(1)

Il-Linji Gwida Politiċi (1) ħabbru l-intenzjoni tal-Kummissjoni l-ġdida li tintroduċi kategorija ġdida ta’ kumpaniji żgħar b’kapitalizzazzjoni medja u tivvaluta meta r-regolamentazzjoni eżistenti li tapplika għall-kumpaniji l-kbar tkun peżanti wisq, sproporzjonata jew tostakola l-iżvilupp kompetittiv tagħhom. Fil-Komunikazzjoni tagħha “Kumpass tal-Kompetittività għall-UE” (2), il-Kummissjoni impenjat ruħha li tipproponi definizzjoni ġdida ta’ kumpaniji żgħar b’kapitalizzazzjoni medja biex tiżgura regolamentazzjoni proporzjonata adattata għad-daqs tal-kumpaniji. Bil-ħolqien ta’ kategorija ġdida bħal din għall-kumpaniji li jkunu akbar mill-SMEs iżda iżgħar mill-kumpaniji l-kbar, eluf ta’ kumpaniji fl-UE se jibbenefikaw minn miżuri mfassla apposta.

(2)

Fil-Komunikazzjoni tagħha “Pakkett ta’ Għajnuna għall-SMEs” (3), il-Kummissjoni ppreżentat għadd kbir ta’ azzjonijiet li jkopru erba’ oqsma ewlenin: biex l-affarijiet isiru aktar faċli għall-intrapriżi żgħar u medji (SMEs), jitjieb l-aċċess tagħhom għall-finanzi u għall-forza tax-xogħol b’ħiliet speċjalizzati, u jiġu appoġġati tul iċ-ċiklu tal-ħajja tan-negozju tagħhom. Filwaqt li timmira li tipprovdi għajnuna fl-immedjat, tixpruna l-kompetittività u r-reżiljenza fit-tul, u tippromwovi ambjent tan-negozju ġust u favorevoli għall-SMEs, l-għan hu li l-SMEs ikunu jistgħu jikkompetu u jikbru. Għalhekk, il-Kummissjoni hi impenjata għall-ħtiġijiet tal-kumpaniji li jaqbżu l-limiti tad-definizzjoni ta’ SME stabbilita fir-Rakkomandazzjoni tal-Kummissjoni 2003/361/KE (4) ,, kif ukoll għall-firxa usa’ ta’ kumpaniji żgħar b’kapitalizzazzjoni medja, u tiżviluppa definizzjoni armonizzata għal dawk l-intrapriżi.

(3)

L-istudju msejjaħ “Study to map, measure and portray the EU mid-cap landscape” (5) wera li l-kumpaniji b’kapitalizzazzjoni medja jirrappreżentaw segment tas-settur kummerċjali li jiddistingwi lilu nnifsu b’mod ċar mill-SMEs u anki mill-intrapriżi kbar. Għalkemm il-kumpaniji b’kapitalizzazzjoni medja huma aktar b’saħħithom, normalment jikbru aktar malajr, huma aktar innovattivi u jindirizzaw id-diġitalizzazzjoni aħjar mill-SMEs, dawn isibu ċerti sfidi simili fosthom il-piż amministrattiv jew in-nuqqas ta’ impjegati tal-ħiliet. Meta mqabbla mal-intrapriżi kbar min-naħa l-oħra, dawn għadhom lura f’oqsma ewlenin tal-prestazzjoni. Definizzjoni bħal din hemm bżonnha wkoll biex tittejjeb il-konsistenza fost il-miżuri ta’ politika li jindirizzaw il-ħtiġijiet speċifiċi tal-kumpaniji żgħar b’kapitalizzazzjoni medja. Għalhekk jixraq tinħoloq definizzjoni formali fil-livell tal-Unjoni ta’ kumpaniji żgħar b’kapitalizzazzjoni medja li tista’ twitti t-triq għal miżuri ta’ politika ffokati fuq dak is-segment kummerċjali speċifiku tal-kumpaniji.

