(1)

Leagtar amach i dTreoir 1999/105/CE ón gComhairle (3) rialacha maidir le táirgeadh d’fhonn ábhar atáirgthe foraoise a chur ar an margadh agus maidir lena mhargú.

(2)

Cumhdaítear 45 % de limistéar talún an Aontais le foraoisí agus comhlíonann siad ról ilfheidhmeach lena gcuimsítear feidhmeanna sóisialta, eacnamaíocha, comhshaoil, éiceolaíocha agus cultúrtha. Inter alia, tá feidhm phríomhordúil mar linn charbóin ag foraoisí sa bheartas maidir le maolú ar an athrú aeráide. Tá ábhar atáirgthe foraoise atá d’aitheantas cruthaithe, d’ardcháilíocht, oiriúnaithe don aeráid agus éagsúil fíor-riachtanach chun na róil sin a chomhlíonadh.

(3)

I bhfianaise na bhforbairtí san eolas eolaíoch nó teicniúil, nuashonrú na Rialacha agus na Rialachán i Scéim na hEagraíochta um Chomhar agus Forbairt Eacnamaíochta (ECFE) maidir le Deimhniú Ábhair Atáirgthe Foraoise a bhíonn ag gluaiseacht sa Trádáil Idirnáisiúnta (‘Scéim Síolta agus Plandaí Foraoise ECFE’), tosaíochtaí nua beartais an Aontais i ndáil le hinbhuanaitheacht, oiriúnú don athrú aeráide agus bithéagsúlacht agus go háirithe Teachtaireacht ón gCoimisiún an 11 Nollaig 2019 dar teideal ‘An Comhaontú Glas don Eoraip’, chomh maith leis an taithí a fuarthas le linn chur chun feidhme Threoir 1999/105/CE, ba cheart gníomh nua a chur in ionad na Treorach sin. Chun cur i bhfeidhm aonfhoirmeach na rialacha nua seo ar fud an Aontais a áirithiú, ba cheart an gníomh sin a bheith i bhfoirm Rialacháin.

(4)

Is é is aidhm do Scéim Síolta agus Plandaí Foraoise ECFE táirgeadh agus úsáid síolta, codanna de phlandaí agus plandaí a bailíodh, a próiseáladh agus a margaíodh i mbealach lena n-áirithítear ardcháilíocht agus infhaighteacht ábhair atáirgthe foraoise a spreagadh. De bharr timthriallta fáis fada foraoisí, costas fáschoillte agus cineál fadtéarmach na hinfheistíochta i bhforaoisí, tá sí fíor-riachtanach go bhfaigheadh foraoiseoirí faisnéis atá go hiomlán iontaofa maidir le tionscnamh agus saintréithe géiniteacha an ábhair atáirgthe foraoise a úsáideann siad ina bhfáschoillte. Comhlíonann Scéim Síolta agus Plandaí Foraoise ECFE an riachtanas sin trí bhíthin deimhniúcháin agus inrianaitheachta. Tá ról mór aige san iarracht chun cuidiú le foraoisí an domhain a oiriúnú do dhálaí aeráide atá ag athrú. Leagtar béim ar ardéagsúlacht ghéiniteach a áirithiú laistigh de speicis agus ar éagsúlacht speiceas, lena n-áirítear trí éagsúlú sna ceapa foraoise, a chaomhnú. Mar thoradh air sin, déantar acmhainneacht oiriúnaitheach foraoisí a choinneáil ar bun agus a fheabhsú d’fhonn limistéar a athphlandú le crainn (‘athfhoraoisiú’) amach anseo agus chun foraoisí nua a chruthú (‘foraoisiú’). Féadfaidh gá a bheith le hathfhoraoisiú mar chuid de bhainistiú inbhuanaithe ar fhoraoisí nó i gcás ina ndearna teagmhais adhaimsire, falscaithe, galair, ráigeanna lotnaidí agus tubaistí eile difear do chodanna d’fhoraois a bhí ann cheana.

(5)

Leagtar amach sa Chomhaontú Glas don Eoraip gealltanas an Choimisiúin chun dul i ngleic leis an athrú aeráide agus dúshláin a bhaineann leis an gcomhshaol. Is é is aidhm dó geilleagar an Aontais a chlaochlú chun todhchaí níos inbhuanaithe a chruthú. Ní mór rialacha an Aontais maidir le táirgeadh agus margú ábhair atáirgthe foraoise a bheith i gcomhréir le Rialachán (AE) 2021/1119 ó Pharlaimint na hEorpa agus ón gComhairle (4), lena mbunaítear creat an Aontais chun aeráidneodracht a bhaint amach, agus leis na trí straitéis cur chun feidhme den Chomhaontú Glas don Eoraip, arna gcur i láthair i dTeachtaireacht ón gCoimisiún an 20 Bealtaine 2020 dar teideal EU Biodiversity Strategy for 2030 — Bringing nature back into our lives [Straitéis Bhithéagsúlachta an Aontais Eorpaigh go dtí 2030 – An dúlra a thabhairt ar ais inár saol] (‘Straitéis Bhithéagsúlachta an Aontais Eorpaigh’), i dTeachtaireacht ón gCoimisiún an 24 Feabhra 2021 dar teideal Forging a climate-resilient Europe — the new EU Strategy on Adaptation to Climate Change [Eoraip atá seasmhach ó thaobh na haeráide de a chruthú – Straitéis nua an Aontais Eorpaigh um an Oiriúnú don Athrú Aeráide] (‘Straitéis Eorpach maidir le hOiriúnú’) agus i dTeachtaireacht ón gCoimisiún an 16 Iúil 2021 dar teideal New EU Forest Strategy for 2030 [Straitéis Foraoiseachta nua an Aontais le haghaidh 2030] (‘Straitéis Foraoise an Aontais’).

(6)

Le Rialachán (AE) 2021/1119, ceanglaítear ar Bhallstáit agus institiúidí ábhartha an Aontais dul chun cinn leanúnach a áirithiú maidir le hacmhainneacht oiriúnaithe a fheabhsú, athléimneacht a neartú agus leochaileacht i leith an athraithe aeráide a laghdú. Ceann de na haidhmeanna atá ag Straitéis an Aontais Eorpaigh um an oiriúnú, dá bhrí sin, is ea dlús a chur le hacmhainneacht an Aontais oiriúnú don athrú aeráide, trí na rialacha maidir le hábhar atáirgthe foraoise a leasú, i measc gníomhaíochtaí eile. Le dlí an Aontais, ba cheart táirgeadh agus margú ábhair atáirgthe foraoise ar fud an Aontais a spreagadh.

(7)

Is iad príomhchuspóirí Straitéis Foraoiseachta an Aontais Eorpaigh foraoisiú éifeachtach agus caomhnú agus athchóiriú foraoisí san Aontas. Trí na cuspóirí sin a shaothrú, cuideofar le hionsú CO2 a mhéadú, tarlú agus méid dóiteán foraoise a laghdú, agus an bithgheilleagar a chur chun cinn, agus na prionsabail éiceolaíocha sin atá fabhrach i ndáil leis an mbithéagsúlacht á n-urramú go hiomlán ag an am céanna. Tá sé fíor-riachtanach athchóiriú foraoisí a áirithiú agus bainistiú inbhuanaithe foraoisí a athneartú chun oiriúnú don athrú aeráide agus d’athléimneacht foraoisí. I ndáil leis sin, deirtear i Straitéis Foraoiseachta an Aontais go mbeidh gá le méideanna móra ábhair atáirgthe foraoise iomchuí chun foraoisí a oiriúnú don athrú aeráide agus chun foraoisí a athchóiriú tar éis damáiste aeráide. Tuigtear leis sin iarrachtaí chun acmhainní géiniteacha foraoise a shlánú agus iad a úsáid go hinbhuanaithe, iarrachtaí ar a mbraitheann foraoiseacht atá níos aeráid-díonaí. Tá gá le hiarrachtaí chun táirgeadh agus infhaighteacht ábhar atáirgthe foraoise mar sin a mhéadú freisin, chun faisnéis níos fearr a sholáthar maidir lena oiriúnacht do dhálaí sonracha aeráide agus éiceolaíocha an limistéar a bhfuiltear chun é a chur nó a phlandú agus chun táirgeadh comhoibríoch agus aistriú an ábhair atáirgthe foraoise sin trasna teorainneacha náisiúnta laistigh den Aontas a fheabhsú.

