, d’áiritheofaí measúnú níos aonfhoirmí ar an éifeacht dhiúltach is dócha a bheadh ag infheistíochtaí coigríche ar an tslándáil nó ar an ord poiblí agus, an tráth céanna, chaomhnófaí an fhéidearthacht do na Ballstáit critéir bhreise a d’fhéadfadh a bheith éagsúil ó Bhallstát go Ballstát a chur san áireamh.

(10)

Ba cheart an scagadh ar infheistíochtaí coigríche a dhéanamh i gcomhréir leis an Rialachán seo. Ba cheart an fhaisnéis uile dá bhfuil ar fáil a chur san áireamh sa scagadh sin agus ba cheart cloí le prionsabal na comhréireachta leis. Ba cheart urraim a thabhairt leis don chuspóir maidir le timpeallacht infheistíochta oscailte agus an margadh inmheánach a chaomhnú. Thairis sin, ba cheart an scagadh ar infheistíochtaí coigríche a bheith i gcomhréir le dlí an Aontais, agus go háirithe le hAirteagail 49 agus 63 CFAE. Aon srianta ar an tsaoirse bunaíochta nó ar an tsaorghluaiseacht chaipitil a d’ fhéadfadh eascairt as sásraí um scagadh nó as cinntí maidir le scagadh, amhail bearta maolaitheacha a fhorchur nó infheistíocht choigríche a thoirmeasc nó a leachtú, ba cheart údar a bheith leo ar chúiseanna beartais phoiblí nó slándála poiblí, lena n-áirítear fíorbhagairtí sách tromchúiseach ar leas bunúsach de chuid na sochaí. Áirítear ar chúiseanna beartais phoiblí nó slándála poiblí den sórt sin rioscaí d’fheidhmiú na n-institiúidí agus na seirbhísí poiblí fíor-riachtanacha, do sholáthar táirgí nó seirbhísí fíor-riachtanacha nó do mharthanas an phobail, rioscaí go mbeadh suaitheadh tromchúiseach ar an gcaidreamh eachtrach nó ar chómhaireachtáil shíochánta náisiún, nó rioscaí do leasanna míleata.

(11)

Chun é a chur ar a chumas don sásra comhair a bhunaítear leis an Rialachán seo feidhmiú go héifeachtúil agus go héifeachtach, is gá raon feidhme íosta coiteann a shainiú le haghaidh infheistíochtaí coigríche ar cheart do na Ballstáit uile scagadh a dhéanamh orthu.

(12)

Is gá an Ballstát ina bhfuil sé beartaithe infheistíocht choigríche a thabhairt i gcrích nó ina ndéantar infheistíocht choigríche a thabhairt i gcrích (‘Ballstát óstach’) a dhéanamh níos cuntasaí don Choimisiún agus do na Ballstáit sin a chuireann ábhair imní in iúl a bhfuil údar cuí leo maidir leis an tslándáil nó leis an ord poiblí.

(13)

Ba cheart nár dhochar an creat coiteann a leagtar amach sa Rialachán seo do fhreagracht aonair gach Ballstáit as a shlándáil náisiúnta a choimirciú, mar a fhoráiltear in Airteagal 4(2) CAE. Ba cheart nár dhochar an creat coiteann sin do chosaint leasanna slándála bunriachtanacha na mBallstát i gcomhréir le hAirteagal 346 CFAE ach an oiread.

(14)

Leis an Rialachán seo, ba cheart infheistíochtaí coigríche a chumhdach lena gcruthaítear nó lena gcoinnítear ar bun naisc fhadtéarmacha dhíreacha idir infheisteoirí coigríche, lena n-áirítear comhlachtaí Stáit, agus sprioc-chuideachtaí de chuid an Aontais a mbíonn gníomhaíocht eacnamaíoch ar siúl acu i mBallstát. Ba cheart feidhm a bheith ag an Rialachán seo i gcás ina ndéanann infheisteoir coigríche infheistíochtaí coigríche go díreach nó inar infheistíochtaí laistigh den Aontas iad. Mar sin féin, níor cheart a chumhdach leis fáil urrús cuideachta atá beartaithe le haghaidh infheistíocht airgeadais agus lena aghaidh sin amháin, agus gan aon rún ann tionchar a imirt ar bhainistiú nó rialú na cuideachta (infheistíochtaí punainne).

(15)

Cruthaítear naisc fhadtéarmacha dhíreacha idir an t-infheisteoir coigríche agus sprioc-chuideachta de chuid an Aontais i gcás ina bhfaigheann an t-infheisteoir coigríche rannpháirtíocht éifeachtach i mbainistiú nó rialú na sprioc-chuideachta de chuid an Aontais. Is cinnte gurb amhlaidh atá i gcás ina bhfaigheann an t-infheisteoir coigríche tionchar cinntitheach ar an sprioc-chuideachta de chuid an Aontais, is é sin le rá an cumas beartas tráchtála na sprioc-chuideachta de chuid an Aontais a chinneadh go haonarach nó go comhpháirteach, bíodh sin de facto nó de jure. Mar sin féin, d’fhéadfadh rannpháirtíocht éifeachtach i mbainistiú nó rialú na sprioc-chuideachta de chuid an Aontais a bheith ann freisin i gcás inar féidir leis an infheisteoir coigríche, gan tionchar cinntitheach a bheith aige ar an sprioc-chuideachta de chuid an Aontais, tionchar ábhartha a imirt ar a beartas, iompraíocht nó cinntí tráchtála mar sin féin, mar shampla trí scairsheilbh, cearta vótála, conarthaí, lena n-áirítear giaráil a eascraíonn as caidrimh le soláthróirí, agus ionadaíocht shuntasach ar an mbord.

(16)

Ba cheart éadálacha trí uirlisí réitigh faoi na creataí réitigh lena mbaineann (i gcás banc, contrapháirtithe lárnacha nó gnóthais árachais nó athárachais) a eisiamh ó raon feidhme an Rialacháin seo. In imthosca den sórt sin, ní tráth moille é agus is minic a dhéantar cinntí i gcaitheamh na hoíche. D’fhéadfadh na nósanna imeachta um scagadh dá bhforáiltear sa Rialachán seo bac a chur ar an gcumas freagairt thráthúil a thabhairt. Chun rioscaí cobhsaíochta airgeadais a sheachaint, ba cheart, dá bhrí sin, idirbhearta réitigh a eisiamh. Ba cheart do na húdaráis réitigh cuspóir an Rialachán seo a chur san áireamh, a mhéid is féidir, agus gníomhaíochtaí réitigh á ndéanamh acu le rannpháirtíocht infheisteora coigríche, go háirithe agus sócmhainní straitéiseacha i gceist.

(17)

Ba cheart oibríochtaí athstruchtúraithe laistigh de ghrúpa corparáideach a bheith lasmuigh de raon feidhme chur i bhfeidhm an Rialacháin seo i gcás ina ndéantar na hoibríochtaí sin chun atheagrú inmheánach a dhéanamh, mar shampla trí chumasc nó trí dheighilt, ar sprioc-chuideachta de chuid an Aontais nó ar an ngrúpa corparáideach lena mbaineann an sprioc-chuideachta de chuid an Aontais, agus chuige sin amháin, gan aon athrú ar úinéireacht thairbhiúil na sprioc-chuideachta sin de chuid an Aontais a bheith mar thoradh orthu. Go háirithe, ba cheart athstruchtúrú inmheánach a eisiamh ón raon feidhme sna cásanna seo a leanas: ní fhágann sé go bhfaigheann infheisteoir coigríche nua úinéireacht nó rialú ar an sprioc-chuideachta de chuid an Aontais ná ar chuideachta a bhfuil an sprioc-chuideachta sin de chuid an Aontais faoina húinéireacht nó faoina rialú, go díreach nó go hindíreach; níl méadú ar na scaireanna atá i seilbh infheisteoirí coigríche mar thoradh air; agus ní thugann sé cearta breise d’infheisteoirí coigríche a d’fhéadfadh athrú a dhéanamh ar rannpháirtíocht éifeachtach infheisteora coigríche amháin nó níos mó maidir le bainistiú nó rialú na sprioc-chuideachta de chuid an Aontais. Mar sin féin, d’fhéadfadh rioscaí slándála a bheith i gceist le hathstruchtúrú inmheánach lena dtugtar isteach eintiteas dlíthiúil nua, atá bunaithe i dtríú tír nach bhfuil i slabhra úinéireachta réamhtheachtach na sprioc-chuideachta de chuid an Aontais cheana féin agus ba cheart, dá bhrí sin, iad a áireamh faoi raon feidhme an Rialacháin seo. Mar shampla, d’fhéadfadh eintiteas den sórt sin a bheith faoi réir dlí tríú tír lena bhforchuirtear oibleagáidí ar dhaoine nádúrtha nó dlítheanacha faisnéis a chomhroinnt chun críoch faisnéise gan próis chuí ná sásraí formhaoirseachta.

(18)

Ní chumhdaítear le Rialachán (AE) 2019/452 ach infheistíochtaí díreacha coigríche arna ndéanamh go díreach ag infheisteoirí coigríche san Aontas. Mar sin féin, is gá raon feidhme chur i bhfeidhm an Rialacháin seo a leathnú chuig infheistíochtaí coigríche a dhéantar idir na Ballstáit agus a dhéantar trí ghnóthas atá bunaithe i mBallstát agus atá á rialú, go díreach nó go hindíreach, ag infheisteoir coigríche (‘fochuideachta infheisteora coigríche san Aontas’). Baineann na rioscaí sonracha céanna don tslándáil nó don ord poiblí leis na hinfheistíochtaí coigríche sin agus a bhaineann le hinfheistíochtaí díreacha coigríche a dhéantar trí eintiteas dlítheanach nach bhfuil bunaithe san Aontas, toisc go bhfuil cumhacht agus tionchar ag an infheisteoir coigríche rialaithe ar an sprioc-chuideachta de chuid an Aontais fiú má fheidhmítear iad trí fhochuideachta an infheisteora coigríche san Aontas. D’fhéadfadh an dlínse a bhfuil an t-infheisteoir coigríche faoina réir nó tionchar gníomhaithe rialtais nó neamhstáit tríú tír a bheith ina gcúis leis na rioscaí sonracha sin. Ní infheistíochtaí coigríche arna ndéanamh ag infheisteoirí nach bhfuil á rialú, go díreach nó go hindíreach, ag duine nó eintiteas tríú tír is cúis leis na rioscaí sin. Is iomchuí, dá bhrí sin, infheistíochtaí coigríche arna ndéanamh trí fhochuideachta infheisteora coigríche san Aontas a áireamh i raon feidhme chur i bhfeidhm an Rialacháin seo, ach ní infheistíochtaí arna ndéanamh ag infheisteoirí eile de chuid an Aontais, go háirithe chun a áirithiú go gcumhdófar go comhsheasmhach infheistíochtaí coigríche lena gcruthaítear nasc fadtéarmach idir an t-infheisteoir coigríche agus an sprioc-chuideachta de chuid an Aontais, cibé acu a dhéanann infheisteoir coigríche go díreach iad nó a dhéantar trí eintiteas atá bunaithe san Aontas agus atá á rialú ag infheisteoir coigríche iad. Leis sin, mhéadófaí comhsheasmhacht agus intuarthacht na rialacha maidir le scagadh ar fud na mBallstát, rud lena laghdófaí costais chomhlíontachta d’infheisteoirí coigríche agus lena gcuirfí deireadh leis an dreasacht infheistíocht a dhéanamh i mBallstáit nach ndéantar scagadh ar na hidirbhearta sin iontu.

