(1)

L-Unjoni tilqa’ l-investimenti barranin peress li huma jikkontribwixxu għat-tkabbir billi jtejbu l-kompetittività tagħha, joħolqu l-impjiegi u l-ekonomiji ta’ skala, u jġibu kapital, teknoloġiji, innovazzjoni u għarfien espert.

(2)

L-Artikolu 3(5) tat-Trattat dwar l-Unjoni Ewropea (TUE) jispeċifika li l-Unjoni, fir-relazzjonijiet tagħha mal-bqija tad-dinja, għandha tafferma u tippromwovi l-valuri u l-interessi tagħha u tikkontribwixxi għall-protezzjoni taċ-ċittadini tagħha.

(3)

L-Unjoni u l-Istati Membri għandhom ambjent ta’ investiment miftuħ, li huwa minqux fit-Trattat dwar il-Funzjonament tal-Unjoni Ewropea (TFUE) u inkorporat fl-impenji internazzjonali tal-Unjoni u tal-Istati Membri tagħha. Madankollu, l-Artikolu 21(2) tat-TUE jiddikjara li l-politiki u l-azzjonijiet tal-Unjoni għandhom l-għan li jissalvagwardjaw il-valuri, l-interessi fundamentali, is-sigurtà, l-indipendenza u l-integrità tagħha. Dawk il-prinċipji u l-objettivi jirfdu l-politika kummerċjali komuni tal-Unjoni, kif stabbilit fl-Artikolu 207 tat-TFUE, inkluż fir-rigward tal-investiment barrani. F’dak il-kuntest, taħt l-impenji internazzjonali meħuda fl-Organizzazzjoni Dinjija tal-Kummerċ (WTO), l-Organizzazzjoni għall-Kooperazzjoni u l-Iżvilupp Ekonomiċi (OECD) u fil-ftehimiet ta’ kummerċ u investiment konklużi ma’ pajjiżi terzi, huwa possibbli għall-Unjoni jew l-Istati Membri li jirrestrinġu l-investimenti diretti barranin għal raġunijiet ta’ sigurtà jew ordni pubbliku, soġġetti għal ċerti rekwiżiti.

(4)

Skont ir-Regolament (UE) 2019/452 tal-Parlament Ewropew u tal-Kunsill (4), ġie stabbilit qafas għall-iskrinjar mill-Istati Membri tal-investimenti diretti barranin fl-Unjoni. B’mod partikolari, dak ir-Regolament stabbilixxa mekkaniżmu ta’ kooperazzjoni li jippermetti lill-Istati Membri u lill-Kummissjoni jiskambjaw informazzjoni dwar l-investimenti diretti barranin u jqajmu tħassib dwar ir-riskji għas-sigurtà jew għall-ordni pubbliku. Dak il-mekkaniżmu ta’ kooperazzjoni kien jirrikjedi li l-Istat Membru li fih ikun qed iseħħ l-investiment dirett barrani iqis kif xieraq il-kummenti pprovduti minn Stati Membri oħra u l-opinjoni maħruġa mill-Kummissjoni fid-deċiżjoni tal-iskrinjar tagħha.

(5)

Il-qafas stabbilit skont ir-Regolament (UE) 2019/452 laħaq l-objettiv tiegħu li jipprovdi mekkaniżmu formali għall-Istati Membri u għall-Kummissjoni biex jiskambjaw informazzjoni dwar l-investimenti diretti barranin u biex iqajmu kuxjenza dwar ir-riskji transfruntiera għas-sigurtà jew l-ordni pubbliku li jirriżultaw minn ċerti investimenti diretti barranin.

(6)

Madankollu, huwa meħtieġ strument leġiżlattiv ġdid biex jissaħħu l-effiċjenza u l-effettività tal-iskrinjar tal-investimenti diretti barranin u biex jiġi żgurat livell ogħla ta’ armonizzazzjoni madwar l-Unjoni. Tali titjib huwa meħtieġ minħabba n-natura li qed tevolvi tal-flussi tal-investimenti. L-integrazzjoni tal-ekonomiji globali, flimkien mal-gwerra u t-tensjonijiet ġeopolitiċi, wasslet biex jitfaċċaw riskji ġodda li jeħtieġ li jiġu indirizzati mill-Unjoni u mill-Istati Membri. Fl-20 ta’ Ġunju 2023, il-Kummissjoni u r-Rappreżentant Għoli tal-Unjoni għall-Affarijiet Barranin u l-Politika ta’ Sigurtà adottaw komunikazzjoni konġunta intitolata “Strateġija Ewropea ta’ Sigurtà Ekonomika” u, fit-3 ta’ Diċembru 2025, adottaw komunikazzjoni konġunta intitolata “Insaħħu s-sigurtà ekonomika tal-UE”. Dawk il-komunikazzjonijiet jidentifikaw l-iskrinjar tal-Investiment Dirett Barrani (IDB) bħala għodda biex l-Unjoni tiġi protetta kontra r-riskji għas-sigurtà ekonomika. Il-komunikazzjonijiet jissottolinjaw il-ħtieġa li jiġu indirizzati r-riskji assoċjati mar-reżiljenza tal-ktajjen tal-provvista, mal-aċċess għall-infrastruttura kritika, mal-ħrib tat-teknoloġija, u mal-istrumentalizzazzjoni tad-dipendenzi ekonomiċi jew mal-koerċizzjoni ekonomika.

(7)

Ċerti investimenti barranin li mhumiex koperti mir-Regolament (UE) 2019/452 jistgħu joħolqu riskji għas-sigurtà jew għall-ordni pubbliku. Dawk ir-riskji jikkonċernaw, b’mod partikolari, ċerti investimenti barranin imwettqa fi Stati Membri li għad ma għandhomx mekkaniżmu ta’ skrinjar fis-seħħ, investimenti barranin imwettqa fi Stati Membri li tassew għandhom mekkaniżmu ta’ skrinjar fis-seħħ iżda li l-kamp ta’ applikazzjoni tiegħu ma jinkludix ċerti investimenti barranin sensittivi, u investimenti barranin li jsiru minn investituri barranin permezz ta’ sussidjarja stabbilita fl-Unjoni (“investimenti intra-Unjoni”) u li potenzjalment jippreżentaw l-istess riskji għas-sigurtà jew għall-ordni pubbliku bħall-investimenti barranin magħmula direttament minn pajjiżi terzi.

(8)

Meta maġġoranza sinifikanti tal-Istati Membri, iżda mhux kollha, kellhom strument leġiżlattiv fis-seħħ li ppreveda mekkaniżmu għall-iskrinjar tal-investimenti diretti barranin, in-nuqqas ta’ mekkaniżmu ta’ skrinjar f’ċerti Stati Membri ppermetta lill-investituri barranin problematiċi li jixtiequ jinvestu f’assi sensittivi jinvestu f’dawk l-Istati Membri bħala bieb għas-suq intern. Barra minn hekk, f’ħafna Stati Membri, il-liġijiet nazzjonali jestendu wkoll l-iskrinjar għall-investimenti intra-Unjoni. Fost l-Istati Membri hemm differenzi sostanzjali fir-rigward tal-kamp ta’ applikazzjoni, il-limiti u l-kriterji użati biex jiġi vvalutat jekk investiment barrani huwiex probabbli li jaffettwa b’mod negattiv is-sigurtà jew l-ordni pubbliku. Hemm ukoll differenzi fi proċeduri ta’ skrinjar. Dan ir-Regolament għandu l-għan li jnaqqas id-diverġenzi dwar elementi fundamentali tal-mekkaniżmi ta’ skrinjar implimentati fil-livell nazzjonali. F’ċerti Stati Membri, l-investiment barrani jista’ jiġi implimentat qabel ma jkun irċieva approvazzjoni fir-rigward tal-effett fuq is-sigurtà jew l-ordni pubbliku. Madankollu, oħrajn jeħtieġu li l-investiment barrani jiġi ffinalizzat biss wara awtorizzazzjoni skont il-mekkaniżmu ta’ skrinjar. Diverġenzi bħal dawn joħolqu problema għall-funzjonament bla xkiel tas-suq intern. Pereżempju, joħolqu kundizzjonijiet mhux ekwi u jżidu l-kostijiet tal-konformità għall-investituri li jfittxu li jinnotifikaw tranżazzjonijiet f’aktar minn Stat Membru wieħed. It-tnaqqis tad-diverġenza huwa kruċjali biex tiġi żgurata l-prevedibbiltà għall-investituri fir-rigward tar-reġimi nazzjonali applikabbli u l-karatteristiċi tagħhom, u b’hekk jitnaqqsu kostijiet tal-konformità assoċjati. Dan huwa aktar u aktar rilevanti meta jitqies il-livell ta’ integrazzjoni tas-suq intern, li jista’ jirriżulta fi tranżazzjoni waħda li jkollha impatt fuq diversi Stati Membri madwar l-Unjoni. Pereżempju, huwa possibbli li tranżazzjoni mmirata għall-akkwist ta’ impriża stabbilita skont il-liġijiet ta’ Stat Membru wieħed taffettwa wkoll is-sigurtà jew l-ordni pubbliku ta’ Stat Membru ieħor, minħabba l-istruttura tal-katina tal-provvista jew elementi ekonomiċi oħra li jgħaqqdu l-entità fil-mira tal-Unjoni ma’ kumpaniji oħra bbażati fi Stati Membri oħra. Sabiex jiġu indirizzati tali problemi relatati mal-integrazzjoni tas-suq intern u sabiex jiġu żgurati konsistenza u prevedibbiltà akbar, huwa xieraq li l-kriterji u l-elementi li għandhom jintużaw għall-valutazzjoni tal-investimenti barranin jiġu stabbiliti permezz ta’ azzjoni tal-Unjoni. Għalhekk, dan ir-Regolament għandu l-għan li jżid il-konverġenza tar-regoli nazzjonali applikabbli għall-iskrinjar tal-investimenti barranin, inklużi l-investimenti intra-Unjoni, u b’hekk joħloq kundizzjonijiet ekwi, iżid iċ-ċertezza għall-investituri barranin, u jipprevjeni li jitfaċċaw ostakli addizzjonali għas-suq intern.

(9)

Bl-għan li jiġi żgurat approċċ konsistenti għall-iskrinjar tal-investiment barrani madwar l-Unjoni, jenħtieġ li l-Istati Membri kollha jkunu meħtieġa jiskrinjaw l-investimenti barranin għal raġunijiet ta’ sigurtà jew ordni pubbliku. Barra minn hekk, l-elementi ewlenin tal-mekkaniżmi nazzjonali ta’ skrinjar jenħtieġ li jiġu armonizzati. Jenħtieġ li dik l-armonizzazzjoni minima tinkludi obbligu li l-Istati Membri jiżguraw li l-investimenti barranin immirati lejn entitajiet li joperaw f’sett speċifiku ta’ oqsma sensittivi jiġu skrinjati. Jenħtieġ li dak l-obbligu jiżgura li ċerti investimenti barranin sensittivi jiġu skrinjati fl-Istati Membri kollha. Barra minn hekk, jenħtieġ li dan ir-Regolament ikompli jarmonizza u jiċċara l-proċeduri taħt il-mekkaniżmu ta’ kooperazzjoni u l-interazzjoni bejn il-mekkaniżmi ta’ skrinjar u l-mekkaniżmu ta’ kooperazzjoni. B’mod partikolari, huwa xieraq li jiġi żgurat li l-mekkaniżmi ta’ skrinjar kollha jinkludu rieżami inizjali li jenħtieġ li ma jdumx aktar minn 45 jum kalendarju mid-data li fiha l-preżentazzjoni titqies kompluta mill-awtorità tal-iskrinjar. Għalhekk, għall-finijiet ta’ dan ir-Regolament, jenħtieġ li tiġi introdotta definizzjoni ta’ “preżentazzjoni” li tkopri kemm is-sottomissjoni inizjali tad-dokumentazzjoni meħtieġa kif ukoll il-valutazzjoni ta’ jekk talba titqiesx kompluta. Fejn meħtieġ, jenħtieġ li titwettaq investigazzjoni fil-fond. Barra minn hekk, l-iskedi ta’ żmien għan-notifika permezz tal-mekkaniżmu ta’ kooperazzjoni jenħtieġ li jiġu armonizzati, u l-passi għall-proċedura taħt il-mekkaniżmu ta’ kooperazzjoni, b’mod partikolari fir-rigward tal-provvista ta’ kummenti mill-Istati Membri u l-ħruġ ta’ opinjonijiet tal-Kummissjoni, jenħtieġ li jkunu allinjati aħjar. Tali armonizzazzjoni u allinjament jippermettu li jiġu indirizzati sitwazzjonijiet fejn l-iskedi ta’ żmien tal-proċeduri nazzjonali ma jkunux allinjati, u li għalhekk jistgħu jdewmu tranżazzjoni. Jenħtieġ li jkun hemm ċertu livell ta’ armonizzazzjoni tal-kriterji li l-Istati Membri u l-Kummissjoni jenħtieġ li jikkunsidraw meta jkunu qed jivvalutaw jekk investiment barrani huwiex probabbli li jaffettwa b’mod negattiv is-sigurtà jew l-ordni pubbliku. Dak is-sett komuni ta’ kriterji jenħtieġ li jinkludi s-sigurtà, l-integrità, ir-reżiljenza u l-funzjonament tal-entitajiet kritiċi, id-disponibbiltà tat-teknoloġiji kritiċi jew il-kontinwità tal-provvista tal-inputs kritiċi. Is-sett komuni ta’ kriterji jiżgura valutazzjoni aktar uniformi tal-effett negattiv probabbli tal-investimenti barranin fuq is-sigurtà jew l-ordni pubbliku filwaqt li jippreserva l-possibbiltà li l-Istati Membri jqisu kriterji ulterjuri li jistgħu jkunu differenti minn Stat Membru għal ieħor.