(8)

Is é is aidhm do Straitéis Bhithéagsúlachta an Aontais Eorpaigh bithéagsúlacht an Aontais a chur ar bhóthar an téarnaimh faoi 2030. Faoin straitéis sin, tá dlí an Aontais le tosaíocht a thabhairt do chaomhnú éagsúlacht speiceas agus ardéagsúlacht ghéiniteach a áirithiú laistigh de speicis agus luchtóga ábhair atáirgthe foraoise chun soláthar ábhair atáirgthe foraoise atá d’aitheantas cruthaithe, d’ardcháilíocht agus atá éagsúil go géiniteach agus atá oiriúnaithe nó inoiriúnaithe do dhálaí aeráide reatha agus dálaí aeráide réamh-mheasta a éascú. Tá caomhnú agus feabhsú bhithéagsúlacht na bhforaoisí, lena n-áirítear an éagsúlacht ghéiniteach laistigh de speicis crann aonair, fíor-riachtanach do bhainistiú inbhuanaithe ar fhoraoisí agus do chaomhnú acmhainní géiniteacha foraoise, agus dá bhrí sin, chun tacú le hoiriúnú foraoisí don athrú aeráide.

(9)

Tá gné fhadtéarmach thrasteorann ann toisc go bhfuil coinne leis go gcuirfear dlús mór le himirce criosanna fásra ó thuaidh, atá le feiceáil cheana, sna deacáidí atá le teacht. Dá réir sin, maidir leis an gceanglas sa Rialachán seo chun faisnéis a sholáthar faoi na limistéir ina bhfuil ábhar atáirgthe foraoise oiriúnaithe do dhálaí áitiúla, bheadh na ceanglais sin ina sócmhainní thar a bheith úsáideach d’fhoraoiseoirí. Ba cheart an deis a bheith ag údaráis inniúla na limistéir sin (‘limistéir úsáide’) a ainmniú.

(10)

I dTreoir 1999/105/CE sainmhínítear ábhar atáirgthe foraoise i ndáil lena thábhacht chun críocha foraoiseachta san Aontas uile nó i gcuid den Aontas, ach tá sé doiléir fós maidir leis na críocha foraoiseachta sin. Ar mhaithe le soiléireacht, ba cheart a liostú i raon feidhme an Rialacháin seo na críocha dá bhfuil sé tábhachtach ábhar atáirgthe foraoise d’ardcháilíocht a úsáid. Féadfar ábhar atáirgthe foraoise a tháirgeadh lena úsáid san fhoraoisiú, san athfhoraoisiú, san éagsúlú i gceap foraoise agus i bplandú crann agus síolú díreach eile chun ceann amháin nó níos mó de na críocha seo a leanas: foraoiseacht ilfheidhmeach, táirgeadh adhmaid, bithábhair, bithmhais nó táirgí foraoise eile agus caomhnú acmhainní géiniteacha foraoise.

(11)

Mar sin féin, ba cheart an agrafhoraoiseacht a eisiamh ó raon feidhme an Rialacháin seo toisc go meastar, mar aon le talmhaíocht bheacht, feirmeoireacht orgánach, agra-éiceolaíocht agus féarthalamh buan ísealdéine, go bhfuil sí ar cheann den iliomad cleachtas talmhaíochta a chuireann le cosaint na bithéagsúlachta, seirbhísí éiceachórais agus gnéithe tírdhreacha. Aithnítear gnéithe agrafhoraoiseachta, agus go háirithe fálta sceach, mar eilimintí talmhaíochta neamhtháirgiúla lena gcosnaítear páirceanna talmhaíochta, agus ar an gcaoi sin cumhdaítear cuspóirí seachas na cuspóirí a leagtar amach sa Rialachán seo.

(12)

Léirítear sa taighde a ríthábhachtaí atá sé an measúnú agus formheas bunábhair a bhunú ar an gcríoch shonrach dá n-úsáidfear an t-ábhar atáirgthe foraoise. Anuas air sin, tá tionchar dearfach ag cur agus plandú an ábhair atáirgthe foraoise d’ardcháilíocht san áit cheart ar an gcuspóir dá n-úsáidtear an t-ábhar atáirgthe foraoise sin. Ciallaíonn cur agus plandú ‘san áit cheart’ go bhfuil an t-ábhar atáirgthe foraoise oiriúnach go géiniteach agus go feinitíopach don suíomh ina bhfástar é, lena n-áirítear na réamh-mheastacháin aeráide ábhartha ina leith.

(13)

Agus an bunábhair formheasta acu, ba cheart do na húdaráis inniúla idirdhealú a dhéanamh idir foinsí uatheascarthacha agus dúchasacha síolta, nó clampaí uatheascarthacha agus dúchasacha. Ba cheart an rogha a bheith ag oibreoirí gairmiúla an t-idirdhealú sin a léiriú i ndoiciméad an oibreora ghairmiúil.

(14)

Chun soláthar leordhóthanach ábhair atáirgthe foraoise a áirithiú de thoradh an éilimh mhéadaithe air, is gá aon bhacainn iarbhír nó fhéideartha ar an trádáil a bhaint, bacainní a d’fhéadfadh dochar a dhéanamh do shaorghluaiseacht ábhair atáirgthe foraoise laistigh den Aontas. Ní féidir an aidhm sin a bhaint amach ach amháin má fhorchuirtear na caighdeáin is airde is féidir le rialacha ábhartha an Aontais maidir le hábhar atáirgthe foraoise.

(15)

Ba cheart riachtanais phraiticiúla a chur san áireamh i rialacha an Aontais maidir le hábhar atáirgthe foraoise a tháirgeadh lena mhargú agus maidir le hábhar atáirgthe foraoise a mhargú, agus níor cheart feidhm a bheith ag na rialacha sin ach amháin do speicis áirithe agus dá hibridí atá tábhachtach do chuspóirí an Rialacháin seo. Ba cheart na speicis sin a liostú sa Rialachán seo.

(16)

Is é is aidhm don Rialachán seo cuidiú le foraoisí athléimneacha a chothabháil agus a bhunú, éiceachórais foraoise a athchóiriú, tacú lena n-éicisheirbhísí agus planduithe crann eile a bhunú. Bainfear an méid sin amach go háirithe trí tháirgeadh inbhuanaithe, margú agus inrianaitheacht ábhair atáirgthe foraoise ardcháilíochta agus trína áirithiú go gcuirtear úsáideoirí ar an eolas, sula gceannaítear ábhar atáirgthe foraoise, faoi na dálaí sonracha aeráide agus éiceolaíocha ina raibh an bunábhar lena mbaineann lonnaithe.

(17)

Chun a áirithiú go ndéantar ábhar atáirgthe foraoise deimhnithe a oiriúnú do dhálaí aeráide agus éiceolaíocha sonracha an limistéir ina mbeartaítear é a chur nó a phlandú, ba cheart do na húdaráis inniúla measúnú a dhéanamh ar shaintréithe inbhuanaitheachta an bhunábhair le linn an nós imeachta chun é a fhormheas. Ba cheart a chumhdach leis na saintréithe inbhuanaitheachta sin oiriúnú an bhunábhair sin do na dálaí sonracha aeráide agus éiceolaíocha, lena n-áirítear na fachtóirí bitheacha agus aibitheacha atá i réim sa réigiún bunáitíochta agus a fhrithsheasmhacht nó a lamháltas i gcoinne lotnaidí agus do na dálaí díobhálacha aeráide agus láithreáin inar fhás sé.