(19)

Chun measúnú cuí a áirithiú i dtaobh an dócha go ndéanfaidh infheistíocht choigríche difear diúltach don tslándáil nó don ord poiblí, tá sé tábhachtach go gcuimseodh an téarma ‘úinéir tairbhiúil’ na fíorshealbhóirí tionchair, cibé acu go díreach nó go hindíreach, ar infheisteoir coigríche nó ar sprioc-chuideachta de chuid an Aontais. I gcás iontaobhas, is ag an iontaobhas ann féin atá an úinéireacht dhlíthiúil, ach is don duine nádúrtha nó do na daoine nádúrtha a n-oibríonn an t-iontaobhas thar a cheann, thar a ceann nó thar a gceann atá an tairbhe eacnamaíoch. Ar an gcúis sin, ba cheart iad siúd a bhaineann tairbhe ar deireadh as an infheistíocht choigríche, go háirithe tairbhithe iontaobhais, a chuimsiú sa sainmhíniú ar ‘úinéir tairbhiúil’. Mar sin féin, is gá a chur san áireamh gur féidir le hinfheisteoirí coigríche a bheith ina gcur i gcéill uaireanta don duine atá taobh thiar den infheistíocht choigríche i ndáiríre. Ar an gcaoi chéanna, uaireanta is féidir le gníomhaithe eile iallach a chur ar infheisteoirí coigríche atá in ann tionchar a imirt ar an infheistíocht choigríche ar deireadh. Dá bhrí sin, ba cheart a áireamh sa sainmhíniú ar ‘úinéir tairbhiúil’ freisin daoine nádúrtha a ndéantar an infheistíocht choigríche thar a gceann nó a bhfeidhmítear an rialú ar an infheistíocht choigríche sin thar a gceann. Go ginearálta, is duine nádúrtha aonair a bhíonn ina úinéir tairbhiúil nó ina húinéir tairbhiúil ar infheisteoir coigríche. Mar sin féin, ní féidir a chur as an áireamh go bhféadfadh níos mó ná duine amháin a bheith ann, amhail i gcás céilí nó baill teaghlaigh eile. Ar an gcaoi chéanna, is gá cásanna nach féidir an duine nádúrtha a shainaithint a chur san áireamh, lena n-áirítear i gcás cuideachtaí a thrádáiltear go poiblí. Sna cásanna sin, ba cheart a mheas gurb é an duine dlítheanach, an t-eintiteas nó an t-iontaobhas ar an leibhéal inaitheanta is airde i slabhra úinéireachta réamhtheachtach nó i slabhra rialaithe réamhtheachtach an infheisteora coigríche nó na sprioc-chuideachta de chuid an Aontais an t-úinéir tairbhiúil.

(20)

Ní dhéantar foráil sa Rialachán seo ach maidir le croí-eilimintí na sásraí um scagadh. Dá bhrí sin, ba cheart do na Ballstáit a bheith in ann forálacha náisiúnta a ghlacadh atá comhlántach le forálacha an Rialacháin seo nó atá níos sonraí ná iad. Mar shampla, ba cheart do na Ballstáit a bheith in ann tairseacha a shonrú maidir le cearta vótála arna bhfáil ag infheisteoirí a spreagann scagadh infheistíochtaí coigríche. Ba cheart do na Ballstáit a bheith in ann raon feidhme a sásra náisiúnta um scagadh a leathnú chun infheistíochtaí coigríche in earnálacha nach gcumhdaítear leis an raon feidhme íosta coiteann a áireamh. I gcás ina roghnaíonn Ballstát raon feidhme a shásra um scagadh a leathnú thar an raon feidhme íosta coiteann, ba cheart don scagadh an Rialachán seo a chomhlíonadh, ar choinníoll go dtagann sé faoi raon feidhme an Rialacháin seo.

(21)

Chun nósanna imeachta scagtha comhsheasmhacha agus intuartha a áirithiú, is iomchuí tréithe bunriachtanacha na sásraí um scagadh atá le cur chun feidhme ag na Ballstáit a leagan síos. Ba cheart a áireamh ar na gnéithe sin ar a laghad raon feidhme íosta na n-idirbheart atá le bheith faoi réir ceanglas réamhúdaraithe, an nós imeachta um scagadh a roinnt ina athbhreithniú tosaigh agus ina ghrinn-imscrúdú, sprioc-amanna don scagadh, tuarascáil bhliantúil phoiblí, an deis a bheith ag páirtithe atá faoi réir an chinnidh maidir le scagadh leigheas breithiúnach a lorg in aghaidh na gcinntí sin, agus cumas na n-údarás scagtha aghaidh a thabhairt go héifeachtach ar chásanna de neamhchomhlíonadh nó de theacht timpeall. Ba cheart rialacha agus nósanna imeachta a bhaineann le sásraí um scagadh a bheith trédhearcach agus níor cheart aon idirdhealú a dhéanamh idir tríú tíortha leo.

(22)

Chun trédhearcacht agus intuarthacht i nósanna imeachta um scagadh a fheabhsú, ba cheart do na húdaráis scagtha, i gcás inarb infheidhme agus gan moill mhíchuí, an duine a rinne an comhdú a chur ar an eolas faoi iomláine an chomhdaithe sin. Le soláthar na faisnéise sin, níor cheart cosc a chur ar an údarás scagtha tuilleadh faisnéise a iarraidh nó ceisteanna breise a chur tar éis iomláine an chomhdaithe a dheimhniú agus ba cheart nár dhochar é don fhéidearthacht atá ag na húdaráis scagtha an duine a rinne an comhdú a chur ar an eolas faoi gharspriocanna nós imeachta tábhachtacha eile.

(23)

Ba cheart don údarás scagtha agus don Choimisiún a bheith in ann faisnéis ábhartha a fhaightear ó gheallsealbhóirí, lena n-áirítear oibreoirí eacnamaíocha, eagraíochtaí na sochaí sibhialta agus comhpháirtithe sóisialta, amhail ceardchumainn, maidir le hinfheistíocht choigríche a chur san áireamh. D’fhéadfadh an Ballstát óstach nós imeachta um scagadh a thionscnamh mar thoradh ar an bhfaisnéis sin. Chun na críche sin, ba cheart don údarás scagtha agus don Choimisiún na sonraí teagmhála trínar féidir le geallsealbhóirí faisnéis maidir le hinfheistíochtaí coigríche a chur isteach ar bhealach rúnda a chur ar fáil go poiblí.

(24)

Chun leibhéal comhsheasmhach éifeachtach cosanta a áirithiú don tslándáil agus don ord poiblí ar fud an Aontais, is gá foráil a dhéanamh maidir le comhchuibhiú íosta ar raon feidhme sásraí um scagadh. Ba cheart a cheangal ar na Ballstáit scagadh a dhéanamh ar infheistíochtaí coigríche i gcás ina bhfuil an sprioc-chuideachta de chuid an Aontais gníomhach in earnálacha nó i ngníomhaíochtaí a bhfuil ábharthacht ar leith ag baint leo maidir le slándáil, cosaint, sláine próiseas daonlathach, athléimneacht seirbhísí bunriachtanacha nó cosaint feidhmeanna sochaíocha ríthábhachtacha. Is gá raon feidhme íosta coiteann den sórt sin maidir le sásraí um scagadh a bhunú chun a áirithiú go ndéanfar infheistíochtaí coigríche ar dócha go ndéanfaidh siad difear diúltach don tslándáil nó don ord poiblí a shainaithint gan beann ar na Ballstáit ina bhfuil na sprioc-chuideachtaí de chuid an Aontais lonnaithe, agus ar an gcaoi sin éifeachtacht an tsásra comhair a neartú agus freagracht aonair na mBallstát as an tslándáil náisiúnta á caomhnú ag an am céanna.

(25)

Ba cheart a áireamh sa raon feidhme íosta coiteann infheistíochtaí coigríche i sprioc-chuideachtaí de chuid an Aontais a dhéanann ítimí dé-úsáide a liostaítear in Iarscríbhinn I a ghabhann le Rialachán (AE) 2021/821 ó Pharlaimint na hEorpa agus ón gComhairle (5) nó earraí agus teicneolaíochtaí míleata a liostaítear san Iarscríbhinn a ghabhann le Treoir 2009/43/CE ó Pharlaimint na hEorpa agus ón gComhairle (6) a fhorbairt, a tháirgeadh nó a thráchtálú, i bhfianaise na rioscaí bunúsacha a bhaineann le rialú ar chumais, teicneolaíochtaí agus fios gnó a bhaineann le cosaint a aistriú, arb infheistíochtaí iad atá ríthábhachtach chun an tslándáil a choinneáil. Leis an raon feidhme íosta coiteann, ba cheart a chumhdach freisin infheistíochtaí coigríche i sprioc-chuideachtaí de chuid an Aontais ina ndéantar leathsheoltóir nó teicneolaíochtaí candamacha a tháirgeadh, nó a fhorbairt, nó ina ndéantar taighde orthu, nó teicneolaíochtaí áirithe intleachta saorga a fhorbairt, nó taighde a dhéanamh orthu, i bhfianaise a dtábhachta straitéisí agus a róil cumasúcháin i raon leathan feidhmeanna atá ríthábhachtach don tslándáil. Thairis sin, ba cheart do na Ballstáit scagadh a dhéanamh ar infheistíochtaí coigríche i sprioc-chuideachtaí de chuid an Aontais a dhéanann gníomhaíochtaí áirithe a bhaineann le hamhábhair straitéiseacha a liostaítear i Roinn I d’Iarscríbhinn I a ghabhann le Rialachán (AE) 2024/1252 ó Pharlaimint na hEorpa agus ón gComhairle (7), eadhon taiscéalaíocht, eastóscadh, próiseáil, athchúrsáil, aisghabháil nó stoc-charnadh. Is féidir le rialú eachtrach ar ghníomhaíochtaí den sórt sin rioscaí a chruthú maidir le suaitheadh soláthair, spleáchas straitéiseach nó giaráil mhíchuí. Thairis sin, ba cheart do na Ballstáit scagadh a dhéanamh ar infheistíochtaí coigríche i sprioc-chuideachtaí de chuid an Aontais ar leo bunachair sonraí clárúcháin vótálaithe, córais vótála agus córais faisnéise ábhartha eile, nó a fhorbraíonn nó a oibríonn iad. Ina theannta sin, ba cheart scagadh a dhéanamh freisin ar infheistíochtaí coigríche i mbonneagar áirithe margaidh airgeadais agus in eintitis airgeadais a bhfuil tábhacht shistéamach leo, lena n-áirítear contrapháirtithe lárnacha, taisclanna lárnacha urrús, oibreoirí margaí rialáilte, oibreoirí córas íocaíochta seachas bainc cheannais, institiúidí eile a bhfuil tábhacht shistéamach leo agus soláthraithe domhanda sainseirbhísí teachtaireachtaí airgeadais, i bhfianaise ról lárnach an bhonneagair sin agus na n-eintiteas sin i gcobhsaíocht, sláine agus athléimneacht chóras airgeadais an Aontais, agus cuspóirí an aontais coigiltis agus infheistíochta á gcur san áireamh.