(10)

L-iskrinjar tal-investimenti barranin jenħtieġ li jitwettaq f’konformità ma’ dan ir-Regolament. Tali skrinjar jenħtieġ li jqis l-informazzjoni kollha disponibbli u jenħtieġ li jaderixxi mal-prinċipju tal-proporzjonalità. Jenħtieġ li jirrispetta l-objettiv tal-preservazzjoni ta’ ambjent ta’ investiment miftuħ u tas-suq intern. Barra minn hekk, l-iskrinjar tal-investimenti barranin jenħtieġ li jikkonforma mad-dritt tal-Unjoni, u b’mod partikolari mal-Artikoli 49 u 63 tat-TFUE. Kwalunkwe restrizzjoni fuq il-libertà tal-istabbiliment jew il-moviment liberu tal-kapital li tista’ tirriżulta minn mekkaniżmi ta’ skrinjar jew deċiżjonijiet ta’ skrinjar, bħall-impożizzjoni ta’ miżuri ta’ mitigazzjoni jew il-projbizzjoni jew ix-xoljiment ta’ investiment barrani, jenħtieġ li tiġi ġġustifikata minn raġunijiet ta’ ordni pubbliku jew sigurtà pubblika, inkluż theddid ġenwin u serju biżżejjed għal interess fundamentali tas-soċjetà. Tali raġunijiet ta’ ordni pubbliku jew sigurtà pubblika jinkludu riskji għall-funzjonament tal-istituzzjonijiet u s-servizzi pubbliċi essenzjali, għall-forniment ta’ prodotti jew servizzi essenzjali jew għas-sopravivenza tal-popolazzjoni, riskji ta’ tfixkil serju għar-relazzjonijiet barranin jew għall-koeżistenza paċifika tan-nazzjonijiet, jew riskji għall-interessi militari.

(11)

Sabiex il-mekkaniżmu ta’ kooperazzjoni stabbilit minn dan ir-Regolament ikun jista’ jiffunzjona b’mod effiċjenti u effettiv, huwa meħtieġ li jiġi definit kamp ta’ applikazzjoni minimu komuni tal-investimenti barranin li l-Istati Membri kollha jenħtieġ li jiskrinjaw.

(12)

Huwa meħtieġ li l-Istat Membru li fih investiment barrani jkun ippjanat li jitlesta jew ikun tlesta (“l-Istat Membru ospitanti”) isir aktar responsabbli lejn il-Kummissjoni u lejn dawk l-Istati Membri li jesprimu tħassib debitament ġustifikat dwar is-sigurtà jew l-ordni pubbliku.

(13)

Il-qafas komuni stabbilit f’dan ir-Regolament jenħtieġ li jkun mingħajr preġudizzju għar-responsabbiltà esklużiva ta’ kull Stat Membru li jissalvagwardja s-sigurtà nazzjonali tiegħu kif previst fl-Artikolu 4(2) tat-TUE. Dak il-qafas komuni jenħtieġ li jkun ukoll mingħajr preġudizzju għall-protezzjoni tal-interessi essenzjali tas-sigurtà tal-Istati Membri f’konformità mal-Artikolu 346 tat-TFUE.

(14)

Dan ir-Regolament jenħtieġ li jkopri l-investimenti barranin li joħolqu jew iżommu rabtiet dejjiema u diretti bejn investituri barranin, inklużi korpi Statali, u l-entitajiet fil-mira tal-Unjoni li jwettqu attività ekonomika fi Stat Membru. Dan ir-Regolament jenħtieġ li japplika meta l-investimenti barranin jitwettqu direttament minn investitur barrani jew huma investiment intra-Unjoni. Madankollu, dan jenħtieġ li ma jkoprix l-akkwist ta’ titoli ta’ kumpanija maħsuba purament għall-investiment finanzjarju mingħajr l-intenzjoni li jinfluwenza l-ġestjoni jew il-kontroll tal-kumpanija (investimenti tal-portafoll).

(15)

Jinħolqu rabtiet dejjiema u diretti bejn l-investitur barrani u entità fil-mira tal-Unjoni meta l-investitur barrani jikseb parteċipazzjoni effettiva fil-ġestjoni jew fil-kontroll tal-entità fil-mira tal-Unjoni. Dan huwa ċertament il-każ meta l-investitur barrani jikseb influwenza deċiżiva fuq l-entità fil-mira tal-Unjoni, jiġifieri l-kapaċità li jiddetermina waħdu jew b’mod konġunt il-politika kummerċjali tal-entità fil-mira tal-Unjoni jew de facto jew de jure. Madankollu, parteċipazzjoni effettiva fil-ġestjoni jew fil-kontroll tal-entità fil-mira tal-Unjoni tista’ teżisti wkoll meta l-investitur barrani, mingħajr ma jkollu influwenza deċiżiva fuq l-entità fil-mira tal-Unjoni, xorta waħda jista’ jkollu impatt materjali fuq il-politika kummerċjali, l-imġiba jew id-deċiżjonijiet tagħha, pereżempju permezz ta’ parteċipazzjoni azzjonarja, drittijiet tal-vot, kuntratti, inkluż ingranaġġ li jirriżulta minn relazzjonijiet mal-fornituri, u rappreżentanza sinifikanti fil-bord.

(16)

L-akkwiżizzjonijiet permezz ta’ għodod ta’ riżoluzzjoni fl-ambitu tal-oqfsa ta’ riżoluzzjoni konċernati (għall-banek, il-kontropartijiet ċentrali jew l-impriżi tal-assigurazzjoni jew tar-riassigurazzjoni) jenħtieġ li jiġu esklużi mill-kamp ta’ applikazzjoni ta’ dan ir-Regolament. F’ċirkostanzi bħal dawn, il-ħin huwa essenzjali u spiss id-deċiżjonijiet jittieħdu mil-lum għal għada. Il-proċeduri ta’ skrinjar previsti f’dan ir-Regolament jistgħu jxekklu l-kapaċità li jingħata rispons fil-ħin. Sabiex jiġu evitati riskji għall-istabbiltà finanzjarja, it-tranżazzjonijiet ta’ riżoluzzjoni jenħtieġ li, għaldaqstant, jiġu esklużi. L-awtoritajiet ta’ riżoluzzjoni jenħtieġ li jqisu, sa fejn ikun possibbli, l-objettiv ta’ dan ir-Regolament meta jkunu qed iwettqu azzjonijiet ta’ riżoluzzjoni bl-involviment ta’ investitur barrani, b’mod partikolari meta jkunu involuti assi strateġiċi.

(17)

L-operazzjonijiet ta’ ristrutturar fi ħdan grupp korporattiv jenħtieġ li jaqgħu barra mill-kamp ta’ applikazzjoni ta’ dan ir-Regolament meta tali operazzjonijiet jitwettqu biss għall-fini tar-riorganizzazzjoni interna, pereżempju permezz tal-fużjoni jew id-diviżjoni, ta’ entità fil-mira tal-Unjoni jew tal-grupp korporattiv li għalih tappartjeni l-entità fil-mira tal-Unjoni, mingħajr ma jirriżultaw f’xi bidla fis-sjieda benefiċjarja tal-entità fil-mira tal-Unjoni. B’mod partikolari, ir-ristrutturazzjonijiet interni jenħtieġ li jiġu esklużi mill-kamp ta’ applikazzjoni meta: ma jirriżultawx fl-akkwist ta’ sjieda jew kontroll minn investitur barrani ġdid fuq l-entità fil-mira tal-Unjoni jew fuq kumpanija li direttament jew indirettament tippossjedi jew tikkontrolla lil dik l-entità fil-mira tal-Unjoni; ma jwasslux għal żieda fl-ishma miżmuma minn investituri barranin; u ma jagħtux drittijiet addizzjonali lill-investituri barranin li jistgħu jwasslu għal bidla fil-parteċipazzjoni effettiva ta’ investitur barrani wieħed jew aktar fil-ġestjoni jew fil-kontroll tal-entità fil-mira tal-Unjoni. Madankollu, ir-ristrutturazzjonijiet interni li jinvolvu l-introduzzjoni ta’ entità ġuridika ġdida, stabbilita f’pajjiż terz li ma tkunx diġà rappreżentata fil-katina tas-sjieda upstream tal-entità fil-mira tal-Unjoni, jistgħu joħolqu riskji għas-sigurtà u għalhekk jenħtieġ li jiġu inklużi fil-kamp ta’ applikazzjoni ta’ dan ir-Regolament. Pereżempju, tali entità tista’ tkun soġġetta għal-liġi ta’ pajjiż terz li jimponi obbligi fuq persuni fiżiċi jew ġuridiċi biex jikkondividu informazzjoni għal finijiet ta’ intelligence mingħajr proċess ġust jew mekkaniżmi ta’ sorveljanza.

(18)

Ir-Regolament (UE) 2019/452 ikopri biss l-investimenti diretti barranin magħmula direttament minn investituri barranin fl-Unjoni. Madankollu, huwa meħtieġ li l-kamp ta’ applikazzjoni ta’ dan ir-Regolament jiġi estiż għall-investimenti barranin magħmula bejn l-Istati Membri li jitwettqu permezz ta’ impriża li tkun stabbilita fi Stat Membru u li tkun ikkontrollata, direttament jew indirettament, minn investitur barrani (“sussidjarja ta’ investitur barrani fl-Unjoni”). Dawk l-investimenti barranin iġorru l-istess riskji speċifiċi għas-sigurtà jew għall-ordni pubbliku bħall-investimenti diretti barranin imwettqa permezz ta’ entità ġuridika mhux stabbilita fl-Unjoni, minħabba li l-investitur barrani kontrollanti għandu setgħa u influwenza fuq l-entità fil-mira tal-Unjoni anke jekk jiġu eżerċitati permezz tas-sussidjarja tal-investitur barrani fl-Unjoni. Dawk ir-riskji speċifiċi jistgħu jiġu kkawżati mill-ġuriżdizzjoni li għaliha jkun soġġett l-investitur barrani jew mill-influwenza tal-gvern jew ta’ atturi mhux statali ta’ pajjiż terz. Tali riskji mhumiex ikkawżati minn investimenti barranin imwettqa minn investituri li mhumiex ikkontrollati, direttament jew indirettament, minn persuna jew entità ta’ pajjiż terz. Għalhekk huwa xieraq li fil-kamp ta’ applikazzjoni ta’ dan ir-Regolament jiġu inklużi investimenti barranin magħmula permezz ta’ sussidjarja ta’ investitur barrani fl-Unjoni iżda mhux l-investimenti magħmula minn investituri oħra tal-Unjoni, b’mod partikolari biex jiġi żgurat li l-investimenti barranin li joħolqu rabta dejjiema bejn l-investitur barrani u l-entità fil-mira tal-Unjoni, kemm jekk imwettqa direttament minn investitur barrani u kemm jekk permezz ta’ entità stabbilita fl-Unjoni u kkontrollata minn investitur barrani, ikunu koperti b’mod konsistenti. Dan iżid il-konsistenza u l-prevedibbiltà tar-regoli tal-iskrinjar fl-Istati Membri kollha, li min-naħa tagħhom inaqqsu l-kostijiet tal-konformità għall-investituri barranin u jneħħu l-inċentiv biex isir investiment fi Stati Membri fejn tali tranżazzjonijiet ma jiġux skrinjati.