(4)

Definizzjoni ta’ intrapriżi żgħar b’kapitalizzazzjoni medja diġà qed tintuża skont ir-Regolament Ġenerali ta’ Eżenzjoni ta’ Kategorija (6) u l-Gwida dwar il-Finanzjament tar-Riskju (7), għall-fini ta’ fallimenti tas-suq identifikati suxxettibbli li jiġu indirizzati b’appoġġ finanzjarju pubbliku mmirat minn riżorsi nazzjonali. Iżda l-għan ta’ definizzjoni ġenerali tal-SMC mhuwiex li tirreplika d-definizzjoni użata fir-regoli dwar l-għajnuna mill-Istat per se, iżda li sservi bħala bażi għal appoġġ ta’ politika mmirat li jista’ jgħin lill-kumpaniji jespandu f’setturi rilevanti u importanti. Id-definizzjoni tal-SMCs f’din ir-Rakkomandazzjoni hija mingħajr preġudizzju għal-limiti meqjusa xierqa fil-kuntest tal-għajnuna mill-Istat.

(5)

Diversi Stati Membri, bħal Franza u l-Ġermanja (8) ,, diġà introduċew definizzjonijiet għal kumpaniji li mhumiex żgħar jew medji, iżda li ma jkunux intrapriżi kbar lanqas. Skont il-loġika ta’ suq uniku tal-UE mingħajr fruntieri interni, l-użu ta’ sett komuni ta’ kriterji meta ssir referenza għall-kumpaniji żgħar b’kapitalizzazzjoni medja jgħin biex ikun żgurat ambjent ekwu fit-trattament tal-intrapriżi madwar l-UE.

(6)

Hemm interazzjoni estensiva bejn il-miżuri nazzjonali u tal-Unjoni li jassistu lill-intrapriżi żgħar b’kapitalizzazzjoni medja, pereżempju b’rabta mal-Fondi Strutturali jew ir-riċerka. Għalhekk jeħtieġ ikunu evitati sitwazzjonijiet meta l-Unjoni tiffoka l-azzjoni tagħha fuq kategorija partikolari ta’ intrapriżi u l-Istati Membri fuq kategorija oħra. Jeħtieġ ukoll jiġi rakkomandat l-użu ta’ definizzjoni komuni mill-Kummissjoni, mill-Istati Membri, mill-Bank Ewropew tal-Investiment (BEI) u mill-Fond Ewropew tal-Investiment (FEI) biex jissaħħu l-koerenza u l-effettività tal-politiki maħsuba għall-intrapriżi żgħar b’kapitalizzazzjoni medja. L-użu ta’ definizzjoni komuni hemm bżonnu wkoll biex konsegwentement jittaffew ir-riskji potenzjali ta’ distorsjoni tal-kompetizzjoni.

(7)

L-Artikolu 2, il-punt (103e) tar-Regolament tal-Kummissjoni (UE) Nru 651/2014 (9) u l-Linji Gwida tal-Kummissjoni dwar l-għajnuna mill-Istat għall-promozzjoni ta’ investimenti tal-finanzjament tar-riskju (10) diġà fihom definizzjoni ta’ intrapriżi żgħar b’kapitalizzazzjoni medja. Hu meqjus importanti li wieħed jibni fuq l-esperjenza u l-għarfien espert miksuba b’dan il-mod hekk kif tissokta l-integrazzjoni tal-appoġġ lil dan is-settur speċifiku ta’ intrapriżi. Madankollu, fil-kuntest ekonomiku attwali, biex tkun takkumpanja aħjar it-tkabbir tal-intrapriżi u tkopri numru akbar ta’ kumpaniji, id-definizzjoni jenħtieġ li tkun tinkludi wkoll lill-intrapriżi li huma tliet darbiet akbar mill-SMEs (11).

(8)

L-enfasi fuq l-intrapriżi żgħar b’kapitalizzazzjoni medja tqieset ġustifikata għax il-valutazzjoni tal-impatt tal-2014 dwar il-Komunikazzjoni tal-Kummissjoni “Linji gwida dwar l-għajnuna mill-Istat għall-promozzjoni ta’ investimenti ta’ finanzjament ta’ riskju” (12) kienet identifikat id-“diskrepanza fil-finanzjament” bħala falliment tas-suq li jaffettwa mhux biss lill-SMEs fl-istadji bikrija u tal-bidu tagħhom iżda anki waqt l-istadji tal-espansjoni u tat-tkabbir tagħhom aktar tard. Ir-rapport iċċara li f’xi każijiet, il-kumpaniji żgħar b’kapitalizzazzjoni medja jistgħu jiffaċċjaw l-istess falliment tas-suq bħall-SMEs, meta jkun għadhom fl-istadju tat-tkabbir tagħhom.