(26)

Ba cheart a áireamh sa raon feidhme íosta coiteann freisin infheistíochtaí coigríche i sprioc-chuideachtaí de chuid an Aontais atá gníomhach in earnálacha an iompair, an fhuinnimh nó an bhonneagair dhigitigh ach amháin a mhéid a mheastar iad a bheith criticiúil tar éis measúnú rioscabhunaithe, spriocdhírithe arna dhéanamh ag an mBallstát ina bhfuil siad bunaithe. Ba cheart an tslándáil náisiúnta agus feidhmeanna sochaíocha ríthábhachtacha a chur san áireamh sa mheasúnú sin, i bhfianaise na seirbhísí bunriachtanacha a sholáthraíonn an sprioc-chuideachta de chuid an Aontais lena mbaineann. Ba cheart rogha a bheith ag na Ballstáit i gcónaí na heintitis lena mbaineann a ainmniú laistigh de na hearnálacha sin agus ba cheart dóibh, i gcás inarb iomchuí, measúnuithe riosca arna ndéanamh de bhun Threoir (AE) 2022/2557 ó Pharlaimint na hEorpa agus ón gComhairle (8) a chur san áireamh. Chun intuarthacht a áirithiú d’infheisteoirí coigríche, ba cheart d’eintitis a bheith in ann a fháil amach, más gá tar éis dóibh dul i dteagmháil leis an údarás inniúil scagtha, an meastar iad a bheith criticiúil chun críocha an Rialacháin seo. Thairis sin, ba cheart do na Ballstáit athmheasúnú rialta a dhéanamh ar na sprioc-chuideachtaí de chuid an Aontais ba cheart a mheas mar sprioc-chuideachtaí criticiúla chun críocha an Rialacháin seo. I measc na samplaí d’eintitis a bhfuil measúnú le déanamh orthu tá, ar an gcéad dul síos, in earnáil an fhuinnimh: saoráid stórála fuinnimh mar a shainmhínítear i dTreoir (AE) 2019/944 ó Pharlaimint na hEorpa agus ón gComhairle (9) agus oibreoirí córais tarchurtha gáis de réir bhrí Threoir (AE) 2024/1788 ó Pharlaimint na hEorpa agus ón gComhairle (10); ar an dara dul síos, in earnáil an iompair: aerfoirt mar a shainmhínítear i dTreoir 2009/12/CE ó Pharlaimint na hEorpa agus ón gComhairle (11), lena n-áirítear na croí-aerfoirt a liostaítear i Rialachán (AE) 2024/1679 ó Pharlaimint na hEorpa agus ón gComhairle (12) agus eintitis a oibríonn suiteálacha coimhdeacha atá laistigh de na haerfoirt, i gcás ina bhfuil na suiteálacha sin bunriachtanach do shlándáil agus leanúnachas oibríochtaí na n-aerfort sin, comhlachtaí bainistíochta calafort mar a shainmhínítear i Rialachán (AE) 2017/352 ó Pharlaimint na hEorpa agus ón gComhairle (13), i ndáil leis na croí-chalafoirt a liostaítear i Rialachán (AE) 2024/1679, soláthraithe seirbhísí calafoirt mar a shainmhínítear i Rialachán (AE) 2017/352, agus eintitis eile laistigh de na croí-chalafoirt, i gcás ina bhfuil na heintitis eile sin bunriachtanach do shlándáil agus leanúnachas oibríochtaí na gcroí-chalafort sin; agus ar an tríú dul síos, in earnáil an bhonneagair dhigitigh: soláthraithe seirbhísí néalríomhaireachta agus soláthraithe líonraí cumarsáide leictreonaí poiblí.

(27)

Chun an tslándáil agus an t-ord poiblí a chosaint go leordhóthanach agus chun éifeachtacht an tsásra comhair a áirithiú, is gá do na Ballstáit uile scagadh ex ante a dhéanamh ar infheistíochtaí coigríche a thagann faoin raon feidhme íosta coiteann. Tá sé ríthábhachtach ceanglas réamhúdaraithe a bheith ann, toisc go dtagann go leor rioscaí a bhaineann le hinfheistíochtaí coigríche chun cinn tráth a fhaigheann an t-infheisteoir coigríche rannpháirtíocht éifeachtach sa bhainistiú nó sa rialú agus nach féidir iad a mhaolú go héifeachtach tar éis na hinfheistíochtaí coigríche a thabhairt i gcrích. Is fíor sin go háirithe i gcás na n-infheistíochtaí coigríche a thagann faoin raon feidhme íosta coiteann, ós rud é go bhféadfadh sé a bheith mar thoradh ar infheistíochtaí coigríche den sórt sin go soláthrófaí rochtain dho-aisiompaithe ar fhaisnéis íogair, ar theicneolaíochtaí criticiúla, ar bhonneagar bunriachtanach nó ar shócmhainní straitéiseacha. Bheadh ualach díréireach ag baint le hidirghabháil ex post, in imthosca den sórt sin, agus, in aon chás, bheadh sí neamhéifeachtach maidir leis an tslándáil agus leis an ord poiblí a chosaint go cuí.

(28)

Déantar infheistíochtaí i láithreán úrnua i gcás ina gcuireann infheisteoir coigríche nó fochuideachta de chuid infheisteora coigríche san Aontas saoráidí nua nó gnóthas nua ar bun chun gníomhaíocht eacnamaíoch a dhéanamh san Aontas. Ba cheart d’infheistíochtaí i láithreán úrnua teacht faoi raon feidhme an Rialacháin seo. Mar sin féin, níor cheart ceanglas réamhúdaraithe a fhorchur leis an Rialachán seo i leith na n- infheistíochtaí sin. Dá bhrí sin, ba cheart é a bheith de shaoirse i gcónaí ag na Ballstáit cinneadh a dhéanamh i dtaobh infheistíochtaí den sórt sin a áireamh i raon feidhme a sásraí um scagadh.

(29)

Leis an sásra comhair a leagtar síos i Rialachán (AE) 2019/452, cuirtear ar chumas na mBallstát dul i gcomhar agus cuidiú le chéile i gcás inar dócha go ndéanfadh infheistíocht dhíreach choigríche i mBallstát amháin difear a dhéanamh don tslándáil nó don ord poiblí i mBallstáit eile nó do thionscadail nó do chláir atá chun leasa an Aontais. Cruthaíodh go dtí seo go raibh an sásra sin an-úsáideach, dá bhrí sin, ba cheart é a choinneáil ar bun agus a neartú leis an Rialachán seo chun cur chuige níos ailínithe a áirithiú i leith infheistíochtaí coigríche ar fud an Aontais.

(30)

Ionas nach ndíreoidh an sásra comhair ach ar na hinfheistíochtaí coigríche sin ina bhfágann saintréithe an infheisteora coigríche nó na sprioc-chuideachta de chuid an Aontais gur dócha go mbeidh éifeacht dhiúltach ag an infheisteoir nó ag an sprioc-chuideachta ar an tslándáil nó ar an ord poiblí, is iomchuí coinníollacha rioscabhunaithe a bhunú maidir le fógra a thabhairt do na Ballstáit eile agus don Choimisiún faoi infheistíochtaí coigríche a bhfuil scagadh á dhéanamh orthu i mBallstát. Go háirithe, i gcás ina bhfuil infheisteoir coigríche nó a fhochuideachta san Aontas faoi rialú díreach nó indíreach rialtais tríú tír, is dóchúla go bhféadfadh sé cuspóirí beartais an tríú tír sin a shaothrú. Dá bhrí sin, is iomchuí do na Ballstáit fógra a thabhairt faoi infheistíochtaí coigríche arna ndéanamh ag na hinfheisteoirí coigríche sin i gcás ina dtagann siad faoi raon feidhme íosta coiteann na sásraí um scagadh. D’fhéadfaí rialú díreach nó indíreach ag rialtas tríú tír a fheidhmiú ar roinnt bealaí agus d’fhéadfaí é a chinneadh, inter alia, ar bhonn struchtúr úinéireachta, cistiú rialtais, socruithe sonracha rialachais amhail scaireanna órga, nó gnéithe eile atá dírithe ar thionchar a imirt ar chinntí bainistíochta. Ar an gcaoi chéanna, is iomchuí do na Ballstáit fógra a thabhairt faoi infheistíochtaí coigríche a thagann faoin raon feidhme íosta coiteann i gcás ina raibh an t-infheisteoir coigríche páirteach in infheistíochtaí coigríche a toirmeascadh nó a údaraíodh faoi réir bearta maolaitheacha nár comhlíonadh go suntasach nó nár comhlíonadh arís agus arís eile. Dá bhrí sin, mar riail ghinearálta, ní bheadh cásanna nós imeachta nó foirmiúla de neamhchomhlíonadh astu féin ina gcúis le fógra a thabhairt. Ar an gcaoi chéanna, ba cheart do na Ballstáit fógra a thabhairt faoi infheistíochtaí coigríche i gcás ina gcinneann siad grinn-imscrúdú a dhéanamh agus ina bhfuil an sprioc-chuideachta de chuid an Aontais nasctha le tionscadail nó le cláir atá chun leasa an Aontais nó le Ballstáit eile. Thairis sin, i gcás nach gcomhlíonann infheistíocht choigríche na coinníollacha eile a leagtar síos chun fógra a thabhairt fúithi tríd an sásra comhair, ba cheart don Bhallstát ina bhfuil scagadh á dhéanamh ar an infheistíocht choigríche, mar sin féin, fógra a thabhairt faoin infheistíocht choigríche sin do na Ballstáit eile agus don Choimisiún, i gcás ina measann an Ballstát sin go bhféadfadh an infheistíocht choigríche difear diúltach a dhéanamh don tslándáil nó don ord poiblí i mBallstát amháin eile ar a laghad. Áirithítear leis sin go dtabharfar fógra tríd an sásra comhair faoi gach infheistíocht choigríche a d’fhéadfadh tionchar diúltach a imirt ar an tslándáil nó ar an ord poiblí, agus áirithítear ag an am céanna go gcoinneoidh an Ballstát óstach corrlach lánroghnach agus cinneadh á dhéanamh aige i dtaobh ar comhlíonadh na coinníollacha maidir le fógra a thabhairt. Sa chás sin, ba cheart don Bhallstát a thugann fógra míniú a thabhairt ar na cúiseanna atá le fógra a thabhairt faoin infheistíocht choigríche sin.