(19)

Sabiex tiġi żgurata valutazzjoni xierqa ta’ jekk investiment barrani huwiex probabbli li jaffettwa b’mod negattiv is-sigurtà jew l-ordni pubbliku, huwa importanti li t-terminu “sid benefiċjarju” jkopri d-detenturi veri ta’ influwenza, kemm direttament kif ukoll indirettament, fuq investitur barrani jew entità fil-mira tal-Unjoni. Fil-każ ta’ trusts, is-sjieda legali hija tat-trust bħala tali, iżda l-benefiċċju ekonomiku huwa għall-persuna fiżika jew għall-persuni fiżiċi li f’isimhom jopera t-trust. Għal din ir-raġuni, id-definizzjoni ta’ “sid benefiċjarju” jenħtieġ li tkopri wkoll lil dawk li fl-aħħar mill-aħħar jibbenefikaw mill-investiment barrani, b’mod partikolari l-benefiċjarji ta’ trust. Madankollu, huwa meħtieġ li jitqies il-fatt li l-investituri barranin jistgħu xi drabi jkunu faċċata għall-persuna li fil-fatt tkun wara l-investiment barrani. Bl-istess mod, l-investituri barranin jistgħu xi drabi jiġu mġiegħla minn atturi oħra li fl-aħħar mill-aħħar ikunu kapaċi jeżerċitaw influwenza fuq l-investiment barrani. Għalhekk, id-definizzjoni ta’ “sid benefiċjarju” jenħtieġ li tinkludi wkoll il-persuni fiżiċi li f’isimhom isir l-investiment barrani jew li f’isimhom jiġi eżerċitat il-kontroll fuq dak l-investiment barrani. B’mod ġenerali, persuna fiżika waħda hija s-sid benefiċjarju ta’ investitur barrani. Madankollu, ma jistax jiġi eskluż li jista’ jkun hemm aktar minn persuna waħda, bħal fil-każ ta’ konjuġi jew membri oħra tal-familja. Bl-istess mod, huwa meħtieġ li jitqiesu s-sitwazzjonijiet fejn ma jkunx possibbli li tiġi identifikata l-persuna fiżika, inkluż fil-każ ta’ kumpaniji nnegozjati pubblikament. F’sitwazzjonijiet bħal dawn, il-persuna ġuridika, l-entità jew it-trust fl-ogħla livell identifikabbli fil-katina tas-sjieda upstream jew fil-katina tal-kontroll tal-investitur barrani jew tal-entità fil-mira tal-Unjoni jenħtieġ li jitqiesu bħala s-sid benefiċjarju.

(20)

Dan ir-Regolament jipprevedi biss elementi ewlenin tal-mekkaniżmi ta’ skrinjar. Għalhekk, jenħtieġ li l-Istati Membri jkunu jistgħu jadottaw dispożizzjonijiet nazzjonali li huma komplementari għad-dispożizzjonijiet ta’ dan ir-Regolament jew li huma aktar speċifiċi minnhom. Pereżempju, jenħtieġ li l-Istati Membri jkunu jistgħu jispeċifikaw il-limiti tad-drittijiet tal-vot miksuba mill-investituri li jiskattaw l-iskrinjar tal-investimenti barranin. Jenħtieġ li l-Istati Membri jkunu jistgħu jestendu l-kamp ta’ applikazzjoni tal-mekkaniżmu nazzjonali ta’ skrinjar tagħhom biex jinkludu investimenti barranin fis-setturi mhux koperti mill-kamp ta’ applikazzjoni minimu komuni. Meta Stat Membru jagħżel li jestendi l-kamp ta’ applikazzjoni tal-mekkaniżmu ta’ skrinjar tiegħu lil hinn mill-kamp ta’ applikazzjoni minimu komuni, jenħtieġ li l-iskrinjar jikkonforma ma’ dan ir-Regolament, dment li jaqa’ fil-kamp ta’ applikazzjoni ta’ dan ir-Regolament.

(21)

Bl-għan li jiġu żgurati proċeduri ta’ skrinjar konsistenti u prevedibbli, huwa xieraq li jiġu stabbiliti l-karatteristiċi essenzjali tal-mekkaniżmi ta’ skrinjar li għandhom jiġu implimentati mill-Istati Membri. Dawk il-karatteristiċi jenħtieġ li tal-anqas jinkludu l-kamp ta’ applikazzjoni minimu tat-tranżazzjonijiet li jridu jiġu soġġetti għal rekwiżit ta’ awtorizzazzjoni minn qabel, it-tqassim tal-proċedura ta’ skrinjar f’rieżami inizjali u f’investigazzjoni fil-fond, skadenzi għall-iskrinjar, rapport annwali pubbliku, il-possibbiltà li l-partijiet soġġetti għad-deċiżjoni tal-iskrinjar ifittxu rikors ġudizzjarju kontra tali deċiżjonijiet, u l-kapaċità tal-awtoritajiet tal-iskrinjar li jindirizzaw b’mod effettiv każijiet ta’ nonkonformità jew ta’ ċirkomvenzjoni. Ir-regoli u l-proċeduri relatati ma’ mekkaniżmi ta’ skrinjar jenħtieġ li jkunu trasparenti u ma jiddiskriminawx bejn pajjiżi terzi.

(22)

Sabiex jissaħħu t-trasparenza u l-prevedibbiltà fil-proċeduri ta’ skrinjar, jenħtieġ li l-awtoritajiet tal-iskrinjar, fejn applikabbli u mingħajr dewmien żejjed, jinfurmaw lill-persuna li tkun għamlet il-preżentazzjoni dwar il-kompletezza ta’ dik il-preżentazzjoni. Jenħtieġ li l-għoti ta’ dik l-informazzjoni ma jipprekludix lill-awtorità tal-iskrinjar milli titlob aktar informazzjoni jew tagħmel mistoqsijiet addizzjonali wara li tikkonferma l-kompletezza tal-preżentazzjoni u jenħtieġ li jkun mingħajr preġudizzju għall-possibbiltà li l-awtoritajiet tal-iskrinjar jinfurmaw lill-persuna li tkun għamlet il-preżentazzjoni bi stadji importanti proċedurali oħra.

(23)

L-awtorità tal-iskrinjar u l-Kummissjoni jenħtieġ li jkunu jistgħu jqisu l-informazzjoni rilevanti li jirċievu mingħand il-partijiet ikkonċernati, inklużi l-operaturi ekonomiċi, l-organizzazzjonijiet tas-soċjetà ċivili u s-sħab soċjali, bħat-trade unions, rigward investiment barrani. Tali informazzjoni tista’ twassal biex jingħata bidu għal proċedura ta’ skrinjar mill-Istat Membru ospitanti. Għal dak l-għan, jenħtieġ li l-awtorità tal-iskrinjar u l-Kummissjoni iqegħdu għad-dispożizzjoni tal-pubbliku d-dettalji ta’ kuntatt li permezz tagħhom il-partijiet ikkonċernati jkunu jistgħu jissottomettu informazzjoni dwar investimenti barranin b’mod kunfidenzjali.

(24)

Sabiex jiġi żgurat livell konsistenti u effettiv ta’ protezzjoni tas-sigurtà u tal-ordni pubbliku madwar l-Unjoni, huwa meħtieġ li tiġi prevista armonizzazzjoni minima tal-kamp ta’ applikazzjoni tal-mekkaniżmi ta’ skrinjar. Jenħtieġ li l-Istati Membri jkunu meħtieġa jiskrinjaw l-investimenti barranin meta l-entità fil-mira tal-Unjoni tkun attiva f’setturi jew attivitajiet li huma ta’ rilevanza partikolari għas-sigurtà, id-difiża, l-integrità tal-proċessi demokratiċi, ir-reżiljenza tas-servizzi essenzjali jew is-salvagwardja tal-funzjonijiet vitali tas-soċjetà. L-istabbiliment ta’ tali kamp ta’ applikazzjoni minimu komuni tal-mekkaniżmi ta’ skrinjar huwa meħtieġ biex jiġi żgurat li l-investimenti barranin li probabbilment jaffettwaw b’mod negattiv is-sigurtà jew l-ordni pubbliku jiġu identifikati irrispettivament mill-Istati Membri li fihom jinsabu l-entitajiet fil-mira tal-Unjoni, u b’hekk tissaħħaħ l-effettività tal-mekkaniżmu ta’ kooperazzjoni filwaqt li tiġi ppreservata r-responsabbiltà esklużiva tal-Istati Membri għas-sigurtà nazzjonali.

(25)

Il-kamp ta’ applikazzjoni minimu komuni jenħtieġ li jinkludi l-investimenti barranin fl-entitajiet fil-mira tal-Unjoni li jiżviluppaw, jipproduċu jew jikkummerċjalizzaw oġġetti b’użu doppju elenkati fl-Anness I tar-Regolament (UE) 2021/821 tal-Parlament Ewropew u tal-Kunsill (5) jew oġġetti u teknoloġiji militari elenkati fl-Anness tad-Direttiva 2009/43/KE tal-Parlament Ewropew u tal-Kunsill (6), minħabba r-riskji inerenti marbuta mat-trasferiment tal-kontroll fuq il-kapaċitajiet, it-teknoloġiji u l-għarfien espert relatati mad-difiża, li huma vitali għaż-żamma tas-sigurtà. Il-kamp ta’ applikazzjoni minimu komuni jenħtieġ li jkopri wkoll l-investimenti barranin fl-entitajiet fil-mira tal-Unjoni li jipproduċu, iwettqu riċerka fi jew jiżviluppaw semikondutturi jew teknoloġiji kwantistiċi, jew iwettqu riċerka fi jew jiżviluppaw ċerti teknoloġiji tal-intelliġenza artifiċjali, fid-dawl tal-importanza strateġika tagħhom u r-rwol abilitanti tagħhom fuq firxa wiesgħa ta’ applikazzjonijiet kritiċi għas-sigurtà. Barra minn hekk, jenħtieġ li l-Istati Membri jiskrinjaw l-investimenti barranin fl-entitajiet fil-mira tal-Unjoni li jeżerċitaw ċerti attivitajiet relatati mal-materja prima strateġika elenkata fit-Taqsima I tal-Anness I tar-Regolament (UE) 2024/1252 tal-Parlament Ewropew u tal-Kunsill (7), jiġifieri l-esplorazzjoni, l-estrazzjoni, l-ipproċessar, ir-riċiklaġġ, l-irkupru jew il-kumulazzjoni ta’ riżerva. Il-kontroll barrani fuq attivitajiet bħal dawn jista’ joħloq riskji ta’ interruzzjoni fil-provvista, dipendenza strateġika jew ingranaġġ mhux dovut. Barra minn hekk, jenħtieġ li l-Istati Membri jiskrinjaw l-investimenti barranin fl-entitajiet fil-mira tal-Unjoni li jippossjedu, jiżviluppaw jew joperaw bażijiet tad-data għar-reġistrazzjoni tal-votanti, sistemi ta’ votazzjoni u sistemi ta’ informazzjoni rilevanti oħra. Barra minn hekk, l-investimenti barranin f’ċerta infrastruttura tas-suq finanzjarju u entitajiet finanzjarji sistemikament importanti, inklużi kontropartijiet ċentrali, depożitorji ċentrali tat-titoli, operaturi ta’ swieq regolati, operaturi ta’ sistemi ta’ pagament għajr il-banek ċentrali, istituzzjonijiet sistemikament importanti oħra u fornituri globali ta’ servizzi ta’ messaġġi finanzjarji speċjalizzati, jenħtieġ li jiġu skrinjati wkoll, minħabba r-rwol ċentrali ta’ dik l-infrastruttura u dawk l-entitajiet fl-istabbiltà, l-integrità u r-reżiljenza tas-sistema finanzjarja tal-Unjoni u b’kont meħud tal-objettivi tal-unjoni tat-tfaddil u tal-investimenti.

(26)

Il-kamp ta’ applikazzjoni minimu komuni jenħtieġ li jinkludi wkoll l-investimenti barranin fl-entitajiet fil-mira tal-Unjoni li huma attivi fis-setturi tat-trasport, tal-enerġija jew tal-infrastruttura diġitali iżda biss sal-punt li jitqiesu kritiċi wara valutazzjoni mmirata ibbażata fuq ir-riskju u mwettqa mill-Istat Membru fejn ikunu stabbiliti. Dik il-valutazzjoni jenħtieġ li tqis is-sigurtà nazzjonali u l-funzjonijiet vitali tas-soċjetà, fid-dawl tas-servizzi essenzjali pprovduti mill-entità fil-mira tal-Unjoni kkonċernata. Jenħtieġ li l-Istati Membri jżommu d-diskrezzjoni li jddeżinjaw l-entitajiet ikkonċernati f’dawk is-setturi u jenħtieġ li, fejn xieraq, iqisu l-valutazzjonijiet tar-riskju mwettqa skont id-Direttiva (UE) 2022/2557 tal-Parlament Ewropew u tal-Kunsill (8). Sabiex tiġi żgurata l-prevedibbiltà għall-investituri barranin, jenħtieġ li l-entitajiet ikunu jistgħu jaċċertaw, jekk ikun meħtieġ wara li jkunu kkuntattjaw lill-awtorità kompetenti tal-iskrinjar, jekk humiex meqjusa bħala kritiċi għall-finijiet ta’ dan ir-Regolament. Barra minn hekk, jenħtieġ li l-Istati Membri regolarment jivvalutaw mill-ġdid liema miri tal-Unjoni jenħtieġ li jitqiesu bħala kritiċi għall-finijiet ta’ dan ir-Regolament. Eżempji ta’ entitajiet li għandhom jiġu vvalutati jinkludu, l-ewwel nett, fis-settur tal-enerġija: il-faċilitajiet tal-ħżin tal-enerġija kif definiti fid-Direttiva (UE) 2019/944 tal-Parlament Ewropew u tal-Kunsill (9) u l-operaturi tas-sistemi tat-trażmissjoni tal-gass skont it-tifsira tad-Direttiva (UE) 2024/1788 tal-Parlament Ewropew u tal-Kunsill (10); it-tieni nett, fis-settur tat-trasport: l-ajruporti kif definiti fid-Direttiva 2009/12/KE tal-Parlament Ewropew u tal-Kunsill (11), inklużi l-ajruporti ewlenin elenkati fir-Regolament (UE) 2024/1679 tal-Parlament Ewropew u tal-Kunsill (12) u l-entitajiet li joperaw l-installazzjonijiet anċillari li jinsabu fl-ajruporti, meta dawk l-installazzjonijiet ikunu essenzjali għas-sigurtà u l-kontinwità tal-operazzjonijiet ta’ tali ajruporti, il-korpi ta’ tmexxija ta’ portijiet kif definiti fir-Regolament (UE) 2017/352 tal-Parlament Ewropew u tal-Kunsill (13), fir-rigward tal-portijiet ewlenin elenkati fir-Regolament (UE) 2024/1679, il-fornituri tas-servizzi portwarji kif definiti fir-Regolament (UE) 2017/352, u entitajiet oħra fil-portijiet ewlenin meta dawk l-entitajiet l-oħra jkunu essenzjali għas-sigurtà u l-kontinwità tal-operazzjonijiet ta’ tali portijiet ewlenin; u t-tielet nett, fis-settur tal-infrastruttura diġitali: il-fornituri tas-servizzi tal-cloud computing u l-fornituri tan-networks pubbliċi tal-komunikazzjoni elettronika.