(18)

Chun an cháilíocht is airde is féidir d’ábhar atáirgthe foraoise a áirithiú, níor cheart é a bhuaint ach amháin ó bhunábhar atá cláraithe i gclár náisiúnta. Ba cheart rialacha a leagan síos maidir le buaint agus bailiú ábhair atáirgthe foraoise ó bhunábhar chun ardcháilíocht agus inrianaitheacht an ábhair atáirgthe foraoise sin a áirithiú. Chun a chur ar chumas na n-údarás inniúil maoirseacht a dhéanamh ar an mbuaint agus ar an mbailiúchán, ba cheart d’oibreoirí gairmiúla fógra a thabhairt dóibh roimh ré go bhfuil sé ar intinn acu an bhuaint a dhéanamh.

(19)

Ba cheart do na húdaráis inniúla bunábhar a mheasúnú agus a fhormheas. Ba cheart bunábhar formheasta a chlárú i gclár náisiúnta in éineacht le tagairt chláir uathúil agus trí thagairt d’aonad formheasa.

(20)

Mar sin féin, chun níos mó solúbthachta a áirithiú maidir le hábhar atáirgthe foraoise den chatagóir ‘sainaitheanta de réir foinse’ i gcás dálaí adhaimsire agus dálaí aeráide tromchúiseacha, ba cheart an deis a bheith ag na húdaráis inniúla, ar fhormheas a fháil ón gCoimisiún, údarú a thabhairt d’oibreoirí gairmiúla bunábhar atá beartaithe le haghaidh táirgeadh ábhair atáirgthe foraoise den chatagóir sin a fhormheas le haghaidh speicis áirithe.

(21)

Chun na forbairtí san eolas eolaíoch nó teicniúil agus sna caighdeáin idirnáisiúnta is infheidhme a léiriú, ba cheart é a bheith indéanta úsáid teicnící bithcheimiceacha agus móilíneacha a áireamh sa nós imeachta chun bunábhar a fhormheas mar mhodh comhlántach.

(22)

Chun forbhreathnú éifeachtach ar an ábhar atáirgthe foraoise a tháirgtear agus a mhargaítear ar fud an Aontais agus forléargas éifeachtach air a áirithiú, ba cheart do gach Ballstáit clár náisiúnta den bhunábhar le haghaidh na speiceas éagsúil agus a hibridí éagsúla atá formheasta ar a chríoch a bhunú, a fhoilsiú agus a choimeád cothrom le dáta i bhformáid leictreonach.

(23)

Ar an gcúis chéanna, ba cheart don Choimisiún liosta an Aontais de bhunábhar formheasta le haghaidh tháirgeadh ábhair atáirgthe foraoise a fhoilsiú i bhformáid leictreonach, bunaithe ar na cláir náisiúnta arna soláthar ag gach Ballstát. Ba cheart faisnéis faoin mbunábhar ina bhfuil orgánach géinmhodhnaithe nó atá comhdhéanta d’orgánach géinmhodhnaithe lena n-áirítear orgánach a táirgeadh le teicnící géanómaíocha nua áirithe, a bheith i liosta sin an Aontais.

(24)

Ba cheart do na húdaráis inniúla cuí máistirdheimhniú a eisiúint le haghaidh an ábhair atáirgthe foraoise uile a dhíorthaítear ó bhunábhar formheasta. Ba cheart a áirithiú leis an máistirdheimhniú sin gur féidir an t-ábhar atáirgthe foraoise a shainaithint, ba cheart faisnéis a bheith air maidir le tionscnamh an bhunábhair agus ba cheart a sholáthair leis na sonraí is iomchuí dá úsáideoirí agus do na húdaráis inniúla atá freagrach as a rialú oifigiúil. Ba cheart é a bheith indéanta an máistirdheimhniú a eisiúint i bhfoirm leictreonach.

(25)

Ba cheart do gach Ballstát liosta náisiúnta de mháistirdheimhnithe eisithe a bhunú agus a thabhairt cothrom le dáta agus an liosta sin a chur ar fáil don Choimisiún agus d’údaráis inniúla na mBallstát eile go léir.

(26)

Níor cheart a bheith in ann ach ábhar atáirgthe foraoise a buanadh ó bhunábhar formheasta a dheimhniú agus a mhargú. Ba cheart ábhar atáirgthe foraoise a dheimhniú mar ábhar atá ‘sainaitheanta de réir foinse’, ‘roghnaithe’, ‘cáilithe’ agus ‘tástáilte’ ag na húdaráis inniúla agus ní mór é a mhargú agus tagairt á déanamh do na catagóirí sin. Ba cheart na catagóirí ‘sainaitheanta de réir foinse’, ‘roghnaithe’, ‘cáilithe’ agus ‘tástáilte’ d’ábhar atáirgthe foraoise a bheith faoi réir ceanglais aonfhoirmeacha maidir le táirgeadh agus margú, chun trédhearcacht a áirithiú, chun téarmaí cothroma iomaíochta a chruthú d’oibreoirí gairmiúla ar fud an Aontais agus chun sláine an mhargaidh inmheánaigh a choimirciú.

(27)

Tá an bunábhar atá beartaithe le haghaidh tháirgeadh ábhair atáirgthe foraoise chun acmhainní géiniteacha foraoise a chaomhnú éagsúil ó bhunábhar atá beartaithe le haghaidh tháirgeadh ábhair atáirgthe foraoise chun críoch tráchtála mar gheall ar na critéir roghnúcháin éagsúla is infheidhme maidir leis an dá chineál bunábhair sin. Dá bhrí sin, ba cheart é a bheith indéanta oibreoirí gairmiúla a údarú, faoi choinníollacha áirithe, chun bunábhar atá beartaithe le haghaidh tháirgeadh ábhair atáirgthe foraoise a fhormheas chun acmhainní géiniteacha foraoise a chaomhnú. Ba cheart d’oibreoirí gairmiúla údaraithe an t-ábhar bunúsach sin a fhormheas i gcomhréir leis na ceanglais a leagtar síos sa Rialachán seo agus le tagairt d’aonad formheasa, agus ba cheart dóibh sonraí an aonaid formheasa sin a chur in iúl don údarás inniúil. Is é údarás inniúil an Bhallstáit lena mbaineann is ceart an cinneadh a dhéanamh maidir leis an mbunábhar sin a áireamh sa chlár náisiúnta.

(28)

Is í an chatagóir ‘sainaitheanta de réir foinse’ an t-íoschaighdeán a cheanglaítear le haghaidh mhargú an ábhair atáirgthe foraoise, toisc nach bhfuiltear tar éis mórán roghnaithe fheinitíopaigh nó roghnú feinitíopach ar bith a dhéanamh i ndáil leis an mbunábhar atá beartaithe le haghaidh tháirgeadh an ábhair atáirgthe foraoise den chatagóir sin. Chun inrianaitheacht a áirithiú, ba cheart don oibreoir gairmiúil taifead a dhéanamh de shuíomh an bhunábhair óna mbailítear ábhar atáirgthe foraoise, nó, i bhfocail eile, ar a bhunáitíocht. Ba cheart tionscnamh an bhunábhair sin a lua má tá sé ar eolas. Tá sé sin i gcomhréir le Scéim Síolta agus Plandaí Foraoise ECFE agus an taithí a fuarthas ó chur i bhfeidhm Threoir 1999/105/CE.