(31)

Chun éifeachtúlacht agus éifeachtacht an tsásra comhair a áirithiú, is gá sprioc-amanna agus nósanna imeachta a ailíniú i gcás ina ndéantar scagadh in dhá Bhallstát nó níos mó ar roinnt infheistíochtaí coigríche atá nasctha leis an idirbheart níos leithne céanna. Maidir le hidirbhearta ilnáisiúnta den sórt sin, ba cheart do na hiarratasóirí féachaint leis na comhduithe ar leithligh a dhéanamh sna Ballstáit lena mbaineann an lá céanna. Ba cheart do na Ballstáit sin féachaint le fógra a thabhairt faoi na comhduithe sin an lá céanna tríd an sásra comhair. Chun a áirithiú go láimhseálfar na hidirbhearta ilnáisiúnta sin go héifeachtúil, ba cheart do na Ballstáit lena mbaineann comhordú a dhéanamh le linn an nós imeachta um scagadh. Go háirithe, ba cheart dóibh plé a dhéanamh eatarthu féin agus leis an gCoimisiún, má iarrann Ballstát amhlaidh, i dtaobh ar cheart fógra a thabhairt faoi na hinfheistíochtaí coigríche. Ba cheart dóibh a gcinntí maidir le scagadh a phlé freisin agus féachaint le huainiú a nósanna imeachta faoi seach a ailíniú, lena n-áirítear dáta glactha a gcinntí maidir le scagadh. I gcás ina bhfuil sé beartaithe ag na Ballstáit lena mbaineann an infheistíocht choigríche atá faoi réir bearta maolaitheacha a údarú, ba cheart dóibh plé a dhéanamh i dtaobh an bhfuil na cinntí atá beartaithe maidir le scagadh comhoiriúnach lena chéile agus aghaidh a thabhairt go leordhóthanach ar na rioscaí sainaitheanta.

(32)

Chun an éifeacht dhiúltach is dócha a bheidh ag infheistíocht choigríche ar an tslándáil nó ar an ord poiblí i mBallstát amháin nó níos mó a shainaithint go leormhaith, ba cheart do na Ballstáit a bheith in ann barúlacha a sholáthar agus ba cheart don Choimisiún a bheith in ann tuairim a eisiúint do Bhallstát óstach fiú mura bhfuil scagadh á dhéanamh ag an mBallstát sin ar an infheistíocht choigríche sin nó más rud é go ndearnadh scagadh ar an infheistíocht choigríche ach nár tugadh fógra fúithi tríd an sásra comhair. Ba cheart do na Ballstáit a n-iarrataí ar fhaisnéis, freagraí agus barúlacha a tharchur go comhuaineach chuig an gCoimisiún.

(33)

I gcás ina n-eascraíonn an éifeacht dhiúltach is dócha a bheidh ar an tslándáil nó ar an ord poiblí as infheistíocht choigríche i sprioc-chuideachta de chuid an Aontais atá ina cuid de cheann de na tionscadail nó de na cláir atá chun leasa an Aontais nó atá rannpháirteach i gceann de na tionscadail nó de na cláir sin, ar tionscadail nó cláir iad atá criticiúil don Aontas ina iomláine, ba cheart an Coimisiún a bheith in ann tuairim a eisiúint. Tuairim ón gCoimisiún lena sainaithnítear an éifeacht dhiúltach is dócha a bheidh ar thionscadail nó ar chláir atá chun leasa an Aontais ar fhoras na slándála nó an oird phoiblí, ba cheart fógra a thabhairt faoin tuairim sin do na Ballstáit uile.

(34)

Ba cheart an Coimisiún a bheith in ann tuairim a eisiúint chuig na Ballstáit uile i gcás ina sainaithníonn sé dhá infheistíocht choigríche nó níos mó ar dócha, nuair a chuirtear le chéile iad, go mbeidh tionchar diúltach acu ar an tslándáil nó ar an ord poiblí. D’fhéadfadh sé sin a bheith amhlaidh go háirithe i gcás ina mbaineann saintréithe inchomparáide le dhá infheistíocht choigríche nó níos mó, mar shampla, i gcás ina ndéanann an t-infheisteoir coigríche céanna na hinfheistíochtaí coigríche, i gcás ina mbaineann rioscaí comhchosúla le dhá infheisteoir coigríche nó níos mó, nó i gcás ina mbaineann dhá infheistíocht choigríche nó níos mó leis an sprioc-chuideachta chéanna nó leis an mbonneagar céanna, amhail bonneagar tras-Eorpach iompair, fuinnimh nó cumarsáide. Ba cheart do na Ballstáit agus don Choimisiún plé a dhéanamh ar anailís an Choimisiúin ar na rioscaí a sainaithníodh sa tuairim uaidh agus ar na bealaí a d’fhéadfadh a bheith ann chun aghaidh a thabhairt ar na rioscaí sin.

(35)

Níor cheart do na Ballstáit cinneadh maidir le scagadh a ghlacadh sula mbeidh na sprioc-amanna le haghaidh barúlacha agus tuairimí imithe in éag mura rud é go n-éilítear cinneadh níos luaithe de bharr leasanna slándála nó oird phoiblí, amhail féimheacht na sprioc-chuideachta de chuid an Aontais a sheachaint. Ba cheart fógra a thabhairt faoi na himthosca eisceachtúla sin do na Ballstáit eile agus don Choimisiún, agus ba cheart dóibh sin a mbarúlacha a sholáthar nó a thuairim a eisiúint go gasta.

(36)

Chun aghaidh a thabhairt go leormhaith ar an éifeacht dhiúltach is dócha a bheidh ag infheistíocht choigríche ar an tslándáil nó ar an ord poiblí i mBallstát amháin nó níos mó, Ballstáit a fhaigheann barúlacha a bhfuil údar cuí leo ó Bhallstáit eile nó tuairim ón gCoimisiún, ba cheart dóibh aird chuí a thabhairt ar na barúlacha nó an tuairim sin, lena n-áirítear i gcás ina measann an Ballstát nach ndéantar difear dá shlándáil nó dá ord poiblí féin. Ba cheart don Bhallstát sin, i gcás inar gá, comhordú leis an gCoimisiún agus leis na Ballstáit lena mbaineann agus an chuid oibríochtúil agus achoimre ar na príomhchúiseanna atá lena chinneadh a sholáthar dóibh. Ba cheart a áireamh san achoimre sin a mhéid a thug an Ballstát óstach aird chuí ar bharúlacha na mBallstát nó ar an tuairim ón gCoimisiún agus, i gcás inarb infheidhme, na cúiseanna nár aontaigh sé le barúlacha na mBallstát nó leis an tuairim ón gCoimisiúin. Áirithítear le soláthar na faisnéise sin go bhfuil na Ballstáit cuntasach as an gcaoi a dtugann siad aird chuí ar na hábhair imní a chuir Ballstáit eile nó an Coimisiún in iúl, agus urraim á tabhairt ag an am céanna do chineál íogair na gcinntí maidir le scagadh agus na faisnéise rúnda atá iontu.

(37)

Tá sé tábhachtach a chur san áireamh go bhféadfadh infheistíochtaí coigríche nár tugadh fógra tríd an sásra comhair fúthu a bheith ina riosca don tslándáil nó don ord poiblí. Dá bhrí sin, ba cheart do na Ballstáit agus don Choimisiún a bheith in ann, tráth nach déanaí ná 15 mhí ón infheistíocht choigríche a thabhairt i gcrích, barúlacha a bhfuil údar cuí leo a sholáthar nó tuairim a eisiúint, faoi seach, chuig an mBallstát óstach maidir le hinfheistíocht choigríche nár tugadh fógra tríd an sásra comhair fúithi. Ionas nach gcuirfear ró-ualach ar an sásra comhair, ba cheart do na Ballstáit agus don Choimisiún, sula soláthróidh siad barúlacha nó sula n-eiseoidh siad tuairim, faoi seach, a fhíorú an bhfuil tús curtha cheana féin ag an mBallstát óstach le scagadh na hinfheistíochta coigríche nó an bhfuil sé curtha i gcrích aige cheana féin agus an bhfuil sé beartaithe aige fógra a thabhairt faoin infheistíocht choigríche tríd an sásra comhair. Ba cheart don Bhallstát óstach aird chuí a thabhairt ar bharúlacha na mBallstát eile agus ar an tuairim ón gCoimisiún agus, ar an mbonn sin, na Ballstáit a sholáthair barúlacha agus an Coimisiún a chur ar an eolas mura bhfuil sé beartaithe aige scagadh a dhéanamh ar an infheistíocht choigríche. D’fhéadfadh sé sin a bheith amhlaidh, mar shampla, i gcás ina n-easaontaíonn an Ballstát óstach leis na rioscaí a shainaithnítear sna barúlacha nó sa tuairim. Ar an gcaoi chéanna, d’fhéadfadh an Ballstát óstach a léiriú nach bhfuil sé i gceist aige scagadh a dhéanamh ar an infheistíocht choigríche toisc nach dtagann an infheistíocht choigríche faoi raon feidhme a shásra um scagadh nó toisc go ndearnadh scagadh uirthi cheana féin, cé gur cheart soiléiriú a bheith tugtha ar na cásanna sin, go hidéalach, sular soláthraíodh aon bharúil nó sular eisíodh aon tuairim. I gcás ina léiríonn an Ballstát óstach nach bhfuil sé i gceist aige scagadh a dhéanamh ar an infheistíocht choigríche, ba cheart cruinniú a eagrú arna iarraidh sin ag Ballstát a sholáthair barúlacha nó arna iarraidh sin ag an gCoimisiún, i gcás inar eisigh an Coimisiún tuairim. Ba cheart cuireadh a thabhairt don Choimisiún freastal ar an gcruinniú fiú murar eisigh sé tuairim. D’fhéadfadh na Ballstáit a sholáthair barúlacha nó an Coimisiún, go háirithe, a iarraidh go mbeadh cruinniú den sórt sin ann chun na rioscaí a sainaithníodh a chur i láthair nó a phlé tuilleadh. I gcás ina gcinneann an Ballstát óstach, tar éis an chruinnithe agus d’ainneoin na mínithe breise a fuarthas ó na Ballstáit a sholáthair barúlacha nó ón gCoimisiún, gan scagadh a dhéanamh ar an infheistíocht choigríche, ba cheart dó na Ballstáit a sholáthair barúlacha agus an Coimisiún a chur ar an eolas faoi sin agus míniú i scríbhinn a thabhairt dóibh. D’fhéadfadh forluí a bheith ag an míniú sin i scríbhinn leis na cúiseanna a luadh roimhe sin, mar shampla ag an gcruinniú a iarradh.

(38)

Chun éifeachtúlacht an tsásra comhair a áirithiú, ba cheart na pointí teagmhála arna gcur ar bun ag na Ballstáit agus ag an gCoimisiún chun an Rialachán seo a chur i bhfeidhm a lonnú go hoiriúnach ina struchtúir riaracháin faoi seach. Ba cheart foireann cháilithe a bheith ag na pointí teagmhála mar aon leis na cumhachtaí is gá chun a n-obair a dhéanamh faoin sásra um chomhordú agus chun láimhseáil cheart faisnéise rúnda a áirithiú.