(9)

Biex l-intrapriżi jkunu jistgħu jespandu bla xkiel mis-segment tal-SMEs lejn is-segment tal-kumpaniji żgħar b’kapitalizzazzjoni medja, hu importanti li d-definizzjonijiet ta’ SME u tal-kumpanija żgħira b’kapitalizzazzjoni medja jkunu msejsa fuq l-istess prinċipji u ma jkunx hemm trikkib bejn iż-żewġ definizzjonijiet. Li jiġi stabbilit x’jikkostitwixxi kumpaniji żgħar b’kapitalizzazzjoni medja hu meħtieġ ukoll biex tkun żgurata l-konsistenza fil-politiki kollha u tiġi ffaċilitata t-tranżizzjoni għall-kumpaniji li joħorġu mid-definizzjoni ta’ SME.

(10)

F’konformità mal-Artikoli 54, 101 u 102 tat-TFUE, intrapriża hi kwalunkwe entità, irrispettivament mill-forma ġuridika tagħha, involuta f’attivitajiet ekonomiċi, inkluż fi sħubijiet jew assoċjazzjonijiet involuti b’mod regolari f’attivitajiet ekonomiċi.

(11)

Il-kriterju tal-għadd ta’ persunal (il-“kriterju tal-għadd tal-persunal”) jitqies bħala l-aktar wieħed importanti u għandu jiġi osservat bħala l-kriterju ewlieni. Madankollu, jeħtieġ ukoll jiddaħħlu kriterji finanzjarji kumplimentari biex mid-definizzjoni jiġu esklużi l-intrapriżi bi skala finanzjarja eċċezzjonalment għolja ta’ operazzjonijiet, imkejla skont il-fatturat tagħhom, u ta’ assi eċċezzjonalment għoljin, imkejla mill-karti tal-bilanċ tagħhom. Mhuwiex mixtieq li l-fatturat jintuża bħala l-uniku kriterju finanzjarju, u dan partikolarment għax l-intrapriżi fis-settur tan-negozju u d-distribuzzjoni, min-natura tal-attivitajiet tagħhom, ikollhom ċifri tal-fatturat akbar miċ-ċifri tas-settur tal-manifattura. Għalhekk, il-kriterju tal-fatturat għandu jiġi kkombinat mat-total tal-karta tal-bilanċ, kriterju li jirrifletti l-ġid ġenerali ta’ negozju, u intrapriża għandha tiġi eskluża mid-definizzjoni ta’ kumpanija żgħira b’kapitalizzazzjoni medja biss jekk il-fatturat tagħha u anki l-karta tal-bilanċ tagħha jkunu jaqbżu l-limiti massimi.

(12)

Il-limiti finanzjarji massimi u l-limiti massimi tal-persunal jeħtieġ li jkunu jirrappreżentaw limiti massimi. L-Istati Membri, il-BEI u l-FEI jistgħu jiffissaw limiti massimi aktar baxxi mil-limiti massimi tal-Unjoni stabbiliti fil-punt 2 tal-Anness, jekk ikunu jixtiequ jidderieġu l-miżuri tagħhom lejn segment speċifiku ta’ intrapriżi żgħar b’kapitalizzazzjoni medja. Fl-interess tas-simplifikazzjoni amministrattiva, l-Istati Membri, il-BEI u l-FEI jistgħu jużaw l-għadd tal-persunal bħala l-uniku kriterju biex jimplimentaw il-politiki tagħhom, kif xieraq, u mingħajr preġudizzju għar-regoli tal-liġi tal-Unjoni dwar il-kompetizzjoni u l-għajnuna mill-Istat.