(29)

Ar bhonn na taithí a fuarthas ó chur i bhfeidhm Threoir 1999/105/CE, agus Scéim Síolta Foraoise agus Plandaí ECFE á cur san áireamh, ba cheart don údarás inniúil measúnú a dhéanamh ar bhunábhar atá beartaithe le haghaidh táirgeadh ábhair atáirgthe foraoise den chatagóir ‘roghnaithe’. Ba cheart an measúnú sin a bheith bunaithe ar bhreathnóireacht shaintréithe an bhunábhair sin agus ba cheart a chur san áireamh ann an cuspóir sonrach dá n-úsáidfear an t-ábhar atáirgthe foraoise a bhuaintear ón mbunábhar sin. Ba cheart cáilíocht fhoriomlán na catagóire sin a áirithiú. Ba cheart méid áirithe aonfhoirmeachta ar a laghad a bheith ag an daonra atáirgthe.

(30)

Chun ábhar atáirgthe foraoise den chatagóir ‘cáilithe’ a tháirgeadh, ba cheart don oibreoir gairmiúil na comhpháirteanna den bhunábhar a úsáidfear sa dearadh crosphórúcháin ar leibhéal aonair a roghnú de bharr na saintréithe den scoth atá acu a mhéid a bhaineann, mar shampla, le táirgeadh adhmaid nó oiriúnú do na dálaí aeráide agus éiceolaíocha áitiúla. Ba cheart don údarás inniúil comhdhéanamh agus dearadh crosphórúcháin molta na gcomhpháirteanna sin a fhormheas, chomh maith le leagan amach an ghoirt, na dálaí leithlisiúcháin agus suíomh an bhunábhair sin. Tá sé sin tábhachtach chun teacht leis na caighdeáin idirnáisiúnta is infheidhme de bhun Scéim Síolta agus Plandaí Foraoise ECFE agus chun an taithí a fuarthas ó chur i bhfeidhm Threoir 1999/105/CE a chur san áireamh.

(31)

Ba cheart an bunábhar atá beartaithe le haghaidh tháirgeadh ábhar atáirgthe foraoise sa chatagóir tástáilte a bheith faoi réir na gceanglas is déine is féidir. Ba cheart ardchéimíocht ábhair atáirgthe foraoise a mheasúnú trí bhíthin é a chur i gcomparáid le ceann amháin de na caighdeáin fhormheasta nó réamhroghnaithe, nó, de rogha, le roinnt de na caighdeáin sin. Ba cheart na caighdeáin sin a chinneadh ar bhonn na críche dá n-úsáidfear an t-ábhar atáirgthe foraoise den chatagóir ‘tástáilte’. Tar éis roghnú na gcomhpháirteanna den bhunábhar, ba cheart ardchéimíocht an ábhair atáirgthe foraoise a léiriú le tástáil chomparáideach nó meastachán a dhéanamh trí bhíthin meastóireacht a dhéanamh ar chomhpháirteanna géiniteacha an bhunábhair sin. Ba cheart don údarás inniúil a bheith páirteach sa phróiseas. Ba cheart dó an dearadh turgnamhach agus na tástálacha formheasa bunábhair a fhormheas, na taifid a sholáthraíonn an t-oibreoir gairmiúil dó a dheimhniú agus torthaí na dtástálacha maidir le hardchéimíocht an ábhair atáirgthe foraoise nó torthaí na meastóireachta géinití a fhormheas. Agus na tascanna sin á ndéanamh, ba cheart don údarás inniúil ailíniú a chuardach leis na caighdeáin idirnáisiúnta is infheidhme de bhun Scéim Síolta agus Plandaí Foraoise ECFE agus caighdeáin idirnáisiúnta eile is infheidhme, agus ba cheart an taithí a fuarthas ó Threoir 1999/105/CE a chur san áireamh.

(32)

Is ar feadh 10 mbliana ar an meán a mhaireann an measúnú ar bhunábhar atá beartaithe le haghaidh tháirgeadh ábhair atáirgthe foraoise den chatagóir ‘tástáilte’. Chun rochtain níos tapa ábhair atáirgthe foraoise den chatagóir sin ar an margadh a áirithiú, fad atá an measúnú ar an mbunábhar fós ar bun, ba cheart an fhéidearthacht a bheith ag na Ballstáit an bunábhar a fhormheas ar bhonn sealadach, go ceann tréimhse uasta 10 mbliana. Níor cheart an formheas sin a dheonú ach amháin má thugtar le fios le torthaí sealadacha na meastóireachta géinití nó torthaí na dtástálacha comparáideacha go gcomhlíonfaidh an bunábhar ceanglais an Rialacháin seo nuair a bheidh na tástálacha críochnaithe. Chun a áirithiú go leanfaidh an formheas de bheith iomchuí, ba cheart na torthaí sin a athscrúdú tar éis 10 mbliana ar a dhéanaí.

(33)

Ba cheart comhlíontacht ábhair atáirgthe foraoise mhargaithe leis na ceanglais le haghaidh na gcatagóirí ‘sainaitheanta de réir foinse’, ‘roghnaithe’, ‘cáilithe’ agus ‘tástáilte’ a fhianú le lipéad oifigiúil. Sula ndéanfar é a mhargú nó a úsáid go díreach, agus go dtí go n-eiseofar an lipéad oifigiúil, ba cheart lipéad sealadach a bheith ar ábhar atáirgthe foraoise buainte chun inrianaitheacht a áirithiú.

(34)

Chomh maith leis an lipéad oifigiúil, ba cheart d’oibreoirí gairmiúla doiciméad oibreora ghairmiúil a eisiúint freisin. Ba cheart dó an fhaisnéis go léir ón lipéad oifigiúil, mar aon le faisnéis fhorlíontach, a chuimsiú. Tá sin riachtanach ionas go gcuirfí an t-úsáideoir ar an eolas ar bhealach chomh cuimsitheach agus is féidir faoin ábhar atáirgthe foraoise agus go dtaifeadfaí an fhaisnéis sin ar an mbealach is éifeachtaí.

(35)

Níor cheart ábhar atáirgthe foraoise géinmhodhnaithe a mhargú ach amháin má tá sé sábháilte do shláinte an duine agus don chomhshaol agus má údaraíodh é le haghaidh saothrú de bhun Threoir 2001/18/CE (5) nó Rialachán (CE) Uimh. 1829/2003 (6) ó Pharlaimint na hEorpa agus ón gComhairle agus má bhaineann an t-ábhar atáirgthe foraoise sin leis an gcatagóir ‘tástáilte’. Níor cheart é a bheith indéanta ábhar atáirgthe foraoise a fhaightear trí theicnící géanómaíocha nua áirithe a mhargú ach amháin má chomhlíonann sé ceanglais Rialachán (AE) 2026/1388 ó Pharlaimint na hEorpa agus ón gComhairle (7) agus má bhaineann an t-ábhar atáirgthe foraoise sin leis an gcatagóir ‘tástáilte’.

(36)

Ba cheart faisnéis faoin mbunábhar, ina bhfuil orgánach géinmhodhnaithe nó atá comhdhéanta d’orgánach géinmhodhnaithe lena n-áirítear orgánach a táirgeadh le teicnící géanómaíocha nua áirithe, a bheith ar an lipéad oifigiúil.

(37)

Chun feidhmiú rianúil an mhargaidh inmheánaigh a áirithiú agus cothrom iomaíochta a chruthú, ba cheart ceanglais áirithe a leagan síos maidir leis an oibleagáid atá ar oibreoirí gairmiúla inrianaitheacht agus sainaithint ábhair atáirgthe foraoise a áirithiú ag gach céim den táirgeadh agus den mhargaíocht, agus na hoibreoirí sin a chur faoi réir rialuithe oifigiúla. Sula gcuirfear ar a n-iontaoibh na gníomhaíochtaí uile nó gníomhaíochtaí áirithe a dhéanamh a dteastaíonn chun ábhar atáirgthe foraoise a tháirgeadh agus a mhargú faoi mhaoirseacht oifigiúil an údaráis inniúil, ba cheart don údarás inniúil iad a údarú sin a dhéanamh. Ba cheart rialacha a leagan síos maidir leis an údarú sin a dheonú, a tharraingt siar nó a mhodhnú agus maidir leis an maoirseacht oifigiúil a dhéanfaidh na húdaráis inniúla.