(39)

Chun feidhmiú éifeachtach an tsásra comhair a áirithiú, ba cheart a cheangal ar na Ballstáit a thugann fógra faoin infheistíocht choigríche tríd an sásra comhair íosleibhéal faisnéise a sholáthar i bhformáid chaighdeánaithe. I gcás nach dtugtar fógra faoi infheistíocht choigríche tríd an sásra comhair, ba cheart don Bhallstát óstach a bheith in ann an t-íosleibhéal céanna faisnéise ar a laghad a sholáthar. Ba cheart don Choimisiún agus do na Ballstáit a bheith in ann faisnéis bhreise a iarraidh ar an mBallstát óstach. Ba cheart údar cuí a bheith le haon iarraidh ar fhaisnéis bhreise, í a bheith teoranta don fhaisnéis is gá chun go soláthróidh na Ballstáit barúlacha nó go n-eiseoidh an Coimisiún tuairim, í a bheith comhréireach le cuspóir na hiarrata agus gan ualach míchuí a bheith ag baint léi don Bhallstát óstach.

(40)

Chun a áirithiú go mbeidh an comhar bunaithe ar fhaisnéis iomlán chruinn, ba cheart don Bhallstát óstach a bheith in ann a iarraidh ar infheisteoir coigríche nó ar aon duine nádúrtha nó dlítheanach eile laistigh de shlabhra rialaithe an infheisteora coigríche nó laistigh de shlabhra rialaithe na sprioc-chuideachta de chuid an Aontais faisnéis a sholáthar. Chun cáilíocht na faisnéise a áirithiú, ba cheart do na Ballstáit óstacha, i gcás ina bhfuil amhras réasúnach orthu faoi iomláine agus cruinneas na faisnéise, bearta réasúnacha a dhéanamh chun an fhaisnéis a sholáthraíonn an t-infheisteoir coigríche sin nó duine nádúrtha nó dlítheanach eile dóibh a fhíorú. Mar shampla, ba cheart don Bhallstát óstach contrárthachtaí follasacha agus faisnéis ar léir í a bheith bréagach, míthreorach nó in easnamh a shainaithint. In imthosca eisceachtúla, i gcás, d’ainneoin na n-iarrachtaí a rinne sé, nach mbeidh an Ballstát óstach in ann faisnéis arna hiarraidh ag Ballstát eile nó ag an gCoimisiún a fháil, ba cheart dó fógra a thabhairt dóibh gan mhoill. Sa chás sin, ba cheart do na Ballstáit eile agus don Choimisiún a bheith in ann a mbarúlacha agus a dtuairim, faoi seach, a bhunú ar an bhfaisnéis atá ar fáil dóibh.

(41)

D’fhéadfadh bacainní a bheith roimh an mBallstát óstach agus roimh an gCoimisiún maidir le faisnéis ábhartha a bhailiú ó dhaoine nádúrtha nó dlítheanacha i mBallstáit eile. Dá bhrí sin, i gcás ina bhfuil géarghá le píosa áirithe faisnéise chun a chinneadh an dócha go ndéanfaidh an infheistíocht choigríche difear diúltach don tslándáil nó don ord poiblí, ba cheart don Bhallstát óstach agus don Choimisiún a bheith in ann a iarraidh ar Bhallstát eile faisnéis a bhailiú ó dhuine nádúrtha nó dlítheanach atá ina chónaí nó bunaithe ina chríoch. Ina theannta sin, d’fhéadfadh Ballstát óstach aghaidh a thabhairt ar chás inar gá iarraidh ar dhá Bhallstát eile nó níos mó cuidiú leis an bhfaisnéis sin a bhailiú, rud a d’fhéadfadh a bheith ina ualach suntasach, go háirithe do na Ballstáit a bhfuil acmhainní níos teoranta acu. Chun éifeachtacht an chúnaimh bailithe faisnéise a fheabhsú, ba cheart do Bhallstát óstach a bheith in ann a iarraidh ar an gCoimisiún cúnamh a thabhairt sa phróiseas sin agus an fhaisnéis a bhailiú ina leith. Ag an am céanna, ba cheart don Bhallstát ina bhfuil cónaí ar an duine nádúrtha nó dlítheanach óna bhfuil an fhaisnéis á lorg nó ina bhfuil an duine sin bunaithe, a bheith in ann, laistigh de thréimhse ama réasúnach, agóid a dhéanamh i gcoinne an phróisis sin nó tairiscint a dhéanamh an fhaisnéis sin a sholáthar é féin. Áirithítear leis an bhféidearthacht atá ag an mBallstát sin agóid a dhéanamh go gcoinneoidh na Ballstáit rialú ar bhailiú faisnéise ar a gcríoch. Dá bhrí sin, ba cheart don Choimisiún an Ballstát sin a chur ar an eolas go leormhaith, lena n-áirítear maidir leis an bhfaisnéis a iarrann an Ballstát óstach. Ba cheart do Bhallstát óstach a bheith in ann a roghnú iarraidh ar Bhallstát eile an fhaisnéis is gá a bhailiú nó cúnamh a iarraidh ar an gCoimisiún, ag brath ar a measann sé a bheith níos éifeachtúla nó níos iomchuí i gcás ar leith. Mar chuid d’iarraidh ar fhaisnéis, d’fhéadfadh an duine nádúrtha nó dlítheanach óna bhfuil faisnéis á lorg faisnéis rúnda a fháil, fiú go hindíreach, amhail faisnéis faoin infheistíocht choigríche atá beartaithe. Dá bhrí sin, is gá a shonrú nár cheart don duine nádúrtha nó dlítheanach sin aon fhaisnéis rúnda a fuair sé a úsáid chun aon chríche seachas chun freagra a thabhairt ar an iarraidh ar fhaisnéis agus nár cheart dó í a nochtadh.

(42)

Ba cheart do na Ballstáit agus don Choimisiún rúndacht na faisnéise a sholáthraíonn nó a fhaigheann siad a áirithiú agus an Rialachán seo á chur i bhfeidhm acu, i gcomhréir le dlí an Aontais agus leis an dlí náisiúnta; Níor cheart faisnéis a fhaightear mar thoradh ar chur i bhfeidhm an Rialacháin seo a úsáid ach amháin chun na críche ar soláthraíodh í, lena n-áirítear an fhaisnéis sin a úsáid san athbhreithniú breithiúnach ar chinntí maidir le scagadh. I gcás ina bhféadfadh nochtadh neamhúdaraithe faisnéise dochar a dhéanamh do leasanna an Aontais, nó do leasanna Ballstáit amháin nó níos mó, ba cheart do thionscnóir na faisnéise an fhaisnéis a rúnaicmiú i gcomhréir le dlí an Aontais agus leis an dlí náisiúnta. Agus iad ag freagairt d’iarrataí ar rochtain ar dhoiciméid a láimhseáiltear i gcur i bhfeidhm an Rialacháin seo, tá na Ballstáit agus an Coimisiún le comhordú le chéile agus tá siad leis an leibhéal cosanta le haghaidh na leasanna faoi chosaint atá ar fáil faoi Airteagal 4 de Rialachán (CE) Uimh. 1049/2001 ó Pharlaimint na hEorpa agus ón gComhairle (14) a sholáthar ar a laghad, d’ fhonn cuspóir na n-imscrúduithe a chosaint. Ba cheart don Choimisiún na bearta uile is gá a dhéanamh chun cosaint na faisnéise rúnda a áirithiú i gcomhréir, go háirithe, le Cinntí (AE, Euratom) 2015/443 (15) agus (AE, Euratom) 2015/444 ón gCoimisiún (16). Thairis sin, ba cheart do na Ballstáit agus don Choimisiún na bearta uile is gá a dhéanamh chun a áirithiú go gcomhlíonfar an Comhaontú idir Ballstáit an Aontais Eorpaigh, ag teacht le chéile dóibh i dtionól na Comhairle, maidir le cosaint na faisnéise rúnaicmithe a mhalartaítear ar mhaithe le leas an Aontais Eorpaigh (17). Áirítear leis sin, go háirithe, an oibleagáid gan faisnéis rúnaicmithe a íosghrádú ná a scaoileadh ón rúnaicmiú gan toiliú i scríbhinn roimh ré ón tionscnóir. Aon fhaisnéis atá de chineál íogair ach nach bhfuil rúnaicmithe nó aon fhaisnéis a chuirtear ar fáil ar bhonn rúnda, ba cheart do na húdaráis í a láimhseáil amhlaidh. Ba cheart don údarás scagtha deis a thabhairt don eintiteas a sholáthraíonn an fhaisnéis a léiriú cén fhaisnéis a mheasann sé a bheith rúnda. Is féidir é sin a dhéanamh, mar shampla, trí bhíthin na foirme atá le tíolacadh chun réamhúdarú na hinfheistíochta coigríche a iarraidh.

(43)

Chun rúndacht agus sláine na cumarsáide a choimirciú, ba cheart don Choimisiún córas slán criptithe a bhunú agus a chothabháil a chomhlíonann na caighdeáin is airde cosanta sonraí agus slándála agus lena n-áirítear cumais faireacháin agus iniúchóireachta chun comhlíonadh na gcaighdeán slándála a áirithiú. Ba cheart gach cumarsáid shubstainteach idir na Ballstáit, agus idir na Ballstáit agus an Coimisiún faoin Rialachán seo, a tharchur tríd an gcóras sin, mura rud é gur gá, mar gheall ar chineál na faisnéise atá le tarchur, modhanna eile a úsáid, amhail doiciméid fhisiceacha. Ba cheart a áireamh sa chumarsáid shubstainteach idir na Ballstáit agus an Coimisiún, go háirithe, fógraí tríd an sásra comhair, faisnéis faoin rún barúil a sholáthar nó tuairim a eisiúint, iarrataí ar fhaisnéis ón mBallstát óstach, freagraí ar na hiarrataí, na barúlacha agus na tuairimí sin, agus faisnéis shubstaintiúil nua tar éis fógra a thabhairt faoin infheistíocht choigríche. Níor cheart go ndéanfadh bunú agus úsáid an chórais shláin chriptithe difear don chumarsáid fhoriomlán idir na húdaráis scagtha agus an Coimisiún, ar cumarsáid í ba cheart a bheith indéanta i gcónaí ar gach modh iomchuí.