(27)

Sabiex jiġu protetti b’mod adegwat is-sigurtà u l-ordni pubbliku u tiġi żgurata l-effettività tal-mekkaniżmu ta’ kooperazzjoni, huwa meħtieġ li l-Istati Membri kollha jwettqu skrinjar ex ante tal-investimenti barranin li jaqgħu fil-kamp ta’ applikazzjoni minimu komuni. Rekwiżit ta’ awtorizzazzjoni minn qabel huwa essenzjali, peress li ħafna riskji assoċjati mal-investimenti barranin jimmaterjalizzaw fil-mument li l-investitur barrani jikseb parteċipazzjoni effettiva fil-ġestjoni jew fil-kontroll u dawn ir-riskji ma jistgħux jiġu mmitigati b’mod effettiv wara t-tlestija tal-investimenti barranin. Dan huwa partikolarment minnu għall-investimenti barranin li jaqgħu fil-kamp ta’ applikazzjoni minimu komuni, peress li tali investimenti barranin jistgħu jwasslu għal provvista ta’ aċċess irriversibbli għal informazzjoni sensittiva, teknoloġiji kritiċi, infrastruttura essenzjali jew assi strateġiċi. Intervent ex post ikun, f’ċirkustanzi bħal dawn, ta’ piż sproporzjonat u, fi kwalunkwe każ, ineffettiv fis-salvagwardja xierqa tas-sigurtà u tal-ordni pubbliku.

(28)

Investimenti greenfield iseħħu meta l-investitur barrani jew is-sussidjarja ta’ investitur barrani fl-Unjoni jistabbilixxu faċilitajiet ġodda jew impriża ġdida għat-twettiq ta’ attività ekonomika fl-Unjoni. Jenħtieġ li l-investimenti greenfield jaqgħu fil-kamp ta’ applikazzjoni ta’ dan ir-Regolament. Madankollu, jenħtieġ li dan ir-Regolament ma jimponix rekwiżit ta’ awtorizzazzjoni minn qabel fir-rigward ta’ dawk l-investimenti. Għalhekk, jenħtieġ li l-Istati Membri jibqgħu liberi li jiddeċiedu jekk jinkludux tali investimenti fil-kamp ta’ applikazzjoni tal-mekkaniżmi ta’ skrinjar tagħhom.

(29)

Il-mekkaniżmu ta’ kooperazzjoni stabbilit fir-Regolament (UE) 2019/452 jippermetti lill-Istati Membri jikkooperaw u jgħinu lil xulxin meta investiment dirett barrani fi Stat Membru wieħed probabbilment jista’ jaffettwa s-sigurtà jew l-ordni pubbliku ta’ Stati Membri oħra jew proġetti jew programmi ta’ interess għall-Unjoni. S’issa dak il-mekkaniżmu ta’ kooperazzjoni wera li huwa utli ħafna, u għalhekk jenħtieġ li jinżamm u jissaħħaħ permezz ta’ dan ir-Regolament biex jiġi żgurat approċċ aktar allinjat għall-investimenti barranin madwar l-Unjoni.

(30)

Biex il-mekkaniżmu ta’ kooperazzjoni jiffoka biss fuq dawk l-investimenti barranin fejn il-karatteristiċi tal-investitur barrani jew l-entità fil-mira tal-Unjoni probabbli li jkollhom effett negattiv fuq is-sigurtà jew l-ordni pubbliku, huwa xieraq li jiġu stabbiliti kundizzjonijiet ibbażati fuq ir-riskju għan-notifika tal-investimenti barranin li jkunu għaddejjin minn skrinjar fi Stat Membru lill-Istati Membri l-oħra u lill-Kummissjoni. B’mod partikolari, meta investitur barrani jew is-sussidjarja tiegħu fl-Unjoni jkunu direttament jew indirettament ikkontrollati minn gvern ta’ pajjiż terz, huwa aktar probabbli li jkunu jistgħu jsegwu l-objettivi ta’ politika ta’ dak il-pajjiż terz. Għalhekk huwa xieraq li l-Istati Membri jinnotifikaw l-investimenti barranin magħmula minn tali investituri barranin meta dawn jaqgħu fil-kamp ta’ applikazzjoni minimu komuni tal-mekkaniżmi ta’ skrinjar. Il-kontroll dirett jew indirett minn gvern ta’ pajjiż terz jista’ jiġi eżerċitat b’diversi modi u jista’ jiġi ddeterminat abbażi ta’, fost oħrajn, l-istruttura tas-sjieda, il-finanzjament mill-gvern, l-arranġamenti speċifiċi ta’ governanza bħall-ishma tad-deheb, jew karatteristiċi oħra mmirati biex jinfluwenzaw id-deċiżjonijiet ta’ ġestjoni. Bl-istess mod, huwa xieraq li l-Istati Membri jinnotifikaw l-investimenti barranin li jaqgħu fil-kamp ta’ applikazzjoni minimu komuni meta l-investitur barrani kien involut f’investimenti barranin li kienu pprojbiti jew awtorizzati soġġett għal miżuri ta’ mitigazzjoni li b’mod sinifikanti jew ripetut ma ġewx irrispettati. Għalhekk, sempliċi każijiet proċedurali jew formali ta’ nuqqas ta’ konformità, bħala regola ġenerali, ma jkunux raġuni għan-notifika. B’mod simili, jenħtieġ li l-Istati Membri jinnotifikaw l-investimenti barranin meta jiddeċiedu li jwettqu investigazzjoni fil-fond u l-entità fil-mira tal-Unjoni tkun marbuta ma’ proġetti jew programmi ta’ interess għall-Unjoni jew ma’ Stati Membri oħra. Barra minn hekk, meta investiment barrani ma jissodisfax il-kundizzjonijiet stabbiliti mod ieħor għan-notifika tiegħu permezz tal-mekkaniżmu ta’ kooperazzjoni, l-Istat Membru fejn l-investiment barrani jkun qed jiġi skrinjat jenħtieġ li madankollu jinnotifika dak l-investiment barrani lill-Istati Membri l-oħra u lill-Kummissjoni, meta dak l-Istat Membru jqis li l-investiment barrani jista’ jaffettwa b’mod negattiv is-sigurtà jew l-ordni pubbliku f’mill-anqas Stat Membru ieħor. Dan jiżgura li l-investimenti barranin kollha li jistgħu jaffettwaw b’mod negattiv is-sigurtà jew l-ordni pubbliku jiġu nnotifikati permezz tal-mekkaniżmu ta’ kooperazzjoni, filwaqt li jiġi żgurat li l-Istat Membru ospitanti jżomm marġni ta’ diskrezzjoni fid-determinazzjoni ta’ jekk il-kundizzjonijiet għan-notifika humiex issodisfati. F’każ bħal dan, l-Istat Membru notifikanti jenħtieġ li jispjega r-raġunijiet għan-notifika ta’ dak l-investiment barrani.

(31)

Bl-għan li jiġu żgurati l-effiċjenza u l-effettività tal-mekkaniżmu ta’ kooperazzjoni, huwa meħtieġ li l-iskadenzi u l-proċeduri jiġu allinjati fejn żewġ investimenti barranin jew aktar marbuta mal-istess tranżazzjoni usa’ jiġu skrinjati f’żewġ Stati Membri jew aktar. F’tali tranżazzjonijiet multinazzjonali, l-applikanti jenħtieġ li jagħmlu ħilithom biex jagħmlu l-preżentazzjonijiet separati fl-Istati Membri kkonċernati fl-istess jum. Dawk l-Istati Membri jenħtieġ li jagħmlu ħilithom biex jinnotifikaw dawk il-preżentazzjonijiet fl-istess jum permezz tal-mekkaniżmu ta’ kooperazzjoni. Sabiex jiġi żgurat trattament effiċjenti ta’ dawk it-tranżazzjonijiet multinazzjonali, l-Istati Membri kkonċernati jenħtieġ li jikkoordinaw matul il-proċedura ta’ skrinjar. B’mod partikolari, jenħtieġ li jiddiskutu bejniethom u mal-Kummissjoni, jekk Stat Membru jitlob dan, jekk l-investimenti barranin jenħtieġx li jiġu nnotifikati. Jenħtieġ li huma jiddiskutu wkoll id-deċiżjonijiet tal-iskrinjar tagħhom u jagħmlu ħilithom biex jallinjaw it-twaqqit tal-proċeduri rispettivi tagħhom, inkluża d-data tal-adozzjoni tad-deċiżjonijiet tal-iskrinjar tagħhom. Fejn l-Istati Membri kkonċernati jkollhom l-intenzjoni li jawtorizzaw l-investiment barrani soġġett għal miżuri ta’ mitigazzjoni, jenħtieġ li jiddiskutu jekk id-deċiżjonijiet tal-iskrinjar maħsuba humiex kompatibbli ma’ xulxin u jindirizzaw b’mod adegwat ir-riskji identifikati.

(32)

Sabiex jiġi identifikat b’mod adegwat l-effett negattiv probabbli ta’ investiment barrani fuq is-sigurtà jew l-ordni pubbliku ta’ Stat Membru wieħed jew aktar, jenħtieġ li l-Istati Membri jkunu jistgħu jipprovdu kummenti u l-Kummissjoni jenħtieġ li tkun tista’ toħroġ opinjoni lil Stat Membru ospitanti anki jekk dak l-Istat Membru ma jkunx qed jiskrinja dak l-investiment barrani jew jekk l-investiment barrani jkun ġie skrinjat iżda mhux innotifikat permezz tal-mekkaniżmu ta’ kooperazzjoni. L-Istati Membri jenħtieġ li jittrażmettu b’mod simultanju t-talbiet tagħhom għal informazzjoni, it-tweġibiet u l-kummenti lill-Kummissjoni.

(33)

Fejn l-effett negattiv probabbli fuq is-sigurtà jew l-ordni pubbliku jirriżulta minn investiment barrani f’entità fil-mira tal-Unjoni li tkun parti minn proġetti jew programmi ta’ interess għall-Unjoni, jew li tipparteċipa f’wieħed minn tali proġetti jew programmi, li huma kritiċi għall-Unjoni kollha kemm hi, jenħtieġ li l-Kummissjoni tkun tista’ toħroġ opinjoni. Opinjoni tal-Kummissjoni li tidentifika l-effett negattiv probabbli fuq proġetti jew programmi ta’ interess għall-Unjoni għal raġunijiet ta’ sigurtà jew ordni pubbliku jenħtieġ li tiġi nnotifikata lill-Istati Membri kollha.

(34)

Jenħtieġ li l-Kummissjoni tkun tista’ toħroġ opinjoni indirizzata lill-Istati Membri kollha fejn tidentifika żewġ investimenti barranin jew aktar li, meħuda flimkien, probabbilment ikollhom effett negattiv fuq is-sigurtà jew l-ordni pubbliku. Dak jista’ jkun il-każ b’mod partikolari fejn żewġ investimenti barranin jew aktar jippreżentaw karatteristiċi komparabbli, pereżempju, fejn l-investimenti barranin isiru mill-istess investitur barrani, fejn żewġ investituri barranin jew aktar jippreżentaw riskji simili, jew fejn żewġ investimenti barranin jew aktar jikkonċernaw l-istess mira jew l-istess infrastruttura, bħall-infrastruttura trans-Ewropea għat-trasport, l-enerġija jew il-komunikazzjoni. Jenħtieġ li l-Istati Membri u l-Kummissjoni jiddiskutu l-analiżi tal-Kummissjoni tar-riskji identifikati fl-opinjoni tagħha u l-modi possibbli biex jiġu indirizzati dawk ir-riskji.