(13)

Biex jinkiseb għarfien aħjar dwar il-pożizzjoni ekonomika reali tal-intrapriżi żgħar b’kapitalizzazzjoni medja u biex jitneħħew minn din il-kategorija l-gruppi ta’ intrapriżi li s-saħħa ekonomika tagħhom tista’ taqbeż lil dik tal-intrapriżi żgħar b’kapitalizzazzjoni medja ġenwini, għandha ssir distinzjoni bejn id-diversi tipi ta’ intrapriżi, skont kemm ikunu awtonomi, jekk ikollhomx parteċipazzjonijiet li ma jinvolvux pożizzjoni ta’ kontroll (intrapriżi sħab), jew jekk ikunux assoċjati ma’ intrapriżi oħra. Il-limitu stabbilit fir-Rakkomandazzjoni 2003/361/KE, ta’ parteċipazzjoni ta’ 25% li inqas minnu intrapriża trid titqies awtonoma, għandu jkun japplika wkoll għad-definizzjoni ta’ intrapriżi żgħar b’kapitalizzazzjoni medja.

(14)

Biex jiġu ffaċilitati l-ħruġ tal-intrapriżi mis-segment tal-SMEs, il-finanzjament tal-ekwità tal-intrapriżi żgħar b’kapitalizzazzjoni medja, u l-iżvilupp rurali u lokali, l-intrapriżi għandhom jitqiesu awtonomi anki jekk ikollhom parteċipazzjoni ta’ 25% jew aktar minn ċerti kategoriji ta’ investituri li għandhom rwol pożittiv fil-finanzjament u l-ħolqien tan-negozju. Dan għandu japplika wkoll għall-investimenti sa EUR 5 000 000 mill-hekk imsejħa “business angels” (individwi jew gruppi ta’ individwi li jkollhom negozju regolari fl-investiment tal-kapital tar-riskju) minħabba l-esperjenza maniġerjali tan-negozju, il-ħiliet, u l-kuntatti li jġibu magħhom għall-intraprenditur meta mqabbla ma’ investituri oħra tal-kapital tar-riskju. L-investiment tagħhom fil-kapital tal-ekwità jikkumplimenta wkoll l-attività tal-investituri tal-kapital tar-riskju.

(15)

Biex titħares l-abbiltà tal-intrapriżi innovattivi li jiksbu finanzjamenti mingħand fondi tal-investiment alternattivi, bħal fondi tal-kapital tar-riskju jew fondi tal-ekwità privati, biex jiffinanzjaw l-operazzjonijiet jew it-tkabbir tagħhom, dawn l-entitajiet jenħtieġ li ma jkunux jikkwalifikaw bħala intrapriżi assoċjati għall-finijiet tal-kalkolu tal-għadd tal-persunal u tal-limiti massimi finanzjarji stabbiliti f’din ir-Rakkomandazzjoni. Biex jitqiesu l-prattiki attwali tas-suq fejn jidħol l-investiment fl-intrapriżi innovattivi b’fondi tal-kapital tar-riskju jew b’fondi tal-ekwità privati, jixraq jiġi speċifikat li meta l-intrapriżi u l-fond tal-investiment alternattiv, u l-meniġer tiegħu jkunu jżommu rekords kontabilistiċi separati u meta l-fond tal-investiment alternattiv ikollu strateġija tal-investiment definita minn qabel biex joħroġ mill-intrapriża, inkluż billi jirrealizza l-valur tiegħu bil-bejgħ tal-intrapriża jew b’mezzi oħra, dawn l-entitajiet jenħtieġ li ma jkunux jikkwalifikaw bħala intrapriżi assoċjati.

(16)

Biex jissimplifikaw l-affari, l-Istati Membri u l-intrapriżi għandhom jużaw il-kundizzjonijiet stabbiliti fl-Artikolu 22 tad-Direttiva 2013/34/UE tal-Parlament Ewropew u tal-Kunsill (13) meta jiddefinixxu l-intrapriżi assoċjati, sa fejn dawk il-kundizzjonijiet ikunu adatatti għall-finijiet ta’ din ir-Rakkomandazzjoni. Biex jiġi inċentivat l-investiment tal-ekwità fil-kumpaniji żgħar b’kapitalizzazzjoni medja, għandu jkun hemm preżunzjoni ta’ nuqqas ta’ influwenza dominanti fuq l-intrapriża inkwistjoni għal ċerti tipi ta’ investituri, jiġifieri li dawn ma jinvolvux lilhom infushom direttament jew indirettament fit-tmexxija tan-negozju, f’konformità mad-dispożizzjonijiet skont l-Artikolu 2(15) tad-Direttiva 2013/34/UE.