(44)

Chun a áirithiú go ndéanfar comhduithe a bhaineann le scagadh infheistíochta coigríche a thíolacadh agus a phróiseáil ar bhealach slán éifeachtúil, agus chun an t-ualach riaracháin ar dhaoine nádúrtha nó dlítheanacha araon a dhéanann comhdú agus ar údaráis scagtha a laghdú, ba cheart don Choimisiún, arna iarraidh sin do naoi mBallstát ar a laghad, tairseach ar líne de chuid an Aontais a bhunú (‘tairseach AE ar líne’). Le tairseach AE ar líne, ba cheart sásra aontaithe a sholáthar do dhaoine nádúrtha nó dlítheanacha a dhéanann comhdú chun idirbhearta a chomhdú go leictreonach le húdaráis scagtha. Ba cheart don Choimisiún an córas a dhearadh le go mbeidh sé soláimhsithe agus ba cheart dó a áirithiú go gcomhlíonann sé na riachtanais is infheidhme maidir le cosaint sonraí agus na caighdeáin slándála. Níor cheartúsáid a bhaint as tairseach AE ar líne, má bhunaítear í, ach amháin maidir le hinfheistíochtaí coigríche i mBallstáit a d’iarr go mbeadh feidhm aici. Má iarrann Ballstát gan bheith páirteach i dtairseach AE ar líne sin, níor cheart úsáid a bhaint as tairseach AE ar líne a thuilleadh maidir le hinfheistíochtaí coigríche sa Bhallstát sin, gan difear a dhéanamh d’úsáid leanúnach thairseach AE ar líne ag na Ballstáit ábhartha eile.

(45)

Chun éifeachtacht an tsásra comhair a áirithiú, ba cheart don Choimisiún bunachar sonraí slán a bhunú ina mbeadh faisnéis faoi na hinfheistíochtaí coigríche ar tugadh fógra ina leith tríd an sásra comhair agus faoi thoradh na measúnuithe faoi shásraí um scagadh ón 12 Deireadh Fómhair 2020 i leith. Ba cheart do na Ballstáit, tar éis dóibh an nós imeachta náisiúnta a chur i gcrích, faisnéis áirithe faoin infheistíocht choigríche a uaslódáil chuig an mbunachar sonraí slán, agus d’fhéadfaidís faisnéis bhreise a sholáthar freisin, lena n-áirítear, i gcás inarb infheidhme, faisnéis ghnó ábhartha arna soláthar agus arna fíorú ó dhíoltóirí tráchtála, amhail soláthraithe anailíse riosca nó smachtbhannaí agus seirbhísí um scagadh comhlíontachta. Is iomchuí gan an fhaisnéis sin a chomhroinnt tríd an sásra comhair ach amháin a mhéid a cheadaítear sin leis na socruithe conarthacha lena rialaítear a húsáid agus a nochtadh. Thairis sin, ba cheart do na Ballstáit a bheith in ann faisnéis ábhartha a uaslódáil chuig an mbunachar sonraí slán maidir le cásanna nár comhlíonadh bearta maolaitheacha, go suntasach nó arís agus arís eile, ós rud é go bhféadfadh an fhaisnéis sin a bheith ábhartha chun a chinneadh ar cheart fógra a thabhairt tríd an sásra comhair faoi infheistíochtaí coigríche eile nó ar dócha go ndéanfaidís difear diúltach don tslándáil nó don ord poiblí.

(46)

Chun feabhas a chur ar chumas na mBallstát agus an Choimisiúin rioscaí féideartha don tslándáil nó don ord poiblí a eascraíonn as infheistíochtaí coigríche a shainaithint, a mheasúnú agus a mhaolú, tá sé tábhachtach go mbeadh cumas faisnéise gnó ar ardchaighdeán ar fáil dóibh. Leis an gcumas sin, ba cheart a bheith in ann faisnéis ábhartha a bhailiú agus anailís a dhéanamh uirthi agus, ar an gcaoi sin, measúnuithe riosca comhordaithe a éascú. Faoi chuimsiú an ollstruchtúir ullmhachta i gcomhair géarchéimeanna arna bhunú faoi Rialachán (AE) 2024/2747 ó Pharlaimint na hEorpa agus ón gComhairle (18), forbróidh an Coimisiún gnéithe le haghaidh an chumais sin. D’fhéadfadh sé an sásra comhair faoin Rialachán seo a chomhlánú a mhéid a bhaineann an fhaisnéis a bhailítear, a phróiseáiltear nó a ndéantar anailís uirthi faoi Rialachán (AE) 2024/2747 le rioscaí féideartha don tslándáil nó don ord poiblí.

(47)

Chun cur chuige comhsheasmhach ar fud an Aontais a áirithiú i leith scagadh na n-infheistíochtaí coigríche, tá sé bunriachtanach roinnt de na caighdeáin agus de na critéir a úsáidtear chun measúnú a dhéanamh ar rioscaí dóchúla don tslándáil nó don ord poiblí a shocrú ar leibhéal an Aontais. Ba cheart go gcuirfí san áireamh sna caighdeáin agus sna critéir sin rioscaí a bhaineann leis an infheistíocht choigríche agus rioscaí a bhaineann leis an infheisteoir coigríche.

(48)

Is dóchúla go mbeidh rioscaí ag baint le hinfheistíochtaí coigríche don tslándáil nó don ord poiblí i gcás inar dócha go mbeidh éifeachtaí acu ar earnálacha, ar shócmhainní nó ar ghníomhaíochtaí áirithe atá ríthábhachtach don tslándáil nó d’fheidhmeanna sochaíocha bunriachtanacha. Dá bhrí sin, is iomchuí go ndíreodh na Ballstáit agus an Coimisiún ar na héifeachtaí féideartha sin agus cinneadh á dhéanamh acu i dtaobh an bhféadfadh infheistíocht difear diúltach a dhéanamh don tslándáil nó don ord poiblí. Go háirithe, ba cheart dóibh measúnú a dhéanamh ar an éifeacht dhiúltach is dócha a bheadh ag infheistíocht ar shlándáil, sláine, athléimneacht agus feidhmiú eintitis chriticiúil mar a shainmhínítear i dTreoir (AE) 2022/2557, i bhfianaise na bpríomhfheidhmeanna a dhéanann na heintitis sin agus na n-iarmhairtí a bheadh i gceist dá gcuirfí isteach orthu. Is amhlaidh atá i gcás infheistíochtaí coigríche a d’fhéadfadh difear a dhéanamh d’infhaighteacht teicneolaíochtaí criticiúla, nó do chosaint agus infhaighteacht maoine intleachtúla nó sócmhainní doláimhsithe eile amhail rúin trádála, bunachair sonraí, algartaim nó próisis, ós rud é go bhféadfadh sceitheadh nó neamh-inrochtaineacht na dteicneolaíochtaí nó na sócmhainní sin an bonn a bhaint ón tslándáil. Tá sé chomh tábhachtach céanna do na Ballstáit agus don Choimisiún measúnú a dhéanamh ar a mhéid a d’fhéadfadh infheistíocht choigríche difear a dhéanamh don tslándáil bia, don tsláinte phoiblí, lena n-áirítear soláthar agus infhaighteacht cógas criticiúil, nó do sholáthar leanúnach ionchur criticiúil chomh maith le slándáil saoráidí míleata agus saoráidí poiblí íogaire eile, i bhfianaise an róil ríthábhachtaigh atá ag na hearnálacha agus na sócmhainní sin maidir le hathléimneacht shochaíoch agus leanúnachas seirbhísí buntábhachtacha a chosaint. Ba cheart do na Ballstáit agus don Choimisiún breithniú a dhéanamh freisin ar na héifeachtaí a d’fhéadfadh a bheith ag infheistíochtaí coigríche ar fhaisnéis íogair, lena n-áirítear sonraí pearsanta, go háirithe i gcás ina bhfuil tacair sonraí ar mórscála i gceist, mar gheall ar an riosca go mbainfí mí-úsáid as na sonraí sin nó go ndéanfaí iad a shaothrú go straitéiseach. Thairis sin, ba cheart aird ar leith a thabhairt ar infheistíochtaí coigríche a d’fhéadfadh difear a dhéanamh do thionscadail nó do chláir atá chun leasa an Aontais, i gcás ina bhféadfadh impleachtaí trasteorann don Aontas ina iomláine a bheith ag suaitheadh nó ag tionchar míchuí. Ar deireadh, chun cosaint a tabhairt ar chur isteach eachtrach féideartha, ba cheart do na Ballstáit agus don Choimisiún breithniú a dhéanamh ar na héifeachtaí a d’fhéadfadh a bheith ag infheistíochtaí coigríche ar shaoirse agus ar iolrachas na meán, lena n-áirítear ardáin ar líne agus ardáin na meán sóisialta nó a ngnéithe coimhdeacha, nó timpeallachtaí digiteacha agus idirghníomhacha eile chun críoch oideachais nó áineasa. Ar mhaithe leis an tsoiléireacht, ba cheart liosta na dtionscadal nó na gclár atá chun leasa an Aontais a leagan amach in iarscríbhinn. Ba cheart a áireamh orthu sin na líonraí tras-Eorpacha le haghaidh iompair, fuinnimh nó cumarsáide, mar aon le cláir lena soláthraítear cistiú le haghaidh taighde agus forbairt ar mhaithe le gníomhaíochtaí atá ábhartha don tslándáil nó don ord poiblí. Ba cheart liosta de réimsí teicneolaíochta atá ábhartha do mheasúnuithe riosca faoin Rialachán seo agus liosta de chógais leighis chriticiúla a leagan amach in iarscríbhinní ar leithligh.

(49)

Ba cheart do na Ballstáit agus don Choimisiún comhthéacs agus imthosca na hinfheistíochta coigríche a chur san áireamh freisin. Ba cheart a áireamh leis sin, go háirithe, an dócha go saothróidh an t-infheisteoir coigríche, duine nádúrtha nó eintiteas a bhfuil an t-infheisteoir coigríche faoina rialú, úinéir tairbhiúil an infheisteora coigríche, aon cheann d’fhochuideachtaí an infheisteora coigríche, nó aon pháirtí eile atá faoi úinéireacht nó faoi rialú an infheisteora coigríche, nó a ghníomhaíonn thar ceann an infheisteora coigríche nó faoina threoir, cuspóirí beartais tríú tír nó go n-éascóidh sé forbairt cumais mhíleata tríú tír, chomh maith le cé acu a d’fhéadfadh nó nach bhféadfadh sé an infheistíocht choigríche a úsáid chun tacú le sáruithe tromchúiseacha a dhéanamh ar chearta an duine nó ar an dlí daonnúil idirnáisiúnta. D’fhéadfadh sáruithe tromchúiseacha den sórt sin a bheith ina gcúis le suaitheadh tromchúiseach sa chaidreamh eachtrach nó i gcómhaireachtáil shíochánta na náisiún, rud a dhéanfadh difear do shlándáil na mBallstát. Thairis sin, d’fhéadfadh imthosca amhail iarrataí ar údarú ar diúltaíodh dóibh roimhe sin nó neamhchomhlíonadh beart maolaitheach, rannpháirtíocht roimhe sin i ngníomhaíochtaí a dhéanann difear diúltach don tslándáil nó don ord poiblí, gníomhaíochtaí neamhdhleathacha nó coiriúla, lena n-áirítear teacht timpeall ar bhearta sriantacha an Aontais arna nglacadh de bhun Airteagal 29 CAE agus Airteagal 215 CFAE, bunaíocht i dtríú tír a shainaithnítear mar thír a bhfuil easnaimh straitéiseacha shuntasacha aici ina córas náisiúnta maidir le sciúradh airgid agus maoiniú sceimhlitheoireachta a chomhrac, ceanglas dlíthiúil chun faisnéis a chomhroinnt chun críoch faisnéise nó struchtúr úinéireachta teimhneach a bheith ina bhfachtóirí riosca agus ba cheart, dá bhrí sin, measúnú a dhéanamh orthu freisin. Ina theannta sin, ba cheart do na Ballstáit agus don Choimisiún scrúdú a dhéanamh i dtaobh an bhféadfadh an t-infheisteoir coigríche a bheith ina chainéal do rialtas tríú tír nó do ghníomhaí neamhstáit chun an sprioc-chuideachta de chuid an Aontais a fháil agus tionchar a imirt uirthi go hindíreach. D’fhéadfadh níos mó ná tionchar a imrítear trí struchtúir chorparáideacha nó trí mhodhanna eile dlí chorparáidigh a bheith i gceist le tionchar den sórt sin agus d’fhéadfadh daoine nádúrtha amhail scairshealbhóirí nó stiúrthóirí boird an infheisteora é a imirt ar aon bhealach. Cuimsítear leis sin modhanna neamhfhoirmiúla lena n-áirítear caidrimh phearsanta a ghiaráil, brú pearsanta nó polaitiúil a chur, agus bagairtí agus cleachtais ionramhála nó mheabhlacha eile a úsáid.