(35)

Jenħtieġ li l-Istati Membri ma jadottawx deċiżjoni tal-iskrinjar qabel ma jkunu skadew l-iskadenzi għall-kummenti u l-opinjonijiet sakemm l-interessi tas-sigurtà jew tal-ordni pubbliku, bħall-evitar tal-falliment tal-entità fil-mira tal-Unjoni, ma jirrikjedux deċiżjoni aktar bikrija. Jenħtieġ li tali ċirkostanzi eċċezzjonali jiġu nnotifikati lill-Istati Membri l-oħra u lill-Kummissjoni, li jenħtieġ li jipprovdu l-kummenti tagħhom jew toħroġ l-opinjoni tagħha malajr.

(36)

Bl-għan li jiġi indirizzat b’mod adegwat l-effett negattiv probabbli ta’ investiment barrani fuq is-sigurtà jew l-ordni pubbliku ta’ Stat Membru wieħed jew aktar, Stat Membru li jirċievi kummenti debitament ġustifikati minn Stati Membri oħra jew opinjoni mill-Kummissjoni jenħtieġ li jagħti kunsiderazzjoni dovuta lil tali kummenti jew opinjoni, inkluż fejn iqis li s-sigurtà jew l-ordni pubbliku tiegħu stess ma jkunux affettwati. Dak l-Istat Membru jenħtieġ li, fejn meħtieġ, jikkoordina mal-Kummissjoni u l-Istati Membri kkonċernati u jipprovdilhom il-parti operattiva u s-sommarju tar-raġunijiet ewlenin għad-deċiżjoni tiegħu. Jenħtieġ li dak is-sommarju jinkludi l-punt sa fejn l-Istat Membru ospitanti jkun ta kunsiderazzjoni dovuta lill-kummenti tal-Istati Membri jew lill-opinjoni tal-Kummissjoni kif ukoll, fejn applikabbli, ir-raġunijiet għan-nuqqas ta’ qbil tiegħu mal-kummenti tal-Istati Membri jew mal-opinjoni tal-Kummissjoni. L-għoti ta’ dik l-informazzjoni jiżgura li l-Istati Membri jkunu responsabbli ta’ kif huma jagħtu kunsiderazzjoni dovuta lit-tħassib imqajjem minn Stati Membri oħra jew mill-Kummissjoni, filwaqt li jirrispettaw in-natura sensittiva tad-deċiżjonijiet tal-iskrinjar u l-informazzjoni kunfidenzjali li tinsab fihom.

(37)

Huwa importanti li jitqies li l-investimenti barranin li ma ġewx innotifikati permezz tal-mekkaniżmu ta’ kooperazzjoni jistgħu joħolqu riskju għas-sigurtà jew għall-ordni pubbliku. Għalhekk, jenħtieġ li l-Istati Membri u l-Kummissjoni jkunu jistgħu, mhux aktar tard minn 15-il xahar mit-tlestija ta’ investiment barrani, jipprovdu kummenti debitament ġustifikati jew toħroġ opinjoni, rispettivament, lill-Istat Membru ospitanti dwar investiment barrani li ma jkunx ġie nnotifikat permezz tal-mekkaniżmu ta’ kooperazzjoni. Sabiex jiġi evitat li jintefa’ piż żejjed fuq il-mekkaniżmu ta’ kooperazzjoni, jenħtieġ li l-Istati Membri u l-Kummissjoni, qabel ma jipprovdu kummenti jew toħroġ opinjoni, rispettivament, jivverifikaw jekk l-Istat Membru ospitanti jkunx diġà beda jew lesta l-iskrinjar tal-investiment barrani u jekk għandux l-intenzjoni li jinnotifika l-investiment barrani permezz tal-mekkaniżmu ta’ kooperazzjoni. L-Istat Membru ospitanti jenħtieġ li jikkunsidra kif xieraq il-kummenti tal-Istati Membri l-oħra u l-opinjoni tal-Kummissjoni u, abbażi ta’ dan, jinforma lill-Istati Membri li jkunu pprovdew kummenti u lill-Kummissjoni jekk ma jkollux l-intenzjoni li jiskrinja l-investiment barrani. Dan jista’ pereżempju jkun il-każ jekk l-Istat Membru ospitanti ma jaqbilx mar-riskji identifikati fil-kummenti jew fl-opinjoni. Bl-istess mod, l-Istat Membru ospitanti jista’ jindika li ma għandux l-intenzjoni li jiskrinja l-investiment barrani minħabba li l-investiment barrani ma jaqax fil-kamp ta’ applikazzjoni tal-mekkaniżmu ta’ skrinjar tiegħu jew għax ikun diġà ġie skrinjat, għalkemm dawk is-sitwazzjonijiet idealment ikun messhom ġew iċċarati qabel ma jkun ġie pprovdut kwalunkwe kumment jew tkun inħarġet kwalunkwe opinjoni. Meta l-Istat Membru ospitanti jindika li ma għandux l-intenzjoni li jiskrinja l-investiment barrani, jenħtieġ li tiġi organizzata laqgħa jew fuq talba ta’ Stat Membru li jkun ipprovda kummenti jew fuq talba tal-Kummissjoni, fejn il-Kummissjoni tkun ħarġet opinjoni. Il-Kummissjoni għandha tiġi mistiedna għal-laqgħa anke jekk ma tkunx ħarġet opinjoni. L-Istati Membri li jkunu pprovdew kummenti jew il-Kummissjoni jistgħu, b’mod partikolari, jitolbu laqgħa bħal din biex ikomplu jippreżentaw jew jiddiskutu r-riskji identifikati. Meta, wara l-laqgħa u minkejja l-ispjegazzjonijiet addizzjonali li jkunu waslu mingħand l-Istati Membri li jkunu pprovdew kummenti jew mingħand il-Kummissjoni, l-Istat Membru ospitanti jiddeċiedi li ma jiskrinjax l-investiment barrani, jenħtieġ li jinforma lill-Istati Membri li jkunu pprovdew kummenti u lill-Kummissjoni b’dan u jipprovdilhom spjegazzjoni bil-miktub. Dik l-ispjegazzjoni bil-miktub jista’ jkollha sovrapożizzjonijiet ma’ raġunijiet indikati preċedentement iddikjarati, pereżempju fil-laqgħa mitluba.

(38)

Sabiex tiġi żgurata l-effiċjenza tal-mekkaniżmu ta’ kooperazzjoni, il-punti ta’ kuntatt stabbiliti mill-Istati Membri u l-Kummissjoni għall-applikazzjoni ta’ dan ir-Regolament jenħtieġ li jitqiegħdu b’mod xieraq fl-istrutturi amministrattivi rispettivi tagħhom. Dawk il-punti ta’ kuntatt jenħtieġ li jkollhom il-persunal kwalifikat u s-setgħat meħtieġa biex iwettqu l-ħidma tagħhom taħt il-mekkaniżmu ta’ kooperazzjoni u jiżguraw it-trattament xieraq tal-informazzjoni kunfidenzjali.

(39)

Sabiex jiġi żgurat il-funzjonament effettiv tal-mekkaniżmu ta’ kooperazzjoni, l-Istat Membru li jinnotifika l-investiment barrani permezz tal-mekkaniżmu ta’ kooperazzjoni jenħtieġ li jkun meħtieġ jipprovdi livell minimu ta’ informazzjoni f’format standardizzat. Meta investiment barrani ma jiġix innotifikat permezz tal-mekkaniżmu ta’ kooperazzjoni, l-Istat Membru ospitanti jenħtieġ li jkun jista’ jipprovdi mill-inqas l-istess livell minimu ta’ informazzjoni. Jenħtieġ li l-Kummissjoni u l-Istati Membri jkunu jistgħu jitolbu informazzjoni addizzjonali mill-Istat Membru ospitanti. Talba għal informazzjoni addizzjonali jenħtieġ li tkun debitament ġustifikata, limitata għall-informazzjoni meħtieġa biex l-Istati Membri jipprovdu kummenti jew biex il-Kummissjoni toħroġ opinjoni, proporzjonata għall-fini tat-talba u mhux ta’ piż bla bżonn għall-Istat Membru ospitanti.

(40)

Sabiex jiġi żgurat li l-kooperazzjoni tkun ibbażata fuq informazzjoni kompluta u preċiża, jenħtieġ li l-Istat Membru ospitanti jkun jista’ jitlob lil investitur barrani jew lil kwalunkwe persuna fiżika jew ġuridika oħra jew fil-katina ta’ kontroll tal-investitur barrani jew fil-katina ta’ kontroll tal-entità fil-mira tal-Unjoni biex jipprovdu informazzjoni. Sabiex tiġi żgurata l-kwalità tal-informazzjoni, jenħtieġ li l-Istati Membri ospitanti, meta jkollhom dubji raġonevoli dwar il-kompletezza u l-preċiżjoni tal-informazzjoni, jieħdu passi raġonevoli biex jivverifikaw l-informazzjoni pprovduta lilhom minn dak l-investitur barrani jew minn persuna fiżika jew ġuridika oħra. Pereżempju, l-Istat Membru ospitanti jenħtieġ li jidentifika kontradizzjonijiet ovvji u informazzjoni ovvjament falza, qarrieqa jew nieqsa. F’ċirkostanzi eċċezzjonali, meta, minkejja l-aħjar sforzi tiegħu, l-Isttat Membru ospitanti ma jkunx jista’ jikseb informazzjoni mitluba minn Stat Membru ieħor jew mill-Kummissjoni, jenħtieġ li jinnotifikahom mingħajr dewmien. F’każ bħal dan, jenħtieġ li l-Istati Membri l-oħra u l-Kummissjoni jkunu jistgħu jibbażaw il-kummenti u l-opinjoni tagħhom, rispettivament, fuq l-informazzjoni disponibbli għalihom.

(41)

L-Istat Membru ospitanti u l-Kummissjoni jistgħu jiffaċċjaw ostakli fil-ġbir ta’ informazzjoni rilevanti minn persuni fiżiċi jew ġuridiċi fi Stati Membri oħra. Għalhekk, meta ċerta biċċa informazzjoni tkun strettament meħtieġa għad-determinazzjoni ta’ jekk l-investiment barrani probabbilment jaffettwa b’mod negattiv is-sigurtà jew l-ordni pubbliku, jenħtieġ li l-Istat Membru ospitanti u l-Kummissjoni jkunu jistgħu jitolbu lil Stat Membru ieħor jiġbor informazzjoni minn persuna fiżika jew ġuridika residenti jew stabbilita fit-territorju tiegħu. Barra minn hekk, Stat Membru ospitanti jista’ jiffaċċja sitwazzjoni fejn ikun meħtieġ li żewġ Stati Membri oħra jew aktar jintalbu jassistu fil-ġbir ta’ dik l-informazzjoni, u dan jista’ jikkostitwixxi piż sinifikanti, speċjalment għall-Istati Membri b’riżorsi aktar limitati. Sabiex tissaħħaħ l-effettività tal-assistenza għall-ġbir ta’ informazzjoni, Stat Membru ospitanti jenħtieġ li jkun jista’ jitlob lill-Kummissjoni tassisti f’dan il-proċess u tiġbor l-informazzjoni għalih. Fl-istess ħin, jenħtieġ li l-Istat Membru, li fit-territorju tiegħu tirrisjedi jew tkun stabbilita l-persuna fiżika jew ġuridika li mingħandha tintalab l-informazzjoni, ikun jista’, fi żmien raġonevoli, joġġezzjona għal dan il-proċess jew joffri li jipprovdi dik l-informazzjoni huwa stess. Il-possibbiltà għal dak l-Istat Membru li joġġezzjona tiżgura li l-Istati Membri jżommu kontroll fuq il-ġbir ta’ informazzjoni fit-territorju tagħhom. Għalhekk, jenħtieġ li l-Kummissjoni tinforma biżżejjed lil dak l-Istat Membru, inkluż fir-rigward ta’ liema informazzjoni tintalab mill-Istat Membru ospitanti. Jenħtieġ li Stat Membru ospitanti jkun jista’ jagħżel li jitlob lil Stat Membru ieħor jiġbor l-informazzjoni meħtieġa jew jitlob l-assistenza tal-Kummissjoni, skont dak li jqis aktar effiċjenti jew aktar xieraq f’sitwazzjoni partikolari. Bħala parti minn talba għall-informazzjoni, il-persuna fiżika jew ġuridika li mingħandha tintalab l-informazzjoni tista’, anke indirettament, tirċievi informazzjoni kunfidenzjali, bħal informazzjoni dwar l-investiment barrani ppjanat. Għalhekk, huwa meħtieġ li jiġi speċifikat li tali persuna fiżika jew ġuridika jenħtieġ li ma tuża l-ebda informazzjoni kunfidenzjali li tkun irċeviet għal kwalunkwe skop ieħor għajr biex twieġeb għat-talba għal informazzjoni u li jenħtieġ li ma tiżvelahiex.