(38)

Go háirithe, ba cheart don údarás inniúil na hoibreoirí gairmiúla a údarú chun an lipéad oifigiúil le haghaidh speicis agus catagóirí áirithe ábhair atáirgthe foraoise a phriontáil faoi mhaoirseacht oifigiúil. Ar an gcaoi sin tabharfar níos mó solúbthachta do na hoibreoirí gairmiúla i ndáil le margú an ábhair atáirgthe foraoise sin ina dhiaidh sin. Mar sin féin, níor cheart cead a bheith ag oibreoirí gairmiúla tosú ar an lipéad oifigiúil a eisiúint agus a phriontáil ach a gcinntear go gcomhlíonann an t-ábhar atáirgthe foraoise na ceanglais is infheidhme. Tá gá leis an údarú sin de bharr chineál oifigiúil an lipéid oifigiúil agus chun na caighdeáin cháilíochta is airde is féidir a ráthú d’úsáideoirí ábhair atáirgthe foraoise.

(39)

Sa mhéid nach bhfuil speicis áirithe agus a hibridí faoi réir na mbeart atá sa Rialachán seo, féadfaidh na Ballstáit, i gcás na speiceas agus na hibridí sin agus i ndáil lena gcríoch féin, bearta coibhéiseacha nó bearta níos déine nó bearta nach bhfuil chomh dian céanna a dhéanamh.

(40)

Chun trédhearcacht agus rialuithe níos éifeachtaí ar tháirgeadh agus margú ábhair atáirgthe foraoise a áirithiú, ba cheart do na hoibreoirí gairmiúla a bheith cláraithe sna cláir a bhunaigh na Ballstáit de bhun Rialachán (AE) 2016/2031 ó Pharlaimint na hEorpa agus ón gComhairle (8). Tá gá leis sin le haghaidh fheidhmiú an chláir oifigiúil d’oibreoirí gairmiúla agus chun clárú dúbailte a sheachaint. Na hoibreoirí gairmiúla a bhfuil feidhm ag an Rialachán seo maidir leo, cumhdaítear iad nach mór faoi raon feidhme an chláir oifigiúil d’oibreoirí gairmiúla faoi Rialachán (AE) 2016/2031.

(41)

Sula n-aistrítear an t-ábhar atáirgthe foraoise, ba cheart d’oibreoirí gairmiúla rochtain a éascú d’úsáideoirí ionchasacha a n-ábhair atáirgthe foraoise ar an bhfaisnéis atá ar fáil cheana maidir le hoiriúnacht an ábhair atáirgthe foraoise do dhálaí aeráide agus éiceolaíocha sonracha, chun go mbeidh na húsáideoirí in ann an t-ábhar atáirgthe foraoise is iomchuí a roghnú le haghaidh a úsáide beartaithe sa suíomh atá beartaithe.

(42)

I gcás bunábhar atá beartaithe le haghaidh tháirgeadh ábhair atáirgthe foraoise sna catagóirí ‘sainaitheanta de réir foinse’ agus ‘roghnaithe’, ba cheart do na Ballstáit, i gcás na speiceas ábhartha, na réigiúin bhunáitíochta a chríochú chun limistéir nó grúpaí limistéar ina bhfuil dálaí éiceolaíocha atá aonfhoirmeach go leor a shainaithint, ar limistéar nó grúpaí limistéar iad ina bhfuil bunábhar lena bhfuil saintréithe feinitíopacha nó géiniteacha comhchosúla. Tá gá leis sin toisc go bhfuil an t-ábhar atáirgthe foraoise a tháirgtear ón mbunábhar sin le margú agus tagairt á déanamh do na réigiúin bhunáitíochta sin.

(43)

Ba cheart forálacha a leagan síos maidir le pleananna teagmhais a tharraingt suas agus a choinneáil cothrom le dáta le haghaidh speiceas crainn amháin nó níos mó, ar pleananna iad is féidir leis na Ballstáit a bhunú chun a áirithiú go mbeidh siad ullamh agus go mbeidh an acmhainneacht acu soláthar leordhóthanach ábhair atáirgthe foraoise a bhunú a dteastaíonn chun limistéir a athfhoraoisiú má bhíonn teagmhais adhaimsire, falscaithe, galair, ráigeanna lotnaidí, tubaistí nó aon teagmhas díobhálach eile iontu. Ba cheart rialacha a leagan amach maidir le hábhar na bpleananna teagmhais sin, chun gníomhaíocht réamhghníomhach agus éifeachtach in aghaidh rioscaí den sórt sin, má thagann siad chun cinn, a áirithiú. Ba cheart an fhéidearthacht a bheith in ann ábhar na bpleananna teagmhais sin a oiriúnú do dhálaí aeráide agus éiceolaíocha sonracha ar chríoch na mBallstát. Ba cheart a léiriú sna féidearthachtaí sin freisin na gníomhaíochtaí ullmhachta ginearálta a dhéanann na Ballstáit ar bhonn deonach faoin Sásra Aontais um Chosaint Shibhialta, arna bhunú le Cinneadh Uimh. 1313/2013/AE ó Pharlaimint na hEorpa agus ón gComhairle (9).

(44)

Chun a inrianaitheacht a áirithiú, ba cheart ábhar atáirgthe foraoise, le linn chéimeanna uile an táirgthe agus na margaíochta, a choinneáil i luchtóga ar leithligh faoi threoir aonaid formheasa aonair, agus faoi threoir an mháistirdheimhnithe nuair a eiseofar é. Ar chúiseanna trédhearcachta agus inrianaitheachta, ba cheart gach luchtóg d’ábhar atáirgthe foraoise a shainaithint leis an gcód luchtóige agus, ar eisiúint an mháistirdheimhnithe, le cód an mháistirdheimhnithe.

(45)

Níor cheart ach síolta a chomhlíonann caighdeáin cháilíochta áirithe a mhargú. Níor cheart iad a lipéadú ná a mhargú ach amháin i bpacáistí dúnta atá séalaithe, chun gur féidir iad a shainaithint i gceart, chun a gcáilíocht agus a n-inrianaitheacht a áirithiú, agus chun calaois a sheachaint.

(46)

Le linn tréimhsí ina mbíonn deacrachtaí sealadacha maidir le soláthairtí leordhóthanacha ábhair atáirgthe foraoise ó speicis áirithe a bhuain, ba cheart é a bheith indéanta bunábhar nó ábhar atáirgthe foraoise a chomhlíonann ceanglais cháilíochta nach bhfuil chomh dian céanna a fhormheas go sealadach, faoi réir coinníollacha áirithe. Ba cheart do na ceanglais sin, nach mbeidh chomh dian céanna, an dá rud a leanas a chumhdach: formheas bunábhair atá beartaithe le haghaidh táirgeadh catagóirí éagsúla ábhair atáirgthe foraoise nó margadh ábhair atáirgthe foraoise a chomhlíonann ceanglais cháilíochta nach bhfuil chomh dian céanna. Ní mór sin a dhéanamh chun cur chuige solúbtha a áirithiú sna limistéir ina mbíonn imthosca díobhálacha agus chun suaitheadh mhargadh inmheánach an ábhair atáirgthe foraoise a sheachaint.

(47)

Chun feidhmíocht na rialuithe oifigiúla agus na ngníomhaíochtaí oifigiúla eile i ndáil le hábhar atáirgthe foraoise a chomhchuibhiú ar fud an Aontais, ba cheart rialacha a leagan síos maidir le hainmniú na n-údarás inniúil atá freagrach as na cúraimí sin, agus maidir leis na ceanglais a bhaineann leo, agus maidir le feidhmíocht agus tarmligean féideartha na gcúraimí sin chomh maith.