(50)

I gcás ina measann an Ballstát óstach gur dócha go mbeidh tionchar diúltach ag infheistíocht choigríche ar an tslándáil nó ar an ord poiblí, is iomchuí a cheangal ar an mBallstát sin bearta iomchuí a dhéanamh chun an riosca sin a mhaolú, i gcás ina mbeidh bearta leormhaithe ar fáil, agus aird chuí á tabhairt ar aon bharúlacha arna soláthar ag Ballstáit eile agus tuairim arna heisiúint ag an gCoimisiún. Níor cheart infheistíochtaí coigríche a thoirmeasc ná a leachtú ach ar bhonn eisceachtúil, i gcás nach leormhaith bearta maolaitheacha ná bearta atá ar fáil faoi dhlí an Aontais ná faoin dlí náisiúnta seachas na bearta sin atá laistigh den sásra um scagadh chun an éifeacht dhiúltach ar an tslándáil nó ar an ord poiblí a mhaolú.

(51)

Chun tacú le cur chun feidhme an tsásra comhair agus chun malartú dea-chleachtas i measc na mBallstát a chothú, ba cheart an grúpa saineolaithe maidir le scagadh na n-infheistíochtaí díreacha coigríche dá dtagraítear i Rialachán (AE) 2019/452, a choinneáil ar bun agus a chúraimí a thabhairt cothrom le dáta i gcomhréir leis an Rialachán seo.

(52)

Ba cheart na Ballstáit agus an Coimisiún a spreagadh chun dul i gcomhar le húdaráis fhreagracha na dtríú tíortha atá ar aon intinn maidir le saincheisteanna a bhaineann le scagadh na n-infheistíochtaí coigríche ar fhorais na slándála nó an oird phoiblí. Ba cheart é a bheith mar aidhm leis an gcomhar riaracháin sin éifeachtacht an chreata a neartú lena ndéanfaidh na Ballstáit scagadh ar infheistíochtaí díreacha coigríche agus lena ndéanfar comhar de bhun an Rialacháin seo idir na Ballstáit agus an Coimisiún. Ba cheart é a bheith indéanta malartú faisnéise agus dea-chleachtas, chomh maith le tacaíocht theicniúil agus tacaíocht fothaithe acmhainneachta, a bheith i gceist leis an gcomhar sin. I gcomhthéacs an chomhair sin, ba cheart don Choimisiún tríú tíortha a spreagadh chun sásraí um scagadh ar infheistíochtaí a bhunú, go háirithe na tíortha sin is iarrthóirí ar aontachas leis an Aontas agus tíortha i gcomharsanacht an Aontais. Ba cheart don Choimisiún faireachán a dhéanamh freisin ar a dtarlaíonn maidir le sásraí um scagadh i dtríú tíortha. Ba cheart an Coimisiún a choimeád ar an eolas faoi theagmhálacha le tríú tíortha a mhéid a bhaineann siad le saincheisteanna sistéamacha a bhaineann le scagadh infheistíochtaí.

(53)

Chun trédhearcacht a fheabhsú d’infheisteoirí coigríche, ba cheart don Choimisiún liosta de na sásraí um scagadh go léir atá ar fáil go poiblí a choinneáil. Thairis sin, a mhéid nach leagtar síos é sin cheana sa dlí náisiúnta, ba cheart do na Ballstáit treoir mhionsonraithe a fhoilsiú agus a thabhairt cothrom le dáta go rialta maidir le raon feidhme a sásra um scagadh, maidir leis na tairseacha agus na truicir le haghaidh oibleagáidí maidir le fógra a thabhairt, agus maidir leis na hamlínte agus na rialacha nós imeachta is infheidhme.

(54)

Ba cheart do na Ballstáit fógra a thabhairt don Choimisiún faoi na sásraí um scagadh atá acu agus faoi aon leasú orthu sin. Ba cheart do na Ballstáit tuarascáil bhliantúil a fhoilsiú maidir le cur i bhfeidhm a sásraí um scagadh, forbairtí reachtacha ábhartha agus gníomhaíochtaí an údaráis scagtha, lena n-áirítear sonraí comhiomlána agus anaithnidithe faoi na hidirbhearta a scagadh.

(55)

Ba cheart don Choimisiún tuarascáil bhliantúil maidir le cur chun feidhme an Rialacháin seo a tharraingt suas agus í a chur faoi bhráid Pharlaimint na hEorpa agus na Comhairle. Ar mhaithe leis an trédhearcacht, ba cheart an tuarascáil sin a chur ar fáil don phobal freisin. Ba cheart an tuarascáil a bheith bunaithe, inter alia, ar thuarascálacha arna gcur faoi bhráid an Choimisiúin ag na Ballstáit uile ar bhonn rúnda agus aird chuí á tabhairt ar an ngá atá le rúndacht faisnéise áirithe a chosaint, go háirithe i gcás ina bhféadfaí difear a dhéanamh do shlándáil nó d’ord poiblí an Aontais le foilsiú na sonraí nó anaithnideacht idirbheart sonrach a chur i mbaol leis. Ba cheart a áireamh sa tuarascáil bhliantúil faisnéis faoi threochtaí agus figiúirí a bhaineann le hinfheistíocht choigríche isteach san Aontas, nuashonruithe ar fhorbairtí reachtacha ábhartha sna Ballstáit, chomh maith le faisnéis faoi iarrachtaí comhair idirnáisiúnta.

(56)

Ba cheart aon phróiseáil sonraí pearsanta de bhun an Rialacháin seo a bheith i gcomhréir leis na rialacha is infheidhme maidir le cosaint sonraí pearsanta. Ba cheart do na pointí teagmhála agus do na heintitis eile laistigh de na Ballstáit próiseáil sonraí pearsanta a dhéanamh i gcomhréir le Rialachán (AE) 2016/679 ó Pharlaimint na hEorpa agus ón gComhairle (19). Aon phróiseáil a dhéanfaidh an Coimisiún ar shonraí pearsanta, ba cheart í a dhéanamh i gcomhréir le Rialachán (AE) 2018/1725 ó Pharlaimint na hEorpa agus ón gComhairle (20). D’fhéadfadh sonraí pearsanta a bheith i ndoiciméid agus i bhfoinsí eile faisnéise a phróiseáiltear chun infheistíocht a scagadh. D’fhéadfadh sé go n-áireofaí ar na sonraí sin ainmneacha daoine nádúrtha arb infheisteoirí i sprioc-chuideachtaí iad, ainmneacha agus sonraí teagmhála daoine nádúrtha a bhfuil baint acu le bainistiú an infheisteora nó na sprioc-chuideachta, nó ainmneacha agus poist daoine a bhfuil baint acu le pointí teagmhála oibriúcháin. Ba cheart do gach údarás inniúil náisiúnta de chuid Ballstáit agus don Choimisiún a bheith freagrach go leithleach as sonraí pearsanta a phróiseáil agus an sásra comhair á úsáid acu.

(57)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 agus thug an Maoirseoir tuairim uaidh an 15 Márta 2024. Ba cheart an Coimisiún agus na Ballstáit a mheas mar rialaitheoirí comhpháirteacha, de réir bhrí Rialachán (AE) 2018/1725 agus Rialachán (AE) 2016/679, chun sonraí pearsanta a phróiseáil. An 28 Aibreán 2022, shínigh an Coimisiún agus ionadaithe nó údaráis na mBallstát atá rannpháirteach sa sásra comhair faoi Rialachán (AE) 2019/452 Comhaontú maidir le Rialaitheoireacht Chomhpháirteach, atá comhoiriúnach leis an Rialachán seo. Dá bhrí sin, ba cheart don Choimisiún agus d’ionadaithe nó d’údaráis na mBallstát atá rannpháirteach sa sásra an Socrú sin maidir le Rialaitheoireacht Chomhpháirteach a choinneáil ar bun, ar cheart dó leanúint d’fheidhm a bheith aige freisin i ndáil leis an Rialachán seo, agus ba cheart tagairtí sa Socrú maidir le Rialú Comhpháirteach d’fhorálacha Rialachán (AE) 2019/452 a léamh, chun na críche sin, mar thagairtí d’fhorálacha comhfhreagracha an Rialacháin seo. Agus Tuairim 13/2024 ón Maoirseoir Eorpach ar Chosaint Sonraí á cur san áireamh, measadh nach mbeadh sé iomchuí tréimhsí coinneála coiteanna a shainiú, ós rud é nach leagtar síos leis an Rialachán seo ach íoscheanglais na sásraí um scagadh agus ós rud é nach bhfuil ach tús curtha ag cuid de na Ballstáit lena sásraí um scagadh a fhorbairt.

(58)

Ba cheart don Choimisiún meastóireacht a dhéanamh ar fheidhmiú agus éifeachtacht an Rialacháin seo laistigh de 4 bliana agus 6 mhí ó dháta theacht i bhfeidhm an Rialacháin seo agus gach 5 bliana ina dhiaidh sin agus ba cheart dó tuarascáil a chur faoi bhráid Pharlaimint na hEorpa agus na Comhairle. Sa tuarascáil sin, ba cheart anailís a dhéanamh ar éabhlóid na n-infheistíochtaí coigríche isteach san Aontas agus ba cheart measúnú a dhéanamh ar rannchuidiú an Rialacháin seo le slándáil eacnamaíoch an Aontais. Ba cheart measúnú a dhéanamh inti freisin i dtaobh an bhfuil údar le modhnú ar raon feidhme íosta coiteann na sásraí um scagadh, lena n-áirítear maidir le hinfheistíochtaí coigríche i sprioc-chuideachtaí de chuid an Aontais a mhonaraíonn nó a shealbhaíonn údarú margaíochta le haghaidh táirgí íocshláinte criticiúla. Ina theannta sin, ba cheart meastóireacht a dhéanamh sa tuarascáil sin ar na rioscaí a bhaineann le hinfheistíochtaí coigríche i seirbhísí meán agus ar an mbealach is fearr chun aghaidh a thabhairt orthu. Ba cheart measúnú a chuimsiú inti freisin i dtaobh ar cheart an Rialachán seo a leasú. I gcás ina bhfuil togra sa tuarascáil chun an Rialachán seo a leasú, ba cheart don Choimisiún a bheith in ann togra reachtach a chur i gceangal leis.