(42)

L-Istati Membri u l-Kummissjoni jenħtieġ li jiżguraw il-kunfidenzjalità tal-informazzjoni li jipprovdu jew jirċievu fl-applikazzjoni ta’ dan ir-Regolament, f’konformità mad-dritt tal-Unjoni u l-liġi nazzjonali. L-informazzjoni riċevuta b’riżultat tal-applikazzjoni ta’ dan ir-Regolament jenħtieġ li tintuża biss għall-iskop li għalih tkun ġiet provduta, li jinkludi l-użu ta’ tali informazzjoni fi stħarriġ ġudizzjarju ta’ deċiżjonijiet tal-iskrinjar. Meta l-iżvelar mhux awtorizzat ta’ informazzjoni jaf jikkawża preġudizzju għall-interessi tal-Unjoni, jew ta’ Stat Membru wieħed jew aktar, l-oriġinatur tal-informazzjoni jenħtieġ li jikklassifika l-informazzjoni f’konformità mad-dritt tal-Unjoni u l-liġi nazzjonali. Meta jwieġbu għal talbiet għal aċċess għal dokumenti ttrattati fl-applikazzjoni ta’ dan ir-Regolament, l-Istati Membri u l-Kummissjoni għandhom jikkoordinaw u jipprovdu mill-inqas il-livell ta’ protezzjoni tal-interessi protetti disponibbli skont l-Artikolu 4 tar-Regolament (KE) Nru 1049/2001 tal-Parlament Ewropew u tal-Kunsill (14), bil-ħsieb li jiġi protett l-għan tal-investigazzjonijiet. Jenħtieġ li l-Kummissjoni tieħu l-miżuri kollha meħtieġa biex tiżgura l-protezzjoni tal-informazzjoni kunfidenzjali f’konformità, b’mod partikolari, mad-Deċiżjonijiet tal-Kummissjoni (UE, Euratom) 2015/443 (15) u (UE, Euratom) 2015/444 (16). Barra minn hekk, l-Istati Membri u l-Kummissjoni jenħtieġ li jieħdu l-miżuri kollha meħtieġa biex jiżguraw il-konformità mal-Ftehim bejn l-Istati Membri tal-Unjoni Ewropea, imlaqqgħin fil-Kunsill, dwar il-protezzjoni ta’ informazzjoni klassifikata skambjata fl-interessi tal-Unjoni Ewropea (17). Dak jinkludi, b’mod partikolari, l-obbligu li ma jkunx hemm tnaqqis fil-grad jew id-deklassifikazzjoni ta’ informazzjoni klassifikata mingħajr il-kunsens bil-miktub minn qabel tal-oriġinatur. Kwalunkwe informazzjoni sensittiva mhux klassifikata jew informazzjoni li tingħata fuq bażi kunfidenzjali jenħtieġ li tiġi ttrattata bħala tali mill-awtoritajiet. Jenħtieġ li l-awtorità tal-iskrinjar tagħti lill-entità li tipprovdi l-informazzjoni l-opportunità li tindika liema informazzjoni hija tqis li hija kunfidenzjali. Dan jista’ jsir pereżempju permezz tal-formola li għandha tiġi sottomessa biex tintalab awtorizzazzjoni minn qabel tal-investiment barrani.

(43)

Sabiex jiġu ssalvagwardjati l-kunfidenzjalità u l-integrità tal-komunikazzjonijiet, jenħtieġ li l-Kummissjoni tistabbilixxi u żżomm sistema sigura u kriptata li tikkonforma mal-ogħla standards ta’ protezzjoni u sigurtà tad-data u tinkludi kapaċitajiet ta’ monitoraġġ u ta’ awditjar biex tiġi żgurata l-konformità mal-istandards tas-sigurtà. Il-komunikazzjonijiet sostantivi kollha bejn l-Istati Membri, kif ukoll bejn l-Istati Membri u l-Kummissjoni skont dan ir-Regolament, jenħtieġ li jiġu trażmessi permezz ta’ dik is-sistema, sakemm in-natura tal-informazzjoni li għandha tiġi trażmessa ma tkunx teħtieġ l-użu ta’ mezzi oħra, bħal dokumenti fiżiċi. Jenħtieġ li l-komunikazzjoni sostantiva bejn l-Istati Membri u l-Kummissjoni tinkludi, b’mod partikolari, notifiki permezz tal-mekkaniżmu ta’ kooperazzjoni, informazzjoni dwar l-intenzjoni li jiġi pprovdut kumment jew li tinħareġ opinjoni, talbiet għal informazzjoni mill-Istat Membru ospitanti, tweġibiet għal dawk it-talbiet, kummenti u opinjonijiet, u informazzjoni ġdida sostanzjali wara n-notifika tal-investiment barrani. L-istabbiliment u l-użu tas-sistema sigura u kriptata jenħtieġ li ma jaffettwawx il-komunikazzjoni ġenerali bejn l-awtoritajiet tal-iskrinjar u l-Kummissjoni, u jenħtieġ li din tibqa’ possibbli bil-mezzi xierqa kollha.

(44)

Sabiex jiġu żgurati s-sottomissjoni u l-ipproċessar siguri u effiċjenti tal-preżentazzjonijiet relatati mal-iskrinjar tal-investiment barrani, u biex jittaffa l-piż amministrattiv kemm fuq il-persuni fiżiċi kif ukoll fuq il-persuni ġuridiċi li jagħmlu preżentazzjoni u l-awtoritajiet tal-iskrinjar, jenħtieġ li l-Kummissjoni, fuq talba ta’ mill-inqas disa’ Stati Membri, tistabbilixxi portal online tal-UE (il-“portal online tal-UE”). Il-portal online tal-UE jenħtieġ li jipprovdi mekkaniżmu unifikat għall-persuni fiżiċi jew ġuridiċi li jagħmlu preżentazzjoni biex jippreżentaw tranżazzjonijiet b’mod elettroniku mal-awtoritajiet tal-iskrinjar. Jenħtieġ li l-Kummissjoni tfassal is-sistema b’mod li tkun faċli għall-utent u tiżgura li tikkonforma mar-regolamenti applikabbli dwar il-protezzjoni tad-data u mal-istandards tas-sigurtà. Jenħtieġ li l-portal online tal-UE, jekk ikun stabbilit, jiġi wżat biss fir-rigward ta’ investimenti barranin fl-Istati Membri li jkunu talbu dan. Jekk Stat Membru jitlob li ma jipparteċipax f’dak il-portal online tal-UE, jenħtieġ li l-portal online tal-UE ma jibqax jiġi wżat fir-rigward tal-investimenti barranin f’dak l-Istat Membru, mingħajr ma jiġi affettwat l-użu kontinwu tal-portal online tal-UE mill-Istati Membri rilevanti l-oħra.

(45)

Sabiex tiġi żgurata l-effettività tal-mekkaniżmu ta’ kooperazzjoni, jenħtieġ li l-Kummissjoni tistabbilixxi bażi tad-data sigura b’informazzjoni dwar l-investimenti barranin innotifikati permezz tal-mekkaniżmu ta’ kooperazzjoni u l-eżitu tal-valutazzjonijiet taħt mekkaniżmi ta’ skrinjar mit-12 ta’ Ottubru 2020. Jenħtieġ li l-Istati Membri, wara t-tlestija tal-proċedura nazzjonali, itellgħu fil-bażi tad-data sigura ċerta informazzjoni dwar l-investiment barrani, u jistgħu jipprovdu wkoll informazzjoni addizzjonali, inkluż, fejn applikabbli, intelligence kummerċjali rilevanti akkwistata u vverifikata minn bejjiegħa kummerċjali, bħal fornituri ta’ analiżi tar-riskju jew sanzjonijiet u servizzi tal-skrinjar tal-konformità. Huwa xieraq li tali informazzjoni tiġi kondiviża permezz tal-mekkaniżmu ta’ kooperazzjoni biss sa fejn ikun permess mill-arranġamenti kuntrattwali li jirregolaw l-użu u l-iżvelar tagħha. Barra minn hekk, jenħtieġ li l-Istati Membri jkunu jistgħu wkoll itellgħu fil-bażi tad-data sigura informazzjoni rilevanti dwar każijiet fejn il-miżuri ta’ mitigazzjoni ma jkunux ġew irrispettati b’mod sinifikanti jew ripetut, peress li tali informazzjoni tista’ tkun rilevanti biex jiġi ddeterminat jekk investimenti barranin oħra jenħtieġx li jiġu nnotifikati permezz tal-mekkaniżmu ta’ kooperazzjoni jew probabbilment jaffettwaw b’mod negattiv is-sigurtà jew l-ordni pubbliku.

(46)

Sabiex tissaħħaħ il-kapaċità tal-Istati Membri u tal-Kummissjoni li jidentifikaw, jivvalutaw u jimmitigaw ir-riskji potenzjali għas-sigurtà jew għall-ordni pubbliku li jirriżultaw minn investimenti barranin, huwa importanti li jkollhom kapaċità ta’ intelligence kummerċjali ta’ kwalità għolja għad-dispożizzjoni tagħhom. Jenħtieġ li dik il-kapaċità tippermetti l-ġbir u l-analiżi ta’ informazzjoni rilevanti u b’hekk tiffaċilita l-valutazzjonijiet tar-riskju kkoordinati. Fil-qafas tal-arkitettura tat-tħejjija għall-kriżijiet stabbilita skont ir-Regolament (UE) 2024/2747 tal-Parlament Ewropew u tal-Kunsill (18), il-Kummissjoni se tiżviluppa elementi għal tali kapaċità. Dan jista’ jikkomplementa l-mekkaniżmu ta’ kooperazzjoni skont dan ir-Regolament sal-punt li l-informazzjoni miġbura, ipproċessata jew analizzata skont ir-Regolament (UE) 2024/2747 tikkonċerna riskji potenzjali għas-sigurtà jew għall-ordni pubbliku.

(47)

Sabiex jiġi żgurat approċċ konsistenti għall-iskrinjar tal-investimenti barranin madwar l-Unjoni, huwa essenzjali għal wħud mill-istandards u l-kriterji użati biex jiġu vvalutati r-riskji probabbli għas-sigurtà jew l-ordni pubbliku li jiġu stabbiliti fil-livell tal-Unjoni. Dawk l-istandards u l-kriterji jenħtieġ li jqisu r-riskji li jappartjenu għall-investiment barrani u r-riskji li jappartjenu għall-investitur barrani.

(48)

Huwa probabbli li l-investimenti barranin joħolqu riskji għas-sigurtà jew għall-ordni pubbliku meta aktarx li jkollhom effetti fuq ċerti setturi, assi jew attivitajiet li huma kruċjali għas-sigurtà jew għall-funzjonijiet vitali tas-soċjetà. Għalhekk, huwa xieraq li l-Istati Membri u l-Kummissjoni jiffukaw fuq dawn l-effetti potenzjali meta jiddeterminaw jekk investiment jistax jaffettwa b’mod negattiv is-sigurtà jew l-ordni pubbliku. B’mod partikolari, jenħtieġ li jivvalutaw l-effett negattiv probabbli ta’ investiment fuq is-sigurtà, l-integrità, ir-reżiljenza u l-funzjonament ta’ entità kritika kif definit fid-Direttiva (UE) 2022/2557, fid-dawl tal-funzjonijiet ċentrali mwettqa minn tali entitajiet u l-konsegwenzi li t-tfixkil tagħhom ikun jinvolvi. L-istess japplika għall-investimenti barranin li jistgħu jaffettwaw id-disponibbiltà ta’ teknoloġiji kritiċi, jew il-protezzjoni u d-disponibbiltà ta’ proprjetà intellettwali jew assi intanġibbli oħra bħal sigrieti kummerċjali, bażijiet tad-data, algoritmi jew proċessi, peress li l-ħrib jew l-inaċċessibbiltà ta’ tali teknoloġiji jew assi jistgħu jimminaw is-sigurtà. Huwa daqstant importanti għall-Istati Membri u l-Kummissjoni li jivvalutaw sa liema punt investiment barrani jista’ jaffettwa s-sigurtà tal-ikel, is-saħħa pubblika, inklużi l-forniment u d-disponibbiltà ta’ mediċini kritiċi, jew il-provvista kontinwa ta’ inputs kritiċi, kif ukoll is-sigurtà ta’ faċilitajiet militari u faċilitajiet pubbliċi sensittivi oħra, minħabba r-rwol essenzjali li dawn is-setturi u l-assi għandhom fis-salvagwardja tar-reżiljenza tas-soċjetà u l-kontinwità ta’ servizzi vitali. Jenħtieġ li l-Istati Membri u l-Kummissjoni jikkunsidraw ukoll l-effetti potenzjali tal-investimenti barranin fuq informazzjoni sensittiva, inkluża data personali, b’mod partikolari meta jkunu kkonċernati settijiet ta’ data fuq skala kbira, minħabba r-riskju ta’ użu ħażin jew sfruttament strateġiku ta’ tali data. Barra minn hekk, jenħtieġ li tingħata attenzjoni partikolari lill-investimenti barranin li jistgħu jaffettwaw proġetti jew programmi ta’ interess għall-Unjoni, meta t-tfixkil jew l-influwenza bla bżonn jista’ jkollhom implikazzjonijiet transfruntiera għall-Unjoni kollha kemm hi. Fl-aħħar nett, sabiex jipproteġu minn interferenza barranija potenzjali, jenħtieġ li l-Istati Membri u l-Kummissjoni jikkunsidraw l-effetti potenzjali tal-investimenti barranin fuq il-libertà u l-pluraliżmu tal-media, inklużi l-pjattaformi online u tal-media soċjali jew il-karatteristiċi anċillari tagħhom, jew ambjenti diġitali u interattivi oħra għal skopijiet ta’ edukazzjoni jew ta’ rikreazzjoni. Għall-iskopijiet ta’ ċarezza, il-lista ta’ proġetti jew programmi ta’ interess għall-Unjoni jenħtieġ li tiġi stabbilita f’anness. Dawk jenħtieġ li jinkludu n-networks trans-Ewropej għat-trasport, l-enerġija jew il-komunikazzjoni, kif ukoll programmi li jipprovdu finanzjament għar-riċerka u l-iżvilupp għal attivitajiet li huma rilevanti għas-sigurtà jew għall-ordni pubbliku. Jenħtieġ li lista ta’ oqsma tat-teknoloġija li huma rilevanti għall-valutazzjonijiet tar-riskju skont dan ir-Regolament u lista ta’ mediċini kritiċi jiġu stabbiliti f’annessi separati.