(48)

Ba cheart do shaineolaithe an Choimisiúin a bheith in ann rialuithe, lena n-áirítear iniúchtaí, a dhéanamh sna Ballstáit chun cur i bhfeidhm reachtaíocht ábhartha de chuid an Aontais agus feidhmiú na gcóras rialaithe náisiúnta agus na n-údarás inniúil a fhíorú.

(49)

Chun prionsabail an dea-riaracháin agus muinín an phobail a áirithiú, ba cheart do na húdaráis inniúla rialuithe oifigiúla lena ngabhann ardleibhéal trédhearcachta a dhéanamh. Chun na críche sin, ba cheart dóibh faisnéis ábhartha a chur ar fáil don phobal, lena n-áirítear trína foilsiú ar an idirlíon, ar faisnéis í a bhaineann le heagrú agus le feidhmiú rialuithe oifigiúla, lena n-áirítear, de réir mar is ábhartha, cineál agus líon na rialuithe oifigiúla, na cásanna nár comhlíonadh, na bearta a rinneadh agus na pionóis a forchuireadh.

(50)

Níor cheart ábhar atáirgthe foraoise a allmhairiú ó thríú tíortha ach amháin más rud é go suitear go gcomhlíonann sé ceanglais atá coibhéiseach leis na ceanglais sin is infheidhme maidir le hábhar atáirgthe foraoise a tháirgtear agus a mhargaítear san Aontas. Is gá sin chun a áirithiú go dtugtar leis an ábhar atáirgthe foraoise allmhairithe sin an leibhéal cáilíochta céanna atá ag an ábhar atáirgthe foraoise a tháirgtear san Aontas. Leis an gcur chuige sin, áiritheofar ní hamháin go gcomhlíonfaidh ábhar atáirgthe foraoise arna allmhairiú caighdeáin an Aontais ach go gcuirfidh sé leis an éagsúlacht ghéiniteach agus leis an inbhuanaitheacht.

(51)

D’fhéadfadh sé tarlú, de dheasca fíor-dhrochdhálaí aimsire agus aeráide, go mbeadh ganntanais ábhair atáirgthe foraoise i mBallstát amháin nó níos mó, agus nárbh fhéidir leis na Ballstáit eile, ná le tríú tíortha ar deonaíodh coibhéis ina leith, aghaidh a thabhairt ar na ganntanais sin. Dá bhrí sin, sna cásanna eisceachtúla sin, ba cheart a cheadú do na Ballstáit sin, faoi réir coinníollacha áirithe, ábhar atáirgthe foraoise a allmhairiú go sealadach ó thríú tíortha seachas na tíortha sin ar deonaíodh coibhéis ina leith. Agus measúnú á dhéanamh aige ar na coinníollacha sin, ba cheart don Choimisiún riachtanais shonracha na mBallstát lena mbaineann a chur san áireamh freisin, amhail tionscnamh agus saintréithe géiniteacha an ábhair atáirgthe foraoise lena mbaineann.

(52)

I gcás ina n-allmhairítear an t-ábhar atáirgthe foraoise san Aontas ó thríú tír, ba cheart don oibreoir gairmiúil lena mbaineann an t-údarás inniúil ábhartha a chur ar an eolas sula n-allmhaireofar an t-ábhar atáirgthe foraoise, trí chóras bainistíochta faisnéise do rialuithe oifigiúla (CBFRO) arna bhunú de bhun Rialachán (AE) 2017/625 ó Pharlaimint na hEorpa agus ón gComhairle (10). Thairis sin, ba cheart deimhniú ECFE nó deimhniú oifigiúil coibhéiseach, arna eisiúint ag an tríú tír thionscnaimh, agus taifid ina mbeidh sonraí ar an ábhar atáirgthe foraoise sin, arna soláthar ag an oibreoir gairmiúil sa tríú tír sin, a bheith ag gabháil leis an ábhar atáirgthe foraoise allmhairithe. Ba cheart lipéad ECFE nó lipéad oifigiúil coibhéiseach a cheangal leis an ábhar atáirgthe foraoise sin, toisc gur gá sin chun roghanna eolacha a áirithiú d’úsáideoirí an ábhair atáirgthe foraoise sin agus ionas gur féidir leis na húdaráis inniúla na rialuithe oifigiúla ábhartha a dhéanamh.

(53)

Chun faireachán a dhéanamh ar thionchar an Rialacháin seo agus chun go mbeidh an Coimisiún in ann measúnú a dhéanamh ar na bearta a thugtar isteach, ba cheart do na Ballstáit tuairisc a thabhairt gach 5 bliana faoi na cainníochtaí d’ábhar atáirgthe foraoise a dheimhnítear de réir catagóirí in aghaidh na bliana, faoin líon na bpleananna teagmhais a ghlactar, faoi na suíomhanna gréasáin agus treoracha do phlandóirí atá ábhartha agus atá ar fáil, chomh maith leis na cainníochtaí d’ábhar atáirgthe foraoise in aghaidh an ghéinis agus an speicis a allmhairítear ó thríú tíortha, faoi na pionóis a fhorchuirtear agus faoi líon na n-oibreoirí gairmiúla a chláraítear.

(54)

Chun an Rialachán seo a chur in oiriúint d’athruithe éiceolaíocha, agus go háirithe don athrú ar na speicis crann agus ar a raonta mar thoradh ar an athrú aeráide, agus chun forbairtí san eolas eolaíoch nó teicniúil a léiriú, ba cheart an chumhacht chun gníomhartha a ghlacadh i gcomhréir le hAirteagal 290 den Chonradh ar Fheidhmiú an Aontais Eorpaigh (CFAE) a tharmligean chuig an gCoimisiún i dtaca leis an Rialachán seo a leasú trí speicis crann a chur le liosta na speiceas atá faoi réir an Rialacháin seo, nó iad a bhaint de, ag brath ar chritéir áirithe a bheith á gcomhlíonadh acu nó gan iad a bheith á gcomhlíonadh a thuilleadh.

(55)

D’fhonn forbairtí san eolas eolaíochta agus teicniúil a léirmhíniú agus i Scéim Síolta agus Plandaí Foraoise ECFE agus sna caighdeáin idirnáisiúnta eile is infheidhme, ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún i ndáil le leasú a dhéanamh ar na ceanglais sin a bhaineann le formheas an bhunábhair atá beartaithe le haghaidh táirgeadh ábhair atáirgthe foraoise atá le deimhniú mar ‘sainaitheanta de réir foinse’, ‘roghnaithe’, ‘cáilithe’, agus ‘tástáilte’ agus lena chois sin na catagóirí faoina bhféadfar ábhar atáirgthe foraoise ó na cineálacha éagsúla bunábhair a mhargú.

(56)

Chun an dul chun cinn san eolas eolaíoch nó teicniúil a léiriú, ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún i ndáil leis an Rialachán seo a fhorlíonadh trí cheanglais áirithe a leagan amach maidir le luchtóga aonad síolta de na speicis chrainn a chumhdaítear leis an Rialachán seo seachas a hibridí, maidir le codanna de phlandaí den speiceas sin agus a hibridí, maidir le caighdeáin cháilíochta sheachtracha do Populus spp. a iomadaítear le gearrthóga gais, lena ngabhann fréamhacha nó gan fréamhacha, maidir le stoc le cur de na speicis chrainn agus a hibridí a chumhdaítear leis an Rialachán seo, agus maidir le stoc le cur atá le margú le húsáideoirí deiridh i réigiúin ina mbíonn dálaí éicea-aeráide ar leith.

(57)

Chun soiléireacht agus cur chuige comhchuibhithe a áirithiú maidir le bunú agus cur chun feidhme na bpleananna teagmhais, ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún i dtaca leis an Rialachán seo a fhorlíonadh trína shonrú cad iad na gnéithe is féidir a áireamh i bplean teagmhais de bhun an Rialacháin seo.