(59)

Ba cheart don Aontas agus do na Ballstáit an Rialachán seo a chur chun feidhme i gcomhréir leis na ceanglais ábhartha maidir le bearta sriantacha a fhorchur ar fhorais na slándála nó an oird phoiblí a leagtar síos i gComhaontuithe na hEagraíochta Domhanda Trádála (21), lena n-áirítear, go háirithe, Airteagal XIV(a) agus Airteagal XIV bis den Chomhaontú Ginearálta maidir le Trádáil Seirbhísí (22). Ba cheart cur chun feidhme an Rialacháin seo a bheith comhsheasmhach freisin leis na gealltanais a tugadh faoi chomhaontuithe eile trádála agus infheistíochta ar comhpháirtithe iontu iad an tAontas nó na Ballstáit chomh maith le comhshocruithe trádála agus infheistíochta inar páirtithe iad an tAontas agus na Ballstáit.

(60)

I gcás inarb é atá in infheistíocht choigríche comhchruinniú a thagann faoi raon feidhme Rialachán (CE) Uimh. 139/2004 ón gComhairle (23), ba cheart nár dhochar cur chun feidhme an Rialacháin seo do chur i bhfeidhm Airteagal 21(4) de Rialachán (CE) Uimh. 139/2004. Ba cheart an Rialachán seo agus Airteagal 21(4) de Rialachán (CE) Uimh. 139/2004 a chur i bhfeidhm ar bhealach comhleanúnach. A mhéid atá raonta feidhme an dá Rialachán faoi seach ag forluí ar a chéile, ba cheart na forais atá leis an scagadh a leagtar amach sa Rialachán seo agus coincheap na leasanna dlisteanacha de réir bhrí Airteagal 21(4) de Rialachán (CE) Uimh. 139/2004 a léirmhíniú ar bhealach comhleanúnach, gan dochar don mheasúnú ar a mhéid atá na bearta náisiúnta atá dírithe ar na leasanna sin a chosaint comhoiriúnach do phrionsabail ghinearálta dhlí an Aontais agus d’fhorálacha eile de dhlí an Aontais.

(61)

Níor cheart difear a dhéanamh leis an Rialachán seo do rialacha an Aontais maidir le measúnú stuamachta ar shealúchais cháilithe san earnáil airgeadais a fháil, a leagtar síos le Treoracha 2009/138/CE (24), 2013/36/AE (25) agus 2014/65/AE ó Pharlaimint na hEorpa agus ón gComhairle (26), ar nós imeachta sainiúil é lena bhfuil cuspóir sonrach.

(62)

Ba cheart cur i bhfeidhm an Rialacháin seo a bheith comhsheasmhach leis na nósanna imeachta eile um fhógra a thabhairt agus um údarú a leagtar amach i ndlí an Aontais, agus an cur i bhfeidhm sin a bheith gan dochar dóibh. Ba cheart a cheadú don Choimisiún úsáid a bhaint as an bhfaisnéis faoina dtugann na Ballstáit fógra faoi chuimsiú an tsásra comhair chun a ról formhaoirseachta ar chur i bhfeidhm dhlí an Aontais a fheidhmiú i gcomhréir le hAirteagal 17 CAE.

(63)

Chun glacadh nó leasú gníomhartha dlí de chuid an Aontais lena mbunaítear tionscadail nó cláir a chur san áireamh, chun liosta na réimsí teicneolaíochta atá ábhartha do mheasúnuithe riosca a oiriúnú agus chun glacadh gníomhartha dlí lena ndéantar foráil maidir le bunú Liosta an Aontais de Tháirgí Íocshláinte Criticiúla a chur san áireamh, ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún i leith leasuithe ar fhorálacha ábhartha an Rialacháin seo agus ar na hIarscríbhinní a ghabhann leis. Le liosta na dtionscadal agus na gclár atá chun leasa an Aontais a leagtar amach san Iarscríbhinn ábhartha a ghabhann leis an Rialachán seo, ba cheart tionscadail nó cláir a chumhdach ar tionscadail nó cláir iad a bhunaítear le dlí an Aontais agus lena ndéantar foráil maidir le bonneagar criticiúil, teicneolaíochtaí criticiúla nó ionchuir chriticiúla a fhorbairt, a choinneáil ar bun nó a fháil agus ar bonneagar, ar teicneolaíochtaí nó arb ionchuir iad a bhfuil tábhacht ar leith acu don tslándáil nó don ord poiblí. Ba cheart a áireamh ar an liosta de réimsí teicneolaíochta atá ábhartha do mheasúnuithe riosca a leagtar amach san Iarscríbhinn ábhartha a ghabhann leis an Rialachán seo réimsí ina bhféadfadh infheistíocht choigríche difear a dhéanamh don tslándáil nó don ord poiblí i níos mó ná Ballstát amháin trí sprioc-chuideachta de chuid an Aontais, nach nglacann páirt i dtionscadal nó i gclár atá chun leasa an Aontais ná nach bhfaigheann cistí ó thionscadal nó ó chlár den sórt sin. A mhéid a bhaineann le táirgí íocshláinte criticiúla, tá sé tábhachtach, nuair a bheidh Liosta an Aontais de Tháirgí Íocshláinte Criticiúla bunaithe ag an gCoimisiún trí bhíthin gníomh cur chun feidhme arna ghlacadh de bhun Rialachán lena leagtar síos nósanna imeachta an Aontais maidir le húdarú agus maoirseacht táirgí íocshláinte lena n-úsáid ag an duine agus lena mbunaítear rialacha lena rialaítear an Ghníomhaireacht Leigheasra Eorpach, lena leasaítear Rialacháin (CE) Uimh. 1394/2007 (27) agus (AE) Uimh. 536/2014 (28) agus lena n-aisghairtear Rialacháin (CE) Uimh. 141/2000 (29), (CE) Uimh. 726/2004 (30) agus (CE) Uimh. 1901/2006 (31), go dtabharfaí cothrom le dáta an tagairt do na táirgí íocshláinte criticiúla atá le cur san áireamh ag na Ballstáit agus ag an gCoimisiún agus cinneadh á dhéanamh acu i dtaobh an dócha go ndéanfaidh infheistíocht choigríche difear diúltach don tslándáil nó don ord poiblí agus go gcuirfí ina hionad tagairt do Liosta an Aontais de Tháirgí Íocshláinte Criticiúla agus do leasuithe arna ndéanamh air ina dhiaidh sin agus gur cheart an iarscríbhinn ábhartha a scriosadh. Tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear ar leibhéal na saineolaithe agus go ndéanfaí na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (32). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid uile ag an am céanna leis na saineolaithe sna Ballstáit, agus bíonn rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe.

(64)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, go háirithe a mhéid a bhaineann leis an bhfoirm atá le húsáid chun faisnéis a sholáthar faoi infheistíochtaí coigríche, na socruithe maidir le feidhmiú an chórais shláin chriptithe agus thairseach AE ar líne, an treoraíocht theicniúil do na Ballstáit maidir leis an mbunachar sonraí slán i ndáil le toradh na measúnuithe faoi shásraí náisiúnta um scagadh, agus an fhoirm atá le húsáid ag na Ballstáit chun iad a thuairisciú go bliantúil don Choimisiún, ba cheart cumhachtaí cur chun feidhme a thabhairt don Choimisiún. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (33).

(65)

I gcomhréir le prionsabal na comhréireachta, is gá agus is iomchuí, chun an bunchuspóir a bhaint amach, is é sin a áirithiú nach mbeidh tionchar diúltach ag infheistíochtaí coigríche isteach san Aontas ar an tslándáil ná ar an ord poiblí, rialacha a leagan síos maidir le creat de chuid an Aontais maidir le scagadh infheistíochtaí coigríche ag na Ballstáit ina gcríoch, ar fhorais na slándála nó an oird phoiblí agus maidir le sásra comhair chun a chur ar a gcumas do na Ballstáit agus don Choimisiún faisnéis ábhartha faoi infheistíochtaí coigríche a mhalartú, measúnú a dhéanamh ar an éifeacht a d’fhéadfadh a bheith acu ar an tslándáil nó ar an ord poiblí, agus ábhair imní a d’fhéadfadh a bheith ann a shainaithint. Ní théann an Rialachán seo thar a bhfuil riachtanach chun an cuspóir arna shaothrú a ghnóthú, i gcomhréir le hAirteagal 5(4) CAE.

(66)

Ba cheart Rialachán (AE) 2019/452 a aisghairm. Chun go mbeidh tréimhse leordhóthanach ag na Ballstáit agus eintitis chun ullmhú dá chur chun feidhme, ba cheart feidhm a bheith ag an Rialachán seo ag tosú 18 mí ó dháta a theacht i bhfeidhm. Chun deimhneacht dhlíthiúil agus comhar rianúil idir na Ballstáit agus an Coimisiún a áirithiú maidir le scagadh na n-infheistíochtaí coigríche, agus ionchais dhlisteanacha infheisteoirí coigríche á gcur san áireamh, is iomchuí leanúint d’fheidhm a bheith ag Rialachán (AE) 2019/452 maidir le hinfheistíochtaí díreacha coigríche a bhfuil scagadh á dhéanamh orthu ar dháta chur i bhfeidhm an Rialacháin seo, nó a chuirtear i gcrích faoi dháta chur i bhfeidhm an Rialacháin seo. Áirítear leis sin an fhéidearthacht do na Ballstáit barúlacha a sholáthar nó don Choimisiún tuairim a eisiúint de bhun Airteagal 7(8) de Rialachán (AE) 2019/452. Níor cheart feidhm a bheith ag an Rialachán seo maidir le hinfheistíochtaí díreacha coigríche a leanann Rialachán (AE) 2019/452 d’fheidhm a bheith aige ina leith. Níor cheart feidhm a bheith aige ach oiread maidir le hinfheistíochtaí coigríche eile a bhfuil scagadh á dhéanamh orthu ar dháta chur i bhfeidhm an Rialacháin seo, amhail infheistíochtaí laistigh den Aontas atá faoi réir scagadh cheana de bhun an dlí náisiúnta. Is iomchuí freisin a shoiléiriú nach bhfuil feidhm ag an Rialachán seo maidir le hinfheistíochtaí coigríche a chuirtear i gcrích faoi dháta chur i bhfeidhm an Rialacháin seo,