(49)

Jenħtieġ li l-Istati Membri u l-Kummissjoni jqisu wkoll il-kuntest u ċ-ċirkostanzi tal-investiment barrani. Dan jenħtieġ li jinkludi, b’mod partikolari, jekk investitur barrani, persuna fiżika jew entità li tikkontrolla l-investitur barrani, is-sid benefiċjarju tal-investitur barrani, kwalunkwe waħda mis-sussidjarji tal-investitur barrani, jew kwalunkwe parti oħra li tkun proprjetà tal-investitur barrani jew ikkontrollata minnu, jew li taġixxi f’ismu jew taħt id-direzzjoni tiegħu, aktarx li ssegwi l-objettivi ta’ politika ta’ pajjiż terz jew tiffaċilita l-iżvilupp tal-kapaċitajiet militari ta’ pajjiż terz, kif ukoll jekk tista’ tuża l-investiment barrani biex tappoġġja t-twettiq ta’ ksur serju tad-drittijiet tal-bniedem jew tal-liġi umanitarja internazzjonali. Tali ksur serju jista’ jikkawża tfixkil serju għar-relazzjonijiet barranin jew għall-koeżistenza paċifika tan-nazzjonijiet, u b’hekk jaffettwa s-sigurtà tal-Istati Membri. Barra minn hekk, ċirkostanzi bħal ċaħdiet preċedenti ta’ talbiet għal awtorizzazzjoni jew nuqqas ta’ konformità ma’ miżuri ta’ mitigazzjoni, involviment minn qabel f’attivitajiet li jaffettwaw b’mod negattiv is-sigurtà jew l-ordni pubbliku, attivitajiet illegali jew kriminali, inkluża ċ-ċirkomvenzjoni tal-miżuri restrittivi tal-Unjoni adottati skont l-Artikolu 29 tat-TUE u l-Artikolu 215 tat-TFUE, l-istabbiliment f’pajjiż terz identifikat bħala li għandu nuqqasijiet strateġiċi sinifikanti fir-reġim nazzjonali tiegħu dwar il-ġlieda kontra l-ħasil tal-flus u dwar il-ġlieda kontra l-finanzjament tat-terroriżmu, rekwiżit legali għall-kondiviżjoni tal-informazzjoni għal finijiet ta’ intelligence jew struttura ta’ sjieda opaka jistgħu jikkostitwixxu fatturi ta’ riskju u għalhekk jenħtieġ li jiġu vvalutati wkoll. Barra minn hekk, jenħtieġ li l-Istati Membri u l-Kummissjoni jeżaminaw jekk l-investitur barrani jistax ikun mezz biex gvern jew attur mhux statali ta’ pajjiż terz jiksbu u jeżerċitaw influwenza fuq l-entità fil-mira tal-Unjoni indirettament. Tali influwenza tista’ tmur lil hinn mill-influwenza li ssir permezz ta’ strutturi korporattivi jew mezzi oħra tal-liġi tal-kumpaniji u tista’ ssir minn persuni fiżiċi bħall-azzjonisti, jew diretturi tal-bord tal-investitur bi kwalunkwe mod. Dak jestendi għal mezzi informali, inkluż l-ingranaġġ ta’ relazzjonijiet personali, l-applikazzjoni ta’ pressjoni personali jew politika, u l-użu ta’ theddid u prattiki manipulattivi jew qarrieqa oħra.

(50)

Meta l-Istat Membru ospitanti jqis li investiment barrani probabbilment jaffettwa b’mod negattiv is-sigurtà jew l-ordni pubbliku, huwa xieraq li dak l-Istat Membru jintalab jieħu miżuri xierqa biex itaffi dak ir-riskju, meta miżuri adegwati jkunu disponibbli, filwaqt li jqis debitament kwalunkwe kumment ipprovdut minn Stati Membri oħra u opinjoni maħruġa mill-Kummissjoni. Jenħtieġ li l-investimenti barranin ikunu pprojbiti jew jiġu xolti biss fuq bażi eċċezzjonali, fejn il-miżuri ta’ mitigazzjoni jew il-miżuri disponibbli skont id-dritt tal-Unjoni jew il-liġi nazzjonali għajr dawk fi ħdan il-mekkaniżmu ta’ skrinjar ma jkunux biżżejjed biex itaffu l-effett negattiv fuq is-sigurtà jew l-ordni pubbliku.

(51)

Sabiex tiġi appoġġata l-implimentazzjoni tal-mekkaniżmu ta’ kooperazzjoni u jitrawwem l-iskambju ta’ prattiki tajba fost l-Istati Membri, jenħtieġ li jinżamm il-grupp ta’ esperti dwar l-iskrinjar tal-investimenti diretti barranin imsemmi fir-Regolament (UE) 2019/452 u jenħtieġ li l-kompiti tiegħu jiġu aġġornati f’konformità ma’ dan ir-Regolament.

(52)

L-Istati Membri u l-Kummissjoni jenħtieġ li jiġu inkoraġġuti jikkooperaw mal-awtoritajiet responsabbli ta’ pajjiżi terzi li huma tal-istess fehma dwar kwistjonijiet relatati mal-iskrinjar ta’ investimenti barranin għal raġunijiet ta’ sigurtà jew ordni pubbliku. Tali kooperazzjoni amministrattiva jenħtieġ li jkollha l-għan li ssaħħaħ l-effettività tal-qafas għall-iskrinjar ta’ investimenti barranin mill-Istati Membri u l-kooperazzjoni bejn l-Istati Membri u l-Kummissjoni skont dan ir-Regolament. Jenħtieġ li jkun possibbli li dik il-kooperazzjoni tinvolvi l-iskambju ta’ informazzjoni u tal-aħjar prattiki, kif ukoll appoġġ tekniku u għat-tisħiħ tal-kapaċitajiet. Fil-kuntest ta’ dik il-kooperazzjoni, jenħtieġ li l-Kummissjoni tinkoraġġixxi l-istabbiliment ta’ mekkaniżmi ta’ skrinjar tal-investimenti minn pajjiżi terzi, b’mod partikolari dawk il-pajjiżi li huma kandidati għall-adeżjoni mal-Unjoni u pajjiżi fil-viċinat tal-Unjoni. Il-Kummissjoni jenħtieġ li tkun tista’ timmonitorja wkoll l-iżviluppi fir-rigward tal-mekkaniżmi ta’ skrinjar f’pajjiżi terzi. Jenħtieġ li l-Kummissjoni tinżamm infurmata dwar kuntatti ma’ pajjiżi terzi sal-punt li jkunu relatati ma’ kwistjonijiet sistemiċi relatati mal-iskrinjar tal-investiment.

(53)

Sabiex tissaħħaħ it-trasparenza għall-investituri barranin, jenħtieġ li l-Kummissjoni żżomm lista disponibbli għall-pubbliku tal-mekkaniżmi kollha ta’ skrinjar. Barra minn hekk, sa fejn dak ma jkunx diġà stabbilit fil-liġi nazzjonali, jenħtieġ li l-Istati Membri jippubblikaw u jaġġornaw regolarment gwida dettaljata dwar il-kamp ta’ applikazzjoni tal-mekkaniżmu ta’ skrinjar tagħhom, il-limiti u l-iskattargħall-obbligi ta’ notifika, u l-iskedi ta’ żmien u r-regoli proċedurali applikabbli.

(54)

Jenħtieġ li l-Istati Membri jinnotifikaw lill-Kummissjoni l-mekkaniżmi ta’ skrinjar tagħhom u kwalunkwe emenda għalihom. Jenħtieġ li l-Istati Membri jippubblikaw rapport annwali dwar l-applikazzjoni tal-mekkaniżmi ta’ skrinjar tagħhom, dwar l-iżviluppi leġiżlattivi rilevanti u l-attivitajiet tal-awtorità tal-iskrinjar, inkluża data aggregata u anonimizzata dwar it-tranżazzjonijiet skrinjati.

(55)

Il-Kummissjoni jenħtieġ li tfassal rapport annwali dwar l-implimentazzjoni ta’ dan ir-Regolament u tippreżentah lill-Parlament Ewropew u lill-Kunsill. Fl-interess tat-trasparenza, dak ir-rapport jenħtieġ li jsir pubbliku wkoll. Ir-rapport annwali jenħtieġ li jkun ibbażat, fost affarijiet oħra, fuq rapporti ppreżentati mill-Istati Membri kollha lill-Kummissjoni fuq bażi kunfidenzjali bir-rispett dovut għall-ħtieġa li tiġi żgurata l-protezzjoni tal-kunfidenzjalità ta’ ċerta informazzjoni, b’mod partikolari fejn il-pubblikazzjoni tad-data tista’ taffettwa s-sigurtà jew l-ordni pubbliku tal-Unjoni jew tipperikola l-anonimità ta’ tranżazzjonijiet speċifiċi. Ir-rapport annwali jenħtieġ li jinkludi informazzjoni dwar ix-xejriet u ċ-ċifri relatati mal-investiment barrani fl-Unjoni, aġġornamenti dwar l-iżviluppi leġiżlattivi rilevanti fl-Istati Membri, kif ukoll informazzjoni dwar l-isforzi ta’ kooperazzjoni internazzjonali.

(56)

Kwalunkwe pproċessar ta’ data personali skont dan ir-Regolament jenħtieġ li jkun f’konformità mar-regoli applikabbli dwar il-protezzjoni ta’ data personali. L-ipproċessar ta’ data personali mill-punti ta’ kuntatt u entitajiet oħra fl-Istati Membri jenħtieġ li jitwettaq f’konformità mar-Regolament (UE) 2016/679 tal-Parlament Ewropew u tal-Kunsill (19). L-ipproċessar ta’ data personali mill-Kummissjoni jenħtieġ li jitwettaq f’konformità mar-Regolament (UE) 2018/1725 tal-Parlament Ewropew u tal-Kunsill (20). Id-data personali taf tkun inkluża f’dokumenti u sorsi oħra ta’ informazzjoni li jiġu pproċessati għall-iskop tal-iskrinjar tal-investiment. Dik id-data tista’ tinkludi ismijiet ta’ persuni fiżiċi li huma investituri f’kumpaniji fil-mira, ismijiet u d-data ta’ kuntatt ta’ persuni fiżiċi li huma involuti fil-ġestjoni tal-investitur jew tal-kumpanija fil-mira, jew ismijiet u pożizzjonijiet tal-persuni involuti fl-operat tal-punti ta’ kuntatt. Jenħtieġ li kull awtorità nazzjonali kompetenti ta’ Stat Membru u l-Kummissjoni jkunu individwalment responsabbli għall-ipproċessar ta’ data personali meta jużaw il-mekkaniżmu ta’ kooperazzjoni.

(57)

Il-Kontrollur Ewropew għall-Protezzjoni tad-Data ġie kkonsultat skont l-Artikolu 42(1) tar-Regolament (UE) 2018/1725 u ta l-opinjoni tiegħu fil-15 ta’ Marzu 2024. Il-Kummissjoni u l-Istati Membri jenħtieġ li jitqiesu bħala kontrolluri konġunti, skont it-tifsira tar-Regolament (UE) 2018/1725 u r-Regolament (UE) 2016/679, għall-ipproċessar ta’ data personali. Fit-28 ta’ April 2022, il-Kummissjoni u r-rappreżentanti jew l-awtoritajiet tal-Istati Membri li jipparteċipaw fil-mekkaniżmu ta’ kooperazzjoni skont ir-Regolament (UE) 2019/452 iffirmaw Ftehim ta’ Kontroll Konġunt, li huwa kompatibbli ma’ dan ir-Regolament. Għalhekk, jenħtieġ li l-Kummissjoni u r-rappreżentanti jew l-awtoritajiet tal-Istati Membri li jipparteċipaw fil-mekkaniżmu jżommu dak l-Arranġament ta’ Kontroll Konġunt, li jenħtieġ li jkompli japplika wkoll fir-rigward ta’ dan ir-Regolament, u jenħtieġ li r-referenzi fl-Arranġament ta’ Kontroll Konġunt għad-dispożizzjonijiet tar-Regolament (UE) 2019/452, għal dak il-għan, jinqraw bħala referenzi għad-dispożizzjonijiet korrispondenti ta’ dan ir-Regolament. Filwaqt li tqieset l-Opinjoni 13/2024 tal-Kontrollur Ewropew għall-Protezzjoni tad-Data, tqies li d-definizzjoni ta’ perjodi komuni ta’ żamma ma tkunx xierqa, peress li dan ir-Regolament jistabbilixxi biss ir-rekwiżiti minimi tal-mekkaniżmi ta’ skrinjar u peress li xi wħud mill-Istati Membri għadhom biss kif jibdew jiżviluppaw il-mekkaniżmi ta’ skrinjar tagħhom.