(58)

Chun creidiúnacht an chórais um údarú na n-oibreoirí gairmiúla agus um maoirseacht oifigiúil na n-údarás inniúil a mhéadú, ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún i dtaca leis an Rialachán seo a fhorlíonadh tríd an nós imeachta a leagan síos lena gcuireann an t-oibreoir gairmiúil isteach ar údarú, agus lena ndeimhnítear comhlíonadh na gceanglas is infheidhme.

(59)

Chun aidhm Theachtaireacht ón gCoimisiún an 9 Márta 2021 dar teideal 2030 Digital Compass: the European way for the Digital Decade [Compás Digiteach 2030: an modh Eorpach don Deacáid Dhigiteach], arb é an t-aistriú go teicneolaíochtaí digiteacha a oibríonn do dhaoine agus do ghnólachtaí a bhaint amach, agus chun an dul chun cinn teicniúil maidir le digitiú na seirbhísí a chur san áireamh, ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún i dtaca leis an Rialachán seo a fhorlíonadh trí rialacha a bhunú maidir le taifeadadh digiteach na bpríomhghníomhaíochtaí a bhaineann le fíorú na gceanglas a bhaineann le formheas an bhunábhair atáirgthe foraoise agus táirgeadh an ábhair sin as a n-eascraíonn eisiúint na máistirdheimhnithe, na lipéad oifigiúil agus na ndoiciméad oibreora ghairmiúil agus maidir le bunú ardáin láraithe lena nasctar na Ballstáit uile agus an Coimisiún.

(60)

Tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin ar ghníomhartha tarmligthe, lena n-áirítear ar leibhéal na saineolaithe, agus go ndéanfaí na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (11). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid uile ag an am céanna leis na saineolaithe sna Ballstáit, agus tá rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe.

(61)

Chun cur chuige comhréireach a áirithiú, níor cheart gur ghá, nuair is cainníochtaí beaga síolta atá á margú, go gcomhlíonfaí ceanglais áirithe. Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún chun a chinneadh cad is cainníocht bheag ann i ndáil le speicis aonair lena bhféadfaí iad a eisiamh ó cheanglais mhargaíochta áirithe.

(62)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, agus chun a áirithiú gur go cruinn agus ar bhealach comhleanúnach a dhéanfaidh oibreoirí gairmiúla údaraithe an formheas ar bhunábhar atá beartaithe le haghaidh tháirgeadh ábhair atáirgthe foraoise chun acmhainní géiniteacha foraoise a chaomhnú, ba cheart cumhachtaí cur chun feidhme a thabhairt don Choimisiún i ndáil leis na coinníollacha sonracha chun measúnú a dhéanamh ar incháilitheacht oibreoirí gairmiúla atá le húdarú chun bunábhar a fhormheas agus i ndáil leis na coinníollacha chun mionsonraí an aonaid formheasa a chur in iúl don údarás inniúil.

(63)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, agus chun aghaidh a thabhairt ar dheacrachtaí sealadacha i soláthar ginearálta an ábhair atáirgthe foraoise, ba cheart cumhachtaí cur chun feidhme a thabhairt don Choimisiún i ndáil le Ballstát amháin nó níos mó a údarú chun margú ábhair atáirgthe foraoise a cheadú go sealadach, ar ábhar atáirgthe foraoise é a chomhlíonann ceanglais nach bhfuil chomh dian céanna leis na ceanglais a leagtar síos sa Rialachán seo, nó ar ábhar atáirgthe foraoise é arna theacht ó bhunábhar a chomhlíonann na ceanglais sin.

(64)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, agus chun so-aitheantacht agus úsáid na máistirdheimhnithe a éascú, ba cheart cumhachtaí cur chun feidhme a thabhairt don Choimisiún maidir le hábhar agus samhail an mháistirdheimhnithe a ghlacadh agus maidir le rialacha a leagan síos i ndáil leis na sásraí agus na socruithe teicniúla chun eisiúint máistirdheimhnithe cruinne iontaofa a áirithiú, agus chun an riosca calaoise a chosc, maidir leis na nósanna imeachta atá le leanúint i gcás máistirdheimhnithe a tharraingt siar agus deimhnithe athsholáthair a eisiúint, na rialacha maidir le cóipeanna deimhnithe de mháistirdheimhnithe a tháirgeadh, agus na rialacha maidir le deimhnithe leictreonacha a eisiúint agus sínithe leictreonacha a úsáid.

(65)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, agus chun creat comhchuibhithe a áirithiú maidir le lipéadú agus soláthar faisnéise a bhaineann le hábhar atáirgthe foraoise, ba cheart cumhachtaí cur chun feidhme a thabhairt don Choimisiún chun formáid, méid, cruth agus dath an lipéid oifigiúil agus dhoiciméad an oibreora ghairmiúil a leagan amach le haghaidh gach catagóire nó le haghaidh catagóirí sonracha ábhair atáirgthe foraoise. Agus an dath á shainiú aige, ba cheart don Choimisiún na Rialacha agus na Rialacháin atá i Scéim Síolta Foraoise agus Plandaí ECFE a chur san áireamh. Ba cheart cead a bheith ag na Ballstáit na rialacha maidir le dath a chur i bhfeidhm de réir mar is iomchuí.

(66)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, agus chun na forbairtí a bhaineann le digiteáil earnáil an ábhair atáirgthe foraoise a léiriú, ba cheart cumhachtaí cur chun feidhme a thabhairt don Choimisiún maidir le leagan amach na socruithe teicniúla le haghaidh eisiúint na máistirdheimhnithe digiteacha, na lipéad oifigiúil digiteach agus dhoiciméid dhigiteacha na n-oibreoirí gairmiúla.

(67)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, agus chun a áirithiú go bhformheasfaidh na hoibreoirí gairmiúla ábhar bunúsach na catagóire ‘sainaitheanta de réir foinse’, ba cheart cumhachtaí cur chun feidhme a thabhairt don Choimisiún i ndáil leis an bhformheas sin a dheonú, faoi réir coinníollacha áirithe.

(68)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, agus chun a áirithiú go mbainfear úsáid cheart as an maolú a bhaineann le formheas sealadach bunábhair atá beartaithe le haghaidh tháirgeadh ábhair atáirgthe foraoise den chatagóir ‘tástáilte’, ba cheart cumhachtaí cur chun feidhme a thabhairt don Choimisiún i leith uaslíon na n-aonad ábhair atáirgthe foraoise agus uasmhéid an limistéir is féidir a bheith faoi réir an fhormheasa sin a shonrú.

(69)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún maidir le cinneadh a dhéanamh i ndáil le heagrú turgnamh sealadach chun roghanna malartacha feabhsaithe, ar cheanglais an Rialacháin seo a mhéid a bhaineann le measúnú agus formheas bunábhair agus táirgeadh agus margú ábhair atáirgthe foraoise, a lorg.

(70)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, agus cur chun feidhme an chuir chuige náisiúnta nó réigiúnach maidir le táirgeadh agus margú ábhair atáirgthe foraoise á chumasú an tráth céanna arb é is aidhm don mhéid sin feabhas a chur ar cháilíocht an ábhair atáirgthe foraoise lena mbaineann, ar chosaint an chomhshaoil, nó ar an rannchuidiú le cosaint na bithéagsúlachta agus le hathchóiriú éiceachóras foraoise, ba cheart cumhachtaí cur chun feidhme a thabhairt don Choimisiún i ndáil le húdarú a thabhairt do na Ballstáit, faoi choinníollacha áirithe, ceanglais níos déine nó breise a ghlacadh maidir le bunábhar agus táirgeadh ábhair atáirgthe foraoise a fhormheas, chun srian a chur ar fhormheas bunábhair atá beartaithe le haghaidh tháirgeadh ábhair atáirgthe foraoise den chatagóir ‘sainaitheanta de réir foinse’ nó chun toirmeasc a chur ar ábhar atáirgthe foraoise a mhargú don úsáideoir deiridh d’fhonn é a shíolú nó a phlandú ina chríoch uile nó i gcuid di i gcás nach bhfuil an t-ábhar atáirgthe foraoise sin oiriúnach do dhálaí éiceolaíocha foraoiseachta an Bhallstáit lena mbaineann agus do na críocha ábhartha.