(17)

Għandhom jitqiesu wkoll, meta rilevanti, ir-relazzjonijiet bejn l-intrapriżi li jgħaddu tramite l-persuni fiżiċi, biex ikun żgurat li l-vantaġġi akkumulanti għall-kumpaniji żgħar b’kapitalizzazzjoni medja minn regoli jew miżuri differenti, ikunu ta’ benefiċċju biss għal dawk l-intrapriżi li ġenwinament jeħtiġuhom. Biex l-eżami ta’ dawk is-sitwazzjonijiet ikun limitat għall-minimu possibbli, l-eżami ta’ dawn ir-relazzjonijiet għandu jkun ristrett għas-suq rilevanti jew għas-swieq qrib – issir referenza għall-Avviż tal-Kummissjoni dwar id-definizzjoni tas-suq rilevanti għall-finijiet tal-liġi tal-kompetizzjoni tal-Komunità (14).

(18)

Biex ikunu evitati distinzjonijiet arbitrarji bejn korpi pubbliċi differenti ta’ Stat Membru, u minħabba l-bżonn taċ-ċertezza legali, hemm bżonn il-konferma li intrapriża b’25% jew aktar tal-kapital jew tad-drittijiet tal-vot tagħha kkontrollati minn korp pubbliku ma tkunx intrapriża żgħira b’kapitalizzazzjoni medja.

(19)

Biex jittaffa l-piż amministrattiv minn fuq l-intrapriżi, u jiġi ssimplifikat u jitħaffef it-trattament amministrattiv ta’ każijiet li jeħtieġu status ta’ intrapriża żgħira b’kapitalizzazzjoni medja, l-intrapriżi għandhom jitħallew jagħmlu dikjarazzjonijiet solenni li jiċċertifikaw uħud mill-karatteristiċi tagħhom.

(20)

Jeħtieġ tiġi stabbilita fid-dettall il-kompożizzjoni tal-għadd tal-persunal biex intrapriża titqies bħala intrapriża żgħira b’kapitalizzazzjoni medja. Biex jiġi promoss l-iżvilupp tat-taħriġ vokazzjonali, meta jkun qed jiġi kkalkulat l-għadd tal-persunal jeħtieġ jiġu injorati l-apprendisti u l-istudenti b’kuntratt tat-taħriġ vokazzjonali. Bl-istess mod, meta jkun qed jiġi kkalkulat l-għadd tal-persunal m’għandhomx jingħaddu l-perjodi tal-liv tal-maternità jew tal-ġenituri.

(21)

Id-diversi tipi ta’ intrapriżi, sew awtonomi, sħab jew assoċjati, definiti skont ir-relazzjoni tagħhom jew l-involviment tagħhom f’intrapriżi oħra, jikkorrispondu għal gradi ta’ integrazzjoni oġġettivament differenti. Għaldaqstant jixraq jiġi rrakkomandat li fil-kalkolu tal-ammonti li jirrappreżentaw l-attivitajiet u s-saħħa ekonomika tagħhom, jintużaw proċeduri distinti għal kull wieħed minn dawk it-tipi ta’ intrapriża.

(22)

Biex ikun żgurat li l-Kummissjoni żżomm rekord tal-użu tad-definizzjoni ta’ intrapriżi żgħar b’kapitalizzazzjoni medja prevista f’din ir-Rakkomandazzjoni jew referenza għal dik id-definizzjoni, l-Istati Membri, il-BEI u l-FEI għandhom jintalbu jinfurmaw lill-Kummissjoni dwar dan l-użu jew ir-referenza.

(23)

Biex il-Kummissjoni tiġġenera statistika li tikkunsidra din id-definizzjoni, jeħtieġ tinġabar informazzjoni dwar il-kriterji addizzjonali tad-daqs (il-fatturat, it-total fil-karta tal-bilanċ). Biex jevitaw stħarriġiet addizzjonali u jillimitaw il-piż fuq l-intrapriżi, l-awtoritajiet nazzjonali tal-istatistika għandhom jiksbu aċċess sostenibbli għal sorsi amministrattivi rilevanti fl-Istati Membri,