(58)

Il-Kummissjoni jenħtieġ li tevalwa l-funzjonament u l-effettività ta’ dan ir-Regolament fi żmien erba’ snin u sitt xhur mid-data tad-dħul fis-seħħ ta’ dan ir-Regolament u kull ħames snin wara dan u jenħtieġ li tippreżenta rapport lill-Parlament Ewropew u lill-Kunsill. Dak ir-rapport jenħtieġ li janalizza l-evoluzzjoni tal-investimenti barranin fl-Unjoni u jivvaluta l-kontribut ta’ dan ir-Regolament għas-sigurtà ekonomika tal-Unjoni. Jenħtieġ li jivvaluta wkoll jekk modifika tal-kamp ta’ applikazzjoni minimu komuni tal-mekkaniżmi ta’ skrinjar hijiex ġustifikata, inkluż fir-rigward tal-investimenti barranin fil-miri tal-Unjoni li jimmanifatturaw jew li għandhom awtorizzazzjoni għat-tqegħid fis-suq għall-mediċini kritiċi. Barra minn hekk, jenħtieġ li dak ir-rapport jevalwa r-riskji marbuta mal-investimenti barranin fis-servizzi tal-media u kif l-aħjar li jiġu indirizzati. Jenħtieġ li jinkludi wkoll valutazzjoni ta’ jekk dan ir-Regolament jeħtieġx jiġi emendat. Meta r-rapport ikun fih proposta biex jiġi emendat dan ir-Regolament, jenħtieġ li l-Kummissjoni tkun tista’ tehmeż proposta leġiżlattiva miegħu.

(59)

L-implimentazzjoni ta’ dan ir-Regolament mill-Unjoni u l-Istati Membri jenħtieġ li tkun f’konformità mar-rekwiżiti rilevanti għall-impożizzjoni ta’ miżuri restrittivi għal raġunijiet ta’ sigurtà jew ordni pubbliku stabbiliti fil-ftehimiet tal-Organizzazzjoni Dinjija tal-Kummerċ (21), inkluż, b’mod partikolari, l-Artikolu XIV(a) u l-Artikolu XIV bis tal-Ftehim Ġenerali dwar il-Kummerċ fis-Servizzi (GATS) (22). Jenħtieġ li l-implimentazzjoni ta’ dan ir-Regolament tkun konsistenti mal-impenji meħuda taħt ftehimiet kummerċjali u ta’ investiment oħra li għalihom ikunu partijiet l-Unjoni jew l-Istati Membri kif ukoll arranġamenti kummerċjali u ta’ investiment li għalihom ikunu aderenti l-Unjoni jew l-Istati Membri.

(60)

Meta investiment barrani jikkostitwixxi konċentrazzjoni li taqa’ fil-kamp ta’ applikazzjoni tar-Regolament tal-Kunsill (KE) Nru 139/2004 (23), jenħtieġ li l-applikazzjoni ta’ dan ir-Regolament tkun mingħajr preġudizzju għall-applikazzjoni tal-Artikolu 21(4) tar-Regolament (KE) Nru 139/2004. Jenħtieġ li dan ir-Regolament u l-Artikolu 21(4) tar-Regolament (KE) Nru 139/2004 jiġu applikati b’mod koerenti. Sa fejn il-kampijiet ta’ applikazzjoni rispettivi taż-żewġ Regolamenti jikkoinċidu, jenħtieġ li r-raġunijiet għall-iskrinjar stabbiliti fdan ir-Regolament u l-kunċett ta’ interessi leġittimi fis-sens tal-Artikolu 21(4) tar-Regolament (KE) Nru 139/2004 jiġu interpretati b’mod koerenti, mingħajr preġudizzju għall-valutazzjoni tal-kompatibbiltà tal-miżuri nazzjonali li għandhom l-għan li jipproteġu dawk l-interessi bil-prinċipji ġenerali u dispożizzjonijiet oħra tad-dritt tal-Unjoni.

(61)

Jenħtieġ li dan ir-Regolament ma jaffettwax ir-regoli tal-Unjoni dwar il-valutazzjoni prudenzjali ta’ akkwisti ta’ parteċipazzjonijiet azzjonarji kwalifikanti fis-settur finanzjarju, stabbiliti mid-Direttivi 2009/138/KE (24), 2013/36/UE (25) u 2014/65/UE (26) tal-Parlament Ewropew u tal-Kunsill, li hija proċedura distinta b’objettiv speċifiku.

(62)

L-applikazzjoni ta’ dan ir-Regolament jenħtieġ li tkun konsistenti ma’ proċeduri oħra ta’ notifika u ta’ awtorizzazzjoni stabbiliti fid-dritt tal-Unjoni u mingħajr preġudizzju għalihom. Jenħtieġ li l-Kummissjoni titħalla tuża l-informazzjoni nnotifikata mill-Istati Membri fi ħdan il-qafas tal-mekkaniżmu ta’ kooperazzjoni biex teżerċita r-rwol tagħha ta’ sorveljanza tal-applikazzjoni tad-dritt tal-Unjoni f’konformità mal-Artikolu 17 tat-TUE.

(63)

Sabiex jitqiesu l-adozzjoni jew l-emenda tal-atti legali tal-Unjoni li jistabbilixxu proġetti jew programmi, sabiex tiġi adattata l-lista ta’ oqsma tat-teknoloġija li huma rilevanti għall-valutazzjonijiet tar-riskju u biex titqies l-adozzjoni ta’ atti legali li jipprevedu l-istabbiliment tal-Lista tal-Unjoni ta’ Prodotti Mediċinali Kritiċi, jenħtieġ li tiġi delegata lill-Kummissjoni s-setgħa li tadotta atti skont l-Artikolu 290 tat-TFUE fir-rigward tal-emendi għad-dispożizzjonijiet rilevanti ta’ dan ir-Regolament u l-Annessi tiegħu. Il-lista ta’ proġetti u programmi ta’ interess għall-Unjoni stabbilita fl-Anness rilevanti ta’ dan ir-Regolament jenħtieġ li tkopri proġetti jew programmi stabbiliti mid-dritt tal-Unjoni li jipprevedu l-iżvilupp, iż-żamma jew l-akkwist ta’ infrastruttura kritika, teknoloġiji kritiċi jew inputs kritiċi li huma ta’ importanza partikolari għas-sigurtà jew għall-ordni pubbliku. Il-lista ta’ oqsma tat-teknoloġija li huma relevanti għall-valutazzjoni tar-riskju stabbiliti fl-Anness rilevanti ta’ dan ir-Regolament jenħtieġ li tinkludi oqsma fejn investiment barrani jista’ jaffettwa s-sigurtà jew l-ordni pubbliku f’aktar minn Stat Membru wieħed permezz ta’ entità fil-mira tal-Unjoni, li ma tipparteċipax fi proġett jew programm ta’ interess għall-Unjoni jew li ma tirċevix fondi mingħandu. Fir-rigward tal-mediċini kritiċi, huwa importanti li, meta l-Kummissjoni tkun stabbiliet il-Lista tal-Unjoni ta’ Prodotti Mediċinali Kritiċi permezz ta’ att ta’ implimentazzjoni adottat skont Regolament li jistabbilixxi proċeduri tal-Unjoni għall-awtorizzazzjoni u s-superviżjoni ta’ prodotti mediċinali għall-użu mill-bniedem u li jistabbilixxi regoli li jirregolaw l-Aġenzija Ewropea għall-Mediċini, li jemenda r-Regolamenti (KE) Nru 1394/2007 (27) u (UE) Nru 536/2014 (28) u li jħassar ir-Regolamenti (KE) Nru 141/2000 (29), (KE) Nru 726/2004 (30) u (KE) Nru 1901/2006 (31), ir-referenza għall-mediċini kritiċi li għandhom jitqiesu mill-Istati Membri u mill-Kummissjoni meta jiddeterminaw jekk investiment barrani probabbilment jaffettwa b’mod negattiv is-sigurtà jew l-ordni pubbliku jenħtieġ li tiġi aġġornata u sostitwita b’referenza għal-Lista tal-Unjoni ta’ Prodotti Mediċinali Kritiċi u l-emendi sussegwenti għaliha u li l-anness rilevanti jenħtieġ li jitħassar. Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta’ tħejjija, ukoll fil-livell ta’ esperti u li dawk il-konsultazzjonijiet jiġu mwettqa f’konformità mal-prinċipji stipulati fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (32). B’mod partikolari, biex tiġi żgurata parteċipazzjoni ugwali fit-tħejjija ta’ atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta’ atti delegati.

(64)

Sabiex ikunu żgurati kundizzjonijiet uniformi għall-implimentazzjoni ta’ dan ir-Regolament, b’mod partikolari fir-rigward tal-formola li għandha tintuża biex tiġi pprovduta informazzjoni dwar investimenti barranin, l-arranġamenti għall-funzjonament tas-sistema sigura u kriptata u l-portal online tal-UE, il-gwida teknika lill-Istati Membri dwar il-bażi tad-data sigura dwar l-eżitu tal-valutazzjonijiet taħt il-mekkaniżmi nazzjonali ta’ skrinjar, u l-formola li għandha tintuża mill-Istati Membri għar-rapportar annwali tagħhom lill-Kummissjoni, jenħtieġ li jingħataw setgħat ta’ implimentazzjoni lill-Kummissjoni. Jenħtieġ li dawk is-setgħat ikunu eżerċitati f’konformità mar-Regolament (UE) Nru 182/2011 tal-Parlament Ewropew u tal-Kunsill (33).

(65)

Skont il-prinċipju ta’ proporzjonalità, huwa meħtieġ u xieraq biex jintlaħaq l-għan bażiku li jiġi żgurat li l-investimenti barranin fl-Unjoni ma jkollhomx effett negattiv fuq is-sigurtà jew l-ordni pubbliku li jiġu stabbiliti regoli dwar qafas tal-Unjoni għall-iskrinjar, mill-Istati Membri, ta’ investimenti barranin fit-territorju tagħhom, għal raġunijiet ta’ sigurtà jew ordni pubbliku u dwar mekkaniżmu ta’ kooperazzjoni li jippermetti lill-Istati Membri u lill-Kummissjoni jiskambjaw informazzjoni rilevanti dwar investimenti barranin, jivvalutaw l-effett potenzjali tagħhom fuq is-sigurtà jew l-ordni pubbliku, u jidentifikaw kwistjonijiet ta’ tħassib potenzjali. Dan ir-Regolament ma jmurx lil hinn minn dak li hu meħtieġ biex jintlaħaq l-objettiv maħsub, skont l-Artikolu 5(4) tat-TUE.

(66)

Jenħtieġ li r-Regolament (UE) 2019/452 jitħassar. Sabiex l-Istati Membri u l-entitajiet ikollhom biżżejjed żmien biex iħejju għall-implimentazzjoni tiegħu, jenħtieġ li dan ir-Regolament jibda japplika 18-il xahar mid-data tad-dħul fis-seħħ tiegħu. Sabiex jiġu żgurati ċ-ċertezza legali u l-kooperazzjoni bla xkiel bejn l-Istati Membri u l-Kummissjoni fl-iskrinjar tal-investimenti barranin, u filwaqt li jitqiesu l-aspettattivi leġittimi tal-investituri barranin, huwa xieraq li r-Regolament (UE) 2019/452 ikompli japplika għall-investimenti diretti barranin li jkunu għaddejjin minn skrinjar fid-data tal-applikazzjoni ta’ dan ir-Regolament, jew li jkunu tlestew sa dik id-data. Dan jinkludi l-possibbiltà li l-Istati Membri jipprovdu kummenti jew li l-Kummissjoni toħroġ opinjoni skont l-Artikolu 7(8) tar-Regolament (UE) 2019/452. Jenħtieġ li dan ir-Regolament ma japplikax għal investimenti diretti barranin li għalihom ikompli japplika r-Regolament (UE) 2019/452. Jenħtieġ ukoll li ma japplikax għal investimenti barranin oħra li jkunu għaddejjin minn skrinjar fid-data tal-applikazzjoni ta’ dan ir-Regolament, bħal investimenti intra-Unjoni li diġà huma soġġetti għal skrinjar skont il-liġi nazzjonali. Huwa daqstant xieraq li jiġi ċċarat li dan ir-Regolament ma japplikax għal investimenti barranin li jitlestew sad-data tal-applikazzjoni ta’ dan ir-Regolament,