(71)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún i ndáil le cinneadh a dhéanamh go gcomhlíonann ábhar atáirgthe foraoise de ghéinis, speicis, nó catagóirí sonracha, agus, i gcás inarb iomchuí, a eascraíonn as cineálacha sonracha bunábhair nó as réigiún sonrach bunáitíochta, a tháirgtear i dtríú tír, ceanglais atá coibhéiseach leis na ceanglais sin is infheidhme maidir le hábhar atáirgthe foraoise a tháirgtear agus a mhargaítear san Aontas.

(72)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún maidir le rialacha áirithe a leagan síos i leith socruithe aonfhoirmeacha praiticiúla i gcomhair fheidhmiú na rialuithe oifigiúla le fíorú go bhfuil na rialacha maidir le hábhar atáirgthe foraoise á gcomhlíonadh.

(73)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún i ndáil leis an bhformáid theicniúil a shonrú, lena n-áirítear a mhéid a bhaineann leis an gcur isteach digiteach agus leis an bpróiseáil dhigiteach atá le húsáid le haghaidh na dtuarascálacha atá le cur faoi bhráid an Choimisiúin ag na Ballstáit maidir le cainníochtaí ábhair atáirgthe foraoise dheimhnithe de réir catagóirí in aghaidh na bliana, líon na bpleananna teagmhais glactha, suíomhanna gréasáin agus treoracha do phlandóirí atá ar fáil agus ábhartha, cainníochtaí na n-ábhar atáirgthe foraoise in aghaidh an ghéinis agus an speicis a allmhairítear ó thríú tíortha, na pionóis, agus líon na n-oibreoirí gairmiúla cláraithe.

(74)

Ba cheart na cumhachtaí cur chun feidhme a thugtar don Choimisiún faoin Rialachán seo a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (12).

(75)

Níor cheart ach ábhar atáirgthe foraoise sláintiúil a cheadú lena mhargú ar fud an Aontais. Ábhar atáirgthe foraoise a mhargaítear i gcomhréir leis an Rialachán seo, ba cheart dó na rialacha a leagtar síos, nó dá bhforáiltear, i bhforálacha ábhartha Rialachán (AE) 2016/2031 maidir le lotnaidí coraintín de chuid an Aontais, lotnaidí coraintín na gcriosanna cosanta agus lotnaidí neamhchoraintín rialáilte an Aontais, agus na bearta arna nglacadh de bhun Airteagal 30(1) den Rialachán sin, a chomhlíonadh freisin.

(76)

Is lotnaidí nach bhfuil faoi réir Rialachán (AE) 2016/2031 iad lotnaidí cáilíochta. Is féidir leo tarlú le linn tháirgeadh an ábhair atáirgthe foraoise agus nuair a stóráiltear an t-ábhar ar feadh tréimhse fhada faoi dhálaí taise nó bogthaise iomarcaí. Dá bhrí sin, ba cheart iad a bheith i láthair ar ábhar atáirgthe foraoise a mhargaítear i méideanna chomh híseal sin nach bhfuil aon éifeacht dhíobhálach ar cháilíocht an ábhair.

(77)

Chun feabhas a chur ar a chomhsheasmhach atá na rialacha a bhaineann le hábhar atáirgthe foraoise le rialacha Rialachán (AE) 2016/2031 maidir le pasanna plandaí, ba cheart a bheith in ann an lipéad oifigiúil le haghaidh ábhar atáirgthe foraoise a nascadh leis an bpas plandaí.

(78)

Mar gheall ar shainiúlachtaí earnáil an ábhair atáirgthe foraoise, is iomchuí go ndéanfaidh an Rialachán seo a fhorálacha féin a leagan síos maidir le rialuithe oifigiúla ábhair atáirgthe foraoise. Chun a áirithiú go gcuirfear rialuithe oifigiúla a bhaineann le hábhar atáirgthe foraoise i bhfeidhm go comhsheasmhach ar fud na mBallstát, chun sineirgí a chruthú le córas na rialuithe oifigiúla in earnálacha comhchosúla, go háirithe sláinte plandaí, agus chun a chur ar chumas na mBallstát ionstraimí agus uirlisí atá ann cheana, amhail córas bainistíochta faisnéise le haghaidh rialuithe oifigiúla, a úsáid chun comhlíonadh na rialacha maidir le hábhar atáirgthe foraoise a fhíorú, ba cheart forálacha maidir le rialuithe oifigiúla sa Rialachán seo a chur i bhfeidhm de bhreis ar fhorálacha ábhartha Rialachán (AE) 2017/625 i gcás inar gá.

(79)

Tuigtear gur féidir le húdaráis inniúla na mBallstát a gcuirtear de chúram orthu cúraimí a dhéanamh faoin Rialachán seo a bheith ina n-údaráis inniúla arna n-ainmniú i gcomhréir le hAirteagal 4 de Rialachán (AE) 2017/625 agus, dá bhrí sin, is iad atá freagrach as na rialuithe oifigiúla agus gníomhaíochtaí oifigiúla eile a eagrú i réimsí eile.

(80)

Ba cheart, dá bhrí sin, Rialacháin (AE) 2016/2031 agus (AE) 2017/625 a leasú dá réir.

(81)

Ar mhaithe le soiléireacht dhlíthiúil agus trédhearcacht, ba cheart Treoir 1999/105/CE a aisghairm.

(82)

Ó tharla nach féidir leis na Ballstáit cuspóir an Rialacháin seo a chomhlíonadh, is é sin cur chuige comhchuibhithe a áirithiú i ndáil le táirgeadh agus margú ábhair atáirgthe foraoise, agus, dá réir sin, de bhun a éifeachtachtaí, a chastachta, agus a thionchair idirnáisiúnta, go bhféadfaí é a bhaint amach níos fearr ar leibhéal an Aontais, féadfaidh an tAontas bearta a dhéanamh, i gcomhréir le prionsabal na coimhdeachta mar a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta, mar a leagtar amach san Airteagal sin, ní sháraíonn an Rialachán seo a bhfuil riachtanach chun an cuspóir sin a bhaint amach. Ina fhianaise sin, agus de réir mar is gá, tugtar maoluithe nó ceanglais shonracha isteach leis an Rialachán seo maidir le cineálacha áirithe ábhair atáirgthe foraoise agus oibreoirí gairmiúla áirithe.

(83)

I bhfianaise an ama agus na n-acmhainní a theastaíonn ó na húdaráis inniúla agus na hoibreoirí gairmiúla lena mbaineann oiriúnú do na ceanglais nua a leagtar amach sa Rialachán seo, ba cheart feidhm a bheith ag an Rialachán seo ón 17 Iúil 2031.

(84)

Chun aon suaitheadh ar tháirgeadh agus ar mhargú ábhair atáirgthe foraoise san Aontas a sheachaint, maidir le hábhar atáirgthe foraoise a táirgeadh roimh an 17 Iúil 2031 i gcomhréir le Treoir 1999/105/CE nó le rialacha náisiúnta, ba cheart a bheith in ann leanúint dá mhargú go dtí go n-ídeofar na stoic atá i gceist. Ar an gcúis chéanna, ba cheart a bheith in ann ábhar atáirgthe foraoise a tháirgtear i gcomhréir le Treoir 1999/105/CE leanúint de bheith á mhargú le máistirdheimhniú arna eisiúint de bhun na Treorach sin,